Obalaŋtai Ni Haa Yehowa Tsui Nyaa
“Ha mitsui mli afili lɛ, ni mana heloo maha mɔ ni bɔɔ mi ahora lɛ.”—ABƐI 27:11, Nw.
1. Gbɛ ni wɔtsɔɔ nɔ Wɔhiɔ shi lɛ saa wɔfɔlɔi kɛ wɔ-Bɔlɔ lɛ ahe yɛ mɛɛ gbɛ nɔ?
OLE jio, oleee jio, gbɛ ni otsɔɔ nɔ ohiɔ shi lɛ kɛ sɔrɔtofeemɔ ko baa oshihilɛ mli. Akɛ nɔkwɛmɔ nɔ lɛ, etsɔɔ nɔ ko kɛhaa ofɔlɔi. Biblia lɛ tsɔɔ mli akɛ: “Bi nilelɔ haa etsɛ naa miishɛɛ; shi bi kwashia lɛ, ehaa enyɛ tsui yeɔ.” (Abɛi 10:1; 23:24, 25) Shi nɔ ni he hiaa fe fɛɛ lɛ, gbɛ ni otsɔɔ nɔ ohiɔ shi lɛ baanyɛ aha o-Bɔlɔ, Yehowa Nyɔŋmɔ ana miishɛɛ loo aye awerɛho. Yehowa woɔ wɔ ŋaa akɛ, “mibi, feemɔ ohe nilelɔ, koni oha mitsui anyɔ mimli, ni mana hetoo maha mɔ ni bɔɔ mi ahora lɛ.”—Abɛi 27:11.
2. Mɛɛ sane ni he hiaa waa Satan tee lɛ shi, ni ekɔɔ wɔhe yɛ mɛɛ gbɛ nɔ?
2 Mɔ ni bɔɔ Yehowa ahora lɛ ji Satan Abonsam. Satan Abonsam tee sane ko ni he hiaa shi yɛ Eden abɔɔ lɛ mli ni ebi ni Nyɔŋmɔ aha hetoo. Beni Abonsam nyɛ eha Hawa kɛ agbɛnɛ yɛ sɛɛ mli lɛ Adam ku Nyɔŋmɔ mla mli yɛ gbɛ ni waaa kwraa nɔ lɛ, ebaka shi faŋŋ akɛ etswa Yehowa mpoa. Ni ji akɛ, Satan miitsɔɔ akɛ: ‘Bo lɛ okɛ hegbɛ aha mi, ni magbala mɔ fɛɛ mɔ kɛaajɛ osɔɔmɔ he.’ (Hiob 1:6-12) No hewɔ lɛ Yehowa jɛ etsuiŋ tɔɔ etsɛ, taakɛ aŋma yɛ yiteŋgbɛ Iɛ, ákɛ ebi lɛ kɛ “hetoo” ko aha Lɛ, koni E-na hetoo eha Satan mpoatswaa lɛ.
3. Mɛɛ Yehowa tsɛmɔ kɔɔ Yesu he titri lɛ, ni namɛi hu baaha Nyɔŋmɔ tsui anya?
3 Shi, namɔ pɔtɛɛ ji mɔ ni Yehowa wieɔ etsɔɔ lɛ akɛ, “mibi” lɛ? Yesu Kristo ji Nyɔŋmɔ bi yɛ gbɛ krɛdɛɛ nɔ, ni lɛ ji e-Bi koome lɛ. (Yohane 1:14) Agbɛnɛ hu, yɛ Adam ni yeee e-Bɔlɔ lɛ anɔkwale sɛɛ lɛ, Yesu ji gbɔmɔ kome pɛ ni yeɔ emuu ni nyiɛ shikpɔŋ nɛɛ nɔ, no hewɔ lɛ lɛ pɛ ji gbɔmɔ ni baanyɛ aye anɔkwale yɛ nakai shishinumɔ mli aha Nyɔŋmɔ (1 Korintobii 15:45) No hewɔ lɛ Yehowa tsɛmɔ lɛ kɔɔ Yesu Kristo he titri. Ni Yesu haaa e-Tsɛ lɛ nine anyɛ shi. Yesu tsɔ enɔkwayeli gbɛ lɛ nɔ ekɛ hetoo ha Nyɔŋmɔ koni ekɛha Satan mpoatswaa akɛ adesa nyɛŋ asɔmɔ Lɛ yɛ anɔkwayeli mli yɛ kaa shishi lɛ. (Hebribii 2:14; 12:2) Kɛfata he lɛ, mɛi fɛɛ ni kɛ Kristo baaye maŋtsɛ yɛ ŋwɛi lɛ hu baafee mɛi ni baaha Yehowa tsui anya kɛtsɔ anɔkwale ni amɛaaye Nyɔŋmɔ kɛyashi gbele po mli lɛ nɔ.—Kpojiemɔ 2:10.
4. Kɛ ooto oyiŋ yɛ nɔ ni esa akɛ okɛ owala atsu he lɛ, mɛɛ sane ni he hiaa esa akɛ osusu he?
4 Shi wɔ ni wɔyɔɔ wala mli ŋmɛnɛ lɛ, ni nyɛ obalaŋtai lɛ fata he lɛ hu? Ani nyɛ hu nyɛfata sane ni ji akɛ ani adesai baaye Nyɔŋmɔ anɔkwale loo amɛfeŋ nakai lɛ he? Yɛ anɔkwale mli lɛ nyɛfata he! (Lala 147:11; 148:12, 13) Ekolɛ nyɛyɔseŋ enɛ, shi nɔ ni nyɛkɛ nyɛshihilɛ feɔ lɛ fiɔ Nyɔŋmɔ sɛɛ yɛ sane lɛ mli aloo Satan sɛɛ. Ehaa Yehowa tsui nyaa aloo Satan moŋ nyaa. Yɛ anɔkwale mli lɛ Yehowa tsɛmɔ loo eninefɔɔ hu baanyɛ afee nɔ ko ni abuɔ lɛ akɛ bo pɔtɛɛ ji mɔ ni afɔɔ bo nine lɛ, akɛ: “Mibi, [nuu loo yoo], feemɔ ohe nilelɔ, koni oha mitsui anyɔ mimli, koni mana hetoo maha mɔ ni bɔɔ mi ahora lɛ.” (Abɛi 27:11) Ani o-Bɔlɔ lɛ tsui ni oooha enya lɛ jeee oti ko ni baaha otsui anyɔ omli?
Nɔ Hewɔ Ni Nilee Yɔɔ Mli
5. Mɛni hewɔ nilee yɔɔ mli akɛ oooha Yehowa tsui anya lɛ?
5 Kadimɔ akɛ Yehowa woɔ wɔ hewalɛ akɛ, “Feemɔ ohe nilelɔ.” Mɛni hewɔ kɛ wɔha Yehowa tsui nya lɛ belɛ wɔji nilelɔi lɛ? No ji akɛ Yehowa ji Tsɛ ni yɔɔ suɔmɔ ni miisumɔ ni wɔná nɔ ni hi fe fɛɛ, ni nɔ fɛɛ nɔ ni ekɛɔ akɛ wɔfee lɛ ji nɔ ni baahi aha wɔ. Taakɛ Yesaia 48:17, 18 kɛɔ lɛ: “Miji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ni onyiɛ nɔ lɛ. Eji obo mikitai lɛ atoi kulɛ, ohejɔlɛ aaatamɔ faa, ni Ojalɛ hu aaatamɔ ŋshɔkei.”
6. (a) Mɛni tsɔɔ akɛ Yehowa miisumɔ ni ona shihilɛ mli ŋɔɔmɔ? (b) Mɛni ni baaba ji nɔ ni onyɛŋ ekwa lɛ?
6 Ákɛ fɔlɔ ni yɔɔ suɔmɔ Iɛ, Yehowa miisumɔ ni ona enikeenii ni ji wala lɛ mli ŋɔɔmɔ kɛmɔ shi. No hewɔ lɛ ekɛɔ akɛ: “Obalanyo, ha omii ashɛ ohe yɛ obalahiiaŋ, ni ona tsuijurɔ yɛ ebalahiiaŋ gbii lɛ mli, ni onyiɛ otsui gbɛi lɛ anɔ, kɛ nii ni ohiŋmɛi naa lɛ asɛɛ.” Shi nɛkɛ gbɛ nɛɛ jeee gbɛ ni aafɔ bo nine ni obafee nɔ fɛɛ nɔ ni ŋɔɔ onaa ni osumɔɔ. Ejaakɛ kɔkɔbɔɔ ni nyiɛ sɛɛ lɛ tsɔɔ nakai: “Shi na ole akɛ enɛɛmɛi fɛɛ hewɔ lɛ Nyɔŋmɔ kɛo baakojo.” (Jajelɔ 11:9) Hɛɛ, onyɛŋ ojo nɔ ni baajɛ onifeemɔi lɛ amli aba lɛ naa foi; Nyɔŋmɔ kɛ nɔ fɛɛ nɔ ni ofeɔ lɛ he sɔ baafɔ onɔ. Biblia mla lɛ ji anɔkwale: “Nɔ fɛɛ nɔ ni gbɔmɔ duɔ lɛ, no nɔŋŋ ebaakpa.”—Galatabii 6:7.
7, 8. Te ooofee tɛŋŋ ojie mlifu kɛ awerɛho kɛjɛ ohe kɛya? (b) Mɛɛ be mli obalaŋtaiaŋ kɛ obalahii agbii bafeɔ yakayaka nii?
7 Yɛ yiŋtoo nɛɛ hewɔ lɛ Yehowa kɛfataa he akɛ: “No hewɔ lɛ jiemɔ mlifu [awerɛho] kɛjɛ otsui mli, ni oha nɔfɔŋ aje oheloo mli; shi gbekɛbiiashi kɛ obalahiiaŋ lɛ, yakayaka nii ni!” (Jajelɔ 11:10) Yɛ anɔkwale mli lɛ, eji nilee gbɛ akɛ oootsi ohe kɛaajɛ nitsumɔi loo nifeemɔi ni baaha oye awerɛho yɛ sɛɛ mli lɛ ahe. Ooh, mɛi yɛ ni baakɛɛ bo akɛ oolaaje nɔ ko pi—ákɛ oleee ‘nɔ ni ŋɔɔ,’ ja otɔ dãa, obɔ ajwamaŋ aloo okɛ ohe ewo “oshara” ko mli da. Shi kwɛ bɔ ni amɛji buului kwraa ha! Obalanyo fioo ko ni yaa skul lɛ ye awerɛho yɛ be mli ni ebɔ ajwamaŋ lɛ sɛɛ akɛ: “Sɛɛnamɔ ko kwraa bɛ mli. Ni kɛjɛ nakai be lɛ mli kɛbaa nɛɛ efee nɔ ni haoɔ mi yɛ be fɛɛ mli.”
8 No hewɔ lɛ, nyɛ obalaŋtai lɛ, nyɛkɛ nilee aboa Nyɔŋmɔ ŋaawoo toi koni nyɛjie awerɛho kɛ nɔfɔŋ kɛjɛa nyɛtsui mli, nɔ ni tamɔ nɔ ko ni baa obalaŋtai ni diɔ pɛsɛmkunya shihilɛ gbɛ ni nilee bɛ mli lɛ anɔ lɛ. Afii ohai 17 lɛ mli lalafolɔ ko kɛɛ akɛ: “Adesai ateŋ mɛi ni fa kɛ amɛklɛŋklɛŋ afii lɛ tsuɔ nii ni amɛkɛhaa amɛnaagbee afii lɛ feɔ nɔ ni yɔɔ mɔbɔ.” Eji anɔkwale, shi kwɛ bɔ ni ehiii kwraa ha! Kɛ obalanyo fite egbɔmɔtsoŋ hewalɛi kɛ nyɛmɔi yɛ gbɛ ni yɛ sɛɛ mli beni eda etsɔ onukpa lɛ ehaa etɔɔ lɛ lɛ, belɛ ebalahiiaŋ gbi lɛ amli afii lɛ bafeɔ yakayaka nii diɛŋtsɛ! (Abɛi 22:3) No hewɔ lɛ le nii! Nyiɛmɔ ŋaawoo kroko hu nɛɛ sɛɛ: “Kaimɔ obɔlɔ lɛ yɛ obalahiiaŋ gbii lɛ amli.”—Jajelɔ 12:1.
9. Mɛɛ sɛɛnamɔi obaana mli ŋɔɔmɔ kɛ okai Yehowa yɛ ebalahiiaŋ gbii lɛ amli?
9 Kɛ okai Yehowa yɛ Obalahiiaŋ gbii amli lɛ ehe baaba sɛɛnamɔ diɛŋtsɛ aha bo. Jeee akɛ obaakwa mlifu kɛ awerɛho kɛ tɔlɛ, shi amrɔ nɛɛ po obaafee mɔ ni yɔɔ miishɛɛ, obaana shihilɛ mli ŋɔɔmɔ akɛ mɔ ni miisɔmɔ e-Bɔlɔ Kpeteŋkpele lɛ. Kɛfata he lɛ, belɛ okɛ jwetri miito ŋwɛi, he ni ehe baaba sɛɛnamɔ aha bo yɛ, kɛya naanɔ. (Mateo 6:19-21) Kɛ okai Yehowa bianɛ kɛtsɔ esuɔmɔnaa nifeemɔ nɔ lɛ, lɛ hu abaakai bo ni ewo bo nyɔmɔ ni eha bo “nii ni otsui shweɔ,” hɛɛ, wala ni miishɛɛ yɔɔ mli yɛ Paradeiso kɛmiiya naanɔ!—Lala 37:4; 133:3; Luka 23:43; Kpojiemɔ 21:3, 4.
Te Onuɔ He Ohaa Tɛŋŋ Yɛ Yehowa He?
10. (a) Mɛni hewɔ oyiŋkpɛɛ akɛ ooosɔmɔ Yehowa lɛ nyɛŋ afee nɔ ko ni asusu he jogbaŋŋ yɛ nilee mli shi miishɛɛ bɛ mli? (b) Yehowa miitsɛ kɛmiiha mɛni feemɔ lolo?
10 Ní kɛlɛ oyiŋkpɛɛ akɛ ooosɔmɔ Yehowa lɛ nyɛŋ afee nɔ ko kɛkɛ ni ásusu he ni jwɛŋmɔ yɔɔ mli ni kɛlɛ miishɛɛ hu bɛ mli. Satan ji henyɛlɔ ko ni le ŋaa waa akɛ kɛ oosusu sɛɛnamɔ ni ooona oha okome he lɛ, yɛ naagbee lɛ ebaanyɛ etsɔ pɛsɛmkunya su ko nɔ ni egbala bo kɛjɛ Yehowa sɔɔmɔ he. No hewɔ lɛ Yehowa efɔɔɔ bo nine kɛkɛ koni otsɔ nilelɔ. Dabi, shi moŋ, eefɔ bo nine hu koni ojɔɔ ohe nɔ oha lɛ. Kristo kɛɛ: “Suɔmɔ Yehowa o-Nyɔŋmɔ lɛ kɛ otsui muu lɛ fɛɛ.” (Mateo 22:37, NW) Ani ole nɔ ni etsɔɔ akɛ aaasumɔ Yehowa kɛ tsui muu lɛ fɛɛ lɛ?
11. (a) Ákɛ okɛ otsui aha Yehowa lɛ tsɔɔ mɛni? (b) Yosef niiashikpamɔ lɛ feɔ bɔ ni tsui kanyamɔ kpakpa baawo wɔ hewalɛ ni wɔfee Nyɔŋmɔ suɔmɔnaa nii he mfoniri yɛ mɛɛ gbɛ nɔ?
11 Otsui lɛ damɔ shi kɛha mligbɛ gbɔmɔ lɛ diɛŋtsɛ, okanyanmɔi, esubaŋi kɛ ohenumɔi ni mli kwɔlɔ, kɛ ojwɛŋmɔŋ nyɛmɔi. No hewɔ lɛ ni ooosumɔ Yehowa kɛ otsui muu lɛ fɛɛ lɛ tsɔɔ akɛ obaasumɔ lɛ waa, ni ákɛ fe nɔ fɛɛ nɔ, ni nɔ ni ohala fe fɛɛ eko ji ni oha etsui anya kɛtsɔ hetoo ni okɛaaba lɛ koni ekɛha Satan ahorabɔɔ lɛ nɔ. Nɛkɛ sɛɛyoomɔ yɛ mligbɛ kɛ suɔmɔ henumɔ ni mli kwɔ kɛ Nyɔŋmɔ he susumɔ nɛɛ baakanya bo waa koni ofee esuɔmɔnaa nii, kɛ etamɔ nɔ ni ehi hao moŋ akɛ ooofee nɔ kroko ni tamɔɔɔ enɛ. Yosef obalanyo lɛ yɛ suɔmɔ ni tamɔ nɛkɛ kɛha Yehowa, no hewɔ lɛ be mli ni yoo ko ni yɔɔ gbɛi waa lɛ fɔ lɛ nine akɛ: “Okɛ mi awɔ” lɛ, eha hetoo akɛ: “Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔ hu?”—1 Mose 39:7-9.
12. (a) Mɛɛ gbɛ nɔ otsɔɔ ojieɔ lɛ kpo akɛ okɛ otsui eha Yehowa yɛ? (b) Kɛ okɛ otsui hako Yehowa lɛ, belɛ mɛɛ sanebimɔi esa akɛ osusu he?
12 Kɛ otee Yehowa ŋɔɔ yɛ sɔlemɔ mli ni okɛɛ lɛ akɛ oosumɔ ni otsɔ enɔ̃, ni akɛ Oosumɔ ni osɔmɔ lɛ kɛya naanɔ lɛ, otsɔɔ akɛ osumɔɔ Yehowa kɛ otsui muu Iɛ fɛɛ. Nɛkɛ gbɛ nɔ otsɔɔ ojɔɔ ohe nɔ ohaa Yehowa. Ani ofee enɛ? Kɛ jeee nakai lɛ, mɛni hewɔ? Mɛni tsiɔ bo gbɛ? Ani oda bɔ ni sa ni ooonu ni oyoo sane kpeteŋkpele ni ka Yehowa kɛ Satan teŋ lɛ shishi? Ni ani oosumɔ ni oha Yehowa tsui anya? Eka shi faŋŋ akɛ Satan taooo ni osumɔ Yehowa kɛ otsui muu lɛ fɛɛ. Eesumɔ ni okɛ pɛsɛmkunya “afee bo diɛŋtsɛ onii,” osa bo diɛŋtsɛ ohiɛ. Namɔ obaasumɔ ni oha etsui anya, Yehowa loo Satan? Okɛ hiɛdɔɔ asusu nɛkɛ sane nɛɛ he.
13. Kɛ oji mɔ ni ojɔɔ ohe nɔ ni abaptisi bo lɛ, mɛɛ saji esa akɛ obi bo diɛŋtsɛ ohe?
13 Kɛ ojɔɔ ohe nɔ oha Nyɔŋmɔ ni okɛ nu mli baptisimɔ fee enɛ he Okadi lɛ, ani oshihilɛ gbɛ tsɔɔ akɛ otsui ji Nyɔŋmɔ nɔ̃ diɛŋtsɛ? Nɛgbɛ nibii ni onyaa he, nibii ni osumɔɔ lɛ yɔɔ? Koni ona kar hee? Ona shika ni okɛhe atadei aloo heloo gbɛfaŋ nibii? Namɔ nibii baa klɛŋklɛŋ —bo diɛŋtsɛ onɔ aloo Yehowa nɔ? Ani ohere Yehowa tsɛmɔ akɛ okɛ otsui aha lɛ lɛ nɔ?
14. (a) Mɛɛ hegbɛ ni jara wa waa obalaŋtai yɔɔ? (b) Mɛni hewɔ eji awerɛho sane kɛ obalanyo loo obalayoo ko kaiii e-Bɔlɔ lɛ?
14 Yɛ be mli ni mɛi ni amɛdara lɛ ji mɛi ni yɔɔ niiashikpamɔ babaoo kɛ nilee babaoo lɛ, obalaŋtai hu yɛ nɔ ko ni amɛbaanyɛ amɛkɛtsu nii ni amɛkɛsa Nyɔŋmɔ hiɛ. Biblia lɛ kɛɔ akɛ: “Obalahii anunyam ji amɛhewalɛ.” (Abɛi 20:29) No hewɔ lɛ okɛ ohewalɛ atsu nii bianɛ. Kaimɔ o-Bɔlɔ lɛ “dani gbii fɔji” ni ji gbɔlɛ be “lɛ aba,” yɛ be mli ni gbɔmɔtso lɛ gbɔjɔɔ ni emli nii lɛ fɛɛ kumɔɔ shwieɔ shi ni etsuuu nii jogbaŋŋ dɔŋŋ lɛ. Kwɛ awerɛho ni mɔ ni kaiii e-Bɔlɔ lɛ yɛ ebalahiiaŋ ni yɛ no hewɔ lɛ yɛ egbɔlɛ be mli lɛ ebɛ nɔ ko ni eeedamɔ nɔ ekɛjie ehe shi etsɔɔ Nyɔŋmɔ lɛ baaye! Eji “yakayaka nii amli yakayaka nii!” diɛŋtsɛ. (Jajelɔ 12:1-8) No hewɔ lɛ okɛ nilee akai o-Bɔlɔ lɛ yɛ he mli ni oyɔɔ hewalɛ kɛ nyɛmɔ nɛɛ. Tswaa anɔkwayeli sɔɔmɔ ni Nyɔŋmɔ baanyɛ adamɔ nɔ akai bo yɛ gbɛ kpakpa nɔ yɛ ekojomɔ be mli lɛ oma shi, hɛɛ, koni ona naanɔ wala—Hebribii 6:10-12; Jajelɔ 12: 13, 14.
Amɛha Nyɔŋmɔ Tsui Nya
15. Mɛɛ Biblia mli nɔkwɛmɔ nii yɔɔ ni tsɔɔ obalaŋtai ni kɛ amɛhewalɛ tsu nii yɛ Nyɔŋmɔ sɔɔmɔ mli?
15 Biblia lɛ mli eyi obɔ kɛ obalaŋtai ni kɛ amɛ “hefɛo”—amɛhewalɛ tsu nii yɛ Nyɔŋmɔ sɔɔmɔ mli lɛ ahe nɔkwɛmɔ nii. “Obalahii” ni he yɔɔ oya ni yɔɔ hewalɛ ji mɛi ni yasara Shiwoo Shikpɔŋ lɛ amɛkwa (Yoshua 6:22, 23; 2:15, 16, 23, NW) Beni David diɛŋtsɛ eye kɛjɛ afii 20 kɛyaa lɛ mli ni etsu “obalahii nyɔŋma” koni amɛyatao niyenii ko kɛjɛ Nabal dɛŋ kɛba lɛ. (1 Samuel 25:4, 5) Beni Yudafoi lɛ ni yɔɔ Amralo Nehemia shishi lɛ tswaa Yerusalem gbogboi lɛ ekoŋŋ yɛ be mli ni awo amɛhe gbeyei akɛ abaatutua amɛ lɛ, namɛi tsu nakai nitsumɔ ni wa ni oshara yɔɔ mli lɛ? Nehemia tsɔɔ mli akɛ, “Mibalahii lɛ tsuɔ nii yɛ nitsumɔ lɛ mli, ni fa hiɛɔ akpɔlɔi kɛ tsɛŋi kɛ gaii kɛ damai” (Nehemia 4:16, NW) Ni beni Nyɔŋmɔ tswa Anania kɛ eŋa Safira nɔ̃ ni amɛgboi akɛni amɛmale hewɔ lɛ, “obalahii” lɛ ji mɛi ni hole amɛ ni amɛyafu amɛ—Bɔfɔi lɛ Asaji 5:5, 6, 10.
16. Mɛɛ mumɔŋ nitsumɔi obalaŋtai ni hi shi yɛ blema lɛ kɛ amɛhe wo mli?
16 Yɛ anɔkwale mli lɛ Yehowa tsui nyaa kɛ obalaŋtai kɛ amɛhe ha kɛha nitsumɔ fɛɛ nitsumɔ ni ataoɔ yɛ amɛdɛŋ yɛ be ko mli lɛ. Ni kɛlɛ obalaŋtai kɛ amɛhe ewo mumɔŋ nitsumɔ ni biɔ nɔ ni fe gbɔmɔtsoŋ hewalɛ kɛ nyɛmɔ mli. Elihu kpɛlɛ nɔ akɛ, “Gbekɛ ji mi.” Ni kɛlɛ Yehowa kɛ lɛ tsu ni ekɛjaje Hiob. (Hiob 32:4-6) Beni Samuel je sɔɔmɔ shishi yɛ Yehowa kpeebuu ni yɔɔ Shilo lɛ mli lɛ no mli lɛ “gbekɛ ji lɛ.” (1 Samuel 2:18) “Gbekɛ obalayoo fioo ko” ni eji tsulɔyoo yɛ Naeman shia lɛ ji mɔ ni kɛ ekãa jaje nɔ ni Yehowa gbalɔ lɛ baanyɛ atsu etsɔɔ. (2 Maŋtsɛmɛi 5:2-4) Beni Yehowa kɛ nitsumɔ wo Yeremia dɛŋ akɛ gbalɔ lɛ, Yeremia kɛɛ: “Gbekɛ ji mi.” (Yeremia 1:5, 6) Ni mɛɛ Yehowa tsuji ni ekaaa “gbekɛbii hii ejwɛ”—Daniel kɛ enanemɛi Hebribii etɛ—lɛ ji yɛ Babilon nomŋɔɔ lɛ mli nɛkɛ! (Daniel, yitsei 1 kɛ 3) Paulo nyɛmiyoo bi, “obalanyo” kɛ ekãa tsu nii eha etsɛkwɛ̃ lɛ. (Bɔfoi lɛ Asaji 23:16-22) Agbɛnɛ obalanyo Timoteo yɛ, mɔ ni le ŋmalɛi krɔŋkrɔŋi lɛ kɛjɛ egbekɛbiiashi ni kɛ ehe wo Yehowa sɔɔmɔ mli yɛ ebalahiaŋ gbii lɛ amli lɛ.—2 Timoteo 3:15; Filipibii 2:19-23; 1 Korintobii 4:17.
Nyɔŋmɔ Tsui Ni Wɔɔha Anya Ŋmɛnɛ
17. Mɛni hewɔ esa akɛ wɔkpa gbɛ akɛ wɔbaana obalaŋtai ni miisa Yehowa hiɛ ŋmɛnɛ, ni ani wɔnaa amɛ?
17 Ni jeee blema obalaŋtai lɛ pɛ ha Yehowa tsui nya kɛtsɔ amɛ anɔkwa sɔɔmɔ nɔ. Nyɔŋmɔ kɛɔ akɛ, “Ni aaaba mli yɛ naagbee gbii lɛ anɔ, akɛ mafɔse mimumɔ lɛ eko mashwie heloo fɛɛ nɔ, ni nyɛbihii kɛ nyɛbiyei lɛ aaagba, ni nyɛbalahii lɛ aaana ninaai.” (Bɔfoi lɛ Asaji 2:17; Yoel 3:1) No hewɔ lɛ esa akɛ wɔkpa gbɛ yɛ gbɛ ni ja nɔ akɛ wɔbaana obalaŋtai Kristofoi babaoo yɛ nɛkɛ naagbee gbii nɛɛ amli ni miisa Yehowa hiɛ. Ní wɔnaa amɛ hu! Yɛ be mli ni Odasefoi obalaŋtai jeee mɛi ni tɔɔɔ taakɛ bɔ ni wɔ hu wɔjeee mɛi ni tɔɔɔ lɛ, amɛteŋ mɛi pii bɔɔ mɔdɛŋ jogbaŋŋ akɛ Kristofoi. Nɔ ni amɛsusuɔ he ji ni amɛha Yehowa tsui anya.—Abɛi 27:11; 3:1, 2.
18, 19. Mɛɛ nitsumɔ ehe hiaa ni atsu ŋmɛnɛ, ni mɛni hewɔ obalaŋtai ji mɛi ni baanya atsu enɛ jogbaŋŋ lɛ?
18 Yehowa suɔmɔnaa nii yɛ nɛkɛ naagbee gbii nɛɛ amli ji ni aye e-Maŋtsɛyeli lɛ he odase wulu yɛ je muu fɛɛ, ni enɛ biɔ mɔdɛŋbɔɔ babaoo diɛŋtsɛ. (Mateo 24:14) Esa akɛ amamɔ Maŋtsɛyeli Asai kɛha jamɔ, kɛ agbɛnɛ hu tsui ni dara kɛha kpokpaa nɔ kpeei. Maji pii yɛ ni aatao tsũi ni dara koni akɛkala Biblia kasemɔ he woji kɛ agbɛnɛ shihilɛ hé tsũi yɛ Betel shiai amli. Nɛkɛ tsũi amaamɔ nɛɛ biɔ tsumaa he nitsumɔ babaoo, ni taakɛ eji yɛ be mli ni atswa gbogbo lɛ yɛ Nehemia gbii lɛ amli lɛ, obalaŋtai ni yɔɔ hewalɛ kɛ nyɛmɔ hu miitsu nitsumɔi nɛɛ titri yɛ ŋmɛnɛ.
19 Nɛkɛ obalaŋtai nɛɛ hu ji mɛi ni tsuɔ nitsumɔ ni biɔ gbɔmɔtsoŋ hewalɛ ni akɛkalaa, akɛfeɔ ni akɛ Biblia kasemɔ he woji tɔn akpei abɔ majeɔ kɛyaa maŋsɛɛ daa afi lɛ. Yɛ anɔkwale mli lɛ, yɛ Yehowa Odasefoi anitsumɔ he lɛ yitso ni yɔɔ New York lɛ, kɛ agbɛnɛ Watchtower Farms lɛ amli lɛ, obalaŋtai ni amɛyɛ afii 25 kɛ mɛi ni shɛko nakai fe 1,400 yɔɔ jɛmɛ ni miisɔmɔ. Ní amɛsɔɔmɔ lɛ jeee nɔ ni akɛ gbɔmɔtsoŋ hewalɛ pɛ feɔ yɛ otsi lɛ mli; kɛ eshɛ otsii lɛ anaagbee lɛ amɛkɛ amɛhe woɔ shia kɛ shia shiɛmɔ nitsumɔ lɛ mli kɛ agbɛnɛ Kristofoi asafoŋ kpeei amli kɛ asafoi sɔrɔtoi. Kwɛ bɔ ni amɛhaa Yehowa tsui nyaa!
20. (a) Mɛɛ gbɛfaŋnɔ obalaŋtai naa yɛ gbɛgbamɔ sɔɔmɔ lɛ mli? (b) Mɛɛ saji esa akɛ obalaŋtai ni bɛ be-fɛɛ sɔɔmɔ lɛ mli lɛ abi amɛ diɛŋtsɛ amɛhe?
20 Yɛ U.S. Amerika lɛ, mɛi ni kɛ nɛkɛ obalaŋtai nɛɛ tsuɔ nii kɔŋ kɛ kɔŋ ji mɛi krokomɛi ni amɛ hu amɛ afii tamɔ nakai ni amɛyifalɛ fe 12,700 ni miisɔmɔ akɛ daa gbɛgbalɔi sɔɔlɔi. Obalaŋtai akpei nyɔŋma-nyɔŋmai abɔ krokomɛi hu miisɔmɔ yɛ je lɛŋ hei krokomɛi akɛ gbɛgbalɔi. Kɛ oji obalanyo ni obɛ be-fɛɛ sɔɔmɔ lɛ mli lɛ, ani okɛ otii komɛi ni baaha okɛ Yehowa aye klɛŋklɛŋ gbɛhe yɛ oshihilɛ mli baamamɔ ohiɛ, fe ni ooobɔ mɔdɛŋ kɛkɛ akɛ ooona nitsumɔ ni awoɔ mɔ nyɔmɔ babaoo yɛ mli, ni obote gbalashihilɛ mli ni ofɔ bii? Ani onuɔ je muu fɛɛ sane ni ka shi lɛ shishi? Ani oosumɔ lɛlɛŋ ni ona akɛ ajie ahorabɔɔ ni akɛba wɔ Bɔlɔ kpeteŋkpele lɛ gbɛi nɔ lɛ fɛɛ kɛtee? Kɛji nakai ni lɛ, ani ejeee nɔ ni hi akɛ ooofee nɔ fɛɛ nɔ ni ooonyɛ yɛ Yehowa sɔɔmɔ mli? Ni nɔ ni fata enɛ he jeee akɛ kɛ hoo lɛ nyɛteŋ mɛi pii ni nyɛkɛ nyɛhe aaaha ni nyɛsɔmɔ yɛ Betel shiai amli aloo ni nyɛkɛ nyɛhe awo gbɛgbamɔ sɔɔmɔ lɛ mli?
21. (a) Mɛɛ tsɛmɔ ni jɛ Yehowa ŋɔɔ esa akɛ ohere nɔ, ni yɛ mɛɛ gbɛ nɔ? (b) Mɛni hewɔ wɔbaanyɛ wɔna hekɛnɔfɔɔ akɛ obalaŋtai pii baahere Yehowa tsɛmɔ loo ninefɔɔ lɛ nɔ taakɛ Yesaia fee lɛ?
21 Bo toi! Yehowa miifɔ bo nine, hɛɛ, eetsɛ bo, ni okɛ sane aha lɛ koni ekɛha Satan ahorabɔɔ fɔŋ lɛ hetoo. Ani obaanyɛ ofee tamɔ Yesaia, ni miinu ni Yehowa miibi akɛ: “Namɔ matsu, ni namɔ baaya aha wɔ?” Mɛni hewɔ ofeee nilelɔ ni oha hetoo taakɛ Yesaia fee lɛ: “Naa mi! tsu mi.” (Yesaia 6:8, NW) Wɔye hekɛnɔfɔɔ akɛ nyɛ obalaŋtai lɛ ateŋ mɛi pii baahere nɔ, ejaakɛ Nyɔŋmɔ Wiemɔ lɛ woɔ shi akɛ: “Omaŋ lɛ aaaba yɛ ota gbi lɛ nɔ yɛ amɛsuɔmɔ naa. . . . Obalahii [obalayei] asafo lɛ baa tamɔ bɔ jɛɔ jetsɛremɔ musuŋ lɛ.” (Lala 110:3; 148:12, 13) Ni kɛ ohere nɔ lɛ, Obaana miishɛɛ yɛ le ni ooole akɛ Yehowa naa bo ni ekpɛlɛɔ onɔ—akɛ oha etsui miinya!a
[Shishigbɛ niŋmai]
a Ajie kɛjɛ August 1, 1986 Watchtower lɛ mli.
Emlitii
◻ Mɛni hewɔ gbɛ ni wɔtsɔɔ nɔ wɔhiɔ shi lɛ he hiaa Yehowa Iɛ?
◻ Mɛni hewɔ nilee yɔɔ mli akɛ wɔɔha Yehowa tsui anya lɛ?
◻ Te wɔɔfee tamɔ wɔtsɔɔ akɛ wɔkɛ wɔtsui eha Yehowa?
◻ Namɛi ha Yehowa tsui nya yɛ blema, ni yɛ mɛɛ gbɛ nɔ?
◻ Namɔi haa Yehowa tsui nyaa ŋmɛnɛ lɛ, ni yɛ mɛɛ gbɛ nɔ?
[Wiemɔ ni akɔ ni akɛmiitsu nii ni yɔɔ baafa 27]
Kɛ obalaŋtai kumɔ Nyɔŋmɔ mlai amli lɛ, nɔ ni jɛɔ mii baa yɛ sɛɛ mli lɛ feɔ nɔ ni jooɔ diɛŋtsɛ kɛhaa amɛ
[Mfoniri ni yɔɔ baafa 28]
Obalaŋtai ha Nyɔŋmɔ tsui nya yɛ be mli ni amɛye amɛbua ni atswa Yerusalem gbogboi lɛ ekoŋŋ Iɛ
[Baafa 31]February Daa Gbi Ŋmalɛ
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)