NAMƆ BAANYƐ ANU OKADI LƐ SHISHI PƐPƐƐPƐ?
“Osatofoi, nyɛle ŋwɛi kɛ shikpɔŋ nibii ashishitsɔɔmɔ shi te tɛŋŋ ni nyɛleee yinɔ nɛɛ Shishitsɔɔmɔ hu?”—LUKA 12:56.
1, 2. Mɛni Yesu henyɛlɔi lɛ nyɛɔ amɛleɔ kɛjɛɔ bɔ ni atatui lɛ tsakemɔ baa haa lɛ hewɔ, shi mɛni ji nɔ ni amɛnyɛɛɛ amɛnu shishi lɛ?
1 AMLAKUI ni le nii lɛ le gbɛ ni amɛtaoɔ no amɛtsoɔ bɔ ni atutui yɔɔ ha lɛ shishi ni amɛboɔ nɔ ni etsɔɔ lɛ toi. Taakɛ lalafoo wiemɔi komɛi to naa lɛ: “Kɛ ŋwɛi tsu gbɛkɛ lɛ, amlakui amiishɛɛ sane ni, Kɛ ŋwɛitsu leebi lɛ, amlakui kɛ kɔkɔbɔɔ tsuɔ nii.”
2 Nuŋtsɔ Yesu Kristo ha sane ko ni tamɔ nakai nɔŋŋ je kpo waa yɛ 2 be mli ni ehenyɛlɔi kɛ lɛ kpe Iɛ. Sanekpakpa lɛ ŋmalɔ, Luka, bɔ kpe ni amɛkpe nɛɛ he amaniɛ akɛ: “Ni ekɛɛ asafoi lɛ hu akɛ: Kɛ nyɛna atatu miiwo yɛ anaigbɛ lɛ, amrɔ lɛ nyɛkɛɔ akɛ: Nugbɔ baanɛ; ni ebaa mli nakai; ni kɛ wuoyi kɔɔyɔɔ miitswa lɛ, nyɛkɛɔ akɛ: Latsaa baaba ni ebaa mli. Osatofoi, nyɛle ŋwɛi kɛ shikpɔŋ nɔ nibii ashishitsɔɔmɔ; shi te tɛŋŋ ni nyɛleee yinɔ nɛɛ Shishitsɔɔmɔ hu?”—Luka 12:54-56.
3. Mɛɛ “okadi” ni yeɔ odase akɛ Yesu ji Mesia lɛ ehenyɛlɔi le nyɛɛɛ atsi nɔ lɛ?
3 Nakai henyɛlɔi kɛ henɔwolɔi lɛ baanyɛ atsɔɔ kɔɔyɔŋ tsakemɔ shishi, shi amɛji osatofoi babaoo tsɔ kɛ mɛi ni leee nɔ ko nɔ ko kwraa yɛ mumɔŋ akɛ amɛaanyɛ amɛnu nɔ ni saji titrii ni he hiaa lɛ tsɔɔ lɛ diɛŋtsɛ shishi. Yesu fee okadii sɔrɔtoi ni enɛ ye ebua mɛi ni tsui ja lɛ koni amɛhe lɛ amɛye. (Yohane 2:23) Shi, egbele lɛ yɛ Hehoo Gbi lɛ nɔ yɛ afi 33 Ŋ.B. lɛ kɛ eshitee yɛ gbi ni ji etɛ lɛ nɔ lɛ ji “okadi” titri ni tsɔɔ akɛ lɛ ji Mesia loo Kristo lɛ. (Mateo 12:38-41; Luka 11: 30) Wɔnaa yɛ biɛ akɛ Yesu henyɛlɔi lɛ bɔ mɔdɛŋ ni amɛtsĩ “okadi” lɛ naa. (Mateo 27:62–28:20; Bɔfoi lɛ Asaji 4:1-4) Shi dani eeekwɔ kɛaaya ŋwɛi lɛ, Yudafoi aaafee 500 sɔŋŋ batsɔmɔ eshitee lɛ he odasefoi. (1 Korintobii 15:3-6) Nakai nɔŋŋ hu ŋmɛnɛ, “okadi” ko yɛ ni anyɛŋ atsi nɔ loo aha nɔ. Ni wɔɔnu ekadi nɛɛ shishi pɛpɛɛpɛ lɛ ji wala kɛ gbele sane. Shi mɛni ji nakai “okadi” lɛ? Ni namɛi baanyɛ anu enɛ shishi pɛpɛɛpɛ?
Wɔ Gbi Nɛɛ Mli “Okadi” Lɛ
4. Ŋmɛnɛ, mɛɛ “okadi” ji nɔ ni anaa, ni mɛni ji emli nibii lɛ ekomɛi? (Mateo 24:3)
4 Yesu kaselɔi lɛ ebi lɛ akɛ: “Mɛni ji beni oba lɛ kɛ nibii agbɛjianɔtoo lɛ naagbee lɛ he okadii?” Yɛ hetoohamɔ mli lɛ, Kristo gba tawuu, hɔmɔ, shikpɔŋhosomɔi, kɛ “ba ni eba” yɛ Maŋtsɛyeli hewalɛ mli ni anaaa lɛ lɛ he “okadi” nɛɛ mli nibii babaoo ni eko bako ni tamɔ nakai da. Nɔ titri hu ni yɔɔ enɛ mli ji Maŋtsɛyeli shiɛmɔ ni yaa nɔ bianɛ ni Yehowa odasefoi fe 2,840,000 shiɛɔ yɛ shikpɔji 203 nɔ yɛ jeŋ fɛɛ lɛ. Buu Mɔɔ woji lɛ etsi enɛ kɛ odaseyelii krokomɛi ni haa Yesu “ba ni eba” lɛ he “okadi” lɛ baa mli lɛ ta shii abɔ.—Mateo yitsei 24, 25; Marko, yitso 13; Luka, yitso 21.
5. Mɛni hewɔ jeee sane he Yesu woɔ tsɔ yɛ be mli ni etsɛ klɛŋklɛŋ afii oha lɛ mli Yudafoi lɛ akɛ “yinɔbii fɔji kɛ gbalafitelɔi” lɛ?
5 Ajeee anɔkwale ni eji akɛ kɛjɛ be mli ni Jeŋ Ta I fɛ yɛ 1914 kɛbaa nɛɛ odaseyeli ni haa “okadi” lɛ baa mli Iɛ miifa babaoo lɛ he ŋwane. Mɛni ji nɔ ni esa akɛ enɛ atsɔɔ kɛha wɔ? Ojogbaŋŋ, wɔsumɔɔɔ ni wɔtamɔ Yudafoi lɛ ni hi shi yɛ afii ohai 19 ni eho lɛ mli ni tsɔɔ kɔɔyɔŋ tsakemɔ shishi jogbaŋŋ shi amɛku amɛhiɛ amɛshwie odaseyelii ni jwere amɛhiɛ faŋŋ lɛ anɔ ni amɛsumɔɔɔ ni amɛnu nɔ ni enɛ tsɔɔ diɛŋtsɛ kɛ nɔ ni baajɛ mli aba lɛ shishi yɛ anɔkwayeli mli lɛ. Jeeŋmɔ beebe dani enɛ aaaba lɛ, no mli Nyɔŋmɔ kɛ hewalɛ ha Mose koni efee okadii etɛ ni ekɛye ŋwɛi ni ajɛ ahala lɛ aha Israelbii ni naa amanehulu lɛ he odase. (2 Mose 4:1-31) Shi yɛ okadii babaoo ni fe etɛ lɛ fɛɛ sɛɛ lɛ, Yudafoi ni hi shi yɛ nakai klɛŋklɛŋ afii oha lɛ yinɔ lɛ mli lɛ sumɔɔɔ ni amɛkpɛlɛɔ Mesia lɛ nɔ akɛ Mɔ ni da fe Mose. (Yohane 4:54; Hebribii 2:2-4) No hewɔ lɛ jeee akɛ Yesu miiwo sane he tsɔ yɛ be mli ni etsɛ amɛ akɛ “yinɔ bii fɔji kɛ gbalafitelɔi” lɛ.—Mateo 12:39.
6. Mɛi ni le jeŋ saji miiwie mɛni agbɛnɛ yɛ jeŋ shihilɛi ahe?
6 Gbɔmɛi ni yɔɔ afii ohai 20 yinɔ nɛɛ mli ni sumɔɔɔ aloo amɛheee Yesu Kristo baa ni ji enyɔ lɛ amɛyeee lɛ kaneee gbɛjianɔtoo nɛɛ naagbee Iɛ he “okadi” Iɛ jogbaŋŋ loo pɛpɛɛpɛ. Shi ŋmɛnɛŋmɛnɛ shihilɛi lɛ haaa mɔ tsui anyɔ emli yɛ gbɛ ko gbɛ ko kwraa nɔ, taakɛ nɔkwɛmɔ nii ni nyiɛ sɛɛ nɛɛ tsɔɔ lɛ:
“Jeŋmaji Ekomefeemɔ lɛ Woloŋmalɔ Nukpa, Javier-Perez de Cuellar ewie akɛ je lɛ ebote shihilɛ be ko ni mli wa waa yɛ majimaji ateŋ saji ahiɛtsakemɔ yɛ ekãa naa mli lɛ mli, ni mɔdɛŋ ni abɔɔ koni ana majimaji ateŋ gbɛjianɔtoo ko ni ja, ni toiŋjɔlɛ yɔɔ mli ni yɔɔ shiŋŋ lɛ tamɔ nɔ ni egbɔjɔ. . . . ’Hekɛnɔfɔɔ ni kãa majimaji ateŋ ni laajeɔ lɛ kɛ hegbɛ baa koni béi kɛ tai ate shi,’ enɛ ji sane ni Jeŋmaji Ekomefeemɔ Woloŋmalɔ akpa lɛ kɛɛ.”—Indian Express, October 22, 1983.
“Wɔteŋ mɛi pii miiwie afii pii nɛ akɛ nuklea ta baagbe gbɔmɛi ni he bɛ sane nɛɛ mli lɛ ateŋ akpekpei babaoo ni ebaaba shikpɔŋ lɛ nɔ hei komɛi afee he ni mɔ ko bɛ jɛmɛ . . . aloo anyɛŋ ahi jɛmɛ dɔŋŋ. Jeŋ nilelɔi akuu ko ni abuɔ amɛ waa hu emu sane naa yɛ gbɛ ni yɔɔ gbeyei nɔ —ákɛ nuklea ta, aloo nuklea okpɛlɛmii ni jeŋ hewalɛi lɛ aaatswia, kɛ ekome kome po yɛ amɛteŋ lɛ kɛ jeŋ fɛɛ kɔɔyɔŋ tsakemɔ ko ni kɛ oshara baa baaba, ni nɔ ni baajɛ mli aba ji akɛ enɛ baanyɛ agbe gbɔmɛi akpekpei toi akpei abɔ moŋ fe akpekpei, ni ebaanyɛ eba akɛ ebaaha adesa wala yɛ shikpɔŋ nɔ aba naagbee po. Conference on the Long-term Worldwide Biological Consequences of Nuclear Warlɛ kɛ afii enyɔ fee nikasemɔ ni tamɔ nɛkɛ. Jeŋ nilelɔi fe 100 kpɛlɛ sane naamuu nɛɛ nɔ Carl Sagan . . . tsɔɔ nɔ ni baajɛ nuklea tawuu mli aba lɛ faŋŋ: ‘Adesai ashishi bulemɔ diɛŋtsɛ—lɛ baanyɛ aba.’”—The Express (Easton, Pa.) , November 3, 1983.
7. Nɛgbɛ esa akɛ mɛi ni sumɔɔ wala yɛ jeŋ kpakpa ko mli lɛ atao nɔmimaa lɛ kɛ́jɛ?
7 Shihilɛ ni miishɛɛ bɛ mli kwraa nɛɛ ji bo ni jeŋ nilelɔi komɛi ni wieɔ saji ahe lɛ kwɛɔ sane lɛ. Sane lɛ ewo amɛ duŋ, ejaakɛ amɛnyɛɛɛ amɛtsɔɔ gbɛ ko ni aaatsɔ nɔ aje oshara ni amɛnaa lɛ mli. Yɛ anɔkwale mli lɛ, mɛi ni sumɔɔ wala yɛ jeŋ kpakpa ko mli lɛ miisumɔ ni amɛnu sane ko ni baaha amɛna hiɛnɔkamɔ. Yɛ miishɛɛ mli lɛ, gbɛ ko yɛ ni akɛaaje oshara ni baa je lɛ nɔ lɛ mli, ejaakɛ mɛi komɛi yɛ kɛ̃ ni je je muu fɛɛ oshara ko ni ba nakailɛ mli. Ejaakɛ, eji mɛi komɛi ejeee Noa gbii lɛ amli Nu Afua lɛ mli kwraa kulɛ, gbɔmɛi fe (4,000,000,000) akpekpei toi akpei ejwɛ ehiŋ shikpɔŋ lɛ nɔ bianɛ! Wolo kome pɛ—Ŋmalɛ Krɔŋkrɔŋ lɛ ni ji Biblia Iɛ—kɛ bɔ ni fee ni gbɔmɛi kpaanyɔ pɛ kɛ kooloi sɔrɔtoi komɛi je nakai jeŋ fɛɛ hiɛkpatamɔ lɛ mli lɛ he sane haa wɔ.
8. Yɛ nɔ ni kɛ nɔ ni mɛi krokomɛi feɔ lɛ kpaaa gbee lɛ, mɛni esa akɛ Yesu kaselɔi lɛ afee beni aahe ajie ŋmɛnɛŋmɛnɛ nibii agbɛjianɔtoo nɛɛ kɛya lɛ?
8 Akɛni nakai wolo kome lɛ nɔŋŋ ni anyɛɔ akɛ he fɔɔ nɔ lɛ kɛ bɔ ni Yesu tsɔɔ shihilɛi ni baaba shikpɔŋ nɔ yɛ be mli ni ŋmɛnɛŋmɛnɛ nibii agbɛjianɔtoo ni abaajie kɛya lɛ kumɔɔ shwieɔ shi lɛ haa wɔ hewɔ lɛ, ani esaaa akɛ wɔbɔɔ mɔdɛŋ akɛ wɔnuɔ nakai “okadi” lɛ shishi pɛpɛɛpɛ? Afii nyɔŋmai etɛ kɛ kpawo dani Roma asraafoi lɛ aaakpata Yerusalem hiɛ yɛ afi 70 Ŋ.B. lɛ, Yesu kɛ nakai “okadi” ni nibii pii hɔlɔ mli ni baatsɔ je muu fɛɛ hiɛkpatamɔ ni Nu Afua lɛ fee he mfoniri lɛ hiɛ lɛ ha. Nɔ ni ekɛɛ kɛfata nibii krokomɛi ahe nɛ: “Ni okadii aaaba hulu kɛ nyɔŋtsere kɛ ŋulamii amli, ni jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye yɛ ŋshɔ kɛ ŋshɔkei agbɛɛmɔ hewɔ; ejaakɛ aaahoso ŋwɛi hewalɛi tete. Kɛkɛ lɛ amɛaana gbɔmɔ Bi lɛ akɛ eeba yɛ atatuŋ kɛ hewalɛ kɛ anunyam babaoo. Shi beni nibii nɛɛ aaatsɔ naa shi lɛ, no lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ.”—Luka 21:25-28.
9. Mɛɛ gbɛ nɔ atsɔ ajie nitsumɔ ni ka wolo tɛtrɛɛ nɛɛ nɔ lɛ kpo yɛ ehiɛ gbɛ loo ehehaa nɔ̃ lɛ sɛɛ kɛjɛ afi 1895 kɛbashi 1931?
9 Nakai gbalɛ lɛ fa je kpo yɛ Buu-Mɔɔ lɛ hiɛ, ni ji ehehaa nɔ̃ Iɛ sɛɛ kɛjɛ January 1, 1985 nɔ̃ lɛ nɔ aahu kɛbaashi October 1, 1931. Nɔ ni je kpo yɛ nakai Biblia mli sane lɛ yiteŋgbɛ ji buu mɔɔ ko ni la miikpɛ kɛmiijɛ nɔ, yɛ be mli ni ŋshɔ ko ni efee hamahama kɛ ŋshɔkei miihoso shishitoo ni nakai mɔɔ lɛ ma nɔ lɛ. Nɛkɛ gbɛ nɔ wolo nɛɛ teɔ etsɔɔ nitsumɔ ni akɛwo edɛŋ lɛ mli eha yinɔ ko ni emlibii lɛ ateŋ mɛi komɛi yɔɔ wala mli lolo ni amɛmiikane nɔ ni akala ni ohiɛ nɛɛ nɔŋŋ eko lɛ.
10. Te wɔɔfee tɛŋŋ wɔkwa gbeyeishemɔ ni etsɔ piŋmɔ ni baa ŋmɛnɛŋmɛnɛ adesai ahiɛnyiɛlɔi anɔ lɛ?
10 Ŋmɛnɛ, gbɔmɛi ni le jeŋ saji, ni amɛtsuii ekumɔ yɛ gbeyei hewɔ lɛ kɛ amɛ diɛŋtsɛ amɛ shishitsɔɔmɔ haa “okadi” ni nibii pii yɔɔ mli lɛ. Shi wɔ shishitsɔɔlɔ ni fe fɛɛ ji Yesu Kristo, ni kɛji akɛ wɔnu nɔ ni “okadi” ni ekɛha lɛ tsɔɔ lɛ shishi lɛ, wɔsheŋ gbeyei ní adesai ahiɛnyiɛlɔi ni leee gbɛ ni amɛaatsɔ nɔ amɛje jeŋ basabasafeemɔ nɛɛ mli lɛ sheɔ lɛ. Shi moŋ, wɔmli baafili wɔ ejaakɛ wɔkpɔmɔ kɛmiijɛ nɛkɛ yiwalɛ gbɛjianɔtoo nɛɛ mli lɛ miibɛŋkɛ
Be Ni Akadi Ni “Okadi” Lɛ Kɛbaaje Kpo
11. Mɛɛ gbɛ nɔ Yesu tsɔ etsɔɔ akɛ jeŋ saji ni tsɔɔ akɛ naagbee lɛ eshɛ lɛ baaba yɛ ebe naa pɛpɛɛpɛ.
11 Saji ni baa je lɛŋ lɛ miiba mli yɛ amɛbe naa pɛpɛɛpɛ. Yɛ mɛɛ gbɛ nɔ? Ojogbaŋŋ, dani Yesu kɛ gbalɛ ni aŋma afɔ shi yɛ Luka 21:25-28 lɛ aaaha lɛ, egba Yerusalem hiɛkpatamɔ ni ji enyɔ efɔ shi. Ni ewiemɔ lɛ ba mli anɔkwale, eba mli yɛ afi 70 Ŋ.B. Yesu wie yɛ Yudafoi ni baaje mli lɛ ahe akɛ: “Ni amɛaanyɔnyɔi yɛ klante naa, ni aaaŋɔ amɛ nom kɛaatee jeŋmaji fɛɛ mli, ni jeŋmaji lɛ aaanaanaa Yerusalem nɔ kɛyashi beyinɔ ni jeŋmaji abe lɛ aaashɛ.” Nakai jeŋmaji lɛ jeee Yudafoi, amɛji Jeŋmaji. No hewɔ lɛ afɔɔ nɔnaamɔ be nɛɛ tsɛmɔ akɛ “Jeŋmaji abei.” (Luka 21:24, NW,King James Version aloo Ga Biblia) Mɛɛ be mli amɛba naagbee? Ojogbaŋŋ, babaoo yɛ ni kɔɔ enɛ he fe nɔ ni ba shikpɔŋ nɔ Yerusalem nɔ lɛ. No hewɔ lɛ be ni Israelbii ni yɔɔ ŋmɛnɛ lɛ ŋɔ Yerusalem maŋtiase lɛ fã ni atswa blema gbogbo lɛ awo he lɛ, aloo yɛ anɔkwale ni eji akɛ eji ŋmɛnɛŋmɛnɛ beaŋ Israel maŋ ni eye ehe lɛ maŋtiase lɛ etsɔɔɔ nɔ ko kwraa. Nyɔŋmɔ be ni eto lɛ ji nɔ ni tsɔɔ nɔ ko!
12. Mɛɛ be mli Jeŋmaji Abɛi lɛ je shishi, te esɛɛkɛlɛ yɔɔ tɛŋŋ, ni mɛɛ be mli amɛba naagbee?
12 Romabii ni ji Jeŋmajiaŋbii lɛ je Yerusalem nɔnaamɔ shishi yɛ afi 63 D.Ŋ.B. Shi dani amɛaaba lɛ no mli lɛ Jeŋmajiaŋbii ni ji Helabii, Persia kɛ Babiloniabii lɛ enaanaa nakai “Maŋtsɛ agbo lɛ,” Yehowa, “maŋ” lɛ nɔ. (Mateo 5:34, 35) Babilonbii lɛ kpata maŋtiase nɛɛ kɛ esɔlemɔwe lɛ hiɛ yɛ afi 607 D.Ŋ.B. Kɛje nakai be lɛ nɔ kɛbaa lɛ, Jeŋmaji bɔi nɔ ni damɔ shi kɛha Nyɔŋmɔ Maŋtsɛyeli lɛ nɔnaamɔ shishi, ni Jeŋmaji Abei lɛ hu je shishi diɛŋtsɛ. Nakai Jeŋmaji Abɛi lɛ baafee kpawo, ni eko fɛɛ eko kɛ gbalɛ afi ko ni feɔ gbii 360 yeɔ egbɔ. No hewɔ lɛ, yɛ “gbi kome aaatsɔ afi” lɛ naa lɛ, “bei kpawo” lɛ fɛɛ baafee afii 2,520. (Daniel yitso 4; 4 Mose 14:34; Ezekiel 4:6) Enɛ je shishi kɛ Yerusalem amaŋfɔfeemɔ yɛ afi 607 D.Ŋ.B., ni amɛbaaba naagbee yɛ 1914 Ŋ.B.
13. Kɛjɛ mɛɛ be mli Biblia kaselɔi ele he ni Jeŋmaji Abɛi lɛ kɛbaaba naagbee?
13 Jeeŋmɔ beebe yɛ afi 1880 ni Buu-Mɔɔ wolo tɛtrɛɛ lɛ wie akɛ Jeŋmaji Abei lɛ mli baakpã kɛyashi 1914. Kɛkɛ ni yɛ be mli ni akala wolo ni ji the book The Time Is at Hand lɛ yɛ 1889 lɛ, ahɛle Biblia kaselɔi ni yɔɔ jeŋ fɛɛ lɛ ashi ekoŋŋ yɛ anɔkwale ni eji akɛ Jeŋmaji Abei lɛ baaba naagbee yɛ 1914 gbo be mli lɛ he.
14. Yɛ nɔ ni ba Yerusalem nɔ yɛ afi 1948 lɛ fɛɛ sɛɛ lɛ, mɛni hewɔ wɔbaanyɛ wɔkɛɛ akɛ Jeŋmaji Abɛi lɛ ba naagbee yɛ 1914 lɛ?
14 Ojogbaŋŋ, belɛ ani maji ni jeee Yudafoi, aloo Jeŋmaji lɛ kpa blema Yerusalem nɔnaamɔ? Dabi, ejaakɛ no mli lɛ nakai yinɔsane maŋ lɛ yɛ Turkibii amaŋtsɛyeli lɛ ni fata Germane he kɛwuu ta lɛ dɛŋ lolo. December 9, 1917 dani Ŋlesi asraafoi ni yɔɔ Tatsɛnukpa Allenby shishi lɛ he maŋ lɛ kɛje Turkibii adɛŋ. Yerusalem tee nɔ ehi Ŋleshi nɔyeli shishi yɛ Jeŋmaji Akpaŋmɔ lɛ ni kɛwo amɛdɛŋ lɛ hewɔ. Ni enɛ tee nɔ aahu kɛbashi 1948. Kɛkɛ ni Yudafoi lɛ te shi ni amɛhe ŋmɛnɛŋmɛnɛ beaŋ Yerusalem lɛ fa ni yɔɔ anaigbɛ lɛ yɛ gbogbo momo lɛ sɛɛ lɛ. Ni Mohamedanbii lɛ ŋɔ maŋtiase lɛ fa ni atswa gbogbo awo he lɛ. Belɛ te wɔɔfee tɛŋŋ wɔkɛɛ akɛ Jeŋmaji Abei lɛ ba naagbee yɛ 1914 hu? Ejaakɛ nakai afi lɛ mli afɔ́ Maŋtsɛ agbo lɛ, Yehowa, nɔyeli lɛ yɛ ŋwɛi.
15, 16. (a) Kɛje mɛɛ be mli Yerusalem momo lɛ ebafeee Yehowa “Maŋtsɛ agbo lɛ maŋ” dɔŋŋ lɛ, shi mɛɛ Yerusalem ni awo nɔ gojoo moŋ yɔɔ? (b) Belɛ nɛgbɛ mɔ Yehowa baanya awo Yesu Kristo Maŋtsɛ yɛ?
15 Beni Yesu yɔɔ shikpɔŋ nɔ lɛ, no mli lɛ Nyɔŋmɔ sɔlemɔwe lɛ yɛ Yerusalem, ni Yesu já yɛ jɛmɛ. No hewɔ lɛ abaanyɛ atsɛ Yerusalem akɛ “Maŋtsɛ agbo lɛ,” Yehowa, “maŋ.” (Mateo 6:34, 35) Shi eka shi faŋŋ akɛ beni sɔlemɔtsu lɛ mli muhɔɔ lɛ mli gba enyɔ kɛjɛ yiteŋ kɛbayi shi yɛ Yesu gbele be yɛ Hehoo Gbi lɛ nɔ yɛ afi 33 Ŋ.B. lɛ, eba naagbee akɛ Yehowa maŋtsɛmɛi amaŋ. Yerusalem kɛ esɔlemɔwe lɛ ni Romabii Jeŋmajiaŋbii lɛ kpata hiɛ yɛ afi 70 Ŋ.B. lɛ maa anɔkwasane nɛɛ nɔ mi. Nɔ ni yɔɔ miishɛɛ kɛha Kristofoi ni ji Yudafoi lɛ kɛ Kristofoi krokomɛi fɛɛ kɛjɛ nakai be lɛ mli kɛbaa lɛ ji akɛ, Yerusalem kroko yɛ, eko ni awo nɔ kɛtee ŋwɛi shɔŋŋ, “ŋwɛi Yerusalem.”—Hebribii 12: 22.
16 Yɛ nɔ ni kɛ anɔkwasane nɛɛ yaa pɛpɛɛpɛ lɛ, Yesu gbalɛ ni aŋma afɔ shi yɛ Luka 21:24 lɛ je shishi ekɔ shikpɔŋ nɔ Yerusalem he shi ebaaya ayagbe naa akɛ nɔ ni kɔɔ “ŋwɛi Yerusalem” lɛ he. Hɛɛ, ejaakɛ ŋwɛi Yerusalem lɛ ebaye shikpɔŋ nɔ Yerusalem lɛ najiaŋ akɛ “Maŋtsɛ agbo” lɛ, Yehowa Nyɔŋmɔ, “maŋ.” Nakai ŋwɛi “maŋ” lɛ ji he ni Yehowa, “Maŋtsɛ agbo Iɛ” baawo e-Bi Yesu Kristo ni awo ehiɛ nyam lɛ maŋtsɛ yɛ Jeŋmaji Abei lɛ naagbee yɛ 1914.
17. Mɛɛ ŋwɛi famɔ akɛha Maŋtsɛ Yesu Kristo ni ta sɛi nɔ lɛ yɛ Jeŋmaji Abɛi lɛ naagbee, ni namɛi jɛ amɛsuɔmɔ mli amɛkɛ amɛhe ha esɔɔmɔ lɛ?
17 Enɛ ji be ni ajɛ ŋwɛi ato ni Yehowa Nyɔŋmɔ baafã e-Bi Yesu Kristo ni ta maŋtsɛsɛi nɔ lɛ koni etsu wiemɔi ni yɔɔ Lala 110: 2, 3 lɛ he nii: “Ohewalɛ tso lɛ, Yehowa aaakpa mli kɛaajɛ Zion ahao: Ye lumɔ yɛ ohenyɛlɔi lɛ ateŋ! Omaŋ lɛ aaaba yɛ ota gbi lɛ nɔ, yɛ amɛsuɔmɔ naa, yɛ hewulamɔ krɔŋkrɔŋ mli; obalahii asafo lɛ baa tamɔ bɔ jɛɔ jetsɛremɔ musuŋ lɛ.” Yɛ gbalɛ nɛɛ kɛ gbeekpamɔ naa lɛ, ‘maŋbii’ ni amɛjɔɔ amɛhe nɔ ni nyiɛ Yesu nanemaahei asɛɛ ni amɛyoo Jeŋmaji Abei lɛ naagbee yɛ 1914 lɛ jɛ amɛsuɔmɔ mli amɛkɛ amɛhe ha akɛ amɛaasɔmɔ akɛ Yehowa Nyɔŋmɔ nɔyeli ni eje shishi ehee yɛ ŋwɛi Zion kɛtsɔ Nuŋtsɔ Yesu Kristo nɔ lɛ he adafitswalɔi. Shi mɛi ni akɛɛ atsɛɔ amɛ Kristofoi amaji lɛ jɛɛɛ amɛsuɔmɔ mli amɛŋmɛɛɛ amɛhe amɛhaaa Maŋtsɛ hee ni Yehowa Nyɔŋmɔ kɛ lɛ eta sɛi nɔ lɛ. Yɛ anɔkwale mli lɛ amɛbatsɔmɔ “ehenyɛlɔi” moŋ, ejaakɛ amɛkɛ amɛhe wo adesa yinɔsane mli klɛŋklɛŋ jeŋ ta ni awuu yɛ jeŋ nɔyeli he lɛ mli. Ni amɛbɔ mɔdɛŋ akɛ amɛaatsĩ Nyɔŋmɔ Maŋtsɛyeli lɛ he sane lɛ jajemɔ naa yɛ jeŋ fɛɛ.
18. Mɛɛ odaseyeli yɔɔ yɛ 1918 ni tsɔɔ akɛ aanyɛ Nyɔŋmɔ Maŋtsɛyeli lɛ?
18 Nyɛ̃ɛ ni ayɔɔ kɛha Nyɔŋmɔ Maŋtsɛyeli lɛ bafee faŋŋ titri lɛ yɛ 1918. Yɛ May 8, 1,918 lɛ, amɔmɔ Buu-Mɔɔ wolo tɛtrɛɛ lɛ ŋmalɔ lɛ kɛ enanemɛi nitsulɔi lɛ ateŋ mɛi komɛi yɛ be ni ta eye amɛ sɛkɛ nɛɛ mli. Yɛ sɛɛ mli, yɛ June 21 lɛ, awo amɛ tsuŋ afii pii yɛ‘Nɔyeli lɛ tsuŋwoo he ni yɔɔ Atlanta, Geogia, U.S. Amerika lɛ. Beni ta lɛ eba naagbee ni amɛye nyɔji nɛɛhu yɛ gboklɛfoi atsuŋ lɛ sɛɛ dani aŋmɛ gbɛ ni aŋmɛɛ Nyɔŋmɔ Maŋtsɛyeli lɛ he sɔɔlɔi nɛɛ ahe koni kɛ fee sɛɛ ni akwɛ amɛsane lɛ mli ekoŋŋ. Shi beni be shwieɔ mli lɛ, amɛbaye amɛhe kwraa kɛjɛ apasa naafolɔmɔi ni akɛfɔ amɛnɔ lɛ fɛɛ mli.
19. Yɛ Jeŋ Taŋ I sɛɛ Iɛ, mɛɛ shidaamɔ Amerika Maŋ Sɔlemɔi Agwabɔɔ lɛ kɔ yɛ Jeŋmaji Akpaŋmɔ lɛ he?
19 Jeŋ Ta I ba naagbee yɛ November 11, 1918, ni nyɔŋ ni nyiɛ sɛɛ lɛ mli ni Kristo Sɔlemɔi Agwabɔɔ ni yɔɔ Amerika Iɛ jaje yɛ faŋŋ mli akɛ efiɔ Jeŋmaji Akpaŋmɔ ni ato yiŋ yɛ he lɛ sɛɛ. Nakai Nyɔŋmɔ-jamɔ kuu lɛ jaje akɛ Kpaŋmɔ Iɛ ji “Nyɔŋmɔ Maŋtsɛyeli lɛ kpojiemɔ yɛ maŋkwramɔŋ yɛ shikpɔŋ nɔ.” U.S. Amerika ku ehiɛ eshwie nɔ ni jamɔi nɛɛ ejie yi amɛtsɔɔ lɛ nɔ, ni yɛ maŋkramɔŋ yiŋtoi komɛi ahewɔ Iɛ ekpoo akɛ ekɛ ehe aaabɔ Kpaŋmɔ lɛ he, ni Jeŋ Saneyeli He lɛ pɛ ekɛ ehe bɔ he. Ni kɛlɛ Kpaŋmɔ lɛ bɔi nitsumɔ yɛ afi 1920 shishijee mli, ni Maŋ Sɔlemɔi Agwabɔɔ lɛ kɛ ejɔɔmɔ kɛ esɛɛfimɔ ha enɛ.
20. Mɛɛ shidaamɔ Yehowa webii kɔ yɛ Kpaŋmɔ Lɛ he, ni mɛni ji nɔ ni amɛje shishi akɛ amɛaatswa he adafi?
20 Shi yɛ gbɛ kroko nɔ lɛ, Buu-Mɔɔ wolo tɛtrɛɛ lɛ kɛ Yehowa webii ni jaa wolo tɛtrɛɛ nɛɛ kpoo akɛ amɛaakpɛlɛ nɔ akɛ Jeŋmaji Akpaŋmɔ Iɛ ji maŋkwramɔŋ nɔ ko ni akɛmiito Nyɔŋmɔ Maŋtsɛyeli lɛ najiaŋ. Amɛbuuu enɛ akɛ nɔ ni miiha sɔlemɔ nɔkwɛmɔ nɔ ni Yesu Kristo tsɔɔ lɛ aba mli, akɛ: “Ha omaŋtsɛyeli lɛ aba. Ha afee osuɔmɔnaa nii yɛ shikpɔŋ nɔ, taakɛ afeɔ yɛ ŋwɛi hu lɛ.” (Mateo 6:9, 10, NW) Amɛkɛ amɛhe haaa nakai gbɛjianɔ ni ato lɛ, nakai shishiumɔ nii lɛ sɔɔmɔ! Shi moŋ amɛkɛ amɛhe ha Nyɔŋmɔ Maŋtsɛyeli lɛ diɛŋtsɛ ni yɔɔ Yesu Kristo dɛŋ yɛ “ŋwɛi Yerusalem” lɛ. Yɛ Nyɔŋmɔ yelikɛbuamɔ naa lɛ, amɛnu Yesu “ba ni eba lɛ kɛ nibii agbɛjianɔtoo lɛ naagbee” lɛ he “okadi” lɛ shishi pɛpɛɛpɛ. No hewɔ lɛ amɛje shishi akɛ amɛaatswa Maŋtsɛyeli Iɛ he adafi yɛ jeŋ fɛɛ.a
[Shishigbɛ niŋmaa]
a Ajie kɛjɛ February 1, 1985 Watchtower lɛ mli.
Mɛni Ji Oheloo?
◻ Mɛɛ “okadi” anaa ŋmɛnɛ, ni mɛni ji emli nibii lɛ ekomɛi?
◻ Te wɔɔfee tɛŋŋ wɔkwa gbeyei ni adesai hiɛnyiɛlɔi lɛ sheɔ ŋmɛnɛ lɛ?
◻ Mɛɛ be mli Jeŋmaji Abei lɛ je shishi ni eba naagbee?
Mɛɛ “Yerusalem” Yehowa ewo Yesu Kristo akɛ Maŋtsɛ yɛ mli lɛ?
◻ Te Yehowa webii susu Jeŋmaji Akpaŋmɔ lɛ he amɛha tɛŋŋ?
[Akrabatsa ni yɔɔ baafa 11]
October, 607 B.C.E.—October, 1 D. Ŋ. B. = 606 years
October, 1 B.C.E.—October, 1914 Ŋ. B. = 1,914 years
JEMAJI ABEI KPAWO = 2,520 years
[Mfoniri ni yɔɔ baafa 12]
Mɛi ni nuɔ “okadi” lɛ shishi pɛpɛɛpɛ lɛ baanyɛ aje nibii agbɛjianɔtoo nɛɛ naagbee lɛ mli, taakɛ mɛi kpaanyɔ je Nu Afua lɛ mli lɛ