Yitso 4
Yesu Kristo—Samfee ni Akɛgbeleɔ Nyɔŋmɔ he Nilee Naa
1, 2. Je lɛŋ jamɔi lɛ kɛ samfee ni kɛ mɔ yaa Nyɔŋmɔ nilee he lɛ etsu nii yɛ gbɛ ni ejaaa nɔ yɛ mɛɛ gbɛ nɔ?
ODAMƆ oshinaa naa ni ootao osamfei amli. Fɛ̃i yɛ ni duŋ ewo, ni ooye oyai ni obote mli—shi samfee lɛ nyɛɛɛ agbele shinaa lɛ. Etamɔ no pɛpɛɛpɛ, ni kɛlɛ enyɛɛɛ egbele. Kwɛ naagba ni enɛ ji! Okwɛɔ osamfee lɛ ekoŋŋ. Ani shinaa lɛ naa nɔ̃ lɛ okɛgbeleɔ lɛ? Ani mɔ ko efite samfee lɛ?
2 Enɛ ji mfoniri ko ni ja jogbaŋŋ ni tsɔɔ bɔ ni je nɛŋ jamɔ mli yiŋfutumɔ lɛ efee Nyɔŋmɔ he nilee. Nɔ ni ejɛ mli eba ji akɛ, mɛi pii kɛ samfee—Yesu Kristo—ni gbeleɔ eshishinumɔ naa kɛhaa wɔ lɛ etsu nii yɛ gbɛ ni ejaaa nɔ. Jamɔi komɛi ejie samfee lɛ, amɛku amɛhiɛ amɛshwie Yesu nɔ kwraa. Mɛi krokomɛi hu etsɔmɔ Yesu nitsumɔ lɛ, ni amɛjaa lɛ akɛ Nyɔŋmɔ Ofe. Yɛ fɛɛ mli lɛ, kɛ wɔbɛ gbɔmɔ titri nɛɛ, Yesu Kristo, he anɔkwa nilee lɛ, belɛ aŋa Nyɔŋmɔ he nilee lɛ naa yɛ wɔ hiɛ.
3. Mɛni hewɔ abaanyɛ atsɛ Yesu akɛ samfee ni kɛ mɔ yaa Nyɔŋmɔ he nilee mli lɛ?
3 Ekolɛ obaakai akɛ Yesu kɛɛ: “Enɛ ji naanɔ wala lɛ, akɛ amɛaaná bo anɔkwa Nyɔŋmɔ kome lɛ, kɛ Yesu Kristo, mɔ ni otsu lɛ lɛ he nilee.” (Yohane 17:3, NW) Nakai ni Yesu wie lɛ etsɔɔɔ akɛ eepupuu ehe. Ŋmalɛi lɛ maa bɔ ni ehe hiaa ni ana Kristo he anɔkwa nilee nɔ mi. (Efesobii 4:13; Kolosebii 2:2; 2 Petro 1:8; 2:20) Bɔfo Petro wie akɛ: “Lɛ [Yesu Kristo] he odase gbalɔi lɛ fɛɛ yeɔ.” (Bɔfoi lɛ Asaji 10:43) Ni bɔfo Paulo ŋma akɛ: “Mɔ [Yesu] mli ni aŋɔ ŋaa kɛ nilee jwetrii lɛ fɛɛ atee yɛ lɛ.” (Kolosebii 2:3) Paulo po wie akɛ Yehowa shiwoi lɛ fɛɛ baa mli anɔkwale yɛ Yesu hewɔ. (2 Korintobii 1:20) No hewɔ lɛ Yesu Kristo ji samfee diɛŋtsɛ ni akɛgbeleɔ Nyɔŋmɔ he nilee lɛ naa. Esaaa akɛ nɔ ko nɔ ko tsɔɔ Yesu su kɛ baŋ lɛ, kɛ enitsumɔ yɛ Nyɔŋmɔ gbɛjianɔtoo mli lɛ he nilee ni wɔyɔɔ lɛ afa. Shi mɛni hewɔ Yesu sɛɛnyiɛlɔi lɛ buɔ lɛ akɛ mɔ titri yɛ Nyɔŋmɔ yiŋtoo mli lɛ?
SHIWOO MESIA LƐ
4, 5. Mɛɛ hiɛnɔkamɔi kɔɔ Mesia lɛ he, ni te Yesu kaselɔi lɛ susu ehe amɛha tɛŋŋ?
4 Kɛjɛ gbɔmɔ anɔkwafo Habel gbii lɛ amli tɔ̃ɔ, ni Nyɔŋmɔ tsuji kɛ hehiamɔ ekpa Seshi ni Yehowa Nyɔŋmɔ diɛŋtsɛ gba ehe sane efɔ shi lɛ gbɛ. (1 Mose 3:15; 4:1-8; Hebribii 11:4) Ajie lɛ kpo akɛ Seshi lɛ baatsu Nyɔŋmɔ yiŋtoo he nii akɛ Mesia, ni eshishi ji “Mɔ ni Afɔ Lɛ Mu.” “Ebaasɔo eshai anaa,” ni agba e-Maŋtsɛyeli lɛ mli anunyam lɛ he saji afɔ shi yɛ lalai lɛ amli. (Daniel 9:24-26; Lala 72:1-20) Namɔ Mesia nɛɛ baaji?
5 Susumɔ miishɛɛ ni obalanyo Yudanyo ni atsɛɔ lɛ Andrea na beni ebo Yesu ni jɛ Nazaret lɛ wiemɔi atoi lɛ he okwɛ. Andrea sha foi kɛtee enyɛmi nuu Simon Petro ŋɔɔ ni ekɛɛ lɛ akɛ: “Wɔna Mesia lɛ.” (Yohane 1:41) Yesu kaselɔi lɛ ayiŋ tsɔ akɛ lɛ ji Mesia ni awo shi yɛ ehe lɛ. (Mateo 16:16) Ni anɔkwa Kristofoi efee mɛi ni sumɔɔ akɛ amɛkɛ amɛwala aaasha afɔle kɛ hemɔkɛyeli ni tsɔɔ akɛ Yesu ji Mesia, loo Kristo ni agba ehe sane afɔ shi lɛ lɛlɛŋ. Mɛɛ odaseyelii amɛyɔɔ? Nyɛhaa wɔsusua odaseyelii sɔrɔtoi etɛ he.
ODASEYELI Ni TSƆƆ AKƐ YESU JI MESIA LƐ
6. (a) Mɛɛ wekukpaa baafɔ shiwoo Seshi lɛ, ni te wɔfeɔ tɛŋŋ wɔleɔ akɛ Yesu ba kɛtsɔ nakai wekukpaa lɛ mli? (b) Mɛni hewɔ enyɛŋ eba akɛ mɔ fɛɛ mɔ ni hiɔ shi yɛ 70 Ŋ.B. sɛɛ lɛ aaajie ehe kpo akɛ lɛ ji Mesia lɛ?
6 Yesu wekukpaa kɛ klɛŋklɛŋ nɔ ni aaadamɔ nɔ ayoo lɛ akɛ shiwoo Mesia lɛ haa. Yehowa ekɛɛ E-tsulɔ Abraham akɛ shiwoo Mesia lɛ baaba kɛjɛ eweku lɛ mli. Abraham binuu Isak, Isak binuu Yakob, kɛ Yakob binuu Yuda fɛɛ nine shɛ shiwoo ni tamɔ nakai nɔŋŋ nɔ. (1 Mose 22:18; 26:2-5; 28:12-15; 49:10) Amua Mesia lɛ wekukpaa lɛ naa yɛ sɛɛ mli afii ohai abɔ lɛ mli beni akɛɛ Maŋtsɛ David akɛ ewekukpaa lɛ mli Mɔ nɛɛ baatsɔ aba lɛ. (Lala 132:11; Yesaia 11:1, 10) Mateo kɛ Luka Sanekpakpa lɛ maa nɔ mi akɛ Yesu ba kɛtsɔ nakai wekukpaa lɛ mli. (Mateo 1:1-16; Luka 3:23-38) Eyɛ mli akɛ Yesu yɛ henyɛlɔi pii ni sumɔɔɔ esane kwraa moŋ, shi amɛteŋ mɔ ko mɔ ko ejeee ewekukpaa ni awie he babaoo lɛ he ŋwane. (Mateo 21:9, 15) No hewɔ lɛ, eyɛ faŋŋ akɛ, anyɛŋ aje ewekukpaa nɛɛ he ŋwane. Shi, akpata Yudafoi aweku he saji ni aŋmala ashwie shi lɛ hiɛ beni Romabii lɛ kpata Yerusalem hiɛ yɛ 70 Ŋ.B. Yɛ sɛɛ mli lɛ, mɔ ko mɔ ko nyɛɛɛ atsɔɔ akɛ lɛ ji shiwoo Mesia lɛ.
7. (a) Mɛni ji odaseyeli ni ji enyɔ ni tsɔɔ akɛ Yesu ji Mesia lɛ? (b) Mika 5:1 ba mli yɛ Yesu he yɛ mɛɛ gbɛ nɔ?
7 Gbalɛ mlibaa ji odaseyeli ni ji enyɔ. Hebri Ŋmalɛi nyɔŋmai abɔ tsɔɔ Mesia lɛ shihilɛ gbɛ lɛ yɛ gbɛi sɔrɔtoi anɔ. Yɛ afii ohai kpaanyɔ D.Ŋ.B. lɛ, gbalɔ Mika gba fɔ shi akɛ abaafɔ nɛkɛ nɔyelɔ kpeteŋkpele nɛɛ yɛ Betlehem maŋ ni abuuu lɛ lɛ mli. Atsɛɔ maji enyɔ gbɛi yɛ Israel akɛ Betlehem, shi nɛkɛ gbalɛ nɛɛ tsɔɔ emli nɔ ni ji: Betlehem Efrata, he ni afɔ Maŋtsɛ David yɛ lɛ. (Mika 5:1) Yesu fɔlɔi, Yosef kɛ Maria, hi Nazaret, Betlehem kooyigbɛ aaafee kilomitai 150. Shi beni Maria hiɛ musu lɛ, Roma nɔyelɔ Kaisare Augusto fa ni gbɔmɛi lɛ fɛɛ ayaŋma amɛ gbɛi yɛ maji ni amɛjɛ mli lɛ amli.a No hewɔ lɛ ehe bahia ni Yosef kɛ eŋa ni hiɛ hɔ lɛ aya Betlehem, he ni ayafɔ Yesu yɛ lɛ.—Luka 2:1-7.
8. (a) Mɛɛ be ni mɛni ni ba kɛ “otsii” 69 lɛ je shishi? (b) “Otsii” 69 lɛ sɛɛkɛlɛ feɔ enyiɛ, ni mɛni ba beni amɛba naagbee lɛ?
8 Gbalɔ Daniel gba yɛ afii ohai ekpaa D.Ŋ.B. akɛ “Mesia ni ji Lumɔ lɛ” baapue beni áwo akpɔ akɛ aku sɛɛ ayasaa ni atswa Yerusalem ekoŋŋ lɛ sɛɛ “otsii” 69. (Daniel 9:24, 25) Nɛkɛ “otsii” nɛɛ eko fɛɛ eko kɛlɛ feɔ afii kpawo.b Taakɛ Biblia lɛ kɛ jeŋ yinɔsane tsɔɔ lɛ, akɛ famɔ ni tsɔɔ akɛ aku sɛɛ atswa Yerusalem ekoŋŋ lɛ ha yɛ 455 D.Ŋ.B. (Nehemia 2:1-8) No hewɔ lɛ afi 455 D.Ŋ.B. sɛɛ afii 483 (69 toi 7) dani Mesia lɛ baapue. Enɛ kɛ wɔ baa afi 29 Ŋ.B., afi diɛŋtsɛ mli ni Yehowa kɛ mumɔ krɔŋkrɔŋ fɔ Yesu mu lɛ. No hewɔ lɛ Yesu batsɔ “Kristo lɛ” (eshishi ji “Mɔ ni Afɔ Lɛ Mu”), loo Mesia.—Luka 3:15, 16, 21, 22.
9. (a) Lala 2:2 ba mli yɛ mɛɛ gbɛ nɔ? (b) Mɛɛ gbalɛi krokomɛi hu ba mli yɛ Yesu mli? (Kwɛmɔ tao lɛ.)
9 Shi, jeee mɔ fɛɛ mɔ kpɛlɛ Yesu nɔ akɛ shiwoo Mesia lɛ, ni Ŋmalɛi lɛ egba enɛ efɔ shi. Taakɛ aŋma yɛ Lala 2:2 lɛ, ajɛ ŋwɛi akɛ mumɔ tsirɛ Maŋtsɛ David ni egba akɛ: “Shikpɔŋ lɛ nɔ maŋtsɛmɛi lɛ ete shi edamɔ shi, ni lumɛi lɛ hu efee ekome amɛtee Yehowa kɛ mɔ ni efɔ lɛ mu lɛ yinɔ ajina.” Gbalɛ nɛɛ tsɔɔ akɛ jeŋmaji ni fe ekome mli hiɛnyiɛlɔi baafee ekome koni amɛtutua Mɔ ni Yehowa Efɔ Lɛ Mu, loo Mesia lɛ. Ni nakai ji bɔ ni eba mli. Yudafoi ajamɔ mli hiɛnyiɛlɔi lɛ, Maŋtsɛ Herode, kɛ Roma amralo Pontio Pilato fɛɛ na gbɛfaŋnɔ yɛ Yesu ni agbe lɛ lɛ mli. Tsutsu henyɛlɔi Herode kɛ Pilato batsɔmɔ nanemɛi waa kɛjɛ nakai be lɛ nɔ kɛyaa. (Mateo 27:1, 2; Luka 23:10-12; Bɔfoi lɛ Asaji 4:25-28) Kɛha odaseyeli lolo ni tsɔɔ akɛ Yesu ji Mesia lɛ, ofainɛ kwɛmɔ tao ni fata he ni eyitso ji “Mesia He Gbalɛi Komɛi ni Ekaaa” lɛ.
10. Mɛɛ gbɛi anɔ Yehowa ye odase akɛ Yesu ji Mɔ ni Afɔ Lɛ Mu ni awo shi yɛ ehe lɛ?
10 Yehowa Nyɔŋmɔ odaseyeli hu ji odaseyeli ni ji etɛ ni fiɔ Mesia ni Yesu ji lɛ sɛɛ. Yehowa tsu ŋwɛibɔfoi koni abaha gbɔmɛi ale akɛ Yesu ji shiwoo Mesia lɛ. (Luka 2:10-14) Yɛ anɔkwale mli lɛ, yɛ Yesu shikpɔŋ nɔ shihilɛ mli lɛ, Yehowa diɛŋtsɛ wie kɛjɛ ŋwɛi, ni etsɔɔ bɔ ni ekpɛlɛ Yesu nɔ eha. (Mateo 3:16, 17; 17:1-5) Yehowa Nyɔŋmɔ ha Yesu hewalɛ koni ekɛfee naakpɛɛ nii. Nɛkɛ naakpɛɛ nibii nɛɛ eko fɛɛ eko ji ŋwɛi odaseyeli ni tsɔɔ akɛ Yesu ji Mesia lɛ, ejaakɛ Nyɔŋmɔ kɛ hewalɛ haŋ shishiulɔ ko koni efee naakpɛɛ nii. Yehowa kɛ emumɔ krɔŋkrɔŋ lɛ hu tsu nii koni ekanya Sanekpakpa lɛ mli saji lɛ aŋmalamɔ, no hewɔ lɛ odaseyeli ni tsɔɔ akɛ Yesu ji Mesia lɛ bafee Biblia lɛ wolo ni atsɔɔ shishi ni aja waa fe fɛɛ yɛ yinɔsane mli lɛ fã.—Yohane 4:25, 26.
11. Te odaseyeli ni tsɔɔ akɛ Yesu ji Mesia lɛ falɛ yɔɔ ha tɛŋŋ?
11 Yɛ fɛɛ mli lɛ, nɔ ni fata odaseyelii sɔrɔtoi nɛɛ ahe ji anɔkwa saji ohai abɔ ni yɔseɔ Yesu akɛ shiwoo Mesia lɛ. Eyɛ faŋŋ akɛ, anɔkwa Kristofoi esusu ehe akɛ ‘mɔ ni gbalɔi lɛ fɛɛ yeɔ ehe odase’ kɛ samfee ni gbeleɔ Nyɔŋmɔ he nilee lɛ naa yɛ gbɛ ni ja nɔ. (Bɔfoi lɛ Asaji 10:43) Shi babaoo yɛ ni abaakase yɛ Yesu Kristo he fe anɔkwale ni eji akɛ lɛ ji Mesia lɛ. Nɛgbɛ ejɛ? Te etamɔ eha tɛŋŋ?
YESU SHIHILƐ DANI EBATSƆ ADESA
12, 13. (a) Te wɔfeɔ tɛŋŋ wɔleɔ akɛ Yesu ehi shi yɛ ŋwɛi dani eba shikpɔŋ lɛ nɔ? (b) Namɔ ji “Wiemɔ” lɛ, ni mɛni efee dani ebatsɔ adesa?
12 Abaanyɛ aja Yesu shihilɛ be lɛ mli etɛ. Klɛŋklɛŋ nɔ lɛ je shishi jeeŋmɔ dani afɔ lɛ yɛ shikpɔŋ nɔ. Mika 5:1 kɛɛ akɛ Mesia lɛ shishijee “jɛ blema beebe kɛjɛ naanɔ gbii lɛ amli.” Ni Yesu diɛŋtsɛ ekɛɛ akɛ ejɛ “ŋwɛi.” (Yohane 8:23; 16:28) Be enyiɛ ekɛhi ŋwɛi dani eba shikpɔŋ nɔ?
13 Atsɛ Yesu akɛ Nyɔŋmɔ “Bi koome,” ejaakɛ Yehowa bɔ lɛ tɛɛ. (Yohane 3:16) Akɛ “bɔɔnii fɛɛ ateŋ kromɔbi” lɛ, Nyɔŋmɔ kɛ Yesu tsu nii ni ekɛbɔ nibii krokomɛi fɛɛ. (Kolosebii 1:15; Kpojiemɔ 3:14) Yohane 1:1 kɛɔ akɛ “shishijee lɛŋ lɛ,” “Wiemɔ lɛ” (Yesu shihilɛ dani ebatsɔ gbɔmɔ) kɛ Nyɔŋmɔ yɔɔ. No hewɔ lɛ Wiemɔ lɛ kɛ Yehowa yɔɔ beni abɔ “ŋwɛi kɛ shikpɔŋ” lɛ. Nyɔŋmɔ ji mɔ ni kɛ Wiemɔ lɛ wieɔ beni E-kɛɛ: “Ha wɔbɔ gbɔmɔ yɛ wɔsubaŋ nɔ.” (1 Mose 1:1, 26) Nakai nɔŋŋ hu, Wiemɔ lɛ baanyɛ afee Nyɔŋmɔ “nitsulɔ ŋaalɔ ko” ni esumɔɔ lɛ taakɛ atsɔɔ mli yɛ Abɛi 8:22-31 (NW) akɛ nilee ni ejie ehe kpo yɛ gbɔmɔ su mli, ni tsuɔ nii yɛ Yehowa masɛi beni efeɔ nibii fɛɛ lɛ. Beni Yehowa kɛ lɛ ba shihilɛ mli sɛɛ lɛ, Wiemɔ lɛ kɛ Nyɔŋmɔ hi ŋwɛi afii babaoo ni aleee dani ebatsɔ gbɔmɔ yɛ shikpɔŋ nɔ.
14. Mɛni hewɔ atsɛɔ Yesu akɛ “Nyɔŋmɔ ni anaaa lɛ lɛ subaŋ” lɛ?
14 Belɛ esaaa akɛ efeɔ wɔ naakpɛɛ akɛ Kolosebii 1:15 tsɛɔ Yesu akɛ “Nyɔŋmɔ ni anaaa lɛ subaŋ” lɛ! Akɛni ekɛ lɛ bɔ gbagbalii yɛ yinɔi babaoo mli hewɔ lɛ Bi toibolɔ lɛ batsɔ tamɔ e-Tsɛ, Yehowa, pɛpɛɛpɛ. Enɛ hu ji yiŋtoo kroko hewɔ ni Yesu ji samfee ni akɛgbeleɔ Nyɔŋmɔ he nilee ni haa wala lɛ naa lɛ. Nɔ fɛɛ nɔ ni Yesu fee beni eyɔɔ shikpɔŋ nɔ lɛ pɛpɛɛpɛ Yehowa baafee. No hewɔ lɛ, ni aaale Yesu hu lɛ tsɔɔ Yehowa he nilee ni wɔyɔɔ lɛ ni wɔɔha efa. (Yohane 8:28; 14:8-10) Belɛ eyɛ faŋŋ akɛ, ehe miihia ni wɔkase Yesu Kristo he nii waa.
YESU SHIHILƐ GBƐ YƐ SHIKPƆŊ NƆ
15. Te fee tɛŋŋ ni abafɔ Yesu akɛ abifao ni yeɔ emuu?
15 Yesu shihilɛ be ni ji enyɔ lɛ ji biɛ yɛ shikpɔŋ nɛɛ nɔ. Ejɛ esuɔmɔ mli ekpɛlɛ nɔ ni Nyɔŋmɔ jie ewala kɛjɛ ŋwɛi kɛbawo Yudayoo fro ni atsɛɔ lɛ Maria lɛ musuŋ. Yehowa mumɔ krɔŋkrɔŋ ni yɔɔ hewalɛ waa lɛ ‘ha’ Maria nɔ, ni eha eŋɔ hɔ, ni yɛ naagbee lɛ efɔ bi ni yeɔ emuu. (Luka 1:34, 35) Yesu naaa emuu ni ayeee, ejaakɛ ewala jɛ Jɛɛhe ni yeɔ emuu. Atsɔse lɛ yɛ shia ni baa shi mli akɛ mɔ ni tsoŋaalɔ, Yosef, eŋɔ lɛ efee ebinuu, ni lɛ ji klɛŋklɛŋ bi yɛ bii pii ni yɔɔ weku lɛ mli lɛ ateŋ.—Yesaia 7:14; Mateo 1:22, 23; Marko 6:3.
16, 17. (a) Nɛgbɛ Yesu na hewalɛ kɛjɛ ni ekɛfee naakpɛɛ nii lɛ, ni mɛni ji amɛteŋ ekomɛi? (b) Mɛni ji sui komɛi ni Yesu jie lɛ kpo?
16 Bɔ ni Yesu etu ehe eha Yehowa Nyɔŋmɔ momo kwraa lɛ je kpo beni eye afii 12. (Luka 2:41-49) Beni eda sɛɛ ni ekɛ ehe wo esɔɔmɔ lɛ mli beni eye afii 30 lɛ, Yesu jie bɔ ni esumɔɔ enanemɛi adesai lɛ kpo waa. Beni Nyɔŋmɔ mumɔ krɔŋkrɔŋ lɛ wo lɛ hewalɛ ni efee naakpɛɛ nii lɛ, ekɛ musuŋtsɔlɛ tsa mɛi ni he yeɔ, obubuafoi, kpajelɔi, shwilafoi, mumuii, kɛ kpitiyelɔi. (Mateo 8:2-4; 15:30) Yesu lɛ gbɔmɛi akpei abɔ ni hɔmɔ yeɔ amɛ lɛ. (Mateo 15:35-38) Eha ahum ni woɔ enanemɛi ashweshweeshwe shihilɛ he gbeyei lɛ fee diŋŋ. (Marko 4:37-39) Yɛ anɔkwale mli lɛ, etee gbohii ashi po. (Yohane 11:43, 44) Nɛkɛ naakpɛɛ nibii nɛɛ ji yinɔsane mli anɔkwalei ni ama nɔ mi. Yesu henyɛlɔi lɛ po kpɛlɛ nɔ akɛ ‘efee naakpɛɛ nibii pii.’—Yohane 11:47, 48.
17 Yesu fa gbɛ kɛtsɔ emaŋ shikpɔŋ lɛ nɔ, etsɔɔ gbɔmɛi Nyɔŋmɔ Maŋtsɛyeli lɛ he nii. (Mateo 4:17) Agbɛnɛ eto tsuishitoo kɛ sane shishinumɔ he nɔkwɛmɔ nɔ ni nɔ bɛ efɔ shi. Beni ekaselɔi lɛ je esɛɛ po lɛ, ekɛ musuŋtsɔlɛ wie akɛ: “Mumɔ lɛ miikpɛlɛ moŋ; shi heloo lɛ he waaa.” (Marko 14:37, 38) Ni kɛlɛ, Yesu yɛ ekãa ni ewieɔ faŋŋ etsɔɔ mɛi ni gbeɔ anɔkwale lɛ he guɔ ni amɛwaa mɛi ni bɛ yelikɛbuamɔ lɛ ayi lɛ. (Mateo 23:27-33) Nɔ ni fe fɛɛ lɛ, ekase e-Tsɛ lɛ suɔmɔ nɔkwɛmɔ nɔ lɛ yɛ emuuyeli mli. Yesu miisumɔ ni egbo po koni adesai ni yeee emuu lɛ ana wɔsɛɛ shihilɛ he hiɛnɔkamɔ. Ebɛ naakpɛɛ mɔ akɛ, wɔbaanyɛ wɔwie Yesu he jogbaŋŋ akɛ Nyɔŋmɔ he nilee lɛ naa samfee! Hɛɛ, lɛ ji samfee ni hiɛ ka! Shi mɛni hewɔ wɔkɛɔ akɛ samfee ni hiɛ ka lɛ? Enɛ kɛ wɔ baa eshihilɛ gbɛ ni ji etɛ lɛ nɔ.
YESU ŊMƐNƐ
18. Te esa akɛ wɔsusu bɔ ni Yesu Kristo ji ŋmɛnɛ lɛ he wɔha tɛŋŋ?
18 Eyɛ mli akɛ Biblia lɛ bɔɔ Yesu gbele he amaniɛ moŋ, shi amrɔ nɛɛ ehiɛ ka! Yɛ anɔkwale mli lɛ, mɛi ohai abɔ ni hi shi yɛ Ŋ.B. klɛŋklɛŋ afii oha lɛ mli lɛ kɛ amɛhiŋmɛii na anɔkwa sane nɛɛ akɛ atee lɛ shi. (1 Korintobii 15:3-8) Taakɛ agba afɔ shi lɛ, yɛ no sɛɛ lɛ eyata shi yɛ e-Tsɛ lɛ ninejurɔ nɔ ni emɛ koni enine ashɛ maŋtsɛyeli hewalɛ nɔ yɛ ŋwɛi. (Lala 110:1; Hebribii 10:12, 13) No hewɔ lɛ te esa akɛ wɔsusu Yesu he ŋmɛnɛ wɔha tɛŋŋ? Ani esa akɛ wɔsusu ehe akɛ abifao ni ka kooloi aniyenii anɔ̃ mli ni nyɛɛɛ nɔ ko afee? Aloo akɛ gbɔmɔ ni miipiŋ ni aagbe lɛ? Dabi. Eji Maŋtsɛ hewalɔ ni miiye lumɔ! Ni agbɛnɛ etsɛŋ kwraa, ebaajie enɔyeli lɛ kpo yɛ wɔ shikpɔŋ ni ehao nɛɛ nɔ.
19. Mɛni Yesu baafee yɛ wɔsɛɛ be ni ebɛŋkɛ lɛ mli?
19 Atsɔɔ bɔ ni Maŋtsɛ Yesu Kristo ji lɛ mli faŋŋ yɛ Kpojiemɔ 19:11-15 akɛ eeba kɛ hewalɛ kpeteŋkpele koni ebakpata efɔŋ feelɔi ahiɛ. Kwɛ bɔ ni ŋwɛi Nɔyelɔ ni yɔɔ suɔmɔ nɛɛ he tswaa shi akɛ eeeha piŋmɔi fɛɛ ni baa adesai akpekpei anɔ ŋmɛnɛ lɛ aba naagbee! Ni ehe miitswa shi hu akɛ eeeye ebua mɛi ni bɔɔ mɔdɛŋ ni amɛkase nɔkwɛmɔ nɔ ni yeɔ emuu ni efee efɔ shi beni eyɔɔ shikpɔŋ nɔ lɛ. (1 Petro 2:21) Eesumɔ ni ebaa amɛyi kɛtsɔ “Nyɔŋmɔ Ofe lɛ gbi wulu lɛ nɔ ta,” ni afɔɔ lɛ tsɛmɔ akɛ Harmagedon, ni baa kɛ foi lɛ mli, koni amɛnyɛ amɛhi shi kɛya naanɔ yɛ shikpɔŋ nɔ akɛ Nyɔŋmɔ ŋwɛi Maŋtsɛyeli lɛ shishibii.—Kpojiemɔ 7:9, 14; 16:14, 16.
20. Mɛni Yesu baafee aha adesai yɛ e-Afii Akpe Nɔyeli lɛ mli?
20 Yɛ Yesu Afii Akpe Nɔyeli ni toiŋjɔlɛ yɔɔ mli ni agba afɔ shi lɛ mli lɛ, ebaafee naakpɛɛ nii eha adesai fɛɛ. (Yesaia 9:6, 7; 11:1-10; Kpojiemɔ 20:6) Yesu baatsa helai fɛɛ ni ekɛ gbele baaba naagbee. Ebaatee akpekpei toi akpei abɔ shi koni amɛ hu amɛbana hegbɛ ni amɛhi shi kɛya naanɔ yɛ shikpɔŋ nɔ. (Yohane 5:28, 29) Obaana he miishɛɛ akɛ oookase babaoo yɛ e-Mesia Maŋtsɛyeli lɛ he yɛ yitso ko ni baaba yɛ sɛɛ mli lɛ mli. Na nɔmimaa yɛ enɛ he: Wɔnyɛŋ wɔfee bɔ ni wɔshihilɛi baaŋɔɔ waa aha yɛ Maŋtsɛyeli nɔyeli lɛ shishi lɛ po he mfoniri. Kwɛ bɔ ni ehe hiaa akɛ wɔɔle Yesu Kristo jogbaŋŋ! Hɛɛ, ehe miihia ni wɔhiɛ akakpa Yesu, ni ji samfee ni hiɛ ka ni gbeleɔ Nyɔŋmɔ he nilee ni kɛ mɔ yaa naanɔ wala mli lɛ naa lɛ nɔ, ejaakɛ enɛ he miihia.
[Shishigbɛ niŋmai]
a Nɛkɛ gbɛi-ŋmaa nɛɛ ha Roma Maŋtsɛyeli lɛ hé too yɛ gbɔmɛi lɛ adɛŋ. No hewɔ lɛ, Augusto ye bua ni gbalɛ ko ni kɔɔ nɔyelɔ ko ni “aaaha oniatsulɔ ko abatsɔ maŋtsɛyeli lɛ anunyam lɛ mli kɛho” lɛ he lɛ ba mli ni jeee gbɛ eje efee. Nakai gbalɛ lɛ nɔŋŋ gba akɛ “aaakumɔ” “kpaŋmɔ lɛ lumɔ lɛ” loo Mesia lɛ, yɛ nɔyelɔ nɛɛ sɛɛyelɔ lɛ gbii lɛ amli. Agbe Yesu yɛ Augusto sɛɛyelɔ, ni ji Tiberio nɔyeli beaŋ.—Daniel 11:20-22.
b Blema Yudafoi lɛ susuɔ otsii ni ji afii ahe. Akɛ nɔkwɛmɔ nɔ lɛ, taakɛ bɔ ni gbii kpawo fɛɛ gbii kpawo ji Hejɔɔmɔ gbi lɛ, afi fɛɛ afi ni gbeɔ yi feɔ kpawo lɛ hu ji Hejɔɔmɔ afi.—2 Mose 20:8-11; 23:10, 11.
KAA ONILEE OKWƐ
Mɛɛ gbɛ nɔ Yesu wekukpaa lɛ kɛ odaseyeli haa akɛ lɛ ji Mesia lɛ?
Mɛni ji Mesia lɛ he gbalɛi komɛi ni ba mli yɛ Yesu mli?
Mɛɛ gbɛ nɔ Nyɔŋmɔ diɛŋtsɛ tsɔɔ tɛ̃ɛ akɛ Yesu ji Mɔ ni Efɔ Lɛ Mu lɛ?
Mɛni hewɔ Yesu ji samfee ni hiɛ ka ni kɛ mɔ yaa Nyɔŋmɔ he nilee mli?
[Akrabatsa ni yɔɔ baafa 37]
MESIA GBALƐI KOMƐI NI EKAAA
GBALƐ NƆ̃ NI TEE NƆ EMLIBAA
EMRA BE MLI SHIHILƐ
Yesaia 7:14 Obalayoo fro fɔ lɛ Mateo 1:18-23
Yeremia 31:15 Agbe abifabii yɛ efɔmɔ sɛɛ Mateo 2:16-18
ESƆƆMƆ NITSUMƆ
Yesaia 61:1, 2 Enitsumɔ ni jɛ Nyɔŋmɔ ŋɔɔ Luka 4:18-21
Yesaia 9:1, 2 Esɔɔmɔ ha gbɔmɛi na la Mateo 4:13-16
kpele
Lala 69:10 Efee ekãa kɛha Yehowa we Yohane 2:13-17
Yesaia 53:1 Aheee lɛ ayeee Yohane 12:37, 38
Zakaria 9:9; Ebote Yerusalem ni eta teji Mateo 21:1-9
Lala 118:26 bi nɔ; ajie eyi akɛ maŋtsɛ
ni baa yɛ Yehowa gbɛi amli
ESƐƐGBƐTSƆƆMƆ KƐ GBELE
Lala 41:10; 109:8 Bɔfo kome yeee anɔkwa; Bɔfoi lɛ Asaji 1:15-20
etsɔɔ Yesu sɛɛgbɛ ni
akɛ mɔ kroko ye enajiaŋ yɛ sɛɛ mli
Zakaria 11:12 Atsɔɔ esɛɛgbɛ ahe jwiɛtɛi Mateo 26:14, 15
kukuji 30
Lala 27:12 Atsɛ amale odasefoi Mateo 26:59-61
ashi lɛ
Lala 22:19 Afɔ etadei anɔ oshiki Yohane 19:23, 24
Yesaia 53:12 Abu lɛ afata eshafeelɔi ahe Mateo 27:38
Lala 22:8, 9 Ajɛ lɛ beni egboɔ Marko 15:29-32
Lala 69:22 Aha lɛ ashiŋ Marko 15:23, 36
Yesaia 53:5; Atsu lɛ nɔ̃ Yohane 19:34, 37
Yesaia 53:9 Afu lɛ kɛ niiatsɛmɛi Mateo 27:57-60
Lala 16:8-11, s.n. Atee lɛ shi beni efiteko Bɔfoi lɛ Asaji 2:25-32; 13:34-37
[Mfoniri ni yɔɔ baafa 35]
Nyɔŋmɔ ha Yesu hewalɛ koni etsa helatsɛmɛi