Kristofoia Ekomefeemɔ Ni Aaahiɛ Mli yɛ Nitsumɔ Mli Saji Amli
“Kwɛ bɔ ni ehi, bɔ ni eyɔɔ fɛo, kɛ nyɛmimɛi fee ekome kɛhi shi lɛ!”—LALA 133:1.
1. Mɛni hewɔ asumɔɔ Kristofoia ekomefeemɔ babaoo nakai lɛ?
EJI nɔ ni ‘hi kɛ nɔ ni yɔɔ fɛo diɛŋtsɛ kɛ nyɛmimɛi Kristofoi fee ekome kɛhi shi,’ titri lɛ yɛ ŋmɛnɛ ni mligbalamɔ babaoo yɔɔ je lɛŋ lɛ. He ni ekomefeemɔ diɛŋtsɛ yɔɔ lɛ, ebafeɔ nii ni yɔɔ fɛo, ni nɔ ni jɛɔ mli baa ji nyɛmimɛi asuɔmɔ yɛ ekomefeemɔ mli ni fimɔɔ mɔ yɛ gbɔmɛi ateŋ, ni efeɔ miishɛɛ akɛ mɔ kɛ enyɛmi aaabɔ naanyo. Shi yɛ gbɛ kroko nɔ lɛ, mligbalamɔ yɛ taŋ ni nɔ ni jɛɔ mli ba ji nyɛɛ, hetsɛ̃, ni egbalaa mɔ kɛ enanemɛi ateŋ.
2. Mɛni hewɔ esa akɛ bɔ ni wɔbuɔ Biblia mli shishitoo mlai wɔhaa lɛ aha wɔ nyɛmimɛi ateŋ ekomefeemɔ yɛ nitsumɔ mli saji amli po lɛ aya hiɛ lɛ?
2 Kɛ Kristofoi kɛ Yehowa tsuji krokomɛi kɛ amɛhe wo nitsumɔ mli saji amli lɛ, esa akɛ Biblia mli shishitoo mlai ni amɛ fɛɛ amɛle lɛ aha ekome ni ámɛfee akɛ nyɛmimɛi lɛ mli alɛɛ. Yehowa Odasefoi asafo lɛ mli nɔkwɛlɔ ko wie lɛ yɛ nɛkɛ gbɛ nɔ: “Yɛ be mli ni je lɛ feɔ je ni anyɛɛɛ akɛ he afɔ enɔ babaoo lɛ, mɔ ko mii shɛɔ ehe kɛ ekɛ enanemɛi Kristofoi ni diɔ shishitoo mlai asɛɛ miitsu nii. Ehe ehiaaa ni ‘wɔhiɛ ahi wɔhe nɔ’ yɛ be fɛɛ mli. Nitsumɔ mli hefatalɔi ni he tse ni yeɔ anɔkwale miitã yɛ je nɛɛ mli. Kwɛ miishɛɛ ni eji akɛ okɛ gbɔmɛi ni yeɔ anɔkwale, ni amɛshɛreee zigarɛt aloo wiemɔsha ejɛɛɛ amɛnaa aaatsu nii, mɛi ni yɔɔ henɔyeli, ni amɛyiŋtoo titri jeee heloo gbɛfaŋ hiɛjoomɔ!”
3. (a) Mɛni ji nitsumɔ mli tsakpaai komɛi ni nanemɛi heyelilɔi kɛ amɛhe woɔ mli lɛ ekomɛi? (b) Mɛɛ Shishitoo mla esa akɛ ekudɔ nitsumɔ mli nifeemɔi?
3 Mɛni ji nitsumɔ mli tsakpaa komɛi ni nanemɛi heyelilɔi baanyɛ ni amɛkɛ amɛhe awo mli lɛ? Ekome ji he ni Kristofoi enyɔ loo nɔ ni fe nakai aaakpɛ amɛyiŋ akɛ amɛkɛ amɛhe baawo nitsumɔ mli akɛ hefatalɔi lɛ. Ekroko ji he ni mɔ kome ji nitsumɔtsɛ ni mɔ kroko lɛ hu ji nitsulɔ lɛ. Ekroko hu ji shihilɛ ko ni haa Kristofonyo hɔɔ nɔ ko loo etsuɔ nɔ ko ehaa heyelilɔ kroko. Yɛ nitsumɔi fɛɛ ni tamɔ enɛɛmɛi amli lɛ, esa akɛ shishitoo mlai ni kɔɔ anɔkwayeli kɛ emuuyeli mli hiɛmɔ ni aŋma afɔ shi yɛ Yehowa Wiemɔ ni jɛ mumɔŋ lɛ mli lɛ akudɔ amɛ nifeemɔi. Kɛ eba lɛ nɛkɛ lɛ, ekomefeemɔ ákɛ nyɛmimɛi kɛ miishɛɛ ni akɛtsuɔ nii yɛ ekomefeemɔ mli lɛ mli lɛɛɔ.—1 Korintobii 10:31.
4. Mɛɛ oshara yɔɔ kɛha Kristofoi ni kɛ amɛhe ewo nitsumɔ mli lɛ?
4 Shi oshara yɛ akɛ mɛi komɛi ehiɛŋ Kristofoi asusumɔ ni kwɔ nɛɛ mli. Amɛbaaje shishi amɛsusu amɛ diɛŋtsɛ amɛsɛɛnamɔi ahe babaoo. (Filipibii 2:4) Shika baanyɛ afee nɔ ni he hiaa amɛ fe Kristofoia ekomefeemɔ. Shi pɛsɛmkunya yɛ nitsumɔ mli baanyɛ afite ekomefeemɔ ni ka mɛi ateŋ lɛ kɛ ekomefeemɔ ni ka amɛkɛ Yehowa teŋ lɛ. Wɔsumɔŋ ni wɔɔha enɛ aba kɔkɔɔkɔ!—Yohane 13:34, 35; Hebribii 13: 5; 1 Timoteo 3:2, 3; 1 Yohane 3:16; 4:20, 21.
Bɔ ni Gbeekpamɔ ni Aŋma Awo Wolo Nɔ lɛ He Hiaa Ha
5. Yɛ mɛɛ gbɛ nɔ Abraham niiashikpamɔ yɛ shikpɔŋ ni ehé lɛ mli lɛ tsɔɔ sɛɛnamɔ ni yɔɔ gbeekpamɔ ni aŋmaa awoɔ wolo nɔ lɛ he?
5 Bɔni afee ni eye ebua ni béi akaba nitsumɔ mli nifeemɔi amli lɛ, susumɔ gbɛ ni Abraham tsɔ nɔ ehe shikpɔŋkuku ko lɛ he okwɛ. “Ni Abraham ŋmɛ jwiɛtɛi ni Efron tsi ta yɛ Hetbii atoiiaŋ lɛ eha lɛ, jwiɛtɛi shekeli ni jarayelɔi yeɔ lɛ ohai ejwɛ. Ni atu Efron shikpɔŋ lɛ ni yɔɔ Makpela . . . awo Abraham dɛ, koni etsɔ enɔ̃ Hetbii lɛ fɛɛ kɛ mɛi fɛɛ ni tsɔɔ emaŋ agbo mli lɛ ahiɛ.” Enɛ jeee mɛi enyɔ ateŋ gbeekpamɔ ni wolo bɛ nɔ. Eji gbeekpamɔ diɛŋtsɛ ni aje gbɛ afee, ni ama nɔ mi yɛ Odasefoi ahiɛ. Béi ko loo shishinumɔ ni eyabaaa bɛ nɔ ni afee lɛ kɛ jara ni awo yɛ he lɛ mli.—1 Mose 23:2-4, 14-18.
6. Te Kristofoi aaafee tɛŋŋ ni amɛkɛ amɛnitsumɔi awo woji anɔ?
6 Nakai nɔŋŋ eji nilee gbɛ kɛha Kristofoi akɛ amɛkɛ mɛi ateŋ gbeekpamɔi ni he hiaa lɛ aaawo woji amli. Kɛji akɛ gbeekpamɔ lɛ kɔɔ nɔ ko ni ahɔɔ he lɛ, mɛi enyɔ lɛ baanyɛ aŋma nɔ ni ahɔɔ lɛ, jara ni ahɔɔ lɛ, gbɛ ni aaatsɔ nɔ awo nyɔmɔ lɛ, be kɛ bɔ ni aaafee ni akɛ nɔ ni ahɔɔ loo ahe lɛ aha, kɛ bɔ ni akpa gbee yɛ nibii krokomɛi ahe yɛ nɔ lɛ fɛɛ awo woji anɔ. Kɛji akɛ ebaahi ni akwɛ nɔ ni ahe lɛ nɔ aahu yɛ be kplaŋŋ ko mli lɛ, esa akɛ mɛi enyɔ lɛ aŋmala nitsumɔ ni abaatsu yɛ he, kɛ be ni akɛbaatsu agbe naa, nyɔmɔ ni abaabɔ yɛ he, kɛ nibii krokomɛi ni kɔɔ he lɛ fɛɛ awo woji anɔ, esa ákɛ akɛ be loo gbi ni akɛfee nakai wolo lɛ awo nɔ ni akɛ waonaa gbɛi awo shishi, ni mɛi enyɔ lɛ ateŋ mɔ fɛɛ mɔ ahiɛ ekome. Nɛkɛ gbeekpamɔ ni áŋma afɔ shi nɛɛ he hiaa titri yɛ nitsumɔ mli saji amli. Eyeɔ ebuaa mɛi enyɔ lɛ koni amɛnu wekukpaa ni ka amɛteŋ lɛ shishi faŋŋ ni eyeɔ ebuaa amɛ koni amɛhi shi yɛ Yesu ŋaawoo nɛɛ kɛ gbeekpamɔ naa: “Nyɛhaa nyɛ Hɛɛ afea Hɛɛ, Nyɛ Dabi, afea Dabi.” (Mateo 5:37, NW) Yɛ hei ni saji lɛ yɔɔ hwanyaŋŋ lɛ, ebaafee nɔ ni sa akɛ aaatao yelikɛbuamɔ kɛjɛ mɛi ni he esa yɛ enɛ mli lɛ aŋɔɔ yɛ gbeekpamɔ lɛ aŋmalamɔ mli.
7. (a) Mɛni hu esa akɛ asusu he yɛ gbeekpamɔi ni aŋmala awo woji anɔ lɛ he? (b) Mɛɛ su loo mumɔ esa akɛ Kristofoi atsu amɛnitsumɔi ahe nii yɛ mli lɛ?
7 Yɛ be mli ni mɛi enyɔ lɛ ŋmalaa amɛgbeekpamɔi lɛ yɛ faŋŋ mli lɛ, jeee amɛyiŋtoo lɛ pɛ esa akɛ mɛi enyɔ lɛ asusu he, shi moŋ, nibii ni baanyɛ ajɛ mli aba, tamɔ nɔ ni aaatsɔ nɔ afo nakai gbeekpamɔ lɛ mli kɛ́ eeeba akɛ nakai nifeemɔ lɛ he baahia. (Abɛi 21:5) Oshara yɛ nitsumɔ fɛɛ nitsumɔ ni akɛ he woɔ mli lɛ he, ni wolo ko bɛ ni abaanyɛ aŋmala oshara fɛɛ oshara ni baanyɛ ate shi yɛ he lɛ awo mli. Kɛji akɛ shihilɛi komɛi tsake lɛ, abaanyɛ atsake gbeekpamɔ lɛ, aloo afee ehee. Be baashɛ po ni ebaafee faŋŋ aha amɛteŋ mɔ kome akɛ ekɛ ehe wo nitsumɔ lɛ mli yɛ gbɛ ni nilee bɛ mli nɔ, ni ehe baahia ni ejie ehe kɛjɛ mli yɛ gbɛ ni bulɛ yɔɔ mli nɔ. Shi, esaaa akɛ enɛ feɔ ŋaa kɛkɛ ni aaatsɔ nɔ ajo nyɔmɔ ni abɔ kɛtsɔ shika ni afite kɛkɛ ni sɛɛnamɔ bɛ he aloo nitsumɔ nɔkwɛmɔ yɛ gbɛ gbonyo nɔ lɛ mli ba kɛ ehe gbɛnaa nii lɛ naa foi. Ehe miihia ni asusu sane lɛ he akwɛ akɛ ani abaanyɛ afo gbeekpamɔ lɛ mli lo, kɛ agbɛnɛ te abaatsu shika he saji ni ekolɛ eyɔɔ mli lɛ he nii aha tɛŋŋ. Yɛ anɔkwale mli lɛ, mɔ ni yɔɔ henilee kpakpa lɛ baabɔ mɔdɛŋ ni ekɛ woo aha gbeekpamɔ he gbɛnaa nii ni ka enɔ lɛ fɛɛ kɛji akɛ ebaahi ni etsake eshihilɛ gbɛ yɛ be ko mli po. (2 Tesalonikabii 3:12) Kɛji akɛ Kristofonyo ko miisumɔ ni enyiɛ yɛ gbɛ ni anaŋ ehe sane ko ata nɔ, ni agbɛnɛ edi jalɛnifeemɔ sɛɛ lɛ, ebaaba mɔdɛŋ ni etsu gbɛnaa nii ni ka enɔ yɛ gbeekpamɔ ko mli Iɛ he nii, eyɛ mli akɛ ekolɛ enɛ ehiŋ haŋ lɛ tsɔ, shi ebaafee bɔni afee ni eya nɔ ena Yehowa nɔkpɛlɛmɔ. “Mɔ ni kɛ́ eka kita ni eeena amane yɛ mli po lɛ, etsakeee.” (Lala 15:1-5) Ehe miihia ni Yehowa tsuji ‘afee amɛnii fɛɛ yɛ suɔmɔ mli’ yɛ nitsumɔi ni tamɔ nɛkɛ mli.—1 Korintobii 16:14.
8. Mɛni hewɔ ehi akɛ aaasusu loo aŋmɛ nɔ fɛɛ nɔ akwɛ jogbaŋŋ dani akɛ mɛi krokomɛi afee ekome yɛ nitsumɔ mli lɛ?
8 Yɛ enɛ hewɔ lɛ, dani mɔ ko kɛ mɔ kroko baabote nitsumɔ mli lɛ, ehe miihia ni aŋmɛ nɔ ni yɔɔ mli Iɛ fɛɛ akwɛ jogbaŋŋ. (Luka 14:28-30) Mɛi komɛi kɛ jwɛŋmɔ kpakpa baabote jarayeli ŋshɔ lɛ mli, shi eshishi tɛi ni etee ehe lɛ baaha eshiu. Akɛ nɔkwɛmɔ nɔ lɛ, mɛi komɛi nuɔ he akɛ sɛɛnamɔ ni amɛnitsumɔtsɛmɛi lɛ naa lɛ baanyɛ afee amɛ nɔ eji amɛ hu amɛyɛ amɛ diɛŋtsɛ amɛ nitsumɔ ni tamɔ nakai nɔŋŋ kulɛ. Shi amɛnuuu shishi akɛ nitsumɔ nɔkwɛmɔ bɛ mlɛo yɛ je ni akaŋshii keketee yɔɔ mli nɛɛ mli. Nitsumɔi akui nyɔŋma-nyɔŋmai abɔ fiteɔ yɛ jeŋ fɛɛ daa afi. No hewɔ lɛ, Kristofoi pii eye amɛhe moŋ akɛ amɛaatsɔmɔ nitsulɔi ni awoɔ amɛnyɔmɔ be fɛɛ yɛ be mli ni amɛgbee shi akɛ nitsumɔtsɛmɛi yɛ jarayeli mli lɛ sɛɛ.
Woo Ni Akɛhaa Nitsumɔ Mli Bii
9. Mɛni ji gbɛi komɛi ni Kristofoi baanyɛ atsɔ nɔ ni amɛkɛ woo aha amɛhe yɛ nitsumɔ mli?
9 Romabii 12:10 kɛɔ akɛ: “Mɔ fɛɛ mɔ kɛ woo aha enaanyo tsutsu.” Nitsulɔi ni ji Kristofoi ni feɔ nakai lɛ ebɔŋ mɔdɛŋ akɛ amɛaashishiu amɛnitsumɔtsɛ lɛ akɛni lɛ hu eji Odasefonyo lɛ hewɔ, ni amɛŋɔ su ni je lɛ hiɛ akɛ, akɛni eyeŋ nitsumɔtsɛ lɛ awui ko hewɔ lɛ, esa akɛ ekpɛlɛ enitsulɔi lɛ afatɔɔi anɔ. Nɔ ni abaafee moŋ ji ni amɛkɛ woo aha amɛnitsumɔtsɛ lɛ kɛtsɔ amɛsubaŋ kɛ mɔdɛŋbɔɔ yɛ nitsumɔ mli lɛ nɔ. (1 Timoteo 6:2) Yɛ no sɛɛ lɛ, nitsumɔtsɛmɛi ni ji Kristofoi hu kɛ woo baaha amɛnanemɛi Odasefoi ni ji nitsulɔi lɛ kɛtsɔ gbɛ ni amɛwieɔ amɛtsɔɔ amɛ kɛ bɔ ni amɛkɛ amɛ yeɔ Iɛ nɔ. Esaaa akɛ nitsumɔtsɛ ko nuɔ he akɛ enɔ kwɔ fe enaanyo heyelilɔ lɛ ni tsuɔ nii haa lɛ lɛ, shi moŋ esa akɛ ekai akɛ Yehowa tsuji ji amɛ fɛɛ ni amɛyeɔ egbɔ yɛ E-hiɛ. (Efesobii 6:9) Agbɛnɛ hu esa akɛ nitsumɔtsɛ kɛ nitsulɔ lɛ fɛɛ aha ŋaawoo ni yɔɔ Galatabii 6:10 lɛ ahi amɛjwɛŋmɔ mli: “Nyɛhaa wɔfea mɛi fɛɛ ejurɔ, shi titri lɛ, mɛi ni ji hemɔkɛyeli lɛ webii lɛ.”
10. Yɛ mɛɛ gbɛ nɔ heshibaa yeɔ buaa yɛ woo ni akɛhaa mɛi krokomɛi nɛɛ mli?
10 Woo ni akɛaaha mɔ ko lɛ waaa kɛji akɛ heshibaa yɛ. Akɛ nɔkwɛmɔ nɔ lɛ, ewaŋ kɛhaŋ Kristofoi asafo lɛ mli onukpa akɛ eeeba ehe shi yɛ nitsumɔ mli eha enaanyo Kristofonyo ni bɛ hegbɛi ni eyɔɔ yɛ asafo lɛ mli lɛ nɔŋŋ eko lɛ gbɛtsɔɔmɔ. Yɛ no sɛɛ lɛ, ewaŋ kɛhaŋ nitsumɔtsɛ ni baa ehe shi lɛ akɛ eeeba ehe shi eha enitsulɔ, ni ji onukpa lɛ yɛ asafo lɛ mli nitsumɔi amli. Heshibaa hu baaye abua amɛ koni amɛkafee keketee aloo amɛmiikpakpaa emuuyeli gbɛ kɛmiijɛ mɔ ko dɛŋ, ejaakɛ “mɛi fɛɛ efee esha, ni Nyɔŋmɔ anunyam lɛ ebɔ amɛ.”—Romabii 3: 23; 12: 3.
11. Kristofoi baanya ajie saneshishinumɔ kpo yɛ nitsumɔ mli saji amli yɛ mɛɛ gbɛ nɔ?
11 Biblia lɛ hu kɛ famɔ haa akɛ: “Nyɛhaa mɛi fɛɛ alea nyɛ sane-shishinumɔ lɛ.” (Filipibii 4:5, NW) Efeŋ nɔ ni shishinumɔ yɔɔ mli akɛ Kristofonyo aaakpa hegbɛi krɛdɛɛ komɛi agbɛ aloo nitsumɔ ni hi fe fɛɛ aloo akpa jata ni baa shi fe fɛɛ lɛ gbɛ akɛni ekɛ enaanyo heyelilɔ miiye lɛ hewɔ. Ni asaŋ, esaaa akɛ Kristofonyo kɛɔ akɛ eyɛ hegbɛ, akɛ ebiɔ gbɛ aloo hegbɛi komɛi, tamɔ tsɔne ko aloo kar ko ni ebaata mli, akɛni enitsumɔtsɛ lɛ ji enaanyo heyelilɔ lɛ hewɔ. Hegbɛi ni akɛhaa, nitsumɔ ni hi fe fɛɛ, jara ni baa shi fe fɛɛ, aloo bei ni ahaa mɔ ko kɛha nɔ ko feemɔ lɛ baanyɛ aba, shi esaaa akɛ abiɔ. Gbɛkpamɔi ni shishinumɔ bɛ mli baanyɛ atee mlifu shi yɛ Kristofoi ateŋ, ni ebaanyɛ efite wekukpaa ni ka amɛteŋ lɛ.—Abɛi 18:19.
12. Yɛ Maŋtsɛyeli shiɛmɔ he lɛ, ehe hiaa ni akwɛ jogbaŋŋ yɛ nitsumɔ hé yɛ enɛ mli yɛ mɛɛ gbɛ nɔ?
12 Yɛ be mli ni Kristofoi miisumɔ ni amɛjaje Nyɔŋmɔ Maŋtsɛyeli lɛ he sanekpakpa lɛamɛtsɔɔ mɛi ni bɛ hemɔkɛyeli lɛ mli lɛ yɛ amɛnitsumɔ mli lɛ, esa akɛ amɛkwɛ jogbaŋŋ koni amɛye Maŋtsɛyeli lɛ he odase lɛ yɛ be ni sa mli. (Jajelɔ 3:1, 7) Kɛ́ afee enɛ yɛ nitsumɔ be mli lɛ, belɛ esa akɛ abi nitsumɔtsɛ lɛ nɔkpɛlɛmɔ. Kɛ jeee nakai lɛ nitsumɔtsɛ lɛ basumɔŋ, ni ebaanyɛ ekɛ heguɔgbee aba Yehowa kɛ E-webii anɔ. (1 Timoteo 6:1) Bei krokomɛi baa tamɔ niyeli be aloo beni akpa shwane ni abaanyɛ aye odase. Agbɛnɛ hu, heni Odasefoi pii yɔɔ nitsumɔ he ko lɛ, amɛbasumɔŋ akɛ amɛaafite be ni amɛkɛmiiwie teokrase lɛ he saji ahe amɛmiitsɔɔ amɛhe yɛ be mli ni esa akɛ amɛtsu nii.
Jwɛŋmɔ Ni Ahiɛ Yɛ Nitsumɔ Mli Lɛ Ni Aaakwɛ No Jogbaŋŋ
13. Paulo kɛ mɛi ni eyato amɛ yɛ Korinto lɛ susu amɛheloo gbɛfaŋ nitsumɔ he yɛ mɛɛ gbɛ nɔ?
13 Yɛ be mli ni bɔfo Paulo yɔɔ Korinto lɛ, ekɛ Kristofoi ni eyato amɛ ni ji Akwila kɛ Priskila bote nitsumɔ mli. (Bɔfoi lɛ Asaji 18:1-3) Amɛtsu nii koni amɛkɛtao shihilɛ mli hiamɔ nibii, shi enɛ ji oti ko ni ji enyɔ yɛ oti titri ni ma amɛhiɛ—Yehowa jamɔ ni amɛaaha eshwere lɛ sɛɛ. Eka shi faŋŋ akɛ anyɛŋ afolɔ amɛnaa akɛ ‘amɛsusuɔ akɛ Nyɔŋmɔjamɔ ji [heloo gbɛfaŋ] ninamɔ.’ (1 Timoteo 6:5) Yehowa jɔɔ mɛi etɛ lɛ fɛɛ babaoo ni atsi amɛta jogbaŋŋ yɛ Biblia lɛ mli—Romabii 16:3-5.
14. (a) Mɛni hewɔ ehi akɛ aaapɛi jwɛŋmɔi ni ahiɛ lɛ amli dani akɛ he awo nitsumɔ ko mli lɛ? (b) Te fee tɛŋŋ ni Odasefoi etɛ ko saa naagba ni ka amɛteŋ lɛ?
14 Kɛ Kristofonyo ko susu jwɛŋmɔi ni ehiɛ lɛ he jogbaŋŋ dani ekɛ ehe wo nitsumɔ ko mli lɛ, ebaanyɛ ekwa naagbai babaoo. Akɛ nɔkwɛmɔ nɔ lɛ, Kristofonyo ko baasumɔ ni ena be babaoo eha Maŋtsɛyeli lɛ he nibii, yɛ be mli ni ehefatalɔ lɛ hu baasumɔ ni eha eshihilɛ gbɛ aya hiɛ. Mɔ kroko hu baasumɔ ni ekɛ sɛɛnamɔ ni enaa lɛ awo nitsumɔ lɛ mli ekoŋŋ koni ekɛlɛɛ nitsumɔ lɛ mli, shi mɔ kroko hu miisumɔ ni ewo too wuji ni esumɔŋ ni ekɛ esɛɛnamɔ lɛ awo nitsumɔ lɛ mli bɔni afee ni enine akpele nitsumɔ lɛ nɔ ni ekafa tsɔ. Yɛ maŋ ko mli lɛ, Yehowa Odasefoi etɛ ni amɛji wekumɛi yɛ heloo naa fee ekome amɛkɛ amɛhe wo nitsumɔ mli. Shi be bashɛ ni jwɛŋmɔ ni amɛteŋ mɔ fɛɛ mɔ hiɛ lɛ baafee nɔ ni yɔɔ sɔrɔtoi yɛ he ni mɔ lɛ sumɔɔ ni ekɛ ehe awo nitsumɔ lɛ mli aha lɛ mli, Amɛ tsabaa lɛ bafee akɛ amɛkpɛlɛ nɔ akɛ amɛbaagbala amɛmli koni amɛjara mɛi ni amɛtsuɔ nii amɛhaa amɛ lɛ amɛha amɛhe. Enɛ ha amɛbaa amɛmumɔŋ kɛ heloo naa weku mli ekomefeemɔ lɛ yi. Amɛbo Biblia mli ŋaawoo ni ji “nyɛhaa wɔtiua hejɔlɛ nibii kɛ nibii ni wɔkɛaaha wɔnanemɛi anane amɔ shi moŋ” lɛ toi.—Romabii 14:19.
15. Mɛni hewɔ esa akɛ wɔkwɛ jwɛŋmɔ ni wɔhiɛ yɛ shika he lɛ jogbaŋŋ lɛ?
15 Esa akɛ akwɛ jogbaŋŋ diɛŋtsɛ yɛ jwɛŋmɔ ni mɔ hiɛ yɛ shika he lɛ mli. Biblia lɛ maa nɔ mi kɛhaa wɔ akɛ: “Nuu anɔkwafo aaana jɔɔmɔ babaoo; shi mɔ ni yeɔ oyai ana nii lɛ, eyeŋ ehe.” (Abɛi 28:20) Kɛ Kristofonyo “miiye oyai ana nii” lɛ, ebaashwila yɛ nɔ ko ni jara wa waaa moŋ lɛ he—e-Kristofoi anyɛmifeemɔ lɛ. Enɛ kɛ mligbalamɔ baaba asafo lɛ mli, ejaakɛ mɛi krokomɛi sumɔŋ shika ni ekɛ yeɔ Maŋtsɛyeli lɛ he nibii ahiɛ lɛ. No hewɔ lɛ, Biblia lɛ bɔɔ wɔ kɔkɔ akɛ: “Shi mɛi ni taoɔ nii pii ana lɛ gbeɔ kaa kɛ tsɔne kɛ kwashiai akɔnɔi pii ni fiteɔ mɔ ni tsiɔ mɛi ewoɔ hiɛkpatamɔ kɛ lajemɔ mli lɛ amli. Ejaakɛ nibii fɔji fɛɛ ashishifaa ji shikasuɔmɔ ni mɛi komɛi di sɛɛ ni amɛdu gbɛ kɛjɛ hemɔkɛyeli lɛ mli ni amɛkɛ piimɔi babaoo egbulɔ amɛhe lɛ.”—1 Timoteo 6:9, 10.
16. Mɛɛ gbɛ esa akɛ atsɔ nɔ atsu nitsumɔ mli saji fɛɛ he nii yɛ?
16 Gbɛ kome ni “shikasuɔmɔ” baanyɛ agbala Kristofonyo kɛya ji kɛtsɔ kaa ni ekaa lɛ koni ekɛ nitsumɔ mli nifeemɔi komɛi ni ejaaa aloo ejeee anɔkwale atsu nii. Kɛ́ nanemɛi Kristofoi kɛ gbɔmɛi ni tamɔ nɛkɛ bɔ lɛ, ekɛ mligbalamɔ baaba. Ni nifeemɔ ni tamɔ nɛkɛ fiteɔ wekukpaa ni ka mɔ kɛ Yehowa teŋ lɛ. Dani ekomefeemɔ yɛ nitsumɔ mli nɛɛ aaaya nɔ fɛfɛo lɛ, ehe miihia ni aha ehi jwɛŋmɔ mli akɛ shishiumɔ yɛ nitsumɔ mli lɛ, “Yehowa miihi.” (Abɛi 11:1; 20:23) No hewɔ lɛ, Kristofoi miisumɔ ni amɛnyɛ amɛkɛɛ, taakɛ bɔ ni bɔfo Paulo kɛɛ lɛ: “Wɔyɛ hekɛnɔfɔɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.”—Hebribii 13:18.
Nitsumɔ Mli Naagbai Anaa Tsabaa Ni Aaana
17. Mɛɛ gbɛ nɔ abaanyɛ atsɔ asaa nitsumɔ mli saji bibii yɛ?
17 Naagbai baanyɛ ate shi yɛ nitsumɔ fɛɛ nitsumɔ ni nyɛmimɛi efee ekome yɛ mli lɛ mli. Naagbai bibii komɛi yɛ ni abaanyɛ ana naa kɛtsɔ shishitoo mla ni yɔɔ 1 Petro 4:8 ni kaneɔ akɛ: “Shi titri lɛ nyɛsuɔmɔ ni nyɛkɛsumɔɔ nyɛhe lɛ mli awaa, ejaakɛ suɔmɔ haa eshiai babaoo nɔ” lɛ kɛ nitsumɔ nɔ. Kɛ anyɛŋ atsu naagbai ahe nii yɛ nɛkɛ gbɛ nɔ lɛ, esaaa akɛ aŋmɛɔ gbɛ ni efiteɔ kwraa. Nɔ ni baanyɛ ajɛ enɛ mli aba ji bulɛ ni abɛ kɛha he kɛ mligbalamɔ. Yɛ bei babaoo mli lɛ, ehe nitsumɔ lɛ damɔ sanegbaa kɛ mlihilɛ ni ka shi faŋŋ nɔ dani shihilɛ lɛ afite kwraa. Nyɔŋmɔ Wiemɔ lɛ woɔ ŋaa akɛ wɔkɛ oyaiyeli asaa wɔteŋ bei.—Mateo 5:23-25; Efesobii 4:26, 27.
18. Mɛni ji nɔ ni Kristofonyo baanyɛ afee kɛ eheɔ eyeɔ akɛ enaanyo Kristofonyo ko efee lɛ efɔŋ waa yɛ nitsumɔ mli lɛ?
18 Shi, kɛji akɛ Kristofonyo ko heɔ eyeɔ akɛ enaanyo heyelilɔ ko efee lɛ efɔŋ waa yɛ nitsumɔ mli lɛ, esa akɛ atsu gbɛ ni atsɔɔ mli yɛ Mateo 18:15-17 lɛ he nii fitsofitso kɛmɔ shi. Esa akɛ klɛŋklɛŋ nifeemɔ loo nɔ ni ji enyɔ asaa sane lɛ. Kɛ anyɛɛɛ afee nakai lɛ, nifeemɔ ni ji etɛ lɛ ji ni onukpai ni ahala amɛ lɛ akwɛ sane lɛ. Kɛ eeeba lɛ nɛkɛ lɛ, onukpai lɛ baabɔ mɔdɛŋ ni amɛje nyɛmimɛi nɛɛ anijiaŋ wui yɛ saneyeli hei ni amɛkɛ amɛhe aaaya lɛ mli. Nɔ ni saneyeli he ni mɔ ko kɛ enaanyo heyelilɔ lɛ aaaya lɛ baatsɔɔ ji nɔ ni Paulo kɛɛ akɛ: “Enɛ lɛ nyɛto kpa momo.” Ni ekɛfata he akɛ: “Mɛɛba nyɛhaaa ayɛ nyɛ amim moŋ? Mɛɛba nyɛhaaa ashishiu nyɛ moŋ:” (1 Korintobii 6:1-18) Ehi moŋ akɛ aaalaaje shika ko fe ni akɛ ahorabɔɔ aaaba Yehowa gbɛi lɛ kɛ asafo lɛ nɔ ni akɛfite ekomefeemɔ ni yɔɔ wɔteŋ lɛ kɛtsɔ heyelilɔ ko ni wɔkɛ lɛ aaaye sane lɛ nɔ. Shi, kɛji akɛ eyagbeee naa yɛ saneyeli he po lɛ, ehe baahia ni asafo lɛ atsu enɛ he nii kɛ eje kpo akɛ amɛteŋ mɔ kome yeee anɔkwale yɛ sane lɛ mli.
19. Mɛɛ Biblia mli nɔkwɛmɔ nii ni nɔ bɛ onukpai baanyɛ agbala jwɛŋmɔ kɛya nɔ yɛ be mli ni amɛwoɔ ŋaa yɛ nitsumɔ mli naagbai ahe lɛ?
19 Kɛ aawo mɛi ni naagba ebaka amɛteŋ yɛ nitsumɔ mli nɛɛ ŋaa lɛ, onukpai lɛ baanyɛ agbala amɛjwɛŋmɔ kɛya nifeemɔ ni pɛsɛmkunya bɛ mli ni Abraham kɛto Okadi yɛ be mli ni sane ba wekukpaa ni kã ekɛ Lot teŋ lɛ nɔ lɛ. Eyɛ mli akɛ Abraham ji’ onukpa moŋ, shi ekɛ mlihilɛ ŋmɛ Lot gbɛ akɛ Iɛ klɛŋklɛŋ ehala shikpɔŋ lɛ fa ni esumɔɔ moŋ fe ni eeefite wekukpaa ni ka amɛteŋ lɛ. (1 Mose 13:5-11) Onukpai lɛ hu baanyɛ agbala jwɛŋmɔ kɛya Zakeo nɔkwɛmɔ nɔ kpakpa lɛ nɔ. Eesumɔ ni ekɛ enibii fɛɛ ni eyɔɔ lɛ mli fa aha ohiafoi koni ekɛ fa lɛ ato mɛi ni eshishiu amɛ aloo ekɛ apasa naafolɔmɔ eshɔ nɔ ko kɛjɛ amɛdɛŋ lɛ najiaŋ toi ejwɛ.—Luka 19:1-10; kwɛmɔ 1 Korintobii 10:24 hu.
20, 21. Mɛni ji nɔ ni esa akɛ aha ahi jwɛŋmɔ mli titri yɛ heloo naa nitsumɔ mli?
20 Kwɛ bɔ ni eyɔɔ fɛo kɛ Kristofoi saa ni tsumɔ mli naagbai ni ka amɛteŋ lɛ fɛfɛo kɛtsɔ Biblia mli ŋaawoo lɛ asɛɛdii nɔ! Amɛhiɔ shi yɛ ekomefeemɔ mli yɛ nɛkɛ gbɛfaŋ kɛji akɛ nitsumɔ lɛ fite po. Miishɛɛ sane ni baajɛ mli aba nɛ, kɛ wɔha ehi wɔjwɛŋmɔ mli yɛ be fɛɛ mli akɛ, kɛha Kristofoi lɛ, heloo naa nitsumɔ yeɔ Maŋtsɛyeli lɛ he nibii kɛ ekomefeemɔ ni aaaka nyɛmimɛi ateŋ lɛ sɛɛ yɛ be fɛɛ mli. Ehi jogbaŋŋ hu akɛ aaanyɛ ato nitsumɔ lɛ mli nibii ahe gbɛjianɔ bɔ ni no aaaha ana be babaoo aha nibii ni he hiaa titri ni kɔɔ Maŋtsɛyeli lɛ nitsumɔ he lɛ.—Mateo 6: 33; Okɛto Filipibii 1:9, 10 he.
21 No hewɔ lɛ, nɔ ni he hiaa titri yɛ wɔshihilɛ mli ji wekukpaa ni ka wɔ kɛ Yehowa kɛ wɔ Kristofoi anyɛmifeemɔ lɛ teŋ lɛ. (Mateo 22:36-39) Wɔsumɔŋ ni je lɛŋ sui loo nitsumɔ mli saji afite enɛ kɔkɔɔkɔ, ejaakɛ eka shi faŋŋ akɛ anyɛŋ akɛ nɔ ko nɔ ko kwraa ato wekukpaa ni ka wɔkɛ Yehowa teŋ lɛ he, aloo ni eeetamɔ bɔ ni wɔ nyɛmimɛi ateŋ ekomefeemɔ lɛ yɔɔ fɛo ha lɛ!a
[Shishigbɛ niŋmai]
a Ajie kɛjɛ November 15, 1986 Watchtower lɛ mli.
Sanebimɔi ni Akɛtiɔ Mli
◻ Nyɔŋmɔ Wiemɔ lɛ toiboo haa wekukpaa ni ka mɛi ateŋ yɛ nitsumɔ mli lɛ shwereɔ yɛ mɛɛ gbɛ nɔ?
◻ Mɛni hewɔ nilee yɔɔ mli ákɛ akɛ nitsumɔ mli saji ni he hiaa lɛ aaawo wolo nɔ lɛ?
◻ Kristofoi baanyɛ ni amɛkɛ bule aha amɛhe yɛ nitsumɔ mli yɛ mɛɛ gbɛ nɔ?
◻ Mɛni hewɔ esa akɛ wɔpɛi jwɛŋmɔ ni wɔhiɛ yɛ nitsumɔ mli lɛ mli lɛ?
◻ Mɛɛ su ji nɔ ni esa akɛ ajie lɛ kpo yɛ be mli ni ataoɔ ni asaa nitsumɔ mli naagbai lɛ?
[Mfoniri ni yɔɔ baafa 11]
Abraham ma shikpɔŋ ni ehe lɛ nɔ mi kɛtsɔ gbeekpamɔ ni ba ekɛ Efron teŋ lɛ nɔ
[Mfoniri ni yɔɔ baafa 13]
Ni aaatsu nii ni akɛna heloo gbɛfaŋ nibii ni he hiaa lɛ ji hiamɔ nii ni ji enyɔ kɛha Paulo, Akwila kɛ Priskila