‘Miishɛɛ Ji Gbɔmɔ ni Náa Nilee Lɛ’

EJI lalafolɔ, tsumalɔ, kɛ maŋtsɛ. Akɛni shika ni enáa daa afi lɛ fa fe dɔlai akpekpei 200 hewɔ lɛ, eyɛ nii fe maŋtsɛ fɛɛ maŋtsɛ ni ehi shikpɔŋ nɔ pɛŋ. Ale nuu lɛ hu waa yɛ enilee lɛ hewɔ. Maŋnyɛ ko ní basara lɛ lɛ naa ekpɛ ehe aahu akɛ ejaje akɛ: “Naa, jeee emli fã tete agba mi lɛ: onilee kɛ oshweremɔ lɛ fa aahu fe yijiemɔ ni minu lɛ tete.” (1 Maŋtsɛmɛi 10:4-9) Nɛkɛ ji bɔ ni Maŋtsɛ Salomo ni hi shi yɛ blema Israel lɛ shihilɛ ji.

Salomo yɛ nii kɛ nilee fɛɛ. Ni no ha ebafee mɔ ni sa ni eeenyɛ etsɔɔ enyɔ lɛ ateŋ nɔ ni he hiaa waa. Eŋma akɛ: “Ajɔɔ gbɔmɔ ni náa nilee kɛ gbɔmɔ ni náa jwɛŋmɔ! Ejaakɛ no namɔ hi fe jwiɛtɛi namɔ, ni emli sɛɛnamɔ lɛ fe shika krɔŋŋ. Ejara hu wa fe tɛŋɛlɛo, ni onii ni jara wa fɛɛ onyɛŋ okɛto he.”—Abɛi 3:13-15.

Shi kɛlɛ, nɛgbɛ abaanyɛ aná nilee yɛ? Mɛni hewɔ ejara wa fe ninamɔ lɛ? Mɛni ji ehe nibii ni gbalaa mɔ lɛ? Biblia mli Abɛi awolo, ni Salomo ŋma lɛ yitso 8 lɛ haa sanebimɔi nɛɛ ahetoo yɛ naakpɛɛ gbɛ nɔ. Awie nilee he yɛ jɛmɛ yɛ gbɔmɔ su mli, tamɔ nɔ ni ebaanyɛ ewie ni efee nii. Ni nilee diɛŋtsɛ jieɔ nɔ ni asumɔɔ yɛ ehe kɛ agbɛnɛ bɔ ni ejara wa ha lɛ kpo.

“Ebolɔɔ Gegeege”

Abɛi awolo lɛ, yitso 8 lɛ jeɔ shishi kɛ sanebimɔ ni akpaaa gbɛ akɛ abaaha hetoo akɛ: “Ani jeee bolɔmɔ nilee bolɔɔ lɛ, ni sanesɛɛkɔmɔ hu wóɔ egbee?”a Hɛɛ, nilee kɛ sanesɛɛkɔmɔ bolɔɔ, shi etamɔɔɔ yoo ajwamaŋ ni woɔ antɛo yɛ hei ni ewo duŋ, ni ewieɔ yakayaka wiemɔi ewoɔ oshija kɛ oblanyo ni nako niiashikpamɔ lɛ toi mli lɛ. (Abɛi 7:12) “Edamɔ hei grɔŋŋi lɛ ayiteaŋ, yɛ gbɛ lɛ he, yɛ ŋmaŋmashai lɛ; ebolɔɔ gegeege yɛ agbói lɛ anaa, yɛ maŋ lɛ klotia, yɛ shinaai lɛ ashi.” (Abɛi 8:1-3) Anuɔ nilee gbee ni wa lɛ jogbaŋŋ yɛ faŋŋ mli yɛ maŋ—yɛ agbói anaa, yɛ gbɛjegbɛi anɔ, maŋ agbói anaa. Gbɔmɛi baanyɛ anu nakai gbee lɛ amrɔ nɔŋŋ ni amɛkpɛlɛ nɔ.

Namɔ baanyɛ aje he ŋwane akɛ nilee ni Nyɔŋmɔ gbeyeishemɔ yɔɔ mli ni yɔɔ Nyɔŋmɔ Wiemɔ ni jɛ mumɔŋ, Biblia lɛ mli lɛ yɛ mɔ fɛɛ mɔ ni miisumɔ ni ená he sɛɛ lɛ dɛŋ yɛ shikpɔŋ nɔ? The World Book Encyclopedia lɛ kɛɛ akɛ: “Biblia lɛ ji wolo ni akane fe fɛɛ eko yɛ yinɔsane mli.” Ekɛfata he akɛ: “Aja Biblia lɛ babaoo fe woji krokomɛi fɛɛ ni yɔɔ. Atsɔɔ Biblia lɛ shishi shii babaoo, kɛtee wiemɔi babaoo hu mli, fe woji krokomɛi fɛɛ.” Akɛni atsɔɔ Biblia muu lɛ fɛɛ loo efãi komɛi ashishi kɛtee wiemɔi kɛ wiemɔi bibii ni fa fe 2,100 mli hewɔ lɛ, nɔ ní fe adesai aweku lɛ mlijaa oha mli 90 anine eshɛ, kɛ hoo lɛ, Nyɔŋmɔ Wiemɔ lɛ fã ko nɔ yɛ amɛ diɛŋtsɛ amɛwiemɔ mli.

Yehowa Odasefoi miijaje Biblia mli shɛɛ sane lɛ yɛ faŋŋ mli yɛ he fɛɛ he. Amɛkɛ ekãa miishiɛ Nyɔŋmɔ Maŋtsɛyeli lɛ he sanekpakpa lɛ ni amɛmiitsɔɔ anɔkwalei ni anaa yɛ Nyɔŋmɔ Wiemɔ lɛ mli yɛ shikpɔji 235 nɔ. Amɛjaa amɛwoji tɛtrɛbii ni damɔ Biblia lɛ nɔ, ni ji Buu-Mɔɔ ni akalaa yɛ wiemɔi 140 mli, kɛ Awake!, ni akalaa yɛ wiemɔi aaafee 83 mli lɛ ekomekomei ni fa fe akpekpei 20. Eka shi faŋŋ akɛ nilee miibolɔ waa yɛ maŋ lɛŋ!

“Gbɔmɛi Abii lɛ Miwoɔ Migbee Mihaa”

Nilee ni ejie ehe kpo yɛ gbɔmɔ su mli lɛ je shishi ni ebɔi wiemɔ, ekɛɛ: “Nyɛ hii, nyɛ mibolɔɔ mitsɛ́ɔ, ni nyɛ gbɔmɛi abii lɛ miwoɔ migbee mihaa. Nyɛ mɛi ni nyɛnáko jwɛŋmɔ, nyɛkasea hiɛtɛɛ, ni nyɛ kwashiai lɛ hu, nyɛnáa tsui ni kɔɔ sane sɛɛ!”—Abɛi 8:4, 5.

Nilee tsɛmɔ lɛ yɛ he fɛɛ he. Ekpãa eninefɔɔ lɛ mli ehaa adesai fɛɛ. Aafɔ̃ nine aaatsɛ mɛi ni nako jwɛŋmɔ lɛ po ni amɛná hiɛtɛɛ, loo hiɛshikamɔ, kɛ kwashiai ni amɛná sane shishinumɔ. Eji anɔkwale akɛ, Yehowa Odasefoi heɔ amɛyeɔ akɛ Biblia lɛ ji wolo kɛha gbɔmɛi fɛɛ moŋ, shi amɛkɛ hiɛaŋ ni akwɛɛɛ bɔɔ mɔdɛŋ ní amɛwo mɔ fɛɛ mɔ hewalɛ koni ekwɛ mli ni ená nilee wiemɔi ni yɔɔ mli lɛ.

‘Anɔkwale Jɛɔ Midaaŋ’

Beni nilee lɛɔ efaikpamɔ lɛ mli lɛ, etsa nɔ akɛ: “Nyɛboa toi, ejaakɛ mibawie wiemɔi ni he jaraa, ni minaa ní mibagbele nɛɛ, wiemɔi ni ja sɔŋŋ ni. Ejaakɛ anɔkwale baaje midaaŋ, ni minaabu miihi nifɔjianii. Midaaŋ wiemɔi lɛ fɛɛ lɛ jalɛ ni, emli eko eko bɛ ni ekɔ̃dɔ̃ loo eji kutumpɔo.” Hɛɛ, nilee tsɔɔmɔi lɛ hi ni eja, anɔkwale kɛ jalɛ ni. Kutumpɔo loo nɔ ko kɔ̃ɔdɔ̃ŋ bɛ amɛmli. “Fɛɛ kã shi faŋŋ ha mɔ ni kɔɔ sane sɛɛ, ni amɛja yɛ mɛi ni ená nilee lɛ ahiɛ.”—Abɛi 8:6-9.

Esa jogbaŋŋ akɛ nilee woɔ wɔ hewalɛ akɛ: “Nyɛmɔa mitsɔsemɔ lɛ moŋ mli, shi jeee jwiɛtɛi, kɛ nilee hu fe shika ni asha mli.” Jwɛŋmɔ yɛ nibimɔ nɛɛ mli, “ejaakɛ nilee hi fe tɛŋɛlɛo, ni nii ni jara wa fɛɛ anyɛŋ akɛto he.” (Abɛi 8:10, 11) Shi mɛni hewɔ? Mɛni haa nilee jara waa babaoo fe ninamɔ lɛ?

“Miyibii lɛ Hi Fe Shika”

Nikeenii ni nilee kɛhaa mɔ ni boɔ lɛ toi lɛ jara wa fe shika, jwiɛtɛi, loo tɛŋɛlɛo. Beni nilee tsɔɔ nɔ ni nikeenii nɛɛ ji lɛ, etsɔɔ mli akɛ: “Mi, nilee, mikɛ hiɛtɛɛ yɔɔ, ni miyɛ sɛɛyoomɔ kɛ jwɛŋmɔ kpakpa. Yehowa gbeyeishemɔ ji akɛ anyɛ̃ efɔŋ; hewoo kɛ hetsɔ̃ɔmɔ kɛ jeŋba fɔŋ kɛ kutumpɔo naabu lɛ miinyɛ̃.”—Abɛi 8:12, 13.

Nilee kɛ hiɛtɛ̃ɛ kɛ jwɛŋmɔ haa mɔ ni yɔɔ lɛ. Gbɔmɔ ni yɔɔ nilee ni Nyɔŋmɔ gbeyeishemɔ yɔɔ mli lɛ hu yɛ bulɛ kɛ woo kɛha Nyɔŋmɔ ejaakɛ “Yehowa gbeyeishemɔ ji nilee shishijee.” (Abɛi 9:10) No hewɔ lɛ, enyɛ̃ɔ nɔ ni Yehowa nyɛ̃ɔ. Anaaa hewoo, henɔwomɔ, jeŋba shara, kɛ wiemɔ shara yɛ emli kwraa. Efɔŋ ni enyɛ̃ɔ lɛ buɔ ehe kɛjɛɔ hewalɛ ni ekɛaatsu nii yɛ pɛsɛmkunya gbɛ nɔ lɛ he. Kwɛ bɔ ni ehe hiaa akɛ mɛi ni hiɛ hegbɛi ni gbɛnaa nii yɔɔ mli yɛ Kristofoi asafo lɛ mli, kɛ agbɛnɛ hu weku yitsei lɛ atao nilee!

Nilee tsaa nɔ akɛ: “Minɔ ji ŋaawoo kɛ shweremɔ; miji sanesɛɛkɔmɔ, hewalɛ lɛ minɔŋ. Minɔ maŋtsɛmɛi tsɔɔ yeɔ maŋtsɛ, ni lumɛi woɔ mla yɛ jalɛ naa. Minɔ lumɛi tsɔɔ yeɔ lumɛi, kɛ abladei kɛ shikpɔŋ lɛ nɔ kojolɔi fɛɛ.” (Abɛi 8:14-16) Nɔ ni fata nilee yibii he ji sɛɛyoomɔ, sane shishinumɔ, kɛ hewalɛ—nibii ni he hiaa nɔyelɔi, maŋ onukpai kɛ lumɛi babaoo lɛ. Nilee he miihia mɛi ni yɔɔ nɔkwɛmɔ hegbɛ mli kɛ mɛi ni woɔ mɛi krokomɛi ŋaa lɛ.

Anɔkwale nilee yɛ kɛha mɛi fɛɛ, shi jeee mɔ fɛɛ mɔ naa. Mɛi komɛi kpoɔ loo amɛkuɔ amɛhiɛ amɛshwieɔ nɔ kɛji akɛyaha amɛ yɛ amɛshiai amli po. Nilee kɛɛ akɛ: “Misumɔɔ mɛi ni sumɔɔ mi, ni mɛi ni jɛɔ mra taoɔ misɛɛgbɛ lɛ, amɛaana mi.” (Abɛi 8:17) Nilee yɛ kɛha mɛi pɛ ni taoɔ kɛ hehiamɔ lɛ.

Nilee gbɛ̀i lɛ ja. Ewoɔ mɛi ni taoɔ lɛ lɛ nyɔmɔ. Nilee kɛɛ akɛ: “Nii kɛ anunyam yɛ midɛŋ, nii ni tsɛɔ kɛ jalɛ fɛɛ. Miyibii lɛ hi fe shika, fe shika ŋmiiŋmi, ni minibaanii lɛ fe jwiɛtɛi krɔŋŋ. Jalɛ gbɛ lɛ nɔ minyiɛɔ, yɛ kojomɔ tempɔŋi lɛ ateŋ, koni maha mɛi ni sumɔɔ mi lɛ aye gboshinii, ni mawo amɛnitoohei lɛ obɔbɔ.”—Abɛi 8:18-21.

Kɛfata sui kpakpai kɛ kadimɔ nii tamɔ hiɛtɛɛ, jwɛŋmɔ, heshibaa, sɛɛyoomɔ, nilee, kɛ sane shishinumɔ he lɛ, nilee nikeenii lɛ ekomɛi hu ji ninamɔ kɛ hiɛnyam. Gbɔmɔ ni le nii lɛ baanyɛ aná nii yɛ jalɛ gbɛ nɔ, ni ebaaya hiɛ yɛ mumɔŋ. (3 Yohane 2) Nilee hu haa gbɔmɔ hiɛ baa nyam. Kɛfata he lɛ, etsui nyɔɔ emli yɛ nɔ ni enáa lɛ he, ni enáa jwɛŋmɔ toiŋjɔlɛ kɛ henilee kpakpa yɛ Nyɔŋmɔ hiɛ. Hɛɛ, miishɛɛ ji mɔ ni ená nilee. Eji anɔkwale akɛ yibii ni nilee woɔ lɛ hi fe shika ŋmiiŋmi kɛ jwiɛtɛi krɔŋŋ.

Kwɛ bɔ ni ŋaawoo nɛɛ yɔɔ ebe naa kɛha wɔ, akɛni wɔyɔɔ heloonaa nibii asɛɛtiumɔ jeŋ nɛɛ mli, heni amaa nii ni aaana kɛtsɔ gbɛ fɛɛ gbɛ nɔ lɛ nɔ mi lɛ hewɔ lɛ! Eba akɛ wɔhiɛ kpaŋ bɔ ni nilee jara wa ha lɛ nɔ kɔkɔɔkɔ loo wɔbaatsɔ gbɛ ni ejaaa nɔ kɛná nii. Nyɛkahaa wɔkua wɔhiɛ wɔshwieɔ nibii ni haa wɔnáa nilee lɛ anɔ kɔkɔɔkɔ—ni ji wɔ Kristofoi akpeei, kɛ wɔteemɔŋ nikasemɔ yɛ Biblia lɛ kɛ woji ni “tsulɔ anɔkwafo kɛ nilelɔ” lɛ kɛhaa lɛ amli—yɛ heloonaa nii ni wɔtaoɔ wɔná kɛkɛ lɛ hewɔ.—Mateo 24:45-47.

“Aŋɔ Mi Ata nɔ Kɛjɛ Naanɔ Beebe”

Nilee ni ejie ehe kpo yɛ gbɔmɔ su mli ni anaa yɛ Abɛi awolo lɛ yitso 8 lɛ jeee gbɛ kɛkɛ ni atsɔɔ nɔ atsɔɔ nibii ni emuuu lɛ amli kɛkɛ. Ekɔɔ Yehowa nibɔɔ nii ni he hiaa fe fɛɛ lɛ hu he yɛ mfonirifeemɔŋ. Nilee yaa nɔ ekɛɔ akɛ: “Yehowa kɛ mi fee egbɛ lɛ shishijelɔ dani ebɔi eblema nitsumɔi lɛ. Aŋɔ mi ata nɔ kɛjɛ naanɔ beebe, kɛjɛ shishijee, dani shikpɔŋ lɛ ba. Beni bui ni mli kwɔlɔ lɛ bɛ lɛ, afɔ mi; beni bui ni baa nu babaoo lɛ bɛ lɛ. Afɔ mi dani aŋɔ gɔji lɛ amamɔ shi, dani gɔŋkpɔi lɛ ba, beni enako efee shikpɔŋ kɛ ŋa kɛ je lɛŋ mlu lɛ.”—Abɛi 8:22-26.

Kwɛ bɔ ni nɔ ni awie yɛ nilee ni ejie ehe kpo yɛ gbɔmɔ su mli nɛɛ kɛ bɔ ni awie “wiemɔ lɛ” he yɛ Ŋmalɛi lɛ amli lɛ kpãa gbee ha! Bɔfo Yohane ŋma akɛ: “Shishijee mli lɛ Wiemɔ lɛ yɛ, ni Wiemɔ lɛ kɛ Nyɔŋmɔ yɔɔ, ni Wiemɔ lɛ ji nyɔŋmɔ ko.” (Yohane 1:1, NW) Nilee ni ejie ehe kpo yɛ gbɔmɔ su mli lɛ damɔ shi kɛha Nyɔŋmɔ Bi, Yesu Kristo, yɛ eshihilɛ dani ebatsɔ gbɔmɔ lɛ mli yɛ mfonirifeemɔŋ.b

Yesu Kristo ji “bɔɔ nii fɛɛ ateŋ kromɔ bi lɛ. Ejaakɛ emli abɔ nii fiaa yɛ, nii ni yɔɔ ŋwɛi kɛ nii ni yɔɔ shikpɔŋ lɛ nɔ, nii ni anaa kɛ nii ni anaaa.” (Kolosebii 1:15, 16) Nilee ni ejie ehe kpo yɛ gbɔmɔ su mli lɛ tsa nɔ akɛ: “Beni [Yehowa] esaa ŋwɛi lɛ, miyɛ jɛi, beni esaa bu kwɔŋkwɔŋ lɛ yi kɛbɔleɔ lɛ, beni eŋɔ atatui lɛ esɛŋ shi shiŋŋ yɛ ŋwɛi, ni etsi bu kwɔŋkwɔŋ lɛ mli nu ni baa lɛ naa lɛ, beni efo husu ewo ŋshɔ lɛ he, ni nui lɛ akatɔ ekita lɛ nɔ, beni eto shikpɔŋ lɛ shishi lɛ: no mli lɛ miyɛ emasɛi akɛ ŋaalɔ; ni mimii shɛɔ mihe daa, mishwɛɔ yɛ ehiɛ be fɛɛ be, mishwɛɔ yɛ eshikpɔŋ lɛ nɔ, ni mináa gbɔmɛi abii ahe miishɛɛ.” (Abɛi 8:27-31) Yehowa kromɔ Bi lɛ yɛ e-Tsɛ masɛi, ní ekɛ lɛ miitsu nii kɛ ekãa—ŋwɛi kɛ shikpɔŋ Bɔlɔ ni anyɛŋ akɛ mɔ ko ato ehe lɛ. Beni Yehowa Nyɔŋmɔ bɔ klɛŋklɛŋ adesai enyɔ lɛ, E-Bi nuu lɛ fata ehe yɛ nakai nitsumɔ lɛ mli akɛ Nitsulɔ Nukpa. (1 Mose 1:26) Ŋwanejee ko bɛ he akɛ, no hewɔ ni Nyɔŋmɔ Bi lɛ yɔɔ adesai ahe miishɛɛ waa ni esumɔɔ amɛsane hu po lɛ!

“Ajɔɔ Gbɔmɔ ni Boɔ Mi Toi”

Ákɛ nilee ni ejie ehe kpo yɛ gbɔmɔ su mli lɛ, Nyɔŋmɔ Bi lɛ kɛɛ akɛ: “No hewɔ lɛ, mibii, nyɛboa mi toi! Ejaakɛ ajɔɔ mɛi ni nyiɛɔ migbɛi lɛ anɔ lɛ! Nyɛboa tsɔsemɔ toi ni nyɛle nii, ni nyɛkakwaa lɛ kwraa! Ajɔɔ gbɔmɔ ni boɔ mi toi ni ebuɔ migbói lɛ anaa daa ni emɛɔ yɛ mishinaatsei lɛ ahe lɛ. Ejaakɛ mɔ ni aaaná mi lɛ, ená wala, ni ehiɛ aaaba nyam yɛ Yehowa hiɛ. Shi mɔ ni nine shɛɛɛ minɔ lɛ, eewa lɛ diɛŋtsɛ esusuma yi; mɛi fɛɛ ni nyɛ̃ɔ mi lɛ, amɛmiisumɔ gbele.”—Abɛi 8:32-36.

Yesu Kristo ji Nyɔŋmɔ nilee lɛ kpojiemɔ diɛŋtsɛ. “Mɔ mli ni aŋɔ ŋaa kɛ nilee jwetrii lɛ fɛɛ atee yɛ lɛ.” (Kolosebii 2:3) Belɛ, nyɛhaa wɔboa lɛ toi jogbaŋŋ, ni wɔnyiɛ enanemaahei lɛ asɛɛ kpaakpa. (1 Petro 2:21) Kɛji wɔkpoo lɛ lɛ, no lɛ wɔmiifee wɔsusuma efɔŋ ni wɔmiisumɔ gbele, ejaakɛ “yiwalaheremɔ bɛ mɔ ko mɔ ko mli.” (Bɔfoi lɛ Asaji 4:12) Belɛ, nyɛhaa wɔkpɛlɛa Yesu nɔ akɛ mɔ ni Nyɔŋmɔ kɛha, kɛha wɔyiwalaheremɔ. (Mateo 20:28; Yohane 3:16) No lɛ, wɔbaaná miishɛɛ ni baa kɛjɛɔ ‘wala ní aaaná kɛ Yehowa hiɛ nyam ni aaaná lɛ’ mli lɛ mli ŋɔɔmɔ.

[Shishigbɛ niŋmai]

[Mfonirii ni yɔɔ baafa 26]

Nilee he miihia mɛi ni yɔɔ nɔkwɛmɔ gbɛhei amli lɛ

[Mfonirii ni yɔɔ baafa 27]

Kaaku ohiɛ oshwie nibii ni haa anáa nilee lɛ nɔ