Ani Nyɔŋmɔ Tsuɔ Nii yɛ Gbɛ̀i ni “Ekɔdɔ” Nɔ?
“DEUS ESCREVE CERTO POR LINHAS TORTAS” (“NYƆŊMƆ ŋmalaa nibii jogbaŋŋ yɛ liamɔi ni ekɔdɔ nɔ”) lɛ ji wiemɔ ko yɛ Brazil. Etsɔɔ akɛ Nyɔŋmɔ feɔ nɔ ni ja be fɛɛ be shi yɛ bei komɛi amli lɛ yɛ gbɛ ni bafeɔ tamɔ ekɔdɔ kɛha gbɔmɔ nɔ. Ákɛ nɔkwɛmɔnɔ lɛ, kɛ mɔ ko gbo beni eji oblanyo loo oblayoo lɛ, mɛi babaoo kɛɔ akɛ, ‘Nyɔŋmɔ etsɛ lɛ kɛtee ŋwɛi.’ Kɛji mɔ ko miina amanehulu yɛ gbɔmɔtso mli kpajee ko hewɔ loo ekɛ oshara ko kpe lɛ, mɛi komɛi kɛɔ akɛ, ‘Nyɔŋmɔ suɔmɔnaa nii ni.’ Akɛni akɛ gbele, gbɔmɔtso mli naagbai, kɛ nibii krokomɛi ni kɛ ŋkɔmɔyeli baa lɛ he shwamɔ fɔɔ Nyɔŋmɔ nɔ hewɔ lɛ, wiemɔi ni tamɔ nɛkɛ lɛ tsɔɔ akɛ Nyɔŋmɔ ‘ŋmaa nii ni ekɔdɔ,’ akɛ efeɔ nibii yɛ gbɛ ni gbɔmɔ nyɛŋ anu shishi nɔ.
Mɛni hewɔ ni jamɔi amli bii babaoo heɔ yeɔ akɛ Nyɔŋmɔ ji mɔ ni kɛ gbele kɛ nɔnaai baa lɛ? Bei babaoo lɛ nɛkɛ hemɔkɛyelii nɛɛ jɛ Biblia mli ŋmalɛi komekomei komɛi ni ayanuuu shishi lɛ hewɔ. Ha wɔsusu amɛteŋ fioo komɛi ahe kuku wɔkwɛ.
● ”Namɔ bɔ mumui loo toimulɔ, loo ninalɔ loo shwilafo? Ani jeee mi, Yehowa, nɛɛ nɔŋŋ?”—2 Mose 4:11.
Ani enɛ tsɔɔ akɛ Nyɔŋmɔ sa shwamɔ yɛ mɛi fɛɛ ni naa amanehulu kɛjɛɔ kpajeei srɔtoi amli lɛ? Dabi. Enɛ baafee nɔ ni kɛ Nyɔŋmɔ su kɛ ebaŋ lɛ kpaŋ gbee. Biblia lɛ kɛɔ wɔ akɛ: “Nɔ fɛɛ nɔ ni Nyɔŋmɔ bɔ lɛ ehi.” (1 Timoteo 4:4) Esaaa akɛ ashwaa lɛ kɛ afɔ́ mɔ ko shwilafo, mumui, loo toimulɔ. Nibii kpakpai pɛ ji nɔ ni esumɔɔ ní ebɔɔ nii lɛ aná, ejaakɛ lɛ E-ŋɔɔ “duromɔ nii kpakpai fɛɛ kɛ nikeenii ni hi kɛ-wula shi fɛɛ lɛ” jɛ.—Yakobo 1:17.
Wɔ klɛŋklɛŋ fɔlɔi, Adam kɛ Hawa, ji mɛi diɛŋtsɛ ni hala akɛ amɛaatse atua amɛshi Nyɔŋmɔ, ni amɛlaaje emuuyeli mli ni amɛyɔɔ lɛ kɛ agbɛnɛ hu nyɛmɔ ni amɛyɔɔ akɛ amɛaafɔ́ bii ni eye emuu lɛ. (1 Mose 3:1-6, 16, 19; Hiob 14:4) Beni amɛ seshibii lɛ boteɔ gbalashihilɛ mli ni amɛnáa bii lɛ, emuu ni ayeee fáa babaoo, ni gbɔmɔtso mli kpajeei fata he lɛ, babɔi gbɛɛ-kɛ-shwamɔ yɛ adesai ateŋ. Eyɛ mli akɛ jeee Yehowa Nyɔŋmɔ ha nibii nɛɛ ba moŋ, shi lɛ ji mɔ ni eŋmɛ gbɛ koni eba. No hewɔ lɛ, ebaanyɛ ewie yɛ ehewɔ akɛ mɔ ni “bɔ” mumui, toimulɔ, kɛ shwilafo hu.
● ”Nɔ ni ekɔdɔ lɛ, anyɛɛɛ ajaje.”—Jajelɔ 1:15.
Ani Nyɔŋmɔ ji mɔ ni fee nibii ni ekɔdɔ lɛ? Eka shi faŋŋ akɛ dabi. Jajelɔ 7:29 kɛɛ akɛ: “Nyɔŋmɔ fee gbɔmɔ bɔ ni ja pɛ, shi amɛ lɛ amɛtaoɔ ŋaai babaoo.” Aloo taakɛ Contemporary English Version lɛ tsɔɔ kuku nɛɛ shishi yɛ gbɛ kroko nɔ lɛ: “Wɔbafee mɛi ni yeɔ anɔkwa kwraa kɛmɔ shi beni Nyɔŋmɔ bɔ wɔ lɛ, shi amrɔ nɛɛ wɔná jwɛŋmɔi ni ekɔdɔ.” Yɛ nɔ najiaŋ ni aaahi shi yɛ Nyɔŋmɔ jalɛ tɛi anaa lɛ, yɛ nibii babaoo agbɛfaŋ lɛ, hii kɛ yei ejɛ amɛsuɔmɔ mli amɛhala akɛ amɛaanyiɛ amɛ diɛŋtsɛ amɛ yiŋtoi, ŋaatsɔi, susumɔi, aloo amɛ gbɛ̀i asɛɛ—kɛye amɛhe awui.—1 Timoteo 2:14.
Agbɛnɛ, taakɛ bɔfo Paulo wie lɛ, yɛ esha ni adesai fee hewɔ lɛ, “aŋɔ bɔɔnii lɛ awo yakayakanii ashishi.” (Romabii 8:20) Ni nɛkɛ shihilɛ nɛɛ, ‘anyɛŋ ajaje lɛ’ kɛtsɔ adesai amɔdɛŋbɔi anɔ. Ja Nyɔŋmɔ kɛ ehe ewo mli dani abaajie nibii ni ekɔdɔ kɛ yakayakanii fɛɛ ni yɔɔ shikpɔŋ nɔ saji amli lɛ kɛya.
● ”Kwɛmɔ Nyɔŋmɔ nitsumɔ lɛ; shi namɔ aaanyɛ ajaje nɔ ni lɛ ekɔdɔ lɛ?”—Jajelɔ 7:13.
Yɛ wiemɔ kroko mli lɛ, Maŋtsɛ Salomo bi akɛ: ‘Namɔ yɔɔ adesai ateŋ ni baanyɛ ajaje kpajeei kɛ emuu ni ayeee ni Nyɔŋmɔ eŋmɛ gbɛ lɛ?’ Mɔ ko kwraa bɛ, ejaakɛ Yehowa Nyɔŋmɔ yɛ yiŋtoo hewɔ ni eŋmɛ nɛkɛ nibii nɛɛ agbɛ ni amɛba lɛ.
No hewɔ lɛ, Salomo jie yi akɛ: ‘Gbi kpakpa nɔ lɛ, nyã, ni gbi fɔŋ nɔ lɛ, jwɛŋmɔ akɛ anɔkwa Nyɔŋmɔ lɛ fee enɛ kɛ enɛ fɛɛ, beni afee ni gbɔmɔ akana nɔ ni baaba wɔsɛɛ.’ (Jajelɔ 7:14) Esa akɛ gbɔmɔ hiɛ asɔ gbi ni nibii baaya nɔ jogbaŋŋ lɛ ni ekɛtsɔɔ hiɛsɔɔ kɛtsɔ ekpakpafeemɔ ni eeejwɛŋ nɔ lɛ nɔ. Esa akɛ eyɔse gbi kpakpa akɛ nikeenii ni jɛ Nyɔŋmɔ ŋɔɔ. Shi kɛ gbi lɛ kɛ nɔ fɔŋ ba hu? Gbɔmɔ bɔɔ mɔdɛŋ ni ‘ena,’ ni ji akɛ, ni eyɔse akɛ Nyɔŋmɔ eŋmɛ gbɛ ni amanehulu lɛ aya nɔ. Mɛni hewɔ efee nakai? Salomo wie akɛ: “Beni afee ni gbɔmɔ akana nɔ ni baaba wɔsɛɛ.” Mɛni enɛ tsɔɔ?
Anɔkwa sane ni ji akɛ Nyɔŋmɔ ŋmɛɔ gbɛ ni wɔkɛ miishɛɛ kɛ naagbai fɛɛ akpe lɛ kaiɔ wɔ akɛ wɔnyɛŋ wɔtsɔɔ nɔ ni baaba wɔsɛɛ. Amanehulu baanyɛ anina jalɔi kɛ mɛi ni ejaaa fɛɛ. Ajieee mɔ ko yɛ mli. Esa akɛ enɛ aha wɔyɔse bɔ ni ehe hiaa akɛ wɔkɛ wɔhe akakpasa wɔ diɛŋtsɛ wɔhe, shi Nyɔŋmɔ moŋ nɔ, ni wɔkai akɛ “Nyɔŋmɔ lɛ, suɔmɔ ji lɛ.” (1 Yohane 4:8) Eyɛ mli akɛ wɔyanuŋ nibii komɛi ashishi bianɛ moŋ, wɔbaanyɛ wɔná nɔmimaa akɛ beni aaatsɔɔ nɔ fɛɛ nɔ naa lɛ, no mli lɛ nɔ ni Nyɔŋmɔ eŋmɛ gbɛ lɛ etsu yiŋtoo ni he baa sɛɛnamɔ he nii eha mɛi fɛɛ ni ekɔɔ amɛhe lɛ.
Nɔ fɛɛ nɔ ni eŋmɛɔ gbɛ lɛ yeŋ mɛi ni tsui ja lɛ awui kɔkɔɔkɔ kɛyaŋ naanɔ. Bɔfo Petro fee enɛ faŋŋ beni ewieɔ amanehulu ni baa hefatalɔi heyelilɔi ni yɔɔ ebeaŋ lɛ anɔ lɛ he lɛ akɛ: “Duromɔ fɛɛ Nyɔŋmɔ ni tsɛ nyɛ kɛba enaanɔ anunyam lɛ mli yɛ Kristo Yesu mli lɛ, kɛ́ nyɛna amanehulu fioo nɛɛ etã lɛ, lɛ diɛŋtsɛ eeesaa nyɛ pɛ ni eeewaje nyɛ ni eeewo nyɛ hewalɛ ni eeeha nyɛfi shi shiŋŋ.”—1 Petro 5:10.
Be Kɛha Nibii Ajajemɔ
Yehowa haa wɔ hewalɛ koni wɔdamɔ wɔ ŋmɛnɛŋmɛnɛ beaŋ kaai lɛ anaa. Ewo shi hu akɛ ebaafee “nii fɛɛ ehee.” (Kpojiemɔ 21:5) Hɛɛ, eji eyiŋtoo akɛ etsɛŋ ni eŋwɛi Maŋtsɛyeli lɛ baaku sɛɛ ekɛ hewalɛnamɔ abaha mɛi ni naa amanehulu kɛjɛɔ kpajeei amli lɛ ni ebaakwɛ ni atee gbohii lɛ ashi. Nakai nɔyeli lɛ baakpata mɔ ni eji anɔkwale akɛ egbɛ̀i ekɔdɔ lɛ hiɛ—Satan Abonsam. (Yohane 5:28, 29; Romabii 16:20; 1 Korintobii 15:26; 2 Petro 3:13) Mɛɛ jɔɔmɔ nɛkɛ eeeji kɛha Nyɔŋmɔ gbeyei shelɔi ni yɔɔ shikpɔŋ muu lɛ fɛɛ nɔ lɛ beni be ni Nyɔŋmɔ kɛbaajaje nibii lɛ ebashɛ shi lɛ!
[He ni Mfoniri ni yɔɔ baafa 28 lɛ Jɛ]
Beni Hiob Nuɔ Ehiɛkpatamɔ He Lɛ/The Doré Bible Illustrations/Dover Woji