Sanebimɔi Ni Jɛ Kanelɔi Adɛŋ

Ani mɔ ni ŋma Abɛi 30:19 lɛ nu he lɛlɛŋ akɛ bɔ ni nuu tsɔɔ ŋaa gbɛ nɔ elakaa obalayoo lɛ yɛ “naakpɛɛ tsɔ”?

Eeenyɛ ebalɛ akɛ nakai ji Abɛi 30:​19, ni wɔkpɛlɛɔ nɔ akɛ ejeee ŋmalɛ kuku ni eshishinumɔ yɔɔ mlɛo lɛ shishinumɔ.

Kɛji wɔmiitao jwɛŋmɔ ni yɔɔ kuku nɛɛ sɛɛ lɛ, no lɛ esaaa ni wɔkuɔ wɔhiɛ wɔfɔɔ emli sane lɛ diɛŋtsɛ nɔ. Yɛ kuku ni tsɔ enɛ hiɛ lɛ mli lɛ, mumɔ naa niŋmalɔ lɛ tsi nibii ejwɛ komɛi, ni yɛ gbɛ ko nɔ lɛ, amɛtɔrɔko da lɛ atã. (Abɛi 30:​15, 16) Kɛkɛ ni eto naa ni ebɔi nakai nibii lɛ atãtsii: “Nibii etɛ yɛ ni feɔ mi naakpɛɛ tsɔ, ni nɔ ni ji ejwɛ lɛ mileee: okropɔŋ gbɛ yɛ ŋwɛi, onufu gbɛ yɛ tɛsaa nɔ, lɛlɛ gbɛ yɛ ŋshɔ teŋ, kɛ nuu gbɛ yɛ obalayoo he.”​—Abɛi 30:​18, 19.

Mɛni baanyɛ afee “naakpɛɛ” nii yɛ nɛkɛ nibii ejwɛ nɛɛ ahe?

Ekolɛ akɛni amɛnuɔ he akɛ wiemɔ “naakpɛɛ” lɛ miitsɔɔ nɔ ni hi loo nɔ kpakpa hewɔ lɛ, woloŋlelɔi komɛi tsɔɔ mli akɛ nibii ejwɛ lɛ ateŋ eko fɛɛ eko jieɔ nilee ni yɔɔ Nyɔŋmɔ adebɔɔ mli lɛ kpo: naakpɛɛ nii ni ji bɔ ni loofɔlɔ agbo nyɛɔ efilikiɔ, bɔ ni onufu ni bɛ naji lɛ nyɛɔ enyiɛɔ kɛtsɔɔ tɛsaa nɔ, bɔ ni lɛlɛ ni tsii nyɛɔ etɛoɔ ŋshɔ ni efee hamahama hiɛ, kɛ bɔ ni obalanyo ni he wa nyɛɔ enaa obalayoo fɛfɛo ko he suɔmɔ waa ni ekɛ lɛ boteɔ gbalashihilɛ mli, kɛkɛ lɛ amɛfɔ bi ni ji adesa yɛ naakpɛɛ gbɛ nɔ lɛ. Woloŋlelɔ ko hu na nɔ kroko ni je amɛhe waa yɛ nibii ejwɛ lɛ fɛɛ mli, akɛ amɛteŋ mɔ fɛɛ mɔ tsɔɔ gbɛ ko ni yɔɔ ehee be fɛɛ be nɔ​—he ni okropɔŋ, onufu, kɛ lɛlɛ nyiɛɔ, ni gbɛ ko kwraa bɛ jɛmɛ, kɛ suɔmɔ hee kwraa ni jeɔ shishi yɛ nuu kɛ yoo teŋ lɛ.

Shi kɛlɛ, ehe ehiaaa ni nibii ejwɛ nɛɛ ahe afee”naakpɛɛ” yɛ jwɛŋmɔ kpakpa naa, tamɔ nɔ ni nɔ kpakpa ji nɔ ni jeɔ kpo yɛ nibii ejwɛ lɛ fɛɛ mli. Abɛi 6:​16-19 toɔ naa etsɔɔ “nibii . . . ni Yehowa nyɛɔ.” Ni taakɛ wɔkadiɔ lɛ, nibii ni atsi tã yɛ kukuji ni tsɔ hiɛ lɛ amli, yɛ Abɛi 30:​15, 16 (gbohiiaje [Sheol], musu ni fɔɔɔ, shikpɔŋ gbiŋ, kɛ la ni miitso grigri) lɛ ekɛɛɛ kɔkɔɔkɔ akɛ, “Efá!” Belɛ eka shi faŋŋ akɛ amɛjeee nibii ni yɔɔ naakpɛɛ yɛ gbɛ kpakpa nɔ.

Hebri wiemɔ ni atsɔɔ shishi akɛ “naakpɛɛ” yɛ Abɛi 30:18 lɛ shishi ji “agbala mli, nɔ ko ni hiɛ ehe; aha nɔ ko ahiɛ ehe, esoro lɛ kwraa, eyɛ naakpɛɛ.” Nɔ ko baanyɛ afee nɔ ni hiɛ ehe, ni esoro lɛ kwraa, loo naa kpɛɔ he yɛ he ni jeee doo akɛ eji nɔ kpakpa. Daniel 8:​23, 24 tsɔ hiɛ egba maŋtsɛ ko ni hiɛ wa, ni baakpata nii ahiɛ “ni yɛ naakpɛɛ” “ni eeekpata hewalɔi. . . [a]hiɛ,” ni mɛi krɔŋkrɔŋi lɛ po fata he lɛ he sane efɔ shi.​—Okɛto 5 Mose 17:8; 28:​59; Zakaria 8:6 he.

Kuku ni nyiɛ Abɛi 30:​18, 19 sɛɛ lɛ baanyɛ ekɛ nɔ ni ewa ha niŋmalɔ lɛ akɛ eeenu shishi lɛ he jwɛŋmɔ fioo ko aha wɔ. Kuku 20 tsiɔ yoo gbalafitelɔ ko tã akɛ “eyeɔ, ni etsumɔɔ enaa, ni ekɛɔ akɛ: ‘Mifeko nɔ ko fɔŋ ko!’” Ekolɛ etsɔɔ teemɔ kɛ ŋaalee nɔ efeɔ esha, shi akɛni anaaa efɔŋ ni efee lɛ he akadi ko kwraa hewɔ lɛ, enyɛɔ ebuɔ ehe mɔ ko ni eye bem.

Nɔ ko ni tamɔ nakai nɔŋŋ yɛ nibii ni etsi tã kɛtsɔ enɛ hiɛ lɛ amli. Okropɔŋ filikiɔ kɛtsɔɔ ŋwɛi, ni onufu tsɔɔ tɛsaa nɔ, ni lɛlɛ gbaa gbɛ kɛtsɔɔ ŋshɔkei ateŋ​—eko eko shiii okadi ko yɛ esɛɛ, ni ebaawa waa akɛ aaaja gbɛi ni nibii etɛ nɛɛ fɛɛ tsɔɔ nɔ lɛ sɛɛ mo. Kɛji nɔ ni je amɛhe yɛ nibii etɛ nɛɛ ahe ji enɛ lɛ, nɔ ni ji ejwɛ, “nuu gbɛ yɛ obalayoo he” lɛ hu?

Enɛ hu baanyɛ afee nɔ ko ni anyɛŋ sɛɛ mo aja. Ekolɛ obalanyo ko kɛ ŋaa fɔŋ, naa dɔkɔbii, kɛ lakamɔ gbɛi baatsu nii, ni eeetsɔ nakai gbɛ nɔ eha obalayoo foro ko ana ehe suɔmɔ. Akɛni ebɛ niiashikpamɔ hewɔ lɛ, ekolɛ obalayoo lɛ yoŋ ŋaa ni etsɔɔ lɛ. Ni kɛji elaka lɛ egbe naa po sɛɛ lɛ, ekolɛ obalayoo lɛ nyɛŋ atsɔɔ bɔ ni fee po ni nine shɛ enɔ; ni ekolɛ ebaawa eha mɛi ni na lɛ hu akɛ amɛaatsɔɔ mli. Ni kɛlɛ, obalayei foji pii elaaje amɛjeŋba kpakpa lɛ amɛha shishiulɔi. Gbɛi ni hii ni he yɔɔ oya nɛkɛ tsɔɔ nɔ lɛ sɛɛ mo jaa wa waa diɛŋtsɛ, shi kɛlɛ, oti ko ma amɛhiɛ, tamɔ okropɔŋ ni miifiliki, aloo onufu ni nyiɛ kɛ foi, aloo lɛlɛ yɛ ŋshɔŋ. Yɛ mɛi ni lakaa mɛi lɛ agbɛfaŋ lɛ, oti ni ma amɛhiɛ ji bɔlɛnamɔ he nitsumɔ.

Yɛ nɛkɛ shishinumɔ naa lɛ, oti ni yɔɔ Abɛi 30:​18, 19 lɛ jeee nɔ ni kɔɔ bɔ ni jeŋ nilee loo adebɔɔ mli nibii tsuɔ nii haa lɛ he. Shi moŋ, nakai ŋmalɛ kuku lɛ kɛ jeŋba he kɔkɔbɔɔ haa wɔ, tamɔ bɔ ni Abɛi 7:​1-27 bɔɔ kɔkɔ ni wɔtsi wɔhe kɛjɛ osharai ni yɔɔ yoo ajwamaŋ lakamɔ he lɛ. Gbɛ kome ni Kristofoi nyɛmimɛi yei baanyɛ atsɔ nɔ amɛbo ŋaawoo ni yɔɔ Abɛi 30:​18, 19 lɛ toi jogbaŋŋ ji ni amɛkwɛ hii ni kɛɔ akɛ amɛyɛ Biblia lɛ kasemɔ he miishɛɛ lɛ jogbaŋŋ. Kɛji nuu ni he yɔɔ miishɛɛ, ni eji naanyo nitsulɔ po lɛ tamɔ mɔ ko ni yɔɔ wiemɔ lɛ he miishɛɛ lɛ, esa akɛ nyɛmiyoo lɛ atuu lɛ ewo nyɛminuu ko dɛŋ yɛ asafo lɛ mli. Nyɛminuu lɛ baanyɛ atsu miishɛɛ diɛŋtsɛ ni eyɔɔ lɛ he nii ni “nuu gbɛ yɛ obalayoo he” lɛ he osharai lɛ eko kwraa baaa mli.