“Ye Mikitãi lɛ Anɔ, ní Oyi Aná Wala”

EJI oblanyo ni le nii waa, ‘ehe yɛ fɛo ni ehiɛ hu yɛ fɛo.’ Enitsumɔtsɛ lɛ ŋa lɛ sumɔɔ koni ekɛ lɛ agbe ekɔnɔ, ni eyɛ ekãa. Akɛni oblanyo lɛ he feɔ lɛ akɔnɔ waa diɛŋtsɛ hewɔ lɛ, ebɔɔ mɔdɛŋ daa gbi koni elaka lɛ ni efee efɔŋ. “Eba mli gbi lɛ eko akɛ Yosef tee shia lɛ eyaatsu enii, ni shia lɛ bii lɛ eko eko bɛ jɛi. Ni emɔ etade lɛ mli, ni ekɛɛ: Okɛ mi abawɔ!” Shi Yosef, blematsɛ Yakob binuu lɛ shĩ etade lɛ yɛ esɛɛ ni ejo Potifar ŋa lɛ naa foi.—1 Mose 39:1-12.

Yɛ anɔkwale mli lɛ, jeee mɔ fɛɛ mɔ joɔ shihilɛ ko ni kaa mɔ naa foi. Ákɛ nɔkwɛmɔnɔ lɛ, susumɔ oblanyo ko ni blema Israel Maŋtsɛ Salomo na lɛ yɛ gbɛjegbɛi lɛ anɔ gbɛkɛ lɛ sane lɛ he okwɛ. Beni yoo ko ni ekpalaŋ lɛ lakaa lɛ koni efee efɔŋ lɛ, “enyiɛ esɛɛ kɛtee amrɔ lɛ nɔŋŋ tamɔ tsina ni ayaagbe lɛ.”—Abɛi 7:21, 22.

Awoɔ Kristofoi hewalɛ koni ‘amɛjo ajwamaŋbɔɔ naa foi.’ (1 Korintobii 6:18) Bɔfo Paulo ŋma kɛyaha Kristofonyo kaselɔ Timoteo ni edako lɛ akɛ: “Oblahiiaŋ sɛɛdii lɛ hu, joo naa foi.” (2 Timoteo 2:22) Kɛ wɔkɛ shihilɛi komɛi kpe ni tsɔɔ akɛ wɔkɛ wɔhe awo ajwamaŋbɔɔ, gbalafitemɔ, loo jeŋbai fɔ̃ji krokomɛi amli lɛ, esa akɛ wɔ hu wɔkɛ ekãa ajo naa foi taakɛ Yosef jo Potifar ŋa lɛ naa foi lɛ. Mɛni baaye ebua wɔ koni wɔtswa wɔfai shi akɛ wɔɔfee nakai? Yɛ Biblia mli wolo ni ji Abɛi lɛ yitso 7 lɛ mli lɛ, Salomo kɛ ŋaawoo ko ni sɛɛnamɔ yɔɔ he waa lɛ ha wɔ. Jeee tsɔɔmɔi ni buɔ wɔhe kɛjɛɔ gbɔmɛi ni kɛ amɛhe woɔ jeŋba shara mli lɛ atsɔnei lɛ ahe lɛ he pɛ ewieɔ, shi ejieɔ gbɛ̀i ni amɛtsɔɔ nɔ amɛtsuɔ nii lɛ kpo kɛtsɔ bɔ ni etsɔɔ mfonirifeemɔ lɛ mli ehaa faŋŋ ni tsɔɔ oblanyo ko ni yoo ni kɛ ehe woɔ jeŋba shara mli lɛ laka lɛ koni efee efɔŋ lɛ nɔ.

‘Fĩimɔ Mikitãi lɛ Okpɛtɛ Owaobii Ahe’

Maŋtsɛ lɛ kɛ ŋaawoo ni tamɔ tsɛ nɔ̃ je shishi akɛ: “Mibi, ye miwiemɔi lɛ anɔ, ni okɛ mikitãi ato. Ye mikitãi lɛ anɔ, ní oyi aná wala, ni obu mimla lɛ tamɔ ohiŋmɛi mli ajaŋmalatɛ!”—Abɛi 7:1, 2.

Fɔlɔi, titri lɛ tsɛmɛi lɛ, yɛ gbɛnaa nii ni Nyɔŋmɔ kɛha amɛ akɛ amɛkɛ ekpakpa kɛ efɔŋ he tɛi ni Nyɔŋmɔ efolɔ eshwie shi lɛ atsɔse amɛbii. Mose wo fɔlɔi aŋaa akɛ: “Nɛkɛ wiemɔi nɛɛ ni miwoɔ he kitã ŋmɛnɛ gbi nɛɛ akã otsui nɔ, ni ojwɛŋ nɔ otsɔɔ obii, ni owie he, beni ota shi yɛ oshia lɛ kɛ beni onyiɛ gbɛ teŋ kɛ beni okã shi kɛ beni ote shi.” (5 Mose 6:6, 7) Ni bɔfo Paulo ŋma akɛ: “Nyɛ tsɛmɛi lɛ, nyɛkawoa nyɛbii amlifu, shi moŋ nyɛlɛa amɛ yɛ [Yehowa, NW] tsɔsemɔ kɛ ŋaawoo lɛ mli.” (Efesobii 6:4) No hewɔ lɛ, kaimɔi lɛ, kitãi lɛ, kɛ mlai ni anaa yɛ Nyɔŋmɔ Wiemɔ ni ji Biblia lɛ mli lɛ fata fɔlɔi agbɛtsɔɔmɔi ni esa akɛ abu lɛ jwetri, aloo abu lɛ waa lɛ he yɛ faŋŋ mli.

Nɔ ni baanyɛ afata nitsɔɔmɔ ni fɔlɔi kɛhaa he hu ji gbɛtsɔɔmɔi krokomɛi—weku mli mlai. Enɛɛmɛi yɛ kɛha weku lɛ mli bii lɛ ahilɛ-kɛhamɔ. Lɛɛlɛŋ, mlai lɛ baanyɛ afee srɔto yɛ weku fɛɛ weku nɔ̃ he yɛ bɔ ni hiamɔ nii lɛ yɔɔ lɛ naa. Shi kɛlɛ, nitsumɔ kã fɔlɔi lɛ anɔ koni amɛkpɛ amɛyiŋ yɛ nɔ ni hi fe fɛɛ he kɛha amɛ diɛŋtsɛ amɛweku lɛ. Ni bei pii lɛ, mlai ni amɛwoɔ lɛ ji anɔkwa suɔmɔ kɛ mɔ hesusumɔ ni amɛyɔɔ lɛ kpojiemɔ. Ŋaawoo ni akɛhaa gbekɛbii ji akɛ, amɛkɛ mlai nɛɛ kɛ Ŋmalɛ naa nitsɔɔmɔi ni amɛnáa kɛjɛɔ amɛfɔlɔi aŋɔɔ lɛ atsu nii. Hɛɛ, ehe miihia koni obu gbɛtsɔɔmɔi nɛɛ “tamɔ ohiŋmɛi mli ajaŋmalatɛ”—koni obu he jogbaŋŋ diɛŋtsɛ. No ji gbɛ ni aaatsɔ nɔ akpoo nɔ ni gbeɔ mɔ, ní jɛɔ hiɛ ni akuɔ ashwieɔ tɛi ni Yehowa efolɔ eshwie shi lɛ mli kɛbaa lɛ koni agbɛnɛ “oyi aná wala.”

Salomo tee nɔ ekɛɛ akɛ: “Fĩimɔ [mikitãi lɛ] okpɛtɛ owaobii ahe, ŋmaa yɛ otsuiŋ tao lɛ nɔ!” (Abɛi 7:3) Akɛni wɔhiŋmɛii naa wɔwaobii lɛ ojogbaŋŋ ni amɛhe hiaa yɛ wɔyiŋtoi ahe nitsumɔ mli hewɔ lɛ, esa akɛ nibii ni akaseɔ kɛjɛɔ Ŋmalɛ naa tsɔsemɔ loo Biblia mli nilee ní aaaná lɛ mli lɛ aya nɔ akai wɔ daa koni ekudɔ wɔ yɛ nɔ fɛɛ nɔ ni wɔfeɔ lɛ mli. Esa akɛ wɔŋmala amɛ wɔwo wɔtsui tao lɛ nɔ, ní wɔha efee wɔmligbɛ su lɛ fã ko.

Yɛ be mli ni maŋtsɛ lɛ hiɛ kpaaa bɔ ni nilee kɛ sanesɛɛkɔmɔ he hiaa ha lɛ nɔ lɛ, ewo ŋaa akɛ: “Kɛɛmɔ nilee akɛ: Minyɛmi yoo jio! ni otsɛ́ sanesɛɛkɔmɔ akɛ oshieŋnyɛ.” (Abɛi 7:4) Nilee ji nyɛmɔ ni ayɔɔ ákɛ akɛ nilee ni Nyɔŋmɔ kɛha lɛ aaatsu nii jogbaŋŋ. Esa akɛ wɔná suɔmɔ wɔha nilee ákɛ nyɛmi yoo ni wɔsumɔɔ lɛ jogbaŋŋ. Mɛni ji sanesɛɛkɔmɔ? No ji nyɛmɔ ni ayɔɔ ákɛ aaakwɛ sane ko mli ni anu shishi kɛtsɔ saji ni kɔɔ efãi lɛ ahe kɛ fɛɛ he lɛ mli shishinumɔ mli. Esa akɛ sanesɛɛkɔmɔ abɛŋkɛ wɔ waa tamɔ naanyo ni bɛŋkɛɔ mɔ kpaakpa.

Mɛni hewɔ esa akɛ wɔkpɛtɛ Ŋmalɛ naa tsɔsemɔ ni wɔbɛŋkɛ nilee kɛ sanesɛɛkɔmɔ? “Koni [amɛbaa wɔyi] kɛjɛ mɔ kroko ŋa dɛŋ, kɛjɛ yoo mɔkpɔŋ ni wieɔ dɔkɔbii lɛ dɛŋ.” (Abɛi 7:5) Hɛɛ, nakai feemɔ baabu wɔhe kɛjɛ mɔ kroko loo mɔkpɔŋ—mɔ ni kɛ ehe woɔ jeŋba shara mli lɛ naadɔkɔbii wiemɔi kɛ yiŋkɔnemɔ gbɛ̀i lɛ ahe.a

Oblanyo lɛ Kɛ ‘Yoo ko ni Hiɛ Etɛ̃’ Kpe

No sɛɛ lɛ, Israel maŋtsɛ lɛ tsɔɔ shihilɛ ko ni lɛ diɛŋtsɛ ena: “Mitsɔ̃ miwe samfɛlɛ kɛ emli fɔji lɛ amli mikwɛ, ni mina oblanyo ko ni bɛ yitsoŋ yɛ mɛi ni nako jwɛŋmɔ lɛ ateŋ, miyoo lɛ yɛ oblahii lɛ ateŋ: etsɔ̃ ekóŋ lɛ masɛi kɛfo mli yɛ blohu lɛŋ, ni etsɔ̃ ewe lɛ gbɛ, gbi lɛ gbɛkɛ, beni hiɛ efee tuutuu lɛ, nyɔɔŋ teŋ, beni duŋ ewo kpii lɛ.”—Abɛi 7:6-9.

Samfɛlɛ ni Salomo kwɛ nii kɛtsɔ mli lɛ yɛ fɔji—yɛ faŋŋ mli lɛ akɛ tsei to he gbɛjianɔ ni ekolɛ akɛ nibii ni agbɔ lɛ haŋtsii ewo he. Beni hiɛ ni efee tuutuu lɛ baa shi lɛ, gbɛkɛ mli duŋ lɛ baa gbɛjegbɛi lɛ anɔ. Ena oblanyo ko ni bɛ henɔyeli ko kwraa. Akɛni ebɛ sɛɛyoomɔ, loo jwɛŋmɔ kpakpa hewɔ lɛ, ebɛ yitsoŋ. Eeenyɛ efee akɛ, ele akutso ni ebote mli lɛ kɛ nɔ ni baanyɛ aba enɔ yɛ jɛmɛ. Oblanyo lɛ bɛŋkɛ “ekóŋ lɛ” ni yɔɔ ewe lɛ gbɛ lɛ nɔ lɛ. Namɔ ni? Mɛni mli ekɛ ehe woɔ?

Maŋtsɛ ni kwɛɔ nii jogbaŋŋ lɛ tee nɔ ekɛɛ akɛ: “Naa, yoo ko kɛ lɛ bakpe, ewo ajwamaŋ atade, etsui esa, enaa wa ni etoi esa, etooo enane shi yɛ ewe lɛ hu. Bianɛ bianɛ etee agbó lɛ naa, bianɛ bianɛ etee jaanɔ, ni ewoɔ ká yɛ kóŋ fɛɛ kóŋ.”—Abɛi 7:10-12.

Bɔ ni yoo nɛɛ saa ehe ehaa lɛ wieɔ nibii babaoo yɛ ehe. (1 Mose 38:14, 15) Esaa ehe bɔ ni esaaa, tamɔ yoo ajwamaŋ. Kɛfata he lɛ, etsui esa—“kutumpɔo” yɛ ejwɛŋmɔ mli, “ehiɛ etɛ̃” yɛ eyiŋtoo mli. (An American Translation; New International Version) Enaa wa ni etoi esa, ewieɔ babaoo ni ekuɛŋ ti, eyɛ hoo ni efeɔ etsui naa nii, ebuuu mɔ, ni ewoɔ ehe nɔ. Yɛ nɔ najiaŋ ni eeehi shia lɛ, esumɔɔ gbɛjegbɛi kɛ hei ni abuaa he naa yɛ lɛ yaa, ni ewoɔ ká yɛ gbɛjegbɛi akoji anɔ koni enine ashɛ mɛi anɔ. Eemɛ mɔ ko ni tamɔ oblanyo lɛ.

‘Naaŋɔɔmɔ Sɔŋŋ’

No hewɔ lɛ, oblanyo ko kɛ yoo ko ni kɛ ehe woɔ jeŋba shara mli ni toɔ ŋaa fɔŋ yakpe. Kwɛ bɔ ni enɛ baagbala Salomo jwɛŋmɔ aha! Egba akɛ: “Emɔ lɛ ni eshɔ enaa, epele ehiɛ ni ekɛɛ lɛ akɛ: Kulɛ shidaa afɔleshaa kã minɔ; shi ŋmɛnɛ nɔŋŋ miyaha mishiwoo nii lɛ. No hewɔ lɛ mije kpo ni mikɛo abakpe, ní mabɔ mɔdɛŋ matao ohiɛgbɛ, ni minao nɛɛ.”—Abɛi 7:13-15.

Nɛkɛ yoo nɛɛ naa yɛ dɔkɔbii. Be mli ni epeleɔ ehiɛ lɛ, ekɛ ekãa wie ewiemɔi lɛ. Ebuɔ nɔ fɛɛ nɔ ni ekɛɔ lɛ he akɔntaa jogbaŋŋ koni ekɛlaka oblanyo lɛ kɛwo efɔŋfeemɔ mli. Akɛni ekɛɛ akɛ ekɛ shidaa afɔlei eha yɛ nakai gbi lɛ nɔ nɔŋŋ ni eyaha eshiwoo nii lɛ hewɔ lɛ, ekɛ ehe tsɔɔ akɛ jalɔ, ni ekɛmiitsɔɔ akɛ eyɛ mumɔŋ shidaamɔ kpakpa. Nɔ ni fata afɔleshaa nii ni akɛhaa yɛ sɔlemɔwe lɛ yɛ Yerusalem lɛ he ji loo, ashikishaŋ, fɔ, kɛ wein. (3 Mose 19:5, 6; 22:21; 4 Mose 15:8-10) Akɛni mɔ ni kɛ afɔle lɛ haa lɛ baanyɛ akɔ afɔleshaa nii lɛ eko eha ehe kɛ eweku lɛ hewɔ lɛ, ekɛ no tsɔɔ mli akɛ niyenii babaoo yɛ ni abaaye kɛ nii babaoo ni abaanu yɛ ewe lɛ. Shishinumɔ ni yɔɔ sɛɛ lɛ yɛ faŋŋ: Oblanyo lɛ mii baashɛ ehe babaoo yɛ jɛmɛ. Eje gbɛ eshi eshia kɛ yiŋtoo diɛŋtsɛ akɛ eba koni ebatao lɛ yɛ jɛmɛ. Kwɛ bɔ ni etaa mɔ tsuiŋ—kɛ́ mɔ fɛɛ mɔ baanyɛ ahé wiemɔ ni tamɔ nɛkɛ aye. Biblia he woloŋlelɔ ko kɛɛ akɛ: “Eyɛ mli akɛ etee koni eyatao mɔ ko moŋ, shi ani eje gbɛ eba diɛŋtsɛ koni ebatao nɛkɛ mɔ krɛdɛɛ nɛɛ? Kwashia pɛ—ekolɛ mɔnɛ—baanyɛ ahe lɛ aye.”

Beni efee ehe mɔ ni he yɔɔ akɔnɔ kɛtsɔ etadewoo ni anaa lɛ nɔ, yiteŋmuluwoo wiemɔ ni gbɛɛɔ ni ewieɔ nɔ, efuamɔ ni taa mɔ mli, enaabui ni ŋɔɔŋɔi lɛ nɔ lɛ sɛɛ lɛ, yoo ni lakaa mɔ ewoɔ efɔŋfeemɔ mli lɛ kɛ ŋmajee hewalɛ lɛ tsu nii. Ekɛɛ akɛ: “Mikɛ saanɔboi eha misaa lɛ nɔ, kɛ kentei ni akɛ Mizraim kpãa lo. Mikɛ mire kɛ aloe kɛ sinamon ewo misaa lɛ mli ŋma.” (Abɛi 7:16, 17) Ekɛ kente ni akɛ Mizraim kpãa lo ésaa esaa lɛ nɔ fɛfɛo ni ekɛ mire, aloe kɛ sinamon ni jeɔ ŋma waa eshwã nɔ.

Etee nɔ ekɛɛ akɛ: “Ba, ní wɔkɛ suɔmɔ agbe wɔkɔnɔ kɛyashi leebi, ha ni wɔnya kɛ suɔmɔ nibii.” Ninefɔɔ lɛ yɛ kɛha nɔ ko ni ŋɔɔ waa fe gbɛkɛ niyenii ni mɛi enyɔ baaye. Shiwoo ni ekɛha lɛ tsɔɔ akɛ amɛbaaná bɔlɛnamɔ mli ŋɔɔmɔ waa. Yɛ oblanyo lɛ gbɛfaŋ lɛ, ninefɔɔ lɛ baaha ele nibii heei, ni miishɛɛ babaoo yɛ mli! Be mli ni elakaa lɛ lolo lɛ, ekɛfata he akɛ: “Ejaakɛ nuu lɛ bɛ, efã gbɛ kɛtee shɔŋŋ; ewó shika kɛ kotoku ehiɛ edɛ, nyɔɔŋ lɛ emuuyeli mli dani ebaaba shia!” (Abɛi 7:18-20) Eha ená nɔmimaa akɛ, amɛnáŋ naagba ko kwraa, ejaakɛ ewu lɛ etee nitsumɔ yɛ gbɛfaa mli ni aakpa gbɛ akɛ ebaatsɛ dani ebaaba shia. Kwɛ bɔ ni ehe esa jogbaŋŋ ha yɛ oblanyo lɛ lakamɔ mli! “Ekɛ enaaŋɔɔmɔ sɔŋŋ ha ekpɛlɛ, ekɛ enaa dɔkɔbii lɛ kpala lɛ kɛtee.” (Abɛi 7:21) Nuu ni hiɛ jeŋba kpakpa tamɔ Yosef pɛ ji mɔ ni baanyɛ atsĩ ninefɔɔ ni lakaa mɔ tamɔ nɛkɛ lɛ naa. (1 Mose 39:9, 12) Ani oblanyo nɛɛ yɛ hesaai ni tamɔ nɛkɛ?

“Tamɔ Tsina ni Ayaagbe Lɛ”

Salomo bɔ amaniɛ akɛ: “Enyiɛ esɛɛ kɛtee amrɔ lɛ nɔŋŋ tamɔ tsina ni ayaagbe lɛ, aloo tamɔ sɛkɛyelɔ ni ayaabɔ lɛ apã, kɛyashi beyinɔ ni gãi tsu emlɛbo mli; tamɔ loofɔlɔ he feɔ oyá kɛyaa tsɔne mli ni eleee akɛ ewala hewɔ atsɔ̃ lɛ.”—Abɛi 7:22, 23.

Ninefɔɔ lɛ bafee nɔ ni oblanyo lɛ nyɛɛɛ atsĩ naa. Beni eku ehiɛ eshwie jwɛŋmɔi kpakpai fɛɛ nɔ lɛ, enyiɛ esɛɛ etee “tamɔ tsina ni ayaagbe lɛ.” Tamɔ bɔ ni nuu ni awo lɛ apã nyɛŋ ajo toigbalamɔ naa foi lɛ, nakai nɔŋŋ agbala oblanyo lɛ awo eshafeemɔ mli. Enaaa oshara ni yɔɔ mli lɛ fɛɛ kɛyashi beyinɔ ni “gãi tsu emlɛbo mli,” ni ji akɛ, kɛyashi beni ená pilamɔ ni baanyɛ agbe lɛ. Gbele lɛ baanyɛ afee gbele diɛŋtsɛ ni tsɔɔ akɛ ekɛ ehe eha bɔlɛnamɔ mli tsɛŋemɔ helai ni gbeɔ mɔ.b Pilamɔ lɛ hu baanyɛ agbe lɛ yɛ mumɔŋ; “ewala hewɔ atsɔ̃ lɛ.” Enɛ sa lɛ gbɔmɔ muu lɛ fɛɛ kɛ ewala he waa diɛŋtsɛ, ni éfee esha ni hiɛdɔɔ yɔɔ mli eshi Nyɔŋmɔ. No hewɔ lɛ ehe feɔ oyá kɛboteɔ gbele hewalɛ lɛ mli tamɔ loofɔlɔ ni eyabote tsɔne mli!

“Kaadũ Gbɛ Kɛyaje Etempɔŋi lɛ Anɔ”

Beni maŋtsɛ nilelɔ lɛ kaseɔ nii kɛjɛɔ nɔ ni éna lɛ mli lɛ, ewo ŋaa akɛ: “No hewɔ lɛ, mibii, nyɛboa mi toi, nyɛfea toi nyɛhaa midaaŋ wiemɔi lɛ. Kaaha otsui miidɔ kɛmiiya egbɛ̀i lɛ anɔ, ni kaadũ gbɛ kɛyaje etempɔŋi lɛ anɔ! Ejaakɛ epila mɛi pii eshwie shi, ni mɛi ni egbegbei lɛ ayi fá babaoo. Ewe lɛ, gbohiiaje gbɛ ni, ekã kɛmiiya gbele piai lɛ amli.”—Abɛi 7:24-27.

Eyɛ faŋŋ akɛ, ŋaawoo ni Salomo kɛhaa ji akɛ esa akɛ atsi he kɛjɛ mɔ ni kɛ ehe woɔ jeŋba shara mli lɛ gbɛ̀i ni gbeɔ mɔ lɛ he, ní ‘eyi aná wala.’ (Abɛi 7:2) Kwɛ bɔ ni ŋaawoo nɛɛ ji nɔ ni yɔɔ ebe naa pɛpɛɛpɛ kɛha wɔgbii nɛɛ! Eka shi faŋŋ akɛ ehe miihia ni otsi ohe kɛjɛ hei ni mɛi ni woɔ ká koni amɛmɔmɔ mɛi lɛ fɔɔ jɛmɛ baa lɛ he. Mɛni hewɔ esa akɛ okɛ ohe aha amɛ ŋaatsɔɔ gbɛ̀i lɛ kɛtsɔ hei ni tamɔ nakai ni oooya lɛ nɔ? Yɛ anɔkwale mli lɛ, mɛni hewɔ esa akɛ ofee mɔ “ni bɛ yitsoŋ” ni odu gbɛ kɛyaje “mɔkpɔŋ” tempɔŋi anɔ?

“Mɔ kroko ŋa” ni maŋtsɛ lɛ na lɛ lɛ, laka oblanyo lɛ kɛ ninefɔɔ akɛ eba koni eha ‘amɛnya kɛ suɔmɔ nibii.’ Ani akɛ oblahii kɛ oblayei babaoo—titri lɛ gbekɛbii yei—tsuko nii yɛ gbɛ ni tamɔ nakai nɔ? Shi susumɔ he okwɛ: Kɛ mɔ ko bɔ mɔdɛŋ koni egbala bo kɛwo bɔlɛnamɔ jeŋba shara mli lɛ, ani eji anɔkwa suɔmɔ loo akɔnɔ fɔŋ ni akɛ pɛsɛmkunya taoɔ sɛɛ gbɛ? Mɛni hewɔ ni nuu ko ni sumɔɔ yoo ko waa lɛ baanyɛ yoo lɛ nɔ koni eku tsɔsemɔ kɛ henilee ni ená ákɛ Kristofonyo lɛ mli? Salomo wo ŋaa akɛ “kaaha otsui miidɔ” kɛmiiya gbɛ̀i ni tamɔ nɛkɛ nɔ.

Bei pii lɛ, mɔ ni lakaa mɔ ewoɔ efɔŋfeemɔ mli lɛ wiemɔi ŋɔɔ ni esusu he jogbaŋŋ. Nilee kɛ sanesɛɛkɔmɔ ni wɔkɛaatsu nii daa lɛ baaye ebua wɔ koni wɔyoo bɔ ni fɛɛ ji. Wɔhiɛ ni kpaŋ nɔ ni Yehowa efã akɛ wɔfee lɛ nɔ lɛ baabu wɔhe. No hewɔ lɛ, eba akɛ wɔɔbɔ mɔdɛŋ ni ‘wɔye Nyɔŋmɔ kitãi anɔ, ní wɔyi aná wala,’ kɛya naanɔi anaanɔ po.—1 Yohane 2:17.

[Shishigbɛ niŋmai]

[Mfonirii ni yɔɔ baafa 29]

Te obuɔ ofɔlɔi amlai ohaa tɛŋŋ?

[Mfoniri ni yɔɔ baafa 31]

Nyɔŋmɔ kitãi anɔyeli haa mɔ wala