Jeŋba Mli Hetsemɔ Ji Obalaŋtai Ahefɛo
“Obalanyo, ha omii ashɛ ohe yɛ obalahiaŋ, . . . ni onyiɛ otsui gbɛi lɛ anɔ, kɛ nii ni ohiŋmɛi naa lɛ asɛɛ, shi na ole akɛ enɛɛmɛi fɛɛ hetoo lɛ, Nyɔŋmɔ kɛo baakojo”—JAJELƆ 11:9.
1, 2. (a) Mɛni Yehowa taoɔ ni obalaŋtai ana? (b) Mɛni hewɔ eji kwashiai anifeemɔ akɛ ooodi nɔ fɛɛ nɔ ni otsui kɛ ohiŋmɛi taoɔ lɛ sɛɛ lɛ?
“OBALAŊTAIAŊ, mlifilimɔ kɛ mlijɔlɛ tamɔ agbiɛnaa be mli gbii. Ni ooowie oshi shihilɛ be ni sɛɛ etsɛɛɛ nɛɛ, bɔɔ mɔdɛŋ ni ona mli miishɛɛ.” Nɛkɛ ji bɔ ni afii ohai 19 lɛ mli German lalafolɔ ko ŋma. Nakai ŋaa ni awoɔ nyɛ obalaŋtai lɛ tamɔ nɔ ni aŋma kɛtsɔ hiɛ afii akpei abɔ ni eho nɛ yɛ Biblia mli wolo ni ji Jajelɔ lɛ mli lɛ: “Obalanyo, ha omii ashɛ ohe yɛ obalahiaŋ, ni ona tsuijurɔ yɛ obalahiaŋ [loo obalayeiaŋ] gbii lɛ amli, ni onyiɛ otsui gbɛi lɛ anɔ, kɛ nii ni ohiŋmɛi naa lɛ asɛɛ.” (Jajelɔ 11:9a) No hewɔ lɛ Yehowa Nyɔŋmɔ susuuu nibii ni baa obalaŋtai atsine lɛ he efɔŋ yakatswaa. Eesumɔ ni nyɛna nyɛbalaŋtaiaŋ hewalɛ kɛ nyɛmɔ lɛ mli ŋɔɔmɔ kɛmɔ shi.—Abɛi 20:29.
2 Shi ani enɛ tsɔɔ akɛ, obaanyɛ odi nɔ fɛɛ nɔ ni otsui kɛ ohiŋmɛi sumɔɔ lɛ asɛɛ? Dabi kwraa! (4 Mose 15:39; 1 Yohane 2:16) Ŋmalɛi lɛ yaa nɔ ekɛɔ akɛ: “Shi na ole akɛ enɛɛmɛi fɛɛ [nibii ni ohalaa akɛ okɛaagbe okɔnɔi lɛ] hewɔ lɛ, Nyɔŋmɔ kɛo baakojo.” (Jajelɔ 11:9b) Hɛɛ, onyɛŋ ojo nɔ ni baajɛ onifeemɔi amli aba lɛ naa foi; taakɛ onukpai ji lɛ, obalaŋtai hu baa Nyɔŋmɔ kojomɔ shishi—Romabii 14:12.
3, 4. (a) Mɛni hewɔ esa akɛ ohiɛ jeŋba mli hetsemɔ ni nɔ kwɔ waa mli lɛ? (b) Mɛɛ nɔnyɛɛ baa onɔ koni oŋmɛɛ oshidaamɔ ni he tse yɛ Nyɔŋmɔ hiɛ lɛ he, ni mɛɛ sanebimɔi ateɔ amɛ shi?
3 Jeee akɛ Yehowa kojomɔ ni duromɔ yɔɔ mli lɛ kɛ mɔ yaa naanɔ wala mli kɛkɛ, shi moŋ ekɛ mɔ kɛ Nyɔŋmɔ teŋ wekukpaa ni bɛŋkɛ kpaakpa hu baa. Shi, esa akɛ ohiɛ jeŋba hetsemɔ ni nɔ kwɔ diɛŋtsɛ mli. Lala 24, kukuji 3 kɛyashi 5 wieɔ enɛ yɛ nɛkɛ gbɛ nɔ: “Namɔ aaakwɔ Yehowa gɔŋ lɛ? Ní namɔ aaadamɔ ehe krɔŋkrɔŋ lɛ? Mɔ ni eniji ahe bɛ muji ko ni etsui hu mli tse; mɔ ni wooo esusuma nɔ ehaaa yakayaka nii ni ekaaa kutumpɔo kita: lɛ eeena Yehowa dɛŋ jɔɔmɔ kɛ jalɛ kɛjɛ eyiwalaheremɔ Nyɔŋmɔ lɛ ŋɔɔ.” Hɛɛ, kɛ ohiɛ jeŋba ni he tse mli lɛ, ohe yɛ fɛo yɛ Yehowa hiɛ.
4 Ni kɛlɛ, nɔnyɛɛ baa onɔ be fɛɛ be koni oŋmɛɛ oshidaamɔ ni he tse yɛ Nyɔŋmɔ hiɛ nɛɛ he. Yɛ be mli ni nɛkɛ naagbee gbii nɛɛ tsiɔ kɛyaa amɛnaagbee kwraa lɛ he lɛ, jeŋba shara kɛ muji nitsumɔ ni naa mɔ nɔ hewalɛ etsɔ tamɔ tsɛŋemɔ hela. (2 Timoteo 3:1-5) Be ko bako ni kaa koni ahiɛ jeŋba kpakpa mli yɛ hetsemɔ mli lɛ efee nɔ ni da kɛha obalaŋtai tamɔ nɛkɛ be nɛɛ. Ani oodamɔ nɛkɛ kaa nɛɛ naa yɛ omanyeyeli mli? Ani obaaya nɔ ofee nakai?
Kaa Loo Sane ni Mli wa ni Ka Ohiɛ Lɛ
5. Mɛɛ hewalɛ fɔŋ ko ni he tseee haa ewaa akɛ aaahiɛ shidaamɔ ni he tse mli yɛ Nyɔŋmɔ hiɛ lɛ?
5 Redio kɛ TV nɔ nibii ni akɛjieɔ hiɛtserɛ lɛ kɛ nibii ni ehiii ni tsiɔ nibii ni he tse lɛ emaa afa ni ewoɔ jeŋba ni ekpɔtɔ kwraa lɛ hiɛ nyam miiha obalaŋtai. Akɛ nɔkwɛmɔ nɔ lɛ, beni ajie sinii ni woɔ mɔ he gbeyei waa lɛ ekome kpo lɛ, mɛi ni wieɔ shiɔ enɛ lɛ ateŋ mɔ kome ŋma akɛ: “Bɔ ni atsake nibii ni haa mɔ he jɔ̃ɔ lɛ ni haa ŋmiŋmi mɔɔ mɔ yɛ bɔlɛnamɔ mli, awuiyeli mli, yɛ yakayaka nifeemɔ mli ni anaa enɛ babaoo yɛ nɛkɛ mfonirii nɛɛ amli lɛ ji nɔ ni eba nɔ agbɛnɛ. Kɛji akɛ eha mɛi babaoo bakwɛ lɛ, ebaakai wɔ bɔ ni akɔnɔ ni anaa ahaa sinii . . . lɛ eba shi loo efite kwraa eha.” Nɔ ni fata nɛkɛ sinii nɛɛ ahe ji lalai ni kɔɔ bɔlɛnamɔ he kɛ televishin nɔ nibii ni woɔ bɔlɛnamɔ mli jeŋba shara hiɛ nyam. Ani obaanyɛ ni okɛ ohe awo “sakasakafeemɔ shɛii” ni ajieɔ atsɔɔ nɛɛ mli koni yɛ nakai beaŋ nɔŋŋ lɛ ohiɛ ohetsemɔ yɛ jeŋba mli lɛ mli yɛ Nyɔŋmɔ hiɛ? (1 Petro 4:4) Taakɛ Abɛi lɛ kɛɔ lɛ: “Aso mɔ ko aaaje la ashwie emiinaa, ni etadei eshaŋ?”—Abɛi 6:27.
6. Mɛɛ nɔnyɛɛ obalaŋtai kɛkpeɔ ni jɛ amɛtipɛŋfoi aŋɔɔ?
6 Nɔnyɛɛ ni baa onɔ koni oŋmɛɛ oshidaamɔ ni he tse yɛ Nyɔŋmɔ hiɛ lɛ he lɛ hu baa kɛjɛɔ jɛɛhe kroko—otipɛŋfoi aŋɔɔ. Jɛ lɛŋ gbekɛyoo ko ni eye afii 17 ye ŋkɔmɔ akɛ: “Mikɛ mihe wo bɔlɛnamɔ mli klɛŋklɛŋ kwraa yɛ yiŋtoi ni ejaaa fɛɛ mli: ejaakɛ gbekɛnuu ni mikɛnyiɛɔ lɛ ma nɔ mi ni misusu akɛ eji nii ni mɔ fɛɛ mɔ miifee.” Mɔ ko mɔ ko sumɔɔɔ ni aŋmɔ lɛ. Akɛ mɔ aaasumɔ ni etamɔ mɛi krokomɛi lɛ ji adebɔɔ mli su. Shi kɛji akɛ okɔ Biblia mli jeŋba gbɛ lɛ, obalaŋtai krokomɛi baanyɛ aye ohe fɛo. Suɔmɔ ni oyɔɔ akɛ oootamɔ mɛi krokomɛi, koni otipɛŋfoi akpɛlɛ onɔ lɛ baanyɛ ni ekɛ nɔnyɛɛ aba onɔ koni ofee nɔ ko ni ole akɛ eji efɔŋ.—Abɛi 13:20.
7. Mɛni hewɔ hewalɛ fɔŋ loo nɔ ni he tseee nɛɛ ni aaawuu ashi lɛ mli wa waa titri lɛ kɛba obalaŋtai lɛ, shi mɛni ji nɔ ni obalaŋtai akpei abɔ ni yɔɔ Yehowa asafo lɛ mli lɛ ejie amɛhe kpo akɛ amɛji?
7 Ni aaawuu ashi nɛkɛ nɔnyɛɛ nɛɛ wa waa diɛŋtsɛ titri lɛ yɛ be mli ni obalanyo loo obalayoo foro lɛ “esale gbala,” yɛ be mli ni bɔlɛnamɔ mli henumɔ lɛ mli wa lɛ. (1 Korintobii 7:36) Ŋwanejee ko bɛ he akɛ enɛ hewɔ ni gbɛjianɔtoo ko ni pɛiɔ saji amli lɛ mu sane naa nɛkɛ lɛ: “Obalaŋta ni esoro lɛ lɛ ji mɔ ni tsɔko hiɛ ekɛ ehe woko bɔlɛnamɔ mli yɛ be mli ni eye afii 19.” Ni kɛlɛ, obalaŋtai akpei abɔ ni yɔɔ Yehowa gbɛjianɔtoo lɛ mli lɛ ejie amɛhe kpo akɛ amɛyɛ sɔrɔto. Nyɛmiikpee kaa lɛ naa diɛŋtsɛ ni nyɛmiihiɛ nyɛhetsemɔ yɛ jeŋba mli lɛ mli.
8. Mɛni hewɔ obalaŋtai ni ji Kristofoi komɛi eŋmɛ gbɛ ni je lɛ jeŋba sui gbohii lɛ ena amɛnɔ hewalɛ lɛ, ni mɛni ejɛ mli eba?
8 Shi eyɛ awerɛho akɛ wɔɔkɛɛ akɛ, obalaŋtai Kristofoi komɛi eŋmɛ gbɛ ni je lɛ sui gbohii lɛ ena amɛnɔ hewalɛ. Yɛ be mli ni amɛbaakɛɛ akɛ amɛsumɔɔ nɔ ni hi lɛ, amɛnyɛɛɛ efɔŋ; kɛ hooo lɛ amɛnyɛɛɛ efɔŋ bɔ ni sa. (Lala 97:10) Yɛ saji lɛ ekomɛi amli po lɛ, amɛtamɔ mɛi ni sumɔɔ enɛ. Taakɛ Lala 52:5 wieɔ he lɛ: “Osumɔɔ efɔŋ fe ekpakpa kɛ malemɔ hu fe jalɛ wiemɔ.” Amɛteŋ mɛi komɛi po yaa shɔŋŋ akɛ amɛkpooɔ gbɛtsɔɔmɔ ni jɛɔ Yehowa gbɛjianɔtoo lɛ ŋɔɔ baa yɛ nibii tamɔ nyiɛmɔ ni tsɔɔ gbalashihilɛ hiɛ, hiɛtserɛjiemɔ, kɛ jeŋba kpakpa he lɛ. Nɔ ni jɛɔ mli baa ji akɛ, yɛ bei babaoo mli lɛ, amɛkɛ hiɛshishwiemɔ loo hiɛgbele baa amɛ diɛŋtsɛ amɛhe kɛ amɛfɔlɔi anɔ. Agbɛnɛ amɛlaajeɔ amɛhe ni yɔɔ fɛo yɛ Nyɔŋmɔ hiɛ lɛ.—2 Petro 2:21, 22.
Yelikɛbuamɔ Koni Adamɔ Kaa Loo Sane ni Mli Wa lɛ Naa
9. Mɛni he hiaa koni anyɛ adamɔ kaa akɛ ahi shi yɛ jeŋba hetsemɔ mli lɛ naa?
9 Te ooofee tɛŋŋ odamɔ kaa loo sane ni naa wa koni ohi shi akɛ mɔ ni he tse yɛ jeŋba mli lɛ naa? Lalatsɛ lɛ bi sane ko ni tamɔ nakai nɔŋŋ: “Te obalanyo aaafee tɛŋŋ ni eeeha egbɛ lɛ he atse hu?” Kɛkɛ ni ekɛ hetoo lɛ ha: “No ji akɛ ekwɛ ehe nɔ jogbaŋŋ yɛ owiemɔ lɛ naa.” (Lala 119:9) Hɛɛ, Nyɔŋmɔ Wiemɔ lɛ mli gbɛtsɔɔmɔ he miihia bo. Ni wɔ-Ŋwɛi Tsɛ ni yɔɔ suɔmɔ lɛ eto gbɛjianɔ koni egbɛjianɔtoo lɛ kɛ gbɛtsɔɔmɔ ni tamɔ nɛkɛ aha koni akɛye abua bo koni onyɛ odamɔ nɔnyɛɛ ni he tseee ni yɔɔ je nɛŋ lɛ naa.
10, 11. (a) Mɛɛ woji aŋmala koni akɛye abua obalaŋtai ni amɛhi shi akɛ mɛi ni he tse yɛ jeŋba mli? (b) Yɛ mɛɛ gbɛ nɔ saji ni aŋmala ni ii ‘Obalaŋtai Biɔ Akɛ . . . ’? lɛ eye ebua oblaŋtai komɛi? (d) Mɛɛ gbɛ nɔ bo diɛŋtsɛ ona saji ni aŋmala ni ji ‘Obalaŋtai Biɔ Akɛ . . . ’? lɛ he sɛɛ yɛ?
10 Aŋmala woji sɔrɔtoi yɛ afii abɔ lɛ amli, titri lɛ yɛ obalaŋtai ahewɔ, tamɔ wolo ni ji Your Youth—Getting the Best out of It lɛ. Kɛjɛ afi 1982 kɛbaa nɛɛ, aŋmala wiemɔ tamɔ ‘Obalaŋtai Biɔ Akɛ. . . ’ ni yɔɔ Awake! woji tɛtrɛbii lɛ amli lɛ ni ekɛ ŋaawoo ni yeɔ buaa yɛ saji tamɔ bɔlɛnamɔ he mfonirii, suɔmɔ nifeemɔi ahe woji, kɛ jeŋba kpakpa yɛ nyiɛmɔ ni tsɔɔ gbalashihilɛ hiɛ lɛ mli lɛ eha. Ani saji ni tamɔ nɛkɛ eye ebua obalaŋtai lɛ diɛŋtsɛ? Susumɔ nɔkwɛmɔ nɔ ko he. Saji pii ni aŋmala yɛ enɛɛmɛi amli lɛ wie fɔmɔ nii kɛ shwɛmɔ he, ni etsɔɔ akɛ nakai su lɛ kanyaa mɔ ko “bɔlɛnamɔ mli akɔnɔ” ni ewaaa kwraa akɛ eeeha mɔ ko agbee bɔlɛnamɔ mli jeŋba shara mli.a (Kolosebii 3:5) Akɛ ŋaawoo ni anyɛɔ atsuɔ he nii ha ni tsɔɔ gbɛ ni aaatsɔ nɔ awuu ashi nakai su lɛ kɛ nɔ ni esa akɛ afee kɛ aku sɛɛ abote nakai su lɛ mli ekoŋŋ. Yɛ nɛkɛ saji ni aŋmala nɛɛ ahewɔ lɛ, obalaŋtai komɛi ŋma akɛ: “Mibote naagba ni ji fɔmɔ nii ni akɛshwɛɔ nɛɛ mli yɛ be mli ni miye afii 12. Amrɔ nɛɛ miye afii 18, ni miiye nɔ kunim fiofio, miida shi yɛ saji ni aŋmala yɛ he lɛ hewɔ.” “Akɛni amrɔ nɛɛ mikpɛlɛ ŋaawoo ni sa ni aŋmala aha lɛ nɔ hewɔ lɛ, mijwɛŋmɔ eka mi shi. Minuɔ he akɛ mihe etse fe tsutsu.”
11 Eheɔ be dani anyɛ akane ni akase sane ni tamɔ nɛkɛ, shi nakai feemɔ baanyɛ aye abua bo ni ohi shi akɛ mɔ ni he tse yɛ jeŋba mli. Ani okɛ woji ni aŋmala ni tamɔ nɛkɛ miitsu nii? Yɛ be mli ni obalaŋta ko ŋmaa yɛ ‘Obalaŋtai Biɔ Akɛ . . . ’ lɛ mli saji ni kɔɔ ‘Bɔlɛnamɔ ni Tsɔɔ Gbalashihilɛ Hiɛ—Mɛni Hewɔ Esaaa?’b lɛ he lɛ, obalayoo fioo ko, ni no mli lɛ ekaseɔ Biblia lɛ yɛ nakai be lɛ mli lɛ ŋma akɛ: “Mile fɔyeli gbonyo ko, awuŋayeli henumɔ ni teɔ shi yɛ be mli ni mɔ ko kɛ ehe ewo bɔlɛnamɔ mli beni eboteko gbalashihilɛ mli lɛ, ni enɛ dɔ mi waa. Midaa Yehowa shi daa gbi akɛni ekpɛlɛ minɔ ni ekɛ mihe eshai eke mi lɛ hewɔ. Miyɛ hiɛnɔkamɔ akɛ sane ni nyɛŋma lɛ baaye abua mɛi krokomɛi dani eba akɛ amɛaafee bɔ ni mifee lɛ. Eyeɔ mɔ awui diɛŋtsɛ. Agbɛnɛ, minuɔ nɔ hewɔ ni Yehowa Nyɔŋmɔ suɔmɔnaa nii ji ni ‘wɔtsi wɔhe kɛjɛ ajwamaŋbɔɔ he’ lɛ shishi.”—1 Tesalonikabii 4:3.
12. Mɛni baatsirɛ wɔ ni wɔsumɔ akɛ wɔɔsa Yehowa hiɛ?
12 Enɛ kɛ wɔ baa nɔ kroko ni baaye abua bo ni onyɛ odamɔ kaa lɛ naa yɛ omanyeyeli mli lɛ he: Esa akɛ oyoo akɛ Yehowa ji Jeŋ Muu Fɛɛ Maŋtsɛ, ni esa akɛ abo lɛ toi. (Kpojiemɔ 4:11) Shi, yɛ nakai beaŋ nɔŋŋ lɛ, eji ŋwɛi Tsɛ ni yɔɔ suɔmɔ, ni eyɛ wɔhilɛ-kɛhamɔ he miishɛɛ yɛ etsui mli. (Abɛi 2:20-22; Yesaia 48:17) Emlai lɛ yɛ koni ebu wɔhe, jeee koni etsi wɔnaa yakatswaa. Amɛ toiboo ji nilee gbɛ. (5 Mose 4:5, 6) Ní ooonu nɔ hewɔ ni Yehowa maa hetsemɔ yɛ jeŋba mli nɔ mi waa lɛ shishi faŋŋ lɛ baaye abua bo ni ona hefɛɔ diɛŋtsɛ ni yɔɔ mli lɛ, ni enɛ baatsirɛ bo koni osumɔ akɛ ooosa ehiɛ.—Lala 112:1.
13. Te ooofee tɛŋŋ otsɔɔ mli akɛ Yehowa mla ni guɔ ajwamaŋbɔɔ lɛ hi kɛha wɔ lɛ?
13 Susumɔ anɔkwale ni eji akɛ Nyɔŋmɔ tsiɔ bɔlɛnamɔ naa ewoɔ gbalashihilɛ mli pɛ ni egu ajwamaŋbɔɔ hu lɛ he. (Hebribii 13:4) Ani nɛkɛ mla nɛɛ toiboo haa olaajeɔ nɔ ko kpakpa ko? Ani ŋwɛi Tsɛ ni yɔɔ suɔmɔ lɛ baafee mla ko ni baaha olaaje miishɛɛnamɔ yɛ shihilɛ mli? Dabi! Kwɛmɔ nɔ ni yaa nɔ yɛ otipɛŋfoi ni kpooɔ Nyɔŋmɔ mla ni kɔɔ jeŋba kpakpa he lɛ ashihilɛ mli. Nɔ ni jɛɔ hɔŋɔɔ ni asumɔɔɔ lɛ mli baa yɛ bei babaoo mli ji musufitemɔ, aloo, ekolɛ, gbalashihilɛ ni aboteɔ mli mra tsɔ yɛ be mli ni adarako. Yɛ saji nɛɛ pii amli lɛ nɔ ni etsɔɔ ji ni aaalɛ bii ni wu bɛ he. Kɛfata he lɛ, obalaŋtai ni kɛ amɛhe woɔ ajwamaŋbɔɔ mli lɛ ‘miifee esha miishi amɛ diɛŋtsɛ amɛgbɔmɔtsei’ ni enɛ baaha amɛna helai ni bɔlɛnamɔ kɛbaa lɛ eko. (1 Korintobii 6:18) Kɛji akɛ obalaŋta ni ejɔɔ ehe nɔ eha Yehowa lɛ bɔ ajwamaŋ lɛ, nɔ ni jɛɔ mli baa yɛ henumɔŋ lɛ yeɔ lɛ awui diɛŋtsɛ. Ni aaabɔ mɔdɛŋ akɛ aaaba henumɔ ni nuɔ fɔyeli he daa lɛ shi lɛ baanyɛ ni ekɛ haomɔ kɛ wɔ ni awɔɔɔ nyɔɔŋ teŋ aba. (Lala 32:3, 4; 51:3) Belɛ ani ejeee nɔ ni ka shi faŋŋ akɛ Yehowa mla ni guɔ ajwamaŋbɔɔ lɛ ji nɔ ko ni afee ni akɛbu wɔhe? Sɛɛnamɔ diɛŋtsɛ yɛ hetsemɔ yɛ jeŋba mli lɛ mli!
14. Yɛ nɔ ni akɛɔ akɛ gbekɛbii agbalashihilɛ ji hebuu nɔ lɛ he lɛ, tsɔɔmɔ bɔ ni esa akɛ wɔnu Paulo wiemɔi ni yɔɔ 1 Korintobii 7:9 kɛ 7:36 lɛ shishi wɔha lɛ mli.
14 Wɔbaanyɛ wɔkpɛlɛ nɔ akɛ, ebɛ mlɛo akɛ aaaye Nyɔŋmɔ mlai ni wa ni kɔɔ jeŋba kpakpa he lɛ anɔ. Yɛ enɛ hewɔ lɛ, obalaŋtai komɛi emu sane naa akɛ belɛ hebuu nɔ ni hi fe fɛɛ ji ni amɛbote gbalashihilɛ mli yɛ be mli ni amɛyeko afii nyɔŋmai enyɔ. Amɛsusumɔ lɛ ji akɛ, ‘yɛ fɛɛ sɛɛ lɛ, ani 1 Korintobii 7:9 ekɛɛɛ akɛ: “Shi kɛ amɛnyɛɛɛ amɛhe nɔ amɛyɛ lɛ, ha amɛbote gbalashihilɛ mli; ejaakɛ gbalashihilɛ hi fe nɔ ni akɔnɔ aaahaoo”?’ Shi susumɔ ni tamɔ nɛkɛ lɛ tsɔɔ nii ni ekwɛɛɛ kɛyaaa shɔŋŋ. Paulo ewieee wiemɔi nɛɛ etsɔɔɔ obalaŋtai ni yeko afii nyɔŋmai enyɔ, shi moŋ obalaŋtai ni “amɛsale gbala.” (1 Korintobii 7:36) Yɛ saji lɛ babaoo mli lɛ wɔbaana akɛ obalaŋtai ni shɛko gbala lɛ darako yɛ henumɔŋ kɛ mumɔŋ bɔ ni sa ni aaaha amɛnyɛ amɛdamɔ nɔnyɛɛ kɛ gbɛnaa nii ni baa kɛjɛɔ gbalashihilɛ mli lɛ naa. Wolo ni ji Journal of Marriage and the Family lɛ bɔ amaniɛ akɛ: “Gbɔmɛi ni boteɔ gbalashihilɛ mli mra lɛ naaa tsui ni nyɔɔ mɔ mli tsɔ ejaakɛ amɛsako amɛhe amɛhako gbalashihilɛ mli taomɔ nii. No hewɔ lɛ enɛ ni amɛnyɛɛɛ amɛtsu jogbaŋŋ lɛ haaa amɛtsui anyɔ amɛ mli, ni nɔ ni jɛɔ mli baa ji akɛ gbalashihilɛ lɛ nyɛɛɛ adamɔ shi.” No hewɔ lɛ hetoo lɛ ji, kaabote gbalashihilɛ mli yɛ be mli ni odako, shi moŋ hiɛmɔ oshijayeli ni he tse mli kɛyashi be mli ni ooona sui ni he hiaa lɛ fɛɛ ni aaaha oye omanye yɛ gbalashihilɛ mli lɛ.
Hii Shi Akɛ Mɔ ni he Tse!
15. Mɛɛ nifeemɔ ni mli wa he hiaa kɛji akɛ obaanyɛ ohi shi akɛ mɔ ni he tse yɛ jeŋba mli?
15 Bɔfo Paulo ŋma akɛ: “No hewɔ lɛ nyɛgbɛa nyɛhe nii ni yɔɔ shikpɔŋ lɛ nɔ lɛ: ajwamaŋbɔɔ, nyaŋemɔ nitsumɔ, . . . akɔnɔ fɔŋ.” (Kolosebii 3:5) Hɛɛ, nibii ni he wa he miihia; esa akɛ otswa ofai shi akɛ obaahi shi akɛ mɔ ni he tse. Yɛ be mli ni ewieɔ feemɔ-wiemɔ ni atsɔɔ shishi akɛ “nyɛgbea” lɛ he lɛ, The Expositor’s Bible Commentary lɛ kɛɔ akɛ: “Etsɔɔ akɛ jeee akɛ wɔbaaha loo wɔbaaye efɔŋ nifeemɔi kɛ sui anɔ pɛ kɛkɛ. Esa akɛ wɔtsumɔ fɛɛ kɛya, ni wɔbule shihilɛ gbɛ momo lɛ shishi kwraa. ‘Wɔgbe kwraa’ baanyɛ atsɔɔ hewalɛ ni yɔɔ mli. . . . Feemɔ-wiemɔ lɛ shishinumɔ kɛ hewalɛ ni yɔɔ wiemɔ lɛ fɛɛ mli lɛ tsɔɔ mɔ diɛŋtsɛ faishitswaa nifeemɔ kɛ piŋmɔ kɛ.hewalɛ.”—Okɛto Mateo 5:27-30 he.
16. Bɔni afee ni ohi shi akɛ mɔ ni he tse yɛ jeŋba mli lɛ, mɛni hewɔ esa akɛ otsu nii waa koni ohi shi akɛ mɔ ni he tse yɛ jwɛŋmɔ mli lɛ, ni te ooofee tɛŋŋ ofee nakai lɛ?
16 Shi te ooofee tɛŋŋ “ogbe kwraa” loo ‘otsumɔ’ jeŋba mli nifeemɔi kɛ sui ni he tseee nɛɛ? Yesu tee naagba lɛ shishi tɔɔ beni ekɛɛ: “Mligbɛ, ni ji gbɔmɛi atsuii amli lɛ, jɛi jwɛŋmɔi fɔji lɛ jɛɔ, gbalafitemɔ, ajwamaŋbɔɔ, . . . hiɛjoomɔ.” (Marko 7: 21, 22) Nɔ ni fata okadi tsui lɛ he ji jwɛŋmɔŋ nyɛmɔi, ni no hewɔ ni akɛtoɔ “susumɔi” ahe lɛ. Bɔni afee ni ohi shi akɛ mɔ ni he tse yɛ jeŋba mli lɛ, belɛ esa akɛ obɔ mɔdɛŋ ni ojwɛŋmɔ mli atse. Yɛ mɛɛ gbɛ nɔ? Akɛni hiŋmɛi lɛ ji nɔ ni kɛ saji yaa jwɛŋmɔ lɛ mli hewɔ lɛ, ehe miihia ni okwɛ nɔ ni okɛ ohiŋmɛi kwɛɔ lɛ jogbaŋŋ, okpoo woji, TV nɔ nibii loo sinii ni tsɔɔ loo emaa bɔlɛnamɔ mli jeŋba shara nɔ mi lɛ. Agbɛnɛ hu, ehe miihia ni okwɛ nɔ ni okɛ otoi boɔ toi lɛ jogbaŋŋ, okpoo lalai ni bɔlɛnamɔ mli henumɔ yɔɔ mli. Ebiɔ tsuisalɛ dani onyɛ okɔ shidaamɔ ni tamɔ nɛkɛ, titri lɛ yɛ otipɛŋfoi ateŋ, shi nakai feemɔ baaye abua bo ni ohi shi akɛ mɔ ni he tse yɛ jeŋba mli ni ona bulɛ oha ohe.
17. Mɛni hewɔ esaaa akɛ atsiɔ jeŋba ni he tseee ta po yɛ nyɛteŋ lɛ?
17 Bɔfo Paulo wo ŋaa akɛ: “Shi ajwamaŋbɔɔ kɛ nyaŋemɔ nitsumɔ fɛɛ aloo hiɛjoomɔ lɛ, akatsi ta tete yɛ nyɛteŋ, taakɛ bɔ ni sa mɛi krɔŋkrɔŋi.” (Efesobii 5:3; kwɛmɔ Efe 5 kuku 12 hu.) No hewɔ lɛ esaaa akɛ atsiɔ jeŋba mli mujiwoo nɛɛ ta po, ni ji akɛ, awieɔ he aloo akɛtsuɔ nii akɛ sane ni akɛyeɔ fɛo. Mɛni hewɔ? Taakɛ Biblia kaselɔ William Barclay wie he lɛ: “Ni ooowie nɔ ko he, oye nɔ ko he fɛo, okɛha osanegbaa mli yɛ be fɛɛ mli lɛ tsɔɔ akɛ okɛmiiwo ojwɛŋmɔ mli, ni ooha nakai nii lɛ feemɔ diɛŋtsɛ miibɛŋkɛ bo.” (Yakobo 1: 14, 15) Ebiɔ faishitswaa diɛŋtsɛ dani mɔ ko ‘awo enaabu manyoflɛ’ titri lɛ yɛ be mli ni obalaŋtai krokomɛi kɛ fɛoyelii miigba nibii ni ehiii aloo akɛ yakayaka wiemɔ miitsɔɔ bɔlɛnamɔ mli nifeemɔi komɛi amli lɛ. (Lala 39:2) Shi kɛ ohi shi akɛ mɔ ni ja kɛ mɔ ni he tse lɛ, obaaha Yehowa tsui anya.—Lala 11:7; Abɛi 27:11.
18. (a) Bɔni afee ni aye ta ni awuɔ ashiɔ jeŋba ni he tseee lɛ mli kunim lɛ, mɛni hewɔ efaaa kɛkɛ akɛ aaakpoo susumɔi kɛ wiemɔi ni he tseee lɛ? (b) Te ooofee tɛŋŋ ona Paulo ŋaawoo ni ekɛha Filipibii lɛ he sɛɛ?
18 Efaaa kɛkɛ akɛ oookpoo susumɔi kɛ wiemɔi ni he tseee dani onyɛ oye jeŋba mli hetsemɔ mli tawuu lɛ mli kunim. Chinabii buɔ abɛ ko akɛ: “ Ŋaawoi sɔrɔtoi fɛɛ boteɔ jwɛŋmɔ ni mli ka shi efolo lɛ mli.” (Okɛto Mateo 12:43-45 he.) Paulo yɔse bɔ ni ehe hiaa akɛ akɛ susumɔi kpakpai ni hi aaawo jwɛŋmɔ lɛ mli obɔ lɛ. No hewɔ lɛ, ewo Filipibii lɛ aŋaa akɛ: “Anyɛmimɛi, nii abɔ ni ji anɔkwa, nii ni sa woo, nii ni ja, nii ni he tse, nii ni adɔɔ he, nii ni yɔɔ gbɛi kpakpa lɛ fɛɛ, kɛ jeŋba kpakpa ko yɛ lɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa [‘efee nii ni nyɛsusuɔ he yɛ be fɛɛ mli’c].”—Filipibii 4:8.
19. Mɛni hewɔ esa akɛ okɛ hiɛdɔɔ akase Ŋyɔŋmɔ Wiemɔ lɛ, ni enɛ baaye abua bo ni ohi shi akɛ mɔ ni he tse yɛ jeŋba mli yɛ mɛɛ gbɛ nɔ?
19 Enɛ tsɔɔ Nyɔŋmɔ Wiemɔ lɛ kasemɔ kɛ hiɛdɔɔ diɛŋtsɛ. (Yoshua 1:8; Lala 1:2) Ebaawaje ojwɛŋmɔ kɛ otsui ni ebaaye ebua bo koni ona okɛ Yehowa teŋ wekukpaa ni bɛŋkɛ kpaakpa mli ŋɔɔmɔ. Enɛ baaha onyɛ ote shi owo kaai ni baaha okɛ ohe awo jeŋba ni he tseee mli lɛ. Ebaŋ akɛ ooobɔ mɔdɛŋ ni ogbe Yehowa gbɛi lɛ he guɔ ni owo oweku lɛ kɛ asafo lɛ hiɛgbele. Shi moŋ, okɛ obalaŋtaiaŋ hewalɛ kɛ nyɛmɔ lɛ baatao nii yɛ gbɛ ni haŋ oshwa ohe yɛ sɛɛ mli lɛ nɔ. Hɛɛ, obaanyiɛ hetsemɔ yɛ jeŋba mli gbɛ lɛ nɔ, nɔ ni ji obalaŋtaiaŋ ahefɛo diɛŋtsɛ kɛha mɛi ni anaa akɛ amɛmiisɔmɔ Yehowa lɛ!—Abɛi 3:1-4.
[Shishigbɛ niŋmai]
a Kwɛmɔ Awake! ni je kpo September 8, 1987, baafai 19-21; November 8, 1987, baafai 18-20; kɛ March 8, 1988, baafai 20-3.
b Awake! December 8, 1985, baafai 10-12.
c The Expositor’s Greek Testament
Obalaŋtai—Te Nyɛbaaha Hetoo Nyɛha Tɛŋŋ?
◻ Mɛni hewɔ esa akɛ nyɛhiɛ jeŋba ni he tse ni nɔ kwɔ mli Iɛ?
◻ Mɛɛ nɔnyɛɛ haa ewaa akɛ aaahiɛ jeŋba ni he tse yɛ Nyɔŋmɔ hiɛ lɛ mli?
◻ Mɛni baanyɛ aye abua nyɛ ni nyɛdamɔ kaa ni aaaha nyɛhi shi akɛ mɛi ni he tse yɛ jeŋba mli Iɛ naa?
◻ Mɛɛ nifeemɔi ni mli wa he hiaa kɛji akɛ nyɛaanyɛ nyɛhi shi akɛ mɛi ni he tse?