Gbɛtsɔɔmɔi Kɛha Shihilɛ Ni Yɔɔ Miishɛɛ

KƐ́ OKƐ naagba ko kpe lɛ, nɛgbɛ otaoɔ ŋaawoo kɛjɛɔ? Ekolɛ obaaya naanyo ko ni anyɛɔ akɛ he fɔ̃ɔ enɔ loo ŋaawolɔ ko ni he esa ŋɔɔ. Hei ni anáa saji kɛjɛɔ, tamɔ wojiatoohe lɛ baanyɛ aye abua. Aloo obaanyɛ oyatao yɛ “Nanaa nilee” lɛ mli taakɛ Bokagbɛbii komɛi tsɛ́ɔ lɛ lɛ koni okase nii kɛjɛ niiashikpamɔ ni ekɛ afii babaoo ená lɛ mli. Yɛ gbɛ fɛɛ gbɛ ni osumɔɔ ni okɛtsu nii lɛ sɛɛ lɛ, ehi akɛ ooosusu nilee wiemɔi kukuji ni kɛ saji kpakpai ni akɛkuɔ naagba lɛ naa lɛ haa lɛ he. Naa ŋaawoo kpakpa ko ni obaana akɛ ehe baaba sɛɛnamɔ kɛha bo.

² Weku Shihilɛ: Fɔlɔi babaoo ehao akɛ amɛmiitsɔse amɛbii yɛ jeŋ ni nibii fɔ̃ji ni náa mɔ nɔ hewalɛ eyi mli obɔ lɛ mli. Ŋaawoo ni nyiɛ sɛɛ nɛɛ hesusumɔ baanyɛ aye abua: “Tsɔɔmɔ gbekɛ gbɛ ni sa akɛ etsɔ nɔ, ni kɛ egbɔ hu lɛ, ejeŋ nɔ.”¹ Yɛ be mli ni gbekɛbii daraa lɛ, ‘gbɛ lɛ’ ni ji tɛi komɛi ni afolɔ ashwie shi lɛ he miihia amɛ koni amɛnyiɛ sɛɛ. Mɛi ni ji enɛ he nilelɔi lɛ ateŋ mɛi babaoo ebayɔse bɔ ni ehe hiaa ni akɛ mlai ni he yɔɔ sɛɛnamɔ aha gbekɛbii. Tɛi ni nilee yɔɔ mli ni fɔlɔi efolɔ eshwie shi lɛ haa gbekɛbii nuɔ he akɛ amɛyɛ shweshweeshwe. Kɛfata he lɛ: “Tso kɛ kãmɔ hãa mɔ leɔ nii; shi gbekɛ ni akpoo ejeŋ afɔ̃ enɔ lɛ, ewoɔ enyɛ hiɛgbele.”² ‘Tso lɛ’ miiwie fɔlɔi ahegbɛ ni esa ákɛ akɛ suɔmɔ atsu he nii koni ekaha gbekɛbii lɛ miikpalaŋ lɛ he. Hegbɛ ni tamɔ nɛkɛ ni akɛaatsu nii lɛ etsɔɔɔ akɛ esa akɛ awa gbekɛbii ayi yɛ gbɛ ko nɔ. Ŋaawoo ni akɛhaa fɔlɔi ji: “Nyɛkawoa nyɛbii amlila, koni amɛtsui akafã.”³

³ Wekukpaa kpakpa ni kãa wu kɛ ŋa teŋ lɛ ji nɔ ni haa anáa weku ni miishɛɛ yɔɔ mli. Mɛni ji nɔ ni he hiaa koni aná wekukpaa ni tamɔ nakai? “Nyɛteŋ mɔ fɛɛ mɔ asumɔ lɛ diɛŋtsɛ eŋa nakai, tamɔ lɛ diɛŋtsɛ ehe; koni ŋa lɛ hu ashé ewu.”⁴ Suɔmɔ kɛ bulɛ tsuɔ nii akɛ nibii ni haa weku gbɛjianɔtoo lɛ tsuɔ nii jogbaŋŋ. Bɔni afee ni ŋaawoo nɛɛ atsu nii lɛ, sanegbaa he miihia, ejaakɛ “kɛ́ ajinatoo bɛ lɛ, yiŋtoi feɔ yaka.”⁵ Bɔni afee ni wɔjɛ wɔtsuiaŋ wɔgba sane lɛ, esa akɛ wɔfee koni wɔkwɛ nii kɛteke wɔhefatalɔ lɛ henumɔi, ní wɔle bɔ ni enuɔ he ehaa diɛŋtsɛ. Nilee yɛ mli akɛ wɔɔha ehi wɔjwɛŋmɔŋ akɛ “[gbɔmɔ] jwɛŋmɔ baanyɛ afee nɔ ni mli kwɔ tamɔ nu ni yɔɔ nubu mli, shi nuu [loo, yoo] ni kɔɔ sane sɛɛ lɛ baagbala yɛ emli kɛje kpo.”⁶

⁴ Yɛ maji wuji ni be ko ni eho lɛ nɔ ni bii fɔɔ feemɔ ji bulɛ ni amɛkɛhaa mɛi ni edara po lɛ amli lɛ, mɛi babaoo ni edara lɛ ahe feɔ shoo waa yɛ amɛgbɔlɛ bei amli, beni amɛbii lɛ eshĩ amɛ kome too pɛ lɛ. Ni kɛlɛ, ehi jogbaŋŋ akɛ amɛbii lɛ aaasusu nilee wiemɔi nɛɛ ahe, ákɛ: “Wó otsɛ kɛ onyɛ.”⁷ “Kaagbe onyɛ he guɔ, kɛ́ egbɔ lɛ.”⁸ “Mɔ ni waa etsɛ yi ni ewoɔ enyɛ foi lɛ, bi ni woɔ mɔ hiɛgbele ni ebɔɔ mɔ ahora ni.”⁹ Yɛ gbɛ kroko nɔ lɛ, ehe miihia ni fɔlɔi ni amɛdara lɛ aná jwɛŋmɔ kpakpa yɛ saji ahe ni amɛkɛ hegbɛ lɛ atsu nii koni amɛkɛtao wekukpaai ni yɔɔ miishɛɛ. “Mɔ ni etse ehe lɛ, akɔnɔ nii etaoɔ, ni etseɔ nɔ ni hi ha lɛ fɛɛ hiɛ atũa.”¹⁰

⁵ Dãanumɔ: Eji anɔkwale akɛ “wein haa hiɛkãlɔi amii shɛɔ amɛhe,”¹¹ ni ekolɛ dãa srɔtoi ni wa ni anuɔ haŋ ‘akai haomɔ lɛ dɔŋŋ.’¹² Shi kaimɔ akɛ: “Wein lɛ hefɛoyelɔ ni, ni dãa ní wa lɛ hoofeelɔ ni, ni mɔ fɛɛ mɔ ní no haa edidã lɛ, eleee nii.”¹³ Susumɔ nɔ ni jɛɔ dãanumɔ shɛii mli kɛbaa lɛ he okwɛ: “Kɛ́ fee sɛɛ lɛ [wein] ekɔ̃ɔ mɔ tamɔ onufu, ni efɛ̃ɔ mɔ tamɔ blikã. Ohiŋmɛii aaakwɛ yei krokomɛi, ni otsui aaawie nibii gbohii. . . . Té be ni mihiɛ aaatsɛŋ? matao sɛɛgbɛ ekoŋŋ kɛ̃!”¹⁴ Dãa srɔtoi ni anuɔ yɛ hiɛshikamɔ mli lɛ he baanyɛ aba sɛɛnamɔ, shi be fɛɛ be lɛ esaaa akɛ akɛtsuɔ nii yɛ gbɛ ni ejaaa nɔ.

⁶ Shika He Gbɛjianɔtoo: Yɛ shihilɛi komɛi amli lɛ, abaanyɛ ajie shika he naagbai kɛya kɛ́ akɛ nilee to shika he gbɛjianɔ. Bó ŋaawoo ni nilee yɔɔ mli nɛɛ toi: “Kaaŋɔ ohe ofutu dãatɔlɔi kɛ mɛi ni feɔ loo he fú lɛ! Ejaakɛ dãatɔlɔ kɛ fulɔ lɛ, amɛaaye ohia, ni wɔdɔ̃iwɔ aaaha mɔ ábu mamashwɛi.”¹⁵ Kɛ wɔkɛ dãa kɛ tsofai tsuuu nii yɛ gbɛ fɔŋ nɔ, ní wɔkɛ wɔhe wooo jeŋbai tamɔ asɔshwɛmɔ mli lɛ, wɔbaanyɛ ni wɔkɛ wɔshika atsu nii koni wɔkɛha wɔweku lɛ aná amɛhiamɔ nii yɛ gbɛ kpakpa nɔ. Ni kɛlɛ, mɛi babaoo heɔ nii fe bɔ ni kulɛ esa akɛ amɛ́he yɛ shika ni amɛhiɛ lɛ naa, ni yɛ naagbee lɛ amɛtsuɔ nii waa koni amɛkɛwo nyɔji ni amɛhiɛ lɛ kɛkɛ. Mɛi komɛi po yafaa shika koni amɛkɛyawo hekpa ni jɛ shikafaa kroko mli ba lɛ he nyɔmɔ. Nilee wiemɔi ni nyiɛ sɛɛ nɛɛ ni aaaha ehi jwɛŋmɔ mli lɛ baaye abua: “Mɔ ni nyiɛɔ yakayakanii asɛɛ lɛ, eeetɔ kɛ ohia.”¹⁶ Wɔbaanyɛ wɔbi wɔhe akɛ: ‘Ani nibii ni ekolɛ masumɔ akɛ mahe lɛ he miihia mi lɛɛlɛŋ? Nibii enyiɛ mibuaa naa miwoɔ adeka mli mimaa shi beni mikɛtsu nii be fioo ko pɛ lɛ?’ Adafitswaa wolo mli niŋmalɔ ko ŋma akɛ: “Nibii diɛŋtsɛ ni he hiaa gbɔmɔ lɛ faaa​—nibii ni etaoɔ ená lɛ falɛ bɛ naagbee.” Ha nilee wiemɔi nɛɛ ahi ojwɛŋmɔ mli: “Wɔkɛ nɔ ko nɔ ko baaa je nɛŋ, no hewɔ lɛ eyɛ faŋŋ akɛ wɔnyɛŋ wɔkɛ nɔ ko aya hu. Shi kɛ́ wɔyɛ ŋmãa kɛ hehaanii kɛkɛ lɛ, esa akɛ wɔmii ashɛ he. . . . Nibii fɔ̃ji fɛɛ ashishifã ji shika suɔmɔ ní mɛi komɛi di sɛɛ . . . ni amɛkɛ piŋmɔi babaoo egbulɔ amɛhe lɛ.”¹⁷

⁷ Mɔdɛŋbɔɔ yɛ nitsumɔ mli haa anaa shika he naagbai anaa. “Hejɔ̃lɔ, yaa tsatsu ŋɔɔ; jwɛŋmɔ egbɛ̀i lɛ ahe ni ole nii! . . . ‘Mawɔ fioo, majie mihiɛsɛɛ fioo, makota miniji mawɔ fioo!’ No koni o-hia lɛ aaaba tamɔ ojotswalɔ.”¹⁸ Gbɛjianɔ ni atoɔ jogbaŋŋ kɛ shika he gbɛjianɔtoo kpakpa hu baanyɛ aye abua: “Nyɛteŋ namɔ ni kɛji eetao mɔ̃ɔ emã lɛ ni etáŋ shi, ní ebu naa ekwɛ dã akɛ eyɛ nii bɔ ni aaashɛ naagbee lo?”¹⁹

⁸ Shi kɛlɛ, kɛ́ wɔye ohia ni jeee wɔtɔmɔ ha eba lɛ nakai hu? Ákɛ nɔkwɛmɔnɔ lɛ, yɛ shika he gbɛjianɔtoo ko fitemɔ hewɔ lɛ, ekolɛ yɛ naagbee lɛ wɔnitsumɔ baaje wɔdɛŋ eyɛ mli akɛ wɔmiisumɔ ni wɔtsu nii waa. Aloo ekolɛ wɔbaahi maŋ ko mli ní mɛi babaoo ni yɔɔ mli lɛ miiye ohia futaa. Belɛ mɛni wɔbaafee? “Nilee tamɔ hɔɔŋ, tamɔ bɔ ni shika hu tamɔ hɔɔŋ lɛ; shi nɔ ni nilee kɛfe ji akɛ nilee hereɔ etsɛ yiwala.”²⁰ Yɛ enɛ sɛɛ lɛ, susumɔ ŋaawoo nɛɛ he okwɛ: “Kɛ́ oona nuu ni bɔɔ mɔdɛŋ yɛ enitsumɔ mli lɛ, maŋtsɛmɛi ahiɛ tete eeedamɔ.”²¹ Ani wɔbaanyɛ wɔkase nitsumɔ mli hesaai ni baaye ebua wɔ koni wɔná nitsumɔ?

⁹ Ŋaawoo ni nyiɛ sɛɛ nɛɛ baafee tamɔ nɔ ni teɔ shi woɔ ehe, shi ekɛ nitsumɔ mɔɔ shi waa diɛŋtsɛ: “Nyɛhaa, ni aaaha nyɛ; . . . ejaakɛ nɔ̃ susumɔ nɔ̃ ní nyɛkɛsusuɔ lɛ, no nɔŋŋ aaaku sɛɛ aŋɔsusu aha nyɛ.”²² Enɛ etsɔɔɔ akɛ aaha nii koni akpa gbɛ akɛ abaafee mɔ ejurɔ kɛto najiaŋ. Shi moŋ, ŋaawoo lɛ ji koni aná nihamɔ su: “Mɔ ni nine kpɔɔ lɛ, eeewo fɔ, ni mɔ ni haa mɛi tɔrɔɔ lɛ, lɛ hu eeetɔ.”²³ Kɛ wɔkɛ mɛi ja nii yɛ hiamɔ be mli lɛ, wɔkɛ nakai feemɔ haa nihamɔ mumɔ ni he baaba sɛɛnamɔ aha wɔ be ko lɛ shwereɔ.

¹⁰ Adesai ateŋ naanyobɔɔi: Maŋtsɛ ko ni le nii kɛɛ akɛ: “Mina deŋmegbomɔ fɛɛ, kɛ nitsumɔ mli shweremɔ fɛɛ hu, akɛ no hewɔ gbɔmɔ he tsɛ̃ɔ enaanyo. Enɛ hu yakayakanɔ ko kɛ kɔɔyɔɔ hakumɔ ni.”²⁴ Hetsɛ̃ etsirɛ mɛi babaoo yisɛɛ ni eha amɛ́fee nii ni nilee bɛ mli. Mɔ ko naa akɛ enaanyo yɛ tɛlivishiŋ ni ehiɛ lɛɛmɔ ji sɛntimitai 80, ni eyaa ni eyaheɔ nɔ ni ehiɛ lɛɛmɔ ji sɛntimitai 90, eyɛ mli akɛ enɔ̃ ni ehiɛ lɛɛmɔ ji sɛntimitai 70 lɛ tsuɔ nii jogbaŋŋ diɛŋtsɛ. Hetsɛ̃ ni tamɔ nɛkɛ lɛ ji yakayakanɔ ko lɛɛlɛŋ, tamɔ bɔ ni kɔɔyɔɔ hakumɔ ji lɛ​—ekpaa shi sɔŋŋ kɛkɛ yakatswaa. Aloo jeee nakai?

¹¹ Ekolɛ nɔ ni mɛi krokomɛi ekɛɛ wɔ lɛ ewo wɔ mlifu. Shi susumɔ ŋaawoo nɛɛ he okwɛ: “Kaaha omumɔ mli miifu oyá, ejaakɛ mlifu lɛ, kwashiai amiinaa eyɔɔ.”²⁵ Lɛɛlɛŋ, shihilɛi komɛi yɛ ni wɔmli ni aaafu lɛ baanyɛ afee nɔ ni ja. Blema niŋmalɔ ko ŋma akɛ: “Nyɛmli afua, shi nyɛkafea esha; hulu akanyɔ shi yɛ nyɛmlila lɛ nɔ.”²⁶ Shi te wɔɔfee tɛŋŋ wɔtsu mlifu ni naa wa lɛ he nii? “Gbɔmɔ ni yɔɔ jwɛŋmɔ lɛ, emli fuuu mra, ni ehiɛ ni ekuɔ efɔ̃ɔ nɔtɔmɔ nɔ lɛ, ehiɛnyam ni.”²⁷ Jwɛŋmɔ ji nɔ ni he hiaa. Wɔbaanyɛ wɔbi wɔhe akɛ: ‘Mɛni hewɔ efee enii nakai? Ani shihilɛi komɛi yɛ ni ha eba lɛ nakai?’ Kɛfata jwɛŋmɔ he lɛ, sui komɛi yɛ ni abaanyɛ aná koni akɛtsu mlifu he nii. “Nyɛwoa musuŋtsɔlɛ, mlihilɛ, heshibaa jwɛŋmɔ, mlijɔlɛ, tsuishitoo, ni kɛji mɔ ko kɛ mɔ ko ná sane ko lɛ, nyɛnanaa nyɛhaa nyɛhe ni nyɛkɛfafaa nyɛhe, . . . shi enɛɛmɛi fɛɛ sɛɛ lɛ nyɛwoa suɔmɔ ni ji emuuyeli kpãa lɛ.”²⁸ Hɛɛ, suɔmɔ kuɔ naagbai babaoo ni yaa nɔ yɛ adesai ateŋ naanyobɔɔi amli lɛ naa.

¹² Ni kɛlɛ, “henɔ bibioo” ko yɛ ni haaa adesai anaanyobɔɔi ni toiŋjɔlɛ yɔɔ mli aya nɔ​—lilɛi lɛ. Kwɛ bɔ ni nɛkɛ wiemɔi nɛɛ ji anɔkwale ha: “Lilɛi lɛ, gbɔmɔ ko gbɔmɔ ko nyɛɛɛ ehe ajɔɔ, nɔ fɔŋ ni eflegeje ni eyi obɔ kɛ ebɔɔ ni gbeɔ mɔ ni.”²⁹ Ni ŋaawoo nɛɛ sa kadimɔ jogbaŋŋ: “Mɔ fɛɛ mɔ he afee oyá kɛ ninumɔ, ehumi shi kɛ wiemɔ, ehumi shi kɛ mlifu.”³⁰ Shi kɛlɛ, kɛ́ wɔkɛ lilɛi lɛ miitsu nii lɛ, ehe miihia ni wɔkwɛ jogbaŋŋ ni wɔkɛ anɔkwalei ni amalei futu mli akatsu nii ni wɔkɛmiiha hiɛaŋhiɛaŋ toiŋjɔlɛ miiya nɔ kɛkɛ. “Nyɛhaa nyɛwiemɔ afea: Hɛɛ, hɛɛ! dabi, dabi! shi nɔ fɛɛ nɔ ni fe enɛɛmɛi lɛ ejɛ mɔ fɔŋ lɛŋ.”³¹

¹³ Te wɔɔfee tɛŋŋ wɔha wekukpaa kpakpa aya nɔ yɛ wɔ kɛ mɛi krokomɛi ateŋ? Kadimɔ shishitoo mla ni kudɔɔ mɔ nɛɛ: “Nyɛteŋ mɔ fɛɛ mɔ akafó enɔ mli, shi efó enaanyo nɔ mli.”³² No feemɔ mli lɛ wɔbaahi shi yɛ wiemɔi ni mɛi babaoo tsɛɔ lɛ Mla Kpakpa lɛ naa: “No hewɔ lɛ, nɔ fɛɛ nɔ ni nyɛtaoɔ akɛ mɛi aŋɔfee nyɛ lɛ, nyɛ hu nyɛfea amɛ nakai nɔŋŋ.”³³

¹⁴ Nɔnyɛɛ: Te wɔɔfee tɛŋŋ wɔŋmɛ pɛpɛɛpɛ yɛ henumɔŋ yɛ jeŋ ni nɔnyɛɛ eyi mli obɔ nɛɛ mli? “Miishɛɛ tsui haa mɔ tseɔ ehiɛ; shi tsuiŋdɔlɛ haa mɔ feɔ gblinĩi.”³⁴ Ekolɛ wɔnáŋ “miishɛɛ tsui” kwraa kɛ́ wɔna akɛ mɛi krokomɛi kuɔ amɛhiɛ amɛshwieɔ nɔ ni tamɔ nɔ ko ni ja yɛ wɔhiɛ lɛ nɔ lɛ. Ni kɛlɛ, wɔɔfee jogbaŋŋ akɛ wɔɔkai wiemɔi nɛɛ: “Kaafee ohe jalɔ tuutu, ni asaŋ kaafee ohe nilelɔ tuutu: mɛɛba ooofite bo diɛŋtsɛ ohe?”³⁵ Yɛ gbɛ kroko nɔ lɛ, ekolɛ shihilɛ mli yeyeeyefeemɔi baaba wɔnɔ be fɛɛ be. Kɛkɛ lɛ mɛni? Nyɛhaa wɔkaia akɛ: “Gbɔmɔ tsui mli ŋkɔmɔyeli haa edɔɔ kɔmɔ̃ɔ; shi wiemɔ kpakpa haa emii shɛɔ ehe.”³⁶ Ekolɛ wɔbaasusu “wiemɔ kpakpa” ni ji mlihilɛ wiemɔ ni woɔ wɔ hewalɛ lɛ he. Kɛ wɔná jwɛŋmɔ kpakpa yɛ shihilɛi ni nyɛɔ mɔ nɔ lɛ fɛɛ sɛɛ lɛ, ebaanyɛ ená wɔnɔ hewalɛ kpakpa po: “Tsuijurɔ lɛ, tsofa kpakpa ni.”³⁷ Kɛ nɔnyɛɛ ba wɔnɔ yɛ be mli ni etamɔ nɔ ni mɛi krokomɛi susuuu wɔhe lɛ, wɔbaanyɛ wɔkɛ gbɛtsɔɔmɔ nɛɛ atsu nii wɔkwɛ: “Nɔ̃ hamɔ mli yɛ jɔɔmɔ fe hemɔ.””³⁸ Kɛ wɔná jwɛŋmɔ ni ja lɛ, wɔbaanyɛ wɔdamɔ nɔnyɛɛ ni wɔkɛkpeɔ daa gbi lɛ naa.

¹⁵ Ani osusuɔ akɛ obaanyɛ ni okɛ nilee wiemɔi ni átsɔ hiɛ akɛ́ha lɛ atsu nii ákɛ mɔ ni yɔɔ afii ohai 21 nɛɛ mli lɛ? Yɛ anɔkwale mli lɛ, anaa enɛɛmɛi yɛ blema wolo ko mli​—Biblia lɛ. Shi mɛni hewɔ esa akɛ okɛ Biblia lɛ atsu nii moŋ fe hei krokomɛi ni oooná nilee kɛaajɛ lɛ? Ejaakɛ, kɛfata yiŋtoi krokomɛi ahe lɛ, Biblia lɛ mli shishitoo mlai lɛ efee nɔ ni mɔɔ shi ni akɛ́tsu nii jogbaŋŋ kɛjɛ jeeŋmɔ beebe. Ŋɔɔ Yasuhiro kɛ Kayoko ni kɛ amɛhe wo yei aheyeli kuu mli lɛ ákɛ nɔkwɛmɔnɔ okwɛ. Amɛkɛ amɛhe bote gbalashihilɛ mli akɛni Yasuhiro ewo Kayoko hɔ́ hewɔ. Shi, yɛ shika mli naagbai kɛ bɔ ni amɛnuɔ he akɛ amɛkɛ amɛhe kpãaa hewɔ lɛ, etsɛɛɛ ni amɛtsé gbala. Sɛɛ mli lɛ, Yehowa Odasefoi kɛ amɛteŋ mɔ fɛɛ mɔ bɔi Biblia lɛ kasemɔ ní mɔ nɛ leee akɛ akɛ mɔ kroko lɛ miikase nii. Amɛteŋ mɔ fɛɛ mɔ yɔse tsakemɔi wuji yɛ mɔ kroko lɛ shihilɛ mli. Yasuhiro kɛ Kayoko kpɛ amɛyiŋ akɛ amɛbaaku sɛɛ amɛbote gbalashihilɛ mli ekoŋŋ. Eyɛ mli akɛ amɛshihilɛ jeee nɔ ni naagba ko kwraa bɛ mli moŋ, shi amɛyɛ Biblia mli shishitoo mlai lɛ ni amɛaahi shi yɛ naa agbɛnɛ, ni mɛi enyɔ lɛ fɛɛ miiŋmɛɛ saji ahe koni amɛku amɛnaagbai anaa. Obaana yibii kpakpai ni Biblia mli shishitoo mlai ni akɛtsuɔ nii yɛ Yehowa Odasefoi ateŋ lɛ woɔ. Ni amɛkpeei lɛ eko ní oooya koni ole gbɔmɛi ni bɔɔ mɔdɛŋ akɛ amɛaahi shi yɛ Biblia lɛ gbɛtsɔɔmɔ naa hu?

¹⁶ Ŋaawoo ni átsɛ sɛɛ lɛ ji nilee ni anyɛɔ atsuɔ he nii ni fa babaoo ni etãaa ni obaanyɛ oná yɛ nilee bu, ni ji Biblia lɛ mli lɛ amli fioo komɛi kɛkɛ. Yiŋtoi yɛ ni nomɛi ahewɔ ni Yehowa Odasefoi jɛɔ amɛsuɔmɔ mli amɛkɛ Biblia mli shishitoo mlai tsuɔ nii yɛ amɛshihilɛi amli lɛ. Mɛni hewɔ otaooo yiŋtoi ni yɔɔ nakai suɔmɔ lɛ sɛɛ lɛ amli koni okase Biblia lɛ mli shishitoo anɔkwalei komɛi ahe nii?