Hii Shi Shweshweeshwe akɛ Nyɔŋmɔ Gbɛjianɔtoo lɛ Mlinyo
“Mɔɔ ni wa ji Yehowa gbɛi lɛ; no mli jalɔ sháa foi kɛyaa, ni ehiɔ shi shweshweeshwe.”—ABƐI 18:10.
1. Taakɛ Yesu sɔlemɔ lɛ ji lɛ, mɛɛ jaramɔ shihilɛ Kristofoi yɔɔ mli?
BENI eshwɛ fioo ní ebaagbo lɛ, Yesu sɔle eha eŋwɛi Tsɛ lɛ yɛ esɛɛnyiɛlɔi lɛ ahewɔ. Ekɛ suɔmɔ kɛ mɔ hesusumɔ kɛɛ akɛ: “Miŋɔ owiemɔ lɛ miha amɛ, ni je lɛ miinyɛ amɛ, ejaakɛ amɛjɛɛɛ je lɛ mli, taakɛ bɔ ni mi hu mijɛɛɛ je lɛ mli lɛ. Mibiii akɛ ojie amɛ kɛjɛ je lɛ mli, shi moŋ akɛ obu amɛhe yɛ efɔŋ lɛ mli.” (Yohane 17:14, 15) Yesu le akɛ je lɛ baafee he ko ni yɔɔ oshara kɛha Kristofoi. Ebaajie nyɛɛ ni eyɔɔ kɛha amɛ lɛ kpo kɛtsɔ amɛhe amale wiemɔi kɛ yiwaa ni ekɛaaba amɛnɔ lɛ nɔ. (Mateo 5:11, 12; 10:16, 17) Ebaafee fitemɔ jɛɛhe hu.—2 Timoteo 4:10; 1 Yohane 2:15, 16.
2. Nɛgbɛ Kristofoi baanyɛ aná mumɔŋ shweshweeshwe shihilɛ yɛ?
2 Mɛi ni feɔ jeŋ ni baanyɛ Kristofoi lɛ ji mɛi ni etsi amɛhe kɛjɛ Nyɔŋmɔ he, ní amɛyɔɔ Satan kudɔmɔ shishi lɛ. (1 Yohane 5:19) Nɛkɛ jeŋ nɛɛ da kwraa fe Kristofoi asafo lɛ, ni Satan diɛŋtsɛ hu he wa kwraa fe adesa fɛɛ adesa. No hewɔ lɛ, je lɛ nyɛɛ lɛ ji hegbeyeiwoo nɔ diɛŋtsɛ. Nɛgbɛ Yesu sɛɛnyiɛlɔi lɛ baaná mumɔŋ shweshweeshwe shihilɛ yɛ? Wiemɔ ko ni je kpo yɛ December 1, 1922, The Watchtower lɛ mli lɛ tsɔɔ hetoo lɛ akɛ: “Amrɔ nɛɛ wɔyɛ gbi fɔŋ lɛ mli. Tawuu lɛ miiya nɔ yɛ Satan gbɛjianɔtoo lɛ kɛ Nyɔŋmɔ gbɛjianɔtoo lɛ teŋ. Eji ta ni aawuu kɛ hiɛdɔɔ diɛŋtsɛ.” Nyɔŋmɔ gbɛjianɔtoo lɛ ji mumɔŋ shweshweeshwefeemɔhe, yɛ nɛkɛ ta nɛɛ mli. Wiemɔ “gbɛjianɔtoo” lɛ ejeee kpo yɛ Biblia lɛ mli, ni mra mli yɛ 1920 afii lɛ amli tɔ̃ɔ lɛ, no mli lɛ wiemɔ “Nyɔŋmɔ gbɛjianɔtoo” lɛ ji wiemɔ hee. Belɛ, mɛni ji nɛkɛ gbɛjianɔtoo nɛɛ? Ni mɛɛ gbɛ nɔ wɔɔtsɔ wɔná hebuu yɛ mli?
Yehowa Gbɛjianɔtoo Lɛ
3, 4. (a) Taakɛ wiemɔi komekomei ashishitsɔɔmɔ wolo ko kɛ Buu-Mɔɔ lɛ tsɔɔ mli lɛ, mɛni ji gbɛjianɔtoo? (b) Abaanyɛ atsɛ Yehowa Odasefoi amajimaji ateŋ naanyobɔɔ lɛ akɛ gbɛjianɔtoo yɛ mɛɛ shishinumɔ naa?
3 Gbɛjianɔtoo ji “kuu ko ni ato amɛ gbɛjianɔ,” taakɛ Concise Oxford Dictionary lɛ tsɔɔ shishi lɛ. Beni no yɔɔ wɔjwɛŋmɔ mli lɛ, wɔnuɔ shishi akɛ akɛni bɔfoi lɛ to klɛŋklɛŋ afii oha lɛ mli Kristofoi lɛ ahe gbɛjianɔ amɛwo asafoi amli yɛ nɔyeli kuu ni yɔɔ Yerusalem lɛ nɔkwɛmɔ shishi hewɔ lɛ, eja gbɛ akɛ aaawie nakai ‘nyɛmimɛi asafo’ lɛ he akɛ gbɛjianɔtoo. (1 Petro 2:17) Yehowa Odasefoi yɛ asafo gbɛjianɔtoo ni tamɔ nakai nɔŋŋ ŋmɛnɛ. Awo ekomefeemɔ ni hi shi yɛ klɛŋklɛŋ afii oha lɛ mli kuu lɛ mli lɛ mli hewalɛ kɛtsɔ ‘gbɔmɛi ateŋ nikeenii,’ tamɔ “nɔkwɛlɔi kɛ tsɔɔlɔi” lɛ anɔ. Mɛnɛɛmɛi ateŋ mɛi komɛi fãa gbɛ kɛjɛɔ asafo kome mli kɛyaa asafo kroko mli, yɛ be mli ni mɛi krokomɛi lɛ ji onukpai yɛ asafoi ni amɛyɔɔ mli lɛ amli. (Efesobii 4:8, 11, 12; Bɔfoi lɛ Asaji 20:28) “Nikeenii” ni tamɔ nɛkɛ woɔ ekomefeemɔ ni yɔɔ Yehowa Odasefoi ateŋ lɛ mli hewalɛ ŋmɛnɛ.
4 November 1, 1922, The Watchtower lɛ kɛɛ yɛ wiemɔ “gbɛjianɔtoo” lɛ he akɛ: “Gbɛjianɔtoo ji gbɔmɛi akuu ni kɛ amɛhe bɔɔ kɛ yiŋtoo akɛ amɛaatsu ŋaa ko ni amɛkpɛ amɛyiŋ yɛ he lɛ he nii.” The Watchtower lɛ tee nɔ etsɔɔ mli akɛ tsɛmɔ ni atsɛɔ Yehowa Odasefoi akɛ gbɛjianɔtoo lɛ hãaa amɛfee “kuu fã, yɛ bɔ ni akɛ nakai wiemɔ lɛ tsuɔ nii ahaa lɛ shishinumɔ naa, shi moŋ etsɔɔ kɛkɛ akɛ Biblia Kaselɔi lɛ [Yehowa Odasefoi] miibɔ mɔdɛŋ ní amɛtsu Nyɔŋmɔ yiŋtoi ahe nii, ni amɛmiifee enɛ taakɛ Nuntsɔ lɛ feɔ nɔ fɛɛ nɔ lɛ, yɛ gbɛjianɔtoo kpakpa naa.” (1 Korintobii 14:33) Bɔfo Paulo tsɔɔ akɛ Kristofoi ni hi shi yɛ egbii lɛ amli lɛ hu fee amɛnii yɛ gbɛjianɔtoo kpakpa naa. Ekɛ Kristofoi ni afɔ amɛ mu lɛ akuu ni kɛ amɛhe bɔɔ lɛ to adesa gbɔmɔtso lɛ, ní yɔɔ henii sɔrɔtoi, ní eko fɛɛ eko tsuɔ egbɛfaŋnɔ ni aha lɛ lɛ he nii bɔni afee ni gbɔmɔtso lɛ anyɛ atsu nii jogbaŋŋ lɛ he. (1 Korintobii 12:12-26) Eji gbɛjianɔtoo he mfonirifeemɔ ni hi jogbaŋŋ diɛŋtsɛ! Mɛni hewɔ ato Kristofoi ahe gbɛjianɔ lɛ? Koni amɛtsu “Nyɔŋmɔ yiŋtoi” ahe nii, ní amɛfee Yehowa suɔmɔnaa nii.
5. Mɛni ji Nyɔŋmɔ gbɛjianɔtoo ni anaa lɛ?
5 Biblia lɛ gba efɔ̃ shi akɛ abaafee anɔkwa Kristofoi ni yɔɔ ŋmɛnɛ lɛ ekome, ni akɛ amɛ fɛɛ baaba “shikpɔŋ” kome nɔ ákɛ “jeŋmaŋ” kome, ni ‘amɛaatso yɛ jɛmɛ tamɔ kanei yɛ je nɛŋ.’ (Yesaia 66:8; Filipibii 2:15) Amrɔ nɛɛ, nɛkɛ “jeŋmaŋ” ni ato amɛ gbɛjianɔ nɛɛ mli bii lɛ ayi fa fe akpekpei enumɔ kɛ fã. (Yesaia 60:8-10, 22) Shi kɛlɛ, jeee Nyɔŋmɔ gbɛjianɔtoo lɛ dalɛ ni fe fɛɛ nɛ. Ŋwɛibɔfoi hu yɛ mli.
6. Namɛi feɔ Nyɔŋmɔ gbɛjianɔtoo lɛ, yɛ eshishinumɔ ni mli lɛɛ naa?
6 Nɔkwɛmɔnii babaoo yɛ ni tsɔɔ bɔ ni ŋwɛibɔfoi kɛ Nyɔŋmɔ tsuji ni ji adesai lɛ feɔ ekome kɛtsuɔ nii. (1 Mose 28:12; Daniel 10:12-14; 12:1; Hebribii 1:13, 14; Kpojiemɔ 14:14-16) No hewɔ lɛ, May 15, 1925, The Watchtower lɛ wie yɛ gbɛ ni ja nɔ akɛ: “Ŋwɛibɔfoi krɔŋkrɔŋi lɛ fɛɛ fata Nyɔŋmɔ gbɛjianɔtoo lɛ he.” Ekɛɛ kɛfata he akɛ: “Mɔ ni ta Nyɔŋmɔ gbɛjianɔtoo lɛ yitso, ní eyɔɔ hewalɛ kɛ hegbɛ fɛɛ, [ji] Nuntsɔ Yesu Kristo.” (Mateo 28:18) No hewɔ lɛ, yɛ eshishinumɔ ni mli lɛɛ fe fɛɛ naa lɛ, mɛi fɛɛ ni yɔɔ ŋwɛi kɛ shikpɔŋ nɔ, ní feɔ ekome kɛtsuɔ nii kɛfeɔ Nyɔŋmɔ suɔmɔnaa nii lɛ fataa he kɛfeɔ Nyɔŋmɔ gbɛjianɔtoo lɛ. (Kwɛmɔ akrabatsa lɛ.) Kwɛ hegbɛ ni yɔɔ nyam ni eji, ákɛ mɔ aaafee efã! Ni kwɛ miishɛɛ ni eji akɛ aaakpa be mli ni aaato bɔɔnii fɛɛ ni yɔɔ wala mli, yɛ ŋwɛi kɛ shikpɔŋ nɔ lɛ fɛɛ ahe gbɛjianɔ, ní amɛjie Yehowa Nyɔŋmɔ yi yɛ ekomefeemɔ mli lɛ gbɛ! (Kpojiemɔ 5:13, 14) Shi kɛlɛ, mɛɛ hebuu Nyɔŋmɔ gbɛjianɔtoo lɛ kɛhaa ŋmɛnɛ?
Abuɔ Mɔ He yɛ Nyɔŋmɔ Gbɛjianɔtoo lɛ Mli—Yɛ Mɛɛ Gbɛ Nɔ?
7. Nyɔŋmɔ gbɛjianɔtoo lɛ buɔ wɔhe yɛ mɛɛ gbɛ nɔ?
7 Nyɔŋmɔ gbɛjianɔtoo lɛ baanyɛ aye abua kɛbu wɔhe kɛjɛ Satan kɛ eŋaatsɔi lɛ ahe. (Efesobii 6:11) Satan kɛ nɔnyɛɛi, kɛ yiwaai baa, ni ekaa Yehowa jálɔi kɛ oti kome pɛ ni ekɛma ehiɛ: koni egbala amɛ kɛjɛ ‘gbɛ ni esa akɛ amɛnyiɛ nɔ lɛ nɔ.’ (Yesaia 48:17; okɛto Mateo 4:1-11 he.) Wɔnyɛŋ wɔjo nakai tutuamɔi lɛ anaa foi kwraa kɛmɔ shi kɔkɔɔkɔ yɛ nibii agbɛjianɔtoo nɛɛ mli. Shi kɛlɛ, wekukpaa ni bɛŋkɛ kpaakpa ní kã wɔkɛ Nyɔŋmɔ kɛ egbɛjianɔtoo lɛ teŋ lɛ woɔ wɔ hewalɛ ni ebuɔ wɔhe, ni no yeɔ ebuaa wɔ ni wɔnyiɛɔ “gbɛ” lɛ nɔ. Nɔ ni jɛɔ mli baa ji akɛ, wɔnine enyɛɛɛ shi yɛ wɔhiɛnɔkamɔ lɛ gbɛfaŋ.
8. Mɛɛ gbɛ nɔ Yehowa gbɛjianɔtoo ni anaaa lɛ fiɔ etsuji ni yɔɔ shikpɔŋ nɔ lɛ asɛɛ yɛ?
8 Mɛɛ gbɛ nɔ Nyɔŋmɔ gbɛjianɔtoo lɛ kɛ hebuu nɛɛ haa yɛ? Klɛŋklɛŋ lɛ, wɔyɛ Yehowa tsuji ni ji mumɔŋ bɔɔnii lɛ asɛɛfimɔ ni yɔɔ daa. Beni Yesu yɔɔ nɔnyɛɛ ni mli wa waa shishi lɛ, ŋwɛibɔfo ko ba ni ebasɔmɔ lɛ. (Luka 22:43) Beni eyɔɔ gbele hegbeyeiwoo shishi lɛ, ŋwɛibɔfo ko here Petro yiwala yɛ naakpɛɛ gbɛ nɔ. (Bɔfoi lɛ Asaji 12:6-11) Eyɛ mli akɛ naakpɛɛ nii ni tamɔ nɛkɛ bɛ ŋmɛnɛ moŋ, shi áwo Yehowa webii ashi akɛ amɛbaaná ŋwɛibɔfoi asɛɛfimɔ yɛ amɛ shiɛmɔ nitsumɔ lɛ mli. (Kpojiemɔ 14:6, 7) Bei pii lɛ, amɛnáa hewalɛ ni fa kɛteke nɔ kɛ́ amɛkɛ shihilɛi ni mli wawai kpe. (2 Korintobii 4:7) Kɛfata he lɛ, amɛle jogbaŋŋ akɛ “Yehowa bɔfo lɛ bɔɔ nsara yɛ mɛi ni sheɔ lɛ gbeyei lɛ ahe kɛkpeɔ, ni ejieɔ amɛ.”—Lala 34:8.
9, 10. Abaanyɛ awie akɛ “mɔɔ ni wa ji Yehowa gbɛi lɛ” yɛ mɛɛ gbɛ nɔ, ni te shishitoo mla lɛ kɔɔ Nyɔŋmɔ gbɛjianɔtoo muu lɛ fɛɛ he ehaa tɛŋŋ?
9 Yehowa gbɛjianɔtoo ni anaa lɛ ji hebuu hu. Yɛ mɛɛ gbɛ nɔ? Wɔkaneɔ yɛ Abɛi 18:10 lɛ akɛ: “Mɔɔ ni wa ji Yehowa gbɛi lɛ; no mli jalɛ sháa foi kɛyaa, ni ehiɔ shi shweshweeshwe.” Enɛ etsɔɔɔ akɛ Nyɔŋmɔ gbɛi ni aaatĩ mli atsɛ shii abɔ lɛ kɛkɛ haa mɔ hebuu. Shi moŋ, Nyɔŋmɔ gbɛi ni wɔkɛfeɔ wɔbobaahe lɛ tsɔɔ akɛ wɔkɛ wɔhe fɔ̃ɔ Yehowa diɛŋtsɛ nɔ. (Lala 20:2; 122:4) Etsɔɔ maŋtsɛ ni eji lɛ sɛɛfimɔ, emlai kɛ eshishitoo mlai amli hiɛmɔ, kɛ hemɔkɛyeli ní ayɔɔ yɛ eshiwoi amli. (Lala 8:2-10; Yesaia 50:10; Hebribii 11:6) Nɔ ni fata he hu ji hetuu-kɛhamɔ ni akɛhaa Yehowa kome pɛ. Mɛi ni jáa Yehowa yɛ nɛkɛ gbɛ nɔ lɛ pɛ baanyɛ amɛkɛ lalatsɛ lɛ akɛɛ akɛ: “[Yehowa mli] wɔnáa tsuijurɔ yɛ, ejaakɛ egbɛi krɔŋkrɔŋ lɛ nɔ wɔhiɛ kã.”—Lala 33:21; 124:8.
10 Agbɛnɛ mɛi fɛɛ ni yɔɔ Nyɔŋmɔ gbɛjianɔtoo ni anaa lɛ mli lɛ kɛ Mika kɛɔ akɛ: “Wɔ lɛ wɔɔnyiɛ yɛ Yehowa, wɔ-Nyɔŋmɔ lɛ, gbɛi amli kɛaatee naanɔi anaanɔ!” (Mika 4:5) Abua ŋmɛnɛŋmɛnɛ beaŋ gbɛjianɔtoo lɛ naa kɛbɔle “Nyɔŋmɔ Israel lɛ,” ni atsɛɔ lɛ yɛ Biblia lɛ mli akɛ “maŋ ko [kɛha] egbɛi lɛ” he. (Galatabii 6:16; Bɔfoi lɛ Asaji 15:14; Yesaia 43:6, 7; 1 Petro 2:17) No hewɔ lɛ, Yehowa gbɛjianɔtoo lɛ fã ni mɔ ko ji lɛ tsɔɔ akɛ mɔ lɛ fata gbɔmɛi ni taoɔ hebuu yɛ Nyɔŋmɔ gbɛi amli, ní amɛnine shɛɔ nɔ lɛ ahe.
11. Yehowa gbɛjianɔtoo lɛ kɛ hebuu haa mɛi ni yɔɔ mli lɛ yɛ mɛɛ gbɛi pɔtɛɛi anɔ?
11 Kɛfata he lɛ, Nyɔŋmɔ gbɛjianɔtoo ni anaa lɛ ji kuu ni mli bii lɛ yɔɔ hemɔkɛyeli, nanemɛi heyelilɔi asafo ni tswaa amɛhe amɛmaa shi ni amɛwowoɔ amɛhe hewalɛ. (Abɛi 13:20; Romabii 1:12) Eji he ko ni Kristofoi tookwɛlɔi lɛ kwɛɔ tooku lɛ nɔ, ni amɛwoɔ mɛi ni he yeɔ kɛ mɛi ni yɔɔ nɔnyɛɛ shishi lɛ hewalɛ, ni amɛbɔɔ mɔdɛŋ akɛ amɛaahole mɛi ni egbee shi lɛ anɔ. (Yesaia 32:1, 2; 1 Petro 5:2-4) “Tsulɔ anɔkwafo kɛ nilelɔ” lɛ hãa “amɛŋmãa yɛ be ni sa nɔ” kɛtsɔɔ gbɛjianɔtoo lɛ nɔ. (Mateo 24:45) Nakai “tsulɔ” lɛ, ni ji Kristofoi ni afɔ amɛ mu lɛ, kɛ mumɔŋ nibii kpakpai lɛ amli nɔ ni hi fe fɛɛ hãa—nilee ni ja, ni damɔ Biblia lɛ nɔ, ní baanyɛ ekɛ mɔ aya naanɔ wala mli. (Yohane 17:3) Atsɔɔ gbɛtsɔɔmɔ ni jɛɔ “tsulɔ” lɛ ŋɔɔ lɛ nɔ ayeɔ abuaa Kristofoi koni amɛhiɛ jeŋba he tɛi ni nɔ kwɔlɔ mli, koni ‘amɛhiɛ atɛ̃ tamɔ onufui, ní amɛfee kpoo tamɔ okpoi,’ yɛ shihilɛ ni yɔɔ oshara ni ebɔle amɛhe kɛkpe lɛ mli. (Mateo 10:16) Ni ayeɔ abuaa amɛ be fɛɛ be koni ‘amɛteke nɔ yɛ Nuntsɔ lɛ nitsumɔ lɛ mli,’ ni no hu diɛŋtsɛ ji hebuunɔ ni yɔɔ hewalɛ.—1 Korintobii 15:58.
Namɛi Fata Nyɔŋmɔ Gbɛjianɔtoo lɛ He?
12. Namɛi ale amɛ akɛ amɛji Nyɔŋmɔ ŋwɛi gbɛjianɔtoo lɛ fã?
12 Akɛni hebuu nɛɛ yɛ kɛha mɛi ni fata Nyɔŋmɔ gbɛjianɔtoo lɛ he hewɔ lɛ, namɛi fata emli bii lɛ ahe? Yɛ ŋwɛi gbɛjianɔtoo lɛ gbɛfaŋ lɛ, ŋwanejee ko bɛ sanebimɔ nɛɛ hetoo lɛ he. Satan kɛ ebɔfoi lɛ bɛ ŋwɛi dɔŋŋ. Yɛ gbɛ kroko nɔ lɛ, ŋwɛibɔfoi anɔkwafoi lɛ yɛ jɛmɛ lolo ‘yɛ asafo lɛ naabuamɔ lɛ mli.’ Bɔfo Yohane na akɛ yɛ naagbee gbii lɛ amli lɛ, “toobi lɛ,” kerubim sɔrɔtoi lɛ (“hiɛkalɔi ejwɛ lɛ”), kɛ “bɔfoi pii” baabɛŋkɛ Nyɔŋmɔ maŋtsɛsɛi lɛ he kpaakpa diɛŋtsɛ. Onukpai 24 lɛ—ni feɔ nakai Kristofoi ni afɔ amɛ mu lɛ ni amɛbote amɛ ŋwɛi gboshinii ni yɔɔ nyam lɛ mli momo lɛ ahe mfoniri lɛ, baafata amɛhe. (Hebribii 12:22, 23; Kpojiemɔ 5:6, 11; 12:7-12) Eyɛ faŋŋ akɛ amɛ fɛɛ amɛfata Nyɔŋmɔ gbɛjianɔtoo lɛ he. Shi kɛlɛ, nibii bɛ mlɛo tamɔ nɛkɛ yɛ adesai ateŋ.
13. Yesu tsɔɔ mɛi ni ji Nyɔŋmɔ gbɛjianɔtoo lɛ fã kɛ mɛi ni jeee efã lɛ yɛ mɛɛ gbɛ nɔ?
13 Yesu wie mɛi komɛi ni baakɛɛ akɛ amɛnyiɛ esɛɛ lɛ ahe akɛ: “Mɛi pii aaakɛɛ mi yɛ no gbi lɛ nɔ akɛ: Nuntsɔ, Nuntsɔ! ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ.” (Mateo 7:22, 23) Kɛji mɔ ko tsuɔ nibii ni ejaaa lɛ, no lɛ eka shi faŋŋ akɛ efataaa Nyɔŋmɔ gbɛjianɔtoo lɛ he, ekɔɔɔ he eko nɔ ni ekɛ nɔmimaa kɛɔ, ni ekɔɔɔ he ni ejáa Nyɔŋmɔ yɛ lɛ he eko hu. Yesu hu tsɔɔ bɔ ni aaafee ana mɔ ko ni ji Nyɔŋmɔ gbɛjianɔtoo lɛ fã. Ekɛɛ akɛ: “Jeee mɔ fɛɛ mɔ ni kɛɔ mi akɛ: Nuntsɔ, Nuntsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ.”—Mateo 7:21.
14. Mɛɛ Nyɔŋmɔ suɔmɔnaa nii lɛ fãi komɛi awieɔ he akɛ ekɛ gbɛnaa nii fɔ̃ɔ mɛi ni ji Nyɔŋmɔ gbɛjianɔtoo lɛ fã lɛ anɔ?
14 No hewɔ lɛ, kɛ́ mɔ ko baafee Nyɔŋmɔ gbɛjianɔtoo lɛ—ní “ŋwɛi maŋtsɛyeli lɛ” ji emli oti fe fɛɛ lɛ—fã lɛ, no lɛ esa akɛ mɔ lɛ afee Nyɔŋmɔ suɔmɔnaa nii. Mɛni ji esuɔmɔnaa nii? Paulo tsɔɔ efã ko ni he hiaa waa beni ekɛɛ akɛ: “[Nyɔŋmɔ] sumɔɔ akɛ ahere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Kɛji mɔ ko miitao ni ená anɔkwa nilee kɛjɛ Biblia lɛ mli lɛɛlɛŋ, ní ekɛtsu nii yɛ eshihilɛ mli, ní egbɛ eshwã eha “gbɔmɛi fɛɛ” lɛ, no lɛ eefee Nyɔŋmɔ suɔmɔnaa nii. (Mateo 28:19, 20; Romabii 10:13-15) Eji Nyɔŋmɔ suɔmɔnaa nii hu akɛ alɛ Yehowa tooi lɛ ni akwɛ amɛnɔ. (Yohane 21:15-17) Kristofoi akpeei tsuɔ gbɛfaŋnɔ ni he hiaa yɛ enɛ mli. Mɔ ko ni yɔɔ hegbɛ akɛ eeeya kpeei ni tamɔ nɛkɛ, shi ekuɔ ehiɛ efɔ̃ɔ nɔ lɛ, bɛ hiɛsɔɔ kɛha gbɛhe ni eyɔɔ yɛ Nyɔŋmɔ gbɛjianɔtoo lɛ mli lɛ.—Hebribii 10:23-25.
Je lɛ kɛ Naanyobɔɔ
15. Mɛɛ kɔkɔbɔɔ Yakobo kɛha egbii lɛ amli asafoi lɛ?
15 Yesu gbele sɛɛ aaafee afii 30 lɛ, enyɛmi nuu Yakobo tsɔɔ nibii komɛi ni baanyɛ ekɛ mɔ ko gbɛhe ni eyɔɔ yɛ Nyɔŋmɔ gbɛjianɔtoo lɛ mli lɛ awo oshara mli. Eŋma akɛ: “Gbalafitelɔi! nyɛleee akɛ je nɛɛ hedɔɔ lɛ Nyɔŋmɔ nyɛɛ ni lo? No hewɔ lɛ mɔ fɛɛ mɔ ni sumɔɔ akɛ etsɔ je nɛɛ hedɔlɔ lɛ etsɔ Nyɔŋmɔ henyɛlɔ.” (Yakobo 4:4) Eka shi faŋŋ akɛ Nyɔŋmɔ henyɛlɔ jeee egbɛjianɔtoo lɛ fã. Belɛ, mɛni ji je lɛ kɛ naanyobɔɔ mɔ? Átsɔɔ mli akɛ ebaa yɛ gbɛi sɔrɔtoi anɔ, tamɔ nanemɛi fɔji ní anáa loo akɛ amɛ bɔɔ. Kɛfata he lɛ, Yakobo gbala jwɛŋmɔ kɛtee nɔ ko pɔtɛɛ diɛŋtsɛ nɔ—jwɛŋmɔi loo susumɔi ni ejaaa ni kɛ mɔ yaa subaŋ fɔŋ mli lɛ.
16. Mɛni kɔkɔbɔɔ ni Yakobo kɛha akɛ je lɛ kɛ naanyobɔɔ ji Nyɔŋmɔ nyɛɛ lɛ mli sane lɛ tsɔɔ?
16 Wɔkaneɔ yɛ Yakobo 4:1-3 lɛ akɛ: “Nɛgbɛ tawuui kɛ nɔmɔi ni yɔɔ nyɛteŋ lɛ jɛ? Jeee nyɛkɔnɔi ni wuɔ ta yɛ nyɛ henii lɛ amli lɛ mli ejɛ lo? Nii feɔ nyɛ akɔnɔ, ni nyɛnáaa; nyɛgbeɔ mɛi ni nyɛyeɔ awuŋa, ni nyɛnine nyɛɛɛ nɔ ashɛ; nyɛnɔɔ ni nyɛwuɔ; nyɛbɛ nɔ ko akɛni nyɛkpaaa he fai hewɔ lɛ; nyɛkpaa fai hu, ni nyɛnáaa, ejaakɛ fai fɔŋ nyɛkpaa, koni nyɛkpata nii lɛ ahiɛ yɛ nyɛkɔnɔi amli.” Beni eŋmala wiemɔi nɛɛ egbe naa lɛ sɛɛ dani Yakobo bɔ kɔkɔ yɛ je lɛ kɛ naanyobɔɔ he lɛ.
17. “Béi” kɛ “nɔmɔi” hi klɛŋklɛŋ afii oha lɛ mli Kristofoi asafo lɛ mli yɛ mɛɛ gbɛ nɔ?
17 Afii ohai abɔ yɛ Yakobo gbele sɛɛ lɛ, amale Kristofoi kɛ amɛhe wuu ta ni amɛgbegbee amɛhe diɛŋtsɛ. Shi kɛlɛ, Yakobo ŋma wolo lɛ kɛyaha “Nyɔŋmɔ Israel lɛ” mli bii ni hi shi yɛ klɛŋklɛŋ afii oha lɛ mli, ni kpaa gbɛ akɛ amɛaaye ‘osɔfoi kɛ maŋtsɛmɛi’ yɛ ŋwɛi lɛ. (Kpojiemɔ 20:6) Amɛkɛ amɛhe wuuu ni amɛgbeee amɛhe yɛ tai diɛŋtsɛ amli. No hewɔ lɛ, mɛni hewɔ Yakobo wie nibii nɛɛ ahe yɛ Kristofoi ateŋ lɛ? Ojogbaŋŋ, bɔfo Yohane tsɛ́ mɔ fɛɛ mɔ ni nyɛɔ enyɛmi lɛ akɛ gbɔmɔgbelɔ. Ni Paulo wie mɛi ateŋ béi kɛ nɔmɔi ni yɔɔ asafoi lɛ amli lɛ ahe ákɛ “béi” kɛ “nɔmɔi.” (Tito 3:9; 2 Timoteo 2:14; 1 Yohane 3:15-17) Yɛ enɛ nɔŋŋ gbɛfaŋ lɛ, eka shi faŋŋ akɛ nɔ ni yɔɔ Yakobo jwɛŋmɔ mli ji suɔmɔ ni anáaa ahaaa nanemɛi Kristofoi. Yɛ amɛteaŋ lɛ, Kristofoi lɛ kɛ amɛhe miiye tamɔ bɔ ni bei pii lɛ, mɛi ni yɔɔ je lɛŋ lɛ kɛ amɛhe yeɔ lɛ nɔŋŋ pɛpɛɛpɛ.
18. Mɛni baanyɛ ekɛ nifeemɔi ni suɔmɔ kɛ henumɔi bɛ mli aba Kristofoi ateŋ?
18 Mɛni hewɔ nibii ni tamɔ nɛkɛ ba yɛ Kristofoi asafoi lɛ amli lɛ? Eba lɛ nakai yɛ sui ni ejaaa, tamɔ hiɛjoomɔ kɛ ‘akɔnɔi’ ahewɔ. Henɔwomɔ, awuŋayeli, kɛ hiɛnyam taomɔ hu baanyɛ afite Kristofoi anaanyobɔɔ ni suɔmɔ yɔɔ mli lɛ kwraa yɛ asafo ko mli. (Yakobo 3:6, 14) Sui ni tamɔ nɛkɛ haa mɔ bafeɔ je lɛ naanyo, ni no hewɔ lɛ, ebatsɔɔ Nyɔŋmɔ henyɛlɔ. Mɔ ko bɛ ní yɔɔ sui ni tamɔ nɛkɛ, ní baanyɛ akpa gbɛ akɛ ebaaya nɔ efee Nyɔŋmɔ gbɛjianɔtoo lɛ mlinyo.
19. (a) Kɛ́ Kristofonyo ko na akɛ susumɔi ni ejaaa miihé shi yɛ etsui mli lɛ, namɔ klɛŋklɛŋ esa akɛ eshwa? (b) Kristofonyo baanyɛ aye susumɔi ni ejaaa nɔ yɛ mɛɛ gbɛ nɔ?
19 Kɛ́ wɔna akɛ susumɔi ni ejaaa miihé shi yɛ wɔtsui mli lɛ, namɔ wɔbaanyɛ wɔshwa? Satan? Yɛ gbɛ ko nɔ lɛ, hɛɛ. Lɛ ji je nɛŋ, he ni nɛkɛ sui nɛɛ egbɛ eshwã babaoo yɛ lɛ, “kɔɔyɔɔ mli hewalɛ lɛ nɔ lumɔ lɛ.” (Efesobii 2:1, 2; Tito 2:12) Shi bei pii lɛ, susumɔi ni ejaaa lɛ ashishifai lɛ jɛɔ wɔ diɛŋtsɛ wɔheloo ni yeee emuu lɛ mli. Beni ebɔ kɔkɔ yɛ je lɛ kɛ naanyobɔɔ he lɛ sɛɛ lɛ, Yakobo ŋma akɛ: “Aloo nyɛsusuɔ akɛ yaka ni ŋmalɛ lɛ kɛɔ akɛ hiɛkɔ̃ɔ sɛɛ mumɔ ni yɔɔ wɔmli lɛ diɔ lɛ?” (Yakobo 4:5) Wɔ fɛɛ wɔyɛ mligbɛ henumɔ ko ni akɛfɔ́ wɔ, ní haa wɔfeɔ efɔŋ. (1 Mose 8:21; Romabii 7:18-20) Shi kɛlɛ, wɔbaanyɛ wɔwuu wɔshi nakai henumɔ lɛ kɛji akɛ wɔkpɛlɛɔ wɔgbɔjɔmɔi anɔ, ní wɔkɛ wɔhe fɔ̃ɔ Yehowa yelikɛbuamɔ nɔ koni wɔye amɛnɔ kunim. Yakobo kɛɔ akɛ: “[Nyɔŋmɔ] duroɔ mɔ pii [fe wɔ mligbɛ henumɔ ni akɛfɔ́ wɔ ní haa wɔnyɛɔ mɔ lɛ].” (Yakobo 4:6) Kɛtsɔ Nyɔŋmɔ mumɔ krɔŋkrɔŋ lɛ yelikɛbuamɔ kɛ nyɛmimɛi Kristofoi anɔkwafoi lɛ asɛɛfimɔ nɔ, kɛ agbɛnɛ, kɛtsɔ Yesu kpɔmɔ afɔleshaa lɛ jarawalɛ lɛ nɔ lɛ, anɔkwa Kristofoi lɛ aheloo gbɔjɔmɔi lɛ yeee amɛnɔ kunim. (Romabii 7:24, 25) Amɛyɛ shweshweeshwe yɛ Nyɔŋmɔ gbɛjianɔtoo lɛ mli, amɛji Nyɔŋmɔ shieŋtsɛmɛi, jeee je lɛ nɔ̃.
20. Mɛɛ jɔɔmɔi babaoo mɛi ni fata Nyɔŋmɔ gbɛjianɔtoo lɛ he lɛ náa mli ŋɔɔmɔ?
20 Biblia lɛ woɔ shi akɛ: “Yehowa aaaha emaŋ lɛ hewalɛ; Yehowa aaajɔɔ emaŋ lɛ kɛ hejɔlɛ.” (Lala 29:11) Kɛ́ wɔji Yehowa ŋmɛnɛŋmɛnɛ beaŋ “jeŋmaŋ,” ni ji egbɛjianɔtoo ni anaa lɛ fã lɛɛlɛŋ lɛ, no lɛ, wɔbaaná hewalɛ ni ekɛhaa lɛ mli gbɛfaŋnɔ, ni wɔbaaná toiŋjɔlɛ ní ekɛjɔɔ ewebii lɛ hu mli ŋɔɔmɔ. Eji anɔkwale akɛ, Satan je lɛ da kwraa fe Yehowa gbɛjianɔtoo ni anaa lɛ, ni Satan he wa kwraa hu fe wɔ. Shi Yehowa ji Ofe. Anyɛŋ aye enitsumɔ hewalɛ lɛ nɔ kunim kɔkɔɔkɔ. Ebɔfoi ni yɔɔ hewalɛ lɛ hu kɛ wɔ efee ekome kɛmiisɔmɔ Nyɔŋmɔ. Enɛ hewɔ lɛ, yɛ nyɛɛ ni wɔkɛkpeɔ lɛ fɛɛ sɛɛ lɛ, wɔbaanyɛ wɔdamɔ shi shiŋŋ. Taakɛ Yesu fee lɛ, wɔbaanyɛ wɔye je lɛ nɔ kunim.—Yohane 16:33; 1 Yohane 4:4.
Ani Obaanyɛ Otsɔɔ Mli?
◻ Mɛni ji Nyɔŋmɔ gbɛjianɔtoo ni anaa lɛ?
◻ Nyɔŋmɔ gbɛjianɔtoo lɛ kɛ hebuu haa yɛ mɛɛ gbɛi anɔ?
◻ Namɛi fata Nyɔŋmɔ gbɛjianɔtoo lɛ he?
◻ Mɛɛ gbɛ nɔ wɔɔtsɔ wɔtsi wɔhe kɛjɛ je lɛ kɛ naanyobɔɔ he?
[Akrabatsa ni yɔɔ baafa 9]
Mɛni Ji Nyɔŋmɔ Gbɛjianɔtoo Lɛ?
Akɛ wiemɔ “Nyɔŋmɔ gbɛjianɔtoo” lɛ tsuɔ nii yɛ gbɛ̀i etɛ nɔ, yɛ Yehowa Odasefoi awoji amli.
1 Yehowa ŋwɛi gbɛjianɔtoo ni anaaa, ní mumɔŋ bɔɔnii anɔkwafoi lɛ feɔ lɛ. Atsɛɔ lɛ akɛ “ŋwɛi Yerusalem” yɛ Biblia lɛ mli.—Galatabii 4:26.
2 Yehowa gbɛjianɔtoo ni anaa, ni ji adesai lɛ. Ŋmɛnɛ, mɛi ni feɔ gbɛjianɔtoo nɛɛ ji shwɛɛnii ni afɔ amɛ mu lɛ, kɛ asafo babaoo ní ebafata amɛhe lɛ.
3 Yehowa jeŋ muu fɛɛ gbɛjianɔtoo lɛ. Ŋmɛnɛ, mɛi ni feɔ gbɛjianɔtoo nɛɛ ji Yehowa ŋwɛi gbɛjianɔtoo lɛ kɛ mɛi ni afɔ amɛ mu, ní eŋɔ amɛ akɛ ebii ni yɔɔ shikpɔŋ nɔ, ní amɛyɔɔ mumɔŋ hiɛnɔkamɔ lɛ. Adesai ní ahã amɛye emuu yɛ shikpɔŋ nɔ hu baafata he yɛ be ni sa mli.
[Mfoniri ni yɔɔ baafa 10]
Akɛ mumɔŋ niyenii ní hi fe fɛɛ haa kɛtsɔɔ Yehowa gbɛjianɔtoo lɛ nɔ