Tamɔ Shika Akutui

AKUTUI—kwɛ bɔ ni efeɔ hiŋmɛi lɛ akɔnɔ ni eŋɔɔ lilɛi lɛ naa ha! Biblia lɛ kɛ nɛkɛ aduawa ni ŋɔɔ nɛɛ tsuɔ ni ekɛtoɔ nɔ ko he yɛ gbɛ ni kanyaa mɔ jwɛŋmɔ lɛ nɔ beni ekɛɛ akɛ: “Wiemɔ ni awie yɛ be ni sa mli lɛ, etamɔ shika akutui yɛ jwiɛtɛi kpanyai amli.” (Abɛi 25:11) Te wiemɔ nɛɛ shishi hu?

“Shika akutui yɛ jwiɛtɛi kpanyai amli” lɛ baanyɛ atsɔɔ nɔ ko ni akpɛ, tamɔ jwiɛtɛi apaawa ko ni shika aduawai yɔɔ nɔ. Akɛni kukuji ni tsɔ hiɛ yɛ yitso nɛɛ mli lɛ tsi maŋtsɛ ni ayaa eŋɔɔ lɛ ta hewɔ lɛ, kuku nɛɛ baanyɛ atsɔɔ nikeenii ni akɛhaa nɔyelɔ ko—shika nibii ni tamɔ akutui ni akɛwo jwiɛtɛi apaawai amli. (Abɛi 25:6, 7) Lɛlɛŋ, eyɛ fɛo naakpa!

Awie nɔ ko ni yɔɔ fɛo ni tamɔ nakai he yɛ wiemɔi ni ja, ni hiɛ yɔɔ nyam, ni yɔɔ ebe naa pɛpɛɛpɛ mli, kɛ ŋma aŋma loo awie lɛ ahe. Nomɛi ji wiemɔi ni ŋɔɔ mɔ naa, ni woɔ mɔ hewalɛ, ni he yɔɔ sɛɛnamɔ yɛ gbɛi babaoo nɔ. Titri lɛ nakai nɔŋŋ Biblia lɛ mli wiemɔi ni jɛ mumɔŋ ni ajɛ ŋwɛi aŋma lɛ hu tamɔ “shika akutui yɛ jwiɛtɛi kpanyai amli.”

Taakɛ Maŋtsɛ Salomo wiemɔ ni yɔɔ Abɛi 25:11 ni nilee yɔɔ mli lɛ tsɔɔ mli lɛ “[e]tao ni ena wiemɔi ni ŋɔɔ, ni nɔ ni eŋma nɛɛ, jalɛ kɛ anɔkwale wiemɔi ni.” (Jajelɔ 12:10; Abɛi 25:1) Afii ohai abɔ sɛɛ lɛ, Kristofonyo bɔfo Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ mumɔ lɛŋ lɛ ehi.” (2 Timoteo 3:16) Hɛɛ, ŋaawoo ni he baa sɛɛnamɔ, gbalɛi, wiemɔi ni akɛfeɔ nɔ ko he mfoniri yɛ jwɛŋmɔŋ, kɛ anɔkwalei ni kpɛlɛɔ ni yɔɔ fɛo lɛ feɔ tamɔ nakai kwraa po fe ŋaa nitsulɔi kpakpai ni fe fɛɛ lɛ anitsumɔi. Kɛfata he lɛ, mɔ fɛɛ mɔ ni naa nilee kɛjɛɔ Nyɔŋmɔ Wiemɔ, ni ji Biblia lɛ mli lɛ nine shɛɔ nɔ ko ni jara wa waa nɔ ni ebaanyɛ ena naanɔ wala he hiɛnɔkamɔ.—Abɛi 4:7-9; Yohane 17:3.