Ná Nilee Ni Okpɛlɛ Tsɔsemɔ nɔ

YEHOWA NYƆŊMƆ ji ewebii lɛ a-Tsɔɔlɔ Kpeteŋkpele. Etsɔɔɔ amɛ nibii ni kɔɔ lɛ diɛŋtsɛ ehe pɛ kɛkɛ, shi moŋ nibii ni kɔɔ shihilɛ he hu. (Yesaia 30:​20; 54:​13; Lala 27:​11) Ákɛ nɔkwɛmɔnɔ lɛ, Yehowa ha Israel maŋ lɛ gbalɔi, Levibii​—titri lɛ osɔfoi​—kɛ nilelɔi krokomɛi ni amɛsɔmɔ akɛ tsɔɔlɔi. (2 Kronika 35:⁠3; Yeremia 18:​18) Gbalɔi lɛ tsɔɔ gbɔmɛi lɛ nibii ni kɔɔ Nyɔŋmɔ yiŋtoi kɛ esui ahe ni amɛtsɔɔ gbɛ ni ja ni esa akɛ amɛkɔ. Sɔ̃ kã osɔfoi lɛ kɛ Levibii lɛ anɔ akɛ amɛtsɔɔ Yehowa Mla lɛ. Ni nilelɔi lɛ, loo onukpai lɛ kɛ ŋaawoo kpakpa ni kɔɔ daa gbi shihilɛ mli saji ahe haa.[1]

Salomo, ni ji David bi lɛ ji Israel nilelɔi lɛ ateŋ mɔ ni ekaaa. (1 Maŋtsɛmɛi 5:​10, 11Ga Bible) Beni ená enunyam kɛ eninámɔ lɛ, esaralɔi ni ehe gbɛi waa lɛ ateŋ mɔ kome, ni ji Sheba maŋnyɛ lɛ kpɛlɛ nɔ akɛ: “Jeee emli fã tete agba mi lɛ: onilee kɛ oshweremɔ lɛ fa aahu fe yijiemɔ ni minu lɛ tete.” (1 Maŋtsɛmɛi 10:⁠7) Mɛni ji nɔ ni hɔ Salomo nilee lɛ sɛɛ? Beni ebatsɔ Israel maŋtsɛ yɛ afi 1037 D.Ŋ.B. lɛ, Salomo sɔle ebi “nilee kɛ sɛɛyoomɔ.” Akɛni Yehowa ná enibimɔ lɛ he miishɛɛ hewɔ lɛ, eha lɛ sɛɛyoomɔ, nilee kɛ shishinumɔ tsui. (2 Kronika 1:​10-​12; 1 Maŋtsɛmɛi 3:​12) Ebɛ naakpɛɛ akɛ Salomo ‘bu abɛi akpei etɛ’! (1 Maŋtsɛmɛi 5:​12Ga Bible) Aŋmala enɛɛmɛi ekomɛi ní “Agur . . . wiemɔi” lɛ kɛ “Maŋtsɛ Lemuel” nɔ lɛ fata he lɛ yɛ Biblia mli wolo ni ji Abɛi lɛ mli. (Abɛi 30:⁠1; 31:⁠1) Anɔkwa wiemɔi ni yɔɔ nɛkɛ abɛbuai nɛɛ amli lɛ jieɔ Nyɔŋmɔ nilee lɛ kpo ni amɛyɛ kɛyashi naanɔ. (1 Maŋtsɛmɛi 10:​23, 24) Amɛhe yɛ sɛɛnamɔ ŋmɛnɛ kɛha mɔ fɛɛ mɔ ni miisumɔ ni ená miishɛɛ ni eye omanye yɛ shihilɛ mli lɛ tamɔ bɔ ni awie he klɛŋklɛŋ lɛ.

Omanyeyeli kɛ Jeŋba Mli Hetsemɔ​—Yɛ Mɛɛ Gbɛ Nɔ?

Atsɔɔ yiŋtoo ni yɔɔ Abɛi awolo lɛ sɛɛ yɛ nɛkɛ hiɛkpamɔ wiemɔi nɛɛ amli: “Israel maŋtsɛ Salomo, David bi lɛ, abɛi nɛ: Ní akɛle nii kɛ tsɔsemɔ, ní akɛnu wiemɔi ni jwɛŋmɔ yɔɔ mli ashishi; ní akɛná tsɔsemɔ ni tsɔɔ mɔ nilee, kɛ jalɛ kɛ kojomɔ kɛ nɔ ni ja gbɛ; ní akɛtsɔɔ mɛi ni nako jwɛŋmɔ lɛ ahiɛtɛ̃ɛ, kɛ oblanyo hu nilee kɛ jwɛŋmɔ.” (Wɔma efã ko nɔ mi.)​—Abɛi 1:​1-⁠4.

Mɛɛ yiŋtoo ni yɔɔ nyam “Salomo . . . abɛi” lɛ hiɛ nɛkɛ! Amɛyɛ “ní akɛle nii kɛ tsɔsemɔ.” Nilee ji ní ayoo nibii bɔ ni amɛyɔɔ lɛ ni akɛ sanesɛɛkɔmɔ atsu naagbai ahe nii, ashɛ otii ahe, akwa loo atsi he kɛjɛ osharai ahe, loo aye abua mɛi krokomɛi ní amɛfee nakai.[2] Wolo ko tsɔɔ mli akɛ: “Yɛ Abɛi a-Wolo lɛ mli lɛ, ‘nilee’ tsɔɔ ŋaa ni akɛhiɔ shi⁠—⁠nyɛmɔ ni akɛfeɔ nihalamɔi ni nilee yɔɔ mli ní akɛhiɔ shi yɛ omanyeyeli mli.”[3] Kwɛ bɔ ni ehe hiaa akɛ aná nilee!​—Abɛi 4:⁠7.

Salomo abɛi lɛ hu kɛ tsɔsemɔ haa. Ani tsɔsemɔ nɛɛ he miihia wɔ? Yɛ Ŋmalɛi lɛ amli lɛ, tsɔsemɔ hiɛ shishinumɔ ni tsɔɔ saamɔ, hiɛkamɔ, loo toigbalamɔ.[4] Taakɛ Biblia he nilelɔ ko tsɔɔ lɛ, “etsɔɔ jeŋba su lɛ tsɔsemɔ, kɛ suɔmɔ ni mɔ ko sumɔɔ ni egba afã lɛ saamɔ.”[6] Jeee akɛ kɛji wɔtsɔse wɔhe loo mɔ kroko tsɔse wɔ lɛ, wɔtsiɔ wɔhe kɛjɛɔ efɔŋfeemɔ he kɛkɛ, shi moŋ ekanyaa wɔ koni wɔtsake ni wɔtsɔmɔ gbɔmɛi kpakpai.[7] Hɛɛ, kɛji wɔmiisumɔ ni wɔhi shi akɛ mɛi ni jeŋba he tse lɛ, no lɛ, tsɔsemɔ he miihia wɔ.

Belɛ, yiŋtoi enyɔ yɔɔ abɛbuai lɛ amli​—koni ekɛ nilee kɛ tsɔsemɔ aha.[8] Jeŋba he tsɔsemɔ kɛ jwɛŋmɔŋ nyɛmɔ hiɛ fãi srɔtoi. Ákɛ nɔkwɛmɔnɔ lɛ, jalɛ kɛ jalɛsaneyeli ji jeŋba mli sui,[9] ni amɛyeɔ amɛbuaa wɔ koni wɔbo Yehowa shishitoo mlai ni nɔ kwɔlɔ lɛ toi.[10]

Nilee ji nibii babaoo ni akɛfutu, ní sane shishinumɔ, sɛɛyoomɔ, hiɛtɛ̃ɛ kɛ jwɛŋmɔŋ nyɛmɔ fata he.[11] Sane shishinumɔ ji nyɛmɔ ni akɛnaa saji anaa ni akɛyɔseɔ bɔ ni eji kɛtsɔ efãi srɔtoi ni tsara ni aaafee lɛ ekome lɛ nɔ, kɛkɛ lɛ, ayoo sɛɛ.[12] Sɛɛyoomɔ biɔ sanesɛɛkɔmɔ ni akɛ susuɔ nii ahe kɛ sane shishinumɔ ni akɛleɔ nɔ hewɔ ni nifeemɔ ko ja loo ejaaa.[13] Ákɛ nɔkwɛmɔnɔ lɛ, mɔ ni yɔɔ sane shishinumɔ lɛ baanyɛ ana beni mɔ ko miiya he ko ni ejaaa, ni ekolɛ ebaabɔ lɛ kɔkɔ amrɔ nɔŋŋ akɛ oshara yɛ jɛmɛ. Shi ebiɔ sɛɛyoomɔ yɛ egbɛfaŋ koni ekɛnu nɔ hewɔ ni gbɔmɔ lɛ yaa jɛmɛ lɛ shishi koni ena gbɛ ni hi fe fɛɛ ni eeetsɔ nɔ eye ebua lɛ.

Gbɔmɛi ni hiɛ tɛ̃ lɛ yɛ nilee​—jeee mɛi ni heɔ nɔ fɛɛ nɔ amɛyeɔ. (Abɛi 14:​15) Amɛnyɛɔ amɛnaa efɔŋ ni miiba ni amɛsaa amɛhe kɛhaa no. Ni nilee yeɔ ebuaa wɔ ni wɔnyɛɔ wɔsusuɔ nibii kpakpai kɛ susumɔi ni kɛ yiŋtoo kpakpa baa shihilɛ mli lɛ ahe.[14] Biblia mli abɛi lɛ akasemɔ he yɛ sɛɛnamɔ lɛɛlɛŋ ejaakɛ aŋmala ashwie shi bɔni afee ni wɔná nilee kɛ tsɔsemɔ. “Mɔ ni nako jwɛŋmɔ” ni boɔ abɛi lɛ toi lɛ po hiɛ baatɛ̃, ni “oblanyo” hu baaná nilee kɛ jwɛŋmɔ.

Abɛi Kɛha Nilelɔi Lɛ

Shi kɛlɛ, Biblia mli abɛi lɛ bɛ kɛha mɔ ni nako jwɛŋmɔ kɛ oblanyo pɛ. Amɛyɛ kɛha mɔ fɛɛ mɔ ni yɔɔ nilee bɔ ni sa ni ekɛaabo toi. Maŋtsɛ Salomo kɛɛ akɛ: “Ní nilelɔ anu ní eshwere yɛ nikasemɔ gbɛfaŋ, ní mɔ ni yɔɔ jwɛŋmɔ hu aná ŋaawoo kpakpa, ní akɛnu abɛ kɛ wiemɔi ni shishinumɔ jaraa, nilelɔi awiemɔi kɛ amɛbɛbuai ashishi.” (Abɛi 1:​5, 6, wɔma efã ko nɔ mi.) Mɔ ni ená nilee momo lɛ baaya hiɛ yɛ nikasemɔ mli kɛji ebo abɛi lɛ toi, ni mɔ ni yɔɔ sane shishinumɔ lɛ baaha nyɛmɔ ni ekɛaakudɔ eshihilɛ yɛ omanyeyeli mli lɛ afa babaoo.

Bei pii lɛ, abɛi jieɔ anɔkwa wiemɔi akpo yɛ wiemɔi fioo ko pɛ mli.[15] Ekolɛ, Biblia mli abɛ ko baanyɛ afee wiemɔi ni shishinumɔ jaraa. (Abɛi 1:​17-​19) Abɛi komɛi ashishinumɔ wa​—wiemɔi ni futuɔ mɔ yiŋ ni yɔɔ ŋwanyaŋŋ ni biɔ shishitsɔɔmɔ.[16] Nɔ ko ni akɛtoɔ nɔ ko he, okadifeemɔ wiemɔi kɛ mfoniri feemɔŋ wiemɔi krokomɛi ni akɛtoɔ nii ahe baanyɛ ahi abɛ ko mli.[17] Enɛɛmɛi ashishinumɔ heɔ be kɛ sane nɔ jwɛŋmɔ. Eka shi faŋŋ akɛ, Salomo, ní ŋma abɛi babaoo lɛ, ná abɛi ashishinumɔ he jwɛŋmɔ. Yɛ Abɛi awolo lɛ mli lɛ, ebɔ mɔdɛŋ koni ekɛ nakai nyɛmɔ lɛ aha enikanelɔi lɛ, nɔ ko ni gbɔmɔ ni le nii lɛ baasumɔ ni ebo toi.[17a]

Shishijee ni Kɛ Mɔ Shɛɔ Oti lɛ He

Nɛgbɛ mɔ ko jeɔ shishi etiuɔ nilee kɛ tsɔsemɔ sɛɛ yɛ? Salomo haa hetoo akɛ: “Yehowa gbeyeishemɔ ji nilee shishijee; shi kwashiai gbeɔ nilee kɛ tsɔsemɔ he guɔ.” (Abɛi 1:⁠7, wɔma efã ko nɔ mi.) Nilee jeɔ shishi kɛ Yehowa gbeyeishemɔ. Kɛ nilee bɛ lɛ anyɛŋ aná ŋaalee loo tsɔsemɔ. No hewɔ lɛ, Yehowa gbeyeishemɔ ji nilee kɛ tsɔsemɔ shishijee.​—Abɛi 9:​10; 15:⁠33.

Nyɔŋmɔ gbeyeishemɔ jeee gbeyeishemɔ fɔŋ ni anáa ahaa lɛ. Shi moŋ, eji bulɛ kɛ woo ni mli kwɔ. Anyɛŋ aná anɔkwa nilee ni gbeyeishemɔ nɛɛ fataaa he. Wala jɛ Yehowa Nyɔŋmɔ ŋɔɔ, ni eji anɔkwale akɛ, wala he miihia kɛha wɔ nilee namɔ. (Lala 36:⁠9; Bɔfoi lɛ Asaji 17:​25, 28) Kɛfata he lɛ, Nyɔŋmɔ bɔ nibii fɛɛ; no hewɔ lɛ, adesai anilee fɛɛ damɔ eninenaa nitsumɔi lɛ akasemɔ nɔ. (Lala 19:​1, 2; Kpojiemɔ 4:​11) Nyɔŋmɔ hu ji mɔ ni kɛ mumɔ tsirɛ e-Wiemɔ ni aŋma, ni ‘hi ha nitsɔɔmɔ kɛ hiɛkamɔ kɛ mɔ saamɔ kɛ tsɔsemɔ ni yɔɔ jalɛ mli lɛ.’ (2 Timoteo 3:​16, 17) No hewɔ lɛ, nɔ titri ni he hiaa yɛ anɔkwa nilee fɛɛ mli ji Yehowa, ni esa akɛ mɔ ni miitao lɛ aná gbeyeishemɔ ni mli kwɔ kɛha lɛ.

Mɛɛ sɛɛnamɔ yɔɔ adesai anilee kɛ je lɛŋ ŋaalee ni Nyɔŋmɔ gbeyeishemɔ bɛ mli lɛ he? Bɔfo Paulo ŋma akɛ: “Nɛgbɛ nilelɔ yɔɔ? nɛgbɛ woloŋmalɔ yɔɔ? nɛgbɛ je nɛŋ naataalɔ yɔɔ? Ani Nyɔŋmɔ ehako je lɛŋ nilee lɛ atsɔ kwashiai asane?” (1 Korintobii 1:​20) Akɛni ebɛ Nyɔŋmɔ gbeyeishemɔ hewɔ lɛ, mɔ ni yɔɔ jeŋ nilee lɛ muɔ saji anaa yɛ gbɛ ni ejaaa nɔ kɛjɛɔ anɔkwalei ni ale mli, ni ehaa efeɔ ‘kwashia.’

“Kɔsɔ̃ŋkɔsɔ̃ Ha Okuɛ”

Maŋtsɛ nilelɔ lɛ wie etsɔɔ oblahii kɛ oblayei lɛ yɛ sɛɛ mli akɛ: “Mibi, bo otsɛ tsɔsemɔ lɛ toi, ni kaashɛ onyɛ mla lɛ ofɔ̃! Ejaakɛ nomɛi ji anunyam akekere ha oyitso kɛ kɔsɔ̃ŋkɔsɔ̃ ha okuɛ.” (Wɔma efã ko nɔ mi.)​—Abɛi 1:​8, 9.

Yɛ blema Israel lɛ, Nyɔŋmɔ kɛ sɔ̃ fɔ̃ fɔlɔi anɔ akɛ amɛtsɔse amɛbii lɛ. Mose wo tsɛmɛi ahewalɛ akɛ: “Nɛkɛ wiemɔi nɛɛ ni miwoɔ he kita ŋmɛnɛ gbi nɛɛ akã otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 6:​6, 7) Nyɛmɛi hu yɛ hewalɛ bɔ ni sa. Yɛ nɔyeli hegbɛ ni ewu lɛ yɔɔ mli lɛ, Hebriyoo baanyɛ awo weku mla lɛ mli hewalɛ.[18]

Yɛ anɔkwale mli lɛ, yɛ Biblia lɛ mli fɛɛ lɛ, weku lɛ ji shishijee kuu ni kɛ tsɔsemɔ haa. (Efesobii 6:​1-⁠3) Kɛ́ gbekɛbii bo amɛfɔlɔi ni heɔ yeɔ lɛ atoi lɛ, efeɔ tamɔ nɔ ni amɛkɛ anunyam akekere kɛ kɔsɔ̃ŋkɔsɔ̃ŋ ewula amɛhe yɛ mfonirifeemɔ gbɛ nɔ.[19]

“Nɔ ni Amɛdiɔ Sɛɛ lɛ Nɔŋŋ Ŋɔɔ Amɛwala Kɛyaa”

Dani ekɛ ebi nuu aaaya United States kɛha nɔtsamɔ skul lɛ, Asianyo tsɛ ko wo ebi ni eye afii 16 lɛ ŋaa koni ekɛ ehe akabɔ mɛi fɔji ahe.[20] Nɛkɛ ŋaawoo nɛɛ jijeɔ yɛ Salomo kɔkɔbɔɔ nɛɛ mli: “Mibi, kɛ́ eshafeelɔi miilakao lɛ, kaakpɛlɛ!” (Abɛi 1:​10, wɔma efã ko nɔ mi.) Shi kɛlɛ, Salomo tsɔɔ lakamɔ wiemɔi ni amɛkɛtsuɔ nii lɛ mli: “Amɛkɛɛ: Ba, wɔtee ni wɔyawo lá antɛo ni wɔyawo mɔ ni efeko nɔ ko ká yakatswaa; ha wɔmi amɛ hiɛkalɔi tamɔ gbohiiajeŋ, mɛi ni eye emuu lɛ hu tamɔ mɛi ni kpelekeɔ shi kɛyaa bu mli; wɔɔna nibii ni jara wa srɔtoi fɛɛ, wɔkɛ haanii aaawo wɔshiai obɔbɔ; okɛ ohe abɔ wɔhe; wɔ fɛɛ wɔɔhiɛ kotoku kome.”​—Abɛi 1:​11-​14.

Eyɛ faŋŋ akɛ, lakamɔ wiemɔi lɛ ji ninámɔi.[21] Bɔni afee ni amɛná nii mra hewɔ lɛ, “eshafeelɔi” lakaa mɛi krokomɛi koni amɛkɛ amɛhe awo amɛŋaatsɔi ni yeɔ awui ni ejaaa lɛ mli. Yɛ heloonaa ninámɔ hewɔ lɛ, mɛi fɔji nɛɛ shashaooo shi akɛ amɛaashwie lá shi. ‘Amɛmiɔ mɔ ni amɛnine shɛɔ enɔ lɛ hiɛkalɔ tamɔ gbohiiajeŋ,’ ni amɛheɔ nɔ fɛɛ nɔ ni eyɔɔ lɛ yɛ edɛŋ taakɛ bɔ ni gbonyobu heɔ gbɔmɔtso muu lɛ fɛɛ lɛ.[22] Amɛninefɔɔ lɛ ji awuiyeli nitsumɔ​—amɛmiisumɔ ni ‘amɛkɛ haanii awo amɛshiai obɔbɔ,’ ni amɛmiisumɔ ni mɔ ni bɛ niiashikpamɔ lɛ kɛ ‘ehe abɔ amɛhe.’[23] Mɛɛ kɔkɔbɔɔ ni yɔɔ ebe naa eji kɛha wɔ nɛkɛ! Ani oblahii kɛ oblayei kobɔlɔi akui kɛ mɛi ni hɔɔ tsofai fɔji lɛ kɛ gbɛ ni tamɔ nakai nɔŋŋ tsuuu nii amɛkɛtaooo mɛi? Ani ninámɔ mra he shi ni awoɔ lɛ jeee nɔ ni kaa nitsumɔi babaoo ni yiŋkɔshikɔshifeemɔ yɔɔ he ni atsuɔ lɛ?

Maŋtsɛ nilelɔ lɛ woɔ ŋaa akɛ: “Mibi, okɛ amɛ akanyiɛ gbɛ lɛ nɔ; kɔ onane kɛjɛ amɛtempɔŋ lɛ nɔ! Ejaakɛ amɛnaji sháa foi kɛyaa efɔŋfeemɔ mli, ni amɛhe feɔ oya kɛ láshishwiemɔ.” Beni egbaa amɛnaagbee hiɛkpatamɔ lɛ, ekɛfata he akɛ: “Ejaakɛ yakatswaa po akɛ yaa lɛɛɔ shi yɛ loofɔji ahiɛ. Shi amɛ lɛ, amɛ diɛŋtsɛ amɛlá antɛo amɛwoɔ, amɛmiiwo amɛsusumai hu ká. Bɔ ni hiɛjoolɔi fɛɛ anaa yaakpa nɛ, nɔ ni amɛdiɔ sɛɛ lɛ nɔŋŋ ŋɔɔ amɛwala kɛyaa.” (Wɔma efã ko nɔ mi.)​—Abɛi 1:​15-​19.

‘Mɔ fɛɛ mɔ ni taoɔ sɛɛnamɔ bɔ ni ejaaa’ lɛ hiɛ baakpata yɛ lɛ diɛŋtsɛ enifeemɔ lɛ mli. Antɛo ni mɛi fɔji woɔ mɛi krokomɛi lɛ nɔŋŋ baafee tsɔne kɛha amɛ.[24] Ani efɔŋfeelɔi ni jeɔ gbɛ amɛfeɔ efɔŋ lɛ baatsake amɛgbɛ lɛ? Dabi. Yaa baanyɛ alɛɛ shi ni aana, shi loofɔji​—adebɔɔ nibii ni “yɔɔ fiji”​—filikiɔ kɛyaboteɔ mli kɛ̃.[26] Nakai nɔŋŋ akɛni hiɛjoomɔ eshwila mɛi fɔji ahiŋmɛi hewɔ lɛ, amɛyaa nɔ yɛ amɛ awuiyeli nifeemɔi lɛ amli, eyɛ amli akɛ etsɛŋ loo sɛɛ mli lɛ abaamɔ amɛ.[27]

Namɔ Baabo Nilee Gbee Toi?

Ani eshafeelɔi le diɛŋtsɛ akɛ amɛgbɛ lɛ kɛ mɔ yaa hiɛkpatamɔ mli? Ani abɔ amɛ kɔkɔ yɛ nɔ ni baajɛ gbɛ ni amɛkɔ lɛ mli aba lɛ he? Anyɛŋ akɛ le ní aleee lɛ ajie naa, ejaakɛ ajaje shɛɛ sane ni yɔɔ tɛ̃ɛ yɛ blohuiaŋ.

Salomo jaje akɛ: “Nilee bolɔɔ yɛ blohuiaŋ, ewoɔ egbee yɛ jaji anɔ; ebolɔɔ yɛ hei ni efee hoo; ewieɔ ewiemɔi lɛ yɛ agbói lɛ anaa, yɛ maŋ lɛŋ.” (Abɛi 1:​20, 21, wɔma efã ko nɔ mi.) Nilee kɛ gbee ni jijeɔ ni yɔɔ faŋŋ miibolɔ yɛ blohuiaŋ koni mɛi fɛɛ anu. Yɛ blema Israel lɛ, onukpai kɛ ŋaawoo haa ni amɛkojoɔ yɛ maŋ lɛ agbói lɛ anaa.[28] Kɛha wɔ lɛ, Yehowa eha aŋmala anɔkwa nilee yɛ e-Wiemɔ, ni ji Biblia lɛ mli, ni eyɛ babaoo.[29] Ni etsuji bɛ dekã kwraa kɛmiijaje eshɛɛ sane lɛ yɛ he fɛɛ he ŋmɛnɛ.[30] Eji anɔkwale akɛ Nyɔŋmɔ eha ajaje nilee atsɔɔ wɔ fɛɛ.

Mɛni ji nɔ ni anɔkwa nilee kɛɔ? Enɛ: “Nyɛ mɛi ni nyɛnako jwɛŋmɔ, mɛɛ beyinɔ nɔŋŋ nyɛaasumɔ kwashiafeemɔ? ni hefɛoyelɔi aaana hefɛoyeli he miishɛɛ . . . ? Mitsɛ́, ni nyɛkwa, mikpã miniji amli, ni mɔ ko mɔ ko efooo mli.” Mɛi ni bɛ jwɛŋmɔ lɛ booo nilee gbee toi. No hewɔ lɛ, “amɛaaye amɛgbɛ lɛ mli yibii.” He ni amɛ diɛŋtsɛ ‘amɛkpaleɔ kɛyaa kɛ jwɛŋmɔ ni kwashiai jwɛŋɔ akɛ amɛyɛ shweshweeshwe lɛ nɔŋŋ aaakpata amɛhiɛ.’ (Wɔma efã ko nɔ mi.)​—Abɛi 1:​22-​32.

Shi mɛni baaba mɔ ni eŋɔ be ni ekɛbo nilee gbee lɛ toi lɛ nɔ? ‘Eeehi shi shweshweeshwe, ni ehe aaajɔ lɛ ní efɔŋ gbeyeishemɔ bɛŋ.’ (Abɛi 1:​33) Eba akɛ obaafata mɛi ni aaaná nilee ni amɛaakpɛlɛ tsɔsemɔ nɔ lɛ ahe kɛtsɔ toiboo ni ooofee oha Biblia mli abɛi lɛ nɔ.

[Mfoniri ni yɔɔ baafa 15]

Anɔkwa nilee babaoo yɛ