“Gbɔmɛi Ateŋ Nikeenii” Ni Baakwɛ Yehowa Tooi Lɛ
“Beni ekwɔ kɛtee ŋwɛi lɛ eŋɔ nomii anom; ekɛ gbɔmɛi ateŋ nikeenii hã.”—EFESOBII 4:8, NW.
1. Mɛɛ wiemɔ nyɛmi yoo Kristofonyo ko wie yɛ onukpai ni yɔɔ esafo lɛ mli lɛ ahe?
“MIIDA nyɛ shi akɛ nyɛsusuɔ wɔhe babaoo nɛkɛ. Nyɛ ŋmɔlɔ, nyɛ miishɛɛ, kɛ bɔ ni nyɛsusuɔ wɔhe lɛ ji anɔkwale diɛŋtsɛ. Nyɛfee klalo be fɛɛ be akɛ nyɛbaabo wɔ toi ní nyɛkɛ wɔ awie Biblia mli wiemɔi ní kanyaa wɔmumɔ. Misɔleɔ akɛ ekaba akɛ masusu akɛ nyɛhe ehiaaa kɔkɔɔkɔ.”[1] Nɛkɛ ji bɔ ni nyɛmi yoo Kristofonyo ko ŋma eyaha onukpai ni yɔɔ esafo lɛ mli lɛ. Eyɛ faŋŋ akɛ, suɔmɔ ní Kristofoi nɔkwɛlɔi ní susuɔ mɔ he lɛ jieɔ lɛ kpo lɛ eta etsui he.—1 Petro 5:2, 3.
2, 3. (a) Taakɛ Yesaia 32:1, 2 lɛ tsɔɔ lɛ, te onukpai ni yɔɔ musuŋtsɔlɛ lɛ kwɛɔ Yehowa tooi lɛ amɛhaa tɛŋŋ? (b) Mɛɛ be abaanyɛ asusu onukpa ko he akɛ nikeenii?
2 Onukpai lɛ ji gbɛjianɔtoo ní jɛ Yehowa ŋɔɔ koni amɛkwɛ etooi lɛ. (Luka 12:32; Yohane 10:16) Yehowa tooi lɛ ajara wa kɛha lɛ—yɛ anɔkwale mli lɛ, amɛjara wa aahu akɛ ekɛ Yesu lá ni jara wa lɛ hé. Belɛ, ebɛ naakpɛɛ akɛ kɛ́ onukpai lɛ kɛ Yehowa tooku lɛ ye kɛ musuŋtsɔlɛ lɛ, enáa he miishɛɛ. (Bɔfoi lɛ Asaji 20:28, 29) Kadimɔ bɔ ni awie onukpai, loo “lumɛi” nɛɛ ahe aha yɛ gbalɛ wiemɔ mli: “Mɔ fɛɛ mɔ aaatsɔ tamɔ abobaahe yɛ kɔɔyɔɔ naa kɛ teemɔhe yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ko ní hãa hɔ̃ɔŋ yɛ shikpɔŋ gbiŋ nɔ.” (Yesaia 32:1, 2) Hɛɛ, esa akɛ amɛbu tooi lɛ ahe, ní amɛha amɛ hejɔɔmɔ, ní amɛshɛje amɛmii. Enɛ hewɔ lɛ, onukpai ní kɛ musuŋtsɔlɛ kwɛɔ tooi lɛ anɔ lɛ miibɔ mɔdɛŋ ní amɛshɛ nɔ ni Nyɔŋmɔ taoɔ yɛ amɛdɛŋ lɛ he.
3 Awieɔ onukpai nɛɛ ahe yɛ Biblia lɛ mli ákɛ “gbɔmɛi ateŋ nikeenii.” (Efesobii 4:8, NW) Kɛ́ osusu nikeenii he lɛ, osusuɔ nɔ ko ní akɛha koni etsu hiamɔ ko he nii, loo koni eha mɔ ní akɛhaa lɛ aná miishɛɛ lɛ he. Abaanyɛ asusu onukpa lɛ he akɛ nikeenii, beni ekɛ enyɛmɔi tsuɔ nii ní ekɛ yelikɛbuamɔ ni he hiaa hãa, ní eyeɔ ebuaa kɛhaa asafoku lɛ miishɛɛnamɔ lɛ. Mɛɛ gbɛ nɔ eeetsɔ efee enɛ? Hetoo lɛ, ní wɔnaa yɛ Paulo wiemɔi ní yɔɔ Efesobii 4:7-16 lɛ, wóɔ suɔmɔ mli ní Yehowa jɛɔ esusuɔ etooi lɛ ahe lɛ nɔ gojoo.
“Gbɔmɛi Ateŋ Nikeenii”—Kɛjɛ Nɛgbɛ?
4. Yɛ Lala 68:18 (NW) lɛ mlibaa mli lɛ, Yehowa ‘kwɔ kɛtee ŋwɛi’ yɛ mɛɛ gbɛ nɔ, ni namɛi ji “gbɔmɛi ateŋ nikeenii” lɛ?
4 Beni Paulo kɛ wiemɔ “gbɔmɛi ateŋ nikeenii” lɛ tsu nii lɛ, no mli lɛ eetsɛ Maŋtsɛ David wiemɔi asɛɛ, beni ewie yɛ Yehowa he akɛ: “Okwɔ kɛtee ŋwɛi; oŋɔ nomii anom; ohe gbɔmɛi ateŋ nikeenii.” (Lala 68:18, NW) Beni Israelbii lɛ ehi Shiwoo Shikpɔŋ lɛ nɔ yɛ afii komɛi asɛɛ lɛ, Yehowa “kwɔ” Zion Gɔŋ lɛ yɛ mfonirifeemɔ mli ni efee Yerusalem Israel maŋtsɛyeli ní David yeɔ nɔ akɛ emaŋtsɛ lɛ emaŋtiase. Shi namɛi ji “gbɔmɛi ateŋ nikeenii” lɛ? Amɛji gbɔmɛi ní aŋɔ amɛ nom beni aye shikpɔŋ lɛ nɔ kunim lɛ. Yɛ sɛɛ mli lɛ, akɛ nomii nɛɛ ekomɛi hã Levibii lɛ koni amɛye amɛbua yɛ kpee buu lɛ he nitsumɔ gbɛfaŋ.[2]—Ezra 8:20.
5. (a) Paulo tsɔɔ akɛ Lala 68:18 (NW) lɛ yɛ emlibaa yɛ Kristofoi asafo lɛ mli yɛ mɛɛ gbɛ nɔ? (b) Yesu ‘kwɔ kɛtee ŋwɛi’ yɛ mɛɛ gbɛ nɔ?
5 Paulo tsɔɔ yɛ ewolo ni eŋma eyaha Efesobii lɛ mli akɛ lalatsɛ lɛ wiemɔi lɛ hiɛ shishinumɔ ni mli lɛɛ yɛ Kristofoi asafo lɛ mli. Beni etsɔɔ Lala 68:18 (NW) lɛ shishi kɛ wiemɔ kroko lɛ, Paulo ŋma akɛ: “Shi wɔteŋ mɔ fɛɛ mɔ lɛ, aŋɔ duromɔ lɛ aha lɛ yɛ Kristo nikeenii asusumɔ lɛ naa. No hewɔ lɛ ekɛɛ: ‘Beni ekwɔ kɛtee ŋwɛi lɛ eŋɔ nomii anom; ekɛ gbɔmɛi ateŋ nikeenii hã.’ ” (Efesobii 4:7, 8, NW) Paulo kɛ lala nɛɛ to Yesu he yɛ biɛ ákɛ Nyɔŋmɔ najiaŋdamɔlɔ. Yesu “[ye] je lɛ nɔ kunim” kɛtsɔ enɔkwayeli gbɛ lɛ nɔ. (Yohane 16:33) Eye gbele kɛ Satan hu nɔ kunim kɛtsɔ shi ní Nyɔŋmɔ tée lɛ kɛjɛ gbohii ateŋ lɛ nɔ. (Bɔfoi lɛ Asaji 2:24; Hebribii 2:14) Yɛ afi 33 Ŋ.B. lɛ, Yesu ní atée lɛ shi lɛ kwɔ “kɛtee ŋwɛii fɛɛ ayiteŋ”—enɔ kwɔ fe ŋwɛi bɔɔnii krokomɛi fɛɛ.[3] (Efesobii 4:9, 10; Filipibii 2:9-11) Ákɛ kunimyelɔ lɛ, Yesu ŋɔ “nomii” kɛjɛ henyɛlɔ lɛ dɛŋ. Yɛ mɛɛ gbɛ nɔ?
6. Yesu bɔi Satan shia lɛ mli nibii hàa, kɛjɛ Pentekoste afi 33 Ŋ.B. kɛbaa yɛ mɛɛ gbɛ nɔ, ni mɛni ekɛ “nomii” lɛ fee?
6 Beni eyɔɔ shikpɔŋ nɔ lɛ, Yesu jie hewalɛ ní eyɔɔ yɛ Satan nɔ lɛ kpo kɛtsɔ kpɔmɔ ní ekpɔ̃ mɛi ni yɔɔ daimonioi anyɔŋyeli shishi lɛ nɔ. Etamɔ nɔ ni Yesu tutua Satan shia lɛ, ni efimɔ lɛ, ni ehé enibii lɛ yɛ edɛŋ. (Mateo 12:22-29) Ní átee Yesu shi, ní aŋɔ ‘hegbɛ fɛɛ ahã lɛ yɛ ŋwɛi kɛ shikpɔŋ nɔ’ nɛɛ, bo diɛŋtsɛ susumɔ bɔ ni ebaahà nii kɛjɛ nakai beaŋ lɛ he okwɛ! (Mateo 28:18) Kɛjɛ Pentekoste afi 33 Ŋ.B. kɛbaa lɛ, Yesu ní átee lɛ shi lɛ bɔi Satan shia lɛ mli nibii hàa ákɛ Nyɔŋmɔ najiaŋdamɔlɔ, kɛtsɔ “nomii”—ni ji gbɔmɛi ní ehi esha kɛ gbele nyɔŋyeli shishi yɛ be kakadaŋŋ mli, yɛ Satan kudɔmɔ shishi lɛ ‘anom ní eŋɔ’ lɛ nɔ.[4] “Nomii” nɛɛ jɛ amɛ diɛŋtsɛ amɛsuɔmɔ mli amɛbatsɔmɔ “Kristo tsuji ni jieɔ amɛmusuŋ amɛfeɔ Nyɔŋmɔ suɔmɔnaa nii.” (Efesobii 6:6) Yɛ gbɛ ko nɔ lɛ, etamɔ nɔ ni Yesu jie amɛ kɛjɛ Satan kudɔmɔ shishi, ni edamɔ Yehowa najiaŋ ekɛ amɛ hã asafo lɛ ákɛ “gbɔmɛi ateŋ nikeenii.” Bo diɛŋtsɛ feemɔ bɔ ni Satan mli baafu waa, beni ekwɛɔ ní aheɔ amɛ kɛjɛɔ edɛŋ ní enyɛɛɛ nɔ ko kwraa efee lɛ he mfoniri okwɛ!
7. (a) “Gbɔmɛi ateŋ nikeenii” lɛ sɔmɔɔ yɛ asafoi lɛ amli yɛ mɛɛ gbɛhei amli? (b) Mɛɛ hegbɛ Yehowa kɛha nuu fɛɛ nuu ní sɔmɔɔ akɛ onukpa lɛ?
7 Ani wɔnaa “gbɔmɛi ateŋ nikeenii” nɛɛ yɛ asafo lɛ mli ŋmɛnɛ? Hɛɛ, wɔnaa amɛ! Wɔnaa amɛ ní amɛmiisɔmɔ akɛ onukpai, ní amɛmiitsu nii waa akɛ ‘sanekpakpa jajelɔi, nɔkwɛlɔi, kɛ tsɔɔlɔi’ yɛ Nyɔŋmɔ webii asafoi ní fa fe 87,000 yɛ shikpɔŋ lɛ nɔ fɛɛ lɛ amli.[5] (Efesobii 4:11) Satan baaná he miishɛɛ waa kɛji amɛkɛ asafoku lɛ baaye yɛ gbɛ fɔŋ nɔ. Shi jeee no hewɔ Nyɔŋmɔ tsɔ Kristo nɔ ekɛ amɛ hã asafo lɛ. Shi moŋ, Yehowa kɛ hii nɛɛ eha yɛ asafo lɛ hilɛ-kɛhamɔ hewɔ, ni amɛbaabu tooi ní akɛ amɛkwɛmɔ ewo amɛdɛŋ lɛ ahe akɔntaa amɛha lɛ. (Hebribii 13:17) Kɛ́ oosɔmɔ akɛ onukpa lɛ, Yehowa eha bo hegbɛ ko ni yɔɔ nyam waa ní okɛaaha ana bo akɛ oji nikeenii, loo jɔɔmɔ kɛha onyɛmimɛi lɛ. Obaanyɛ ofee nakai kɛtsɔ gbɛnaa nii ejwɛ komɛi ni he hiaa lɛ ahe nitsumɔ nɔ.
Be Mli ní ‘Saamɔ’ He Miihia
8. Ehe hiaa ní asáa wɔteŋ mɔ fɛɛ mɔ yɛ bei komɛi amli yɛ mɛɛ gbɛ̀i anɔ?
8 Klɛŋklɛŋ lɛ, akɛ “gbɔmɛi ateŋ nikeenii” lɛ hã “koni aŋɔsaa hetselɔi lɛ,” taakɛ Paulo kɛɛ lɛ. (Efesobii 4:12) Hela wiemɔ ni atsɔɔ shishi akɛ ‘saamɔ’ lɛ tsɔɔ nɔ ko ní “ahãa ejaa pɛpɛɛpɛ.”[6] Ákɛ adesai ni yeee emuu lɛ, ehe miihia ní asaa wɔteŋ mɔ fɛɛ mɔ yɛ be kɛ bei amli—ní ‘ahã’ wɔsusumɔ, wɔsubaŋi, loo wɔjeŋba kɛ Nyɔŋmɔ susumɔ kɛ esuɔmɔnaa nii ‘aja pɛpɛɛpɛ.’ Yehowa ejɛ suɔmɔ mli ekɛ “gbɔmɛi ateŋ nikeenii” eha koni amɛye amɛbua wɔ ní wɔfee tsakemɔ ni he hiaa lɛ. Mɛɛ gbɛ nɔ amɛtsɔɔ amɛfeɔ enɛ?
9. Onukpa baanyɛ aye abua kɛsáa too ni etɔ̃ lɛ yɛ mɛɛ gbɛ nɔ?
9 Bei komɛi lɛ, ekolɛ ebaabi ní onukpa ko aye abua too ko ní etɔ̃, ní ekolɛ ‘nɔtɔmɔ ko ebanina lɛ trukaa lɛ.’ Mɛɛ gbɛ nɔ onukpa lɛ baatsɔ aye abua? “Nyɛsáa nakai mɔ lɛ ekoŋŋ yɛ mlijɔlɛ mumɔ mli,” taakɛ Galatabii 6:1 lɛ kɛɔ lɛ. No hewɔ lɛ, kɛ́ onukpa ko kɛ ŋaawoo miiha lɛ, esaaa ni ekãa mɔ ni etɔ̃ lɛ hiɛ, ní ekɛ wiemɔi ni mli wawai tsuɔ nii. Esa akɛ ŋaawoo lɛ awo mɔ ni akɛhaa lɛ lɛ hewalɛ, shi jeee ní ‘ewo ehe gbeyei.’ (2 Korintobii 10:9; okɛto Hiob 33:7 he.) Ekolɛ mɔ lɛ nuɔ hiɛgbele he momo, no hewɔ lɛ nɔkwɛlɔ ni yɔɔ suɔmɔ lɛ baakwa wiemɔi ní ekɛaakumɔ mɔ lɛ mumɔ. Kɛ́ ŋaawoo, kɛ kamɔ ní mli wa po lɛ jɛ suɔmɔ mli, ní akɛha yɛ suɔmɔ mli hu lɛ, no lɛ eka shi faŋŋ akɛ ebaasaa mɔ ni etɔ̃ lɛ susumɔ loo ejeŋba, ni ebaakpale lɛ kɛba ekoŋŋ.—2 Timoteo 4:2.
10. Mɛni fata mɛi krokomɛi asaamɔ lɛ he?
10 Beni ekɛ “gbɔmɛi ateŋ nikeenii” lɛ haa kɛha wɔsaamɔ lɛ, no mli lɛ, nɔ ni yɔɔ Yehowa jwɛŋmɔ mli ji akɛ, onukpai lɛ afee mɛi ni hãa mɔ mumɔŋ hejɔɔmɔ, mɛi ní esa akɛ ewebii akase amɛ. (1 Korintobii 16:17, 18; Filipibii 3:17) Jeee mɛi ni ekɔ gbɛ ní ejaaa lɛ ajajemɔ pɛ he hiaa yɛ mɛi krokomɛi asaamɔ mli, shi moŋ yelikɛbuamɔ ní akɛaaha anɔkwafoi lɛ hu, koni amɛya nɔ amɛnyiɛ gbɛ ni ja lɛ nɔ.a Ŋmɛnɛ, akɛni naagbai ní kɛ nijiaŋwujee baa lɛ efa babaoo hewɔ lɛ, hewalɛwoo he miihia mɛi babaoo koni amɛnyɛ amɛya nɔ. Ekolɛ yelikɛbuamɔ ni jɛ suɔmɔ mli he baahia mɛi komɛi koni amɛha amɛsusumɔ kɛ Nyɔŋmɔ nɔ̃ akpã gbee. Ákɛ nɔkwɛmɔnɔ lɛ, Kristofoi anɔkwafoi komɛi wuɔ amɛshiɔ henumɔi ni mli wa waa, ní hãa amɛsusuɔ akɛ amɛsaaa loo amɛhe bɛ sɛɛnamɔ lɛ. Ekolɛ “mɛi ni tsui fãa” nɛɛ baanu he akɛ Yehowa nyɛŋ asumɔ amɛ kɔkɔɔkɔ, ni ákɛ amɛmɔdɛŋbɔɔ ni hi fe fɛɛ ni amɛkɛsɔmɔɔ Nyɔŋmɔ lɛ nyɛŋ asa ehiɛ kɔkɔɔkɔ. (1 Tesalonikabii 5:14) Shi susumɔ ní tamɔ nɛkɛ lɛ kɛ bɔ ni Nyɔŋmɔ nuɔ he yɛ ejálɔi ahe lɛɛlɛŋ lɛ enyiɛɛɛ pɛpɛɛpɛ.
11. Mɛni onukpai lɛ baanyɛ afee ni amɛkɛye amɛbua mɛi ni wuɔ amɛshiɔ henumɔi ní hãa amɛsusuɔ akɛ amɛsaaa lɛ?
11 Onukpai, mɛni nyɛbaanyɛ nyɛfee ní nyɛkɛye nyɛbua gbɔmɛi nɛɛ? Nyɛjɛa mlihilɛ mli nyɛkɛ amɛ agbaa Ŋmalɛ mli odaseyeli ni tsɔɔ akɛ Yehowa susuɔ etsuji ateŋ mɔ fɛɛ mɔ he lɛ he sane, ní nyɛmaa nɔ mi nyɛhaa amɛ akɛ Biblia mli ŋmalɛi nɛɛ kɔɔ amɛ diɛŋtsɛ amɛhe tɛ̃ɛ. (Luka 12:6, 7, 24) Nyɛyea nyɛbuaa amɛ ní amɛna akɛ Yehowa ‘egbala’ amɛ koni amɛbasɔmɔ lɛ, no hewɔ lɛ, eka shi faŋŋ akɛ enaa amɛ akɛ amɛhe yɛ sɛɛnamɔ. (Yohane 6:44) Nyɛmaa nɔ mi nyɛhaa amɛ akɛ jeee amɛ kome pɛ amɛyɔɔ enɛ mli—Yehowa tsuji anɔkwafoi babaoo ená henumɔi ni tamɔ nɛkɛ dã. Be ko lɛ, gbalɔ Elia hao waa, aahu akɛ eesumɔ ní egbo. (1 Maŋtsɛmɛi 19:1-4) Kristofoi ní afɔ amɛ mu, ní hi shi yɛ klɛŋklɛŋ afii oha lɛ mli lɛ ekomɛi nu he akɛ amɛ diɛŋtsɛ amɛtsuii ‘miibu amɛ fɔ.’ (1 Yohane 3:20) Le ní wɔɔle akɛ anɔkwafoi ni hi shi yɛ Biblia beaŋ lɛ ekomɛi ná “[henumɔi] tamɔ wɔ nɔŋŋ” lɛ baaha wɔná miishɛjemɔ. (Yakobo 5:17) Nyɛbaanyɛ nyɛkɛ mɛi ni nijiaŋ eje wui lɛ asusu Buu-Mɔɔ kɛ Awake! lɛ mli saji ni woɔ mɔ hewalɛ lɛ ahe. Nyɔŋmɔ, mɔ ni kɛ nyɛ hã akɛ “gbɔmɛi ateŋ nikeenii” lɛ, hiɛ kpaŋ mɔdɛŋ ní nyɛjɛɔ suɔmɔ mli nyɛbɔɔ koni nakai gbɔmɛi lɛ aná hekɛnɔfɔɔ ekoŋŋ lɛ nɔ kɔkɔɔkɔ.—Hebribii 6:10.
Asafoku lɛ “Tswaa”
12. Mɛni wiemɔ ni ji “Kristo gbɔmɔtso lɛ tswaa” lɛ tsɔɔ, ni mɛni ji nɔ titri ní tswaa asafoku lɛ emaa shi?
12 Nɔ ni ji enyɔ lɛ, akɛ “gbɔmɛi ateŋ nikeenii” lɛ hã kɛha “Kristo gbɔmɔtso lɛ tswaa.” (Efesobii 4:12) Paulo kɛ wiemɔi ní akɛtoɔ sane he miitsu nii yɛ biɛ. Wiemɔ “tswaa” lɛ hãa wɔkaiɔ tsumaa, ni “Kristo gbɔmɔtso lɛ” kɔɔ gbɔmɛi ahe—Kristofoi ní afɔ amɛ mu lɛ asafo lɛ mli bii lɛ.[9] (1 Korintobii 12:27; Efesobii 5:23, 29, 30) Esa akɛ onukpai lɛ aye abua amɛnyɛmimɛi lɛ ní amɛhe awa yɛ mumɔŋ. Oti ni ma amɛhiɛ ji ní ‘amɛha asafoku lɛ nane amɔ shi, jeee ní amɛwule amɛ.’ (2 Korintobii 10:8) Nɔ̃ titri ní tswaa asafoku lɛ emaa shi ji suɔmɔ, ejaakɛ ‘sumɔ hãa mɔ nane mɔɔ shi.’—1 Korintobii 8:1.
13. Ákɛ aaaná mlitsɔlɛ lɛ tsɔɔ mɛni, ni mɛni hewɔ ehe hiaa ní onukpai lɛ ajie mlitsɔlɛ kpo lɛ?
13 Suɔmɔ fã ko ní yeɔ ebuaa onukpai ní amɛtswaa asafoku lɛ ji mlitsɔlɛ. Ní aaaná mlitsɔlɛ lɛ tsɔɔ akɛ anuɔ he ahaa mɛi krokomɛi—anuɔ amɛsusumɔi kɛ henumɔi ashishi, ni asusuɔ amɛgbɔjɔmɔi ahe. (1 Petro 3:8) Mɛni hewɔ ehe hiaa ní onukpai lɛ aná mlitsɔlɛ lɛ? Nɔ ni fe fɛɛ lɛ, akɛni Yehowa—mɔ ni kɛ “gbɔmɛi ateŋ nikeenii” lɛ hã lɛ—ji Nyɔŋmɔ mlitsɔlɔ lɛ hewɔ. Kɛ́ etsuji miina amanehulu loo amɛyɛ piŋmɔ mli lɛ, enuɔ he ehaa amɛ. (2 Mose 3:7; Yesaia 63:9) Esusuɔ amɛgbɔjɔmɔi lɛ ahe. (Lala 103:14) Belɛ, te onukpai lɛ baafee tɛŋŋ amɛjie mlitsɔlɛ kpo?
14. Onukpai lɛ baanyɛ ajie mlitsɔlɛ kpo amɛtsɔɔ mɛi krokomɛi yɛ mɛɛ gbɛ̀i anɔ?
14 Kɛ́ mɔ ko ni nijiaŋ eje wui ba amɛ ŋɔɔ lɛ, amɛboɔ lɛ toi, ni amɛkpɛlɛɔ mɔ lɛ henumɔi anɔ. Amɛbɔɔ mɔdɛŋ ní amɛnu bɔ ni atsɔse amɛnyɛmimɛi lɛ aha, amɛsu kɛ baŋi, kɛ shihilɛi ní amɛyɔɔ mli lɛ ashishi. Kɛkɛ lɛ, kɛ́ onukpai lɛ kɛ Ŋmalɛ mli yelikɛbuamɔ ni tswaa mɔ emaa shi hã lɛ, ebaafee mlɛo kɛha tooi lɛ akɛ amɛaakpɛlɛ nɔ ejaakɛ ejɛ tookwɛlɔi ni nuɔ amɛ shishi lɛɛlɛŋ, ní susuɔ amɛhe lɛ aŋɔɔ. (Abɛi 16:23) Mlitsɔlɛ tsirɛɔ onukpai lɛ ni amɛsusuɔ mɛi krokomɛi agbɔjɔmɔi, kɛ henumɔi ní ekolɛ ejɛɔ mli baa lɛ hu he. Ákɛ nɔkwɛmɔnɔ lɛ, ekolɛ Kristofoi ní bɔɔ mɔdɛŋ lɛ ateŋ mɛi komɛi baanu fɔyeli he akɛni amɛnyɛɛɛ amɛfee babaoo yɛ Nyɔŋmɔ sɔɔmɔ mli, ekolɛ yɛ gbɔlɛ loo hela hewɔ lɛ hewɔ. Yɛ gbɛ kroko nɔ lɛ, ekolɛ hewalɛwoo he baahia mɛi komɛi koni amɛya hiɛ yɛ amɛsɔɔmɔ nitsumɔ lɛ mli. (Hebribii 5:12; 6:1) Mlitsɔlɛ baatsirɛ onukpai lɛ ní amɛtao “wiemɔi ni ŋɔɔ” ni tswaa mɛi krokomɛi emaa shi. (Jajelɔ 12:10) Kɛ́ atswa Yehowa tooi lɛ ama shi ní akanya amɛ lɛ, suɔmɔ ni amɛyɔɔ kɛha Nyɔŋmɔ lɛ baatsirɛ amɛ ní amɛfee nɔ fɛɛ nɔ ni amɛaanyɛ yɛ esɔɔmɔ mli!
Hii ni Woɔ Ekomefeemɔ he Hewalɛ
15. Wiemɔ ni ji “hemɔkɛyeli . . . ekomefeemɔ” lɛ tsɔɔ mɛni?
15 Nɔ ni ji etɛ lɛ, akɛ “gbɔmɛi ateŋ nikeenii” lɛ hã koni “wɔ fɛɛ [wɔshɛ] Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he.” (Efesobii 4:13) Wiemɔ kuku ni ji “hemɔkɛyeli . . . ekomefeemɔ” lɛ tsɔɔ ekomefeemɔ, jeee yɛ hemɔkɛyelii agbɛfaŋ pɛ kɛkɛ, shi moŋ yɛ heyelilɔi hu agbɛfaŋ. Belɛ, enɛ ji yiŋtoo kroko hu hewɔ ní Nyɔŋmɔ kɛ “gbɔmɛi ateŋ nikeenii” lɛ ha wɔ lɛ—ní amɛwo ekomefeemɔ he hewalɛ yɛ ewebii ateŋ. Mɛɛ gbɛ nɔ amɛtsɔɔ amɛfeɔ enɛ?
16. Mɛni hewɔ ehe hiaa ní onukpai lɛ aha ekomefeemɔ ahi amɛteŋ be fɛɛ be lɛ?
16 Klɛŋklɛŋ kwraa lɛ, esa akɛ amɛhiɛ ekomefeemɔ mli yɛ amɛ diɛŋtsɛ amɛteŋ. Kɛ́ tookwɛlɔi lɛ amli egbala lɛ, no lɛ ebaaha amɛkpoo tooi lɛ akwɛmɔ. Ekolɛ ebaaha kpeei ni sɛɛ tsɛɔ kɛ saji ni he ehiaaa ahe naataamɔi ahé be ni he hiaa ní kulɛ amɛbaanyɛ amɛkɛtsu nii ní amɛkɛkwɛ asafoku lɛ nɔ lɛ. (1 Timoteo 2:8) Jeee be fɛɛ be onukpai baakpã gbee yɛ sane fɛɛ sane ní amɛsusuɔ he lɛ he, ejaakɛ amɛji hii ni yɔɔ sui srɔtoi babaoo. Ekomefeemɔ etsɔɔɔ akɛ amɛnaŋ susumɔi srɔtoi aloo ní amɛaajie susumɔi nɛɛ akpo po yɛ gbɛ ní ŋmɛɔ pɛpɛɛpɛ nɔ beni amɛkɛ jwɛŋmɔ kpakpa susuɔ saji ahe lɛ. Onukpai báa ekomefeemɔ ni yɔɔ amɛteŋ lɛ yi kɛtsɔ bulɛ ni amɛkɛboɔ mɛi krokomɛi atoi, ní amɛnáaa amɛhe jwɛŋmɔ fɔŋ ko lɛ nɔ. Bei abɔ ní akuuu Biblia shishitoo mla ko mli lɛ, esa akɛ amɛteŋ mɔ fɛɛ mɔ ajɛ esuɔmɔ mli ekpɛlɛ naagbee yiŋkpɛɛ ni onukpai akuu lɛ feɔ lɛ nɔ ní efi sɛɛ. Sane nɔkpɛlɛmɔ mumɔ tsɔɔ akɛ “nilee ni jɛ ŋwɛi,” ni “[he] jɔ, ehiɛ kã shi” lɛ ji nɔ ni kudɔɔ amɛ.—Yakobo 3:17, 18.
17. Onukpai lɛ baanyɛ aye abua kɛbaa asafo lɛ ekomefeemɔ yi yɛ mɛɛ gbɛ nɔ?
17 Onukpai lɛ ahiɛ hiɔ amɛhe nɔ ni amɛwoɔ ekomefeemɔ he hewalɛ yɛ asafo lɛ mli hu. Kɛ́ sui ní kɛ mligbalamɔ baa—tamɔ oshekuyeli ní fiteɔ mɔ, mɛi anifeemɔi ahe susumɔi fɔji namɔ, loo béi mumɔ—kɛ toiŋjɔlɛ miiwo oshara mli lɛ, amɛkɛ ŋaawoo ni yeɔ buaa haa amrɔ nɔŋŋ. (Filipibii 2:2, 3) Ákɛ nɔkwɛmɔnɔ lɛ, ekolɛ onukpai lɛ le aŋkroaŋkroi komɛi ni wieɔ nii ahe waa, loo amɛsumɔɔ ni amɛkɛ amɛhe awo mɛi krokomɛi asaji amli, ni no hewɔ lɛ, amɛtsɔmɔ mɛi ní foɔ sane mli. (1 Timoteo 5:13; 1 Petro 4:15) Onukpai lɛ baaye abua gbɔmɛi ní tamɔ nɛkɛ ní amɛyoo akɛ gbɛ ní amɛkɔ nɛɛ kɛ nɔ ni Nyɔŋmɔ etsɔɔ wɔ lɛ kpãaa gbee, ni ákɛ esa akɛ wɔteŋ mɔ fɛɛ mɔ ‘atere lɛ diɛŋtsɛ ejatsu.’ (Galatabii 6:5, 7; 1 Tesalonikabii 4:9-12) Amɛkɛ Ŋmalɛi lɛ baatsu nii, ni amɛbaatsɔɔ mli akɛ Yehowa shĩɔ nibii babaoo ehaa wɔ aŋkroaŋkro henilee, ni esaaa akɛ wɔteŋ mɔ ko kojoɔ mɛi krokomɛi yɛ saji ni tamɔ nɛkɛ he. (Mateo 7:1, 2; Yakobo 4:10-12) Kɛ́ wɔɔsɔmɔ kutuu yɛ ekomefeemɔ mli lɛ, no lɛ esa akɛ hekɛnɔfɔɔ kɛ bulɛ shihilɛ ahi asafo lɛ mli. “Gbɔmɛi ateŋ nikeenii” lɛ yeɔ buaa wɔ koni wɔbáa wɔ toiŋjɔlɛ kɛ ekomefeemɔ lɛ yi, kɛtsɔ Ŋmalɛ mli ŋaawoo ní amɛkɛhaa wɔ kɛ́ ehe miihia lɛ nɔ.—Romabii 14:19.
Asafoku lɛ Hebuu
18, 19. (a) “Gbɔmɛi ateŋ nikeenii” lɛ buɔ wɔhe kɛjɛɔ namɛi ahe? (b) Mɛɛ oshara kroko ehe hiaa ní abu tooi lɛ ahe kɛjɛ he, ni onukpai lɛ tsuɔ nii kɛbuɔ tooi lɛ ahe yɛ mɛɛ gbɛ nɔ?
18 Nɔ ni ji ejwɛ lɛ, Yehowa kɛ “gbɔmɛi ateŋ nikeenii” lɛ hãa koni amɛbu wɔhe, koni hewalɛ ní ‘tsɔɔmɔ kɔɔyɔɔ fɛɛ tsɔɔmɔ kɔɔyɔɔ ní kpalaa mɛi kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa’ lɛ akaná wɔnɔ hewalɛ. (Efesobii 4:14) Awieɔ akɛ shishijee wiemɔ ní akɛtsu nii kɛha “ŋaa fɔŋ” lɛ shishinumɔ ji “shishiumɔ yɛ ludu tɛ fɔ̃ɔ mli”[10] aloo “hesaa ní akɛfɔ̃ɔ ludu tɛ yɛ ŋaa mli.”[11] Ani enɛ haaa wɔkai bɔ ni hemɔkɛyeli kwalɔi tsuɔ nii yɛ ŋaa mli lɛ?[12] Amɛkɛ naadɔkɔmɔ wiemɔi tsuɔ nii, ni amɛtsɔmɔɔ Ŋmalɛi lɛ, ni amɛbɔɔ mɔdɛŋ ní amɛlaka anɔkwa Kristofoi kɛjɛ amɛhemɔkɛyeli lɛ he. Esa akɛ onukpai lɛ ahiɛ ahi amɛhe nɔ yɛ “klaji fulɔi” nɛɛ ahe!—Bɔfoi lɛ Asaji 20:29, 30.
19 Ehe miihia ní abu Yehowa tooi lɛ ahe kɛjɛ osharai krokomɛi hu ahe. Blema tookwɛlɔ David kɛ ekãa bu etsɛ tooi lɛ ahe kɛjɛ kooloi ní mɔmɔɔ amɛ lɛ ahe. (1 Samuel 17:34-36) Ŋmɛnɛ hu, bei komɛi shɛɔ ní esa akɛ Kristofoi tookwɛlɔi ní susuɔ mɔ he lɛ afee ekãa ní amɛkɛbu asafoku lɛ, titri lɛ amɛteŋ mɛi ni tutuamɔ waaa lɛ ahe kɛjɛ mɔ fɛɛ mɔ ní baanyɛ ahao Yehowa tooi lɛ loo enyɛ amɛnɔ lɛ ahe. Onukpai lɛ ahe baafee oya ní amɛjie mɛi ní jeɔ gbɛ amɛfeɔ esha, ní amɛjeɔ gbɛ amɛkɛ shishiumɔ ŋaa, lakamɔ, kɛ ŋaatsɔɔ tsuɔ nii ní amɛkɛfeɔ efɔŋ lɛ kɛjɛ asafo lɛ mli.b—1 Korintobii 5:9-13; okɛto Lala 101:7 he.
20. Mɛni hewɔ wɔbaanyɛ wɔfee shweshweeshwe yɛ “gbɔmɛi ateŋ nikeenii” lɛ akwɛmɔ shishi lɛ?
20 Kwɛ bɔ ni wɔdaa shi babaoo yɛ “gbɔmɛi ateŋ nikeenii” lɛ he! Wɔbaanyɛ wɔfee shweshweeshwe, yɛ suɔmɔ mli ní amɛjɛɔ amɛkwɛɔ wɔnɔ lɛ mli, ejaakɛ amɛkɛ musuŋtsɔlɛ sáa wɔ, amɛjɛɔ suɔmɔ mli amɛtswaa wɔ amɛmaa shi, amɛkɛ klalofeemɔ báa wɔ ekomefeemɔ lɛ yi, ni amɛkɛ ekãa buɔ wɔhe. Shi te esa akɛ “gbɔmɛi ateŋ nikeenii” lɛ abu amɛ nitsumɔ yɛ asafo lɛ mli amɛha tɛŋŋ? Ni mɛɛ gbɛ nɔ wɔɔtsɔ wɔtsɔɔ akɛ wɔhiɛ sɔɔ amɛ? Abaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.
[Shishigbɛ niŋmai]
a Yɛ Hela Septuagint shishitsɔɔmɔ lɛ mli lɛ, akɛ feemɔ-wiemɔ ní atsɔɔ shishi akɛ “nyɛsáa” lɛ tsu nii yɛ Lala 17[16]:5, he ni David anɔkwafo lɛ sɔle yɛ akɛ enajifaamɔi amɔ̃ shi shiŋŋ yɛ Yehowa gbɛ̀i lɛ anɔ lɛ.[8]
b Ákɛ nɔkwɛmɔnɔ lɛ, kwɛmɔ “Sanebimɔi ni Jɛ Kanelɔi Adɛŋ” yɛ November 15, 1979, blɔfo Buu-Mɔɔ lɛ mli, yɛ baafai 31-2, kɛ “Nyɛhaa Wɔhia Efɔŋ” ni yɔɔ January 1, 1997 nɔ̃ lɛ baafai 26-9 lɛ.
Ani Okaiɔ?
◻ Namɛi ji “gbɔmɛi ateŋ nikeenii” lɛ, ni mɛni hewɔ Nyɔŋmɔ tsɔ Kristo nɔ ekɛ amɛ ha asafo lɛ?
◻ Te onukpai lɛ tsuɔ amɛnitsumɔ ni ji asafoku lɛ saamɔ lɛ he nii amɛhaa tɛŋŋ?
◻ Mɛni onukpai lɛ baanyɛ afee ní amɛkɛtswa amɛnanemɛi heyelilɔi lɛ amɛma shi?
◻ Onukpai lɛ baanyɛ abaa asafo lɛ ekomefeemɔ yi yɛ mɛɛ gbɛ nɔ?
[Mfoniri ni yɔɔ baafa 10]
Mlitsɔlɛ yeɔ buaa onukpai lɛ ni amɛwoɔ mɛi ni nijiaŋ eje wui lɛ hewalɛ
[Mfoniri ni yɔɔ baafa 10]
Ekomefeemɔ ni yɔɔ onukpai ateŋ lɛ woɔ ekomefeemɔ he hewalɛ yɛ asafo lɛ mli