Yehowa Kpooo Tsui Ni Werɛ Eho Ehe
“Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpooŋ.”—LALA 51:19.
1. Te Yehowa buɔ ejalɔi ni feɔ esha ni hiɛdɔɔ yɔɔ mli shi amɛtsakeɔ amɛtsui loo amɛshwaa amɛhe lɛ tɛŋŋ?
YEHOWA baanyɛ ‘atsi gbɛ ni atsɔɔ nɔ kɛbaa eŋɔɔ lɛ naa tamɔ akɛ atatu tsiɔ nii ahiɛ, koni sɔlemɔ akatsɔ mli.’ (Yaafo 3:44) Shi eesumɔ ni ewebii aba eŋɔɔ. Kɛji akɛ ejalɔi lɛ ateŋ mɔ ko aaatɔ̃ tɔ̃mɔ ni mli wa po, shi eshwa ehe lɛ, wɔŋwɛi Tsɛ lɛ kaiɔ ekpakpa ni nakai mɔ lɛ efee lɛ. No hewɔ lɛ, bɔfo Paulo baanyɛ akɛɛ nanemɛi Kristofoi lɛ akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ, kɛ suɔmɔ deŋme ni nyɛgbo yɛ egbɛi lɛ ahewɔ” lɛ.—Hebribii 6:10.
2, 3. Mɛni esa akɛ Kristofoi onukpai lɛ asusu he beni amɛkɛ nanemɛi heyelilɔi ni amɛfee esha lɛ yeɔ lɛ?
2 Esa akɛ onukpai Kristofoi lɛ hu akai afii abɔ ni nanemɛi heyelilɔi kɛsɔmɔ Nyɔŋmɔ lɛ. Nɔ ni fata enɛ he ji sɔɔmɔ krɔŋkrɔŋ ni mɛi ni etsɔ gbɛ fɔŋ nɔ loo amɛtɔ̃ tɔmɔ ni hiɛdɔɔ yɔɔ mli ni amɛshwa amɛhe lɛ kɛha lɛ. Nɔkwɛlɔi Kristofoi taoɔ mɛi fɛɛ ni yɔɔ Nyɔŋmɔ asafoku lɛ mli lɛ amumɔŋ hilɛ-kɛhamɔ.—Galatabii 6: 1, 2.
3 Yehowa mɔbɔnalɛ he miihia efɔŋfeelɔ ni eshwa ehe loo etsake etsui lɛ. Ni kɛlɛ, babaoo he miihia. David wiemɔi ni yɔɔ Lala 51:12-21 lɛ feɔ enɛ faŋŋ.
Tsui ni He Tse He Miihia
4. Mɛni hewɔ David sɔle ebi tsui ní he tse kɛ mumɔ hee lɛ?
4 Kɛji akɛ Kristofonyo ko ni ejɔɔ ehe nɔ ebote mumɔŋ shihilɛ ni ehiii kwraa mli yɛ esha hewɔ lɛ, mɛni he baahia lɛ yɛ Yehowa mɔbɔnalɛ kɛ eshaifaa sɛɛ? David kpa fai akɛ: “Nyɔŋmɔ, bɔɔ tsui ni he tse oha mi, ni ofee mumɔ ni fiɔ shi ehee yɛ mimli.” (Lala 51:12) Eka shi faŋŋ akɛ David bi nii ni tamɔ nɛkɛ ejaakɛ eyɔse akɛ esha ni hiɛdɔɔ yɔɔ mli ni ebaanyɛ etsɔ ehe kɛya he lɛ yɛ etsui mli lolo. Ekolɛ wɔkɛ wɔhe woko esha ni tamɔ nɔ ni tsɔ David tsɔne yɛ Batsheba kɛ Uria he lɛ mli, shi Yehowa yelikɛbuamɔ he miihia wɔ koni wɔkwa wɔhe ni wɔɔŋmɛɛ wɔha kaa ni aaaha wɔkɛ wɔhe awo esha fɛɛ esha ni hiɛdɔɔ yɔɔ mli lɛ mli. Yɛ no gbɛfaŋ lɛ, ŋwɛi yelikɛbuamɔ he baahia wɔ diɛŋtsɛ koni wɔjie eshafeemɔ sui ni tamɔ hiɛjoomɔ kɛ hetsɛ—efɔŋfeemɔi ni tamɔ juu kɛ gbɔmɔgbee lɛ kɛjɛ wɔtsui mli.—Kolosebii 3: 5, 6; 1 Yohane 3:15.
5. (a) Akɛ aaana tsui ni he tse lɛ tsɔɔ mɛni? (b) Mɛni David taoɔ beni ebi mumɔ hee lɛ?
5 Yehowa miitao ni etsuji ana “tsui ni he tse,” ni ji, yiŋtoo loo jwɛŋmɔ ni he tse. Akɛni David yɔse akɛ ejieko hetsemɔ ni tamɔ nɛkɛ kpo hewɔ lɛ, esɔle koni Nyɔŋmɔ aha etsui mli atse ni ekɛ ŋwɛi taomɔ nii akpa gbee. Lalatsɛ lɛ miitao ni ena mumɔ, loo jwɛŋmɔŋ susumɔ hee ni ja hu. Mumɔ ni baaye abua lɛ ni enyɛ edamɔ kaa naa ni ekɛ ehe akpɛtɛ Yehowa mlai kɛ etaomɔ nii ahe kpɛŋŋ he miihia lɛ.
Mumɔ Krɔŋkrɔŋ He Miihia
6. Mɛni hewɔ David kpa fai akɛ Yehowa akajie mumɔ krɔŋkrɔŋ kɛmiijɛ enɔ lɛ?
6 Kɛji wɔnijiaŋ je wui yɛ wɔtɔmɔi loo nɔ fɔŋ feemɔi ahe lɛ, ekolɛ wɔbaanu he akɛ Nyɔŋmɔ miihe ashɛ wɔ afɔ ni ejie emumɔ loo enifeemɔ hewalɛ lɛ kɛjɛ wɔmli. David nu he nakai, ejaakɛ ekpa Yehowa fai akɛ: “Kaajie mi yɛ ohiɛ oshɛ ofɔ, ni kaaŋɔ omumɔ krɔŋkrɔŋ lɛ kɛmiijɛ mimli!” (Lala 51:13) David heshibalɔ ni yeɔ awerɛho lɛ nu he akɛ ehe eshai lɛ eha efee mɔ ni esaaa akɛ esɔmɔɔ Yehowa. Ni aaashɛ lɛ afɔ kɛaajɛ Yehowa hiɛ lɛ baatsɔɔ akɛ elaaje eduromɔ, miishɛjemɔ kɛ jɔɔmɔ. Kɛ aaasaa David ekoŋŋ yɛ mumɔŋ lɛ, belɛ Yehowa mumɔ krɔŋkrɔŋ lɛ he miihia lɛ. Kɛ enɛ yɛ enɔ lɛ, maŋtsɛ lɛ baanyɛ atsɔ sɔlemɔ nɔ atao ŋwɛi gbɛtsɔɔmɔ koni esa Yehowa hiɛ, ebaanyɛ etsi ehe kɛjɛ esha he, ni ebaanyɛ ekɛ nilee aye maŋtsɛ. Akɛni ele akɛ efee esha eshi mumɔ krɔŋkrɔŋ lɛ Halɔ hewɔ lɛ, David kpa fai yɛ gbɛ ni sa nɔ akɛ Yehowa akahe kɛmiijɛ edɛŋ.
7. Mɛni hewɔ esa akɛ wɔsɔle wɔbi mumɔ krɔŋkrɔŋ shi wɔkwɛ jogbaŋŋ hu ni wɔkafee lɛ nidɔɔ nii lɛ?
7 Ni wɔ hu? Esa akɛ wɔsɔle wɔbi mumɔ krɔŋkrɔŋ lɛ ni wɔkwɛ jogbaŋŋ ni wɔkafee lɛ nidɔɔ nii kɛtsɔ egbɛtsɔɔmɔ ni wɔdiŋ sɛɛ lɛ nɔ. (Luka 11:18; Efesobii 4:30) Kɛ jeee nakai lɛ, mumɔ lɛ baaje wɔdɛŋ, ni wɔnyɛŋ wɔjie eyibii ni Nyɔŋmɔ kɛhaa ni ji suɔmɔ, miishɛɛ, toiŋjɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ kɛ henɔyeli lɛ kpo. Yehowa Nyɔŋmɔ baaje gbɛ ajie emumɔ krɔŋkrɔŋ lɛ kɛjɛ wɔnɔ kɛ wɔtee nɔ wɔfee esha wɔshi lɛ ni wɔtsakeee wɔtsui.
Yiwalaheremɔ He Nyamɔ
8. Kɛ wɔfee esha shi wɔmiisumɔ ni wɔna yiwalaheremɔ he nyamɔ lɛ, mɛni ehe baahia ni wɔna?
8 Eshafeelɔ ni etsake etsui ni asaa lɛ yɛ mumɔŋ ekoŋŋ lɛ baanyɛ anya ekoŋŋ yɛ Yehowa yiwalaheremɔ he gbɛjianɔtoo lɛ he. Akɛni David miishwe enɛ hewɔ lɛ, ekpa Nyɔŋmɔ fai akɛ: “Okɛ oyiwalaheremɔ lɛ he nyamɔ lɛ aku sɛɛ aha mi, ni toiboo mumɔ lɛ amɔ mimli!” (Lala 51:14) Kwɛ miishɛɛ ni eji akɛ wɔmli aaafili wɔ yɛ Yehowa Nyɔŋmɔ yiwalaheremɔ he hiɛnɔkamɔ ni ma shi shiŋŋ lɛ mli! (Lala 3:9) Beni David fee esha eshi Nyɔŋmɔ lɛ sɛɛ lɛ, agbɛnɛ eetao ni eku sɛɛ ena yiwalaheremɔ he nyamɔ ni jɛ E-ŋɔɔ lɛ ekoŋŋ. Yɛ sɛɛ mli lɛ, Yehowa tsɔ e-Bi Yesu Kristo kpɔmɔ afɔleshaa lɛ nɔ eto yiwalaheremɔ he gbɛjianɔ. Kɛji akɛ wɔ ni ji Nyɔŋmɔ tsuji ni wɔjɔɔ wɔhe nɔ lɛ tɔ tɔmɔ ko ni mli wa, shi wɔmiisumɔ ni wɔnine ashɛ yiwalaheremɔ he nyamɔ lɛ nɔ ekoŋŋ lɛ, belɛ ehe baahia ni wɔna tsuitsakemɔ loo heshwamɔ su, koni wɔtsi wɔhe kɛjɛ esha ni wɔɔfee wɔshi mumɔ krɔŋkrɔŋ lɛ he.—Mateo 12:31, 32; Hebribii 6:4-6.
9. Mɛni David biɔ ni enine ashɛ nɔ, beni ebi ni Nyɔŋmɔ kɛ “toiboo mumɔ” ni jɛɔ suɔmɔ mli efeɔ nii afi esɛɛ lɛ?
9 David bi ni Yehowa kɛ “toiboo mumɔ” loo mumɔ ni sumɔɔ ni efee nii afi esɛɛ. Eka shi faŋŋ akɛ enɛ etsɔɔɔ bɔ ni Nyɔŋmɔ sumɔɔ ni eye ebua loo emumɔ krɔŋkrɔŋ lɛ, shi moŋ ekɔɔ David jwɛŋmɔ ni tsirɛɔ lɛ lɛ he. David miitao ni Nyɔŋmɔ afi esɛɛ kɛtsɔ toiboo mumɔ ni ekɛaaha lɛ koni ekɛfee nɔ ni ja koni ekagbee esha mli ekoŋŋ lɛ nɔ. Yehowa Nyɔŋmɔ yaa nɔ efiɔ etsuji asɛɛ be fɛɛ be ni eholeɔ mɛi ni edɔrɔ kɔmɔɔ yɛ kaai sɔrɔtoi ahewɔ lɛ anɔ. (Lala 145:14) Kwɛ miishɛjemɔ sane ni enɛ ji akɛ wɔɔyoo enɛ, titri lɛ kɛji akɛ wɔtɔ, shi wɔmiiye awerɛho ni wɔmiisumɔ ni wɔsɔmɔ Yehowa yɛ anɔkwayeli mli kɛya naanɔ agbɛnɛ lɛ!
Atsɔɔ Nɔtɔlɔi Mɛni?
10, 11. (a) Mɛni David baanyɛ atsɔɔ lsraelbii nɔtɔlɔi? (b) David baanyɛ atsɔɔ eshafeelɔi anii kɛ lɛ diɛŋtsɛ lɛ efee mɛni da?
10 Kɛji Nyɔŋmɔ baaŋmɛ gbɛ lɛ, David miisumɔ ni efee nɔ ko ni baatsɔɔ ehiɛsɔɔ kɛha Yehowa mɔbɔnalɛ lɛ ni baaye abua mɛi krokomɛi hu yɛ gbɛ ni pɛsɛmkunya bɛ mli nɔ. Maŋtsɛ ni eshwa ehe lɛ tsɔ sɔlemɔ nɔ ekɛ henumɔ jaje etsɔɔ Yehowa akɛ: “No lɛ matsɔɔ nɔtɔlɔi ogbɛi lɛ, ni eshafeelɔi aaaku amɛsɛɛ kɛaaba oŋɔɔ.” (Lala 51:15) Te aaafee tɛŋŋ ni David eshafeelɔ lɛ aaanyɛ atsɔɔ nɔtɔlɔi Nyɔŋmɔ Mla hu? Mɛni eeenyɛ ekɛɛ amɛ? Ni mɛɛ nɔ kpakpa ko enɛ aaanyɛ atsu?
11 Beni etsɔɔ lsraelbii nɔtɔlɔi Yehowa gbɛ̃i kɛ hiɛnɔkamɔ akɛ eeegbala amɛ kɛaajɛ gbɛ fɔŋ nɔ lɛ, David baanyɛ atsɔɔ amɛ bɔ ni esha ehiii ha, nɔ ni tsuitsakemɔ tsɔɔ, kɛ gbɛ ni amɛaatsɔ nɔ ni amɛnine ashɛ Nyɔŋmɔ mɔbɔnalɛ nɔ. Akɛni enu Yehowa duromɔ ni bɛ enɔ dɔŋŋ lɛ kɛ henilee ni eye fɔ mli piŋmɔi ahe hewɔ lɛ, ŋwanejee ko bɛ he akɛ David baanyɛ afee eshafeelɔi ni eshwa amɛhe ni amɛtsuii ekumɔ lɛ atsɔɔlɔ ni naa mɔbɔ. Hɛɛ, ebaanyɛ ekɛ enɔkwɛmɔ nɔ lɛ atsɔɔ mɛi krokomɛi anii, shi ja lɛ diɛŋtsɛ hu ekpɛlɛ Yehowa mlai anɔ ni enine eshɛ E-dɛŋ eshaifaa anɔ dã, ejaakɛ mɛi ni ekpɛlɛɛɛ nɔ akɛ amɛaaba amɛhe shi amɛha ŋwɛi taomɔ nii lɛ bɛ hegbɛ akɛ ‘amɛjajeɔ Nyɔŋmɔ akpɔi lɛ amɛtsɔɔ.’—Lala 50:16, 17.
12. Nilee akɛ Nyɔŋmɔ ejie lɛ kɛjɛ la he fɔyeli mli lɛ he ba sɛɛnamɔ kɛha David yɛ mɛɛ gbɛ nɔ?
12 Beni etiɔ eyiŋtoi lɛ amli yɛ gbɛ kroko nɔ lɛ, David kɛɛ: “Jiemɔ mi kɛjɛ la he fɔyeli mli, bo Nyɔŋmɔ, ni ji miyiwalaheremɔ Nyɔŋmɔ, ni mililɛi aaala ajie ojalɛ yi!” (Lala 51:16) La he fɔyeli kɛ gbele fɔbuu baa. (1 Mose 9:5, 6) No hewɔ lɛ, nilee ni eyɔɔ akɛ eyiwalaheremɔ Nyɔŋmɔ lɛ ejie lɛ kɛjɛ la he fɔyeli ni kɔɔ Uria he lɛ mli lɛ baaha David tsuiŋ kɛ jwɛŋmɔŋ toiŋjɔlɛ. Elilɛi baanyɛ ala Nyɔŋmɔ jalɛ lɛ he lala kɛ mlifilimɔ, shi jeee lɛ diɛŋtsɛ enɔ. (Jajelɔ 7:20; Romabii 3:10) David nyɛŋ atsumɔ ejeŋba shara lɛ aloo ni ekɛ Uria ajɛ gbonyo bu mli aba, taakɛ bɔ ni ŋmɛnɛŋmɛnɛ beaŋ gbɔmɔ ko nyɛŋ esaa eha mɔ ko ni elaka lɛ ekɛ lɛ ewɔ lɛ he atse ekoŋŋ aloo ni eeetee mɔ ni egbe lɛ lɛ shi kɛba wala mli lɛ. Ani esaaa akɛ wɔsusuɔ enɛɛmɛi ahe yɛ be mli ni akaa wɔ lɛ? Ni kwɛ bɔ ni esa akɛ wɔhiɛ asɔ Yehowa mɔbɔnalɛ ni ejie lɛ kpo etsɔɔ wɔ yɛ jalɛ mli lɛ babaoo wɔha! Yɛ anɔkwale mli lɛ, esa akɛ hiɛsɔɔ atsirɛ wɔ ni wɔkudɔ mɛi krokomɛi kɛba nɛkɛ jalɛ kɛ eshaifaa Nuhiŋmɛi nɛɛ he.
13. Mɛɛ shihilɛi ashishi pɛ eshafeelɔ baanyɛ agbele enaabu yɛ gbɛ ni ja nɔ koni ejie Yehowa yi?
13 Eshafeelɔ ko nyɛŋ agbele enaabu yɛ gbɛ ni ja nɔ ni ekɛjie Yehowa yi, ja Nyɔŋmɔ kɛ mɔbɔnalɛ gbele, koni ekɛjaje E-nɔkwalei lɛ. No hewɔ lɛ David la akɛ: “Nuŋtsɔ, [Yehowa] gbelemɔ minaabu, ni midaa ajaje oyijiemɔ lɛ atsɔɔ!” (Lala 51:17) Akɛni Nyɔŋmɔ dɛŋ eshaifaa lɛ eha ehenilee mli etse lɛ hewɔ lɛ, ebaanyɛ etsirɛ David ni etsɔɔ nɔtɔlɔi lɛ Yehowa gbɛi, ni ebaanyɛ ejie E-yi yɛ heyeli mli. Esa akɛ mɛi fɛɛ ni akɛ amɛhe eshai eke amɛ taakɛ akɛke David lɛ ahiɛ asɔ Yehowa mlihilɛ ni esaaa amɛ ni ejie kpo etsɔɔ amɛ lɛ, ni esa akɛ amɛŋɔ hegbɛ fɛɛ hegbɛ ni amɛaana lɛ ni amɛkɛjaje Nyɔŋmɔ anɔkwale lɛ ni ‘amɛjaje eyijiemɔi lɛ.’—Lala 43:3.
Afɔlei ni Saa Nyɔŋmɔ Hiɛ
14. (a) Mɛɛ afɔleshaai abiɔ yɛ Mla kpaŋmɔ lɛ shishi? (b) Mɛni hewɔ ejaaa akɛ wɔɔsusu akɛ wɔbaanyɛ wɔkɛ nifeemɔi kpakpai komɛi asaa efɔŋ ni wɔyaa nɔ wɔfeɔ lɛ?
14 David ena shishinumɔ ni mli kwɔ, ni enɛ ha ekɛɛ akɛ: “Ejaakɛ jeee afɔle [Yehowa] otaoɔ, kulɛ maha; shaa afɔle hu, onaaa he tsui.” (Lala 51:18) Mla kpaŋmɔ lɛ bi ni akɛ kooloi asha afɔle aha Nyɔŋmɔ. Shi, anyɛŋ akɛ afɔlei ni tamɔ nɛkɛ akpata aha esha ni David fee ni ji gbalafitemɔ kɛ gbɔmɔgbee, ni akɛ gbele gbalaa mɔ toi yɛ he lɛ. Kɛ jeee nakai kulɛ, ebaanyɛ esha afɔlei fɛɛ ni ataoɔ lɛ eha Yehowa. Kɛ heshwamɔ kɛ tsuitsakemɔ diɛŋtsɛ bɛ lɛ, afɔlei ni ashaa lɛ ahe bɛ sɛɛnamɔ ko. No hewɔ lɛ eji tɔmɔ akɛ wɔɔsusu akɛ nibii kpakpai komɛi ni wɔɔfee lɛ baanyɛ asaa tɔmɔi komɛi ni wɔyaa nɔ wɔfeɔ lɛ.
15. Mɛni ji gbɔmɔ ni ejɔɔ he enɔ ni werɛ eho ehe lɛ su?
15 David kɛfata he akɛ: “Nyɔŋmɔ afɔlei lɛ ji mumɔ ni werɛ eho ehe; tsui ni werɛ eho ehe ni tswiaa shi kɛ dɔlɛ lɛ, Nyɔŋmɔ, okpooŋ!” (Lala 51:19) Yɛ eshafeelɔ ni etsake etsui lɛ gbɛfaŋ lɛ, nɔ ni akpɛlɛɔ nɔ ji, “Nyɔŋmɔ afɔlei [ni] ji mumɔ ni werɛ eho ehe.” Gbɔmɔ ni tamɔ nɛkɛ beee. Gbɔmɔ ni ejɔɔ ehe nɔ ni yɔɔ mumɔ ni werɛ eho ehe lɛ tsui miiye kɛ awerɛho waa yɛ esha ni efee lɛ he, ebaa shi kwraa akɛni enuɔ he akɛ ebɛ Nyɔŋmɔ nɔkpɛlɛmɔ dɔŋŋ lɛ hu hewɔ, ni eesumɔ ni efee nɔ fɛɛ nɔ ni eeenyɛ ni ekɛna ŋwɛi duromɔ ekoŋŋ. Wɔnyɛŋ wɔkɛ nɔ ko ni jara wa aha Nyɔŋmɔ, ja wɔtsake wɔtsui kɛjɛ wɔhe eshai lɛ amli ni wɔkɛ wɔtsui fɛɛ ha lɛ yɛ hetuu-kɛhamɔ ni wɔkɛaaha ekome too lɛ mli.—Nahum 1:2.
16. Te Nyɔŋmɔ kwɛɔ mɔ ni tsui werɛ eho ehe yɛ esha ni efee hewɔ lɛ ehaa tɛŋŋ?
16 Nyɔŋmɔ kpooo afɔle ni tamɔ tsui ni werɛ eho ehe ni tswiaa shi kɛ dɔlɛ. No hewɔ lɛ, yɛ shihilɛi ni mli wawai ni wɔkɛkpeɔ akɛ ewebii lɛ fɛɛ sɛɛ lɛ, nyɛkahaa wɔnijiaŋ miije wui. Kɛji akɛ wɔtɛrɛ yɛ shihilɛ gbɛ lɛ nɔ yɛ gbɛ ko nɔ ni haa wɔtsui bolɔɔ etsɛɔ ŋwɛi yelikɛbuamɔ lɛ, kɛlɛ shihilɛ lɛ jeee nɔ ni hiɛnɔkamɔ bɛ mli. Kɛ wɔfee esha ko po ni hiɛdɔɔ yɔɔ mli, shi wɔtsake wɔ tsui lɛ, Yehowa ekuŋ ehiɛ eshwieŋ wɔtsui ni werɛ eho ehe lɛ nɔ. Ebaadamɔ Kristo kpɔmɔ afɔleshaa lɛ nɔ ekɛke wɔ, ni ebaaku sɛɛ ekɛ wɔ aba E-duromɔ mli ekoŋŋ. (Yesaia 57:15; Hebribii 4:16; 1 Yohane 2:1) Shi, taakɛ David ji lɛ, esa akɛ wɔsɔlemɔi lɛ afee nɔ ni wɔkɛtaoɔ ŋwɛi duromɔ hegbɛ ekoŋŋ, shi jeee ni wɔkɛjo kamɔ loo jajemɔ ni he hiaa lɛ naa foi. Nyɔŋmɔ kɛke David, shi eka ehiɛ hu.—2 Samuel 12:11-14.
Jamɔ Krɔŋŋ He Susumɔ
17. Yɛ Nyɔŋmɔ dɛŋ eshaifaa ni amɛbiɔ lɛ sɛɛ lɛ, mɛni esa akɛ eshafeelɔi afee?
17 Kɛji akɛ wɔfee esha ko ni hiɛdɔɔ yɔɔ mli lɛ, ŋwanejee ko bɛ he akɛ enɛ baagba wɔnaa waa, ni tsui ni ekumɔ lɛ baatsirɛ wɔ ni wɔtao Nyɔŋmɔ dɛŋ eshaifaa. Ni kɛlɛ, nyɛhaa wɔsɔlea wɔhaa mɛi krokomɛi hu. Eyɛ mli akɛ David kpa gbɛ akɛ ekɛ jamɔ ni nɔkpɛlɛmɔ yɔɔ mli baaha Nyɔŋmɔ shikome ekoŋŋ moŋ, shi elala lɛ ekuuu hiɛ eshwieee mɛi krokomɛi anɔ yɛ pɛsɛmkunya gbɛ nɔ. Nɔ ni fata he ji fai ni ekpa Yehowa nɛɛ: “Feemɔ Zion ejurɔ yɛ oduromɔ naa; tswaa Yerusalem gbogboi lɛ!”—Lala 51:20.
18. Mɛni hewɔ David ni eshwa ehe lɛ sɔle eha Zion lɛ?
18 Hɛɛ, David kpa be mli ni eeena ŋwɛi duromɔ ekoŋŋ lɛ gbɛ. Shi eji lalatsɛ heshibalɔ lɛ sɔlemɔ hu akɛ ‘Nyɔŋmɔ kɛ Zion’ ni ji Israel maŋtiase Yerusalem, he ni David hiɛ ka nɔ akɛ ebaama Nyɔŋmɔ sɔlemɔtsu lɛ yɛ lɛ ‘aye yɛ tsuijurɔ naa.’ David eshai ni hiɛdɔɔ yɔɔ mli lɛ kɛ maŋ muu lɛ fɛɛ wo oshara mli, ejaakɛ gbɔmɛi lɛ fɛɛ baanyɛ ana amanehulu yɛ maŋtsɛ lɛ nɔ fɔŋ feemɔ lɛ hewɔ. (Okɛto 2 Samuel, yitso 24 he.) No tsɔɔ akɛ ehe eshai lɛ gbɔjɔ “Yerusalem gbogboi lɛ,” ni yɛ enɛ hewɔ lɛ ehe miihia ni aku sɛɛ atswa ama shi ekoŋŋ.
19. Kɛ wɔfee esha shi akɛke wɔ lɛ, mɛni eeefee nɔ ni sa jogbaŋŋ akɛ wɔɔsɔle wɔbi?
19 Kɛ wɔfee esha ni hiɛdɔɔ yɔɔ mli, shi wɔnine eshɛ Nyɔŋmɔ dɛŋ eshaifaa nɔ lɛ, ebaafee nɔ ni sa akɛ wɔɔsɔle koni esaa nibii ni wɔjeŋba efite amɛ lɛ. Ekolɛ wɔkɛ ahorabɔɔ eba egbɛi krɔŋkrɔŋ lɛ nɔ, wɔgbɔjɔ asafo lɛ, ni wɔha wɔweku lɛ eye awerɛho. Wɔŋwɛi Tsɛ ni yɔɔ suɔmɔ lɛ baanyɛ ajie ahorabɔɔ ni eba egbɛi lɛ nɔ lɛ, ebaanyɛ etswa asafo lɛ ema shi ekoŋŋ kɛtsɔ mumɔ krɔŋkrɔŋ lɛ nɔ, ni ebaanyɛ eshɛje wɔ suɔlɔi ni sumɔɔ lɛ ni sɔmɔɔ lɛ lɛ amii. Kɛ afee esha jio, afeko esha jio, esa akɛ Yehowa gbɛi lɛ hetsemɔ kɛ ewebii ahilɛ-kɛhamɔ afee nɔ ni he hiaa wɔ be fɛɛ be.—Mateo 6:9.
20. Mɛɛ shihilɛi ashishi Yehowa baanya Israel afɔleshaai lɛ ahe yɛ?
20 Kɛ Yehowa tswa Zion gbogboi lɛ ema shi ekoŋŋ lɛ, mɛni hu baaba? David la akɛ: “No lɛ [Yehowa] ooona jalɛ afɔlei lɛ ahe tsui, shaa afɔle jio, afɔle muu jio; no lɛ amɛaasha tsina hii yɛ ofɔleshaa latɛ lɛ nɔ.” (Lala 51:21) David miisumɔ waa ni lɛ kɛ maŋ muu lɛ fɛɛ ana Yehowa hiɛ duromɔ ekoŋŋ, koni amɛnyɛ amɛsɔmɔ Lɛ yɛ nɔkpɛlɛmɔ mli. Kɛkɛ lɛ Nyɔŋmɔ baanya amɛ shaa afɔlei lɛ kɛ afɔlei muji lɛ ahe. Nakai ebaaba lɛ, ejaakɛ enɛɛmɛi baafee jalɛ afɔlei ni gbɔmɛi anɔkwafoi ni amɛjɔɔ amɛhe ni amɛtsake amɛtsui ni naa Nyɔŋmɔ duromɔ mli ŋɔɔmɔ kɛhaa. Yɛ Yehowa mɔbɔnalɛ lɛ he shidaa hewɔ lɛ, amɛkɛ tsina hii—afɔlei ni hi fe fɛɛ, ni jara wa hu fe fɛɛ lɛ baasha afɔle yɛ efɔleshaa latɛ lɛ nɔ. Ŋmɛnɛ, wɔkɛ woo haa Yehowa kɛtsɔɔ nii ni hi fe fɛɛ ni wɔyɔɔ ni wɔkɛbahaa lɛ lɛ nɔ. Ni nɔ ni fata wɔ afɔleshaai lɛ ahe ji “wɔnaabui [ni wɔŋɔ]fee tsina hii,” yijiemɔ afɔlei ni wɔkɛhaa Yehowa, wɔ-Nyɔŋmɔ ni naa mɔbɔ lɛ.—Hoshea 14:2; Hebribii 13:15.
Yehowa Boɔ Wɔbolɔmɔi Atoi
21, 22. Mɛɛ nikasemɔi ni he yɔɔ sɛɛnamɔ kɛha wɔ yɔɔ Lala 51?
21 David sɔlemɔ ni jɛ tsuiŋ ni aŋma afɔ shi yɛ Lala 51 lɛ tsɔɔ akɛ esa akɛ wɔkɛ tsuitsakemɔ mumɔ diɛŋtsɛ atsu esha he nii. Nikasemɔi pɔtɛɛ hu yɛ nɛkɛ lala nɛɛ mli ni he baaba sɛɛnamɔ aha wɔ. Akɛ nɔkwɛmɔ nɔ lɛ, kɛ wɔfee esha shi wɔtsake wɔtsui lɛ, wɔbaanyɛ wɔkɛ wɔhiɛ afɔ Nyɔŋmɔ mɔbɔnalɛ lɛ nɔ. Shi, nyɛhaa wɔsusua ahorabɔɔ ni ekolɛ wɔkɛba Yehowa gbɛi lɛ nɔ lɛ he titri. (Kukuji 3-6) Taakɛ David ji lɛ, wɔbaanyɛ wɔkpa wɔ-ŋwɛi Tsɛ lɛ fai ni ena wɔ mɔbɔ yɛ esha ni wɔna kɛjɛ fɔmɔ mli lɛ hewɔ. (Kuku 7) Esa akɛ wɔye anɔkwa, ni ehe miihia ni wɔtao nilee kɛjɛ Nyɔŋmɔ ŋɔɔ. (Kuku 8) Kɛ wɔfee esha lɛ, esa akɛ wɔkpa Yehowa fai koni eju wɔhe, ni eha wɔ tsui ni yɔɔ krɔŋŋ, kɛ mumɔ ni fiɔ shi shiŋŋ.—Kukuji 9-12.
22 Wɔbaanyɛ wɔjɛ Lala 51 wɔna hu akɛ wɔkaŋmɛ gbɛ ni wɔkpiliŋ yɛ eshafeemɔ mli. Kɛ wɔfee nakai lɛ, Yehowa baajie emumɔ krɔŋkrɔŋ loo enifeemɔ hewalɛ lɛ kɛjɛ wɔnɔ. Shi kɛ Nyɔŋmɔ mumɔ lɛ yɛ wɔnɔ lɛ, wɔbaanyɛ wɔtsɔɔ mɛi krokomɛi egbɛi lɛ yɛ omanyeyeli mli. (Kukuji 13-15) Kɛ wɔtɔ, shi wɔtsake wɔtsui lɛ, Yehowa baaŋmɛ wɔ gbɛ ni wɔya nɔ wɔjie eyi, ejaakɛ ekpooo tsui ni werɛ eho ehe ni tswiaa shi kɛ dɔlɛ. (Kukuji 16-19) Nɛkɛ lala nɛɛ tsɔɔ hu akɛ, esaaa akɛ wɔsɔleɔ wɔhaa wɔ kome wɔhe pɛ kɛkɛ. Shi moŋ, esa akɛ wɔsɔle wɔha mɛi fɛɛ ni kɛ amɛhe woɔ Yehowa jamɔ krɔŋŋ mli lɛ ajɔɔmɔ kɛ amɛhilɛ-kɛhamɔ yɛ mumɔŋ.—Kukuji 20, 21.
23. Mɛni hewɔ esa akɛ Lala 51 atsirɛ wɔ ni wɔfee ekãa ni wɔna jwɛŋmɔ kpakpa hu?
23 Esa akɛ nɛkɛ David lala ni henumɔ yɔɔ mli waa nɛɛ akanya wɔ ni wɔfee ekãa ni wɔna jwɛŋmɔ kpakpa. Eyeɔ ebuaa wɔ ni wɔnaa akɛ ehe ehiaaa ni wɔsusu akɛ kɛ wɔgbee esha mli pɛ lɛ belɛ nɔ fɛɛ nɔ elaaje. Mɛni hewɔ? Ejaakɛ kɛ wɔtsake wɔtsui ni wɔshwa wɔhe lɛ, Yehowa mɔbɔnalɛ lɛ baanyɛ ahere wɔ kɛjɛ nijiaŋwujee mli. Kɛ wɔmiiye awerɛho yɛ efɔŋ lɛ hewɔ ni wɔtu wɔhe kwraa wɔha wɔŋwɛi Tsɛ ni yɔɔ suɔmɔ lɛ lɛ, eboɔ wɔbolɔmɔ kɛha mɔbɔnalɛ lɛ toi. Ni kwɛ wɔmii ni shɛɔ wɔhe akɛ wɔɔle akɛ Yehowa kpooo tsui ni werɛ eho ehe!
Te Obaaha Hetoo Tɛŋŋ?
◻ Mɛni hewɔ tsui krɔŋŋ kɛ Nyɔŋmɔ mumɔ krɔŋkrɔŋ lɛ he hiaa Kristofoi lɛ?
◻ Mɛni gbɔmɔ ni etsake etsui lɛ baanyɛ atsɔɔ nɔtɔlɔi yɛ Yehowa mla he?
◻ Te Yehowa buɔ tsui ni werɛ eho ehe ni tswiaa shi kɛ dɔlɛ lɛ ehaa tɛŋŋ?
◻ Mɛɛ nikasemɔi anaa yɛ Lala 51?
[Nikasemɔ lɛ he Sanebimɔi]
[Mfoniri ni yɔɔ baafa 15]
Ani osɔleɔ obiɔ mumɔ krɔŋkrɔŋ lɛ ní okwɛɔ jogbaŋŋ koni okafee lɛ nidɔɔ nii?
[Mfoniri ni yɔɔ baafa 17]
Jiemɔ hiɛsɔɔ kpo yɛ Yehowa mlihilɛ ni wɔsaa lɛ he kɛtsɔ enɔkwale lɛ jajemɔ nɔ