Ohiafoi Kɛ̃lɛ Niiatsɛmɛi—Te Eeefee Tɛŋŋ Eba lɛ Nakai Hu?

Afii ohai abɔ ni eho nɛ ni nuu nilelɔ ko sɔle koni ekatsɔ ohiafo. Mɛni hewɔ ebi nɔ ko ni tamɔ nɛkɛ? Ejaakɛ eeshe gbeyei akɛ ohia baanyɛ akanya subaŋi kɛ nifeemɔi ni baanyɛ afite wekukpaa ni kã ekɛ Nyɔŋmɔ teŋ lɛ. Enɛ jeɔ kpo yɛ ewiemɔi lɛ amli: “Ha maye niyenii ni ato aha mi lɛ . . . koni mikaye ohia ni miyaju ni mifite mi-Nyɔŋmɔ lɛ gbɛi.”—ABƐI 30:8, 9, NW.

ANI enɛ tsɔɔ akɛ ohiafo nyɛŋ asɔmɔ Nyɔŋmɔ yɛ anɔkwayeli mli? Dabi kwraa! Yehowa Nyɔŋmɔ tsuji anɔkwafoi babaoo diɛŋtsɛ ehiɛ emuuyeli mli amɛha lɛ yɛ piŋmɔ ni ohia kɛbaa lɛ fɛɛ sɛɛ yɛ yinɔsane be fɛɛ mli. Ni Yehowa hu sumɔɔ mɛi ni kɛ amɛhiɛ fɔ̃ɔ enɔ lɛ, ni ekɛ nii ni sa amɛ hãa amɛ.

Anɔkwafoi ni Hi Shi yɛ Blema

Bɔfo Paulo diɛŋtsɛ tsɔ̃ fimɔ bei amli. (2 Korintobii 6:3, 4) Agbɛnɛ hu etsɔɔ bɔ ni odasefoi anɔkwafoi ‘babaoo ni tamɔ atatu’ ni hi shi dani Kristofoi abe lɛ shɛ lɛ ji, kɛ bɔ ni amɛteŋ mɛi komɛi wo “too gwantɛŋi kɛ too abotiai awoji kɛnyiɛ, ohia hia amɛ, . . . amɛtsomlo yɛ ŋai anɔ kɛ gɔji anɔ kɛ tɛkpoloi kɛ shikpɔŋ fɔji amli.”—Hebribii 11:37, 38; 12:1.

Anɔkwafoi nɛɛ ateŋ mɔ kome ji gbalɔ Elia. Yehowa ha lɛ niyenii be fɛɛ be yɛ nuhɔmɔ ko ni ye afii etɛ-kɛ-fã lɛ mli. Klɛŋklɛŋ lɛ, Nyɔŋmɔ ha kwãakwãalabitei kɛ aboloo kɛ loo baha gbalɔ lɛ. (1 Maŋtsɛmɛi 17:2-6) Yɛ sɛɛ mli lɛ, Yehowa tsɔ naakpɛɛ gbɛ nɔ eha mãmu kɛ mu ni yoo okulafo ko kɛfee niyenii eha Elia lɛ hi shi nakai nɔŋŋ ni etãaa. (1 Maŋtsɛmɛi 17:8-16) Eji niyenii folo ko kɛkɛ, shi eha gbalɔ lɛ, yoo lɛ, kɛ ebinuu lɛ hi wala mli.

Yehowa ha gbalɔ Yeremia anɔkwafo lɛ hu niyenii yɛ fimɔ bei ni mli wa waa mli. Yeremia je Yerusalem he ka ni Babilonbii lɛ wo lɛ mli shweshweeshwe, yɛ be mli ni ehe bahia ni gbɔmɛi ‘aŋmɛ aboloo amɛye kɛ tsuiyeli lɛ.’ (Ezekiel 4:16) Yɛ naagbee lɛ, hɔmɔ ni yɔɔ maŋtiase lɛ mli lɛ naa bawa waa aahu akɛ yei komɛi ye amɛ diɛŋtsɛ amɛbii. (Yaafo 2:20) Eyɛ mli akɛ awo Yeremia tsuŋ yɛ ekãa ni ekɛshiɛ lɛ hewɔ moŋ, shi kɛ̃lɛ Yehowa kwɛ koni akɛ “aboloo subɔo” ayaha lɛ daa gbi “kɛyashi beyinɔ ni aboloo lɛ fɛɛ tã yɛ mã lɛŋ.”—Yeremia 37:21.

No hewɔ lɛ, taakɛ Elia ji lɛ, Yeremia ná nɔ ko fioo ko eye. Ŋmalɛi lɛ ekɛɛɛ wɔ nɔ ni Yeremia ye loo shii abɔ, beni aboloo ta kwraa yɛ Yerusalem lɛ. Ni kɛlɛ, wɔle akɛ Yehowa ha lɛ niyenii, ni akɛ, eje nakai hɔmɔ ni mli wa waa lɛ mli shweshweeshwe.

Ŋmɛnɛ, ohia yɛ je lɛŋ he fɛɛ he. Taakɛ Jeŋmaji Ekomefeemɔ kuu lɛ tsɔɔ lɛ, anaa he ni ohia fa waa yɛ lɛ yɛ Afrika. Amaniɛbɔɔ ko ni JE (Jeŋmaji Ekomefeemɔ) lɛ kɛha adafitswaa woji yɛ 1996 lɛ tsɔɔ akɛ: “Afrikabii fɛɛ amlijaa fã ji ohiafoi.” Yɛ shika helɛtemɔ mli shihilɛi ni naa waa kɛyaa hiɛ lɛ fɛɛ sɛɛ lɛ, Afrikabii babaoo ni amɛyifalɛ miiya hiɛ be fɛɛ be kɛ Biblia mli shishitoo mlai miitsu nii yɛ shihilɛ mli, ni amɛmiisɔmɔ Nyɔŋmɔ yɛ anɔkwayeli mli, kɛ hekɛnɔfɔɔ akɛ ebaaye ebua amɛ. Susumɔ nɔkwɛmɔnii komɛi ni jɛ wɔ jeŋ ni ehao lɛ fã ko lɛ ahe okwɛ.

Anɔkwayeli Mlihiɛmɔ

Michael,a ni yɔɔ Nigeria lɛ ji okwaafonyo ni yɔɔ bii ekpaa ni esa akɛ ekwɛ amɛ. Ekɛɛ: “Ewa akɛ oooye anɔkwa yɛ be mli ni obɛ shika ni okɛaakwɛ oweku. Shi kɛ aaka mi ni mafee mɔ ni yeee anɔkwa lɛ, mikɛ Efesobii 4:28 (NW), ni kɛɔ akɛ: ‘Julɔ lɛ ekaju dɔŋŋ, shi moŋ etsu nitsumɔ ni wa, ekɛ enine atsu nitsumɔ kpakpa’ lɛ kaiɔ mihe. No hewɔ lɛ, kɛ kaa ko ba migbɛ nɔ lɛ, mibiɔ mihe akɛ, ‘Ani mi mitsu nii ni mikɛná nɛkɛ shika nɛɛ?’ ”

Michael kɛfata he akɛ: “Akɛ nɔkwɛmɔnɔ lɛ, beni minyiɛ kɛyaa gbi ko lɛ, mina ni baagi ko gbee shi kɛjɛ moto ko sɛɛ. Minyɛɛɛ mawa mɔ ni ta nɔ lɛ, no hewɔ lɛ mikɔ baagi lɛ ni mina akɛ emli eyi obɔ kɛ shika! Mikɛ kadimɔ nii ni yɔɔ baagi lɛ mli lɛ tsu nii, ni mina nɔtsɛ lɛ, ni mikɛ baagi lɛ ha lɛ.”

Nɔnyɛɛ ni Awuɔ Ashiɔ

Nuu ko ni jɛ Afrika Kooyigbɛ kɛɛ akɛ: “Ohia [tamɔ] ni atsi mɔ ko naa awo bu voo ko mli, eena la ni kpɛɔ lɛ kɛ gbɔmɛi ni nyiɛ kɛyaa kɛbaa lɛ, shi ebɛ gbee ni ekɛaabo kɛha yelikɛbuamɔ loo atswere ko ni ekɛaakwɔ kɛje kpo.” Belɛ ebɛ naakpɛɛ mɔ akɛ ohia kɛ nɔnyɛɛ kɛ nijiaŋwujee henumɔ baa yɛ bei pii amli! Nyɔŋmɔ tsuji po baanyɛ ana mɛi krokomɛi aninámɔ ni amɛje shishi amɛsusu akɛ sɛɛnamɔ bɛ emuuyeli shihilɛ lɛ he. (Okɛto Lala 73:2-13 he.) Te aaafee tɛŋŋ aye henumɔi ni tamɔ nɛkɛ nɔ?

Aha Peter, nuu ko ni jɛ Afrika Anaigbɛ kpa nitsumɔ beni ehi nɔyeli lɛ sɔɔmɔ mli afii 19. Amrɔ nɛɛ nitsumɔ mli hejɔɔmɔ shika fioo ko ekɛkwɛɔ ehe. Peter kɛɛ akɛ: “Kɛ minijiaŋ je wui yɛ bei komɛi amli lɛ, mikɛ nɔ ni mikane yɛ Biblia lɛ kɛ Buu Mɔɔ Asafo lɛ woji amli lɛ kaiɔ mihe. Gbɛjianɔtoo momo nɛɛ miihe aho aya, ni wɔmiimɛ gbɛjianɔtoo kpakpa ko.

“Agbɛnɛ hu mijwɛŋɔ 1 Petro 5:9, ni kɛɔ akɛ: ‘Nyɛdamɔa shi shiŋŋ yɛ hemɔkɛyeli lɛ mli nyɛshia [Satan], akɛni nyɛle akɛ amanehului ni nyɛnaa lɛ nɔŋŋ nyɛmimɛi anaanyobɔɔ ni yɔɔ jeŋ muu lɛ fɛɛ hu naa.’ No hewɔ lɛ, jeee mikome pɛ mikɛ naagbai kpeɔ. Nɛkɛ kaimɔi nɛɛ yeɔ ebuaa mi ni mijieɔ susumɔi ni jeɔ mɔ nijiaŋ wui ni nyɛɔ mɔ nɔ lɛ kɛjɛɔ mijwɛŋmɔ mli.”

Peter kɛɛ kɛfata he akɛ: “Agbɛnɛ hu, Yesu fee naakpɛɛ nibii pii yɛ be mli ni eyɔɔ shikpɔŋ nɔ lɛ, eyɛ mli akɛ ehaaa mɔ ko atsɔ niiatsɛ yɛ heloo gbɛfaŋ. Mɛni hewɔ esa akɛ makpa gbɛ akɛ eeeha matsɔ mɔ ni yɔɔ nii?”

Hewalɛ ni Sɔlemɔ Yɔɔ

Yehowa Nyɔŋmɔ ni abɛŋkɛɔ lɛ yɛ sɔlemɔ mli lɛ hu ji gbɛ kroko ni atsɔɔ nɔ akɛwuɔ ashiɔ jwɛŋmɔ ni ejaaa. Beni Mary batsɔ Yehowa Odasefoi lɛ ateŋ mɔ kome yɛ 1960 mli lɛ, eweku lɛ kpoo lɛ. Eboteko gbalashihilɛ mli, ni amrɔ nɛɛ eye kɛjɛ afii 50 kɛyaa, ebɛ gbɔmɔtsoŋ hewalɛ tsɔ̃, ni heloo gbɛfaŋ nibii fioo ko eyɔɔ. Shi kɛ̃lɛ, eyɛ ekãa yɛ Kristofoi asɔɔmɔ nitsumɔ lɛ mli.

Mary kɛɛ: “Kɛ minu nijiaŋwujee he lɛ, miyaa Yehowa ŋɔɔ yɛ sɔlemɔ mli. Mile akɛ mɔ ko mɔ ko bɛ ni baanyɛ aye abua mi babaoo fe bɔ ni eeefee. Mikase akɛ, kɛ okɛ ohiɛ fɔ̃ Yehowa nɔ lɛ, eyeɔ ebuaa bo. Mikaiɔ Maŋtsɛ David wiemɔi ni anaa yɛ Lala 37:25 lɛ be fɛɛ be: ‘Kulɛ obalanyo fioo ji mi, shi migbɔ agbɛnɛ, ni kɛ̃lɛ minako jalɔ ko ni akpoo lɛ kwraa, aloo ni eseshibii miitao aboloo.’

“Minaa hewalɛwoo kɛjɛɔ mumɔŋ nyɛmimɛi hii kɛ yei ni amɛdara lɛ aniiashikpamɔi ni agbaa he sane yɛ Buu-Mɔɔ lɛ mli lɛ amli. Yehowa Nyɔŋmɔ ye ebua amɛ, no hewɔ lɛ, mile akɛ ebaaye ebua mi hu. Ejɔɔ minitsumɔ fioo ni ji fufui ni mihɔ̃ɔ lɛ nɔ, ni mibɔɔ mɔdɛŋ koni minine ashɛ midaa gbi hiamɔ nii anɔ. Yɛ bei komɛi amli kɛ mibɛ shika ko kwraa ni miisusu nɔ ni mafee lɛ he lɛ, Yehowa tsuɔ mɔ ko kɛbaa ni ebakeɔ mi nii, ni ekɛɔ akɛ, ‘Nyɛmiyoo, ofainɛ hemɔ enɛ.’ Yehowa hako minine anyɛ shi kɔkɔɔkɔ.”

Sɛɛnamɔ ni Yɔɔ Biblia Kasemɔ He

Yehowa Odasefoi buɔ Nyɔŋmɔ Wiemɔ ni ji Biblia lɛ kasemɔ akɛ ehe yɛ sɛɛnamɔ, ni ajieee ohiafoi ni yɔɔ amɛteŋ lɛ hu yɛ mli. John ni eye afii 60 lɛ sɔmɔɔ akɛ gbɛgbalɔ (be-fɛɛ Maŋtsɛyeli shiɛlɔ) kɛ asafoŋ sɔɔlɔ yɛ asafo lɛ mli. Ehiɔ tsũ nsɔɔdoi enyɔ ko ni miihe akumɔ ashwie shi ni wekui 13 yɔɔ jɛmɛ lɛ mli. Etsũ lɛ yɛ klɛŋklɛŋ nsɔɔdo lɛ asa lɛ fã, ni akɛ tsei eja mli. Nɔ ni yɔɔ mli ji sɛii memeji enyɔ kɛ okpɔ̃lɔ ni ato Biblia kasemɔ he woji ashwie nɔ tamɔ gɔŋ. Ekãa saa folo ni akɛ jwɛi efee nɔ ewɔɔ.

Kulɛ John hɔ̃ɔ bodobodo ni enaa aaafee dɔla kome daa gbi, shi beni agu ashikishan ni ashɛɔ kɛjɛɔ maŋsɛɛ lɛ pɛ kɛkɛ ni nɔ ni ekɛkwɛɔ ehe lɛ je edɛŋ. Ekɛɛ: “Nibii amli waa kɛhaa mi waa yɛ bei komɛi amli, shi miyaa nɔ yɛ gbɛgbamɔ lɛ mli. Yehowa ji mɔ ni wajeɔ mi. Mitsuɔ nitsumɔ fɛɛ nitsumɔ ni maná, ni mikɛ mihe efɔɔɔ gbɔmɔ ko nɔ koni eye ebua mi loo elɛ mi, eyɛ mli akɛ nyɛmimɛi ni yɔɔ asafo lɛ mli lɛ yeɔ buaa mɔ waa. Amɛyeɔ amɛbuaa mi koni maná nitsumɔ, ni yɛ bei komɛi amli lɛ, amɛkɛ shika keɔ mi.

“Mitoɔ be mihaa Biblia lɛ kɛ Buu Mɔɔ Asafo lɛ woji lɛ akanemɔ. Mikaseɔ nii maŋkɛ̃ mra beni shia lɛ mli ejɔ, ni mikaneɔ nii gbɛkɛ be fɛɛ be ni wɔɔna ilɛtrik kane. Mile akɛ esa akɛ maya nɔ yɛ miteemɔŋ nikasemɔ mli.”

Gbekɛbii Atsɔsemɔ Kɛha Wala

Daniel ji nuu okulafo ni hiɛ bii ekpaa. Enitsumɔ ni etsu aahu afii 25 lɛ je edɛŋ yɛ 1985 mli, shi ena nitsumɔ akɛ mɔ ni kwɛɔ shwapo nɔ. Ekɛɛ: “Shihilɛ wa kɛha weku lɛ yɛ shika gbɛfaŋ. Amrɔ nɛɛ wɔyeɔ nii shikome pɛ daa gbi. Be ko lɛ wɔhi shi gbii etɛ ni wɔyeee nii. Nu pɛ wɔnyɛ wɔnu koni wɔhi wala mli.”

Daniel sɔmɔɔ akɛ onukpa yɛ asafo lɛ mli. Ekɛɛ: “Miyaa Kristofoi akpeei be fɛɛ be, ni mikɛ mihe woɔ teokrase nitsumɔi amli waa. Kɛ nitsumɔ ko yɛ ni abaatsu yɛ Maŋtsɛyeli Asa lɛ he lɛ, mibɔɔ mɔdɛŋ ni mahi jɛmɛ. Ni kɛ nibii amli wa lɛ, mikɛ Petro wiemɔi ni ekɛɛ Yesu ni yɔɔ Yohane 6:68 lɛ kaiɔ mihe: ‘Nuntsɔ, namɔ ŋɔɔ wɔɔtee?’ Kɛ mikpa Yehowa sɔɔmɔ lɛ, nɛgbɛ maya? Paulo wiemɔi ni wɔnaa yɛ Romabii 8:35-39 lɛ hu kɛ faishitswaa woɔ mimli, ejaakɛ amɛtsɔɔ akɛ nɔ ko nɔ ko bɛ ni baagbala wɔ kɛjɛ Nyɔŋmɔ kɛ Kristo suɔmɔ lɛ he. Enɛ ji su ni mitɛoɔ miwoɔ mibii lɛ amli. Mikɛɔ amɛ be fɛɛ be akɛ esaaa akɛ wɔshiɔ Yehowa kɔkɔɔkɔ.” Ekãa ni Daniel yɔɔ lɛ kɛ daa weku Biblia mli nikasemɔ ni efeɔ lɛ ena ebii lɛ anɔ hewalɛ kpakpa.

Nihamɔ Mumɔ

Mɔ ko baasusu akɛ ebaawa akɛ mɛi ni yɔɔ ohia futaa mli lɛ aaanyɛ atsu onia ko ni akɛfi Maŋtsɛyeli lɛ he nibii asɛɛ. Shi jeee nakai kwraa. (Okɛto Luka 21:1-4 he.) Odasefoi komɛi ni yɔɔ Ghana, ni amɛ nitsumɔ titri ji okwaayeli ni no mli nii amɛyeɔ lɛ foɔ amɛ shikpɔŋ lɛ fã ko amɛfɔ̃ɔ shi koni amɛkɛ no atsu Nyɔŋmɔ Maŋtsɛyeli lɛ hiamɔ nii ahe nii. Kɛ amɛhɔ̃ɔ nakai amɛ shikpɔŋ lɛ fã lɛ nɔ nibii lɛ, amɛkɛ nakai shika lɛ tsuɔ nakai yiŋtoo lɛ pɛ he nii, ni nɔ ni fata he ji onia ni amɛtsuɔ yɛ Yehowa Odasefoi a-Maŋtsɛyeli Asa lɛ nɔ.

Joan, ni yɔɔ Afrika Teŋgbɛ lɛ ji gbɛgbalɔ. Bɔni afee ni ekwɛ ewu ni ekumɔ lɛ kɛ mɛi krokomɛi ejwɛ ni jwere enɔ lɛ, ehɔ̃ɔ bodobodo. Beni asafo ni eyɔɔ mli lɛ taoɔ sɛii kakadaji kɛha Maŋtsɛyeli Asa lɛ, Joan weku lɛ kpɛ amɛyiŋ akɛ, amɛkɛ shika fɛɛ ni amɛyɔɔ yɛ shia lɛ mli lɛ baaha. Enɛ fee amɛ shwɛm. Shi enɔ jetsɛremɔ lɛ, mɔ ko ni hiɛ amɛ nyɔmɔ jeeŋmɔ lɛ wo nakai nyɔmɔ lɛ ni amɛkpaaa gbɛ, ni ekɛ shika ni amɛbɛ hiɛnɔkamɔ akɛ amɛnine baashɛ nɔ gbi ko lɛ ha amɛ!

Joan yɛ miishɛɛ, ni egbaaa ehe naa yakatswaa yɛ shika he. “Mitsɔɔ mishihilɛ lɛ mli mitsɔɔ Yehowa yɛ sɔlemɔ mli, kɛkɛ lɛ mikɛ mihe ewo sɔɔmɔ nitsumɔ lɛ mli. Wɔle akɛ hiɛnɔkamɔ ko bɛ akɛ bei kpakpai baaba kɛha nibii agbɛjianɔtoo nɛɛ. Ni kɛ̃lɛ, wɔyɔseɔ akɛ Yehowa kɛ nɔ ni he hiaa wɔ lɛ baaha wɔ.”

Bɔ ni Atsɔɔ Akɛ Ale Nitsumɔ

Akɛ suɔmɔ ni Yehowa Odasefoi yɔɔ kɛha amɛhe lɛ yɔseɔ amɛ. (Yohane 13:35) Mɛi ni yɔɔ shika lɛ yeɔ amɛbuaa amɛ nanemɛi Kristofoi ni ehia amɛ lɛ. Bei pii lɛ enɛ baa tamɔ nikeenii, ni yɛ bei komɛi lɛ ákɛ yelikɛbuamɔ koni aná nitsumɔ.

Mark ni yɔɔ Congo lɛ miina nɔ̃ kɛ kpiti. Efolɔ enaji kɛ eniji waobii lɛ. No hewɔ lɛ ekɛ tsutsɔmɔtso nyiɛɔ. Beni Mark kpɛ eyiŋ akɛ ebaasɔmɔ Yehowa lɛ, eje shishi efee tsakemɔi wuji yɛ eshihilɛ mli. Yɛ nɔ najiaŋ ni eeesisɛ niyenii taakɛ efeɔ tsutsu lɛ, eje shishi edũ lɛ diɛŋtsɛ eniyenii. Efee brikishi hu koni ehɔ̃ɔ.

Yɛ egbɔmɔtsoŋ fãtɔɔ nɛɛ fɛɛ sɛɛ lɛ, Mark tee nɔ etsu nii waa. Yɛ naagbee lɛ ehe shikpɔŋ ko ni ema shia fioo ko yɛ nɔ. Ŋmɛnɛ, Mark sɔmɔɔ akɛ asafoŋ onukpa, ni akɛ bulɛ haa lɛ waa yɛ maŋ ni eyɔɔ mli lɛ mli. Amrɔ nɛɛ ewaa mɛi krokomɛi ni ehia amɛ lɛ.

Yɛ anɔkwale mli lɛ, hei pii yɛ ni anyɛŋ ana nitsumɔ. Kristofonyo onukpa ko ni sɔmɔɔ yɛ Buu Mɔɔ Asafo lɛ nitsumɔhe nine lɛ ekome mli yɛ Afrika Teŋgbɛ lɛ ŋma akɛ: “Nyɛmimɛi pii bɛ nitsumɔ yɛ biɛ. Amɛteŋ mɛi komɛi bɔɔ mɔdɛŋ ni amɛto amɛ diɛŋtsɛ amɛ nitsumɔi ahe gbɛjianɔ, shi enɛ wa. Mɛi pii ekpɛ mli akɛ, akɛni yɛ nɔ fɛɛ nɔ ni amɛaafee lɛ fɛɛ sɛɛ lɛ amɛbaapiŋ hewɔ lɛ, amɛkɛ heloonaa nibii baashã afɔle koni amɛtsɔmɔ sɔɔlɔi gbɛgbalɔi. Yɛ nakai feemɔ mli lɛ, mɛi pii ena akɛ ajɔɔ amɛ babaoo fe ni amɛɛaná nitsumɔ kɛ nyɔmɔwoo fioo loo ni nyɔmɔwoo ko bɛ he kwraa.”

Yehowa Wajeɔ Ewebii

Yesu Kristo wie lɛ diɛŋtsɛ ehe akɛ: “Osɔi yɛ bui, ni ŋwɛi loofɔji hu yɛ tsũi; shi gbɔmɔ bi lɛ bɛ he ni ekɛ eyitso ŋmɛɔ.” (Luka 9:58) Nakai nɔŋŋ bɔfo Paulo ŋma akɛ: “Kɛbashi be nɛɛ fɛɛ lɛ, hɔmɔ kɛ kumai yeɔ wɔ, ni wɔnyiɛɔ yayai, ni agbalagbalaa wɔ mai, ni wɔbɛ hilɛhe krɛdɛɛ ko.”—1 Korintobii 4:11.

Yesu kɛ Paulo fɛɛ hala akɛ amɛaaha amɛshihilɛ afee mlɛo koni amɛnyɛ amɛtsu amɛsɔɔmɔ nitsumɔ lɛ he nii babaoo. Ŋmɛnɛŋmɛnɛ beaŋ Kristofoi pii ji ohiafoi ejaakɛ nɔ kroko bɛ ni amɛbaahala. Shi kɛ̃lɛ, amɛkɛ Biblia mli shishitoo mlai tsuɔ nii yɛ amɛshihilɛ mli, ni amɛkɛ ekãa taoɔ ni amɛsɔmɔ Nyɔŋmɔ. Amɛle akɛ Yehowa sumɔɔ amɛ waa, yɛ be mli ni amɛkpaa anɔkwale ni nɔmimaa ni Yesu kɛha akɛ: “Nyɛtaoa Nyɔŋmɔ maŋtsɛyeli lɛ kɛ ejalɛ lɛ tsutsu, ni akɛ [heloonaa] nii nɛɛ fɛɛ aaafata he aha nyɛ” lɛ gbɛ lɛ. (Mateo 6:25-33) Agbɛnɛ hu, nɛkɛ Nyɔŋmɔ tsuji ohiafoi nɛɛ yɛ odaseyeli ni tsɔɔ akɛ “Yehowa jɔɔmɔ lɛ, no feɔ mɔ niiatsɛ.”—Abɛi 10:22.

[Shishigbɛ niŋmai]

[Akrabatsa ni yɔɔ baafa 6]

Namɛi Ji “Wiemɔ lɛ Nɔyelɔ” Lɛ?

Taakɛ 1994 Gallup niiamlipɛimɔ ko ni afee lɛ tsɔɔ lɛ, Amerikabii amlijaa oha fɛɛ mli 96 “heɔ Nyɔŋmɔ loo jeŋ muu fɛɛ mumɔ ko amɛyeɔ.” U.S.News & World Report lɛ kɛɛ akɛ, nɔ ni yɔɔ hu ji “yɛ United States lɛ, Sɔlemɔi babaoo yɛ ni abaanyɛ aja aha mɔ fɛɛ mɔ fe bɔ ni eyɔɔ yɛ shikpɔŋ nɔ maŋ fɛɛ maŋ.” Yɛ nɛkɛ krɔŋkrɔŋ su ni anaa nɛɛ fɛɛ sɛɛ lɛ, niiamlipɛilɔ George Gallup, Jr. ni kɛ be kakadaŋŋ etsu nii lɛ kɛɔ akɛ: “Anɔkwale ni ka shi faŋŋ lɛ ji akɛ, Amerikabii ateŋ mɛi ni fa leee nɔ ni amɛheɔ amɛyeɔ loo nɔ hewɔ ni amɛheɔ amɛyeɔ.”

Niiamlipɛimɔi ni afee lɛ hu tsɔɔ akɛ, gbɛ agbo ko kã gbɔmɛi babaoo ajamɔŋ hemɔkɛyelii kɛ amɛnifeemɔi lɛ ateŋ. Akɛ nɔkwɛmɔnɔ lɛ, niŋmalɔ Jeffery Sheler kɛɛ akɛ, “adesai nifeemɔi ahe nilelɔi wieɔ akɛ maŋ lɛ mli hei ni awuiyeli yaa nɔ yɛ jɛmɛ fe fɛɛ lɛ ekomɛi hu bafeɔ hei ni jamɔŋ hemɔkɛyeli kɛ nifeemɔ mli wa fe fɛɛ yɛ.”

Esaaa akɛ enɛ feɔ mɔ naakpɛɛ. Mɛni hewɔ? Ejaakɛ yɛ klɛŋklɛŋ afii oha lɛ mli tɔ̃ɔ lɛ, bɔfo Paulo bɔ nanemɛi Kristofoi kɔkɔ akɛ, amɛkwɛ amɛhe nɔ jogbaŋŋ yɛ mɛi ni “amɛkɛɛ akɛ amɛle Nyɔŋmɔ, shi amɛkɛ amɛnitsumɔi kwaa lɛ” lɛ ahe. (Tito 1:16) Kɛfata he lɛ, Paulo kɛɛ obalanyo Timoteo akɛ nɔ ni baakadi “naagbee gbii” lɛ ji gbɔmɛi “ni hiɛ Nyɔŋmɔjamɔ su, shi amɛkwa emli hewalɛ lɛ.”—2 Timoteo 3:1, 5.

Shi kɛlɛ, anɔkwa Kristofoi feɔ bɔ fɛɛ bɔ ni amɛaanyɛ koni amɛnyiɛ Yesu Kristo famɔ akɛ “nyɛyaa ni nyɛyafea jeŋmaji fɛɛ mikaselɔi” lɛ sɛɛ. (Mateo 28:19) Yɛ nɛkɛ gbɛ nɔ lɛ ‘amɛbatsɔmɔɔ wiemɔ lɛ nɔyelɔi ni jeee wiemɔ lɛ nulɔi kɛkɛ.’—Yakobo 1:22.

[Mfoniri ni yɔɔ baafa 7]

Gbɔmɛi ni yɔɔ je lɛŋ he fɛɛ he buɔ sɛɛnamɔ ni yɔɔ Biblia lɛ kasemɔ he lɛ