Dɔɔ Otsui Oha Sɛɛyoomɔ
“Yehowa diɛŋtsɛ kɛ nilee haa, edaaŋ nilee kɛ sɛɛyoomɔ jɛɔ.”—ABƐI 2:6, NW.
1. Te wɔɔfee tɛŋŋ wɔdɔ wɔtsui wɔha sɛɛyoomɔ?
YEHOWA ji wɔ Tsɔɔlɔ Kpele. (Yesaia 30:20, 21) Shi mɛni esa akɛ wɔfee koni “Nyɔŋmɔ he nilee” ni ejie lɛ kpo yɛ e-Wiemɔ lɛ mli lɛ he aba sɛɛnamɔ aha wɔ? Eko ji, esa akɛ ‘wɔdɔ wɔtsui wɔha sɛɛyoomɔ’—wɔná tsuiŋ suɔmɔ akɛ wɔɔná su nɛɛ ni wɔjie no kpo. Yɛ enɛ gbɛfaŋ lɛ, esa akɛ wɔkwɛ Nyɔŋmɔ, ejaakɛ nilelɔ lɛ kɛɛ: “Yehowa diɛŋtsɛ kɛ nilee haa, edaaŋ nilee kɛ sɛɛyoomɔ jɛɔ.” (Abɛi 2:1-6, NW) Mɛni ji nilee, ŋaalee, kɛ sɛɛyoomɔ?
2. (a) Mɛni ji nilee? (b) Te obaatsɔɔ ŋaalee mli oha tɛŋŋ? (d) Mɛni ji sɛɛyoomɔ?
2 Nilee ji anɔkwalei ni aná kɛtsɔ niiashikpamɔ, nikwɛmɔ, loo nikasemɔ ni abale lɛ nɔ. Ŋaalee ji nyɛmɔ ni hãa anyɛɔ akɛ nilee tsuɔ nii yɛ gbɛ ni ja nɔ. (Mateo 11:19) Maŋtsɛ Salomo kɛ ŋaalee tsu nii beni yei enyɔ lɛ ateŋ mɔ fɛɛ mɔ kɛɛ abifao kome too lɛ nɔŋŋ ji ebi lɛ, ni ekɛ nilee ni eyɔɔ yɛ hetuu-kɛhamɔ ni nyɛ̃ yɔɔ kɛha ebi he lɛ tsu nii ni ekɛna sane lɛ naa. (1 Maŋtsɛmɛi 3:16-28) Sɛɛyoomɔ ji “hiɛtɛ̃ɛ ni naa ba yɛ kojomɔ mli.” Eji “jwɛŋmɔŋ hewalɛ loo nyɛmɔ ni ekɛtsɔɔ sɔrɔtofeemɔ ni yɔɔ nibii ateŋ.” (Webster’s Universal Dictionary) Kɛ wɔdɔ wɔtsui kɛtee sɛɛyoomɔ he lɛ, Yehowa baatsɔ e-Bi lɛ nɔ ekɛha wɔ. (2 Timoteo 2:1, 7) Shi te aaafee tɛŋŋ ni sɛɛyoomɔ aaaná shihilɛ mli nibii sɔrɔtoi lɛ anɔ hewalɛ?
Sɛɛyoomɔ kɛ Wɔ Wiemɔ
3. Te obaatsɔɔ Abɛi 11:12, 13 kɛ nɔ ni ‘bɛ tsui’ lɛ shishi ji lɛ mli oha tɛŋŋ?
3 Sɛɛyoomɔ yeɔ ebuaa wɔ ni wɔyɔseɔ akɛ “dioofeemɔ be yɛ, ni wiemɔ be yɛ.” (Jajelɔ 3:7) Su nɛɛ hu haa wɔkwɛɔ nɔ ni wɔwieɔ lɛ jogbaŋŋ. Abɛi 11:12, 13 (NW) kɛɔ akɛ: “Mɔ ni gbeɔ enaanyo he guɔ lɛ, ebɛ tsui; shi mɔ ni yɔɔ jwɛŋmɔ lɛ, ebuɔ enaa. Mɔ ni nyiɛ ni etãa sane lɛ, ejieɔ teemɔŋ saji akpo, shi mɔ ni yɔɔ anɔkwale mumɔ lɛ, etsimɔɔ sane nɔ.” Hɛɛ, nuu loo yoo ni gbeɔ mɔ kroko he guɔ lɛ ‘bɛ tsui.’ Taakɛ Wilhelm Gesenius ni feɔ wiemɔi komekomei ashishitsɔɔmɔ woji lɛ kɛɛ lɛ, gbɔmɔ ni tamɔ nɛkɛ lɛ “bɛ shishinumɔ.” Ekojooo sane yɛ gbɛ kpakpa nɔ, ni wiemɔ “tsui” ni akɛtsu nii lɛ tsɔɔ akɛ ebɛ mligbɛ gbɔmɔ lɛ sui kpakpai lɛ eko kwraa. Kɛji akɛ mɔ ni kɛɔ akɛ eji Kristofonyo lɛ aaaya nɔ yɛ osheku ni eyeɔ lɛ mli kɛyashɛ heguɔgbee loo jɛmɔ he lɛ, belɛ esa akɛ onukpai ni ahala amɛ lɛ atsu he nii ni amɛha shihilɛ ni ehiii nɛɛ sɛɛ afo yɛ asafo lɛ mli.—3 Mose 19:16; Lala 101:5; 1 Korintobii 5:11.
4. Mɛni Kristofoi ni yɔɔ sɛɛyoomɔ ni yeɔ anɔkwa lɛ feɔ yɛ teemɔŋ saji ahe?
4 Ákɛ mɛi ni tamɔɔɔ mɛi ni ‘bɛ tsui’ lɛ, aŋkroaŋkroi ni yɔɔ “sɛɛyoomɔ babaoo” lɛ feɔ diŋŋ kɛ esa akɛ afee nakai. Amɛjieee teemɔŋ saji akpo. (Abɛi 20:19) Akɛni amɛle akɛ wiemɔ babaoo baanyɛ aye awui hewɔ lɛ, mɛi ni yɔɔ sɛɛyoomɔ lɛ “yeɔ anɔkwa yɛ mumɔ mli.” Amɛyeɔ nanemɛi heyelilɔi anɔkwa, ni amɛjieee teemɔŋ saji ni baanyɛ aye amɛ awui lɛ kpo. Kɛji akɛ Kristofoi ni yɔɔ sɛɛyoomɔ lɛ anine shɛ teemɔŋ sane ko ni kɔɔ asafo lɛ he lɛ nɔ lɛ, amɛhaa ehiɔ teemɔŋ kɛyashiɔ be mli ni Yehowa gbɛjianɔtoo lɛ aaana akɛ ehi akɛ eeeha ale kɛtsɔ lɛ diɛŋtsɛ ewoji anɔ.
Sɛɛyoomɔ kɛ Wɔ Jeŋba
5. Te ‘kwashiai’ buɔ ahoshwibɔɔ amɛhaa tɛŋŋ, ni mɛni hewɔ?
5 Biblia mli abɛi yeɔ ebuaa wɔ koni wɔkɛ sɛɛyoomɔ atsu nii ni wɔkwa jeŋba ni esaaa. Akɛ nɔkwɛmɔ nɔ lɛ, Abɛi 10:23 (NW) kɛɔ akɛ: “Kwashia lɛ, ahoshwibɔɔ feɔ lɛ miishɛɛ; shi ŋaalee yɛ kɛha nuu ni yɔɔ sɛɛyoomɔ.” Mɛi ni ahoshwibɔɔ ‘feɔ amɛ miishɛɛ’ lɛ ahiŋmɛi eshwila yɛ bɔ ni amɛgbɛ ejaaa lɛ he, ni amɛbuuu Nyɔŋmɔ akɛ mɔ ni mɔ fɛɛ mɔ baabu ehe akɔntaa eha. (Romabii 14:12) ‘Kwashiai’ ni tamɔ nɛkɛ lɛ ajwɛŋmɔ efite aahu kɛyashɛ he ni amɛsusuɔ akɛ Nyɔŋmɔ enaaa amɛ nɔ fɔŋ feemɔ lɛ. Amɛtsɔɔ amɛ nifeemɔi anɔ amɛkɛɔ akɛ: “Nyɔŋmɔ [Yehowa, NW] ko bɛ.” (Lala 14:1-3; Yesaia 29:15, 16) Akɛni jeee shishitoo mlai ni Nyɔŋmɔ gbeyeishemɔ yɔɔ mli kudɔɔ amɛ hewɔ lɛ, amɛbɛ sɛɛyoomɔ ni amɛnyɛɛɛ amɛkojo saji yɛ gbɛ ni ja nɔ.—Abɛi 28:5.
6. Mɛni hewɔ ahoshwibɔɔ ji kwashiai asane lɛ, ni te wɔbaasusu he wɔha tɛŋŋ kɛ wɔyɛ sɛɛyoomɔ?
6 “Mɔ ni yɔɔ sɛɛyoomɔ” lɛ yɔseɔ akɛ ahoshwibɔɔ jeee ‘miishɛɛ sane,’ loo shwɛmɔ. Ele akɛ esaaa Nyɔŋmɔ hiɛ, ni ebaanyɛ efite wɔkɛ lɛ teŋ wekukpaa. Jeŋba ni tamɔ nɛkɛ lɛ ji kwashiai asane, ejaakɛ ehaa gbɔmɛi laajeɔ bulɛ ni amɛyɔɔ kɛhaa amɛhe lɛ, efiteɔ gbalashihilɛi, eyeɔ jwɛŋmɔ kɛ gbɔmɔtso fɛɛ awui, ni ehaa wɔlaajeɔ wɔ mumɔŋ shidaamɔ. No hewɔ lɛ, nyɛhaa wɔdɔa wɔtsui kɛyaa sɛɛyoomɔ he, koni wɔkpoo ahoshwibɔɔ loo jeŋba shara sɔrɔtoi lɛ fɛɛ eko.—Abɛi 5:1-23.
Sɛɛyoomɔ kɛ Wɔ Mumɔ
7. Mɛni ji nibii ni jɛɔ mlifu mli baa gbɔmɔtso lɛ nɔ lɛ ekomɛi?
7 Wɔtsui ni wɔdɔɔ kɛyaa sɛɛyoomɔ he lɛ hu yeɔ ebuaa wɔ ni wɔyeɔ wɔ mumɔ nɔ. Abɛi 14:29 (NW) kɛɔ akɛ: “Mɔ ni mli fuuu mra lɛ esɛɛyoomɔ fa, shi mɔ ni bɛ tsui lɛ miiwó buuluufeemɔ nɔ.” Yiŋtoo kome hewɔ ni mɔ ni yɔɔ sɛɛyoomɔ lɛ bɔɔ mɔdɛŋ ni ekwa mlifu ni ayeee nɔ lɛ ji akɛ, eyeɔ wɔ awui yɛ gbɔmɔtsoŋ. Ebaanyɛ eha lá falɛ aya hiɛ ni eha kɔɔyɔɔ ni amuɔ awa. Datrɛfoi etsɔɔ akɛ mlifu kɛ mlila ji henumɔi ni haa helai tamɔ fɛ̃fɛ̃, hewolɔ nɔ helai, musuŋtsĩi, kɛ musuŋ faji amli woɔ wu.
8. Mɛi ni bɛ tsui ni wɔɔfee lɛ baanyɛ ekɛ mɛni aba, shi mɛɛ gbɛ nɔ sɛɛyoomɔ baanyɛ aye abua wɔ yɛ enɛ mli?
8 Jeee ni wɔɔkwa awui ni wɔɔye wɔ gbɔmɔtsoŋ hewalɛnamɔ kɛkɛ hewɔ ni esa akɛ wɔkɛ sɛɛyoomɔ atsu nii ni wɔfee mɛi ni “mli fuuu mra” lɛ. Kɛ wɔfee mɛi ni bɛ tsui lɛ, ebaanyɛ ni ekɛ kwashiai anifeemɔi ni baaha wɔshwa wɔhe aba. Sɛɛyoomɔ haa wɔsusuɔ nɔ ni baajɛ wiemɔ ni anyɛɛɛ atsi naa loo nii ni afeɔ kpalakpala lɛ mli aba lɛ he, ni enɛ tsiɔ wɔ naa koni ‘wɔkawó buuluufeemɔ nɔ’ kɛtsɔ nɔ ko ni nilee bɛ mli lɛ feemɔ nɔ. Sɛɛyoomɔ yeɔ ebuaa wɔ titri koni wɔyoo akɛ mlila baanyɛ afutu bɔ ni wɔjwɛŋɔ nii ahe wɔhaa lɛ, ni ehaŋ wɔkɛ jwɛŋmɔ kpakpa atsu nii. Enɛ baagbɔjɔ wɔnyɛmɔ ni wɔkɛaafee ŋwɛi suɔmɔnaa nii, ni wɔhi shi yɛ Nyɔŋmɔ jalɛ shishitoo mlai kɛ gbeekpamɔ naa lɛ. Hɛɛ, hè ni aŋmɛɔ ahãa mlila ni anyɛɛɛ nɔ aye lɛ yeɔ awui yɛ mumɔŋ. Yɛ anɔkwale mli lɛ, abuɔ “mlilawooi” afataa “heloo lɛ nitsumɔi” ni ahiɔ ni haŋ wɔnine ashɛ Nyɔŋmɔ Maŋtsɛyeli lɛ nɔ lɛ he. (Galatabii 5:19-21) Belɛ, ákɛ Kristofoi ni yɔɔ sɛɛyoomɔ lɛ, nyɛhaa wɔhe ‘afea oya kɛ ninumɔ, wɔhumi shi kɛ wiemɔ, wɔhumi shi kɛ mlifu.’—Yakobo 1:19.
9. Yɛ mɛɛ gbɛ nɔ sɛɛyoomɔ kɛ nyɛmimɛi asuɔmɔ baanyɛ aye abua wɔ ni wɔsaa wɔteŋ béi?
9 Kɛ wɔmli fu hu lɛ, sɛɛyoomɔ baanyɛ atsɔɔ akɛ esa akɛ wɔfee dioo koni béi akate shi. Abɛi 17:27 (NW) kɛɔ akɛ: “Mɔ ni tsiɔ ewiemɔ naa lɛ, ele nii, ni nuu ni yɔɔ sɛɛyoomɔ lɛ, emumɔ he jɔ.” Sɛɛyoomɔ kɛ nyɛmimɛi asuɔmɔ baaye abua wɔ ni wɔna bɔ ni ehe hiaa ni wɔye henumɔ ni aaaha wɔkɛɛ nɔ ko ni yeɔ awui lɛ nɔ. Kɛ ábolɔ kɛ mlifu momo lɛ, suɔmɔ kɛ heshibaa baatsirɛ wɔ ni wɔkpa fai ni wɔsaa tɔ̃mɔ lɛ. Shi ŋɔɔ lɛ akɛ mɔ ko etɔ̃ wɔnɔ. No lɛ nyɛhãa wɔkɛ lɛ pɛ awiea yɛ mlijɔlɛ kɛ heshibaa gbɛ nɔ, kɛ yiŋtoo titri akɛ wɔmiisumɔ ni toiŋjɔlɛ ahi shi.—Mateo 5:23, 24; 18:15-17.
Sɛɛyoomɔ kɛ Wɔ Weku Lɛ
10. Mɛni ŋaalee kɛ sɛɛyoomɔ tsuɔ yɛ weku shihilɛ mli?
10 Ehe miihia ni weku lɛ mli bii ajie ŋaalee kɛ sɛɛyoomɔ kpo, ejaakɛ sui ni tamɔ nɛkɛ baatswa shĩa ema shi. Abɛi 24:3, 4 (NW) kɛɔ akɛ: “Ŋaalee akɛtswaa shia amaa shi, ni sɛɛyoomɔ akɛhaa edamɔɔ shi shiŋŋ. Ni nilee akɛhaa piaiaŋ yimɔɔ kɛ nii ni jara wa kɛ nii ni yɔɔ fɛo fɛɛ.” Ŋaalee kɛ sɛɛyoomɔ tamɔ ŋtayaai fɛfɛji ni akɛtswaa weku shihilɛ ni yeɔ omanye amaa shi. Sɛɛyoomɔ yeɔ ebuaa fɔlɔi Kristofoi ni ehaa amɛleɔ amɛbii ahenumɔi kɛ nibii ni amɛsusuɔ he. Mɔ ni yɔɔ sɛɛyoomɔ lɛ nyɛɔ egbaa sane, eboɔ sane toi ni enuɔ egbalashihilɛ mli hefatalɔ lɛ henumɔi kɛ susumɔi ashishi.—Abɛi 20:5.
11. Yoogbayoo ni yɔɔ sɛɛyoomɔ lɛ baanyɛ ‘ema eshĩa’ yɛ mɛɛ gbɛ nɔ?
11 Ŋwanejee ko bɛ he akɛ, ŋaalee kɛ sɛɛyoomɔ he miihia kɛha weku shihilɛ ni miishɛɛ yɔɔ mli. Akɛ nɔkwɛmɔ nɔ lɛ, Abɛi 14:1 kɛɔ akɛ: “Yei anilee maa shĩa; shi buuluu lɛ, ekɛ eniji kumɔɔ shwieɔ shi.” Yoogbayoo ni le nii, ni yɔɔ sɛɛyoomɔ, ni baa ehe shi yɛ gbɛ ni ja nɔ ehaa ewu lɛ baatsu nii waa koni ahi aha shiabii lɛ, ni ekɛ enɛ baaye abua ni ekɛtswa eweku lɛ ema shi. Nɔ̃ kome ni ‘baama eshia lɛ’ ji akɛ, ewieɔ ewu lɛ he ekpakpa be fɛɛ be, ni ehaa bulɛ ni mɛi krokomɛi naa kɛhaa lɛ lɛ yaa hiɛ. Ni ŋa mɔdɛŋbɔlɔ, ni yɔɔ sɛɛyoomɔ, ni kɛ woo sheɔ Yehowa gbeyei lɛ naa yijiemɔ kɛhaa lɛ diɛŋtsɛ ehe.—Abɛi 12:4; 31:28, 30.
Sɛɛyoomɔ kɛ Wɔ Shihilɛ Gbɛ
12. Te mɛi ni “bɛ tsui” lɛ buɔ buuluufeemɔ amɛhaa tɛŋŋ, ni mɛni hewɔ?
12 Sɛɛyoomɔ yeɔ ebuaa wɔ ni wɔhiɛɔ gbɛ kpakpa mli yɛ wɔ shihilɛ mli nibii fɛɛ mli. Atsɔɔ enɛ yɛ Abɛi 15:21 (NW), ni kɛɔ akɛ: “Mɔ ni bɛ tsui lɛ, buuluufeemɔ feɔ lɛ miishɛɛ, shi nuu ni yɔɔ sɛɛyoomɔ lɛ ji mɔ ni yaa ehiɛ tɛ̃ɛ.” Te esa akɛ wɔnu abɛbua nɛɛ shishi wɔha tɛŋŋ? Buuluufeemɔ gbɛ, loo kwashiafeemɔ, ji miishɛɛ gbɛ kɛha hii, yei, kɛ gbekɛbii ni bɛ jwɛŋmɔ. ‘Amɛbɛ tsui,’ amɛbɛ jwɛŋmɔ kpakpa, ni amɛleee nii kwraa akɛ amɛnyãa buuluufeemɔ he.
13. Mɛni Salomo yɔse yɛ ŋmɔ̃lɔ kɛ yiŋfɛlɛfɛlɛ he?
13 Israel Maŋtsɛ Salomo ni yɔɔ sɛɛyoomɔ lɛ kase akɛ yiŋfɛlɛfɛlɛ jeee fɛi. Ekpɛlɛ nɔ akɛ: “Mikɛɛ yɛ mitsui mli akɛ: Ba, mibakao kɛ mlifilimɔ, ni oye nii kpakpai amli ŋɔɔmɔ! Ni naa, no hu yakayakanɔ̃ ko ni. Mikɛɛ ŋmɔ̃lɔ akɛ: Oye sɛkɛ! Ni mikɛɛ miishɛɛ hu akɛ: Mɛni ofeɔ nɛɛ?” (Jajelɔ 2:1, 2) Ákɛ nuu ni yɔɔ sɛɛyoomɔ lɛ, Salomo na akɛ, mlifilimɔ kɛ ŋmɔ̃lɔ pɛ haaa mɔ tsui anyɔ emli, ejaakɛ amɛkɛ miishɛɛ diɛŋtsɛ ni hiɔ shi daa baaa. Ekolɛ ŋmɔ̃lɔ baaye abua wɔ ni wɔhiɛ akpa wɔ naagbai anɔ yɛ be fioo ko mli, shi yɛ no sɛɛ lɛ ekolɛ amɛbaaje kpo babaoo moŋ po. Salomo baanyɛ awie ŋmɔ̃lɔ he akɛ “sɛkɛ” yɛ gbɛ ni ja nɔ. Mɛni hewɔ? Ejaakɛ ŋmɔ̃lɔ ni jwɛŋmɔ bɛ mli lɛ haà yiŋkpɛɛ kpakpa nɔ. Ebaanyɛ eha wɔkɛ yiŋfɛlɛfɛlɛ asusu saji ni hiɛdɔɔ yɔɔ mli lɛ ahe. Anyɛŋ akɛ nine atsɔɔ mlifilimɔ ni sasansɔ̃feelɔ wiemɔi kɛ nifeemɔi kɛbaa lɛ akɛ ekɛ nɔ ko ni sɛɛnamɔ yɔɔ he baa. Salomo niiashikpamɔ kɛ ŋmɔ̃lɔ kɛ mlifilimɔ lɛ sɛɛ ni wɔɔyoo lɛ yeɔ ebuaa wɔ koni wɔkwa “mɛi ni sumɔɔ shwɛmɔ kɛ ŋɔɔmɔ fe Nyɔŋmɔ” ni wɔɔtsɔmɔ.—2 Timoteo 3:1, 4.
14. Gbɔmɔ ni yɔɔ sɛɛyoomɔ lɛ yaa “ehiɛ tɛ̃ɛ” yɛ mɛɛ gbɛ nɔ?
14 Te ebaa lɛ tɛŋŋ ni gbɔmɔ ni yɔɔ sɛɛyoomɔ lɛ yaa “ehiɛ tɛ̃ɛ” hu? Mumɔŋ sɛɛyoomɔ kɛ shishitoo mlai ni Nyɔŋmɔ gbeyeishemɔ yɔɔ mli ni akɛtsuɔ nii nyiɛɔ gbɔmɛi ahiɛ yɛ gbɛ ni ja ni yɔɔ tɔrɔmɔ̃ɔ nɔ. Byington shishitsɔɔmɔ lɛ kɛɔ kpeŋ akɛ: “Buuluufeemɔ ji hejɔlɛ kɛha gbɔmɔ ni bɛ jwɛŋmɔ, shi gbɔmɔ ni le nii lɛ baanyiɛ tɔrɔmɔ̃ɔ.” “Gbɔmɔ ni yɔɔ sɛɛyoomɔ” lɛ feɔ gbɛ̀i ni ja kɛhaa enaji, ni enyɛɔ ekpaa ekpakpa kɛ efɔŋ mli, yɛ Nyɔŋmɔ Wiemɔ lɛ ni ekɛtsuɔ nii yɛ eshihilɛ mli lɛ hewɔ.—Hebribii 5:14; 12:12, 13.
Kwɛmɔ Yehowa Gbɛ Kɛha Sɛɛyoomɔ Be Fɛɛ Be
15. Mɛni wɔkaseɔ kɛjɛɔ Abɛi 2:6-9?
15 Kɛ wɔɔnyiɛ gbɛ ni ja nɔ yɛ shihilɛ mli lɛ, ehe hiaa ni wɔ fɛɛ wɔkpɛlɛ emuu ni wɔyeee lɛ nɔ, koni wɔkwɛ Yehowa gbɛ kɛha mumɔŋ sɛɛyoomɔ. Abɛi 2:6-9 kɛɔ akɛ: “Yehowa haa aleɔ nii; edaaŋ nilee kɛ sanesɛɛkɔmɔ [sɛɛyoomɔ, NW] jɛɔ. Etiaa shweremɔ ehaa mɛi ni ja lɛ, tsɛ̃ŋ hu ji lɛ ha mɛi ni nyiɛɔ pɛpɛɛpɛ lɛ, koni ebu jalɛ saneyeli tempɔŋi lɛ ahe, ni ebaa emɛi krɔŋkrɔŋi lɛ agbɛ̀i lɛ ayi. No dani ooonu jalɛ kɛ kojomɔ kɛ nɔ ni ja, gbɛ kpakpa fɛɛ gbɛ kpakpa shishi.”—Okɛto Yakobo 4:6 he.
16. Mɛni hewɔ ŋaalee, sɛɛyoomɔ, loo ŋaawoo ko bɛ ni kɛ Yehowa shiɔ mple lɛ?
16 Yɛ be mli ni wɔkpɛlɛɔ Yehowa ni wɔkpasaa lɛ lɛ nɔ lɛ, nyɛhaa wɔkɛ heshibaa ataoa akɛ wɔɔyoo esuɔmɔnaa nii, kɛtsɔ e-Wiemɔ lɛ ni wɔɔbote mli vii lɛ nɔ. Lɛ ji mɔ ni yɔɔ ŋaalee fɛɛ, ni eŋaawoo he yɛ sɛɛnamɔ be fɛɛ be. (Yesaia 40:13; Romabii 11:34) Yɛ anɔkwale mli lɛ, sɛɛnamɔ ko kwraa bɛ ŋaawoo fɛɛ ŋaawoo ni teɔ shi woɔ lɛ lɛ he. Abɛi 21:30 kɛɔ akɛ: “Nilee, loo sanesɛɛkɔmɔ [sɛɛyoomɔ, NW] loo ajina ko bɛ ni kɛ Yehowa aaashi mple.” (Okɛto Abɛi 19:21 he.) Mumɔŋ sɛɛyoomɔ pɛ, ni anaa kɛtsɔɔ Nyɔŋmɔ Wiemɔ lɛ kasemɔ, kɛ woji ni “tsulɔ anɔkwafo kɛ nilelɔ” lɛ kɛhaa lɛ yelikɛbuamɔ nɔ baaye abua wɔ ni wɔdi gbɛ ni ja sɛɛ yɛ shihilɛ mli. (Mateo 24:45-47) No hewɔ lɛ, nyɛhaa wɔkudɔa wɔ shihilɛ gbɛ yɛ Yehowa ŋaawoo lɛ kɛ gbeekpãmɔ naa, ni wɔle akɛ, bɔ fɛɛ bɔ ni ŋaawoo ko ni teɔ shi woɔ enɛ lɛ tamɔ nɔ ni ja lɛ fɛɛ sɛɛ lɛ, enyɛŋ ekɛ e-Wiemɔ lɛ ashi mple.
17. Mɛni baaba kɛ akɛ ŋaawoo ni ejaaa ha?
17 Kristofoi ni yɔɔ sɛɛyoomɔ ni kɛ ŋaawoo haa lɛ yɔseɔ akɛ, esa akɛ edamɔ Nyɔŋmɔ Wiemɔ lɛ nɔ shishiishi, ni ákɛ, Biblia kasemɔ kɛ enɔjwɛŋmɔ he miihia dani aha sanebimɔ ko hetoo. (Abɛi 15:28) Kɛ aha sanebimɔi ni kɔɔ saji ni hiɛdɔɔ yɔɔ mli ahe lɛ hetoo yɛ gbɛ ni ejaaa nɔ lɛ, ebaanyɛ eye awui babaoo. No hewɔ lɛ, mumɔŋ sɛɛyoomɔ he miihia Kristofoi onukpai, ni esa akɛ amɛsɔle amɛbi Yehowa gbɛtsɔɔmɔ beni amɛbɔɔ mɔdɛŋ ni amɛye amɛbua nanemɛi heyelilɔi yɛ mumɔŋ lɛ.
Na Mumɔŋ Sɛɛyoomɔ Babaoo
18. Kɛ naagba ko te shi yɛ asafo lɛ mli lɛ, sɛɛyoomɔ baanyɛ aye abua wɔ ni wɔhiɛ pɛpɛɛpɛ ni wɔŋmɛɔ yɛ mumɔŋ lɛ mli yɛ mɛɛ gbɛ nɔ?
18 Kɛ wɔɔsa Yehowa hiɛ lɛ, “sɛɛyoomɔ yɛ nibii fɛɛ mli” he baahia wɔ. (2 Timoteo 2:7, NW) Biblia lɛ kasemɔ kɛ hiɛdɔɔ, kɛ Nyɔŋmɔ mumɔ kɛ gbɛjianɔtoo lɛ gbɛtsɔɔmɔ nɔkpɛlɛmɔ baaye abua wɔ ni wɔyoo nɔ ni esa akɛ wɔfee kɛ wɔkɛ shihilɛi ni baanyɛ ekɛ wɔ aya gbɛ ni ejaaa nɔ kpe. Akɛ nɔkwɛmɔ nɔ lɛ, ŋɔɔ lɛ akɛ atsuuu nɔ ko ni yɔɔ asafo lɛ mli lɛ he nii bɔ ni wɔsusuɔ akɛ esa akɛ afee lɛ aha. Mumɔŋ sɛɛyoomɔ baaye abua wɔ ni wɔna akɛ, enɛ jeee yiŋtoo ni wɔɔdamɔ nɔ wɔkpa Yehowa webii kɛbɔɔ ni wɔkpa Nyɔŋmɔ sɔɔmɔ. Susumɔ hegbɛ ni wɔna akɛ wɔɔsɔmɔ Yehowa, mumɔŋ heyeli ni wɔnaa mli ŋɔɔmɔ, miishɛɛ ni wɔbaanyɛ wɔna kɛjɛ wɔ sɔɔmɔ akɛ Maŋtsɛyeli jajelɔi lɛ mli lɛ ahe okwɛ. Mumɔŋ sɛɛyoomɔ haa wɔnaa nibii amli yɛ gbɛ ni ja nɔ, ni wɔyɔseɔ akɛ wɔjɔɔ wɔhe nɔ wɔha Nyɔŋmɔ, ni esa akɛ wɔnyã wekukpaa ni kã wɔkɛ lɛ teŋ lɛ he, ni nɔ ni mɛi krokomɛi feɔ lɛ kɔɔɔ he eko. Kɛji akɛ nɔ ko bɛ ni wɔbaanyɛ wɔfee yɛ naagba ko he yɛ teokrase gbɛ nɔ lɛ, ehe baahia ni wɔkɛ tsuishitoo amɛ Yehowa koni esaa shihilɛ lɛ. Yɛ nɔ najiaŋ ni wɔɔkpa loo wɔŋmɛɛ wɔhe wɔha nijiaŋwujee lɛ, nyɛhãa ‘wɔkɛ wɔhiɛ afɔa Nyɔŋmɔ nɔ.’—Lala 42:6, 12.
19. (a) Mɛni ji nɔ titri ni yɔɔ sɔlemɔ ni Paulo sɔle eha Filipibii lɛ mli? (b) Mɛɛ gbɛ nɔ sɛɛyoomɔ baanyɛ aye abua wɔ kɛ wɔnuuu nɔ ko shishi jogbaŋŋ lɛ?
19 Mumɔŋ sɛɛyoomɔ yeɔ ebuaa wɔ ni wɔhiɔ shi akɛ anɔkwafoi wɔhaa Nyɔŋmɔ kɛ ewebii. Paulo kɛɛ Kristofoi ni yɔɔ Filipi lɛ akɛ: “Ni enɛ he fai mikpaa, akɛ nyɛsuɔmɔ lɛ afa kɛya nɔ, ni eteke nɔ fe tsutsu lɛ yɛ nilee kɛ sɛɛyoomɔ fɛɛ gbɛfaŋ, ni nyɛyoo nii ni hi titri lɛ, koni nyɛfee krɔŋŋ ni nanetɔtɔmɔ ko akahi nyɛhe kɛyashi Kristo gbi lɛ nɔ.” (Filipibii 1:9, 10) Kɛ wɔɔnyɛ wɔjwɛŋ nii ahe jogbaŋŋ lɛ, no lɛ ‘anɔkwale nilee kɛ sɛɛyoomɔ fɛɛ’ he miihia wɔ. Hela wiemɔ ni atsɔɔ shishi yɛ biɛ akɛ “sɛɛyoomɔ” lɛ tsɔɔ “jeŋba shishinamɔ ni nuɔ nii ahe.” Kɛ wɔkase nɔ ko lɛ, wɔsumɔɔ ni wɔle bɔ ni ekɔɔ Nyɔŋmɔ kɛ Kristo he ehaa, koni wɔjwɛŋ bɔ ni ehaa Yehowa su kɛ baŋ kɛ gbɛjianɔtoi jeɔ agbo lɛ nɔ. Enɛ haa wɔ sɛɛyoomɔ kɛ hiɛsɔɔ ni wɔyɔɔ kɛha nɔ ni Yehowa Nyɔŋmɔ kɛ Yesu Kristo efee kɛha wɔ lɛ mli lɛɛɔ. Kɛ wɔnuuu nɔ ko shishi jogbaŋŋ lɛ, sɛɛyoomɔ baaye abua wɔ ni wɔna akɛ esaaa akɛ wɔshɛɔ wɔ hemɔkɛyeli ni wɔyɔɔ yɛ nibii ni he hiaa lɛ fɛɛ ni wɔkase yɛ Nyɔŋmɔ, Kristo, kɛ ŋwɛi yiŋtoo he lɛ wɔfɔ̃ɔ.
20. Te wɔɔfee tɛŋŋ ni wɔha wɔ mumɔŋ sɛɛyoomɔ afa babaoo?
20 Wɔ mumɔŋ sɛɛyoomɔ baafa babaoo kɛ wɔha wɔsusumɔi kɛ nifeemɔi kɛ Nyɔŋmɔ Wiemɔ lɛ kpã gbee be fɛɛ be. (2 Korintobii 13:5) Enɛ feemɔ yɛ gbɛ kpakpa nɔ lɛ yeɔ ebuaa wɔ ni wɔbaa wɔhe shi, wɔfeee mɛi ni wɔ sane ŋɔɔ wɔ pɛ wɔnaa ni wieɔ shiɔ mɛi krokomɛi. Sɛɛyoomɔ baaye abua wɔ koni kãmɔ he aba sɛɛnamɔ aha wɔ, koni wɔyoo nibii ni he hiaa titri lɛ. (Abɛi 3:7) Belɛ akɛni wɔsumɔɔ ni wɔsa Yehowa hiɛ hewɔ lɛ, nyɛhãa wɔtaoa akɛ e-Wiemɔ lɛ he anɔkwale nilee aaayimɔ wɔ obɔbɔ. Enɛ baaye abua wɔ ni wɔyoo ekpakpa kɛ efɔŋ, wɔle nɔ ni he hiaa titri, ni wɔkɛ wɔhe akpɛtɛ wɔ wekukpaa ni jara wa ni kã wɔkɛ Yehowa teŋ lɛ he yɛ anɔkwayeli mli. Enɛɛmɛi fɛɛ baanyɛ aba, kɛ wɔdɔ wɔtsui kɛtee sɛɛyoomɔ he. Kɛlɛ, nɔ kroko he miihia. Esa akɛ wɔha sɛɛyoomɔ abu wɔhe.
Te Obaaha Hetoo Oha Tɛŋŋ?
◻ Mɛni hewɔ esa akɛ wɔdɔ wɔtsui kɛya sɛɛyoomɔ he?
◻ Sɛɛyoomɔ baanyɛ asa wɔ wiemɔ kɛ jeŋba he yɛ mɛɛ gbɛ nɔ?
◻ Sɛɛyoomɔ baanyɛ ana wɔ mumɔ nɔ hewalɛ yɛ mɛɛ gbɛ nɔ?
◻ Mɛni hewɔ esa akɛ wɔkwɛ Yehowa gbɛ kɛha sɛɛyoomɔ be fɛɛ be lɛ?
[Mfoniri ni yɔɔ baafa 13]
Sɛɛyoomɔ yeɔ ebuaa wɔ koni wɔye wɔ mumɔ nɔ
[Mfoniri ni yɔɔ baafa 15]
Maŋtsɛ Salomo ni yɔɔ sɛɛyoomɔ lɛ yɔse akɛ yiŋfɛlɛfɛlɛ haaa mɔ tsui anyɔ emli diɛŋtsɛ