“Ekwɔ Tamɔ Lebanon Tseneduru”

TSEI ni ale amɛ akɛ Arz Ar-rab, ni shishi ji “Nuntsɔ lɛ Tsenedurutsei” lɛ kwɛ̃ɔ yɛ Lebanon gɔji fɛfɛji lɛ anɔ. Átsĩ nɛkɛ tsei ni yɔɔ nyam ni yɔɔ frɔfrɔ daa nɛɛ, ní be ko lɛ ehà gɔji lɛ anɔ lɛ atã aaafee shii 70 yɛ Biblia lɛ mli—fe tsei krokomɛi.

Ŋmalɛi lɛ kɛ wiemɔi ni ji “eyɛ fɛo” kɛ “fɛfɛo” tsu nii ni ekɛtsɔɔ bɔ ni Lebanon tsenedurutsei ni yɔɔ nyam lɛ yɔɔ ha. (Salomo Lalai 5:15; Ezekiel 17:23) Kɛjɛ jeeŋmɔ beebe lɛ, tseneduru lɛ dalɛ kɛ bɔ ni etso lɛ tsɛɔ waa haa lɛ ehe gbɛi kɛha shiai ni amamɔɔ kɛ lɛlɛi afeemɔ kɛ agbɛnɛ hu tsu mli nibii ni akɛ tsei fee. Bɔ ni tso lɛ jeɔ ŋma kɛ esu ni ji etsuru ni yɔɔ kulɔkulɔ lɛ feɔ mɔ miishɛɛ waa, ni tso mli nu babaoo ni fa yɛ mli lɛ haaa efite ni kooloi bibii aye. Tsei lɛ kɛlɛ ni amɛdara waa diɛŋtsɛ, ni amɛkwɔlɛ aaafee mitai 37 kɛ amɛhe kutruku lɛ aaashɛ mitai 12, ni amɛyɛ shishifãi ni boteɔ shikpɔŋ tɔ̃ɔ ni yɔɔ hewalɛ waa. Ŋwanejee ko kwraa bɛ he akɛ ŋmɛnɛŋmɛnɛ beaŋ koo hayii ahe nitsulɔi ewie amɛhe akɛ “anunyam ni naa wa waa yɛ je lɛŋ tsei ateŋ”!

Biblia ŋmalɔ Ezekiel kɛ Mesia lɛ to tseneduru nine ni Nyɔŋmɔ diɛŋtsɛ tɛoɔ yɛ no beaŋ lɛ he yɛ gbalɛ naa. (Ezekiel 17:22) Yɛ anɔkwale mli lɛ, Hebri wiemɔ kɛha “tseneduru” lɛ jɛ eshishinumɔ diɛŋtsɛ ni shishi ji “koni efee shiŋŋ” mli. Ŋmɛnɛ, ehe miihia ni Mesia lɛ, Yesu Kristo sɛɛnyiɛlɔi lɛ hu ‘adamɔ shi shiŋŋ yɛ hemɔkɛyeli lɛ mli, ni amɛhe awa,’ tamɔ tseneduru ni kwɔ kakadaŋŋ ni kpeeɔ shihilɛ ni naa wa naa. (1 Korintobii 16:13) Te aaafee tɛŋŋ atsu enɛ he nii? Kɛtsɔ nibii ni náa mɔ nɔ hewalɛ ni jeee Kristofoi anifeemɔ lɛ, ni aaate shi awo ni afee shiŋŋ ni akɛŋmɛ tsui shi yɛ emuuyeli kɛ Nyɔŋmɔjamɔ hetuu-kɛhamɔ gbɛ ni akɔ lɛ mli. Awieɔ mɛi ni feɔ nakai lɛ ahe yɛ Biblia lɛ mli akɛ “jalɔ . . . [ni] kɛɔ kakadaŋŋ tamɔ Lebanon tseneduru.”—Lala 92:12, The New English Bible.