Ye Omumɔ Nɔ!

JWƐŊMƆŊ hela he nilelɔ ko na akɛ, “mɛi ni mli fuɔ, ni amɛnaa gbɔmɛi ahe jwɛŋmɔ fɔŋ lɛ baanyɛ agboi beni amɛyeko afii 50 kɛ akɛto he lɛ shii enumɔ fe mɛi ni he jɔ ni anyɛɔ akɛ he fɔɔ amɛnɔ lɛ.” Nɛkɛ ji bɔ ni The New York Times ni je kpo yɛ January 17, 1989 lɛ bɔ amaniɛ. Dr. Redford B. Williams, nilelɔ kpanaa ni yɔɔ Duke University Tsofafeemɔ he ni yɔɔ Durham, North Carolina lɛ “tsɔɔ akɛ nibii ni ena nɛɛ damɔ nikasemɔi pii anɔ.” Shi Times lɛ bɔ amaniɛ akɛ “tsuii ni nyɛɔ amɛkɛ amɛhiɛ fɔɔ mɔ nɔ lɛ tsɛɔ, ejaakɛ abuɔ amɛhe kɛjɛɔ fãji amli gbɛjianɔtoo ni nuɔ nii ahe lɛ ahe.”

Mlifu baanyɛ aha la falɛ aya hiɛ, ebaanyɛ eha kɔɔyɔɔ ni amuɔ lɛ mumɔ awa, ni nibii gbohii krokomɛi baanyɛ ajɛ mli aba. Mlila baanyɛ afite mɔ ko susumɔ, ni nɔ ni jɛɔ mli baa yɛ sɛɛ mli lɛ bafeɔ jwɛŋmɔŋ nɔnyɛɛ ni mli wa. Nɔ ni jɛɔ mlifu mli baa ni ehiii hu ji awui ni eyeɔ gbɔmɔ lɛ mumɔŋ hewalɛnamɔ. Ŋwanejee ko bɛ he akɛ no hewɔ ni Biblia lɛ kɛɔ akɛ: “Tsui ni mli jɔ lɛ, gbɔmɔtso lɛ yiwala ni” lɛ. (Abɛi 14:30) Hɛɛ, kɛ oye omumɔ nɔ lɛ onaa gbɔmɔtsoŋ hewalɛ. Shi kadimɔ yiŋtoi krokomɛi ahewɔ ni esa akɛ ofee nakai lɛ.

Dii Gbɛ ni Nilee Yɔɔ Mli lɛ Sɛɛ

Mɔ fɛɛ mɔ ni jwɛŋmɔŋ ka shi lɛ baasumɔ ni efee nii yɛ nilee mli. Gbɛ kome ni atsɔɔ nɔ afeɔ enɛ ji ni ajie henɔyeli kpo. Yɛ enɛ gbɛfaŋ lɛ, Abɛi 29:11 kɛɔ akɛ: “Kwashia jieɔ emlifu fɛɛ kpo, shi nilelɔ kɛtoɔ sɛɛ ni ejɔɔ he.”

Yɛ Biblia mli lɛ, eshɛɔ be ni akɛ wiemɔ “mlifu” loo “mumɔ” toɔ su ni kanyaa mɔ ko ni haa ediɔ nifeemɔ ko sɛɛ lɛ he. “Kwashia” jieɔ emlifu loo emumɔ fɛɛ kpo, ejaakɛ enyɛɛɛ eye nɔ. Ehaa emlila lɛ fɛɔ ni ebuuu nɔ ni baajɛ mli aba. Mumɔ ni yɔɔ kwashia mli lɛ baaha ejie mlifu kpo yɛ ehiɛ. Kɛkɛ lɛ emumɔ lɛ baajie emlifu lɛ kpo yɛ wiemɔ kɛ nifeemɔi ni ehiii ni ji buului anifeemɔ mli.

Shi, nilelɔ lɛ “jɔɔ he.” Eyeɔ nɔ ni eŋmɛɔ nɔ ni baajɛ emlifu ni eeeha aje kpo lɛ mli aba lɛ ekwɛɔ. Kɛ eyɛ nɔ kpakpa po ni eeedamɔ nɔ eha emli afu lɛ, eyɔseɔ akɛ, ni eeefee nakai amrɔ nɔŋŋ yɛ be mli ni ehiɛ nakai mlifu lɛ baaye awui babaoo. No hewɔ lɛ, ekɛ henɔyeli tsuɔ nii ni etsiɔ ehe naa kɛjɛɔ mlifu ni anyɛɛɛ nɔ aye kɛ basabasa ni eeewie lɛ he. Ekwɛɔ Yehowa gbɛ kɛhaa yelikɛbuamɔ, ekolɛ ekɛ hehiamɔ sɔleɔ yɛ teemɔŋ. Yɛ naagbee lɛ, kɛha mɛi fɛɛ ni yɔɔ jɛmɛ lɛ ahilɛ-kɛhamɔ hewɔ lɛ, nilelɔ lɛ nyɛɔ etsiɔ emlifu naa ni esusuɔ nii ahe yɛ gbɛ ni kɛ Ŋmalɛi lɛ kɛ Nyɔŋmɔ suɔmɔnaa nifeemɔ kpaa gbee lɛ nɔ. Agbɛnɛ, mɔ aŋkro ni ji nilelɔ lɛ yɔseɔ akɛ esaaa akɛ ekɛ mlifu toɔ ejaakɛ ebaaha efee shikpilikpii ni efee nii ni jwɛŋmɔ bɛ mli ni ebaafee esha.

Nilelɔ lɛ hu kɛ bɔfo Paulo ŋaawoo lɛ tsuɔ nii: “Nyɛmli afua, shi nyɛkafea esha; hulu akanyɔ shi yɛ nyɛmlila lɛ nɔ, ni asaŋ nyɛkɛ nyɛhe akafɔa shi nyɛhaa Abonsam.” (Efesobii 4:​26, 27) Kɛ omli fu po yɛ gbɛ ni ja nɔ lɛ, kaaha nakai mlifu lɛ miihi shi, ni hulu nyɔ shi yɛ nakai shihilɛ lɛ mli. Mɛni hewɔ? Ejaakɛ obaaŋmɛ gbɛ koni Satan Abonsam kɛ bo atsu nii, ekolɛ eeelaka bo ni ofee nɔ ko fɔŋ koni Nyɔŋmɔ mlifu aba onɔ. (Lala 37:​8, 9) Shi moŋ, ye omumɔ nɔ, ni ofee nii oya ni okɛsaa naagbai ni ekolɛ nomɛi tee omlifu shi lɛ.​—Mateo 18:​15-17.

Feemɔ Mɔ ni Mumɔ He Jɔ

Abɛbua kroko hu kɛɔ akɛ: “Mɔ ni wiemɔ ekaaa lɛ, ele nii, ni mɔ ni mumɔ he jɔ lɛ, lɛ ji mɔ ni kɔɔ sane sɛɛ.” (Abɛi 17:27) Mɔ ni yɔɔ Nyɔŋmɔ Wiemɔ lɛ he nilee lɛ, ‘tsiɔ ewiemɔi anaa,’ ehaaa ewiemɔi aho yɔɔ tamɔ faa ni etue ni miiho kɛkɛ, titri lɛ kɛ nɔ ko miigba enaa. Akɛni ele wekukpaa ni ka ekɛ Yehowa teŋ kɛ agbɛnɛ egbɛhe ni sa yɛ Nyɔŋmɔ gbɛjianɔtoo lɛ mli hewɔ lɛ, eŋmɛŋ gbɛ ni mlifu aye enɔ kunim. Shi moŋ, “mɔ ni kɔɔ sane sɛɛ” lɛ bɔɔ mɔdɛŋ ni eha ehe ajɔ ni esusumɔ aŋmɛ pɛpɛɛpɛ. Kɛ ohiɛ mumɔ loo su ni tamɔ nɛkɛ lɛ, bo hu obaanyɛ oye shihilɛi ni baaba ni baatsirɛ buulu yisɛɛ kɛya eshafeemɔ mli lɛ nɔ kunim.

Wɔkaneɔ yɛ enɛɛmɛi nɔŋŋ he akɛ: “Mɔ ni mli fuuu mra lɛ, eyɛ jwɛŋmɔ jogbaŋŋ; shi mɔ ni tsui yɔɔ flɔflɔ lɛ, ejieɔ buulufeemɔ kpo.” (Abɛi 14:29) Kɛ mɔ ko naaa tsui kɛ akanya ehenumɔ aloo efee mɔ ni tsui yɔɔ flɔflɔ lɛ, ebaaha efee buului anii. Kwɛ bɔ ni ehi jogbaŋŋ akɛ ooosusu nɔ ni baajɛ wiemɔ loo jeŋba ni anyɛɛɛ nɔ aye lɛ mli aba lɛ he! Kɛ jeee nakai lɛ, mɔ ko baanyɛ ni ekɛ tsui ni yɔɔ flɔflɔ afee nii ni ejaaa ni nilee bɛ mli, ni enɛ baaha ejie “buulu-feemɔ kpo.” No hewɔ lɛ, ‘ba omlifu shi,’ taakɛ Nyɔŋmɔ ji lɛ, ni oookwa tsui ni yɔɔ flɔflɔ kɛ nifeemɔi ni nilee bɛ mli.​—2 Mose 34:⁠6.

Kwa Henɔwomɔ

Yɛ henɔwomɔ hewɔ lɛ, mɔ ko yɛ ni esusuŋ mɛi krokomɛi ahe, ni eji mlifutsɛ hu. No hewɔ lɛ wɔkaneɔ akɛ: “Mlifutsɛ teeɔ bei shi, ni mlilatsɛ lɛ, etɔmɔ faa.” (Abɛi 29:22) Kɛ mɔ ko nyɛɛɛ aye emumɔ nɔ shi moŋ eji “mlifutsɛ” lɛ, ‘ebaatee bei shi,’ yɛ enanemɛi ateŋ po. Ni “mlilatsɛ lɛ, etɔmɔ faa.” Hɛɛ, ebaafee esha​—nɔ ko ni mɔ ni le nii ni esheɔ Nyɔŋmɔ gbeyei lɛ baasumɔ ni ekwa.

Kaaha ohiɛ miikpa nɔ akɛ Yehowa ekpɛlɛɛɛ henɔwomɔ kɛ hetsɔɔmɔ mumɔ ni teeɔ mlifu shi lɛ nɔ. (Abɛi 16:18) Ehi jogbaŋŋ kwraa akɛ oootao Nyɔŋmɔ yelikɛbuamɔ koni oŋmɛ otsui shi yɛ kaa mli ni ofee nii yɛ heshibaa mli fe ni oooŋmɛɛ ohe oha henɔwomɔ kɛ mlifu loo mlila.​—Abɛi 29:⁠23.

Okɛ Naajɔlɛ Atsu Nii

Heshibaa he miihia kɛ eeeba akɛ mɔ ko ni yɔɔ hegbɛ aaaka ohiɛ. Yɛ nɛkɛ be nɛɛ mli lɛ, mɛni baafee oklɛŋklɛŋ kanyamɔ? Ekolɛ ni okɛ wiemɔ sha aha hetoo oya. Shi Biblia lɛ woɔ wɔ ŋaa akɛ: “Kɛ nɔyelɔ mumɔ te shi woo lɛ, kaaje ogbɛhe lɛ; shi sane heŋmɛɛmɔ jɔɔ tɔmɔi wuji ahe.” (Jajelɔ 10:⁠4) Kwɛ bɔ ni nilee yɔɔ mli akɛ okɛ naajɔlɛ aaaha sane hetoo! Lɛlɛŋ, “naajɔlɛ hetoo kuɔ mlila naa.” (Abɛi 15:⁠1) Ebiɔ henɔyeli dani mɔ ko anyɛ ni ekɛ naajɔlɛ aha sane hetoo, shi nɛkɛ nilee gbɛ nɛɛ haa naagbai laajeɔ ni ekɛ toiŋjɔlɛ wekukpaa kpakpa baa.

Kɛ oji mɔ ni aaka ohiɛ yɛ gbɛ ni ejaaa po nɔ lɛ, hiɛnɔkamɔ yɛ akɛ mɔ ni yɔɔ hegbɛ ni feɔ nakai lɛ baaŋmɛ bo gbɛ koni otsɔɔ saji amli. Shi esa akɛ osane mlitsɔɔmɔ lɛ aba yɛ mlijɔlɛ mumɔ mli kɛ hiɛnɔkamɔ akɛ abaajaje jwɛŋmɔ ni ejaaa ni ana lɛ. Ehe baahia ni mɔ aŋkro ni yɔɔ hegbɛ ni kwɛɔ sane nɛɛ mli lɛ aye emumɔ nɔ koni eŋmɛ sane mlitsɔɔmɔ ni tamɔ nɛkɛ gbɛ, ni enɛ baatsɔɔ akɛ eyɛ nilee kɛ hewalɛ.

Kɛ Kristofonyo lɛ yɛ hegbɛ yɛ gbɛhe ko mli aloo jeee nakai hu lɛ, esa akɛ ekai akɛ “mɔ ni nyɛɛɛ emumɔ nɔ aye lɛ, etamɔ maŋ ni akumɔ ni gbogbo bɛ he.” (Abɛi 25:28) Mɔ ni bɛ mumɔ ni he jɔ ni enyɛɛɛ emumɔ nɔ aye lɛ ŋmɛɔ gbɛ ni susumɔi ni ejaaa ni baatsirɛ lɛ ni efee nii yɛ gbɛi ni ejaaa nɔ boteɔ emli. Yesu Kristo, ni to okadi ni yeɔ emuu lɛ efɔ shi lɛ ‘he jɔ ni ebaa ehe shi yɛ etsui mli.’ (Mateo 11:29) Agbɛnɛ, mlijɔlɛ ji Nyɔŋmɔ mumɔ krɔŋkrɔŋ lɛ yibii ni esa akɛ Kristofoi asɔle abi lɛ eko.​—Luka 11:​13; Galatabii 5:​22, 23.

Mɛni Hewɔ Esa Akɛ Oye Omumɔ Nɔ?

Wɔhiɛ sɔɔ wiemɔi ni mli jɔ, shi yɛ bei komɛi amli lɛ wɔleee nɔ ni kanyaa mlifu kɛ bolɔmɔ. Mɔ ni yeee mla nɔ po lɛ baanyɛ atsimɔ emlifu kɛ efai shi ni etswa akɛ ebaatɔ mɔ kroko nɔ owele yɛ nɔ ni efee lɛ loo esusuɔ akɛ efee lɛ lɛ hewɔ lɛ nɔ! Ekolɛ ekɛ osatofeemɔ baamɛ be ni sa koni ekɛɛ nɔ ko ni ehiii yɛ gbɔmɔ ni ena hetsɛ kɛha lɛ lɛ he. Shi yɛ anɔkwale mli lɛ, esaaa akɛ Kristofonyo ŋmɛɔ gbɛ koni su ni tamɔ nakai aje kpo yɛ emli, ejaakɛ bɔfo Yohane ŋma akɛ: “Mɔ ni nyɛɔ enyɛmi lɛ, duŋ mli eyɔɔ, ni duŋ lɛ mli enyiɛɔ, ni eleee he ni eyaa, ejaakɛ duŋ lɛ eshwila ehiŋmɛii.” Yohane kɛɛ hu akɛ: “Mɔ fɛɛ mɔ ni nyɛɔ enyɛmi lɛ, gbɔmɔgbelɔ ji lɛ; ni nyɛle akɛ gbɔmɔgbelɔ ko gbɔmɔgbelɔ ko bɛ naanɔ wala yɛ emli.”​—1 Yohane 2:​11; 3:⁠15.

Kɛ henɔwomɔ, osato loo sui krokomɛi ni tsɔɔ gbeyei ni asheee Nyɔŋmɔ lɛ etee yɛ omli lɛ, nii ni aŋɔtee nɛɛ lakaaa Nyɔŋmɔ. Hoofeemɔ loo he ni akɛaatsɔɔ akɛ mɔ lɛ ji jalɔ lɛ nyɛŋ ekɛ nɔ ni yɔɔ gbɔmɔ lɛ tsui mli diɛŋtsɛ lɛ atee Nyɔŋmɔ. Abɛi 16:2 kɛɔ akɛ: “Gbɔmɔ gbɛi fɛɛ he tse yɛ ehiɛ; shi Yehowa ji mɔ ni ŋmɛɔ mumɔi ekwɛɔ.” Anyɛŋ ashishiu Nyɔŋmɔ kɔkɔɔkɔ.

Kɛha bo diɛŋtsɛ ohilɛ kɛ agbɛnɛ kɛha Ŋmalɛ mli yiŋtoi ni wɔsusu he nɛɛ hewɔ lɛ, belɛ feemɔ tamɔ Yesu kɛ aŋkroaŋkroi komɛi ni le nii ni kwa henɔwomɔ ni kɛ mlijɔlɛ fee nii lɛ. Bɔ fɛɛ bɔ ni sane lɛ ji lɛ, ye omumɔ nɔ!