“Sɔɔmɔ Krɔŋkrɔŋ kɛ Nyɛ Jwɛŋmɔŋ Nyɛmɔ”
“Nyɛŋɔa nyɛ gbɔmɔtsei lɛ nyɛdamɔa shi akɛ afɔle ni hiɛ kã, ni yɔɔ krɔŋkrɔŋ, ni saa Nyɔŋmɔ hiɛ, sɔɔmɔ krɔŋkrɔŋ kɛ nyɛ jwɛŋmɔŋ nyɛmɔ.”—ROMABII 12:1, NW.
1, 2. Yɛ mɛɛ gbɛ nɔ bɔ ni akaseɔ Biblia shishitoo mlai kɛ nitsumɔ tamɔ akaseɔ wiemɔ hee ko?
ANI oka wiemɔ hee ko kasemɔ pɛŋ? Kɛji nakai ni lɛ, ŋwanejee ko bɛ he akɛ obaakpɛlɛ nɔ akɛ, eji nitsumɔ ni wa. Fɛɛ sɛɛ lɛ, babaoo he miihia fe wiemɔi heei komɛi akasemɔ kɛkɛ. Wiemɔ kɛ nitsumɔ yɛ hesaa mli lɛ hu biɔ ewiemɔ mla lɛ kasemɔ jogbaŋŋ. Esa akɛ oyoo bɔ ni wiemɔi kɔɔ amɛhe kɛ bɔ ni amɛtsaraa kɛfeɔ susumɔi ni yeɔ emuu lɛ jogbaŋŋ.
2 Nakai eji yɛ Nyɔŋmɔ Wiemɔ lɛ he nilee ni wɔnaa lɛ mli. Ekɔɔ babaoo he fe Ŋmalɛi komɛi ni jɛ biɛ kɛ biɛ ni aaakase lɛ he. Taakɛ eji lɛ, esa akɛ wɔ hu wɔkase Biblia wiemɔ he mla lɛ. Ehe miihia ni wɔnu bɔ ni ŋmalɛi lɛ kɔɔ amɛhe kɛ bɔ ni amɛtsuɔ nii akɛ shishitoo mlai ni abaanyɛ akɛtsu nii yɛ daa gbi shihilɛ mli lɛ shishi. Kɛkɛ lɛ, wɔbaanyɛ wɔtsɔmɔ mɛi ni “asaa [amɛ] pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:17.
3. Mɛɛ tsakemɔ ba yɛ afi 33 Ŋ.B., yɛ sɔɔmɔ ni akɛhaa Nyɔŋmɔ lɛ he?
3 Yɛ Mose Mla gbɛjianɔtoo lɛ shishi lɛ, abaanyɛ ajie anɔkwayeli kpo babaoo kɛtsɔ mlai ni atsɔɔ mli jogbaŋŋ lɛ ni aaaye nɔ pɛpɛɛpɛ lɛ nɔ. Shi, yɛ 33 Ŋ.B. lɛ, Yehowa jie Mla lɛ, ni “ekala ekpɛtɛ sɛŋmɔtso lɛ” ni agbe e-Bi lɛ yɛ nɔ lɛ he. (Kolosebii 2:13, 14) Yɛ no sɛɛ lɛ, akɛ afɔle ni ato naa kakadaŋŋ ni Nyɔŋmɔ webii aaashã kɛ akpɔi ni aaanyiɛ sɛɛ haaa amɛ. Shi moŋ, akɛɛ amɛ akɛ: “Nyɛŋɔa nyɛ gbɔmɔtsei lɛ nyɛdamɔa shi akɛ afɔle ni hiɛ ka, ni yɔɔ krɔŋkrɔŋ, ni saa Nyɔŋmɔ hiɛ, sɔɔmɔ krɔŋkrɔŋ kɛ nyɛ jwɛŋmɔŋ nyɛmɔ.” (Romabii 12:1, NW) Hɛɛ, esa akɛ Kristofoi kɛ amɛhe aha, kɛ amɛtsui, susuma, jwɛŋmɔ, kɛ hewalɛ fɛɛ aha yɛ Nyɔŋmɔ sɔɔmɔ mli. (Marko 12:30; okɛto Lala 110:3 he.) Shi, ni akɛ “sɔɔmɔ krɔŋkrɔŋ kɛ nyɛ jwɛŋmɔŋ nyɛmɔ” aaaha lɛ tsɔɔ mɛni?
4, 5. Mɛni kɔɔ Yehowa ni wɔɔsɔmɔ lɛ kɛ wɔ jwɛŋmɔŋ nyɛmɔ lɛ he?
4 Atsɔɔ wiemɔ kuku, “jwɛŋmɔŋ nyɛmɔ” lɛ shishi kɛjɛ Hela wiemɔ lo·gi·kosʹ, ni eshishi ji “nɔ ni shishinumɔ yɔɔ mli” loo “mɔ ni le nii” mli. Aatao ni Nyɔŋmɔ tsuji kɛ henilee ni Biblia etsɔse lɛ atsu nii. Yɛ nɔ najiaŋ ni amɛkɛ amɛ yiŋkpɛi aaadamɔ mlai babaoo ni atsɔ hiɛ ato amamɔ shi nɔ lɛ, esa akɛ Kristofoi aŋmɛ Biblia mli shishitoo mlai jogbaŋŋ amɛkwɛ. Ehe miihia ni amɛnu Biblia “wiemɔ he mla” lɛ shishi, loo bɔ ni eshishitoo mlai sɔrɔtoi lɛ kɔɔ amɛhe ehaa. Kɛkɛ lɛ amɛbaanyɛ ni amɛkɛ amɛ jwɛŋmɔŋ nyɛmɔ akpɛ yiŋ ni ŋmɛɔ pɛpɛɛpɛ.
5 Ani enɛ tsɔɔ akɛ Kristofoi bɛ mla? Jeee nakai. Kristofoi a-Hela Ŋmalɛi lɛ guɔ wɔŋjamɔ, bɔlɛnamɔ mli jeŋba shara, gbɔmɔgbee, amale, mumɔi atsɛmɔ, lá kɛ nitsumɔ yɛ gbɛ fɔŋ nɔ, kɛ eshai sɔrɔtoi. (Bɔfoi lɛ Asaji 15:28, 29; 1 Korintobii 6:9, 10; Kpojiemɔ 21:8) Ni kɛlɛ, esa akɛ wɔkɛ wɔ jwɛŋmɔŋ nyɛmɔ lɛ atsu nii ni wɔkɛkase ni wɔkɛ Biblia mli shishitoo mlai atsu nii kɛya shɔŋŋ fe bɔ ni ataoɔ yɛ Israelbii lɛ adɛŋ lɛ. Taakɛ wiemɔ hee ko ni aaanu shishi ji lɛ, ebiɔ be kɛ mɔdɛŋbɔɔ. Mɛɛ gbɛ nɔ wɔɔtsɔ ni wɔha wɔ jwɛŋmɔŋ nyɛmɔ aya hiɛ?
Ojwɛŋmɔŋ Nyɛmɔ ni Oooha Aya Hiɛ
6. Mɛni yɔɔ Biblia lɛ kasemɔ mli?
6 Klɛŋklɛŋ lɛ, esa akɛ wɔfee Biblia lɛ kaselɔi ni hiɛ dɔɔ. Nyɔŋmɔ Wiemɔ ni jɛ mumɔŋ lɛ “hi ha nitsɔɔmɔ, kɛ hiɛkamɔ, kɛ mɔ saamɔ, kɛ tsɔsemɔ ni yɔɔ jalɛ mli.” (2 Timoteo 3:16) Esaaa akɛ wɔkpaa gbɛ be fɛɛ be akɛ abaaha naagba ko hetoo faŋŋ yɛ Biblia kuku kome mli. Shi moŋ, ekolɛ ehe baahia ni wɔsusu ŋmalɛi sɔrɔtoi pii ni tsɔɔ shihilɛ loo naagba pɔtɛɛ ko mli lɛ ahe. Ehe baahia ni wɔtao bɔ ni Nyɔŋmɔ susuɔ sane lɛ he lɛ mli jogbaŋŋ. (Abɛi 2:3-5) Shishinumɔ hu he miihia wɔ, ejaakɛ “nuu ni nuɔ sane shishi lɛ ji mɔ ni naa gbɛtsɔɔmɔ ni hesaa yɔɔ mli.” (Abɛi 1:5, NW) Gbɔmɔ ni nuɔ sane shishi lɛ baanyɛ agbála saji komekomei ni yɔɔ sane ko mli lɛ mli, kɛkɛ lɛ eyoo bɔ ni amɛkɔɔ amɛhe amɛhaa. Taakɛ eji yɛ nɔ ko ni enaanamɔ wa lɛ gbɛfaŋ lɛ, ekɛ fãfãafãi lɛ tsaraa koni ena bɔ ni mfoniri lɛ fɛɛ yɔɔ ha.
7. Te fɔlɔi aaafee tɛŋŋ amɛjwɛŋ Biblia shishitoo mlai ni kɔɔ tsɔsemɔ he lɛ nɔ?
7 Akɛ nɔkwɛmɔ nɔ lɛ, ŋɔɔ lɛ akɛ atsɔmɔ fɔlɔi. Abɛi 13:24 kɛɔ akɛ tsɛ ni sumɔɔ ebi lɛ “jɛɔ mra etsɔseɔ lɛ.” Kɛ wɔkpɛlɛ nɔ nakai kɛkɛ lɛ, abaanyɛ ni akɛ ŋmalɛ nɛɛ atsu nii yɛ gbɛ ni ejaaa nɔ, ni akɛbu toigbalamɔ ni yɔɔ keketee ni baaa naagbee bem. Ni kɛlɛ, Kolosebii 3:21 (NW) kɛ ŋaawoo ni ŋmɛɔ pɛpɛɛpɛ haa: “Nyɛ tsɛmɛi lɛ, nyɛkawoa nyɛbii amlila, koni amɛnijiaŋ akaje wui.” Fɔlɔi ni kɛ amɛ jwɛŋmɔŋ nyɛmɔ tsuɔ nii ni haa shishitoo mlai nɛɛ ŋmɛɔ pɛpɛɛpɛ lɛ kɛ tsɔsemɔ ni abaanyɛ atsɛ lɛ akɛ “eyeɔ awui” haŋ. Amɛkɛ amɛbii baaye yɛ miishɛɛ, shishinumɔ, kɛ woo mli. (Efesobii 6:4) No hewɔ lɛ, kɛ eba fɔlɔi anitsumɔ loo sane kroko ni kɔɔ Biblia shishitoo mlai ahe lɛ, wɔbaanyɛ wɔha wɔ jwɛŋmɔŋ nyɛmɔ aya hiɛ kɛtsɔ saji fɛɛ ni kɔɔ he lɛ ni wɔɔŋmɛ wɔkwɛ nɔ. Yɛ nɛkɛ gbɛ nɔ wɔbaanyɛ wɔyoo Biblia shishitoo mlai ahe “wiemɔ he mla,” nɔ ni Nyɔŋmɔ yiŋtoo ji, kɛ gbɛ ni eeetsɔ nɔ etsu no he nii.
8. Te wɔɔfee tɛŋŋ wɔkwa susumɔi ni yɔɔ kpɛŋŋ ni booo mɔ ko toi kɛ eba hiɛtserɛjiemɔ he?
8 Gbɛ ni ji enyɔ ni wɔɔnyɛ wɔtsɔ nɔ wɔha wɔ jwɛŋmɔŋ nyɛmɔ aya hiɛ ji ni wɔkwa susumɔi ni yɔɔ kpɛŋŋ ni booo mɔ ko toi. Nii ahe susumɔ ni bɛ tswãa lɛ tsĩɔ wɔ jwɛŋmɔŋ nyɛmɔ ni aaada kɛya hiɛ lɛ naa. Susumɔ hiɛtserɛjiemɔ he sane lɛ he. Biblia lɛ kɛɔ akɛ: “Jeŋ muu lɛ fɛɛ ka mɔ fɔŋ lɛ hewalɛ mli.” (1 Yohane 5:19, NW) Ani enɛ tsɔɔ akɛ wolo fɛɛ wolo, sini loo tɛlivishin nɔ nibii fɛɛ ni je lɛ feɔ lɛ ekpɔtɔ ni eji Satan nibii? Shishinumɔ ni tamɔ nɛkɛ efeŋ nɔ ni jwɛŋmɔ yɔɔ mli. Eyɛ mli akɛ, mɛi komɛi baasumɔ ni amɛtsi amɛhe kɛjɛ tɛlivishin, sinii, loo je lɛŋ woji ahe kwraa. Amɛ hegbɛ ji no, ni esaaa akɛ awieɔ ashiɔ amɛ yɛ enɛ hewɔ. Ni asaŋ amɛkabɔ mɔdɛŋ akɛ amɛaanyɛ mɛi krokomɛi anɔ koni amɛkɔ gbɛ ni yɔɔ keketee nɛɛ nɔŋŋ. Asafo lɛ eŋmala saji ni kɛ Biblia shishitoo mlai mamɔɔ shi koni eha wɔnyɛ wɔhala nibii amli yɛ nilee mli yɛ wɔ hejɔɔmɔ loo hiɛtserɛjiemɔ mli. Ni wɔɔya kɛteke nɛkɛ gbɛtsɔɔmɔi nɛɛ ni wɔŋmɛɛ wɔhe wɔha susumɔi gbohii, awuiyelii, loo mumɔi atsɛmɔ ni fa babaoo yɛ je nɛŋ hiɛtserɛjiemɔ mli lɛ baafee nɔ ni nilee bɛ mli kwraa. Yɛ anɔkwale mli lɛ, hiɛtserɛjiemɔ ni akɛ nilee halaa lɛ biɔ ni wɔkɛ wɔ jwɛŋmɔŋ nyɛmɔ atsu nii ni wɔkɛ Biblia shishitoo mlai ato he koni wɔna henilee ni mli tse yɛ Nyɔŋmɔ kɛ gbɔmɔ hiɛ.—1 Korintobii 10:31-33.
9. Mɛni ji wiemɔ “sɛɛyoomɔ fɛɛ” lɛ shishi?
9 Eyɛ faŋŋ akɛ ŋmɛnɛŋmɛnɛ hiɛtserɛjiemɔ lɛ pii ehiii haaa Kristofoi.a No hewɔ lɛ, esa akɛ wɔtsɔse wɔtsuii koni ‘enyɛ efɔŋ’ ni wɔkatsɔmɔ tamɔ klɛŋklɛŋ afii oha lɛ mli bii komɛi ni “nɔ ko nɔ ko efeee amɛ hiɛgbele dɔŋŋ” lɛ. (Lala 97:10; Efesobii 4:17-19) Bɔni afee ni wɔjwɛŋ saji ni tamɔ nɛkɛ he lɛ, “anɔkwa nilee kɛ sɛɛyoomɔ fɛɛ” he miihia wɔ. (Filipibii 1:9, NW) Hela wiemɔ ni atsɔɔ shishi akɛ “sɛɛyoomɔ” lɛ tsɔɔ “jeŋba yoomɔ henumɔ.” Wiemɔ lɛ kɔɔ gbɔmɔ henumɔi diɛŋtsɛ lɛ ahe, tamɔ nii ni anaa. Kɛ eba hiɛtserɛjiemɔ gbɛfaŋ, loo sane kroko ni biɔ yiŋ ni esa akɛ mɔ diɛŋtsɛ akpɛ he lɛ, esa akɛ wɔkɛ wɔ jeŋba henumɔ lɛ ama shi, jeee ni wɔnyɛ wɔyoo nibii ni hi kɛ nɔ ni ehiii lɛ pɛ, shi moŋ nibii ni kã teŋ ni bɛ faŋŋ lɛ hu. Yɛ nakai beaŋ nɔŋŋ lɛ, esa akɛ wɔkwa Biblia shishitoo mlai ni wɔkɛaatsu nii kɛyashɛ he ni shishinumɔ bɛ mli, ni wɔmiima nɔ mi doo akɛ wɔnyɛmimɛi lɛ fɛɛ afee nakai nɔŋŋ lɛ.—Filipibii 4:5.
10. Te wɔɔfee tɛŋŋ wɔnu Yehowa su kɛ baŋ shishi taakɛ atsɔɔ yɛ Lala 15 lɛ?
10 Gbɛ ni ji etɛ ni wɔɔtsɔ nɔ wɔha wɔ jwɛŋmɔŋ nyɛmɔ aya hiɛ ji ni wɔnu bɔ ni Yehowa jwɛŋɔ nii ahe ehaa lɛ shishi ni wɔtɛo enɛ yɛ wɔtsui mli tɔ̃ɔ. Yehowa jieɔ esu kɛ baŋ kɛ tɛi ni efolɔ eshwie shi lɛ kpo yɛ e-Wiemɔ lɛ mli. Akɛ nɔkwɛmɔ nɔ lɛ, wɔkaneɔ gbɔmɔ ni Yehowa fɔɔ lɛ nine ni ebato ebuu lɛ mli lɛ he sane yɛ Lala 15. Gbɔmɔ ni tamɔ nɛkɛ tsuɔ jalɛ nii, ewieɔ anɔkwale yɛ etsui mli, eyeɔ eshiwooi anɔ, ni eyeee mɛi krokomɛi ahe nii. Yɛ Lala nɛɛ kanemɔ mli lɛ, bi ohe akɛ, ‘Ani sui nɛɛ tsɔɔ bɔ ni miji? Ani Yehowa baafɔ mi nine ni mibato ebuu mli?’ Awajeɔ wɔ sɛɛyoomɔ nyɛmɔi lɛ yɛ be mli ni wɔbafeɔ mɛi ni kɛ Yehowa gbɛ̀i kɛ ejwɛŋmɔ kpaa gbee lɛ.—Abɛi 3:5, 6; Hebribii 5:14.
11. Te fee tɛŋŋ ni Farisifoi lɛ “shiɔ jalɛsaneyeli kɛ Nyɔŋmɔ suɔmɔ lɛ”?
11 Enɛ mli Farisifoi lɛ anine nyɛ shi kwraa yɛ lɛ. Farisifoi lɛ le bɔ ni ato Mla lɛ he gbɛjianɔ aha, shi amɛnyɛɛɛ amɛyoo “[e]wiemɔ he mla” lɛ. Amɛbaanyɛ amɛti Mla lɛ mli tsɔɔmɔi babaoo lɛ amli fitsofitso, shi amɛnyɛɛɛ amɛyoo Mɔ ni hɔ sɛɛ lɛ. Yesu kɛɛ amɛ akɛ: “Nyɛhaa kowɛ kɛ shwie kɛ baai sɔrɔtoi fɛɛ mlijaa nyɔŋma-nyɔŋma, ni nyɛshiɔ jalɛsaneyeli kɛ Nyɔŋmɔ suɔmɔ lɛ!” (Luka 11:42) Akɛni amɛjwɛŋmɔ efee keketee ni amɛtsuii wa hewɔ lɛ, Farisifoi lɛ nyɛɛɛ ni amɛkɛ amɛ jwɛŋmɔŋ nyɛmɔ atsu nii. Amɛ susumɔ ni kɛ ehe kpaaa gbee lɛ je kpo faŋŋ beni amɛwie amɛshi Yesu kaselɔi lɛ akɛ amɛmiikumɔ abele tsei ni amɛmiiye enɔ abele lɛ yɛ Hejɔɔmɔ Gbi nɔ lɛ; ni kɛlɛ, yɛ sɛɛ mli yɛ nakai gbi lɛ nɔ nɔŋŋ lɛ, amɛ henilee gbaaa amɛnaa beni amɛkpaŋ akɛ amɛaagbe Yesu lɛ!—Mateo 12:1, 2, 14.
12. Te wɔɔfee tɛŋŋ wɔfee mɛi ni kaseɔ Yehowa akɛ Mɔ ko pɔtɛɛ?
12 Wɔmiisumɔ ni wɔfee sɔrɔto yɛ Farisifoi lɛ ahe. Esa akɛ Nyɔŋmɔ Wiemɔ lɛ he nilee ni wɔna lɛ aye abua wɔ ni wɔkɛ Yehowa akpa gbee babaoo akɛ Mɔ ko. Te wɔɔfee tɛŋŋ wɔfee enɛ? Beni mɛi komɛi ekane Biblia lɛ loo woji ni akɛkaseɔ Biblia lɛ fã ko sɛɛ lɛ, sanebimɔi ni tamɔ nɛkɛ he susumɔ eye ebua amɛ, ‘Mɛni nɛkɛ sane nɛɛ tsɔɔ mi yɛ Yehowa kɛ esui ahe? Te mafee tɛŋŋ majie Yehowa sui akpo yɛ bɔ ni mikɛ mɛi krokomɛi yeɔ haa lɛ mli?’ Sanebimɔi ni tamɔ nɛkɛ nɔjwɛŋmɔ haa wɔ jwɛŋmɔŋ nyɛmɔ yaa hiɛ, ni ehaa wɔnyɛɔ wɔtsɔmɔɔ “Nyɔŋmɔ kaselɔi.”—Efesobii 5:1.
Nyɔŋmɔ kɛ Kristo Tsuji, Jeee Gbɔmɛi Atsuji
13. Farisifoi lɛ fee amɛnii tamɔ mɛi ni yeɔ mɛi krokomɛi ajeŋba nɔ yɛ mɛɛ gbɛ nɔ?
13 Esa akɛ onukpai lɛ aŋmɛ mɛi ni amɛkwɛɔ amɛnɔ lɛ gbɛ ni amɛkɛ amɛ jwɛŋmɔŋ nyɛmɔ atsu nii. Asafo lɛ mli bii lɛ jeee gbɔmɛi atsuji. Paulo ŋma akɛ: “Ejaakɛ kɛ mika he miisa gbɔmɛi ahiɛ lolo lɛ, jeee Kristo tsulɔ ji mi.” (Galatabii 1:10; Kolosebii 3:23, 24) Nɔ ni tamɔɔɔ nakai lɛ, Farisifoi lɛ miisumɔ ni gbɔmɛi ahe aye akɛ ehe miihia waa ni asa gbɔmɛi ahiɛ fe Nyɔŋmɔ. (Mateo 23:2-7; Yohane 12:42, 43) Farisifoi lɛ kɔfɔ̃ amɛnɔ akɛ amɛaatsɔɔ nɔ ni jeŋba ji, ni amɛto amɛ diɛŋtsɛ amɛ mlai, ni amɛkojo mɛi krokomɛi yɛ bɔ ni amɛsa jogbaŋŋ ha lɛ naa. Mɛi ni nyiɛ Farisifoi lɛ asɛɛ lɛ gbɔjɔ yɛ amɛ henilee ni Biblia etsɔse lɛ naa, ni nɔ ni jɛ mli ba ji gbɔmɛi atsuji ni amɛbatsɔmɔ.
14, 15. (a) Te onukpai lɛ aaafee tɛŋŋ amɛjie amɛhe kpo akɛ amɛji asafoku lɛ nanemɛi nitsulɔi? (b) Te esa akɛ onukpai atsu henilee he saji ahe nii amɛha tɛŋŋ?
14 Kristofoi onukpai le ŋmɛnɛ akɛ jeee amɛ titri tooi lɛ baabu amɛhe akɔntaa amɛha. Esa akɛ Kristofonyo fɛɛ Kristofonyo atere lɛ diɛŋtsɛ ejatsu. (Romabii 14:4; 2 Korintobii 1:24; Galatabii 6:5) Esa akɛ eba lɛ nakai. Yɛ anɔkwale mli lɛ, kɛji akɛ asafoku lɛ mlibii aaafee gbɔmɛi atsuji, ni amɛmiibo toi kɛkɛ akɛni aakwɛ amɛ hewɔ lɛ, mɛni amɛbaafee kɛ nakai gbɔmɛi lɛ bɛ? Paulo yɛ nɔ ni eeedamɔ nɔ enyã Filipibii lɛ ahe: “Taakɛ bɔ ni nyɛboɔ toi daa nɛɛ, jeee beni mikɛ nyɛ yɔɔ lɛ kɛkɛ, shi moŋ titri lɛ, agbɛnɛ ni mibɛ nyɛŋɔɔ nɛɛ hu lɛ, nyɛkɛ gbeyeishemɔ kɛ hekpokpomɔ atsua nyɛ diɛŋtsɛ nyɛ yiwalaheremɔ he nii.” Amɛji Kristo tsuji lɛlɛŋ, shi jeee Paulo tsuji.—Filipibii 2:12.
15 No hewɔ lɛ, onukpai lɛ ekpɛɛɛ yiŋ amɛhaaa mɛi ni yɔɔ amɛkwɛmɔ shishi lɛ yɛ henilee he saji agbɛfaŋ. Amɛtsɔɔ Biblia mli shishitoo mlai ni kɔɔ sane ko he lɛ mli, ni amɛŋmɛɔ aŋkroaŋkroi ni ekɔɔ amɛhe lɛ agbɛ ni amɛkɛ amɛ diɛŋtsɛ amɛ jwɛŋmɔŋ nyɛmɔi atsu nii ni amɛkɛkpɛ amɛyiŋ. Gbɛnaa nii ni hiɛdɔɔ yɔɔ mli nɛ, ni kɛlɛ no ji nɔ ni esa akɛ mɔ aŋkro lɛ diɛŋtsɛ atere.
16. Mɛɛ gbɛjianɔtoo yɔɔ Israel ni atsɔ nɔ akɛtsu naagbai ahe nii?
16 Susumɔ be mli ni Yehowa kɛ kojolɔi tsu nii koni amɛkudɔ Israel lɛ he. Biblia lɛ kɛɔ wɔ akɛ: “Nakai gbii lɛ amli lɛ, maŋtsɛ ko bɛ Israel; mɔ fɛɛ mɔ feɔ nɔ ni ja yɛ lɛ diɛŋtsɛ ehiɛ.” (Kojolɔi 21:25) Kɛlɛ, Yehowa kɛ nɔ ni ewebii lɛ baanyɛ atsɔ nɔ ana gbɛtsɔɔmɔ ha amɛ. Maŋ fɛɛ maŋ yɛ onukpai ni amɛbaanyɛ amɛkɛ yelikɛbuamɔ aha kɛ sanebimɔi kɛ naagbai te shi. Kɛfata he lɛ, Levi osɔfoi lɛ tsu nii akɛ mɛi ni na gbɔmɛi lɛ anɔ hewalɛ kpakpa, kɛtsɔ Nyɔŋmɔ mlai lɛ ni amɛkɛtsɔɔ gbɔmɛi lɛ nɔ. Kɛ saji pɔtɛɛ ni mli wawai te shi lɛ, osɔfonukpa lɛ baanyɛ abi Nyɔŋmɔ kɛtsɔ urim kɛ tumim lɛ nɔ. Insight on the Scriptures lɛ wie he akɛ: “Mɔ aŋkro lɛ ni kɛ ehe haa gbɛjianɔ ni ato nɛɛ, ni naa Nyɔŋmɔ mla lɛ he nilee, ni ekɛtsuɔ nii lɛ, naa gbɛtsɔɔmɔ kpakpa kɛhaa ehenilee. Nɔ fɔŋ ko baŋ ‘nɔ ni ja yɛ lɛ diɛŋtsɛ ehiɛ’ ni efeɔ yɛ nɛkɛ sane nɛɛ mli lɛ mli. Yehowa ŋmɛ gbɔmɛi lɛ gbɛ ni amɛjie su kɛ gbɛ ni tsɔɔ suɔmɔ ni ayɔɔ loo suɔmɔ ni bɛ kpo.”—Kpo 2, baafai 162-3.b
17. Te onukpai aaafee tɛŋŋ atsɔɔ akɛ amɛwoɔ ŋaa yɛ tɛi ni Nyɔŋmɔ efolɔ eshwie shi lɛ anaa, shi jeee amɛ diɛŋtsɛ amɛnɔ̃?
17 Taakɛ Israel kojolɔi kɛ osɔfoi lɛ ji lɛ, asafoŋ onukpai kɛ yelikɛbuamɔ ni sa haa yɛ naagbai ahe ni amɛwoɔ ŋaa ni sɛɛnamɔ yɔɔ he. Yɛ bei komɛi amli lɛ, ‘amɛkãa hiɛ, amɛwoɔ ŋaa, amɛbɔɔ kɔkɔ yɛ tsuishitoo kɛ nitsɔɔmɔ fɛɛ mli.’ (2 Timoteo 4:2) Amɛfeɔ nakai yɛ tɛi ni Nyɔŋmɔ efolɔ eshwie shi lɛ anaa, jeee amɛ diɛŋtsɛ amɛ nɔ̃. Kwɛ bɔ ni enɛ mɔɔ shi jogbaŋŋ ha, kɛ onukpai to okadi amɛfɔ shi ni amɛbɔ mɔdɛŋ ni amɛnine ashɛ tsuii anɔ lɛ!
18. Mɛni hewɔ kɛ onukpai anine shɛ tsuii anɔ lɛ no mɔɔ shi jogbaŋŋ titri lɛ?
18 Tsui lɛ ji wɔ Kristofoi anitsumɔ “tsɔne.” No hewɔ lɛ, Biblia lɛ kɛɔ akɛ: “No mli wala jɛɔ.” (Abɛi 4:23) Onukpai ni kanyaa tsuii lɛ baana akɛ etsirɛɔ mɛi ni yɔɔ asafo lɛ mli lɛ koni amɛfee nɔ fɛɛ nɔ ni amɛaanyɛ yɛ Nyɔŋmɔ sɔɔmɔ mli. Amɛbaafee mɛi ni tsɔɔ nifeemɔ hiɛ, ehe ehiaaa ni mɛi krokomɛi atsirɛ amɛ be fɛɛ be. Yehowa sumɔɔɔ toiboo ni akɛ nɔnyɛɛ feɔ. Eetao toiboo ni jɛɔ tsui ni suɔmɔ eyi mli obɔ mli. Onukpai baanyɛ awo sɔɔmɔ ni tsui kanyaa lɛ nɛɛ he hewalɛ kɛtsɔ mɛi ni yɔɔ asafoku lɛ mli lɛ ni amɛaaye amɛbua amɛ ni amɛha amɛ jwɛŋmɔŋ nyɛmɔ aya hiɛ lɛ nɔ.
“Kristo Jwɛŋmɔ” lɛ ni Aaaná
19, 20. Mɛni hewɔ ehe hiaa akɛ wɔɔna Kristo jwɛŋmɔ lɛ?
19 Taakɛ akadi lɛ, efaaa kɛkɛ akɛ aaale Nyɔŋmɔ mlai. Lalatsɛ lɛ kpa fai akɛ: “Ha mi sɛɛyoomɔ, ni mihiɛ aka omla lɛ he, ni maye nɔ kɛ mitsui muu lɛ fɛɛ.” (Lala 119:34) Yehowa ejie “Kristo jwɛŋmɔ lɛ” kpo yɛ e-Wiemɔ lɛ mli. (1 Korintobii 2:16) Akɛ mɔ ni kɛ ejwɛŋmɔŋ nyɛmɔ sɔmɔ Yehowa lɛ, Yesu to okadi ni yeɔ emuu efɔ shi kɛha wɔ. Enu Nyɔŋmɔ mlai kɛ shishitoo taomɔ nii ashishi, ni ekɛtsu nii ni tɔmɔ ko kwraa baaa he. Kɛ wɔkase enɔkwɛmɔ nɔ lɛ, wɔbaanyɛ “[wɔ]na hewalɛ ni . . . [wɔ]yoo nɔ ni ji lɛɛmɔ kɛ kɛlɛ kɛ mlikwɔlɛ kɛ nɔkwɔlɛ lɛ, ni [wɔ]le Kristo suɔmɔ ni ta nilee fɛɛ nɔ lɛ.” (Efesobii 3:17-19) Hɛɛ, nɔ ni wɔkaseɔ kɛjɛɔ Biblia lɛ mli yɛ Yesu he lɛ yaa shɔŋŋ kɛtekeɔ yitsoŋ nilee; ehaa wɔnaa bɔ ni Yehowa diɛŋtsɛ tamɔ ha lɛ mli faŋŋ.—Yohane 14:9, 10.
20 No hewɔ lɛ, yɛ be mli ni wɔkaseɔ Nyɔŋmɔ Wiemɔ lɛ, wɔbaanyɛ wɔyoo bɔ ni Yehowa jwɛŋmɔ ji yɛ saji komɛi ahe lɛ, ni wɔbaanyɛ wɔkpɛ yiŋ yɛ gbɛ ni ŋmɛɔ pɛpɛɛpɛ nɔ. Enɛ baabi mɔdɛŋbɔɔ. Esa akɛ wɔtsɔmɔ mɛi ni kɛ ekãa kaseɔ Nyɔŋmɔ Wiemɔ lɛ, ni wɔfee mɛi ni nuɔ Yehowa su kɛ baŋ kɛ tɛi ni efolɔ eshwie shi lɛ ahe. Etamɔ nɔ ni wɔmiikase wiemɔ he mla hee. Ni kɛlɛ, mɛi ni feɔ nakai lɛ baafee mɛi ni nyiɛɔ Paulo ŋaawoo akɛ “nyɛŋɔ nyɛ gbɔmɔtsei lɛ nyɛdamɔ shi akɛ afɔle ni hiɛ ka, ni he tse, ni sa Nyɔŋmɔ hiɛ, sɔɔmɔ krɔŋkrɔŋ kɛ nyɛ jwɛŋmɔŋ nyɛmɔ” lɛ sɛɛ.—Romabii 12:1, NW.
[Shishigbɛ niŋmai]
a Enɛ baajie hiɛtserɛjiemɔ ni daimonioi anifeemɔi, bɔlɛnamɔ mli mfonirii, loo mɛi ayiwalɛ nifeemɔ yɔɔ mli, kɛ agbɛnɛ nɔ ni akɛɛ atsɛɔ lɛ weku hiɛtserɛjiemɔ ni aŋmɛɔ nɔ fɛɛ nɔ ni Kristofoi nyɛŋ akpɛlɛ nɔ gbɛ yɛ mli lɛ kɛjɛ mli.
b Mɛi ni fee ji Watchtower Bible and Tract Society of New York, Inc.
Mɛni Okase?
◻ Mɛɛ tsakemɔ ni kɔɔ Nyɔŋmɔ sɔɔmɔ he ba yɛ 33 Ŋ.B.?
◻ Te wɔɔfee tɛŋŋ wɔha wɔ jwɛŋmɔŋ nyɛmɔ aya hiɛ?
◻ Te onukpai aaafee tɛŋŋ amɛye amɛbua mɛi ni yɔɔ asafoku lɛ mli lɛ ni amɛtsɔmɔ Nyɔŋmɔ kɛ Kristo tsuji?
◻ Mɛni hewɔ esa akɛ wɔna “Kristo jwɛŋmɔ lɛ”?
[Mfoniri ni yɔɔ baafa 23]
Onukpai yeɔ buaa mɛi krokomɛi koni amɛkɛ amɛ jwɛŋmɔŋ nyɛmɔ atsu nii