Kaa Kɛ Nɔ̃ Nɔsɔŋmɔ Yɛ Ŋmɛnɛŋmɛnɛ Bei Amli
“Namɔ aaanyɛ akpee ebaa gbi Iɛ naa? Ni namɔ aaanyɛ shi adamɔ beni eeebapue lɛ?”—MALEAKI 3:2.
1. Beni Yehowa ba mumɔŋ sɔlemɔwe lɛ yɛ ŋmɛnɛŋmɛnɛ bei nɛɛ amli lɛ, mɛni ebana, ni etee mɛɛ sanebimɔ shi?
BENI “anɔkwale Nuŋtsɔ” lɛ ba mumɔŋ sɔlemɔwe lɛ ni “kpaŋmɔ bɔfo lɛ” fata ehe yɛ beni ato Maŋtsɛyeli lɛ ama shi yɛ ŋwɛi yɛ 1914 sɛɛ nɔŋŋ lɛ, mɛni Yehowa na? Ehe miihia ni atsuu ewebii lɛ ahe ni aha amɛhe atse. Ani amɛkɛ amɛhe baaha enɛ feemɔ ni amɛto amɛtsui shi yɛ hetsemɔ ni ehe hiaa ni eba amɛgbɛjianɔtoo lɛ, nitsumɔ, tsɔɔmɔ, kɛ jeŋba mli lɛ nɔ lɛ mli? Taakɛ Maleaki wie lɛ: “Shi namɔ aaanyɛ akpee ebaa gbi lɛ naa? Ní namɔ aaanyɛ shi adamɔ beni eeebapue lɛ?”—Maleaki 3:1, 2.
2. Namɛi ji “Levibii” lɛ ni yɔɔ Maleaki 3:3 lɛ yɛ ŋmɛnɛŋmɛnɛ beaŋ?
2 Yehowa kpɛlɛɔ gbɛnaa nii lɛ nɔ akɛ lɛ efee “Levibii” lɛ krɔŋkrɔŋ ni etsuu amɛhe lɛ. (Maleaki 3:3) Yɛ blema Israel lɛ, Levi akutso lɛ mli anaa osɔfoi lɛ kɛ sɔlemɔwe sɔɔlɔi lɛ kɛjɛɔ Nɛkɛ “Levibii” nɛɛ damɔ shi kɛha mɛi ni afɔ amɛ mu ŋmɛnɛ lɛ ni miisɔmɔ akɛ osɔfoi yɛ Yesu, Osɔfonukpa lɛ shishi akɛ kuu lɛ. (1 Petro 2:7-9; Hebribii 3:1) Amɛji klɛŋklɛŋ bii ni aka amɛ akwɛ beni Yehowa ba mumɔŋ sɔlemɔwe lɛ ni “kpaŋmɔ bɔfo lɛ” fata lɛ. Agbɛnɛ mɛɛ odaseyeli yɔɔ ni tsɔɔ akɛ nɛkɛ hetsuumɔ nɛɛ ba mli kɛjɛ Jeŋ Ta I naagbee gbii lɛ amli kɛyaa?
Be Kɛha Kai Ni Mli Wawai
3. Beni 1918 agbiɛnaa be shɛɔ lɛ, no mli lɛ mɛni ji shihilɛ ni Nyɔŋmɔ odasefoi lɛ yɔɔ mli?
3 Beni Yehowa fata ‘ekpaŋmɔ bɔfo’ lɛ he kɛba emumɔŋ sɔlemɔwe lɛ, E-na akɛ hetsuumɔ kɛ krɔŋŋfeemɔ he miihia shwɛɛnii lɛ. Akɛ nɔkwɛmɔ nɔ lɛ, no mli lɛ Buu-Mɔɔ lɛ ewo ekanelɔi lɛ hewalɛ ni amɛtuu May 30, 1918 amɛma shi akɛ sɔlemɔ gbi kɛha kunim ni dɛmokrase nɔyelii baaye, taakɛ U.S. Amerika mlawoo gwabɔɔ lɛ kɛ Maŋnukpa Wilson ebi ni afee lɛ. Nɔ ni enɛ tsɔɔ ji amɛhe ni amɛkɛwooo maŋ saji amli akɛ Kristofoi lɛ mlikuu.—Yohane 17:14, 16.
4. Mɛni ba yɛ Yehowa tsuji ayiwaa lɛ mli?
4 Osɔfoi lɛ kɛ nɔyeli lɛ kɛ nɔnyɛɛ babaoo ba Yehowa tsuji ni afɔ amɛ mu lɛ anɔ. Akɛni afolɔ amɛnaa akɛ maŋjwalɔi hewɔ lɛ, shwɛɛnii ni afɔ amɛ mu lɛ bɔ mɔdɛŋ ni amɛtsɔɔ fɔ ni amɛyeee lɛ mli faŋŋ yɛ mɛi ahiɛ. Shi, yɛ May 7, 1918 lɛ akɛ mla Wolo ha koni amɔmɔ Buu Mɔɔ Biblia kɛ Wolo Bibioo Asafo lɛ nɔkwɛlɔi kpaanyɔ lɛ ní sɛinɔtalɔ J. F. Rutherford fata he. Amɛsaneyeli lɛ je shishi Ju, June 3. Yɛ June 20 lɛ, abu amɛ fɔ yɛ nibii ejwɛ nɔ. Kɛkɛ ni yɛ July 4, 1918 lɛ, akɛ oketeke loo nɛkɛ Kristofoi hii ni amɛjɔɔ amɛhe nɔ nɛɛ kɛtee amɛtsuŋwoo he yɛ Atlanta, Georgia, U.S. Amerika.
5. Ebafee faŋŋ akɛ ehe miihia ni asɔŋ mɛi ni sɔmɔɔ Nyɔŋmɔ lɛ anɔ yɛ mɛɛ gbɛ nɔ, ni mɛni tsɔɔ akɛ enɛ ba mli nakai?
5 Beni shɛɔ 1918 latsa be mli lɛ, no mli lɛ be ko Yehowa Maŋtsɛyeli lɛ shiɛmɔ ni mɛi ni afɔ amɛ mu lɛ kɛ gbee ni efee ekome ni naa wa jajeɔ lɛ naawalɛ eba shi. Etamɔ nɔ ni ‘agbe amɛ’ yɛ amɛmaŋ nitsumɔ lɛ gbɛfaŋ (Kpojiemɔ 11:3, 7) Beni Asafo lɛ kpeei abe lɛ shɛɔ yɛ nakai latsa be mli lɛ, hemɔkɛyeli kwalɔi komɛi hu tse amɛhe ni amɛyafee amɛ diɛŋtsɛ amɛjamɔ kui ni teɔ shi woɔ amɛ. Akɛni amɛjie sui ni tamɔ “tsulɔ fɔŋ” lɛ kpo hewɔ lɛ, ‘asha amɛmli’ tamɔ “tutuu” ko ni ajie amɛ kɛjɛ Yehowa shwɛɛnii anɔkwafoi lɛ ateŋ (Mateo 3:12; 24:48-51) Aye Kristo gbele lɛ Kaimɔ lɛ yɛ Hɔgbaa, April 13, 1919 ni mɛi ni ba yɛ shikpɔji pii anɔ lɛ ayibɔ ji 17,961. Kɛ́ akɛto amaniɛbɔɔ ko ni yeee emuu ni nine shɛ nɔ yɛ 1917 lɛ he lɛ, belɛ mɛi ni ba Kaimɔ lɛ shishi lɛ ayifalɛ lɛ eba shi fe 3,000, ni miitsɔɔ nɔ ni ejɛ nɔ̃ nɔ ni asɔŋ lɛ mli eba.
6. Yɛ mɛɛ gbɛ nɔ gbɛ ni Yehowa ŋmɛ kaai ni tamɔ nɛkɛ lɛ tsɔɔ akɛ ehiɛ yɛ jɔɔmɔ ni aaaba ewebii anɔ yɛ naagbee lɛ nɔ lɛ yɛ ejwɛŋmɔŋ?
6 Shi gbɛ ni Yehowa ŋmɛ koni kaai ni naa wa ni tamɔ nɛkɛ aba ewebii anɔ lɛ baafee jɔɔmɔ aha amɛ yɛ naagbee mli. Eshiii amɛ kwraa. Yɛ Jufɔ, March 25, 1919 lɛ, aŋmɛɛ J. F.Rutherford kɛ ehefatalɔi kpawo lɛ ahe kɛjɛ amɛtsuŋwoo lɛ mli koni yɛ sɛɛ mli lɛ atsɛ amɛ ekoŋŋ, ni yɛ naagbee lɛ aŋmɛɛ amɛhe kwraa akɛ amɛyeee fɔ. Trukaa ni heyeli kɛmiijɛ nyɔŋyeli mli ba kɛha mɛi ni eje kaa be nɛɛ mli ni atsuu amɛhe lɛ! Hɛɛ, “wala mumɔ jɛ Nyɔŋmɔ ŋɔɔ ba amɛmli ni amɛte shi amɛdamɔ amɛnaji anɔ” ni amɛfee klalo kɛha nitsumɔ—Kpojiemɔ 11:11.
7. (a) Mɛni ji nɔ ni odasefoi ni ato amɛ gbɛjianɔ ekoŋŋ nɛɛ fee agbɛnɛ? (b) Mɛni jɛ nɛkɛ hetsuumɔ kɛ krɔŋkrɔŋfeemɔ nɛɛ mli ba?
7 Mɛni amɛbaafee agbɛnɛ? Akɛ Kristofoi akuu ni asaa ato amɛ gbɛjianɔ ekoŋŋ lɛ, shwɛɛnii lɛ pɛi amɛ diɛŋtsɛ amɛmli amɛkwɛ Amɛsɔle amɛbi Yehowa dɛŋ eshaifaa kɛha amɛhe eshai ni ji sane he ni amɛŋmɛɛ koni amɛkɛsaa lɛ. (Okɛto Lala 106:6; Yesaia 42:24 he.) Amɛje kpo kɛtee akɛ gbɔmɛi ni afee amɛ krɔŋkrɔŋ. Akɛni atsuu amɛhe hewɔ lɛ, shwɛɛnii lɛ ni jɛɔ amɛtsuiŋ amɛyeɔ anɔkwale lɛ ‘batsɔ tamɔ gbɔmɛi ni kɛ nikee nii miiha Yehowa yɛ jalɛ mli.’ (Maleaki 3:3) Mumɔŋ yijiemɔ afɔlei ni amɛshaa lɛ baafee nɔ ni saa Nyɔŋmɔ hiɛ. (Hebribii 13:15) Amɛmli fili amɛ akɛ Yehowa mlifu ni ba amɛnɔ be fioo ko lɛ eba naagbee. Amɛyɛ hekɛnɔfɔɔ akɛ amɛwɔsɛɛ be sɔɔmɔ baafee nɔ ni saa ehiɛ. (Yesaia 12:1) Kɛjɛ September 1, kɛyashi 8, 1919 lɛ, afee kpee ko ni yɔɔ miishɛɛ yɛ Cedar Point, Ohio, ni mɛi 7,000 ba shishi ni abaptisi 200. Enɛɛmɛi fɛɛ tsɔɔ nibii ni asaa ato amɛ gbɛjianɔ ekoŋŋ kɛ suɔmɔ ni ayɔɔ akɛ aaagbe Yehowa shiɛmɔ nitsumɔ lɛ naa.
8. (a) Nɛkɛ hetsuumɔ kɛ krɔŋkrɔŋfeemɔ nɛɛ saa wɔhe ŋmɛnɛ yɛ mɛɛ gbɛ nɔ? (b) Kɛfata ŋmɛnɛŋmɛnɛ beaŋ “Levibii” ahe lɛ, namɛi hu esa akɛ amɛtsɔ kaa kɛ nɔ nɔsɔŋmɔ nɛɛ mli?
8 Te enɛɛmɛi fɛɛ saa Nyɔŋmɔ bii ni yɔɔ wala mli ŋmɛnɛ lɛ ahe ehaa tɛŋŋ? Taakɛ gbalɛ lɛ tsɔɔ lɛ, Yehowa ni ebɔfo lɛ fata ehe lɛ baaba, ni “eeeta shi tamɔ jwiɛtɛi hetsuulɔ kɛ krɔŋŋfeelɔ.” (Maleaki 3:3) Hɛɛ, niiahetsuumɔ kɛ krɔŋŋfeemɔ nifeemɔ lɛ baaya nɔ, ni “eeeta shi” ni ekwɛ nɔ ni yaa nɔ lɛ jogbaŋŋ. Anɔkwale ni eji akɛ shwɛɛnii anɔkwafoi lɛ tsɔ kaa ni naa wa be mli yɛ afii oha nɛɛ shishijee mli lɛ etsɔɔɔ akɛ Niiahetsuulɔ kpeteŋkpele lɛ egbe krɔŋŋ ni efeɔ amɛ lɛ naa. Kaa kɛ nɔ nɔsɔŋmɔ lɛ etee nɔ aahu kɛbashi wɔgbi nɛɛ. Yehowa yɛ esɔlemɔwe lɛ lolo, eta shi yɛ kojomɔ mli. Jeee “Levibii” lɛ ni ji shwɛɛnii ni afɔ amɛ mu lɛ pɛ efeɔ amɛ krɔŋkrɔŋ. Wɔle akɛ gbalɛ lɛ hu tsɔɔ bɔ ni E-susuɔ “gbɔ” ni damɔ shi kɛha “asafo babaoo” lɛ ni amɛkpaa wala gbɛ yɛ shikpɔŋ nɔ lɛ hu he. (Maleaki 3:5; Kpojiemɔ 7:9, 10) Hɛɛ, Yehowa webii akrɔŋkrɔŋfeemɔ Iɛ etee nɔ yɛ afii 69 ni eho nɛɛ amli yɛ gbɛi sɔrɔtoi ejwɛ nɔ.
Hetsuumɔ Yɛ Gbɛjianɔtoo Mli
9. Mɛni ji nibii ni tee nɔ eba fiofio yɛ gbɛjianɔtoo lɛ tsakemɔ mli kɛjɛ 1919?
9 Klɛŋklɛŋ lɛ, krɔŋkrɔŋfeemɔ lɛ ba kɛtsɔ jeŋ muu fɛɛ asafo Iɛ ni aaaha enu Ŋmalɛ mli shishitoo mlai heei lɛ ashishi ni amɛkɛ enɛ akpa gbee fiofio lɛ nɔ. Esa akɛ ajie demokrase gbɛ ni atsɔɔ nɔ atsuɔ asafo lɛ mli saji ahe nii lɛ kɛya fiofio. Susumɔ nibii ni tee hiɛ ni ba fiofio yɛ enɛ mli lɛ he okwɛ.
1919: Nɔyeli kuu lɛ je shishi ehala mɛi kɛtsɔ Buu Mɔɔ Asafo lɛ ni hala sɔɔmɔ nɔkwɛlɔ kɛha asafo fɛɛ asafo koni ekwɛ sɔɔmɔ nitsumɔ lɛ nɔ lɛ nɔ, afee enɛ kɛjɛ Asafo lɛ yitso.
1932: Afo daa afi onukpai kɛ sɔɔlɔi ahalamɔ lɛ mli; nɔ ni akɛto asafo lɛ ni halaa hii kɛhaa nɛkɛ gbɛhei nɛɛ anajiaŋ ji sɔɔmɔ ajinafoi ni yeɔ buaa sɔɔmɔ nɔkwɛlɔ ni Asafo lɛ ehala lɛ lɛ (ni lɛ hu efata he) .
1937: Abayoo akɛ abaanyɛ ni akɛ asafoŋ hegbɛi awo “Yonadabbii” [ni yɔɔ shikpɔŋ nɔ hiɛnɔkamɔ] lɛ adɛŋ.
1938: Asafo lɛ baahala nɔkwɛlɔi kɛ mɛi ni kwɛɔ amɛsɛɛ lɛ fɛɛ yɛ Teokrase gbɛjianɔtoo naa.
1972: Aha efee faŋŋ akɛ Ŋmalɛ naa nifeemɔ ni akɛkwɛɔ osafo fɛɛ asafo nɔ lɛ jeee nɔ ni ŋɔɔ Kristofonyo naa ni eda yɛ mumɔŋ lɛ kome dɛŋ, shi moŋ, onukpai akuu, ni Asafo lɛ ehala amɛ.
1975: Ato Nɔyeli Kuu lɛ ajinafoi koni amɛkwɛ nitsumɔi sɔrɔtoi anɔ: gbɔmɔ kome kudɔɔ saji dɔŋŋ; shi moŋ mɛi fɛɛ ni yɔɔ ajinafoi akaa lɛ mli lɛ baaná gbee kome ni amɛkɛ ekomefeemɔ baakwɛ Kristo Yesu hiɛnyiɛmɔ lɛ.
10. (a) Mɛni ejɛ nɛkɛ hetsuumɔ nɛɛ mli eba? (b) Te onuɔ nɛkɛ tsakemɔ loo nibii asaamɔ nɛɛ he ohaa tɛŋŋ?
10 Mɛni ejɛ tsakemɔi ni afee nɛɛ mli eba? Ŋwanejee ko bɛ he akɛ Yehowa jɔɔmɔ babaoo eba amɛnɔ, yɛ bɔ ni ejalɔi Iɛ ayi faa ni amɛshwereɔ yɛ mumɔŋ lɛ hewɔ. (Okɛto Bɔfoi lɛ Asaji 6:7; 16:5 he.) Eji anɔkwale akɛ asɔŋ nɔkwɛlɔi lɛ kɛ mɛi krokomɛi anɔ kɛjɛ mli ejaakɛ amɛkɛ anɔkwayeli baŋ amɛhe shi amɛhaŋ gbɛ ni Nyɔŋmɔ kudɔɔ lɛ. Shi Yehowa webii lɛ ateŋ mɛi ni fa titri ji mɛi ni ejie amɛhe kpo akɛ toibolɔi ni amɛbaa amɛhe shi amɛhaa gbɛjianɔtoo lɛ mli nɔyaa sɔrɔtoi lɛ. (Hebribii 13:17) Amɛyoo akɛ Niiahetsuulɔ kpeteŋkpele lɛ etsɔ nɛkɛ tsakemɔi nɛɛ anɔ eha amɛkɛ Ŋmalɛ mli nifeemɔ yɛ asafoi lɛ amli lɛ ekpa gbɛɛ babaoo.
Sɔɔmɔ Nitsumɔ Lɛ
11. Mɛni hu ákɛfata shiɛmɔ nitsumɔ lɛ he yɛ nyɛsɛɛ afii nyɔŋmɔi nɛɛ amli?
11 Nɔ ni ji enyɔ lɛ, krɔŋkrɔŋfeemɔ loo hetsuumɔ lɛ etee nɔ kɛtsɔ kaai ni kɔɔ he ni akɛaawo sɔɔmɔ nitsumɔ lɛ mli lɛ he.
1922: Awo mɛi fɛɛ ni kɛ amɛhe bɔɔ asafoi lɛ ahe lɛ hewalɛ ni amɛkɛ amɛhe awo shia kɛ shia sɔɔmɔ nitsumɔ mli. Monthly Bulletin (Amrɔ nɛɛ Wɔ Maŋtsɛyeli Sɔɔmɔ) ni gbɛtsɔɔmɔ kɛha sɔɔmɔ nitsumɔ lɛ yɔɔ mli lɛ je kpo.
1927: Daa shia kɛ shia shiɛmɔyaa Hɔgbaa je shishi,akɛ woji kɛ woji bibii ha koni akɛ tooyeli aye abua.
1937: Nine shɛ Klɛŋklɛŋ Nikasemɔ Nɔkwɛmɔ nɔ wolo bibioo kɛha shia Biblia mli nikasemɔi anɔ.
1939: Daa afi Buu-Mɔɔ shɛɛ he tafaa je shishi; nine shɛ nɔ ni fɛ 93,000 ni ji ehee ni ashɛ nɔ.
1940: Woji tɛtrɛbii kɛ nitsumɔ yɛ gbɛjegbɛi onɔ je shishi. Nɛkɛ maŋshiɛmɔ nɛɛ tee nɔ yɛ gbɛi sɔrɔtoi ni yaa hiɛ lɛ anɔ, ni nɔ ni fata he ji sɛɛsaramɔi kɛ shia Biblia mli nikasemɔi afeemɔ.
12. (a) Mɛni ejɛ hetsuumɔ ni tee nɔ yɛ sɔɔmɔ nitsumɔ lɛ mli nɛkɛ lɛ mli eba? (b) Mɛɛ gbɛ nɔ wɔɔtsɔ wɔjie anɔkwale ni wɔyeɔ gbɛ ni Yehowa etsɔ nɔ etsuu ewebii ahe lɛ kpo wɔtsɔɔ yɛ?
12 Mɛni ejɛ enɛɛmɛi fɛɛ mli eba? Asɔŋ mɛi komɛi anɔ ni ajie amɛ kɛjɛ mli yɛ afii lɛ amli akɛni amɛsumɔɔɔ ni amɛfeɔ Kristofoi ni woɔ yibii hewɔ. (Yohane 15:5) Ni kɛlɛ Yehowa webii lɛ ateŋ mɛi ni fa ekpɛlɛ tsɛmɔ kɛha Maŋtsɛyeli shiɛmɔ lɛ nɔ. Ejaakɛ nakai kuu fioo ni shɛɛɛ 8,000 yɛ afi 1919 lɛ etee nɔ eda kɛyashɛ Maŋtsɛyeli shiɛlɔi ayifalɛ ni fe fɛɛ ni ji 3,229,022 yɛ 1986! Ní be fɛɛ sɔɔmɔ lɛ hu? Kɛ akɛto Colporteurs (gbɛgbalɔi) ni yɔɔ ekaa yɛ 1919 agbiɛnaa be mli lɛ he lɛ, wɔna gbɛgbalɔi shiɛlɔi ni kɛ aja mli lɛ amɛshiɛɔ daa nyɔŋ nɔ ni ji 391,000—yibɔ ni fe fɛɛ yɛ ŋmɛnɛŋmɛnɛ beaŋ Yehowa Odasefoi lɛ ayinɔsane mli! Kɛ wɔkɛ ekaa wo sanekpakpa lɛ shiɛmɔ mli lɛ, wɔjieɔ anɔkwale mli ni wɔjɛɔ wɔfiɔ gbɛ ni Yehowa etee nɔ etsɔ nɔ etsuu ewebii ahe efee amɛ krɔŋkrɔŋ lɛ sɛɛ lɛ kpo wɔtsɔɔ.—1 Korintobii 9:16.
La Ni Yaa Hiɛ
13. Mɛni ji gbɛi ni Yehowa etsɔ nɔ eha ewebii ena nibii ahe shishinumɔ lɛ ekomɛi ahe nɔkwɛmɔ nɔ?
13 Nɔ ni ji etɛ lɛ, afee Nyɔŋmɔ webii lɛ krɔŋkrɔŋ yɛ be mli ni aka amɛ akwɛ akɛ amɛbaakpɛlɛ mumɔŋ shishinumɔ ni jɛ Biblia lɛ mli ni yaa hiɛ lɛ nɔ lo lɛ. (Abɛi 4:18) Kɛjɛ 1919 kɛbaa ŋmɛnɛŋmɛnɛ be nɛɛ mli lɛ, anɔkwalei ni anu shishi ehee lɛ babaoo eho ni eku ebɔ he shii toi abɔ.
1925: Abayoo yɛ faŋŋ mli akɛ gbɛjianɔtoi sɔrɔtoi enyɔ ni anaa faŋŋ ni teɔ shi woɔ amɛhe yɔɔ—Yehowa nɔ kɛ Satan nɔ.
1931: Akpɛlɛ gbɛi heei ni ji Yehowa Odasefoi lɛ nɔ.
1935: Abayoo “asafo babaoo” ni yɔɔ Kpojiemɔ 7:9-15 lɛ akɛ kuu ni yɔɔ shikpɔŋ nɔ hiɛnɔkamɔ.
1941: Atsɔɔ mli akɛ ja ni jeŋ muu fɛɛ maŋtsɛ ni Yehowa ji lɛ ja lɛ ji sane titri ni Satan Mpoatswaa lɛ tee lɛ shi.
1962: Abayoo “hegbɛi ni yeɔ nɔ” ni yɔɔ Romabii 13:1 lɛ jogbaŋŋ akɛ jeŋ nɔyeli hegbɛi, ni esa akɛ Kristofoi aba amɛhe shi aha amɛ yɛ gbɛ ni husu yɔɔ mli nɔ aloo yɛ nii ni akɛtoɔ nii ahe gbɛ nɔ.
1986: Abayoo akɛ esa akɛ shwɛɛnii lɛ kɛ “asafo babaoo” lɛ fɛɛ aye Yesu heloo kɛ ela lɛ yɛ okadi gbɛ nɔ kɛtsɔ kpɛlɛmɔ ni amɛaakpɛlɛ efɔleshaa lɛ nɔ lɛ nɔ, bɔni afee ni amɛkɛ lɛ akpa gbee.—Yohane 6:53-56.
Yɛ afii nyɔŋmanyɔŋmai ni eho lɛ amli yɛ be mli ni Yehowa ha ewebii nu nibii ashishi lɛ, ebafee faŋŋ akɛ ehe miihia ni asafo lɛ agbala ejwɛŋmɔ kɛba hetsemɔ, gbɛjianɔtoo ni kɛ ehe wooo maŋ saji amli kɛ bulɛ kɛha krɔŋkrɔŋ ni la ji lɛ nɔ.—1 Korintobii 5:11-13; Yohane 17: 14, 16; Bɔfoi lɛ Asaji 15:28, 29.
14. (a) Te Yehowa webii ehere nɛkɛ shishinumɔ kɛ hiɛtɛjemɔ ni baa fiofio lɛ nɔ amɛhe teŋŋ? (b) Mɛni ji ofaishitswaa yɛ gbɛjianɔtoo ni Yehowa tsɔɔ nɔ ekɛwɔ wieɔ lɛ he?
14 Te Nyɔŋmɔ webii ehere nɛkɛ shishinumɔ ni yaa hiɛ nɛɛ nɔ amɛha tɛŋŋ? Yɛ be fɛɛ mli lɛ, fioo ko hiɔ shi ni amɛkpɛlɛɛɛ tsakemɔi komɛi anɔ. ‘Asha amɛmli’ ni ajie amɛ kɛjɛ mli. (Mateo 3:12) Yɛ gbɛ kroko nɔ lɛ, Yehowa webii yɛ miishɛɛ diɛŋtsɛ yɛ nɛkɛ mumɔŋ shishinumɔ kɛ hiɛtɛjemɔ nɛɛ hewɔ! Yɛ be mli ni Kristendom gbugbuɔ shi yɛ mumɔŋ duŋ kpii mli lɛ, Yehowa webii agbi lɛ yaa nɔ ekpɛɔ kaŋkaŋ yɛ be fɛɛ mli. Ani esaaa akɛ wɔtswaa wɔfai shi akɛ wɔkɛ wɔhe baakpɛtɛ gbɛjianɔtoo ni Yehowa tsɔɔ nɔ ekɛwɔ wieɔ ni ekɛtsuɔ nii lɛ he gbagbalii, ni wɔkpɛlɛ nɛkɛ shishinumɔ ni yaa hiɛ fiofio nɛɛ nɔ akɛ “niyenii yɛ be ni sa mli”?—Mateo 24:45.
Nifeemɔi Ni He Tseee Ni Aaajie Kɛaaya
15. Yɛ mɛɛ gbɛ nɔ Yehowa etee nɔ etsuu ewebii ahe fiofio yɛ Babilon nifeemɔi ni he tseee lɛ ahe?
15 Nɔ ni ji ejwɛ lɛ, hetsuumɔ ba yɛ be mli ni ebafee mla ni ka shi akɛ ajie Babilonia nifeemɔi ni he tseee lɛ kɛjɛ wɔteŋ lɛ. Afi 1920 mli ni Nyɔŋmɔ webii kpa Blonya ni ayeɔ kɛ gbii juji krokomɛi ni ayoo akɛ ejɛ wɔŋjamɔ mli lɛ yeli. Afi 1945 mli ni atsɔɔ Kristofoi ashidaamɔ yɛ la ni agbalaa awoɔ mɛi amli lɛ he. Jeŋba ni yɔɔ 1960 kɛ 1970 afii lɛ amli lɛ tee nɔ eba shi yɛ je lɛŋ, shi Buu-Mɔɔ lɛ tee nɔ ekɛ ŋaawoo ha Nyɔŋmɔ webii yɛ saji tamɔ jeŋba kpakpa yɛ nuu kɛ yoo teŋ kɛ bɔ ni ehe hiaa akɛ aaatsi he kɛaajɛ tawa shɛremɔ kɛ tsofai krokomɛi ahe lɛ mli.
16. Te esa akɛ asusu tsakemɔi kɛ nifeemɔi ni he tseee nɛɛ he aha tɛŋŋ?
16 Shi tsakemɔi ni kɔɔ nifeemɔi ni he tseee nɛɛ he lɛ tsuɔ nii akɛ anɔkwayeli he kaa kɛha Nyɔŋmɔ webii. Shi mɛi ni fee tsakemɔi ni he hiaa nɛɛ kwɛɔ tsakemɔi nɛɛ akɛ yelikɛbuamɔ ni Yehowa kɛha koni amɛjie amɛ atade ni ewo muji lɛ kɛjɛ amɛhe. Amɛyoo akɛ eyɛ mli akɛ kusum-nifeemɔi ni kpɛtɛ gbii juji komɛi ahe lɛ baanyɛ afee nɔ ni yeee mɔ ko awui moŋ, shi bɔ ni Yehowa kwɛɔ nii lɛ ji nɔ ni esa akɛ wɔsusu he; etsɔ hiɛ eyoo wɔŋjamɔ mli nifeemɔi ni nɛkɛ nibii nɛɛ jɛ mli lɛ. Yeɔ Nyɔŋmɔ jeŋba he taomɔ nii ahe lɛ, amɛbuɔ enɛɛmɛi akɛ hebuu nɔ̃ moŋ, fe naatsii, no hewɔ lɛ Yehowa jɔɔ amɛ yɛ krɔŋkrɔŋ ni amɛfee amɛhe lɛ hewɔ. Kɛji akɛ ewa akɛ amɛaanu tsakemɔ ko shishi lɛ, amɛkɛ amɛhiɛ fɔɔ Yehowa nɔ akɛ ‘eeetsɔɔ amɛ nii ni he baaba sɛɛnamɔ aha amɛ.’—Yesaia 48:17.
17, 18. (a) Mɛɛ gbɛ nɔ Niiahetsuulɔ kpeteŋkpele lɛ tsɔɔ ekaa wɔ aŋkroaŋkroi lɛ? (b) Mɛni esa akɛ efee wɔfaishitswaa yɛ be mli ni wɔmɛɔ Yehowa gbi lɛ?
17 Yehowa tee nɔ afi fɛɛ afi etsuu ni etse ewebii ahe. Akɛ kuu lɛ, amɛba amɛhe shi amɛha hetsuumɔ nifeemɔ ni kɔɔ amɛgbɛjianɔtoo lɛ, amɛnitsumɔ, tsɔɔmɔi kɛ jeŋba hetsemɔ he lɛ. Shi wɔ aŋkroaŋkroi lɛ hu? Yehowa yaa nɔ etsɔɔ egbɛjianɔtoo lɛ nɔ ekɛ “niyenii ni wa” haa wɔ kɛha wɔgbɛtsɔɔmɔ ni baatsuu wɔtsui he. Akaa wɔjwɛŋmɔ akwɛɔ. (Hebribii 4:12; 5: 14) Kɛ̃ wɔkpɛlɛ Niiahetsuulɔ kpeteŋkpele lɛ hetsuumɔ kɛ krɔŋkrɔŋfeemɔ lɛ nɔ lɛ, wɔyaa nɔ wɔhiɔ shi akɛ mɛi ni he tse yɛ be mli ni wɔmɛɔ “Yehowa gbi wulu kpele ni he yɔɔ gbeyei lɛ.”—Maleaki 3:23.
18 Shidaa aha Yehowa, “anɔkwale Nuŋtsɔ lɛ” kɛ “kpaŋmɔ bɔfo lɛ,” ni ji Yesu Kristo, ni tsuɔ wɔbe ni amɛjieɔ wɔ kɛjɛɔ muji fɛɛ mli, yɛ kaa kɛ nɔ nɔsɔŋmɔ be nɛɛ mli lɛ. Eba akɛ wɔ fɛɛ wɔɔtswa wɔfai shi akɛ wɔbaaya nɔ wɔnyiɛ yɛ Yehowa toiŋjɔlɛ gbɛ̀i ni nɔ tee lɛ anɔ yɛ “Hejɔlɛ Lumɔ” lɛ ni ji Kristo Yesu shishi, koni wɔhiɛ miishɛɛ wekukpaa ni ka wɔkɛ Yehowa teŋ lɛ mli—Yesaia 9:6; Lala 72:7.
[Shishigbɛ niŋmai]
Ajie kɛjɛ June 15, 1987 Watchtower lɛ mli.
Yɛ Mɛɛ Gbɛ Nɔ Yehowa Etsuu Ewebii Ahe Yɛ—
◻ Tsakemɔ yɛ gbɛjianɔtoo mli?
◻ He ni akɛwoɔ sɔɔmɔ nitsumɔ lɛ mli lɛ mli?
◻ Kpɛlɛmɔ ni aaakpɛlɛ shishinumɔ ni yaa hiɛ fiofio lɛ nɔ?
◻ Nifeemɔi ni he tseee ni aaajie kɛaajɛ he kɛaaya?
[Wiemɔ ni akɔ ni akɛmiitsu nii ni yɔɔ baafa 16]
Yɛ krɔŋkrɔŋfeemɔ kɛ hetsuumɔ lɛ hewɔ lɛ shwɛɛnii Iɛ ni hiɛ anɔkwa tsui Iɛ ‘batsɔmɔ tamɔ gbɔmɛi ni kɛ kee nii miisha afɔle yɛ jalɛ mli amɛha Yehowa
[Wiemɔ ni akɔ ni akɛmiitsu nii ni yɔɔ baafa 26]
Yehowa yaa nɔ afi fɛɛ afi etsuuɔ ewebii ahe ni efeɔ amɛ krɔŋkrɔŋ
[Akrabatsa ni yɔɔ baafa 19]
“Ni amɛla Nyɔŋmɔ tsulɔ Mose lala lɛ kɛ Toobi lɛ lala lɛ amɛkɛɛ: ‘Onitsumɔi lɛ dara ni amɛyɛ naakpɛɛ Nuŋtsɔ Nyɔŋmɔ Ofe. Ogbɛ́i lɛ ja ni anɔkwa ji amɛ, bo jeŋmaji lɛ amaŋtsɛ Namɔ po sheŋo gbeyei ni ewoŋ ogbɛi lɛ hiɛ nyam? Ejaakɛ bo okometoo ji mɔ krɔŋkrɔŋ; ejaakɛ jeŋmaji lɛ fɛɛ aaaba ni amɛbaja yɛ ohiɛ, ejaakɛ ojie ojalɛ nii lɛ ashi faŋŋ.’”—Kpojiemɔ 15:3, 4.
[Mfoniri ni yɔɔ baafa 27]
Blema niiahetsuulɔ lɛ jieɔ muji fɛɛ kɛjɛɔ hiɛ. Nakai nɔŋŋ hu Yehowa ŋmɛɔ kaa kɛ nɔ nɔsɔŋmɔ gbɛ koni ekɛtsuu ewebii ahe
[Mfoniri ni yɔɔ baafa 28]
‘Asha fioo ko mli kɛjɛ mli akɛ “tutuu” shi Yehowa tsuji anɔkwafoi lɛ kɛ miishɛɛ kpɛlɛɔ mumɔŋ shishinumɔ ni yaa hiɛ fiofio lɛ nɔ
[He ni Sane lɛ Jɛ]
Pictorial Archive (Near Eastern History) Est.
[Baafa 31]October Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)