Yitso Kpawo
Nɔ ni Wɔkaseɔ Kɛjɛɔ Efɔŋ ni Nyɔŋmɔ Eŋmɛ Gbɛ lɛ Mli
1, 2. (a) Eji Yehowa kpata Eden atuatselɔi lɛ ahiɛ amrɔ nɔŋŋ kulɛ, te enɛ baasa wɔhe aha tɛŋŋ? (b) Mɛɛ gbɛjianɔi ni suɔmɔ yɔɔ mli Yehowa to kɛha wɔ?
BLEMATSƐ Yakob kɛɛ akɛ: “Miwala afii amli gbii lɛ faaa ko kɛ emli efɔŋ.” (1 Mose 47:9) Nakai nɔŋŋ hu Hiob jaje akɛ “kukuoo kɛkɛ ji” adesa ‘gbii lɛ, ni emli eyi tɔ kɛ haomɔ sɔŋŋ.’ (Hiob 14:1) Taakɛ amɛji lɛ, wɔteŋ mɛi pii kɛ shihilɛi ni mli wawai, jalɛ sane ni ayeee, kɛ osharai po ekpe pɛŋ. Ni kɛlɛ, fɔ́ ni afɔ́ wɔ lɛ jeee jalɛ sane ni Nyɔŋmɔ yeee. Eji anɔkwale akɛ, wɔyeee emuu yɛ jwɛŋmɔŋ kɛ gbɔmɔtsoŋ, ni wɔbɛ Paradeiso shia ni Adam kɛ Hawa ná kɛjɛ shishijee lɛ eko. Shi mɛni baaba eji Yehowa kpata amɛhiɛ beni amɛtse atua lɛ nɔŋŋ lɛ? Yɛ be mli ni kulɛ hela, awerɛho, loo gbele ehiŋ shi lɛ, nakai nɔŋŋ hu kulɛ adesa weku lɛ ehiŋ shi. Kulɛ afɔ́ŋ wɔ. Shi yɛ Nyɔŋmɔ mɔbɔnalɛ naa lɛ, eha Adam kɛ Hawa be koni amɛfɔ́, eyɛ mli akɛ amɛná emuu ni ayeee. Ni Yehowa tsɔ Kristo nɔ eto gbɛjianɔ kɛha wɔ koni wɔnine ashɛ nɔ ni ŋmɛɛ Adam lɛ nɔ ekoŋŋ—naanɔ wala yɛ paradeiso shikpɔŋ nɔ.—Yohane 10:10; Romabii 5:12.
2 Kwɛ bɔ ni ewoɔ wɔ hewalɛ akɛ wɔɔnyɛ wɔkpa gbɛ akɛ wɔɔhi shi kɛya naanɔ yɛ jeŋ hee lɛ mli yɛ Paradeiso shihilɛi amli, he ni wɔbaaye wɔhe kɛjɛ hela, awerɛho, piŋmɔ, kɛ gbele dɛŋ, kɛ agbɛnɛ hu kɛjɛ gbɔmɛi fɔji adɛŋ! (Abɛi 2:21, 22; Kpojiemɔ 21:4, 5) Shi wɔkaseɔ kɛjɛɔ nɔ ni aŋma afɔ̃ shi yɛ Biblia lɛ mli akɛ, yɛ be mli ni wɔ yiwalaheremɔ he hiaa wɔ diɛŋtsɛ kɛ Yehowa waa lɛ, ekɔɔ nɔ ko ni sa kadimɔ waa hu he.
Yɛ Egbɛi Kpeteŋkpele lɛ Hewɔ
3. Mɛni kɔɔ Yehowa yiŋtoo kɛha shikpɔŋ lɛ kɛ adesai ahe lɛ mlibaa he?
3 Nyɔŋmɔ gbɛi lɛ kɔɔ eyiŋtoo yɛ shikpɔŋ lɛ kɛ adesai ahe lɛ ni baaba mli lɛ he. Nakai gbɛi, Yehowa lɛ, shishi ji “Ehaa Ebaa Mli.” No hewɔ lɛ egbɛi lɛ fata egbɛi-hemɔ ákɛ Jeŋ Muu Fɛɛ Maŋtsɛ, Yiŋtolɔ, kɛ anɔkwa Nyɔŋmɔ lɛ he. Yɛ gbɛhe mli ni Yehowa yɔɔ lɛ hewɔ lɛ, jeŋ muu fɛɛ toiŋjɔlɛ námɔ kɛ ehilɛ-kɛhamɔ biɔ ni akɛ bulɛ fɛɛ ni sa aha egbɛi lɛ kɛ nɔ fɛɛ nɔ ni fata he lɛ, koni mɔ fɛɛ mɔ afee toiboo aha lɛ.
4. Mɛni fata Yehowa yiŋtoo kɛha shikpɔŋ lɛ he?
4 Beni Yehowa bɔ Adam kɛ Hawa sɛɛ lɛ, ekɛ nitsumɔ wo amɛdɛŋ ni amɛtsu. Efee lɛ faŋŋ akɛ jeee eyiŋtoo ji ni amɛye shikpɔŋ lɛ fɛɛ nɔ—ní no hewɔ lɛ amɛlɛɛ Paradeiso lɛ husui lɛ amli pɛ kɛkɛ—shi moŋ amɛha amɛshwiei ayi nɔ obɔ. (1 Mose 1:28) Ani yiŋtoo nɛɛ baafite yɛ amɛ esha lɛ hewɔ? Mɛɛ ahorabɔɔ po eeeji kɛha Yehowa ofe lɛ gbɛi lɛ, kɛji akɛ enyɛɛɛ eha eyiŋtoo ni kɔɔ shikpɔŋ nɛɛ kɛ adesai ahe lɛ aba mli!
5. (a) Kɛji akɛ klɛŋklɛŋ adesai lɛ ye ekpakpa kɛ efɔŋ lee tso lɛ eko lɛ, mɛɛ be amɛbaagboi? (b) Yehowa ha ewiemɔ ni yɔɔ 1 Mose 2:17 lɛ ba mli yɛ mɛɛ gbɛ nɔ, yɛ be mli ni ekɛ bulɛ haa eyiŋtoo ni kɔɔ shikpɔŋ lɛ he lɛ?
5 Yehowa ebɔ Adam kɛ Hawa kɔkɔ akɛ kɛji amɛgbo enɔ toi ni amɛye ekpakpa kɛ efɔŋ lee tso lɛ yibii lɛ eko lɛ, gbo amɛbaagboi yɛ ‘gbi nɔ ni’ amɛaaye eko lɛ nɔ. (1 Mose 2:17) Yehowa tsu nɔ ni ewie lɛ he nii, etsɛ amɛ koni amɛbajie amɛnaa yɛ gbi ni amɛfee esha lɛ nɔ nɔŋŋ, ni ejaje gbele fɔbuu eshwie amɛnɔ. Yɛ Nyɔŋmɔ hiɛ lɛ, Adam kɛ Hawa gboi yɛ nakai gbi lɛ nɔ nɔŋŋ. Shi, bɔni afee ni Yehowa atsu eyiŋtoo kɛha shikpɔŋ lɛ he nii lɛ, aŋmɛ amɛ gbɛ koni amɛná weku ko dani amɛgboi yɛ gbɔmɔtsoŋ diɛŋtsɛ. Kɛlɛ, akɛni Nyɔŋmɔ baanyɛ abu afii 1,000 tamɔ gbi kome hewɔ lɛ, beni Adam wala ba naagbee yɛ afii 930 mli lɛ, no mli lɛ “gbi” lɛ hoko. (2 Petro 3:8; 1 Mose 5:3-5) No hewɔ lɛ abu Yehowa anɔkwayeli lɛ bem yɛ nɔ ni kɔɔ be ni akɛbaatsu toigbalamɔ he nii lɛ, ni amɛgbele lɛ fiteee eyiŋtoo kɛha shikpɔŋ lɛ. Shi áŋmɛ gbɔmɛi ni yeee emuu, ni efɔŋfeelɔi fata he lɛ agbɛ koni amɛhi shi kɛyashi be ko.
6, 7. (a) Taakɛ 2 Mose 9:15, 16 tsɔɔ lɛ, mɛni hewɔ Yehowa ŋmɛɔ gbɛ ni efɔŋfeelɔi hiɔ shi kɛyashiɔ be ko lɛ? (b) Yɛ Farao sane lɛ mli lɛ, mɛɛ gbɛ nɔ atsɔ ajie Yehowa hewalɛ kpo yɛ, ni aha ale E-gbɛi lɛ yɛ mɛɛ gbɛ nɔ? (d) Mɛni baaba kɛ́ ŋmɛnɛŋmɛnɛ yiwalɛ gbɛjianɔtoo nɛɛ ba naagbee?
6 Nɔ ni Yehowa kɛɛ Mizraim nɔyelɔ lɛ yɛ Mose gbii lɛ amli lɛ hu tsɔɔ nɔ hewɔ ni Nyɔŋmɔ eŋmɛ efɔŋfeelɔi agbɛ koni amɛya nɔ lɛ. Beni Farao tsĩ Israelbii lɛ naa ní amɛkashĩ Mizraim lɛ, Yehowa kpataaa ehiɛ amrɔ nɔŋŋ. Akɛ Haomɔi Nyɔŋma ba shikpɔŋ lɛ nɔ, ni etsɔɔ Yehowa hewalɛ ni yɔɔ naakpɛɛ lɛ yɛ gbɛ̀i srɔtoi anɔ. Beni Yehowa bɔɔ haomɔ ni ji kpawo lɛ he kɔkɔ lɛ, ekɛɛ Farao akɛ kulɛ E-baanyɛ ekpata lɛ Farao lɛ kɛ ewebii lɛ ahiɛ kɛjɛ shikpɔŋ lɛ nɔ yɛ gbɛ ni waaa kwraa nɔ. Yehowa kɛɛ akɛ: ‘Shi kɛlɛ, enɛ hewɔ miha odamɔ shi, koni majie mihewalɛ kpo matsɔɔ bo, ni atsĩ migbɛi atã yɛ jeŋ fɛɛ lɛ.’—2 Mose 9:15, 16.
7 Beni Yehowa kpɔ̃ Israelbii lɛ, abale egbɛi lɛ lɛɛlɛŋ yɛ jeŋ fɛɛ. (Yoshua 2:1, 9-11) Ŋmɛnɛ, yɛ nɔ ni fe afii 3,500 sɛɛ lɛ, hiɛ kpako nɔ ni efee yɛ no beaŋ lɛ nɔ. Jeee akɛ ajaje gbɛi diɛŋtsɛ ni ji Yehowa lɛ atsɔɔ kɛkɛ, shi nakai nɔŋŋ hu ajaje anɔkwale ni kɔɔ Mɔ ni hiɛ nakai gbɛi lɛ hu he lɛ atsɔɔ. Enɛ ha abale gbɛi kpakpa ni Yehowa fee ehã ehe lɛ ákɛ eji Nyɔŋmɔ ni yeɔ eshiwoi anɔ ni efãa etsuji ahe. (Yoshua 23:14) Eye odase akɛ yɛ ehewalɛ ni fe fɛɛ lɛ hewɔ lɛ, nɔ ko nɔ ko bɛ ni baanyɛ atsĩ eyiŋtoo naa. (Yesaia 14:24, 27) Belɛ wɔbaanyɛ wɔná hekɛnɔfɔɔ akɛ etsɛŋ ni ebaafã etsuji anɔkwafoi lɛ ahe kɛtsɔ Satan yiwalɛ gbɛjianɔtoo lɛ fɛɛ hiɛkpatamɔ nɔ. Nakai hewalɛ ni fe fɛɛ lɛ kpojiemɔ kɛ anunyam ni ekɛbaaba Yehowa gbɛi lɛ nɔ lɛ baafee nii ni hiɛ kpaŋ nɔ gbi ko gbi ko. Emli sɛɛnamɔi lɛ asɛɛ efoŋ.—Ezekiel 38:23; Kpojiemɔ 19:1, 2.
‘Oo Bɔ ni Nyɔŋmɔ Nilee Mli Kwɔ Ha Nɛ!’
8. Mɛɛ nibii komɛi Paulo woɔ wɔ hewalɛ koni wɔsusu he?
8 Bɔfo Paulo tée sanebimɔ shi yɛ wolo ni eŋma eyaha Romabii lɛ mli akɛ: “Ani Nyɔŋmɔ yeɔ sane ko ni ejaaa?” Kɛkɛ ni ekɛ nɔmimaa ha hetoo akɛ: “Dabida!” Kɛkɛ ni ema Nyɔŋmɔ mɔbɔnalɛ lɛ nɔ mi, ni ewie nɔ ni Yehowa kɛɛ Farao akɛ lɛ eŋmɛ lɛ gbɛ koni ehi shi be fioo ko lɛ he. Paulo tsɔɔ hu akɛ wɔ adesai lɛ tamɔ sũ yɛ gbɛshɔlɔ dɛŋ. Kɛkɛ ni ekɛɛ akɛ: “Shi kɛ Nyɔŋmɔ miisumɔ akɛ ejie emlifu kpo etsɔɔ ni eha ale ehe ni wa lɛ, ni kɛlɛ eŋmɛɔ eyi shi babaoo ehiɛɔ mlifu nii ni sa fitemɔ lɛ; ni asaŋ kɛ ehaa aleɔ enunyam falɛ lɛ hu yɛ emɔbɔnalɛ nii ni asaa ato aha anunyam lɛ anɔ lɛ, mɛni obaakɛɛ? Shi nakai etsɛ wɔ hu, jeee mɛi ni jɛ Yudafoi [lɛ] ateŋ lɛ kɛkɛ, shi mɛi ni jɛ jeŋmaji ateŋ lɛ hu.”—Romabii 9:14-24.
9. (a) Namɛi ji “mlifu nii ni sa fitemɔ” lɛ? (b) Mɛni hewɔ Yehowa ejie tsuishiŋmɛɛ babaoo kpo yɛ mɛi ni teɔ shi woɔ lɛ lɛ ahe lɛ, ni yɛ mɛɛ gbɛ nɔ nɔ ni baajɛ mli aba yɛ naagbee lɛ baafee nɔkpakpa kɛha mɛi ni sumɔɔ lɛ lɛ?
9 Kɛjɛ Eden atuatsemɔ lɛ sɛɛ kɛbaa lɛ, mɔ fɛɛ mɔ ni teɔ shi ewoɔ Yehowa kɛ emlai lɛ efee amɛhe “mlifu nii ni sa fitemɔ.” Yehowa etee nɔ eŋmɛ etsui shi yɛ nɛkɛ be nɛɛ fɛɛ mli. Efɔŋfeelɔi etee nɔ eye egbɛ̀i lɛ ahe fɛo, amɛ́wa etsuji lɛ ayi ni amɛgbe e-Bi lɛ po. Akɛni Yehowa eye ehe nɔ waa hewɔ lɛ, eŋmɛ be ni fa gbɛ koni bɔɔ nii fɛɛ ana oshara ni ejɛ atua ni atseɔ ashiɔ Nyɔŋmɔ, kɛ adesa nɔyeli ni ehe bɛ mli lɛ mli eba lɛ. Yɛ nakai beaŋ nɔŋŋ lɛ, Yesu gbele lɛ kɛ nɔ ni abaatsɔ nɔ akpɔ adesai toibolɔi, koni ‘afite Abonsam nitsumɔi lɛ ha.’—1 Yohane 3:8; Hebribii 2:14, 15.
10. Mɛni hewɔ Yehowa etee nɔ eŋmɛ etsui shi yɛ afii 1,900 ni eho lɛ mli lɛ?
10 Kɛjɛ be mli ni atée Yesu shi kɛjɛ gbohii ateŋ lɛ sɛɛ nɔ ni fe afii 1,900 nɛɛ, Yehowa etee nɔ ehiɛ “mlifu nii” lɛ amli, ni etsĩ amɛhiɛkpatamɔ lɛ naa. Mɛni hewɔ? Nɔ kome ji akɛ, eesaa mɛi ni baafata Yesu Kristo he yɛ eŋwɛi Maŋtsɛyeli lɛ mli lɛ. Mɛnɛɛmɛi ayibɔ ji 144,000, ni amɛji ‘mɔbɔnalɛ nii’ ni bɔfo Paulo wie amɛhe lɛ. Klɛŋklɛŋ lɛ, afɔ̃ nine atsɛ aŋkroaŋkroi ni yɔɔ Yudafoi lɛ ateŋ koni amɛbafee nɛkɛ ŋwɛi kuu nɛɛ. Yɛ sɛɛ mli lɛ, Nyɔŋmɔ fɔ̃ gbɔmɛi ni jɛ Jeŋmaji lɛ ateŋ lɛ nine. Yehowa enyɛɛɛ mɛnɛɛmɛi ateŋ mɔ ko nɔ koni esɔmɔ lɛ. Shi ekɛ hegbɛ ha mɛi ni kɛ hiɛsɔɔ kpɛlɛ egbɛjianɔtoo ni suɔmɔ yɔɔ mli lɛ nɔ lɛ, koni amɛtsɔmɔ e-Bi lɛ nanemɛi niyelɔi yɛ ŋwɛi Maŋtsɛyeli lɛ mli. Amrɔ nɛɛ nakai saamɔ ni asaa ŋwɛi kuu lɛ miihe aba naagbee kwraa.—Luka 22:29; Kpojiemɔ 14:1-4.
11. (a) Mɛɛ kuu náa Yehowa tsuishiŋmɛɛ lɛ he sɛɛ bianɛ? (b) Ehe baaba sɛɛnamɔ kɛha gbohii lɛ yɛ mɛɛ gbɛ nɔ?
11 Shi shikpɔŋ lɛ nɔ bii hu? Yehowa tsuishiŋmɛɛ lɛ hu eha anyɛ abua “asafo babaoo” ko naa kɛjɛ jeŋmaji fɛɛ mli. Amɛyifalɛ eshɛ akpekpei abɔ. Yehowa ewo shi akɛ nɛkɛ shikpɔŋ nɔ kuu nɛɛ baaje nibii agbɛjianɔtoo nɛɛ naagbee lɛ mli shweshweeshwe, ni amɛbaaná hegbɛ kɛha naanɔ wala yɛ paradeiso shikpɔŋ nɔ. (Kpojiemɔ 7:9, 10; Lala 37:29; Yohane 10:16) Yɛ Nyɔŋmɔ be ni sa mli lɛ, abaatee gbohii babaoo shi, ni akɛ hegbɛ baaha amɛ koni amɛtsɔmɔ ŋwɛi Maŋtsɛyeli lɛ shishibii. Nyɔŋmɔ Wiemɔ lɛ gbaa yɛ Bɔfoi lɛ Asaji 24:15 akɛ: “Gbohiiashitee baaba, ni jalɔi kɛ mɛi ni ejaaa fɛɛ baate shi.”—Yohane 5:28, 29.
12. (a) Mɛni wɔkase kɛjɛ Yehowa he yɛ etsui shi ni eŋmɛ yɛ efɔŋfeemɔ he lɛ hewɔ? (b) Te onuɔ bɔ ni Yehowa tsu nɛkɛ saji nɛɛ ahe nii eha lɛ he ohaa tɛŋŋ?
12 Ani ayeee jalɛ sane ko yɛ enɛɛmɛi fɛɛ mli? Dabi, aye jalɛ sane, ejaakɛ yɛ efɔŋfeelɔi loo “mlifu nii” lɛ ahiɛkpatamɔ ni Nyɔŋmɔ tsi eto lɛ hewɔ lɛ, eejie musuŋtsɔlɛ kpo eetsɔɔ mɛi krokomɛi koni ekɛ eyiŋtoo akpã gbee. Enɛ tsɔɔ bɔ ni enaa mɔ mɔbɔ ni esumɔɔ mɔ hã. Agbɛnɛ hu, akɛni Yehowa ná be ekɛkwɛ bɔ ni eyiŋtoo lɛ tee nɔ eha hewɔ lɛ, wɔkaseɔ ehe nii babaoo diɛŋtsɛ. Wɔnaa kpɛɔ wɔhe yɛ bɔ ni esu kɛ ebaŋ lɛ jeɔ kpo yɛ gbɛ̀i srɔtoi anɔ lɛ he—ejalɛsaneyeli, emɔbɔnalɛ, etsuishiŋmɛɛ, kɛ enilee ni jeɔ kpo yɛ gbɛ̀i srɔtoi anɔ lɛ. Bɔ ni Yehowa kɛ nilee tsu jeŋ muu fɛɛ maŋtsɛyeli he sane ni kã shi lɛ he nii—hegbɛ ni eyɔɔ ákɛ eyeɔ nɔ lɛ—baafee odaseyeli kɛya naanɔ, ni tsɔɔ akɛ, eji anɔkwale akɛ gbɛ ni etsɔɔ nɔ eyeɔ nɔ lɛ ji nɔ ni hi fe fɛɛ. Wɔkɛ bɔfo Paulo fɛɛ kɛɔ akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ! Ekojomɔi lɛ anyɛɛɛ shishi ana, ni egbɛ̀i lɛ hu anyɛɛɛ sɛɛ mo aja!”—Romabii 11:33.
Hegbɛ ni Wɔná ni Wɔkɛaatsɔɔ Wɔhetuu-Kɛhamɔ ni Wɔyɔɔ
13. Kɛji akɛ piŋmɔ ba wɔnɔ lɛ, mɛɛ hegbɛ enɛ kɛhaa wɔ, ni mɛni baaye abua wɔ ni wɔha hetoo yɛ nilee mli?
13 Nyɔŋmɔ tsuji lɛ ateŋ mɛi pii yɛ shihilɛi komɛi ni kɛ piŋmɔ baa amɛ diɛŋtsɛ amɛnɔ lɛ mli. Amɛpiŋmɔ lɛ yaa nɔ ejaakɛ Nyɔŋmɔ kpatako efɔŋfeelɔi ahiɛ koni ekɛ adesai asaamɔ ni agba afɔ̃ shi lɛ aba. Ani esa akɛ wɔha enɛ atsɔ dɔlɛ sane kɛha wɔ? Aloo wɔbaanyɛ wɔna shihilɛi nɛɛ akɛ hegbɛi ni wɔɔtsɔ nɔ wɔha ana Abonsam akɛ amalelɔ? Kɛ wɔha faikpamɔ akɛ: “Mibi, feemɔ ohe nilelɔ, ni oha mitsui anyɔ mimli, ni maná hetoo maha mɔ ni bɔɔ mi ahora” lɛ hi wɔjwɛŋmɔ mli lɛ, eeewo wɔ hewalɛ ni wɔnyɛ wɔfee nakai. (Abɛi 27:11) Satan, mɔ ni bɔɔ Yehowa ahora lɛ kɛɛ akɛ, kɛji akɛ gbɔmɛi aheloonaa nibii fɛɛ ŋmɛɛ amɛ lɛ, aloo amɛpiŋ yɛ gbɔmɔtso mli lɛ, amɛbaashwa Nyɔŋmɔ, ni amɛbaalomɔ lɛ po. (Hiob 1:9-11; 2:4, 5) Wɔhaa Yehowa tsui nyaa, kɛ wɔye lɛ anɔkwa yɛ wɔhaomɔi fɛɛ mli, ni wɔkɛtsɔɔ akɛ enɛ bɛ lɛ nakai yɛ wɔgbɛfaŋ.
14. Kɛji akɛ wɔkɛ wɔhe fɔ̃ Yehowa nɔ beni akaa wɔ lɛ, mɛɛ sɛɛnamɔi wɔnine shɛɔ nɔ?
14 Kɛji wɔkɛ wɔhe fɔ̃ Yehowa nɔ yɛ be mli ni kaai baa wɔnɔ lɛ, wɔbaanyɛ wɔná sui ni ekaaa kwraa. Ákɛ nɔkwɛmɔnɔ lɛ, yɛ nibii ni Yesu na amanehulu yɛ mli lɛ hewɔ lɛ, “ekase toiboo” yɛ gbɛ ni efeko nakai dã lɛ nɔ. Wɔ hu wɔbaanyɛ wɔkase nii kɛjɛ wɔkaai amli, ejaakɛ wɔbaanyɛ wɔná tsuishiŋmɛɛ, tsuishitoo kɛ Yehowa jalɛ gbɛ̀i lɛ ahe shishinumɔ ni mli kwɔ.—Hebribii 5:8, 9; 12:11; Yakobo 1:2-4.
15. Yɛ be mli ni wɔkɛ tsuishitoo ŋmɛɔ wɔtsui shi yɛ haomɔ shishi lɛ, ehe baa sɛɛnamɔ kɛhaa mɛi krokomɛi yɛ mɛɛ gbɛ nɔ?
15 Mɛi krokomɛi baana nɔ ni wɔfeɔ. Yɛ nɔ ni baa wɔnɔ yɛ jalɛ nifeemɔ he suɔmɔ ni wɔyɔɔ lɛ hewɔ lɛ, be baashɛ ni amɛteŋ mɛi komɛi baayoo mɛi ni ji anɔkwa Kristofoi ŋmɛnɛ. Ni kɛ amɛkɛ wɔ fee ekome yɛ jamɔ mli lɛ, amɛnine baanyɛ ashɛ naanɔ wala he jɔɔmɔi lɛ anɔ. (Mateo 25:34-36, 40, 46) Yehowa kɛ e-Bi lɛ miisumɔ ni gbɔmɛi aná nakai hegbɛ lɛ.
16. Bɔ ni wɔsusuɔ shihilɛ ni mli wa ni baa wɔnɔ lɛ he lɛ kɔɔ ekomefeemɔ he sane lɛ he yɛ mɛɛ gbɛ nɔ?
16 Kwɛ bɔ ni esa yijiemɔ ha, kɛ wɔsusu shihilɛi ni mli wawai ahe akɛ hegbɛi ni wɔná ni wɔkɛaatsɔɔ wɔhe ni wɔtuu wɔha Yehowa, kɛ agbɛnɛ esuɔmɔnaa nifeemɔ mli gbɛfaŋnɔ ni wɔɔná lɛ he lɛ! Nakai ni wɔɔfee lɛ baanyɛ aye odase akɛ wɔmiibɔ mɔdɛŋ ni wɔkɛ Nyɔŋmɔ kɛ Kristo afee ekome diɛŋtsɛ. Yesu sɔle eha Yehowa yɛ anɔkwa Kristofoi fɛɛ ahe, akɛ: “Shi jeee mɛnɛɛmɛi [ekaselɔi ni ekɛ amɛ bɔɔ kpaakpa lɛ] ahewɔ kɛkɛ mibiɔ lɛ, shi mɛi ni baahe minɔ aye yɛ amɛwiemɔ naa lɛ hu ahewɔŋ; koni amɛ fɛɛ amɛfee ekome, taakɛ bɔ ni bo, Ataa, oyɔɔ mimli ni mi hu miyɔɔ omli lɛ, koni amɛ hu amɛfee ekome yɛ wɔmli.”—Yohane 17:20, 21.
17. Mɛɛ hekɛnɔfɔɔ wɔbaanyɛ wɔná kɛji wɔye Yehowa anɔkwa?
17 Kɛji akɛ wɔyeɔ Yehowa anɔkwa lɛ, ebaajɔɔ wɔ babaoo diɛŋtsɛ. E-Wiemɔ lɛ kɛɔ akɛ: “Nyɛfia shi ni nyɛkagbugbaa, ni nyɛtekea nɔ yɛ Nuŋtsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeee yaka yɛ Nuŋtsɔ lɛ mli.” (1 Korintobii 15:58) Ekɛɔ hu akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ” lɛ nɔ. (Hebribii 6:10) Yakobo 5:11 kɛɔ akɛ: “Naa, wɔjɔɔ mɛi ni ŋmɛɔ amɛtsui shi lɛ. Nyɛnu Hiob tsuishiŋmɛɛ lɛ he, ni nyɛna [Yehowa, NW] naagbee lɛ; akɛ [Yehowa, NW] mli tsɔɔ lɛ babaoo, ni emli jɔ hu.” Mɛni jɛ mli ba kɛha Hiob? “Yehowa jɔɔ Hiob sɛɛkpee be lɛ fe etsutsu be lɛ.” (Hiob 42:10-16) Hɛɛ, Yehowa ji “mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:6) Ni kwɛ nyɔmɔwoo ni yɔɔ ni esa akɛ wɔkpa gbɛ nɛkɛ—naanɔ wala yɛ paradeiso shikpɔŋ nɔ!
18. Yɛ naagbee lɛ, mɛni baaba shihilɛ ni ehiii ni ekolɛ wɔkɛkpeɔ lɛ nɔ?
18 Nyɔŋmɔ Maŋtsɛyeli nɔyeli lɛ baajie efɔŋ ni afee adesa weku lɛ yɛ afii akpei abɔ ni eho lɛ amli lɛ fɛɛ kɛya kwraa. Miishɛɛ ni abaaná yɛ nakai be lɛ mli lɛ baafe piŋmɔ ni baa wɔnɔ bianɛ lɛ kwraa. Tsutsu shihilɛ ni ehiii lɛ eko kwraa gbaŋ wɔ naa. Susumɔi kɛ nitsumɔi kpakpai ni tswaa mɔ maa shi ni baayi gbɔmɛi lɛ adaa gbi shihilɛ mli obɔ̃ yɛ jeŋ hee lɛ mli lɛ baatsumɔ piŋmɔ he kaimɔi lɛ kɛya fiofio. Yehowa jajeɔ akɛ: “Miibɔ ŋwɛi hee [ŋwɛi Maŋtsɛyeli nɔyeli hee yɛ adesai anɔ] kɛ shikpɔŋ hee [adesa weku ni ji jalɔi], ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ; shi moŋ, nyɛnyaa ní nyɛmli afilia nyɛ kɛyaa naanɔ yɛ nii ní mibɔɔ lɛ ahewɔ.” Hɛɛ, jalɔi lɛ baanyɛ akɛɛ yɛ Yehowa jeŋ hee lɛ mli akɛ: “Shikpɔŋ muu lɛ fɛɛ ená hejɔlɛ, ni enɔ ejɔ, ni amɛmiilá nyamɔ lalai.”—Yesaia 14:7; 65:17, 18.
Sanegbaa ni Akɛtiɔ Mli
• Yehowa ejie bulɛ kpele kpo yɛ gbɛ ni ja nɔ yɛ lɛ diɛŋtsɛ egbɛi lɛ he yɛ be mli ni eŋmɛɔ efɔŋ feemɔ gbɛ lɛ yɛ mɛɛ gbɛ nɔ?
• Yɛ mɛɛ gbɛ nɔ “mlifu nii” ni Nyɔŋmɔ ŋmɛ etsui shi yɛ he lɛ eha emɔbɔnalɛ mli ekpã aahu kɛbashɛ wɔnɔ?
• Mɛni esa akɛ wɔbɔ mɔdɛŋ ni wɔna yɛ shihilɛi ni kɔɔ piŋmɔi ni baa wɔ diɛŋtsɛ wɔnɔ lɛ ahe lɛ mli?
[Mfonirii ni yɔɔ baafa 67]
Yehowa “jɔɔ Hiob sɛɛkpee be lɛ fe etsutsu be lɛ”