Ani Okaiɔ?
Ani ónyã Buu-Mɔɔ srɔtoi ni ba nyɛsɛɛ nɛɛ akanemɔ he? Ojogbaŋŋ, kwɛmɔ akɛ obaanyɛ oha sanebimɔi ni nyiɛ sɛɛ nɛɛ ahetoo lo:
• “Jwɛŋmɔŋ nyɛmɔ” baanyɛ afee nɔ ni buɔ mɔ he yɛ mɛɛ gbɛ nɔ? (Abɛi 1:4)
Ebaanyɛ eha wɔhiɛ ahi wɔhe nɔ yɛ mumɔŋ osharai ahe, ní ekanya wɔ koni wɔfee nii yɛ nilee mli, tamɔ bɔlɛnamɔ he kaai ni wɔɔjo naa foi yɛ nitsumɔhe lɛ nɛkɛ. Eyeɔ ebuaa wɔ ni wɔkpɛlɛɔ nɔ akɛ, nanemɛi Kristofoi yeee emuu, ni no baanyɛ atsirɛ wɔ koni wɔkɛ oyaiyeli akafee nii beni mɔ ko ewo wɔmli la. Ebaanyɛ eye ebua wɔ ni wɔjo nɔnyɛɛi ni jɛɔ heloonaa nibii asɛɛdii mli baa ní baanyɛ aha wɔkpalaŋ yɛ mumɔŋ lɛ hu naa foi.—8/15, baafa 21-24.
• Mɛɛ gbɛ nɔ mɔ ko aaatsɔ afee akutsoŋnyo ni he yɔɔ sɛɛnamɔ?
Gbɛ̀i enyɔ ni abaanyɛ atsɔ nɔ afee akutsoŋnyo kpakpa lɛ ji ni aaafee nihalɔ kpakpa kɛ nihelɔ ni hiɛ sɔɔ nii. Eji nɔ ni sɛɛnamɔ babaoo yɔɔ he akɛ aaafee akutsoŋnyo kpakpa beni oshara eba. Yehowa Odasefoi bɔɔ mɔdɛŋ ni amɛfee akutseiaŋbii kpakpai kɛtsɔ nifeemɔ ni etsɛŋ ni baaba, Nyɔŋmɔ nifeemɔ ni ekɛbaafo efɔŋfeemɔ sɛɛ lɛ he kɔkɔbɔɔ ni amɛkɛhaa mɛi krokomɛi lɛ nɔ.—9/1, baafa 4-7.
• Taakɛ Biblia lɛ tsɔɔ lɛ, namɛi ji anɔkwa hetselɔi, ni te aaafee tɛŋŋ ni amɛaaye amɛbua adesai aweku lɛ?
Mra be mli Kristofoi lɛ fɛɛ ji anɔkwa hetselɔi loo mɛi krɔŋkrɔŋi, ní Nyɔŋmɔ fee amɛ nakai shi jeee gbɔmɛi loo gbɔmɛi agbɛjianɔtoo ko. (Romabii 1:7) Kɛ atée mɛi krɔŋkrɔŋi lɛ ashi kɛtee ŋwɛi shihilɛ mli nɔŋŋ pɛ lɛ, amɛbaafata Kristo he koni amɛjɔɔ anɔkwafoi ni yɔɔ shikpɔŋ nɔ lɛ. (Efesobii 1:18-21)—9/15, baafa 5-7.
• Blema Hela akaŋshii nifeemɔi lɛ ahe nɔ ko ni aaale lɛ he baanyɛ aba sɛɛnamɔ kɛha Kristofoi yɛ mɛɛ gbɛ nɔ?
Bɔfo Petro kɛ bɔfo Paulo kɛ nɔkwɛmɔnii loo mfonirifeemɔŋ nibii ni damɔ blema shwɛmɔi anɔ loo nɔ ni kɔɔ he lɛ tsu nii yɛ amɛniŋmaai lɛ amli. (1 Korintobii 9:26; 1 Timoteo 4:7; 2 Timoteo 2:5; 1 Petro 5:10) Yɛ blema akaŋshilɔ gbɛfaŋ lɛ, ehe miihia ni ená tsɔselɔ kpakpa, ní eye ehe nɔ, ní ekɛ enyɛmɔi atsu nii jogbaŋŋ. Nakai nɔŋŋ eji anɔkwale yɛ Kristofoi amumɔŋ mɔdɛŋbɔi lɛ ahe ŋmɛnɛ.—10/1, baafa 28-31.
• Mɛni ji kaai kɛ jɔɔmɔi ni jɛɔ tsɔsemɔ ni akɛhaa gbekɛbii yɛ maŋsɛɛ lɛ mli kɛbaa?
Gbekɛbii pii kaseɔ wiemɔ hee ko oyayaayai fe amɛfɔlɔi ní ekolɛ ebaafee nɔ ni wa kɛha amɛ akɛ amɛaanu amɛbii lɛ asusumɔ kɛ nifeemɔi ashishi lɛ. Ni ekolɛ efeŋ mlɛo kɛhaŋ gbekɛbii lɛ akɛ amɛaanu Biblia tsɔɔmɔi ashishi yɛ amɛfɔlɔi lɛ awiemɔ mli. Shi kɛlɛ, abaanyɛ awaje weku mli ekomefeemɔ lɛ yɛ be mli ni fɔlɔi tsɔɔ amɛbii lɛ amɛmaŋ wiemɔ lɛ, mɛi ni ekolɛ amɛbaanu wiemɔi srɔtoi enyɔ koni agbɛnɛ amɛnu he akɛ amɛle kusumii srɔtoi enyɔ lɛ.—10/15, baafa 22-26.
• Mɛni hewɔ faikpamɔ ni aaakase lɛ he hiaa lɛ?
Bei pii lɛ, faikpamɔ yɛ anɔkwayeli mli lɛ ji gbɛ ni atsɔɔ nɔ akɛsaa wekukpaa ko ni efite. Biblia lɛ kɛ hewalɛ ni faikpamɔ baanyɛ aná yɛ mɔ nɔ lɛ he nɔkwɛmɔnii haa. (1 Samuel 25:2-35; Bɔfoi lɛ Asaji 23:1-5) Bei pii lɛ, kɛ béi bakã adesai enyɔ teŋ lɛ, mɛi enyɔ lɛ fɛɛ kɛ shwamɔ haa amɛhe. No hewɔ lɛ, enɛ biɔ tɔmɔi anɔkpɛlɛmɔ kɛ faikpamɔi yɛ mɛi enyɔ lɛ fɛɛ agbɛfaŋ.—11/1, baafa 4-7.
• Mɛni hewɔ asɔshwɛmɔ ehiii, kɛ́ shika ni akɛshwɛɔ lɛ faaa po lɛ?
Asɔshwɛmɔ baanyɛ atee henɔwomɔ, akaŋshii mumɔ, kɛ hiɛjoomɔ ni Biblia lɛ buɔ lɛ fɔ lɛ shi. (1 Korintobii 6:9, 10) Mɛi babaoo ni asɔshwɛmɔ eka amɛhe lɛ je shishi beni amɛdarako kɛtsɔ abasataa bibii ni amɛkɛ amɛhe wo mli lɛ nɔ.—11/1, baafa 31.
• Akɛni aŋmala Biblia mli woji lɛ babaoo yɛ Hela wiemɔ mli hewɔ lɛ, mɛni hewɔ ehe ebahia ni atsɔɔ Biblia lɛ shishi kɛya Hela wiemɔ mli, ni mɛni ejɛ mli kɛba?
Ŋmɛnɛŋmɛnɛ beaŋ Hela wiemɔ lɛ yɛ srɔto kwraa yɛ Hela wiemɔ ni akɛtsɔɔ Hebri Ŋmalɛi lɛ ashishi kɛtee Septuagint lɛ mli lɛ kɛ nɔ ni akɛtsɔɔ Kristofoi a-Hela Ŋmalɛi lɛ ashishi kɛtee mli lɛ he. Yɛ nyɛsɛɛ afii oha nɛɛ mli lɛ, aka shii abɔ akɛ aaatsɔɔ Biblia lɛ fã ko loo emuu lɛ fɛɛ shishi kɛya Hela ni awieɔ lɛ mli. Ŋmɛnɛ, ayɛ Biblia muu lɛ fɛɛ loo efã ko yɛ shishitsɔɔmɔi aaafee 30 mli ní Helanyo folo ko kɛkɛ baanyɛ akane ni enu shishi, ni enɛɛmɛi ateŋ ekome ni sa kadimɔ waa ji New World Translation of the Holy Scriptures, ni akala yɛ afi 1997 mli lɛ.—11/15, baafa 26-29.
• Mɛni hewɔ mlijaa nyɔŋma mli ekome hamɔ jeee Kristofoi ataomɔnii lɛ?
Yɛ Mla ni awo blema Israel lɛ shishi lɛ, atsɔɔ mlijaa nyɔŋma mli ekome hamɔ nɔ ayeɔ abuaa Levi akutso lɛ ni akɛkwɛɔ mɛi ni ehia amɛ lɛ. (3 Mose 27:30; 5 Mose 14:28, 29) Yesu afɔleshaa gbele lɛ gu Mla lɛ kɛ emlijaa nyɔŋma mli ekome taomɔnii lɛ. (Efesobii 2:13-15) Nɔkwɛmɔnɔ ni afee afɔ shi aha Kristofonyo fɛɛ Kristofonyo yɛ mra be mli asafo lɛ mli lɛ ji ní eha yɛ enyɛmɔ naa kɛ bɔ ni ekpɛ mli eto momo yɛ etsui mli. (2 Korintobii 9:5, 7)—12/1, baafa 4-6.
• Ani Kpojiemɔ 20:8 tsɔɔ akɛ yɛ naagbee kaa lɛ mli lɛ, Satan baashishiu gbɔmɛi ni fa babaoo?
Ŋmalɛ lɛ kɛɔ akɛ, mɛi ni abaashishiu amɛ lɛ ‘ayibɔ baatamɔ ŋshɔnaa shia.’ Yɛ Biblia lɛ mli lɛ, bei pii lɛ nakai wiemɔ lɛ tsɔɔ yibɔ ko ni aleee, ni kɔɔɔ fa ni efa babaoo lɛ he. Abraham seshi ní baatsɔ ‘tamɔ ŋshɔnaa shia’ lɛ, bafee mɛi 144,000 ní Yesu Kristo fataaa he. (1 Mose 22:17; Kpojiemɔ 14:1-4)—12/1, baafa 29.