Nyɔŋmɔ Gbeyeishemɔ Ni Wɔɔna
“She Yehowa gbeyei, ni oje efɔŋ he!”—ABƐI 3:7.
1. Aŋma Abɛi awolo lɛ aha namɛi?
MUMƆŊ ŋaawoo ni tamɔ jwetri diɛŋtsɛ ji nɔ ni yɔɔ Abɛi awolo lɛ mli. Yehowa kɛ gbɛtsɔɔmɔ he wolo nɛɛ ha kɛjɛ shishijee koni akɛtsɔɔ emaŋ ni ji Israel nii. Nɔ ni etsuɔ ŋmɛnɛ ji nilee wiemɔi ni ekɛhaa e-Kristofoi amaŋ krɔŋkrɔŋ lɛ ni “je lɛ naagbee lɛ enina [amɛ] lɛ.”—1 Korintobii 10:11; Abɛi 1:1-5; 1 Petro 2:9.
2. Mɛni hewɔ kɔkɔbɔɔ ni yɔɔ Abɛi 3:7 lɛ kɔɔ wɔbe nɛɛ he waa ŋmɛnɛ lɛ?
2 Kɛ wɔgbele kɛtee Abɛi 8:7 lɛ, wɔkaneɔ akɛ: “Kaabu ohe nilelɔ; she Yehowa gbeyei, ni oje efɔŋ he!” Kɛjɛ wɔ klɛŋklɛŋ fɔlɔi lɛ agbii lɛ amli, beni Onufu lɛ laka Hawa kɛ shiwoo akɛ “[amɛ]aale ekpakpa kɛ efɔŋ” lɛ kɛbaa nɛɛ, adesa nilee nyɛko atsu adesai ahiamɔ nii ahe nii. (1 Mose 3:4, 5; 1 Korintobii 3:19, 20) Yinɔsane mli be ko bako ni enɛ efee faŋŋ babaoo fe afii 20 nɛɛ mli—“naagbee gbii” ni adesai miikpa yibii ni ji Nyɔŋmɔ ni aleee kɛ sutsakemɔ he susumɔ, ni gbɔmɛi amligbalamɔ, awuiyeli kɛ jeŋba shara fɛɛ miihao adesai nɛɛ amli. (2 Timoteo 3:1-5, 13; 2 Petro 3:3, 4) Eji ‘jeŋ gbɛjianɔtoo hee mli basabasa-feemɔ’ ni Jeŋmaji Ekomefeemɔ lɛ loo je lɛŋ jamɔi ni mli egbala babaoo lɛ nyɛŋ ana naa.
3. Mɛni nibii agba akɛ ebaaba mli yɛ wɔgbii nɛɛ amli?
3 Nyɔŋmɔ gbalɛ Wiemɔ lɛ bɔɔ wɔ amaniɛ akɛ daimonioi atai etee “maŋtsɛmɛi ni yɔɔ jeŋ muu lɛ fɛɛ lɛ aŋɔɔ, koni amɛyabua amɛnaa kɛya Nyɔŋmɔ Ofe lɛ gbi wulu lɛ nɔ ta lɛ . . . kɛtee he ko ni atsɛɔ jɛi yɛ Hebri wiemɔ mli akɛ Har-Magedon lɛ.” (Kpojiemɔ 16:14, 16) Etsɛŋ ni gbeyeishemɔ ko ni jɛ Yehowa ŋɔɔ baanina nakai maŋtsɛmɛi, loo shikpɔŋ nɔ nɔyelɔi lɛ. Ebaatamɔ gbeyei loo ŋmiŋmi ni mɔmɔ Kanaanbii lɛ beni Yoshua kɛ lsraelbii lɛ ba koni amɛbakpata amɛhiɛ lɛ. (Yoshua 2:9-11) Shi ŋmɛnɛ lɛ, lɛ ji Mɔ ni Yoshua fee ehe mfoniri lɛ, Kristo Yesu —“maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ” lɛ—ni ‘baatswia jeŋmaji lɛ anii ni ekɛ dadetso akpala amɛ’ ni ekɛjie “Nyɔŋmɔ Ofe lɛ mlifu ni naa wa lɛ” kpo lɛ.—Kpojiemɔ 19:15, 16.
4, 5. Namɛi anine baashɛ yiwalaheremɔ nɔ, ni mɛni hewɔ?
4 Namɛi ayiwala abaahere yɛ nakai be lɛ mli? Jeee mɛi ni gbeyei loo ŋmiŋmi emɔmɔ amɛ lɛ, shi mɛi fɛɛ ni ena Yehowa gbeyeishemɔ ni woo yɔɔ mli lɛ ni. Ni amɛaabu amɛhe nilelɔi moŋ lɛ, mɛnɛɛmɛi “je[ɔ] efɔŋ he.” Amɛkɛ heshibaa kaseɔ nibii kpakpai amɛwoɔ amɛjwɛŋmɔi amli, koni amɛkɛtsimɔ efɔŋ ni yɔɔ amɛjwɛŋmɔi amli lɛ anɔ. Amɛyɛ bulɛ kpakpa kɛha Nuŋtsɔ Maŋtsɛ Yehowa, “shikpɔŋ fɛɛ nɔ Kojolɔ,” ni miihe akpata mɔ fɛɛ mɔ ni kɛ ehe kpɛtɛɔ efɔŋ feemɔ he lɛ hiɛ, taakɛ ekpata Sodombii ni amɛkpɔtɔ kwraa lɛ ahiɛ lɛ. (1 Mose 18:25) Yɛ anɔkwale mli lɛ, kɛha Nyɔŋmɔ diɛŋtsɛ webii lɛ, “Yehowa gbeyeishemɔ lɛ, wala nu bu ni akɛjeɔ gbele tsɔnei amli ni.”—Abɛi 14:27.
5 Yɛ ŋmɛnɛ gbi ni ŋwɛi kojomɔ yaa nɔ yɛ mli nɛɛ mli lɛ, mɛi fɛɛ ni tuɔ amɛhe amɛhaa Yehowa kwraa kɛ gbeyeishemɔ akɛ amɛsumɔŋ ni amɛfee nɔ ko ni esaaa ehiɛ lɛ baaba abayoo anɔkwale ni ajaje yɛ okadi gbɛ nɔ ni yɔɔ Abɛi 3:8 lɛ: “No [Yehowa] gbeyeishemɔi aaawo olaŋmɔ hewalɛ, ni eeeha owui amli awao.”
Yehowa Hiɛnyamwoo
6. Mɛni esa akɛ ekanya wɔ ni wɔbo Abɛi 3:9 toi?
6 Esa akɛ bɔ ni wɔkɛ hiɛsɔɔ sheɔ Yehowa gbeyei, kɛ suɔmɔ ni mli wa ni wɔyɔɔ kɛha lɛ lɛ, akanya wɔ ni wɔbo Abɛi 3:9 toi: “Okɛ onii ni oyɔɔ, kɛ onibaa nii fɛɛ mli klɛŋklɛŋ nii awo Yehowa hiɛ nyam.” Anyɛɛɛ wɔ nɔ ni wɔkɛ nii ni wɔyɔɔ lɛ awo Yehowa hiɛ nyam. Esa akɛ enɛɛmɛi ajɛ wɔsuɔmɔ mli, taakɛ atsɔɔ aaafee shii 12 kɛjɛ 2 Mose 35:29 kɛyashi 5 Mose 23:23 ni kɔɔ afɔlei ni ashaa yɛ blema Israel he lɛ. Esa akɛ nibaa nii amli klɛŋklɛŋ nii ni akɛhaa Yehowa nɛɛ afee nikeenii ni hi fe fɛɛ ni wɔɔnyɛ wɔkɛha, ni wɔkɛkpɛlɛ ejurɔ ni efeɔ wɔ kɛ mlihilɛ ni wɔna kɛjɛ edɛŋ lɛ nɔ. (Lala 23:6) Esa akɛ amɛjie wɔfaishitswaa akɛ wɔɔya nɔ “[wɔtao] maŋtsɛyeli lɛ kɛ ejalɛ lɛ tsutsu [klɛŋklɛŋ]” lɛ kpo. (Mateo 6:33) Ni mɛni jɛɔ nii ni wɔyɔɔ kɛ wɔnibaanii ni wɔkɛwoɔ Yehowa hiɛ nyam lɛ mli baa? “No dani oboŋoi lɛ aaayimɔ obɔbɔ, ni owein bui lɛ aaafɛlɛ kɛ wein hee.”—Abɛi 3:10.
7. Mɛɛ klɛŋklɛŋ nii esa akɛ wɔkɛsha afɔle wɔha Yehowa, ni mɛni baajɛ mli aba?
7 Klɛŋklɛŋ jɔɔmɔ ni Yehowa kɛhaa ji mumɔŋ nɔ̃. (Maleaki 3:10) No hewɔ lɛ esa akɛ klɛŋklɛŋ nibaa nii ni wɔkɛhaa lɛ lɛ afee mumɔŋ nibii. Esa akɛ wɔkɛ wɔbe, hewalɛ, kɛ nyɛmɔ atsu nii ni wɔkɛfee esuɔmɔnaa nii. Enɛ hu baawaje wɔ yɛ gbɛ ni nitsumɔ ni tamɔ nɛkɛ fee ‘niyenii’ ni waje Yesu lɛ nɔ. (Yohane 4:34) Wɔmumɔŋ aboŋoi lɛ baayimɔ obɔbɔ, ni wɔmiishɛɛ, ni damɔ shi kɛha wein hee lɛ baayimɔ kɛfɛlɛ. Kɛfata he lɛ, yɛ be mli ni wɔsɔleɔ yɛ hiɛnɔkamɔ mli koni wɔna niyenii ni sa daa gbi lɛ, wɔbaanyɛ wɔjɛ nɔ ni wɔnaa lɛ mli wɔkɛ nɔ ko aye abua jeŋ muu fɛɛ Maŋtsɛyeli nitsumɔ lɛ. (Mateo 6:11) Nɔ fɛɛ nɔ ni wɔyɔɔ, ni heloo gbɛfaŋ nibii fata he lɛ, ba wɔŋɔɔ kɛjɛ wɔŋwɛi Tsɛ ni yɔɔ suɔmɔ lɛ ŋɔɔ. Bei abɔ ni wɔkɛ nɛkɛ nibii ni jara wawai nɛɛ tsuɔ nii kɛhaa eyijiemɔ lɛ, ebaafɔse jɔɔmɔi krokomɛi eshwie wɔnɔ lolo.—Abɛi 11:4; 1 Korintobii 4:7.
Suɔmɔ Kamɔi
8, 9. Te esa akɛ wɔbu kãmɔ kɛ tsɔsemɔ wɔha tɛŋŋ?
8 Abɛi yitso 3 lɛ Abɛ 3 kukuji 11 kɛ 12 wieɔ wekukpaa ni miishɛɛ yɔɔ mli ni ka tsɛ-kɛ-bi teŋ ni yɔɔ wekui ni sheɔ Nyɔŋmɔ gbeyei amli lɛ he ekoŋŋ, kɛ agbɛnɛ nɔ ni ka Yehowa kɛ emumɔŋ bii ni esumɔɔ amɛ ni yɔɔ shikpɔŋ nɔ lɛ teŋ lɛ he. Wɔkaneɔ akɛ: “Mibi, kaagbe Yehowa tsɔsemɔ lɛ he guɔ, ni kaaha ekãmɔ lɛ miije otsine; ejaakɛ mɔ ni Yehowa sumɔɔ lɛ, lɛ ekãa, tamɔ bɔ ni tsɛ feɔ ebi ni eyɔɔ ehe tsui lɛ!” Gbɔmɛi ni yɔɔ je lɛ mli lɛ miihĩ kãmɔ. Esa akɛ Yehowa webii asumɔ enɛ. Bɔfo Paulo tsɛ wiemɔi nɛɛ asɛɛ kɛjɛ Abɛi akɛ: “Mibi, kaabu Nuŋtsɔ [Yehowa] tsɔsemɔ lɛ akɛ nɔ ko bibioo, ni asaŋ kɛ eka ohiɛ lɛ, kaaha onijiaŋ miije wui; ejaakɛ mɔ ni Nuŋtsɔ [Yehowa] sumɔɔ lɛ, lɛ etsɔseɔ. . . Shi tsɔsemɔ fɛɛ tsɔsemɔ lɛ, amrɔmrɔ nɛɛ, efeee mɔ akɛ miishɛɛ nɔ ni shi dɔlɛ nɔ moŋ; shi kɛ fee sɛɛ lɛ, ewoɔ hejɔlɛ yibii ni ji jalɛ lɛ ehaa mɛi ni etsɔ nɔ ekase nɔ ko lɛ.”—Hebribii 12:5, 6, 11.
9 Hɛɛ, tsɔsemɔ kɛ kamɔ ji tsɔsemɔ ni he hiaa wɔteŋ mɔ fɛɛ mɔ lɛ fã, kɛ wɔnine shɛ nɔ kɛtsɔ fɔlɔi anɔ, kɛtsɔ Kristofoi asafo lɛ nɔ, aloo yɛ be mli ni wɔjwɛŋɔ Ŋmalɛi lɛ ahe yɛ wɔteemɔŋ nikasemɔ mli lɛ nɔ lɛ. Eji wala kɛ gbele sane kɛha wɔ akɛ wɔɔbo tsɔsemɔ toi, taakɛ Abɛi 4:1, 13 hu tsɔɔ mli lɛ: “Bii, nyɛboa nyɛtsɛ tsɔsemɔ toi, ni nyɛfea toi ni nyɛle sanesɛɛkɔmɔi. Mɔ tsɔsemɔ mli waa, kaaŋmɛɛ he! Okɛto jogbaŋŋ, shi no ji owala.”
Miishɛɛ ni Da Fe Fɛɛ
10, 11. Mɛni ji wiemɔi ni ŋɔɔ ni yɔɔ Abɛi 3:13-18 lɛ mli nibii krokomɛi?
10 Mɛɛ wiemɔi ni ŋɔɔ po nyiɛ sɛɛ nɛkɛ, lɛlɛŋ ‘wiemɔi ni ŋɔɔ kɛ anɔkwa wiemɔi ni ja’! (Jajelɔ 12:10) Nɛkɛ Salomo wiemɔi ni jɛ mumɔŋ nɛɛ tsɔɔ anɔkwa miishɛɛnamɔ mli. Amɛji wiemɔi ni esa akɛ wɔŋmala yɛ wɔtsuii anɔ. Wɔkaneɔ akɛ:
11 “Ajɔɔ [miishɛɛ ji] gbɔmɔ ni naa nilee kɛ gbɔmɔ ni naa jwɛŋmɔ lɛ! Ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ. Ejara hu wa fe tɛŋɛlɛɔ, ni onii ni jara wa fɛɛ onyɛŋ okɛto he. Gbii asɛɛjɛkɛmɔ yɛ eninejurɔ, ni nii kɛ anunyam yɛ ebɛku. Egbɛ̀i lɛ gbɛi fɛfɛji ni, ni etempɔŋi lɛ fɛɛ lɛ hejɔlɛ ni. Wala tso ji lɛ ha mɛi ni mɔɔ emli lɛ, ni mɔ ni hiɛɔ emli lɛ, ajɔɔ lɛ.”—Abɛi 3:13-18.
12. Esa akɛ nilee kɛ saneshishinumɔ he aba sɛɛnamɔ aha wɔ yɛ mɛɛ gbɛ nɔ?
12 Nilee—kwɛ shii abɔ sɔŋŋ ni atsi ta yɛ Abɛi awolo lɛ mli, fɛɛ feɔ shii 46! “Yehowa gbeyeishemɔ ji nilee shishijee.” Enɛ ji nilee ni anyɛɔ atsuɔ he nii, ni Nyɔŋmɔ gbeyeishemɔ yɔɔ mli, ni damɔ Nyɔŋmɔ Wiemɔ ni haa ewebii nyɛɔ amɛkudɔɔ amɛhe kɛtsɔɔ ahum ni yɔɔ gbeyei ni tswaa kɛtsɔɔ Satan je lɛ mli lɛ mli shweshweeshwe lɛ he nilee nɔ. (Abɛi 9:10) Saneshishinumɔ, ni awie he shii 19 yɛ Abɛi lɛ ji nilee yelikɛbualɔ ni he hiaa, ni eyeɔ ebuaa wɔ ni wɔwuɔ wɔshiɔ Satan ŋaatsɔɔi lɛ. Henyɛlɔ kpeteŋkpele lɛ yɛ afii akpei abɔ mli niiashikpamɔ yɛ esɛɛ ni etsɔɔ nomɛi anɔ ekɛtsuɔ eŋaatsɔɔ fɔji lɛ ahe nii. Shi wɔyɛ nɔ ni sɛɛnamɔ yɔɔ he waa fe niiashikpamɔ akɛ tsɔɔlɔ—saneshishinumɔ ni Nyɔŋmɔ gbeyeishemɔ yɔɔ mli, nyɛmɔ ni akɛhalaa nɔ ni ja kɛ nɔ ni ejaaa mli, ni haa ahalaa gbɛ ni ja ni esa akɛ atsɔ nɔ. Enɛ ji nɔ ni Yehowa tsɔɔ e-Wiemɔ lɛ nɔ etsɔɔ wɔ.—Abɛi 2:10-13; Efesobii 6:11.
13. Mɛni baanyɛ abu wɔhe yɛ shika-helɛtemɔ bei ni mli wa mli, ni yɛ mɛɛ gbɛ nɔ?
13 Shika-helɛtemɔ mli basabasa-feemɔ ni yɔɔ je lɛŋ ŋmɛnɛ lɛ tsɔɔ hiɛ egbaa gbalɛ ni yɔɔ Ezekiel 7:19 lɛ mlibaa: “Amɛjwiɛtɛi lɛ amɛaashɛrɛ amɛshwie blohui lɛ amli, ni amɛaabu amɛshika lɛ akɛ nɔ ko ni anyaŋeɔ; amɛjwiɛtɛi kɛ amɛshika lɛ nyɛŋ amɛyiwala ahere yɛ Yehowa mlifu gbi lɛ nɔ.” Shikpɔŋ lɛ nɔ jwetrii fɛɛ nyɛŋ aje shishi ekɛ ehe ato yiwalaheremɔ hewalɛ ni nilee kɛ saneshishinumɔ yɔɔ lɛ he. Maŋtsɛ Salomo nilelɔ lɛ jaje yɛ be kroko mli akɛ: “Nilee tamɔ hɔɔŋ, tamɔ bɔ ni shika hu tamɔ hɔɔŋ lɛ; shi nɔ ni nilee kɛfe ji akɛ, nilee hereɔ etsɛ yiwala.” (Jajelɔ 7:12) Miishɛɛ diɛŋtsɛ ji mɛi fɛɛ ni ŋmɛnɛ amɛnyiɛɔ Yehowa gbɛi fɛfɛji lɛ anɔ ni kɛ nilee halaa “gbii asɛɛjɛkɛmɔ,” naanɔ wala ni ji Nyɔŋmɔ nikeenii kɛha mɔ fɛɛ mɔ ni tsɔɔ hemɔkɛyeli yɛ Yesu kpɔmɔ afɔleshaa lɛ mli lɛ! —Abɛi 3:16; Yohane 3:16; 17:3.
Anɔkwa Nilee ni Aaana
14. Mɛɛ gbɛi anɔ nɛkɛ Yehowa ejie nilee ni ekaaa kpo yɛ?
14 Esa jogbaŋŋ akɛ wɔ adesai, ni abɔ wɔ yɛ Nyɔŋmɔ subaŋ nɔ lɛ, aaabɔ mɔdɛŋ ni wɔna nilee kɛ saneshishinumɔ, sui ni Yehowa diɛŋtsɛ jie lɛ kpo yɛ be mli ni etsuɔ enibɔɔ ni yɔɔ naakpɛɛ lɛ ahe nii lɛ. “Ŋaa [nilee] Yehowa kɛto shikpɔŋ lɛ shishi, eŋɔ ŋwɛi ema shi yɛ jwɛŋmɔ [saneshishinumɔ] naa.” (Abɛi 3:19, 20) Etee nɔ efee bɔɔ nii ni yɔɔ wala, jeee kɛtsɔ naakpɛɛ sutsakemɔ nifeemɔ ko ni anyɛɛɛ atsɔɔ mli nɔ, shi moŋ kɛtsɔ nibɔɔ nitsumɔi diɛŋtsɛ nɔ, eko fɛɛ eko “yɛ amɛhenɔ” kɛha yiŋtoo ni nilee yɔɔ mli. (1 Mose 1:25) Beni yɛ naagbee lɛ abɔ gbɔmɔ akɛ mɔ ni yɔɔ nilee kɛ nyɛmɔi ni kwɔ kwraa fe kooloi lɛ anɔ lɛ, oshebɔɔ ni ŋwɛibɔfoi ni ji Nyɔŋmɔ bii lɛ kɛkpee enɛ lɛ baajije ni ebaaku sɛɛ ejije waa yɛ ŋwɛi fɛɛ. (Okɛto Hiob 38:1, 4, 7 he.) Anaa Yehowa saneshishinumɔ ni tsɔɔ bɔ ni etsɔɔ hiɛ enaa nii, enilee, kɛ esuɔmɔ lɛ yɛ faŋŋ mli yɛ nibii ni ebɔ yɛ shikpɔŋ nɔ lɛ fɛɛ mli.—Lala 104:24.
15. (a) Mɛni hewɔ nilee pɛ ni wɔɔna lɛ kɛkɛ faaa lɛ? (b) Mɛɛ hekɛnɔfɔɔ esa akɛ Abɛi 3:25, 26 akanya yɛ wɔmli?
15 Jeee Yehowa sui ni ji nilee kɛ saneshishinumɔ pɛ ehe hiaa ni wɔna, shi moŋ esa akɛ wɔmɔ mli kpɛŋŋ, ni wɔkagbɔjɔ yɛ e-Wiemɔ ni wɔkaseɔ lɛ mli. Ewoɔ wɔ ŋaa akɛ: “Mibi, kaaha amɛmiije ohiɛ, ŋɔɔ ŋaawoo ni hi kɛ jwɛŋmɔ oto, ni amɛaatsɔ wala amɛha osusuma kɛ wulamɔ nɔ̃ ha okuɛ.” (Abɛi 3:21, 22) Enɛ baaha wɔnyɛ wɔnyiɛ shweshweeshwe kɛ agbɛnɛ yɛ jwɛŋmɔŋ toiŋjɔlɛ mli, yɛ ‘hiɛkpatamɔ ni baa trukaa’ tamɔ julɔ ni baafɛ ashwie Satan je lɛ nɔ ni bɛŋkɛɔ lɛ po mli. (1 Tesalonikabii 5:2, 3) Yɛ amanehulu kpeteŋkpele lɛ diɛŋtsɛ po mli lɛ, “ebɛ akɛ oooshe trukaa hekpokpomɔ kɛ mɛi fɔji ahiɛkpatamɔ ni baa lɛ gbeyei. Ejaakɛ Yehowa aaatsɔ ohiɛ-kɛ-nɔfɔɔ, ni eeebu onane he kɛaajɛ mɔmɔ mli.”—Abɛi 3:23-26.
Suɔmɔ kɛha Ekpakpafeemɔ
16. Mɛɛ nifeemɔ abiɔ yɛ Kristofoi adɛŋ kɛfata ekãa ni amɛaajie kpo yɛ sɔɔmɔ nitsumɔ lɛ mli lɛ he?
16 Gbii ni akɛaajie ekãa kpo yɛ Maŋtsɛyeli lɛ he sanekpakpa lɛ shiɛmɔ mli koni akɛye jeŋmaji lɛ fɛɛ odase lɛ nɛ. Shi esa akɛ Kristofoi anitsumɔ ko, ni atsɔɔ mli yɛ Abɛi 3:27, 28 lɛ afi nɛkɛ odaseyeli nitsumɔ nɛɛ sɛɛ: “Mɛi ni sa ejurɔfeemɔ lɛ kaakama amɛ, kɛji efeemɔ yɛ odɛŋ hewalɛ mli lɛ. Kaakɛɛ onaanyo akɛ: ‘Yaa ni oba, ni wɔ ni maha,’ kɛ oyɛ eko yɛ onine nɔ lɛ.” (Okɛto Yakobo 2:14-17 he.) Akɛni mɛi babaoo miiye ohia ni hɔmɔ hu miiye amɛ yɛ je lɛŋ hewɔ lɛ, akɛ hehiamɔ miibi ni wɔye wɔbua wɔnaanyo gbɔmɔ, titri lɛ wɔmumɔŋ nyɛmimɛi lɛ. Te Yehowa Odasefoi ehere enɛ nɔ amɛha tɛŋŋ?
17-19. (a) Mɛɛ hehiamɔ ko atsu he nii yɛ 1993, ni te ahere enɛ nɔ aha tɛŋŋ? (b) Mɛni yeɔ odase akɛ wɔnyɛmimɛi ni awo amɛhe ka lɛ ‘miiye kunim aahu’?
17 Naa nɔkwɛmɔ nɔ ko: Akɛ hehiamɔ bi yelikɛbuamɔ kɛjɛ tsutsu Yugoslavia yɛ nyɛsɛɛ afi ni ho lɛ mli. Nyɛmimɛi ni yɔɔ maji ni bɛŋkɛ amɛ lɛ amli lɛ here tsɛmɔ lɛ nɔ yɛ naakpɛɛ gbɛ nɔ. Anyɛ akɛ nibii ni yeɔ buaa ni abua naa yɛ tsɔnei ni ato amɛ sɛrɛnɛɛ mli bote tawuu he lɛ, akɛ woji heei, atadei ni titii, niyenii, kɛ tsofai yaha Odasefoi ni enɛɛmɛi ahe hiaa amɛ lɛ yɛ afi ni ho lɛ fɛ̃ibe ni naa wa lɛ mli. Be ko ni akɛ enɛ eko yaa lɛ, nyɛmimɛi lɛ bi gbɛŋmɛɛ wolo yɛ maŋ lɛ husu naa koni amɛkɛ nibii ni amɛtsiimɔ shɛɔ tɔn 15 lɛ ayaha amɛ, shi beni amɛnine shɛ gbɛŋmɛɛ wolo lɛ nɔ lɛ amɛna akɛ aŋma tɔn 30! Oya nɔŋŋ ni Yehowa Odasefoi ni yɔɔ Austria lɛ kɛ tsɔnei wuji etɛ ni nibii eyi mli obɔ yafata he. Yɛ fɛɛ mli lɛ nibii ni amɛtsiimɔ shɛɔ tɔn 25 yashɛ hei ni akpɛ yiŋ akɛ esa akɛ akɛya jɛmɛ lɛ. Kwɛ miishɛɛ babaoo ni wɔnyɛmimɛi lɛ na akɛ amɛnine aaashɛ mumɔŋ kɛ heloonaa nibii babaoo nɛɛ anɔ.
18 Te mɛi ni nine shɛ nibii nɛɛ anɔ lɛ here nɔ amɛha tɛŋŋ? Afi nɛɛ shishijee mli ni onukpa ko ŋma akɛ: “Nyɛmimɛi hii kɛ yei ni yɔɔ Sarajevo lɛ yɛ wala mli ni amɛyɛ jogbaŋŋ, ni nɔ ni he hiaa fe fɛɛ ji akɛ, wɔka he wɔyɛ hewalɛ yɛ mumɔŋ bɔ ni wɔkɛaakpee nɛkɛ sɛkɛyeli ta nɛɛ naa. Shihilɛ lɛ mli bawa waa yɛ niyenii gbɛfaŋ. Eba akɛ Yehowa aaajɔɔ nyɛ ni eduro nyɛ yɛ mɔdɛŋ ni nyɛbɔ yɛ wɔhe lɛ hewɔ. Maŋ onukpai lɛ yɛ bulɛ krɛdɛɛ ko kɛha Yehowa Odasefoi yɛ amɛshihilɛ gbɛ ni ekaaa lɛ kɛ bulɛ ni amɛyɔɔ kɛha nɔyelɔi lɛ hewɔ. Wɔmiida nyɛ shi hu yɛ mumɔŋ niyenii ni nyɛkɛbaha wɔ lɛ hewɔ.”—Okɛto Lala 145:18 he.
19 Nɛkɛ nyɛmimɛi nɛɛ ni oshara eba amɛwala he lɛ ejie hiɛsɔɔ kpo hu, kɛtsɔ sɔɔmɔ nitsumɔ lɛ mli ni amɛkɛ amɛhe woɔ yɛ ekãa naa lɛ nɔ. Amɛ akutseiaŋbii pii baa amɛŋɔɔ amɛbabiɔ ni akɛ amɛ akase Biblia lɛ. Shiɛlɔi 40 kɛ ŋmɛlɛtswaa 25 tsu nii yɛ shiɛmɔ mli kɛ aja mli, ni amɛkɛye amɛbua gbɛgbalɔi nɛɛhu ni yɔɔ asafo lɛ mli lɛ jogbaŋŋ yɛ Tuzla maŋtiase ni akɛ niyenii ni amɛtsiimɔ shɛɔ tɔn enumɔ tee jɛmɛ lɛ mli. Mɛi 243 ni sa kadimɔ jogbaŋŋ ba Yesu gbele lɛ Kaimɔ lɛ shishi. Nɛkɛ nyɛmimɛi ni asumɔɔ amɛ jogbaŋŋ nɛɛ “tsɔɔ mɔ ni sumɔ‘wɔ lɛ nɔ [amɛ]yeɔ kunim aahu.”—Romabii 8:37.
20. Mɛɛ ‘egbɔyeli’ ko etee nɔ yɛ tsutsu Soviet Union loo Russia?
20 Ejurɔfeemɔ ni ajie lɛ kpo yɛ niyenii kɛ atadei babaoo ni akɛwo tsɔnei amli kɛtee tsutsu Soviet Union loo Russia lɛ hu eha nyɛmimɛi ni yɔɔ jɛmɛ lɛ ena ekãa babaoo. Akɛ nɔkwɛmɔ nɔ lɛ, mɛi ni ba afi nɛɛ Kaimɔ lɛ shishi yɛ Moscow pɛ lɛ ayibɔ ji 7,549, kɛ akɛto nyɛsɛɛ afi lɛ nɔ ni ji 3,500 he lɛ. Asafoi ni yɔɔ nakai maŋtiase lɛ nɔŋŋ mli lɛ ayi bafa kɛjɛ 12 kɛyashɛ 16 yɛ nakai be kome too lɛ nɔŋŋ mli. Yɛ tsutsu Soviet Union loo Russia (ni ajie Baltic Maji lɛ kɛjɛ mli lɛ), asafoi lɛ ayifalɛ tee hiɛ kɛyashɛ oha fɛɛ mli 14 nɔyaa, yɛ Maŋtsɛyeli shiɛlɔi amli hu lɛ oha fɛɛ mli 25 nɔyaa, ni yɛ gbɛgbalɔi amli lɛ oha fɛɛ mli 74 nɔyaa. Mɛɛ ekãa kɛ he-kɛ-afɔleshaa mumɔ po nɛ! Ehaa mɔ ko kaiɔ klɛŋklɛŋ afii oha lɛ, beni ‘egbɔyeli’ yɔɔ lɛ. Kristofoi ni yɔɔ mumɔŋ kɛ heloonaa nibii babaoo lɛ kɛ nibii pii ke mɛi ni bɛ nɔ ko tsɔ̃ lɛ, ni ekãa ni mɛi ni naa amanehulu nɛɛ jieɔ lɛ kpo lɛ hu ha mɛi ni ke amɛ nii lɛ na miishɛɛ kɛ ekãawoo babaoo.—2 Korintobii 8:14.
Hii Efɔŋ!
21. Akɛ nilelɔi to kwashiai ahe yɛ Abɛi yitso 3 lɛ naagbee wiemɔi lɛ amli yɛ mɛɛ gbɛ nɔ?
21 Abɛi awolo lɛ yitso ni ji Abɛ etɛ lɛ kɛ sɔrɔtofeemɔi fata nɛkɛ ŋaawoi nɛɛ ahe ekɛgbe sane lɛ naa: “Ohiɛ akakɔ̃ yiwalɔ ko nɔ, ni kaakɔ egbɛi lɛ amli eko eko. Ejaakɛ Yehowa miihi kutumpɔfo; shi mɛi ni ja ekɛbɔɔ. Yehowa loomɔ ka mɔ fɔŋ we lɛ nɔ; shi ejɔɔ jalɔi ashihilɛ he lɛ. Eyeɔ hefɛoyelɔi ahe fɛo, shi eduroɔ heshibalɔi. Nilelɔi agbɛfaŋnɔ ji anunyam, shi kwashiai aaatere hiɛgbele.”—Abɛi 3:29-35.
22. (a) Te wɔɔfee tɛŋŋ wɔkwa nɔ ni aaaba kwashiai anɔ lɛ? (b) Mɛni nilelɔi lɛ hĩɔ, ni mɛni amɛtaoɔ ni amɛná, kɛ mɛɛ nyɔmɔwoo?
22 Mɛɛ gbɛ nɔ wɔɔtsɔ ni wɔkwa bu ni aaabu wɔ afata kwashiai ahe lɛ yɛ? Esa akɛ wɔkase bɔ ni wɔɔfee ni wɔnyɛ̃ efɔŋ, hɛɛ, wɔhi nɔ ni Yehowa hiɔ lɛ—awuiyeli jeŋ ni eye la yi sɔ̃ nɛɛ gbɛi fɔji lɛ fɛɛ. (Kwɛmɔ Abɛi 6:16-19 hu.) Nɔ ni esa akɛ wɔfee moŋ ji ni wɔtao ni wɔna nibii ni hĩ—nɔ ni yeɔ emuu, nɔ ni ja, kɛ heshibaa—koni wɔkɛ humifeemɔ kɛ Yehowa gbeyeishemɔ ana “nii kɛ hiɛnyam kɛ wala.” (Abɛi 22:4) Enɛ baafee nyɔmɔwoo aha wɔ mɛi fɛɛ ni kɛ ŋaawoo: “Okɛ ohiɛ afɔ Yehowa nɔ kɛ otsui fɛɛ” lɛ tsuɔ nii lɛ.
Mɛni Ji Ohetoo?
◻ Ŋmalɛ ni tere wɔnikasemɔ lɛ kɔɔ wɔhe ŋmɛnɛ yɛ mɛɛ gbɛ nɔ?
◻ Mɛɛ gbɛ nɔ wɔɔtsɔ wɔwo Yehowa hiɛ nyam yɛ?
◻ Mɛni hewɔ esaaa akɛ wɔbuɔ tɔsemɔ akɛ nɔ ko bibioo lɛ?
◻ Nɛgbɛ abaana miishɛɛ ni da fe fɛɛ lɛ yɛ?
◻ Te wɔɔfee tɛŋŋ wɔsumɔ ekpakpa ni wɔhi efɔŋ lɛ?
[Mfoniri ni yɔɔ baafa 18]
Abaajɔɔ mɛi ni jɛɔ amɛsuɔmɔ mli amɛkɛ amɛnii ni hi fe fɛɛ shaa afɔle amɛhaa Yehowa lɛ babaoo