Bɔ Ni Aaafee Ajie Oshekuyeli Ni Fiteɔ Mɔ Lɛ Kɛya Kwraa

“Yehowa, too bulɔ yɛ minaabu, buu minaabu shinaa lɛ naa!”​—LALA 141:⁠3.

 1. Mɛɛ nyɛmɔ aŋsɔ ni Nyɔŋmɔ kɛha wɔ lɛ yɔɔ?

YEHOWA eha wɔ aŋsɔ, ni kwɛ bɔ ni enɛ yɔɔ naakpɛɛ ha! Wolo ni atsɛɔ lɛ The Incredible Machine lɛ kɛɔ akɛ: “Kompiuta sɔrɔtoi ni akɛ nilee ni fe fɛɛ efee ni wɔbaanyɛ wɔsusu he akɛ ebaaba po yɛ wɔsɛɛ be mli lɛ ji nibii ni kɛ akɛto bɔ ni adesa aŋsɔ lɛ yɔɔ hwanyaŋŋ kɛ tswaa ha lɛ he lɛ ehaa nɛkɛ kompiutai sɔrɔtoi nɛɛ feɔ tamɔ nibii ni adesai ni hiŋmɛii gbeleko fee . . . Okadii akpekpei abɔ ni hoɔ oya kɛtsɔɔ o-aŋsɔ lɛ mli yɛ bei fɛɛ mli lɛ tereɔ saji sɔrɔtoi babaoo diɛŋtsɛ kɛyaa. Amɛkɛ saji ni kɔɔ ogbɔmɔtso lɛ mligbɛ kɛ kponɔgbɛ nibii ahe haa . . . Yɛ be mli ni okadii krokomɛi pɛiɔ nɛkɛ saji loo amaniɛbɔi nɛɛ amli lɛ, amɛjieɔ henumɔi, jwɛŋmɔi, susumɔi loo gbɛjianɔtoi komɛi ni kɛ yiŋkpɛɛ baa lɛ akpo. Amrɔ nɔŋŋ pɛ kɛkɛ lɛ okadii ni jɛ aŋsɔ lɛ mli lɛ ekɛɛ ogbɔmɔtso lɛ fai lɛ nɔ ni esa akɛ amɛfee . . . Beni enɛ yaaa nɔ lɛ o-aŋsɔ lɛ hu miikudɔ bɔ ni omuɔ kɔɔyɔɔ ohaa, bɔ ni la ni yɔɔ omli lɛ tsuɔ nii ehaa kɛ emli nibii, gbɔmɔtso lɛ mli dɔlɛ, kɛ nibii krokomɛi ni etsuɔ ni he hiaa ni oyooo enɛ.”​—Baafa 326.

 2. Mɛɛ sanebimɔ esa akɛ wɔsusu he?

² Yɛ anɔkwale mli lɛ, esaaa akɛ akɛ naakpɛɛ nikeenii ni jɛ Nyɔŋmɔ ŋɔɔ nɛɛ tsuɔ nii gbi ko gbi ko akɛ jwɛi loomɔ nii loo jwɛi loomɔ tsɛŋsi. Ni kɛlɛ, wɔbaanyɛ ni wɔkɛ aŋsɔ lɛ atsu nii yɛ gbɛ ni ejaaa nɔ kɛtsɔ oshekuyeli ni fiteɔ mɔ loo mɔ heguɔgbee ni wɔɔbo toi ni wɔgbɛ wɔshwa lɛ nɔ. Te wɔɔfee tɛŋŋ wɔkwa wiemɔ ni tamɔ nɛkɛ ni wɔye wɔbua mɛi krokomɛi ni amɛtsi amɛhe kɛjɛ emli ni amɛkɛ amɛhe aaawo lɛ he?

Ha Ohiɛ Aso Jwɛŋmɔ Ni Nyɔŋmɔ Kɛha Bo Lɛ

 3. Mɛni hewɔ anɔkwa Kristofonyo ko kɛ ehe woŋ wiemɔ ni gbeɔ mɔ he guɔ lɛ mli lɛ?

³ Hiɛsɔɔ ni wɔɔna wɔha jwɛŋmɔ ni Nyɔŋmɔ kɛha wɔ lɛ baatsi wɔ gbɛ koni wɔkabo oshekuyeli ni fiteɔ mɔ lɛ toi ni wɔkagbɛ wɔshwa. Yehowa mumɔ lɛ kanyaŋ mɔ ko koni ekɛ nibii ni tamɔ nɛkɛ awo ejwɛŋmɔ mli ni ekɛ elilɛi atsu nii ni ekɛye mɔ ko awui. Shi moŋ, Nyɔŋmɔ Wiemɔ lɛ kɛɔ akɛ: “Ha ni mɔ fɔŋ akwa egbɛi lɛ, ni eshafeelɔ akwa ejwɛŋmɔi lɛ.” (Yesaia 55:⁠7) Nɔ ni eyi mɔ fɔŋ lɛ jwɛŋmɔ mli obɔ ji yiwalɛ nibii, ni ehe feɔ oya kɛ mɔ ni ja lɛ heguɔgbee. Shi wɔkpaŋ wiemɔ ni tamɔ nɛkɛ gbɛ kɔkɔɔkɔ kɛjɛŋ mɛi ni hiɛ sɔɔ jwɛŋmɔ ni Nyɔŋmɔ kɛha amɛ lɛ ŋɔɔ.

 4. Kɛ wɔhiɛ sɔɔ aŋsɔ lɛ kɛ nyɛmɔ ni wɔyɔɔ ni wɔkɛwieɔ lɛ, no lɛ wɔkɛ wɔjwɛŋmɔ kɛ wɔlilɛi baatsu nii yɛ mɛɛ gbɛ nɔ?

⁴ Hiɛsɔɔ kpakpa baaye abuɔ wɔ ni wɔtsi wɔhe kɛjɛ wɔjwɛŋmɔ kɛ wɔlilɛi ni wɔkɛaatsu nii wɔha wɔheloo ni efee esha lɛ suɔmɔnaa nii. Shi moŋ, wɔbaaya nɔ ni wɔjwɛŋ ni wɔwie nibii ni hi lɛ ahe. Wɔbaanyɛ wɔkpoo oshekuyeli ni fiteɔ mɔ kɛtsɔ sɔlemɔ nɔ ni wɔɔtsɔ ni wɔkɛ wɔbe afɔ Mɔ ni jwɛŋmɔi kɛ susumɔi nɔ kwɔlɔ kwraa fe wɔnɔ lɛ nɔ. Bɔfo Paulo wo ŋaa akɛ: “Nii abɔ ni ji anɔkwa [jeee amale loo nɔ ni gbeɔ mɔ he guɔ], nii ni sa woo [jeee nibii bibii], nii ni ja [jeee yiwalɛ nibii], nii ni he tse [jeee mɔ heguɔgbee loo efɔŋ krokomɛi ni he tseee], nii ni adɔɔ he [jeee nibii ni anyɛɔ ni baa mɔ shi], nii ni yɔɔ gbɛi kpakpa lɛ fɛɛ [jeee nɔ ni baa mɔ shi], kɛ jeŋba kpakpa ko yɛ [jeee efɔŋ], kɛ yijiemɔ [jeee nɔ ni buɔ mɔ fɔ] ko hu yɛ lɛ, enɛɛmɛi anɔ nyɛjwɛŋa.”​—Filipibii 4:⁠8.

 5. Mɛni nanemɛi heyelilɔi ena ni amɛnu hu yɛ Paulo he?

⁵ Paulo kɛfata he akɛ: “Nii hu ni nyɛkase ni nyɛmɔ mli ni nyɛnu ni nyɛna yɛ mihe lɛ, nomɛi nɔŋŋ nyɛfea, ni hejɔlɛ Nyɔŋmɔ lɛ kɛ nyɛ aaahi shi.” (Filipibii 4:⁠9) Mɛni mɛi ena ni amɛnu yɛ Paulo he? Nibii ni he tse ni tswaa mɔ emaa shi yɛ mumɔŋ. Ekɛ Lidia loo Timoteo he oshekuyeli wooo amɛtoiaŋ obɔbɔ. Obaanyɛ ona nɔmimaa akɛ Paulo booo oshekuyeli wiemɔi ni kɔɔ Yerusalem onukpai ahe lɛ toi ni egbɛɛɛ enɛ eshwaaa.a Eka shi faŋŋ akɛ, bulɛ ni eyɔɔ kɛhaa jwɛŋmɔ ni Nyɔŋmɔ kɛha lɛ lɛ ye bua Paulo koni etsi ehe kɛjɛ oshekuyeli ni fiteɔ mɔ lɛ mli ni ekɛ ehe aaawo lɛ he. Wɔbaakase enɔkwɛmɔ nɔ lɛ kɛji akɛ wɔhiɛ sɔɔ jwɛŋmɔ kɛ lilɛi ni Yehowa kɛha wɔ lɛ.

Jiemɔ Bulɛ Kpo Otsɔɔ Nyɔŋmɔ Kɛ E-Wiemɔ Lɛ

 6, 7. (a) Yakobo tsɔɔ nɔ ni jɛɔ lilɛi ni anyɛɛɛ nɔ aye lɛ mli baa lɛ mli eha yɛ mɛɛ gbɛ nɔ? (b) Mɛni baŋ kɛji akɛ wɔbuɔ Nyɔŋmɔ kɛ e-Wiemɔ lɛ?

⁶ Bulɛ ni jɛ tsuiŋ tɔɔ kɛha Nyɔŋmɔ kɛ e-Wiemɔ Krɔŋkrɔŋ lɛ hu baaye abua wɔ ni wɔjie oshekuyeli ni fiteɔ mɔ lɛ kɛya kwraa. Yɛ anɔkwale mli lɛ, bulɛ ni tamɔ nɛkɛ baatsirɛ wɔ koni wɔbo kaselɔ Yakobo, ni wie eshi lilɛi lɛ waa lɛ ŋaawoo lɛ toi. (Yakobo 3:​2-12) Kɛji akɛ gbɔmɔ ko baanyɛ akudɔ elilɛi lɛ, ebaanyɛ ewo egbɔmɔtso muu lɛ fɛɛ manyoflɛ, taakɛ bɔ ni manyoflɛ bibioo ni yɔɔ okpɔŋɔ daaŋ lɛ anyɛɔ akɛkudɔɔ nakai kooloo lɛ. Taakɛ bɔ ni la bibioo baanyɛ asha koo muu lɛ, nakai nɔŋŋ lilɛi bibioo lɛ baanyɛ asha wala kokloloŋto lɛ fɛɛ. Gbɔmɔ baanyɛ ajɔɔ kooloi, loofɔji, waamɔ nibii kɛ ŋshɔŋ kooloi ahe, shi Yakobo kɛɛ: “Shi lilɛi lɛ, gbɔmɔ ko gbɔmɔ ko nyɛɛɛ ehe ajɔɔ.” Ni kɛlɛ enɛ hu jeee naajiemɔ akɛ belɛ abɔɔɔ mɔdɛŋ akɛ aaajie oshekuyeli ni fiteɔ mɔ lɛ kɛya kwraa.

⁷ Yakobo kɛɛ hu akɛ jɔɔmɔ kɛ loomɔ faa kpo kɛjɛɔ lilɛi ni yɔɔ daa kometoo lɛ nɔŋŋ mli lɛ mli. Enɛ ejaaa, ejaakɛ nu hiŋmɛi baaa nuŋma kɛ nɔ ni joɔ fɛɛ. Agbami tso nyɛŋ awo miitso yibii, ni ŋoo nu nyɛŋ aba nuŋma. Eji anɔkwale akɛ, bei abɔ ni Kristofoi yeee emuu lɛ, amɛnyɛŋ amɛjɔɔ lilɛi lɛ he kɛmɔ shi. Belɛ esa akɛ wɔjie mɔbɔnalɛ kpo wɔtsɔɔ nɔtɔlɔi ni tsakeɔ amɛtsui lɛ, ni kɛlɛ, enɛ haaa mɔ ko ajie enaa yɛ oshekuyeli ni fiteɔ mɔ lɛ he. Yɛ wɔgbɛfaŋ lɛ, lilɛi ni tamɔ ebɔɔ nɛɛ kɛ nitsumɔ yɛ gbɛ ni ejaaa nɔ lɛ eyaŋ nɔ nakai kɛji akɛ wɔyɛ bulɛ diɛŋtsɛ kɛha Nyɔŋmɔ kɛ e-Wiemɔ lɛ.

Bɔ Ni Sɔlemɔ Baanyɛ Aye Abua

 8. Sɔlemɔ baanyɛ aye abua wɔ ni wɔjie oshekuyeli ni yeɔ awui lɛ kɛya kwraa yɛ mɛɛ gbɛ nɔ?

⁸ Kaa ko ni abo oshekuyeli ni yeɔ awui lɛ toi ni agbɛ enɛ ashwa lɛ baanyɛ afee nɔ ni mli wa waa. No hewɔ lɛ kɛji akɛ oŋmɛɛ ohe oha kaa ni tamɔ nɛkɛ yɛ tsutsu lɛ, ani esaaa akɛ obiɔ Nyɔŋmɔ dɛŋ eshaifaa kɛ yelikɛbuamɔ? Yesu tsɔɔ wɔ ni wɔsɔle akɛ: “Okɛ wɔ akaba kaa mli, shi jiemɔ wɔ kɛjɛ mɔ fɔŋ lɛ dɛŋ.” (Mateo 6:​13, New World Translation) Kristofoi ni kɛ hiɛdɔɔ sɔleɔ akɛ Nyɔŋmɔ akaŋmɛɛ amɛhe eha kaa ni tamɔ nɛkɛ kɛ wiemɔ sha ni tamɔ nɛkɛ lɛ eŋmɛŋ amɛhe amɛhaŋ Satan ŋaatsɔi lɛ; abaajie amɛ kɛjɛ mɔ heguɔgbelɔ kpeteŋkpele lɛ dɛŋ.

 9. Kɛ aaka wɔ koni wɔgbe mɔ ko he guɔ lɛ, mɛɛ gbɛ wɔbaatsɔ nɔ wɔsɔle?

⁹ Kɛ aaka wɔ koni wɔgbe mɔ ko he guɔ lɛ, wɔbaanyɛ wɔsɔle akɛ: “Yehowa, too bulɔ yɛ minaabu, buu minaabu shinaa lɛ naa!” (Lala 141:⁠3) Wɔbaanyɛ wɔfite wɔnaanɔ wala gbɛkpamɔ lɛ kɛtsɔ wɔhe ni wɔɔŋmɛɛ wɔha kaa ni wɔkase Abonsam akɛ mɔ heguɔgbelɔ ni nyɛɔ mɔ, ni maleɔ ni gbeɔ mɔ lɛ. (Yohane 8:44) Bɔfo Yohane ŋma akɛ: “Mɔ fɛɛ mɔ ni nyɛɔ enyɛmi lɛ, gbɔmɔgbelɔ ji lɛ; ni nyɛle akɛ gbɔmɔgbelɔ ko gbɔmɔgbelɔ ko bɛ naanɔ wala yɛ emli.”​—1 Yohane 3:⁠15.

Suɔmɔ Shwieɔ Oshekuyeli

10. Ni wɔɔye mɛi ahe osheku yɛ gbɛ ni fiteɔ mɔ lɛ nɔ lɛ, mɛni nyɔmɔ moŋ wɔhiɛ amɛ?

¹⁰ Wɔ fɛɛ wɔhiɛ mɛi krokomɛi nyɔmɔ yɛ nɔ ko he, shi wɔhiɛɛɛ nyɛɛ ni haa oshekuyeli ni fiteɔ mɔ lɛ baa lɛ he nyɔmɔ. Paulo ŋma akɛ: “Nyɛkahiɛa mɔ ko mɔ ko nyɔmɔ, akɛ ja suɔmɔ ni nyɛkɛaasumɔ nyɛhe lɛ.” (Romabii 13:⁠8) Esa akɛ wɔwo nakai nyɔmɔ lɛ daa gbi moŋ fe ni wɔɔgbe mɛi krokomɛi ahe guɔ ni wɔfite amɛgbɛi. Kɛ wɔkɛɛ akɛ wɔsumɔɔ Yehowa lɛ, wɔnyɛŋ wɔgbe wɔnaanyo jalɔ lɛ he guɔ, “ejaakɛ mɔ ni sumɔɔɔ lɛ diɛŋtsɛ enyɛmi ni enaa lɛ lɛ, Nyɔŋmɔ ni enaaa lɛ lɛ, te aaafee tɛŋŋ ni enyɛ lɛ esumɔ hu?”​—1 Yohane 4:⁠20.

11. Mɛɛ gbɛ nɔ Yesu abɛbua ni kɔɔ gwantɛŋi lɛ kɛ abotiai lɛ ahe lɛ baaha wɔnyɛ wɔna nɔ ko ni wɔsusu he yɛ mɔ heguɔgbee he?

¹¹ Susumɔ Yesu abɛbua ni kɔɔ gwantɛŋi lɛ kɛ abotiai lɛ ahe lɛ he. Akɛɛ mɛi ni tamɔ abotiai lɛ akɛ nɔ ni amɛfee Kristo nyɛmimɛi lɛ tamɔ nɔ ni amɛfee amɛshi lɛ nɔŋŋ. Ani obaaye Kristo he osheku ni okɛfite lɛ? Kɛji akɛ ogbeŋ o-Nuŋtsɔ lɛ he guɔ lɛ, kaafee enyɛmimɛi ni afɔ amɛ mu lɛ nakai. Kaatɔ tɔmɔ ni abotiai ni “baafoŋ kɛya naanɔ hiɛkpatamɔ mli” lɛ tɔ lɛ nɔŋŋ eko. Kɛji akɛ osumɔɔ Yesu nyɛmimɛi lɛ, jiemɔ enɛ kpo kɛtsɔ nɔ ni owieɔ yɛ amɛhe lɛ nɔ.​—Mateo 25:​31-46.

12. Mɛni ji Abɛi 16:2 lɛ mli agugu loo eshishinumɔ diɛŋtsɛ, ni esa akɛ ena wɔsusumɔi, nifeemɔi kɛ wiemɔ nɔ hewalɛ yɛ mɛɛ gbɛ nɔ?

¹² Akɛni wɔ fɛɛ wɔji eshafeelɔi ni Yesu kpɔmɔ afɔleshaa lɛ he miihia wɔ hewɔ lɛ, kɛji akɛ mɔ ko miisumɔ ni ewie wiemɔ ko ni ejaaa yɛ wɔhe lɛ, ebaana babaoo ewie. (1 Yohane 2:​1, 2) Shi ekolɛ, wɔbaasusu akɛ wɔmiifee jogbaŋŋ. “Gbɔmɔ gbɛi fɛɛ he tse yɛ ehiɛ; shi Yehowa ji mɔ ni ŋmɛɔ mumɔ ekwɛɔ.” Hiɛaŋkwɛmɔ hako Yehowa ŋsɛnii lɛ akpa afa. (Abɛi 16:2; Bɔfoi lɛ Asaji 10:​34, 35) Eŋmɛɔ wɔmumɔ ekwɛɔ, ele wɔjwɛŋmɔ kɛ nibii ni tsirɛɔ wɔ ni haa wɔsusuɔ, wɔfeɔ nii ni wɔwieɔ lɛ. Yɛ anɔkwale mli lɛ belɛ wɔsumɔŋ ni Nyɔŋmɔ ana akɛ wɔsusuɔ akɛ wɔhe tse ni mɛi krokomɛi ahe tseee ni esa akɛ awie amɛhe efɔŋ yɛ gbɛ ni ejaaa nɔ. Esa akɛ wɔfee mɛi ni kwɛɛɛ mɛi ahiɛaŋ, mɛi ni yɔɔ musuŋtsɔlɛ kɛ suɔmɔ tamɔ Yehowa.

13. (a) Yɛ mɛɛ gbɛ nɔ anɔkwale ni eji akɛ “suɔmɔ toɔ etsui shi ni emli hi” lɛ baanyɛ aye abua wɔ ni wɔjie oshekuyeli ni fiteɔ mɔ lɛ kɛya kwraa? (b) Mɛni baanyɛ aye abua wɔ ni wɔkawie wɔshi mɔ ko ni nine eshɛ sɔɔmɔ hegbɛ ni wɔbɛ eko lɛ nɔ lɛ?

¹³ Nɔ ni Paulo wie yɛ 1 Korintobii 13:​4-8 lɛ ni wɔkɛaatsu nii lɛ baanyɛ aye abua wɔ ni wɔjie oshekuyeli ni fiteɔ mɔ lɛ kɛya kwraa. Eŋma akɛ: “Suɔmɔ toɔ etsui shi, emli hi.” Nyɛmiyoo ko ni kɛ yiwaa miikpe yɛ shia ni mli egbala lɛ kɛ miishɛɛ ŋaŋ wɔ. Aloo ekolɛ mɛi komɛi baanyɛ afee shɔɔ yɛ gbɔmɔtsoŋ, ekolɛ yɛ gbɔmɔtsoŋ hewalɛnamɔ kpakpa ni bɛ hewɔ. Ani esaaa akɛ suɔmɔ tsirɛɔ wɔ ni wɔto wɔtsui shi ni wɔmli ahi aha aŋkroaŋkroi ni tamɔ nɛkɛ moŋ fe ni wɔɔwie wɔshi amɛ? ‘Suɔmɔ he tsɛɛɛ mɔ, eshwaaa, efeee pupuupu.’ No hewɔ lɛ, kɛji akɛ Kristofonyo ko nine shɛ sɔɔmɔ hegbɛ ko ni wɔbɛ eko lɛ nɔ lɛ, suɔmɔ baatsi wɔ gbɛ koni wɔkawie wɔshi lɛ ni wɔtsɔɔ akɛ nakai nitsumɔ lɛ esaaa lɛ. Suɔmɔ hu baatsi wɔ gbɛ koni wɔkashwa ni wɔfee pupuupu yɛ nibii ni wɔnine eshɛ nɔ lɛ ahe yɛ oshekuyeli ni baanyɛ aje mɛi ni nako hegbɛ ni tamɔ nakai lɛ nijiaŋ wui lɛ nɔ.

14. Mɛni hu yɔɔ ni kɔɔ suɔmɔ he ni baanyɛ asa bɔ ni wɔwieɔ mɛi krokomɛi ahe wɔhaa lɛ he?

¹⁴ Paulo kɛɛ hu akɛ ‘suɔmɔ efeee nii ni esaaa, epeleee lɛ diɛŋtsɛ enɔ, emli wooo la, eniŋŋ efɔŋ he.’ Ni wɔɔwie wiemɔi ni ehiii ni tamɔɔɔ Kristofoi lɛ, esa akɛ wɔha suɔmɔ atsirɛ wɔ ni wɔwie mɛi krokomɛi ahe jogbaŋŋ ni wɔsusu nibii ni he baahia amɛ lɛ ahe. Ehaaa wɔmli awo la ni wɔgbe mɛi ahe guɔ yɛ efɔŋ ni yɔɔ diɛŋtsɛ ni afee wɔ loo nɔ ni bɛ mli he. Akɛni ‘enyaaa nɔ sha he, shi enyaa anɔkwale he’ hewɔ lɛ, etsiɔ wɔ gbɛ koni wɔkɛ wɔhe akawo oshekuyeli ni yeɔ awui yɛ mɛi ni teɔ shi woɔ wɔ ni sane fɔŋ baa amɛnɔ lɛ he.

15. (a) Te esa akɛ anɔkwale ni eji akɛ ‘suɔmɔ heɔ nii fɛɛ eyeɔ ni ehiɛ kaa nii fɛɛ nɔ’ lɛ asa wɔhe aha tɛŋŋ? (b) Mɛɛ suɔmɔ lɛ fa ko baanyɛ aye ebua wɔ ni wɔkɛ wɔbe akpɛtɛ Yehowa gbɛjianɔtoo lɛ he kɛji akɛ mɛi krokomɛi wie shi gbɛjianɔtoo nɛɛ po?

¹⁵ Suɔmɔ ‘heɔ nɔ fɛɛ nɔ eyeɔ ni ehiɛ kaa nɔ fɛɛ nɔ’ ni anaa yɛ Nyɔŋmɔ Wiemɔ lɛ mli lɛ ‘nɔ,’ ni etsirɛɔ wɔ koni wɔhiɛ asɔ mumɔŋ niyenii ni ‘tsulɔ anɔkwafo’ kuu lɛ kɛhaa lɛ moŋ fe ni wɔɔbo hemɔkɛyeli kwalɔi amalelɔi lɛ awiemɔi ni gbeɔ mɔ he guɔ lɛ atoi. (Mateo 24:​45-47; 1 Yohane 2:​18-21) Akɛni ‘suɔmɔ toɔ etsui yɛ nii fɛɛ mli ni esɛɛ efooo gbi ko gbi ko’ hewɔ lɛ, eyeɔ ebuaa wɔ hu koni wɔhi shi akɛ anɔkwafoi wɔha Nyɔŋmɔ asafo lɛ kɛji akɛ “amale nyɛmimɛi” loo mɛi krokomɛi wie amɛshi asafo lɛ loo emlibii lɛ.​—Galatabii 2:⁠4.

Bulɛ Foɔ Oshekuyeli Nɔ

16. Mɛni epasa nyɛmimɛi ni yɔɔ Korinto lɛ fee Paulo?

¹⁶ Bulɛ kɛha nanemɛi heyelilɔi hu yeɔ ebuaa wɔ koni wɔjie oshekuyeli ni fiteɔ mɔ lɛ kɛya kwraa. Akɛni Nyɔŋmɔ ekpɛlɛ amɛnɔ hewɔ lɛ, yɛ anɔkwale mli lɛ esaaa akɛ wɔfiteɔ amɛ. Nyɛkahaa wɔtamɔa “amale nyɛmimɛi” ni Paulo kɛ amɛ kpe lɛ. Ŋwanejee ko bɛ he akɛ, amɛwie nibii fɔji yɛ ehe. (2 Korintobii 11:26) Hemɔkɛyeli kwalɔi hu wie ehe efɔŋ. (Okɛto Yuda 3, 4 he.) Aŋkroaŋkroi komɛi wie ehe yɛ Korinto akɛ: “Ewoji lɛ tsii ni amɛmli wala, shi kɛ ona lɛ yɛ gbɔmɔtso mli lɛ, eji gbɔmɔ wudɔɔ ni ewiemɔ tamɔ nɔ ni anyaŋeɔ.” (2 Korintobii 10:​10, New World Translation) Gbɔmɛi ewieee nɛkɛ yɛ mɛi ni amɛsumɔɔ amɛ lɛ ahe.

17. Mɛni wiemɔi nɛkɛ Diotrefe wieɔ yɛ bɔfo Yohane he lɛ?

¹⁷ Susumɔ bɔfo Yohane, ni Diotrefe wie eshi lɛ lɛ he. Yohane kɛɛ: “Miŋma wolo ko mimaje asafo lɛ, shi Diotrefe mɔ ni taoɔ amɛnɔ onukpa aye lɛ haaa wɔ hegbɛ, hewɔ lɛ, kɛ miba jiŋŋ, makai enitsumɔi ni etsuɔ lɛ, bɔ ni ewieɔ wɔhe wiemɔi fɔji lɛ.” (3 Yohane 9, 10) Nɛkɛ wiemɔi nɛɛ ji sane ni hiɛdɔɔ yɔɔ mli diɛŋtsɛ, ni kɛji akɛ wɔboɔ wiemɔi ni tamɔ nɛkɛ toi aloo wɔgbɛɔ nɔ ko ni tamɔ nɛkɛ wɔshwaa ŋmɛnɛ lɛ, esa akɛ wɔkpa enɛ feemɔ amrɔ nɔŋŋ.

18. Demetrio yɛ sɔrɔto yɛ Diotrefe he yɛ mɛɛ gbɛ nɔ, ni sɔrɔtofeemɔ nɛɛ baanyɛ asa wɔjeŋba he yɛ mɛɛ gbɛ nɔ?

¹⁸ Yɛ be mli ni Yohane woɔ bulɛ ni esa akɛ ana aha mɛi ni ja lɛ he hewalɛ lɛ, ekɛɛ Gaio akɛ: “Suɔlɔ, kaakase nɔ ni ji efɔŋ, shi kasemɔ nɔ ni ji ekpakpa moŋ. Mɔ ni feɔ ekpakpa lɛ, ejɛ Nyɔŋmɔ mli; mɔ ni feɔ efɔŋ, enako Nyɔŋmɔ. Demetrio lɛ, mɛi fiaa kɛ anɔkwale lɛ diɛŋtsɛ miiye ehe odase kpakpa, ni wɔ hu wɔmiiye ehe odase, ni nyɛle akɛ wɔdase lɛ anɔkwa ni.” (3 Yohane 1, 11, 12) Esa akɛ wɔteŋ mɔ fɛɛ mɔ abi ehe akɛ: Ani miwieɔ mɛi ahe tamɔ Diotrefe aloo miji anɔkwafo tamɔ Demetrio? Kɛ wɔbuɔ wɔnanemɛi heyelilɔi lɛ, wɔwieŋ amɛhe efɔŋ, ni wɔha mɛi krokomɛi asusu wɔhe akɛ mɛi ahewielɔi.

19. Apasa nyɛmimɛi bɔ mɔdɛŋ ni amɛgbe C. T. Russell he guɔ yɛ mɛɛ gbɛ nɔ?

¹⁹ Apasa nyɛmimɛi ehiii shi yɛ klɛŋklɛŋ afi oha lɛ pɛ mli. Yɛ 1890 afii lɛ amli lɛ, aŋkroaŋkroi komɛi ni ehiii ni kɛ Nyɔŋmɔ gbɛjianɔtoo lɛ bɔɔ lɛ bɔ mɔdɛŋ ni Buu Mɔɔ Asafo lɛ aba amɛkudɔmɔ loo hewalɛ shishi. Amɛkpaŋ amɛshi Charles Taze Russell, ni amɛbɔ mɔdɛŋ ni amɛjie lɛ akɛ Asafo lɛ klɛŋklɛŋ sɛinɔtalɔ. Yɛ be mli ni amɛtsɔ ŋaa nɛɛ aahu afii enyɔ lɛ, amɛkpaŋmɔ lɛ fɛ yɛ 1894. Apasa naafolɔmɔi lɛ damɔ amale akɛ Russell yeee anɔkwale yɛ nitsumɔ mli lɛ nɔ. Nɛkɛ amale bibii nɛɛ ha ayoo jwɛŋmɔ ni naafolɔlɔi lɛ hiɛ​—koni amɛgbe C. T. Russell he guɔ. Kristofoi ni kwɛɛɛ hiɛaŋ bote sane lɛ mli ni ana Russell akɛ eji gbɔmɔ ni ja. No hewɔ lɛ, nɛkɛ ŋaa koni “afɛlɛ Owula Russell kɛ enitsumɔ lɛ mli dukuduku” lɛ fee yaka. No hewɔ lɛ taakɛ afee Paulo lɛ, apasa nyɛmimɛi sopa Nyɛminuu Russell, shi ayoo nɛkɛ kaa nɛɛ akɛ Abonsam ŋaatsɔɔ. Yɛ sɛɛ mli lɛ ana yinɔkpaŋlɔi lɛ akɛ amɛjeee mɛi ni sa akɛ akɛ amɛ bɔɔ akɛ Kristofoi.

Nitsumɔi Kpakpai Tsiɔ Mɔ Heguɔgbee Naa

20. Mɛɛ tɔmɔ Paulo na yɛ okulafoi komɛi ni darako lɛ ahe?

²⁰ Paulo le akɛ oshekuyeli ni fiteɔ mɔ lɛ kɔɔ nitsumɔ ni anaaa atsu he, jeee nitsumɔi kpakpai pii ni yɔɔ lɛ he. Eŋɔɔɔ enaa akɛ okulafoi ni darako lɛ ateŋ mɛi komɛi “kaseɔ hejɔfeemɔ, amɛkpaa shi yɛ shiai, ni jeee hejɔlɔi kɛkɛ amɛtsɔmɔɔ, shi amɛwieɔwieɔɔ mɛi ahe hu, ni amɛjeɔ shi, amɛwieɔ nii ni ejaaa.” Mɛni ji tsabaa lɛ. Nitsumɔ kpakpa. No hewɔ lɛ Paulo ŋma akɛ: “No hewɔ lɛ miisumɔ akɛ yei okulafoi ni darako lɛ agba, ni amɛfɔ bii, ni amɛye amɛwe nɔ, ni amɛkaha henyɛlɔ lɛ miina sane ko ekɛmiijɛ mɛi.”​—1 Timoteo 5:​11-14.

21. 1 Korintobii 15:58 kɔɔ mɔ heguɔgbee he osharai ni wɔɔkwa lɛ he yɛ mɛɛ gbe nɔ?

²¹ Kɛji akɛ yei ye amɛwe nɔ jogbaŋŋ, amɛtsɔse amɛbii yɛ Nyɔŋmɔ taomɔ nii anaa, ni amɛkɛ amɛhe wo nitsumɔi kpakpai amli lɛ, amɛnaŋ bei ni fa ni amɛkɛaakpa shi amɛwie wiemɔi ni baaha amɛkɛ oshekuyeli afite mɛi. Hii hu naŋ bei amɛhaŋ wiemɔi ni tamɔ nɛkɛ kɛji akɛ amɛmiitsu nitsumɔi kpakpai. ‘Ni wɔɔna babaoo feemɔ yɛ Nuŋtsɔ lɛ nitsumɔ lɛ mli’ lɛ baaye abua wɔ fɛɛ ni wɔkwa mɔ heguɔgbee he osharai lɛ. (1 Korintobii 15:58) Titri kɛ wɔjɛ wɔtsui muu fɛɛ mli wɔkɛ wɔhe wo Kristofoi asɔɔmɔ nitsumɔ lɛ mli, asafoŋ kpeei amli, kɛ nitsumɔi krokomɛi ni Nyɔŋmɔ gbeyeishemɔ yɔɔ mli lɛ amli lɛ, eeeha wɔjwɛŋmɔi ahi mumɔŋ saji anɔ koni wɔkatsɔmɔ mɛi aheguɔgbelɔi ni bɛ nitsumɔ ni kɛ amɛhe woɔ mɛi krokomɛi asaji amli.

22. Yɛ Abɛi 6:​16-19 hewɔ lɛ, te Nyɔŋmɔ buɔ mɛi aheguɔgbelɔi lɛ tɛŋŋ?

²² Kɛji akɛ wɔkɛ wɔhe wo nitsumɔi ni Nyɔŋmɔ gbeyeishemɔ yɔɔ mli lɛ amli vii ni wɔtaoɔ akɛ wɔɔjɔɔ mɛi krokomɛi yɛ mumɔŋ lɛ, wɔbaatsɔmɔ nanemɛi anɔkwafoi, jeee mɛi ni taa saji ni jeee anɔkwale. (Abɛi 17:17) Kɛji akɛ wɔkpoo oshekuyeli ni fiteɔ mɔ lɛ, wɔbaana Naanyo ni hi fe fɛɛ​—Yehowa Nyɔŋmɔ. Nyɛhaa wɔkaia akɛ nibii kpawo ni ehiɔ lɛ ji “hewoo hiŋmɛii, apasa lilɛi, kɛ niji ni shwieɔ la ni eye bem shi, tsui ni shweɔ eyiŋ jwɛŋmɔi fɔji, naji ni he yɔɔ oya kɛ foijee kɛ efɔŋ mli yaa, amale odaseyelɔ ni foɔ sane etaa, kɛ mɔ ni woɔ nyɛmimɛi ateŋ bei.” (Abɛi 6:​16-19) Mɛi ni gbɛɔ oshekuyeli amɛshwaa lɛ woɔ saji ahe ni amɛtsɔmɔɔ nibii, ni mɔ heguɔgbelɔi lɛ yɛ apasa lilɛii. Amɛwiemɔi lɛ haa mɛi ni taa saji lɛ kɛ amɛnaji tsuɔ nii amɛkɛkpaa shi yɛ enɛ feemɔ mli. Nɔ ni jɛɔ mli baa ji bei. Shi kɛ wɔnyɛɔ nɔ ni Nyɔŋmɔ nyɛɔ lɛ, wɔbaakpoo oshekuyeli ni baanyɛ afite mɔ ni ja lɛ ni eha mɔ heguɔgbelɔ kpeteŋkpele, Satan Abonsam mii ashɛ ehe.

23. Yɛ wɔwiemɔi ahe lɛ, te wɔɔfee tɛŋŋ wɔha Yehowa tsui anya?

²³ No hewɔ lɛ, nyɛhaa wɔhaa Yehowa tsui anyaa. (Abɛi 27:11) Nyɛhaa wɔkpooa wiemɔi ni enyɛɔ, wɔkabo wiemɔ ni gbeɔ mɔ he guɔ lɛ toi, ni wɔfee nɔ fɛɛ nɔ ni wɔɔnyɛ ni wɔkɛjie oshekuyeli ni fiteɔ mɔ lɛ kɛya kwraa. Yɛ anɔkwale mli lɛ, wɔbaanyɛ wɔfee nakai yɛ wɔ-Nyɔŋmɔ ni ji mɔ krɔŋkrɔŋ, Yehowa, yelikɛbuamɔ naa.

[Shishigbɛ niŋmai]

Te Obaaha Hetoo Oha Tɛŋŋ?

◻ Sɔlemɔ baanyɛ aye abua wɔ ni wɔkwa mɛi krokomɛi aheguɔgbee yɛ mɛɛ gbɛ nɔ?

◻ 1 Korintobii 13:​4-8 ni wɔkɛaatsu nii Iɛ baaye abua wɔ ni wɔjie oshekuyeli ni fiteɔ mɔ Iɛ kɛya kwraa yɛ mɛɛ gbɛ nɔ?

◻ Yɛ mɛɛ gbɛ nɔ bulɛ ni wɔɔna wɔha wɔhe Iɛ baaye abua wɔ ni etsi kaa ni aaaha wɔgbe wɔnanemɛi heyelilɔi Iɛ ahe guɔ Iɛ naa?

◻ 1 Korintobii 15:58 baanyɛ akɔ mɔ heguɔgbee, aloo oshekuyeli ni fiteɔ mɔ Iɛ he osharai ni wɔɔkwa lɛ he yɛ mɛɛ gbɛ nɔ?