Ninamɔ Baanyɛ Aka Ohemɔkɛyeli
NINAMƆ baanyɛ aka mɔ kpakpa lɛ hemɔkɛyeli. Ni aaabɔ mɔdɛŋ ana heloo naa nibii babaoo lɛ baanyɛ aha mɔ lɛ alaaje ehemɔkɛyeli. (1 Timoteo 6: 9, 10) Shi ninamɔ baanyɛ aka hemɔkɛyeli hu yɛ gbɛ kroko nɔ. Kɛ jalɔ ko yɔse akɛ efɔŋ feelɔi babaoo miina nii yɛ be mli ni lɛ lɛ enaa nɔ lɛ, no lɛ eeenyɛ eka lɛ ni edi gbɛ ni Nyɔŋmɔ gbeyeishemɔ bɛ mli sɛɛ. Enɛ eha Yehowa tsuji komɛi tete yiŋ efee amɛ kɔshikɔshi yɛ sɛɛnamɔ ni jɛɔ jalɛ sɛɛ ni adiɔ lɛ mli baa lɛ he!
Enɛ ba Asaf ni ji Levinyo lalafolɔ lɛ nɔ yɛ Israel maŋtsɛ David nɔyeli beaŋ. Asaf ji mɔ ni fo lalai ní alaa yɛ maŋ jamɔ mli lɛ. Efata Heman kɛ Yedutun he egba gbalɛi hu, ni ekɛ yijiemɔ kɛ shidaa ha Yehowa Nyɔŋmɔ kɛtsɔ saŋkutswaa nɔ. (1 Kronika 25:1; 2 Kronika 29:30) Eyɛ mli akɛ eji hegbɛ ni Asaf ena moŋ, shi Lala 73 tsɔɔ akɛ efɔŋ feelɔi lɛ aheloo naa ninamɔ lɛ kɛ kaa kpeteŋkpele ba ehemɔkɛyeli nɔ.
Asaf Subaŋ ni Oshara Yɔɔ Mli Lɛ
“Lɛlɛŋ, Nyɔŋmɔ hi ha Israel, ha mɛi ni tsuii amli tse lɛ. Shi mi lɛ, shwɛ fioo ni minaji agba afa, shwɛ sharao ni minaji ashane.” (Lala 73:1, 2) Asaf tsɔ wiemɔi nɛɛ anɔ ekpɛlɛ nɔ akɛ Yehowa hi ha Israel maŋ lɛ. Nakai titri eji kɛha mɛi ni “tsuii amli tse lɛ,” ejaakɛ amɛmiishwe ni amɛtuu amɛhe kwraa amɛha Nyɔŋmɔ kɛha egbɛi krɔŋkrɔŋ lɛ hetsemɔ. Kɛ wɔhiɛ nakai su lɛ, no lɛ, wɔbaajɔɔ Yehowa kɛtsɔ ehe ekpakpa wiemɔ nɔ, kɛ́ mɛi fɔji lɛ aninamɔ loo shihilɛi krokomɛi miika wɔ babaoo po.—Lala 145:1, 2.
Tsɛbelɛ, Asaf le Yehowa ekpakpa-feemɔ lɛ moŋ, shi shwɛ fioo ni enaji agba afa kɛjɛ jalɛ gbɛ lɛ nɔ. Etamɔ nɔ ni enaji miishane yɛ ais shikpɔŋ ko ni nɔ shãmɔɔ nɔ, yɛ be mli ni akɛ tɔlɛ daa foi kakadaŋŋ lɛ. Mɛni hewɔ ehemɔkɛyeli egbɔjɔ waa nɛkɛ? Etsɔɔ mli akɛ: “Ejaakɛ, beni mina bɔ ni mɛi fɔji shwereɔ lɛ, miye hewolɔi lɛ ahe awuŋa. Ejaakɛ amɛnaaa piŋmɔ ko kɛyashi gbele mli, ni amɛmusuŋ ejɔ amɛ ni ewo fɔ. Adesai ahaomɔ lɛ eko bɛ amɛnɔ, apiii amɛ tamɔ mɛi krokomɛi.”—Lala 73:3-5.
Mɛi fɔji aheloo gbɛfaŋ ninamɔ lɛ ha Asaf ye amɛhe awuŋa. Etamɔ nɔ ni amɛmiina toiŋjɔlɛ shihilɛ mli ŋɔɔmɔ, eyɛ mli moŋ akɛ amɛtsɔ juu kɛ fɔ̃ nɔ amɛbua ninamɔ naa. (Okɛto Lala 37:1 he.) Yɛ amɛ nɔ fɔŋ feemɔ fɛɛ sɛɛ lɛ, kɛ akwɛ amɛ lɛ amɛyɛ shweshweeshwe. Etamɔ nɔ ni amɛwala baa naagbee ni amɛnaaa gbele mli piŋmɔ ko ni yɔɔ gbeyei! Bei komɛi lɛ, amɛgboiɔ yɛ hejɔlɛ mli kɛ hekɛnɔfɔɔ, ni amɛleee nɔ ni ji mumɔŋ hiamɔ nii. (Mateo 5:3) Yɛ gbɛ kroko nɔ lɛ, Nyɔŋmɔ tsuji lɛ ekomɛi naa amanehulu yɛ hela kɛ gbele mli, shi ewajeɔ amɛ, ni amɛyɛ gbohiiashitee he hiɛnɔkamɔ ni miishɛɛ yɔɔ mli lɛ.—Lala 43:1-3; Yohane 5:28, 29.
Mɛi fɔji pii bɛ gbɔmɔtsoŋ hela ko he naagbai ni haaa amɛna amɛniyenii babaoo yeli lɛ mli ŋɔɔmɔ. “Amɛmusuŋ ejɔ amɛ ni ewo fɔ,” ni agbɛnɛ, amɛmusuŋ miihe afɛ́. Kɛlɛ, amɛbɛ “adesai ahaomɔ lɛ eko,” ejaakɛ amɛ lɛ ehe ehiaaa ni amɛpeleɔ amɛhe kɛnaa shihilɛ mli nibii, taakɛ bɔ ni adesai babaoo feɔ lɛ. Asaf mu sane naa akɛ mɛi fɔji lɛ, “apĩii amɛ tamɔ mɛi krokomɛi” lɛ. Titri lɛ, amɛnaaa kaai tamɔ bɔ ni ebaa jalɔi anɔ yɛ Yehowa jalɛ tɛi ni efolɔ eshwie shi ni amɛhiɔ shi yɛ naa yɛ Satan jeŋ fɔŋ nɛɛ mli hewɔ lɛ.—1 Yohane 5:19.
Akɛni mɛi fɔji lɛ shwereɔ hewɔ lɛ, Asaf tee nɔ ewie amɛhe akɛ: “Hewɔ lɛ amɛkuɛnii ji hewoo, yiwalɛ eha amɛhe tamɔ mama. Fɔ sɔŋŋ eha amɛhiŋmɛii ekɛ̃lɛ, amɛjieɔ amɛtsuiŋ jwɛŋmɔi lɛ kpo. Amɛyeɔ mɛi ahe fɛo, ni amɛkɛ yitso fɔŋ wieɔ amimyeli wiemɔi, amɛfaa amɛhe amɛwieɔ. Amɛhaa amɛnaa saa ŋwɛi he, ni amɛlilɛi kpeleɔ shikpɔŋ lɛ nɔ.”—Lala 73:6-9.
Mɛi fɔji woɔ henɔwomɔ tamɔ “kuɛnii,” ni amɛyiwalɛ nifeemɔ nii lɛ fa aahu akɛ, ‘ehaa amɛhe tamɔ mama.’ Akɛni amɛkɛ faishitswaa ehala amɛ diɛŋtsɛ amɛgbɛ hewɔ lɛ, amɛkɛ yiwalɛ yeɔ mɛi krokomɛi anɔ. Mɛi fɔji ahiŋmɛii boteko mli yɛ niyenii ni amɛnaaa hewɔ, shi moŋ ‘fɔ sɔŋŋ eha ekɛ̃lɛ̃,’ ni eje kpo faŋŋ yɛ shwilɛ tɔtɔrɔɔ ni jɛɔ fufeemɔ mlibaa lɛ hewɔ. (Abɛi 23:20) Akɛni amɛ ŋaatsɔɔi lɛ eye omanye aahu hewɔ lɛ, ‘amɛjieɔ amɛtsuiŋ jwɛŋmɔi lɛ akpo po. Amɛkɛ henɔwomɔ wieɔ ojo ni amɛtswaa lɛ he sane ni “amɛfaa amɛhe” amɛwieɔ. “Amɛhaa amɛnaa saa ŋwɛi he, ni amɛlilɛi kpeleɔ shikpɔŋ lɛ nɔ”! Akɛni amɛbɛ bulɛ kɛha mɔ fɛɛ mɔ ni yɔɔ ŋwɛi loo shikpɔŋ nɔ hewɔ lɛ, amɛbɔɔ Nyɔŋmɔ musu ni amɛgbeɔ adesai ahe guɔ.
Eka shi faŋŋ akɛ, jeee Asaf kome too pɛ nɔ ni enaa lɛ saa ehe yɛ gbɛ ni ejaaa nɔ. Ekɛɛ akɛ: “Hewɔ lɛ [Nyɔŋmɔ] maŋ lɛ kpaleɔ kɛbaa biɛ, ni nu ni fa amɛshɔshɔɔ amɛnuɔ. Ni amɛkɛɔ akɛ: ‘Te Mawu aaafee tɛŋŋ aleŋ? ni kolɛ ŋwɛinyo lɛ le nii?’” (Lala 73:10, 11) Hebri ŋmalɛ lɛ baanyɛ atsɔɔ akɛ, ekolɛ akɛni etamɔ nɔ ni mɛi fɔji lɛ miishwere hewɔ lɛ, Nyɔŋmɔ webii ateŋ mɛi komɛi náa jwɛŋmɔ ni ejaaa, ni amɛshihilɛ lɛ bafeɔ tamɔ mlakwalɔi anɔ lɛ nɔŋŋ, ni amɛkɛɔ akɛ: ‘Nyɔŋmɔ leee nɔ ni yaa nɔ, ni eteŋ shi eshiŋ mlakwamɔ.’ Yɛ gbɛ kroko nɔ lɛ, be mli ni anaa gbɔmɛi gbohii ni miifee mlakwamɔ nii ni etamɔ nɔ ni agbalaaa amɛtoi yɛ he lɛ haa ebafeɔ tamɔ nɔ ni ahã mɔ ko ebɔɔ loo tsofa ko ni joɔ, ni tsirɛɔ jalɔi lɛ ni amɛbiɔ akɛ: ‘Te aaafee tɛŋŋ ni Nyɔŋmɔ aaaya nɔ akwɛ ni enɛɛmɛi aya nɔ hu? Ani enaaa nɔ ni yaa nɔ nɛɛ?’
Be mli ni ekɛ eshihilɛ lɛ toɔ mɛi fɔji anɔ̃ he lɛ, Asaf kɛɛ akɛ: “Naa, mɛi fɔji ji mɛnɛɛmɛi, shi kɛlɛ daa nɛɛ amɛhe ejɔ amɛ, ni nii lɛ na kɛkɛ amɛnaa. Lɛlɛŋ, yakatswaa po mitsumɔ mitsui mli ni mifɔ midɛ yɛ bemyeli mli; ejaakɛ minaa nɔ daa jenamɔ, ni agbalaa mitoi daa leebi.” (Lala 73:12-14) Asaf nu he akɛ sɛɛnamɔ ko bɛ jalɛ nifeemɔ he. Mɛi fɔji lɛ shwereɔ, ni ekolɛ amɛnii lɛ, “ná kɛkɛ amɛnaa” kɛtsɔɔ ojotswaa nɔ. Etamɔ nɔ ni amɛnaaa nɔ fɔŋ feemɔ ni fe fɛɛ lɛ he toigbalamɔ, shi Asaf naa nɔ “daa jenamɔ”—kɛjɛ be mli ni eteɔ shi kɛjɛɔ wɔ mli aahu kɛyashiɔ be mli ni eyawɔɔ gbɛkɛ. Enu he akɛ Yehowa miigbala etoi daa leebi. Akɛni etamɔ nɔ ni enɛ esaaa hewɔ lɛ, eka Asaf hemɔkɛyeli.
Yiŋsusumɔi Jajemɔ
Yɛ naagbee lɛ, beni eyoo akɛ eyiŋsusumɔi lɛ ejaaa lɛ, Asaf kɛɛ: “Eji mikɛɛ akɛ ‘Mawie nɛkɛ kulɛ,’ naa, miye obii lɛ ayinɔbii lɛ ahe kutumpɔo! Beni mijwɛŋ bɔ ni mafee ni male enɛ lɛ, ewa tsɔ ha mi, kɛyashi beyinɔ ni mitee Mawu he krɔŋkrɔŋ lɛ, ni mikpa amɛnaagbee lɛ shi. Hɛɛ, okɛ amɛ eto hei ni shamɔɔ trotro, oŋɔɔ amɛ otswiaa shi, ni amɛkumɔɔ dukuduku. Kwɛ bɔ ni amɛtsɔmɔ amaŋfɔ hiŋmɛitswaa! Aloo amɛ kɛtee, ŋmiŋmi sɔŋŋ eha amɛta kwraa. Nuŋtsɔ, kɛ ohiɛ tsɛ lɛ, ooogbe amɛsubaŋ he guɔ tamɔ lamɔ ni ala ni hiɛ etsɛ.”—Lala 73:15-20.
Ehi akɛ Asaf ewieee eshiii, ejaakɛ eji ewie yɛ faŋŋ mli akɛ sɛɛnamɔ ko bɛ he akɛ aaasɔmɔ Yehowa kulɛ, no aaaje eweku lɛ mlibii ni ji jálɔi lɛ anijiaŋ wui loo eeegbɔjɔ amɛhemɔkɛyeli. Kwɛ bɔ ni ehi naakpa akɛ ooofee dioo ni ofee onii tamɔ bɔ ni Asaf fee lɛ! Bɔni afee ni ena nɔ hewɔ ni etamɔ nɔ ni mɛi fɔji lɛ yeɔ amɛhe kɛjɛɔ efɔŋ feemɔ mli yɛ be mli ni jalɔi lɛ naa nɔ hewɔ lɛ, etee Nyɔŋmɔ he krɔŋkrɔŋ lɛ. Nibii ni ebɔle lɛ kɛkpe lɛ ha Asaf jwɛŋ nii ahe yɛ kpoofeemɔ mli yɛ Yehowa jálɔi ateŋ, ni ajaje eyiŋsusumɔi lɛ. No hewɔ lɛ, kɛ wɔhao yɛ nɔ ni wɔnaa lɛ hewɔ lɛ, no lɛ nyɛhaa wɔtaoa wɔ sanebimɔi lɛ ahetoo kɛtsɔ Nyɔŋmɔ webii ni wɔkɛ amɛ aaabɔ lɛ nɔ fe nɔ ni wɔɔtse wɔhe banee.—Abɛi 18:1.
Asaf bayoo akɛ Nyɔŋmɔ kɛ mɛi fɔji eto “hei ni shamɔɔ trotro.” Akɛni amɛtswa amɛshihilɛ gbɛi lɛ amɛbɔle heloo gbɛfaŋ nibii ahe hewɔ lɛ, oshara yɛ akɛ abaakpata amɛhiɛ trukaa. Naagbee mli kwraa lɛ, gbele baanina amɛ yɛ gbɔlɛ be mli, ni amɛnii ni amɛna yɛ gbɛ fɔŋ nɔ lɛ haŋ amɛhi shi be kakadaŋŋ. (Lala 49:7-13) Amɛninamɔ lɛ baafee tamɔ lamɔ ní ala ni hoɔ oyayaayai. Ekolɛ toigbalamɔ aaanina amɛ po dani amɛaagbɔlɔ yɛ be mli ni amɛkpaa nɔ ni amɛduɔ lɛ. (Galatabii 6:7) Akɛni amɛje gbɛ amɛku amɛhiɛ amɛshwie Mɔ pɛ ni baanyɛ aye abua amɛ lɛ nɔ hewɔ lɛ, amɛnyɛɛɛ nɔ ko amɛfee, ni amɛbɛ hiɛnɔkamɔ. Kɛ Yehowa te shi eshi amɛ lɛ, ebaabu “[amɛ]subaŋ”—amɛgbojee kɛ amɛgbɛnaa lɛ—akɛ nihiinii.
Kwɛmɔ Onifeemɔ Jogbaŋŋ
Akɛni efeee enii yɛ gbɛ ni ja nɔ yɛ nɔ ni ena lɛ he hewɔ lɛ, Asaf kpɛlɛ nɔ akɛ: “Mitsui mli sha mi ni misabai amli tsurɔ mi, kwashia ji mi, ni mileee nii, mitsɔ tamɔ kooloo yɛ ohiɛ. Kɛlɛ mahi oŋɔɔ daa nɛɛ; ooomɔ mininejurɔ mli, okɛ oŋaawoo lɛ aaatsɔɔ mi gbɛ, ni kɛ fee sɛɛ lɛ, oooŋɔ mi kɛaatee anunyam mli.”—Lala 73:21-24.
Ni aaajwɛŋ mɛi fɔji aheloo gbɛfaŋ ninamɔ lɛ kɛ jalɔi anɔnaa lɛ he lɛ baanyɛ ashã mɔ lɛ tsui mli loo ewo emlila. Shihilɛ nɛɛ mli yeyeeye-feemɔ ha Asaf na nɔ babaoo yɛ —esabai amli—tɔ̃ɔ. Etsɔ tamɔ kooloo kwashia ko ni kɛ gbɔmɔtsoŋ henumɔ feɔ enii yɛ Yehowa hiɛ. Kɛlɛ, Asaf ‘yɛ Nyɔŋmɔ ni mɔɔ eninejurɔ mli lɛ ŋɔɔ daa nɛɛ.’ Kɛ wɔtɔ̃ yɛ wɔyiŋsusumɔ mli, shi wɔbo Yehowa ŋaawoo toi taakɛ Asaf fee lɛ, no lɛ Nyɔŋmɔ baamɔ wɔnine shi, ni efi wɔsɛɛ ni enyiɛ wɔhiɛ. (Okɛto Yeremia 10:23 he.) Eŋaawoo lɛ kɛ nitsumɔ pɛ nɔ abaanyɛ atsɔ ni anyiɛ wɔhiɛ kɛya wɔsɛɛ be miishɛɛ shihilɛ mli. Ekolɛ wɔhiɛ aaashwie shi be kukuoo ko, shi Yehowa baatsɔ lɛ sɛɛsɛɛ, ni ‘ekɛ wɔ aaatee woo kɛ anunyam’ mli.
Be mli ni ehiɛ sɔ bɔ ni ehe hiaa ni aŋɔ hiɛ afɔ Yehowa nɔ lɛ, Asaf kɛfata he akɛ: “Namɔ miyɔɔ yɛ ŋwɛi? ni kɛ mina bo lɛ, mitaooo nɔ ko yɛ shikpɔŋ lɛ nɔ. Kɛ miheloo kɛ mitsui miita lɛ, Nyɔŋmɔ ji mitsui tɛsaa kɛ migbɛfaŋnɔ kɛyaa naanɔ! Shi naa, mɛi ni kɛo teŋ jɛkɛ lɛ ahiɛ aaakpata; ofiteɔ mɛi fɛɛ ni jeɔ osɛɛ yabɔɔ ajwamaŋ lɛ. Shi mi lɛ, Nyɔŋmɔ ŋɔɔ hilɛ hi ha mi; mikɛ Nuŋtsɔ Yehowa efee mibobaa he, koni magba onitsumɔi lɛ fɛɛ.”—Lala 73:25-28.
Taakɛ Asaf ji lɛ, wɔbɛ mɔ ko akɛ ja Yehowa ni wɔkɛ wɔhe aaafɔ enɔ kɛha anɔkwa shweshweeshwe shihilɛ kɛ miishɛjemɔ (2 Korintobii 1:3, 4) No hewɔ lɛ ni wɔhiɛ aaakɔ̃ mɔ ko shikpɔŋ nɔ ninamɔ nɔ moŋ lɛ, nyɛhaa wɔsɔmɔa Nyɔŋmɔ ni wɔto jwetrii yɛ ŋwɛi. (Mateo 6:19, 20) Shidaamɔ kpakpa ni wɔɔna yɛ Yehowa hiɛ lɛ afee wɔmiishɛɛ nɔ. Kɛ wɔheloo kɛ wɔtsui tã tete lɛ, ebaawaje wɔ ni ebaawaje wɔtsui bɔni afee ni wɔkalaaje hiɛnɔkamɔ kɛ ekaafeemɔ yɛ nɔnaa mli. Yehowa ni akɛ lɛ aaabɔ gbagbalii lɛ ji ninamɔ ko ni jara wa waa. Kɛ wɔŋmɛɛ he lɛ, no lɛ, eeefee hiɛkpatamɔ kɛha wɔ kɛ mɛi fɛɛ ni kwaa lɛ lɛ. No hewɔ lɛ, nyɛhaa wɔbɛŋkɛa Nyɔŋmɔ ni wɔshɛrɛ wɔjatsui fɛɛ wɔfɔ enɔ, tamɔ bɔ ni Asaf fee lɛ. (1 Petro 5: 6, 7) Enɛ haa wɔmumɔŋ hilɛ-kɛ-hamɔ yaa hiɛ ni etsirɛɔ wɔ koni wɔgba Yehowa naakpɛɛ nitsumɔi lɛ ahe sane wɔtsɔɔ mɛi krokomɛi.
Hii Shi akɛ Mɔ ni Yeɔ Yehowa Anɔkwa
Asaf hao akɛni ena ni efɔŋ feelɔi miishwere yɛ ejaku maŋ Israel lɛ hewɔ. Mɛi ni hi shi yɛ Yehowa anɔkwa sɔɔlɔi ateŋ ji “mɛi fɔji” ni yeɔ hepupuumɔ, henɔwomɔ, awuiyeli, hefɛoyeli, kɛ ojotswaa he fɔ, ni amɛkɛɔ akɛ Nyɔŋmɔ leee nɔ ni amɛfeɔ lɛ. (Lala 73:1-11) Mɛɛ kɔkɔbɔɔ nɛ! Kɛ wɔɔsa Yehowa Nyɔŋmɔ hiɛ lɛ, no lɛ, esa akɛ wɔtsi wɔhe kɛjɛ sui ni tamɔ henɔwomɔ, awuiyeli, hefɛoyeli, kɛ anɔkwa ni ayeee he. Nyɛhaa Yehowa sɔɔlɔi fɛɛ ‘ayaa Nyɔŋmɔ he krɔŋkrɔŋ lɛ’ kɛtsɔ E-nɔkwa jálɔi lɛ ni wɔkɛ amɛ aaabua wɔhe naa daa lɛ nɔ, tamɔ bɔ ni Asaf fee lɛ. Yɛ anɔkwale mli lɛ, nyɛhaa mɛi fɛɛ ni sumɔɔ Yehowa lɛ ‘ahi Nyɔŋmɔ ŋɔɔ’ koni amɛŋɔ amɛhe amɛfɔ enɔ ni ewaje amɛ yɛ nɔnaa mli, ni nɔ ni mɛi aaakɛɛ loo ni amɛaafee kɔɔɔ he eko.—Lala 73:12-28; 3 Yohane 1-10.
Lɛlɛŋ, efɔŋ feelɔi lɛ aheloo naa ninamɔ lɛ baanyɛ aka wɔhemɔkɛyeli, tamɔ bɔ ni eka Asaf nɔ lɛ. Kɛlɛ, wɔbaanyɛ wɔŋmɛ wɔtsui shi yɛ nɛkɛ kaa nɛɛ mli, kɛ wɔkɛ wɔwala fɔ Yehowa sɔɔmɔ nɔ vii. Abaawo wɔ nyɔmɔ yɛ enɛ feemɔ hewɔ, ejaakɛ ‘Nyɔŋmɔ jeee mɔ ni yeɔ sane ni ejaaa ni ehiɛ aaakpa wɔnitsumɔ lɛ kɛ suɔmɔ deŋme ni wɔgbo yɛ egbɛi lɛ ahewɔ lɛ nɔ.’ (Hebribii 6:10) Wɔkaai ni wɔkɛkpeɔ lɛ baatsɔ “wɔmrɔmrɔ amanehulu, ni jaraaa” kɛ akɛto wɔnyɔmɔwoo lɛ he. (2 Korintobii 4:17) Afii 70 loo 80 mli nɔnaa lɛ po feɔ tamɔ mumɔ ko kɛkɛ ni amuɔ ni hoɔ yɛ wɔnaabui kɛ wɔmiiwie blɛoo kɛ akɛto naanɔ miishɛɛ shihilɛ ni Yehowa woɔ enɔkwa sɔɔlɔi lɛ ashi yɛ he lɛ he.—Lala 90:9, 10.
Eba akɛ wɔŋmɛŋ gbɛ kɔkɔɔkɔ ni mɛi fɔji aheloonaa ninamɔ lɛ ni wɔkɛaato wɔmanehulu ni wɔnaa yɛ jalɛ hewɔ lɛ he lɛ atsi wɔnaa kɛjɛ hemɔkɛyeli ni wɔjieɔ lɛ kpo akɛ Nyɔŋmɔ mumɔ lɛ yibii lɛ eko lɛ he. (Galatabii 5:22, 23; 1 Petro 3:13, 14) Satan mii baashɛ ehe kɛ wɔkase mɛi fɔji, ni tsɔɔ gbɛ fɔŋ nɔ amɛshwereɔ loo amɛnaa nii lɛ. Yɛ no najiaŋ lɛ, nyɛhaa wɔkɛ woo ahaa Yehowa gbɛi lɛ kɛtsɔ kaa ni baaha wɔkwa ejalɛ tɛi ni efolɔ eshwie shi lɛ ni wɔɔwuu wɔshi lɛ nɔ. (Zefania 2:3) Nyɛkahaa wɔhaoɔ yɛ mɛi fɔji ashweremɔ lɛ he, ejaakɛ, kɛ amɛtee hiɛ aahu lɛ, nɔ ni amɛbaanyɛ amɛna nɔŋŋ pɛ ji heloo naa ninamɔ. Ni mɛɛ sɛɛnamɔ kwraa yɔɔ no he? Anyɛŋ akɛ enɛ ato mumɔŋ ninamɔ ni mɛi ni jieɔ hemɔkɛyeli kpo yɛ Jeŋ muu fɛɛ nɔyelɔ Nuŋtsɔ Yehowa mli lɛ naa mli ŋɔɔmɔ lɛ po he.