Mɛni ji yiŋtoo kroko hewɔ ni esa akɛ wɔtsi wɔhe kwraa kɛjɛ nakai gbɔmɔ ni ekɔ́ gbɛ fɔŋ lɛ he lɛ? Salomo haa hetoo akɛ: “Koni okaŋɔ ohewalɛ oha mɛi krokomɛi, kɛ ofii lɛ hu oha yiwalɔ; koni gbɔi akaye onii lɛ amɛmiitɔrɔ, ni onitsumɔ nii lɛ akayaje mɔkpɔŋ ko we; ní okakɛ̃mɔ yɛ onaagbee be lɛŋ, beni oheloo kɛ ogbɔmɔtso hiɛ ekpata lɛ.”—Abɛi 5:9-11.

Shi, mɛni hu fata ‘wɔ afii, wɔ hewalɛ, kɛ wɔdeŋmegbomɔ mli yibii ni baayaje gbɔi loo mɛikpɔji adɛŋ’ lɛ he? Wolo ko wieɔ he akɛ: “Oti ni yɔɔ kukuji nɛɛ amli lɛ yɛ faŋŋ: Nɔ ni jɛɔ anɔkwa ni ayeee mli kɛbaa lɛ jara wa waa diɛŋtsɛ; ejaakɛ nɔ fɛɛ nɔ ni mɔ ko etsu ni ená—gbɛhe, hewalɛ, gbɛihemɔ—baanyɛ aje edɛŋ kɛtsɔ nibii ni yoo ni hiɛ kɔɔ nii anɔ lɛ baabi lɛ nɔ, loo kɛtsɔ najiaŋtoo ni akutso lɛ baabi lɛ nɔ.” Bɔlɛnamɔ jeŋba shara jara baanyɛ awa waa!