‘Yehowa Diɛŋtsɛ Kɛ Nilee Haa’

MƐƐ nibii asɛɛdii heɔ obe kɛ ohewalɛ? Ani gbɛi kpakpa ni ooofee oha ohe lɛ ji hiamɔ sane kɛha bo? Ani otuɔ ohe ohaa ninamɔi anaabuamɔ? Ni nitsumɔ kasemɔ yɛ nitsumɔ pɔtɛɛ ko mli loo hesaai ni oooha eya hiɛ yɛ nikasemɔi babaoo lɛ ateŋ lɛ mli hu? Ani okɛ mɛi krokomɛi ateŋ wekukpaa kpakpa ni oooná lɛ he hiaa bo? Ani gbɔmɔtsoŋ hewalɛnamɔ kpakpa ni oooná lɛ he hiaa bo titri?

Etamɔ nɔ ni sɛɛnamɔ ko yɛ nibii fɛɛ ni atsɔ hiɛ awie he lɛ he. Shi mɛni he hiaa waa lɛ? Biblia lɛ haa hetoo akɛ: “Nilee shishi ji akɛ: Otao nilee.” (Abɛi 4:7) No hewɔ lɛ, te wɔɔfee tɛŋŋ wɔná nilee, ni mɛni ji emli sɛɛnamɔi? Biblia mli wolo ni ji Abɛi yitso enyɔ lɛ kɛ hetooi lɛ haa.

‘Bo Nilee Toi’

Beni ewieɔ akɛ tsɛ ní kɛ wiemɔi ni suɔmɔ yɔɔ mli haa lɛ, blema Israel Maŋtsɛ Salomo kɛɛ akɛ: “Mibi, kɛ omɔ miwiemɔi lɛ amli, ni okɛ mikitai lɛ to omasɛi, koni oba otoi shi oha nilee, ni okɛ otsui ha sanesɛɛkɔmɔ; hɛɛ, kɛ́ obolɔ otsɛ́ sɛɛyoomɔ, ní owó ogbee nɔ oha sane shishinumɔ, kɛji otao esɛɛgbɛ tamɔ jwiɛtɛi, ní otao tamɔ jwetrii ni aŋɔtee lɛ: No dani ooonu Yehowa gbeyeishemɔ shishi, ni oooná Nyɔŋmɔ he nilee.” ​—Abɛi 2:​1-5.

Ani oona he ni nilee ní oooná lɛ he sɔ̃ kã? Wiemɔ “kɛ” lɛ je kpo shii etɛ yɛ kukuji nɛɛ amli. Eyɛ faŋŋ akɛ, sɔ̃ kã wɔteŋ mɔ fɛɛ mɔ nɔ akɛ etaoɔ nilee kɛ ehefatalɔi​—sɛɛyoomɔ kɛ sane shishinumɔ.[2] Shi klɛŋklɛŋ lɛ, ehe miihia ni ‘wɔmɔ’ nilee wiemɔi ni aŋmala yɛ Ŋmalɛi lɛ amli lɛ ‘mli,’ ni ‘wɔkɛto’ wɔjwɛŋmɔ mli. Yɛ enɛ gbɛfaŋ lɛ, ehe miihia ni wɔkase Biblia lɛ.

Nilee ji ŋaalee ni Nyɔŋmɔ kɛha lɛ ni akɛtsuɔ nii yɛ gbɛ kpakpa nɔ. Ni kwɛ bɔ ni Biblia lɛ kɛ nilee haa jogbaŋŋ ehaa! Hɛɛ, nilee wiemɔi yɛ mli, tamɔ nɔ ni aŋmala yɛ Abɛi kɛ Jajelɔ woji lɛ amli lɛ, ni ehe miihia ni wɔbo wiemɔi nɛɛ atoi. Wɔnaa nɔkwɛmɔnii babaoo yɛ Biblia baafai lɛ amli ni miitsɔɔ sɛɛnamɔi ni Nyɔŋmɔ shishitoo mlai kɛ nitsumɔ lɛ kɛbaa, kɛ tsɔnei ni duɔ mɛi ni kuɔ amɛhiɛ amɛfɔ̃ɔ nɔ lɛ. (Romabii 15:4; 1 Korintobii 10:11) Ákɛ nɔkwɛmɔnɔ lɛ, susumɔ hiɛjoolɔ Gehazi, ni ji gbalɔ Elisha tsulɔ lɛ sane lɛ he okwɛ. (2 Maŋtsɛmɛi 5:​20-​27) Ani etsɔɔɔ wɔ nilee ni yɔɔ hiɛjoomɔ ni wɔɔtsi wɔhe kɛjɛ he lɛ mli? Ni awerɛho sane ni jɛ saramɔi ni etamɔ nɔ ni tɔmɔ ko bɛ he, ni Yakob biyoo Dina yasaraa Kanaan “shikpɔŋ lɛ nɔ biyei” lɛ hu? (1 Mose 34:​1-​31) Ani wɔyɔseee nilee ni bɛ naanyobɔɔ fɔŋ mli lɛ amrɔ nɔŋŋ?​—Abɛi 13:20; 1 Korintobii 15:33.

Nɔ ni fata nilee toi ni aaabo lɛ he ji sɛɛyoomɔ kɛ sane shishinumɔ kasemɔ. Taakɛ Webster’s Revised Unabridged Dictionary lɛ tsɔɔ lɛ, sɛɛyoomɔ ji “jwɛŋmɔŋ hewalɛ loo nyɛmɔ ni ekɛtsɔɔ srɔtofeemɔ ni yɔɔ nibii ateŋ.” Sɛɛyoomɔ ni Nyɔŋmɔ gbeyeishemɔ yɔɔ mli lɛ ji nyɛmɔ ni akɛyóoɔ nɔ ni ja kɛ nɔ ni ejaaa, ni agbɛnɛ ahalaa gbɛ ni ja. Ja wɔkɛ ‘wɔtsui ha’ sɛɛyoomɔ loo wɔtao waa ni wɔna, kɛ́ jeee nakai lɛ, te wɔɔfee tɛŋŋ wɔhi “gbɛ . . . ni kɛ mɔ yaa wala mli lɛ” nɔ? (Mateo 7:​14; okɛto 5 Mose 30:19, 20 he.) Nyɔŋmɔ Wiemɔ lɛ kasemɔ kɛ ekɛ nitsumɔ haa mɔ náa sɛɛyoomɔ.

Te wɔɔfee tɛŋŋ ‘wɔbolɔ wɔtsɛ sɛɛyoomɔ’​—ni ji nyɛmɔ ni akɛnaa bɔ ni sane oti ko mli nibii kɛ otii srɔtoi ni yɔɔ mli lɛ kpãa gbee haa lɛ? Eji anɔkwale akɛ, afii kɛ niiashikpamɔ ji nibii ni baanyɛ aye abua wɔ ní wɔná sane shishinumɔ babaoo​—shi jeee nakai doo. (Hiob 12:12; 32:​6-​12) Lalatsɛ lɛ kɛɛ akɛ: “Miyoo sane sɛɛ fe onukpai po, ejaakɛ miyeɔ [Yehowa] okpɔi lɛ anɔ.” Elá hu akɛ: “Owiemɔi lɛ anaagbelemɔ haa la, ehaa kwashiai leɔ nii.” (Lala 119:100, 130) Yehowa ji “mɔ ni eye gbii pii lɛ” ni eyɛ sane shishinumɔ ni bɛ naagbee, ní nɔkwɔlɛ fe adesai fɛɛ anɔ. (Daniel 7:​13) Nyɔŋmɔ baanyɛ aha mɔ ni bɛ niiashikpamɔ lɛ sane shishinumɔ, ni enɛ baaha ená nilee ni nɔ kwɔ fe mɛi ni edara yɛ afii amli fe lɛ lɛ po anɔ. No hewɔ lɛ, esa akɛ wɔkɛ he hiamɔ akase Nyɔŋmɔ Wiemɔ, ni ji Biblia lɛ, ni wɔkɛtsu nii.

Akɛ wiemɔ kuku ni ji “kɛ́,” ni atĩ mli yɛ wiemɔ lɛ shishijee mli yɛ Abɛi awolo lɛ yitso enyɔ lɛ tsáa wiemɔi tamɔ ‘omɔ mli,’ ‘okɛto,’ ‘obolɔ otsɛ́,’ kɛ ‘otao’ lɛ nɔ. Mɛni hewɔ niŋmalɔ lɛ kɛ wiemɔi ni maa nii anɔ mi babaoo nɛɛ tsu nii lɛ? Wolo ko wie he akɛ: “Nilelɔ lɛ miima bɔ ni ehe ehia ní akɛ mɔdɛŋbɔɔ atiu nilee sɛɛ lɛ nɔ mi [yɛ biɛ].”[8] Hɛɛ, esa akɛ wɔkɛ mɔdɛŋbɔɔ atiu nilee kɛ esui krokomɛi ni fata ehe​—ni ji sɛɛyoomɔ kɛ sane shishinumɔ lɛ asɛɛ.

Ani Obaabɔ Efeemɔ he Mɔdɛŋ?

Nɔ titri ni akɛtiuɔ nilee sɛɛ ji mɔdɛŋbɔɔ ni akɛkaseɔ Biblia lɛ. Shi kɛlɛ, esa akɛ nikasemɔ nɛɛ atsɔɔ babaoo fe ekanemɔ ni akɛmiitao adafitswaa kɛkɛ. Nibii ni wɔkaneɔ lɛ anɔ jwɛŋmɔ jogbaŋŋ ji Ŋmalɛi lɛ akasemɔ fã ko ni he hiaa. Nilee kɛ sɛɛyoomɔ ni wɔɔná lɛ biɔ ni wɔsusu bɔ ni wɔɔfee ni wɔkɛ nɔ ni wɔkaseɔ lɛ atsu nii ni wɔkɛna naagbai anaa ni wɔkɛfee yiŋkpɛɛi lɛ he. Sane shishinumɔ ni wɔnáa lɛ biɔ ni wɔsusu bɔ ni nikasemɔ hee lɛ saa nɔ ni wɔle kɛtsɔ hiɛ lɛ he ehaa lɛ he. Namɔ baanyɛ aje he ŋwane akɛ, Biblia kasemɔ ni asusuɔ he yɛ nɛkɛ gbɛ nɔ lɛ heɔ be kɛ hewalɛ? Be kɛ hewalɛ ni akɛwoɔ mli lɛ tamɔ nɔ ni akɛtsuɔ nii beni ‘ataoɔ jwiɛtɛi sɛɛgbɛ, ni ataoɔ esɛɛgbɛ tamɔ jwetrii ni aŋɔtee lɛ.’ Ani obaabɔ efeemɔ ni he hiaa lɛ he mɔdɛŋ? Ani ‘obaahe be lɛ’ ni okɛfee nakai?​—Efesobii 5:​15, 16.

Susumɔ jwetrii kpelei ni wɔbaaná kɛji wɔbote Biblia lɛ mli vii kɛ anɔkwa tsui lɛ he okwɛ. ‘Wɔbaaná Nyɔŋmɔ he nilee’​—ni ji nilee kpakpa ni haa wala ni jɛ wɔ-Bɔlɔ lɛ ŋɔɔ lɛ! (Yohane 17:3) “Yehowa gbeyeishemɔ” hu ji jwetri ni abaanyɛ aná. Kwɛ bɔ ni nɛkɛ bulɛ ni gbeyeishemɔ yɔɔ mli kɛha lɛ nɛɛ jara wa ha! Esa akɛ gbeyeishemɔ kpakpa ni wɔnáa akɛ wɔsumɔŋ ni wɔfee nɔ ko ni esaŋ ehiɛ lɛ akudɔ wɔshihilɛ mli nɔ fɛɛ nɔ, ni wɔkɛ mumɔŋ nibii afata nɔ fɛɛ nɔ ni wɔfeɔ lɛ he.​—Jajelɔ 12:13.

Esa akɛ bɔ ni wɔsumɔɔ ni wɔtsa shi kɛtao mumɔŋ jwetrii lɛ mli awa waa yɛ wɔmli. Bɔni afee ni wɔnii amlitaomɔ lɛ afee mlɛo lɛ, Yehowa kɛ dɛŋdadei ní nɔ bɛ, ni akɛtsaa shi​—Buu-Mɔɔ kɛ Awake! ni ji anɔkwale lɛ he woji ni baa yɛ ebe naa, kɛ agbɛnɛ Biblia kasemɔ he woji krokomɛi eha. (Mateo 24:45-​47) Yehowa kɛ Kristofoi akpeei hu eha koni akɛtsɔse wɔ yɛ e-Wiemɔ lɛ kɛ egbɛ̀i ahe. Ehe miihia ni wɔya kpeei daa, ni wɔbo nɔ ni akɛɔ lɛ toi jogbaŋŋ, ni wɔbɔ mɔdɛŋ ni wɔjwɛŋ otii lɛ ahe, ni wɔsusu wɔkɛ Yehowa teŋ wekukpaa lɛ he jogbaŋŋ.​—Hebribii 10:24, 25.

Onine Enyɛŋ Shi

Bei pii lɛ, jwinei, shika loo jwiɛtɛi ni aŋɔtee ni ataoɔ lɛ feɔ efolo. Esaaa akɛ enɛ baa lɛ nakai yɛ mumɔŋ jwetrii ni wɔtaoɔ lɛ he. Mɛni hewɔ? Salomo maa nɔ mi kɛhaa wɔ akɛ: “Yehowa haa aleɔ nii, edaŋ nilee kɛ sanesɛɛkɔmɔ jɛɔ.”​—Abɛi 2:6.

Ale Maŋtsɛ Salomo waa yɛ enilee lɛ hewɔ. (1 Maŋtsɛmɛi 5:​10-​12Ga Bible) Ŋmalɛi lɛ tsɔɔ mli akɛ, eyɛ nilee yɛ saji babaoo ahe, ni nɔ ni fata he ji, tsei, koolooi, adesai asu, kɛ Nyɔŋmɔ Wiemɔ lɛ.[9] Sɛɛyoomɔ ni ejie lɛ kpo akɛ oblanyo maŋtsɛ ni ekɛsaa naataamɔ ni kã yei enyɔ ni mɔ fɛɛ mɔ kɛɛ lɛ ji gbekɛ lɛ nyɛ lɛ ye ebua ni egbɛi bahe shi yɛ majimaji ateŋ. (1 Maŋtsɛmɛi 3:​16-​28) Mɛni ji enikasemɔ babaoo lɛ jɛɛhe? Salomo sɔle ebi ni Yehowa aha lɛ “nilee kɛ sɛɛyoomɔ” kɛ nyɛmɔ koni ‘ekɛyoo nɔ ni hi kɛ nɔ ni ehiii.’ Yehowa kɛ enɛɛmɛi ha lɛ.​—2 Kronika 1:​10-​12; 1 Maŋtsɛmɛi 3:9.

Esa akɛ wɔ hu wɔsɔle wɔbi Yehowa yelikɛbuamɔ beni wɔkɛ mɔdɛŋbɔɔ kaseɔ e-Wiemɔ lɛ. Lalatsɛ lɛ sɔle akɛ: “Yehowa, tsɔɔmɔ mi ogbɛ lɛ, manyiɛ onɔkwale lɛ mli; feemɔ mitsui ekome, ni mashe ogbɛi lɛ gbeyei!” (Lala 86:11) Yehowa kpɛlɛ nakai sɔlemɔ lɛ nɔ ejaakɛ eha aŋma afɔ̃ shi yɛ Biblia lɛ mli. Wɔbaanyɛ wɔná hekɛnɔfɔɔ akɛ, ebaaha mɔdɛŋ ni wɔbɔɔ ni wɔkɛsɔleɔ daa kɛha eyelikɛbuamɔ bɔni afee ni wɔtao mumɔŋ jwetrii ni yɔɔ Biblia lɛ mli lɛ hetoo.​—Luka 18:​1-8.

Salomo tsɔɔ mli akɛ: “Etiaa shweremɔ ehaa mɛi ni ja lɛ, tsɛŋ hu ji lɛ ha mɛi ni nyiɛɔ pɛpɛɛpɛ lɛ, koni ebu jalɛsaneyeli tempɔŋi lɛ ahe, ni ebaa emɛi krɔŋkrɔŋi lɛ agbɛ̀i lɛ ayi. No dani ooonu jalɛ kɛ kojomɔ kɛ nɔ ni ja, gbɛ kpakpa fɛɛ gbɛ kpakpa shishi.” (Abɛi 2:​7-9) Mɛɛ nɔmimaa enɛ ji nɛkɛ! Jeee anɔkwa nilee pɛ Yehowa kɛhaa mɛi ni biɔ lɛ yɛ anɔkwale mli lɛ, shi ejieɔ ehe kpo akɛ mɔ ni buɔ jalɔi ahe ejaakɛ amɛjieɔ anɔkwa nilee kpo ni amɛkɛ anɔkwayeli hiɔ shi yɛ ejalɛ shishitoo mlai lɛ anaa. Eba akɛ wɔɔfata mɛi ni Yehowa yeɔ ebuaa koni amɛnu “gbɛ kpakpa fɛɛ gbɛ kpakpa” shishi lɛ ahe.

Beni ‘Nilee Ŋɔɔ Onaa’

Teemɔŋ Biblia mli nikasemɔ​—ni ji taomɔ nii ni he hiaa ni akɛtao nilee lɛ​—jeee gbɛkpamɔ ko ni ŋɔɔ kɛha mɛi babaoo. Ákɛ nɔkwɛmɔnɔ lɛ, Lawrence ni eye afii 58 lɛ kɛɛ akɛ: “Mikɛ miniji tsuɔ nii be fɛɛ be. Nikasemɔ wa kɛha mi.”[10] Ni Michael, ni eye afii 24, ni náaa skul nikasemɔ he miishɛɛ lɛ kɛɛ akɛ: “Ehe bahia ni manyɛ minɔ kɛta shi ni makase nii.”[11] Shi kɛlɛ, abaanyɛ aná shwelɛ kɛha nikasemɔ.

Susumɔ nɔ ni Michael fee lɛ he okwɛ. Egba akɛ: “Mitsɔse mihe akɛ makase nii ŋmɛlɛtswaa fã daa gbi. Etsɛɛɛ ni mina bɔ ni enáa misubaŋ, misaji ahetoohamɔ yɛ Kristofoi akpeei ashishi, kɛ mikɛ mɛi krokomɛi asanegbaai anɔ hewalɛ ehaa. Amrɔ nɛɛ, mikwɛɔ be ní mikɛkaseɔ nii lɛ gbɛ, ni misumɔɔɔ ni nɔ ko nɔ ko bafoɔ mli.”[12] Hɛɛ, teemɔŋ nikasemɔ bafeɔ nɔ ni ŋɔɔ kɛji wɔna hiɛyaa ni wɔnáa lɛ.[12a] Lawrence hu fee Biblia mli nikasemɔ, ni yɛ be ni sa mli lɛ, ebasɔmɔ akɛ onukpa yɛ Yehowa Odasefoi asafo ko mli.[13]

Ní wɔɔha teemɔŋ nikasemɔ afee niiashikpamɔ ni ŋɔɔ lɛ biɔ mɔdɛŋbɔɔ babaoo. Shi kɛlɛ, sɛɛnamɔi lɛ da kpele. Salomo kɛɛ: “Ejaakɛ ŋaalee aaabote otsui mli ni nilee aaaŋɔɔ osusuma naa; jwɛŋmɔ aaabaa oyi jogbaŋŋ, sane shishinumɔ aaabu ohe.” ​—Abɛi 2:​10, 11.

“Ni Ejieo Kɛjɛ Gbɛ Fɔŋ Nɔ”

Mɛɛ gbɛ nɔ ŋaalee, nilee, jwɛŋmɔŋ hewalɛ nyɛmɔ, kɛ sɛɛyoomɔ baanyɛ afee hebuu nɔ̃ yɛ? Salomo kɛɛ: “Ni ejieo kɛjɛ gbɛ fɔŋ nɔ, kɛjɛ mɛi ni wieɔ nibii kɔ̃dɔ̃ji lɛ adɛŋ, mɛi hu ni shiɔ jalɛ tempɔŋi lɛ, ní amɛyanyiɛɔ dujiaŋ gbɛ̀i anɔ lɛ, mɛi ni nyaa efɔŋfeemɔ he ni amɛmli filiɔ amɛ yɛ nibii fɔji kɔ̃dɔ̃ji ahe lɛ, mɛi ni amɛtempɔŋi ekɔ̃dɔ̃kɔ̃dɔ̃i, ni amɛgbɛ̀i lɛ etsɔmɔ afãfã lɛ.” ​—Abɛi 2:​12-​15.

Hɛɛ, mɛi ni sumɔɔ anɔkwa nilee lɛ kpoɔ akɛ amɛkɛ mɔ ko ni “wieɔ nibii kɔ̃dɔ̃ji,” ni ji, nibii ni teɔ shi woɔ nibii ni ja ni ji anɔkwale lɛ aaabɔ. Jwɛŋmɔŋ hewalɛ nyɛmɔ kɛ sɛɛyoomɔ buɔ mɔ he kɛjɛɔ mɛi ni kpooɔ anɔkwale lɛ, ní amɛyanyiɛɔ duŋ mli lɛ ahe, ni ebuɔ mɔ he kɛjɛɔ mɛi ni feɔ nifɔjianii, ni amɛnáa nibii gbohii afeemɔ he miishɛɛ lɛ ahe.​—Abɛi 3:​32.

Kwɛ bɔ ni wɔmii shɛɔ wɔhe akɛ, anɔkwa nilee kɛ esui krokomɛi ni fata he lɛ hu buɔ wɔhe kɛjɛɔ gbɛ̀i fɔji ni hii kɛ yei ni bɛ jeŋba lɛ kɛbaa lɛ he! Salomo kɛfataa he akɛ, nɛkɛ sui nɛɛ yɛ “koni ejieo kɛjɛ mɔ kroko ŋa dɛŋ, kɛjɛ yoo mɔkpɔŋ ni wieɔ dɔkɔbii lɛ dɛŋ, mɔ ni ekwa eblayeiaŋ wu lɛ, ni ehiɛ ekpa e-Nyɔŋmɔ lɛ kpaŋmɔ lɛ nɔ lɛ; ejaakɛ ewe lɛ ekpa kɛmiiya gbele mli, ni egbɛ̀i lɛ miiya sisai ateŋ; mɛi fɛɛ ni yaa eŋɔɔ lɛ ekuuu amɛsɛɛ dɔŋŋ, ni amɛshɛɛɛ wala gbɛ̀i lɛ anɔ.” ​—Abɛi 2:​16-​19.

Afee “yoo mɔkpɔŋ,” ni ji ajwamaŋbɔlɔ[15] lɛ he mfoniri akɛ mɔ ko ni shiɔ ‘eblayeiaŋ teemɔŋ naanyo’​—ekolɛ eblayeiaŋ wu.a[16] (Okɛto Maleaki 2:​14 he.) Ehiɛ ekpa ajwamaŋbɔɔ he naatsii ni fata Mla kpaŋmɔ lɛ he lɛ nɔ.[17] (2 Mose 20:14) Egbɛ̀i lɛ kɛ mɔ yaa gbele mli. Mɛi fɛɛ ni kɛ lɛ bɔɔ lɛ, “amɛshɛɛɛ wala gbɛ̀i lɛ anɔ,” ejaakɛ etsɛɛɛ loo no sɛɛ lɛ, amɛshɛɔ he ko ni amɛnyɛɛɛ amɛku amɛsɛɛ dɔŋŋ, ni ji gbele ni amɛnyɛɛɛ amɛku amɛsɛɛ kɛba lɛ mli.[18] Mɔ ni yɔɔ sɛɛyoomɔ kɛ jwɛŋmɔŋ nyɛmɔ lɛ le jeŋba shara he ŋaai lɛ ni ekɛ nilee tsiɔ ehe kɛjɛɔ ehe ni ekɛaawo mli lɛ mli.

‘Mɛi ni Ja lɛ Aaahi Shikpɔŋ lɛ Nɔ’

Beni emuɔ nɔ hewɔ ni ekɛ ŋaawoo ni kɔɔ nilee he lɛ haa lɛ naa lɛ, Salomo kɛɛ akɛ: “Koni onyiɛ gbɔmɛi kpakpai agbɛ lɛ nɔ, ni ohi jalɔi atempɔŋi lɛ anɔ.” (Abɛi 2:​20) Mɛɛ yiŋtoo ni yɔɔ naakpɛɛ nilee hiɛ nɛkɛ! Eyeɔ ebuaa wɔ ni wɔhiɔ shi yɛ miishɛɛ kɛ tsui ni nyɔɔ mɔ mli ní kɛ Nyɔŋmɔ nɔkpɛlɛmɔ baa lɛ mli.

Susumɔ jɔɔmɔi ni yɔɔ nyam hu ni asaa ato mɛi ni “nyiɛɔ gbɔmɛi kpakpai agbɛ lɛ” nɔ lɛ he okwɛ. Salomo tee nɔ akɛ: “Mɛi ni ja lɛ aaahi shikpɔŋ lɛ nɔ, ni mɛi ni eye emuu lɛ aaashwɛ yɛ nɔ; shi aaafolɔ mɛi fɔji lɛ kɛaajɛ shikpɔŋ lɛ nɔ, ni aaafamɔ kutumpɔfoi lɛ kɛaajɛ nɔ.” (Abɛi 2:​21, 22) Eba akɛ obaafata mɛi ni kpa ko bɛ amɛhe ni baahi shi yɛ Nyɔŋmɔ jalɛ jeŋ hee lɛ mli kɛya naanɔ lɛ ahe.​—2 Petro 3:​13.

[Shishigbɛ niŋmai]

[Mfoniri ni yɔɔ baafa 26]

Salomo sɔle ebi nilee. Esa akɛ wɔ hu wɔfee nakai