Yaa Nɔ Otao Tamɔ Jwetrii Ni Aŋɔtee
KWƐ bɔ ni nilee ni anaa yɛ Nyɔŋmɔ Wiemɔ ni ji Biblia lɛ mli lɛ ji jwetrii ni anyɛŋ akɛ shika ahe! Nɛkɛ Ojarawa tɛi nɛɛ jieɔ ŋwɛi yiŋtoo lɛ kpo ni ekɛ egbɛkpamɔi ni yɔɔ miishɛɛ mamɔɔ wɔhiɛ. Amɛkɛ miishɛjemɔ haa wɔ ni amɛtsɔɔ wɔ gbɛ ni wɔɔtsɔ nɔ wɔsa Nyɔŋmɔ hiɛ. (Romabii 15:4) Nɛkɛ ojarawa tɛi nɛɛ hu yeɔ buaa wɔ ni wɔfeɔ wɔnii yɛ nilee mli yɛ be mli ni wɔkɛ mɛi krokomɛi yeɔ lɛ. Yɛ anɔkwale mli lɛ, nilee ni jɛ ŋwɛi lɛ yeɔ ebuaa wɔ koni wɔnyiɛ “yɛ wala gbɛ lɛ nɔ” kɛ tsui ni nyɔɔ mɔ mli kɛ miishɛɛ.—Lala 16:11; 119:105.
Akɛni nilee mli sɛɛnamɔi lɛ fa babaoo hewɔ lɛ, esa akɛ wɔbu lɛ akɛ nɔ ko ni jara wa waa. Nilee ni etsɔ ehe gbɔmɔ lɛ kɛɛ: “Midaaŋ wiemɔ fɛɛ lɛ jalɛ ni, emli eko eko bɛ ni ekɔdɔ loo eji kutumpɔo. Fɛɛ ka shi faŋŋ ha mɔ ni kɔɔ sane sɛɛ, ni amɛja yɛ mɛi ni ena nilee lɛ ahiɛ. Nyɛmɔa mitsɔsemɔ lɛ moŋ mli, shi jeee jwiɛtɛi, kɛ nilee hu fe shika ni asha mli. Ejaakɛ nilee hi fe tɛŋɛlɛo, ni nii ni jara wa fɛɛ anyɛŋ akɛto he.”—Abɛi 8:8-11.
Mɛni Hewɔ Esa Akɛ Oya Nɔ Otao?
Wɔle akɛ sɛɛnamɔ bɛ taomɔ ni ataoɔ ojarawa tɛi, shika, loo jwɛitɛi ni afu yɛ shikpɔŋ lɛ he. Shi esaaa akɛ enɛ baa lɛ nakai yɛ ŋwɛi nilee he. Shi mɛɛ gbɛ nɔ wɔɔtsɔ koni wɔye omanye yɛ enɛ mli? Ojogbaŋŋ, omanyeyeli lɛ damɔ bɔ ni wɔshweɔ jwetri ni tamɔ nɛkɛ jogbaŋŋ kɛ bɔ ni wɔtsuɔ he nii waa bɔni afee ni wɔna lɛ nɔ. Kɛ wɔyɔse bɔ ni ejara wa ha diɛŋtsɛ lɛ, wɔbaasumɔ enɛ fe nibii krokomɛi ni jara wa fɛɛ. Yɛ fɛɛ sɛɛ lɛ, “kɛ ona nilee lɛ, ehi aahu fe shika, ni kɛ ona sanesɛɛkɔmɔ lɛ, ehi fe jwiɛtɛi!”—Abɛi 16:16.
Abɛi 2:1-6 woɔ hewalɛ akɛ: “Mibi, kɛ omɔ miwiemɔi lɛ amli, ni okɛ mikitai lɛ to omasɛi, koni oba otoi shi oha nilee, ni okɛ otsui ha sɛnesɛɛkɔmɔ; hɛɛ, kɛ obolɔ otsɛ sɛɛyoomɔ ni owo ogbee nɔ oha sane shishinumɔ, kɛji otao esɛɛ gbɛ tamɔ jwiɛtɛi, ni otao tamɔ jwetri ni aŋɔtee lɛ: No dani ooonu Yehowa gbeyeishemɔ shishi, ni ooona Nyɔŋmɔ he nilee. Ejaakɛ Yehowa haa aleɔ nii, ni edaaŋ nilee kɛ sanesɛɛkɔmɔ jɛɔ.”
Akɛni aŋɔ jwetrii atee loo afu yɛ shikpɔŋ hewɔ lɛ, ehe miihia ni otao. Shi yɛ be mli ni amɛtsaa shi lɛ, mɛi komɛi kɛ hiɛtserɛjiemɔ be, niyeli be, kɛ wɔ ni amɛaawɔ tete shaa afɔle. Shi amɛbuɔ nɛkɛ mɔdɛŋbɔɔ nɛɛ akɛ esa kɛji akɛ amɛna jwetri lɛ. Ehe miihia ni wɔ hu wɔsha afɔlei ni tamɔ nakai nɔŋŋ ni wɔkɛtao Nyɔŋmɔ nilee. Taakɛ bɔ ni jwetri ni afu yɛ shikpɔŋ lɛ biɔ shitsaa kɛ hewalɛ lɛ, nakai nɔŋŋ nilee taomɔ biɔ hekamɔ kɛ tsuishiŋmɛɛ. Efaaa kɛkɛ akɛ mɔ ko aaagbele Biblia lɛ kɛ Kristofoi awoji lɛ abaafai lɛ kɛkɛ. Be, nibii amli taomɔ, kɛ enɔ jwɛŋmɔ he miihia kɛji akɛ mɔ ko aaana mumɔŋ ojarawa tɛi. Shi mɛɛ miishɛɛ enɛ ji be mli ni wɔnuɔ Ŋmalɛi lɛ ashishi lɛ—Nehemia 8:13.
Jwetri-Taomɔ ni Yeɔ Omanye
Hɛɛ, miishɛɛ jɛɔ Nyɔŋmɔ Wiemɔ lɛ mli taomɔ kɛ nilee ni tamɔ ojarawa tɛi ni anaa lɛ mli baa. (Abɛi 3:13-18) Yɛ enɛ hewɔ lɛ, wɔbatsɔmɔɔ nilelɔi kɛji akɛ wɔna wɔ diɛŋtsɛ loo weku wojiatoo he ni sa. Shi mɛni esa akɛ ehi enɛ mli? Kɛfata wiemɔi komekomei ashishitsɔɔmɔ wolo he lɛ, Yehowa Odasefoi naa akɛ sɛɛnamɔ yɛ he kɛji akɛ wɔna Ŋmalɛi lɛ ashishitsɔɔmɔi sɔrɔtoi, kɛ Kristofoi awoji ni adamɔ Biblia lɛ nɔ aŋmala, kɛ Buu-Mɔɔ lɛ kɛ ehefatalɔ ni ji Awake! lɛ afi fɛɛ afi nɔ lɛ. Ni kɛlɛ, esa akɛ akɛ wojiatoo he ni tamɔ nɛkɛ atsu nii yɛ gbɛ ni sa nɔ koni eye ebua wɔ akɛ jwetri-taolɔi.
Yɛ nilee ni wɔtaoɔ lɛ mli lɛ, wɔbaanyɛ wɔkwɛ Watch Tower Publications Index lɛ mli yɛ saji komekomei ni ato naa kɛ Ŋmalɛi sɔrɔtoi ni ato naa yɛ afa gbɛ lɛ aloo Buu Mɔɔ Asafo lɛ woji loo woji tɛtrɛbii ni afee lɛ kpo lɛ amli yɛ emli saji ni ato naa lɛ baafai lɛ. Enɛɛmɛi ji dɛŋdadei ni akɛtaoɔ ŋwɛi nilee. Yɛ anɔkwale mli lɛ, amɛtamɔ shikpɔŋ he mfoniri ni baanyɛ anyiɛ wɔhiɛ kɛya ŋwɛi nilee ni ji “jwetri ni aŋɔtee” lɛ he. (Abɛi 2:4) Kɛ wɔbɛ woji komɛi ni wɔkɛaatao saji amli lɛ, wɔbaanyɛ wɔna enɛ yɛ Yehowa Odasefoia Maŋtsɛyeli Asa lɛ nɔ.
Agbɛnɛ, nyɛhaa wɔfea jwetri taomɔ ni yeɔ omanye lɛ he nɔkwɛmɔ nɔ. Kɛ wɔmiikane Biblia lɛ, wɔbaanyɛ wɔsusu gbɛ ni Yuda Iskariot tsɔ nɔ egbo lɛ he yɛ be mli ni etsɔɔ Yesu Kristo sɛɛ gbɛ lɛ. Mateo 27:5 kɛɔ akɛ Yuda “yiŋ etee ni eyawo esɛ̃ kpaa.” Shi Bɔfoi lɛ Asaji 1:18 kɛɔ akɛ: “Eyama eyi shi, ni emli gba enyɔ ni emli nii fɛɛ tue shwie shi.” No hewɔ lɛ mɛɛ gbɛ nɔ Yuda tsɔ ni egbo? Abaanyɛ ana enɛ hetoo kɛ akwɛ ŋmalɛi ni ato naa “Scripture Index” yɛ wolo ni ji Insight on the Scriptures lɛ mli lɛ shishi lɛ. Ekɛɔ wɔ akɛ: “Etamɔ nɔ ni Mateo miiwie gbɛ ni etsɔ nɔ egbe ehe lɛ he, yɛ be mli ni Bɔfoi lɛ Asaji lɛ hu miitsɔɔ nɔ ni jɛ mli ba lɛ. Kɛ akɛ saji enyɔ nɛɛ fɛɛ to he lɛ, etamɔ nɔ ni Yuda bɔ mɔdɛŋ koni esɛŋ ehe yɛ tɛsaa ko naabu, shi kpaa lɛ tse loo tso nine lɛ ku no hewɔ lɛ ejɛ ŋwɛi ebagbee tɛsaa lɛ nɔ ni emli nii lɛ fɛɛ tue kɛjɛ emli kɛshwie shi. Etamɔ nɔ ni shikpɔŋ he mfoniri ni ebɔle Yerusalem he kɛkpe lɛ haa nifeemɔ ni tamɔ nɛkɛ feɔ nɔ ni baanyɛ aba.” (Kpo 2, baafa 130) Yɛ Insight on the Scriptures lɛ he lɛ, ofainɛ kwɛmɔ wolo tɛtrɛɛ nɛɛ baafa 10.
Concordance hu ni akɛtsuɔ nii lɛ nyɛɔ eyeɔ ebuaa wɔ ni wɔnaa Biblia mli ŋmalɛi. Shi kɛ wɔmiisusu ŋmalɛ ko he lɛ, esa akɛ wɔsusu emli saji lɛ fɛɛ he. Akɛ nɔkwɛmɔ nɔ lɛ, nyɛhaa wɔsusua Lala 144:12-14 he. Nɛkɛ kukuji nɛɛ miitsɔɔ akɛ mɛi komɛi kɛɔ akɛ: ‘Wɔbihii lɛ tamɔ tsei ni atɛo, ni wɔbiyei tamɔ koŋtɛi ni ako yɛ maŋtsɛmɛi amɔɔ he, wɔ aboŋoi eyimɔ, wɔtooi efa amɛtsɔmɔ akpekpei abɔ, wɔtsinai hu shrakeee.’ Obaasusu akɛ nɛkɛ kukuji nɛɛ kɔɔ Nyɔŋmɔ webii ahe, shi kɛ osusu emli saji lɛ fɛɛ he lɛ, ekɔɔɔ amɛhe. Yɛ kuku 11 lɛ, Lalatsɛ David kpa fai koni ajie lɛ kɛjɛ mɛi ni ewieee anɔkwale lɛ adɛŋ. Amɛshwaa yɛ amɛbihii, amɛbiyei, amɛtoi kɛ amɛtsinai ahe. Taakɛ kuku 15 tsɔɔ lɛ, nɛkɛ mɛi fɔji nɛɛ kɛɔ akɛ: “Ajɔɔ maŋ ni yɔɔ nɛkɛ lɛ!” Shi nɔ ni tamɔɔɔ nakai lɛ, David bo akɛ: “Ajɔɔ maŋ ni Yehowa ji e-Nyɔŋmɔ lɛ!”
Mumɔŋ Ojara Wa Tɛi Babaoo Yɛ!
Eka shi faŋŋ akɛ miishɛɛ baa kɛjɛɔ omanye ni ayeɔ yɛ nilee taomɔ mli lɛ mli. Ni abaanyɛ ana mumɔŋ ojarawa tɛi kɛtsɔ nibii amlipɛimɔ jogbaŋŋ ni Biblia mli sanebimɔi ahetoo ni haa mɔ tsui nyɔɔ emli fata he lɛ anɔ. Mɛɛ hetoi po wɔɔna nɛkɛ kɛji akɛ wɔtee nɔ wɔtao lɛ! Akɛ nɔkwɛmɔ nɔ lɛ, nɛgbɛ ji he ni Kain na eŋa lɛ kɛjɛ? October 1, 1981 Watchtower lɛ kɛɛ: “Biblia lɛ kɛɔ wɔ akɛ Adam kɛ Hawa na bii, jeee mɛi enyɔ [Kain kɛ Habel] pɛ. ‘Gbii ni Adam ye yɛ be mli ni efɔ Seth [binuu kroko] lɛ sɛɛ lɛ fɛɛ fee afii ohai kpaanyɔ. Yɛ no sɛɛ lɛ ebatsɔ tsɛ kɛha bihii kɛ biyei.’ (1 Mose 5:4) Yɛ nɛkɛ sane nɛɛ hewɔ lɛ, nɛgbɛ ji he ni obaakɛɛ akɛ Kain na eŋa lɛ kɛjɛ? Hɛɛ, ekɛ enyɛmimɛi lɛ ateŋ mɔ kome bote gbalashihilɛ mli. Ŋmɛnɛ, enɛ baafee oshara aha gbɛkɛbii ni amɛfɔlɔi bɛŋkɛ amɛhe kpaakpa nɛkɛ lɛ. Shi yɛ adesa yinɔsane shishijee, beni adesai bɛŋkɛ emuuyeli he kpaakpa lɛ, ebafeee naagba.”
Ŋɔɔ lɛ akɛ wɔmiikane Biblia mli wolo ni ji Abɛi lɛ. Beni wɔkadi nɔ ni ekɛɛ yɛ Abɛi 1:7 lɛ, wɔbaanyɛ wɔsusu akɛ: ‘Mɛni ji “Yehowa gbeyeishemɔ”?’ Nibii amlipɛimɔ kɛwɔ baaya May 15, 1987 Watchtower lɛ mli, ni enɛ kɛɔ akɛ: “Eji woo loo bulɛ ni gbeyeishemɔ yɔɔ mli, mɛi ni sumɔɔɔ ni ana amɛ akɛ mɛi ni esaaa yɛ ehiɛ lɛ he gbeyeishemɔ ni sa ejaakɛ wɔhiɛ sɔɔ eduromɔ kɛ emlihilɛ lɛ. ‘Yehowa gbeyeishemɔ’ tsɔɔ akɛ ni wɔɔkpɛlɛ nɔ akɛ lɛ ji Jeŋ Muu Fɛɛ Kojolɔ kɛ Ofe, mɔ ni yɔɔ hegbɛ kɛ hewalɛ ni ekɛ toigbalamɔ loo gbele aaaba mɛi ni gboɔ enɔ toi lɛ anɔ. Etsɔɔ hu akɛ ni wɔɔsɔmɔ Nyɔŋmɔ yɛ anɔkwayeli mli ni wɔkɛ wɔhe afɔ enɔ kwraa ni wɔnyɛ nɔ ni esaaa yɛ ehiɛ lɛ.”
Yaa nɔ Otao!
Akalaa Buu-Mɔɔ lɛ koni eye ebua mɛi ni kɛ anɔkwayeli taoɔ nilee lɛ koni amɛna mumɔŋ ojarawa tɛi ni jara wa tsɔ fe bɔ ni shika aaanyɛ ahe. Nilee kɛ sane shishinumɔ ni jɛ Nyɔŋmɔ Wiemɔ lɛ mli lɛ he miihia wɔ fɛɛ. Abɛi 4:7, 8 kɛɔ akɛ: “Nilee shishijee ji akɛ: Otao nilee ni okɛ onii ni ona lɛ fɛɛ atao sanesɛɛkɔmɔ! Buu lɛ, ni eeewo onɔ; kɛ oloo lɛ atuu lɛ, eeewo ohiɛ nyam.
Kɛ wɔnu Ŋmalɛi lɛ ashishi ni wɔkɛ nilee tsu nii yɛ gbɛ ni ja nɔ pɛ wɔɔtsɔ ni wɔna anɔkwale miishɛɛ. Hɛɛ, kɛ agbɛnɛ ŋwɛi nilee ni wɔkɛaatsu nii lɛ pɛ nɔ wɔɔtsɔ ni wɔsa Yehowa Nyɔŋmɔ hiɛ. No hewɔ lɛ kaaha nɔ ko nɔ ko miitsi onaa yɛ nilee ni oootao tamɔ jwetrii ni aŋɔtee lɛ mli.
[Mfonirii ni yɔɔ baafa 4, 5]
Jwetrii ni aŋɔtee loo afu yɛ shikpɔŋ Iɛ biɔ shitsaa kɛ hewalɛ. Ani esaaa akɛ wɔmiaa wɔhiɛ ni wɔyaa nɔ yɛ ŋwɛi nilee taomɔ mli?