Kaimɔ O-bɔlɔ Kpeteŋkpele Lɛ!
“Kaimɔ o-Bɔlɔ Kpeteŋkpele lɛ bianɛ . . . dani gbii fɔji lɛ aba.”—JAJELƆ 12:1, NW.
1. Te esa akɛ oblahii kɛ oblayei ni amɛjɔɔ amɛhe nɔ amɛha Nyɔŋmɔ lɛ asumɔ ni amɛkɛ amɛblahiiaŋ kɛ amɛblayeiaŋ hewalɛ lɛ atsu nii amɛha tɛŋŋ?
YEHOWA kɛ hewalɛ haa etsuji koni amɛfee esuɔmɔnaa nii. (Yesaia 40:28-31) Enɛ ji anɔkwale ni afii abɔ ni amɛye lɛ kɔɔɔ he eko. Shi, esa akɛ oblahii kɛ oblayei ni amɛjɔɔ amɛhe nɔ amɛha Nyɔŋmɔ lɛ asumɔ waa akɛ amɛkɛ amɛblahiiaŋ kɛ amɛblayeiaŋ hewalɛ lɛ aaatsu nii yɛ gbɛ ni nilee yɔɔ mli nɔ. No hewɔ lɛ, amɛkɛ “jajelɔ lɛ” ni ji blema Israel Maŋtsɛ Salomo ŋaawoo lɛ toɔ amɛtsui mli. Ewo hewalɛ akɛ: “Asaŋ kaimɔ obɔlɔ lɛ yɛ oblahiiaŋ gbii lɛ amli, be mli ni gbii fɔji lɛ náko aba, ni afii ní obaakɛɛ yɛ amɛhe akɛ: ‘Minaaa amɛhe miishɛɛ’ lɛ, náko ashɛ lɛ.’ ”—Jajelɔ 1:1; 12:1.
2. Mɛni esa akɛ Kristofoi ni amɛjɔɔ amɛhe nɔ lɛ abii afee?
2 Klɛŋklɛŋ lɛ, akɛ Salomo ŋaawoo ni kɔɔ Bɔlɔ Kpeteŋkpele lɛ kaimɔ yɛ oblahiiaŋ kɛ oblayeiaŋ gbii lɛ amli lɛ he lɛ ha Israel oblahii kɛ oblayei. Afɔ́ amɛ awo maŋ ni ejɔɔ ehe nɔ eha Yehowa lɛ mli. Ni Kristofoi ni amɛjɔɔ amɛhe nɔ ŋmɛnɛ lɛ abii lɛ hu? Yɛ anɔkwale mli lɛ, esa akɛ amɛha amɛ-Bɔlɔ Kpeteŋkpele lɛ ahi amɛjwɛŋmɔ mli. Kɛji akɛ amɛfee nakai lɛ, amɛkɛ woo baaha lɛ ni ehe aaaba sɛɛnamɔ kɛha amɛ.—Yesaia 48:17, 18.
Nɔkwɛmɔnii Kpakpai ni Jɛ Blema
3. Mɛɛ nɔkwɛmɔnii Yosef, Samuel, kɛ David fee?
3 Oblahii kɛ oblayei pii ni aŋmala amɛhe saji yɛ Biblia lɛ mli lɛ to okadi kpakpa akɛ mɛi ni kai amɛ-Bɔlɔ Kpeteŋkpele lɛ. Yakob binuu Yosef jɛ egbekɛbiiashi tɔ̃ɔ ekai e-Bɔlɔ lɛ. Beni Potifar ŋa lɛ ka Yosef koni ekɛ ehe awo bɔlɛnamɔ jeŋba shara mli lɛ, ekɛ shiŋŋfeemɔ kpoo ni ekɛɛ akɛ: “Te aaafee tɛŋŋ ni mafee efɔŋ kpeteŋkpele ni tamɔ nɛkɛ nɛɛ, ni mafee esha mashi Nyɔŋmɔŋ?” (1 Mose 39:9) Jeee akɛ Levinyo Samuel kai e-Bɔlɔ lɛ yɛ egbekɛbiiashi kɛkɛ, shi yɛ eshihilɛ be fɛɛ mli. (1 Samuel 1:22-28; 2:18; 3:1-5) David, oblanyo fioo ni jɛ Betlehem lɛ ha e-Bɔlɔ lɛ hi ejwɛŋmɔ mli. Ehekɛnɔfɔɔ ni eyɔɔ yɛ Nyɔŋmɔ mli lɛ je kpo beni ekɛ Filistinyo oblaŋ Goliat kpe ni ejaje akɛ: “Bo lɛ ooba miŋɔɔ kɛ klante kɛ akpɔlɔ kɛ tsɛŋ; shi mi lɛ miiba oŋɔɔ yɛ Yehowa Zebaot ni ji Israel tai ni obɔɔ amɛ ahora lɛ a-Nyɔŋmɔ lɛ gbɛi amli! Ŋmɛnɛ gbi nɛɛ Yehowa aaajieo awo midɛŋ, ni magbeo, ni mafo oyi, . . . koni shikpɔŋ muu lɛ fɛɛ ana ale akɛ Nyɔŋmɔ ko yɛ Israel, ni asafo ni ekpe nɛɛ fɛɛ aaaná ale akɛ jeee klante loo akpɔlɔ Yehowa kɛhereɔ mɔ yiwala; ejaakɛ Yehowa nɔ̃ ji ta lɛ, ni eeeŋɔ nyɛ ewo wɔdɛŋ!” Etsɛɛɛ ni Goliat gbo, ni Filistibii lɛ jo foi.—1 Samuel 17:45-51.
4. (a) Mɛni tsɔɔ akɛ Israel gbekɛ yoo fioo ni yɔɔ nomŋɔɔ mli yɛ Aram lɛ kɛ Maŋtsɛ Yosia oblanyo fioo lɛ kai wɔ-Bɔlɔ Kpeteŋkpele lɛ? (b) Te fee tɛŋŋ ni Yesu ni eye afii 12 lɛ tsɔɔ akɛ ekai e-Bɔlɔ lɛ?
4 Oblayoo fioo ko hu ní kai e-Bɔlɔ Kpeteŋkpele lɛ ji Israel gbekɛ yoo ni aŋɔ lɛ nom lɛ. Eye Aram asafoiatsɛ nukpa Naeman odase fɛfɛo ko, ni no ha etee Nyɔŋmɔ gbalɔ lɛ ŋɔɔ, ni atsá ekpiti lɛ aha lɛ, ni ebatsɔ Yehowa jálɔ. (2 Maŋtsɛmɛi 5:1-19) Maŋtsɛ Yosia, oblanyo fioo lɛ hu kɛ ekãa ha Yehowa jamɔ krɔŋŋ shwere. (2 Maŋtsɛmɛi 22:1–23:25) Shi nɔkwɛmɔnɔ ni hi fe fɛɛ ni tsɔɔ mɔ ni kai e-Bɔlɔ Kpeteŋkpele lɛ beni eji gbekɛ lolo ji Yesu ni jɛ Nazaret lɛ. Susumɔ nɔ ni ba beni eye afii 12 lɛ he okwɛ. Efɔlɔi kɛ lɛ tee Yerusalem koni amɛyaye Hehoo lɛ. Beni amɛkuɔ amɛsɛɛ lɛ, amɛyoo akɛ Yesu elaaje; no hewɔ lɛ amɛku amɛsɛɛ koni amɛyatao lɛ. Enɔ gbii etɛ lɛ, amɛna lɛ ni ekɛ tsɔɔlɔi miisusu Ŋmalɛ mli sanebimɔi ahe yɛ sɔlemɔwe lɛ. Beni ehaa enyɛ ni ehao lɛ sanebimɔ lɛ hetoo lɛ, Yesu bi lɛ akɛ: “Mɛɛba ni nyɛtaoɔ mi? Ani nyɛleee akɛ esa mi akɛ mihiɔ shi yɛ nii ni ji mitsɛ nɔ̃ lɛ mli?” (Luka 2:49) Sɛɛnamɔ yɛ he kɛha Yesu akɛ enine aaashɛ mumɔŋ saji ni jara wa nɔ yɛ sɔlemɔwe lɛ, ni ji ‘e-Tsɛ we lɛ.’ Ŋmɛnɛ, Yehowa Odasefoi a-Maŋtsɛyeli Asa lɛ ji he ni hi fe fɛɛ ni akɛaaná wɔ-Bɔlɔ Kpeteŋkpele lɛ he anɔkwale nilee.
Kaimɔ Yehowa Bianɛ!
5. Te obaatsɔɔ nɔ ni jajelɔ lɛ kɛɛ taakɛ aŋma afɔ̃ shi yɛ Jajelɔ 12:1 lɛ mli yɛ bo diɛŋtsɛ owiemɔi amli oha tɛŋŋ?
5 Yehowa jálɔ ni jɛɔ etsui muu fɛɛ mli lɛ miisumɔ ni ekɛ ehe awo E-sɔɔmɔ mli amrɔ nɔŋŋ bɔ ni eeenyɛ, koni esɔmɔ Nyɔŋmɔ yɛ ewala be ni eshwɛ lɛ fɛɛ mli. Shi kɛlɛ, mɛɛ gbɛkpamɔi jwere mɔ ni fiteɔ eblahiiaŋ loo eblayeiaŋ yakatswaa akɛni ekaiii Bɔlɔ lɛ hewɔ lɛ hiɛ? Jajelɔ lɛ wie yɛ mumɔ lɛ kanyamɔ naa akɛ: “Asaŋ kaimɔ obɔlɔ lɛ yɛ oblahiiaŋ gbii lɛ amli, be mli ni gbii fɔji lɛ náko aba, ni afii ní obaakɛɛ yɛ amɛhe akɛ: ‘Mináaa amɛhe miishɛɛ’ lɛ, náko ashɛ lɛ.”—Jajelɔ 12:1.
6. Mɛɛ odaseyeli yɔɔ ni tsɔɔ akɛ Simeon kɛ Hana ní amɛ́gbɔlɔ lɛ kai amɛ-Bɔlɔ Kpeteŋkpele lɛ?
6 Mɔ ko mɔ ko nyaaa gbɔlɛ be mli “gbii fɔji” lɛ ahe. Shi mɛi ni egbɔlɔ ní haa Nyɔŋmɔ hiɔ amɛjwɛŋmɔ mli lɛ yɛ miishɛɛ. Ákɛ nɔkwɛmɔnɔ lɛ, Simeon ni egbɔ lɛ hé Yesu efɔ̃ ekpɔkɔiaŋ yɛ sɔlemɔwe lɛ ni ekɛ miishɛɛ jaje akɛ: “Agbɛnɛ ha otsulɔ aya, Owura, yɛ owiemɔ lɛ naa, yɛ hejɔlɛ mli; ejaakɛ mihiŋmɛii ena owalaheremɔ lɛ, nɔ ni osaa oma maji fɛɛ ahiɛ lɛ, la ni aaatɛje jeŋmaji lɛ ahiɛ ni eeewo omaŋ Israel hiɛ nyam lɛ.” (Luka 2:25-32) Hana ni eye afii 84 lɛ hu kai e-Bɔlɔ lɛ. Ehiɔ sɔlemɔwe lɛ be fɛɛ be, ni eyɛ jɛmɛ ni akɛ abifao Yesu ba. “Eba yɛ nakai ŋmɛlɛtswaa lɛ mli nɔŋŋ, ni ebajie Nyɔŋmɔ yi, ni ewie yɛ ehewɔ etsɔɔ mɛi fɛɛ ni kwɛɔ Yerusalem kpɔmɔ lɛ gbɛ lɛ.”—Luka 2:36-38.
7. Mɛɛ shihilɛ mɛi ni egbɔlɔ yɛ Nyɔŋmɔ sɔɔmɔ mli lɛ yɔɔ mli?
7 Ŋmɛnɛŋmɛnɛ beaŋ Yehowa Odasefoi ni amɛgbɔlɔ yɛ Nyɔŋmɔ sɔɔmɔ mli lɛ baanyɛ aná afii ni etee hiɛ lɛ amli piŋmɔi kɛ fatɔɔi amli amanehulu. Ni kɛlɛ, kwɛ miishɛɛ ni amɛyɔɔ, kɛ bɔ ni wɔhiɛ sɔɔ amɛ anɔkwa sɔɔmɔ lɛ wɔhaa! Amɛyɛ “Yehowa he nyamɔ” lɛ, ejaakɛ amɛle akɛ eŋɔ ehewalɛ kpele ni anyɛɛɛ nɔ kunim aye lɛ yɛ shikpɔŋ nɛɛ he nitsumɔ hewɔ, ni éwo Yesu Kristo akɛ ŋwɛi Maŋtsɛ ni yɔɔ hewalɛ. (Nehemia 8:10) Be ni esa akɛ oblahii kɛ oblayei kɛ onukpai fɛɛ abo kɔkɔbɔɔ wiemɔ ni ji: “Oblahii kɛ oblayei hu, onukpai kɛ gbekɛbii bluublu: Ha amɛjie Yehowa gbɛi lɛ yi; ejaakɛ ekome too egbɛi kwɔ gojoo, enunyam lɛ teke shikpɔŋ kɛ ŋwɛi fɛɛ” lɛ toi lɛ nɛ.—Lala 148:12, 13.
8, 9. (a) Namɛi “gbii fɔji” lɛ ahe baaa sɛɛnamɔ kɛhaaa amɛ lɛ, ni mɛni hewɔ nakai pɛ sane lɛ ji lɛ? (b) Te obaatsɔɔ Jajelɔ 12:2 mli oha tɛŋŋ?
8 Nyɔmɔwoo ko bɛ gbɔlɛ be mli “gbii fɔji” lɛ amli—ekolɛ haomɔ babaoo moŋ—kɛha mɛi ni susuuu amɛ-Bɔlɔ Kpeteŋkpele lɛ he, ní amɛbɛ enunyam yiŋtoi lɛ ahe shishinumɔ ko kwraa lɛ. Amɛbɛ mumɔŋ shishinumɔ ni baaha amɛnyɛ amɛdamɔ gbɔlɛ be mli kaai kɛ amanehului ni eba adesai anɔ kɛjɛ be mli ni ashwie Satan kɛjɛ ŋwɛi lɛ anaa. (Kpojiemɔ 12:7-12) No hewɔ lɛ, jajelɔ lɛ woɔ wɔ hewalɛ ni wɔkai wɔ-Bɔlɔ lɛ yɛ “be mli ni hulu kɛ la kɛ nyɔɔŋtsere kɛ ŋulamii woko duŋ, ni atatui kuɔ amɛsɛɛ amɛbaa ekoŋŋ yɛ nugbɔnɛmɔ sɛɛ lɛ.” (Jajelɔ 12:2) Mɛni nɛkɛ wiemɔi nɛɛ tsɔɔ?
9 Salomo kɛ oblahiiaŋ kɛ oblayeiaŋ gbii lɛ toɔ Palestina latsaa be, beni hulu, nyɔɔŋtsere, kɛ ŋulamii kpɛ́ɔ amɛla kɛjɛɔ ŋwɛi ni atatui bɛ mli lɛ he. No mli lɛ gbɛkpamɔ kpakpa yɛ. Shi yɛ gbɔlɛ be mli lɛ, gbɔmɔ gbii tamɔ nugbɔnɛmɔ be ni woɔ fɛ̃i ni haa jeŋ jɔɔ ŋanii, ní haomɔ kome nyiɛɔ ekroko sɛɛ kɛbaa lɛ. (Hiob 14:1) Kwɛ awerɛho sane ni eeefee akɛ aaale Bɔlɔ lɛ shi asɔmɔɔɔ lɛ yɛ wala shihilɛ latsaa be lɛ mli! Yɛ wala shihilɛ gbɔlɛ fɛ̃i be lɛ mli lɛ, nibii woɔ duŋ, titri lɛ kɛhaa mɛi ni eŋmɛɛ hegbɛi ni amɛkɛaasɔmɔ Yehowa yɛ amɛblahiiaŋ kɛ amɛblayeiaŋ lɛ he, yɛ amɛhe ni amɛkɛwo yaka nibii asɛɛdii mli lɛ hewɔ lɛ. Shi kɛlɛ, yɛ afii abɔ ni wɔye lɛ fɛɛ sɛɛ lɛ, nyɛhaa ‘wɔnyiɛa Yehowa sɛɛ kɛwula shi,’ taakɛ anɔkwafo Kaleb, gbalɔ Mose hefatalɔ anɔkwayelɔ lɛ fee lɛ.—Yoshua 14:6-9.
Nɔ ni Jɛɔ Gbɔlɛ Afii Amli Baa
10. Mɛni wiemɔi nɛɛ damɔ shi kɛha (a) “shia bulɔi”? (b) “hii hewalɔi”?
10 No sɛɛ lɛ Salomo tsɔɔ naagbai ni baa yɛ “gbi nɔ ni shia bulɔi lɛ ahe aaakpokpo, ni hii hewalɔi lɛ aaakotokotoo shi, ni wiɛlɔi lɛ aaafɔɔ yɛ amɛyi ni faaa [lɛ] hewɔ, ni mɛi ni kwɛɔ samfɛji amli lɛ ahiɛ aaawo duŋ” lɛ. (Jajelɔ 12:3) “Shia” lɛ tsɔɔ gbɔmɔtso lɛ. (Mateo 12:43-45; 2 Korintobii 5:1-8) ‘Ebulɔi’ lɛ ji niji ni buɔ gbɔmɔtso lɛ he ni ehaa lɛ nibii ni he hiaa lɛ lɛ. Yɛ gbɔlɛ be mli lɛ amɛhe fɔɔ kpokpomɔ kɛ gbɔjɔmɔ, fãji amli gbɔjɔmɔ, kɛ kuumɔ hela. “Hii hewalɔi”—ni ji naji lɛ—jeee akulashiŋi ni yɔɔ hewalɛ dɔŋŋ shi amɛmli egbɔjɔ ni amɛ́dɔrɔ, no hewɔ lɛ agbalaa naji lɛ ashi kɛkɛ. Ni kɛlɛ, ani efeee bo miishɛɛ akɛ ooona nanemɛi heyelilɔi ní amɛgbɔlɔ yɛ Kristofoi akpeei ashishi?
11. Kɛ aawie yɛ mfonirifeemɔŋ lɛ, namɛi ji ‘yei wiɛlɔi’ lɛ kɛ ‘yei ni kwɛɔ samfɛji amli lɛ’?
11 ‘Yei wiɛlɔi lɛ efɔ̃ɔ yɛ amɛyi ni faaa hewɔ’—shi yɛ mɛɛ gbɛ nɔ? Ekolɛ nyanyɔji lɛ efite loo efamɔ, ni fioo komɛi yɔɔ kɛ eko eshwɛ po. Niyenii ni wa lɛ taa wa aloo akpaa kwraa. Yei “ni kwɛɔ samfɛji amli”—hiŋmɛii kɛ jwɛŋmɔŋ nyɛmɔi ni wɔtsɔɔ nɔ wɔnaa nii lɛ—enɔ feɔ kusuu, kɛ jeee duŋ kwraa po ewoɔ.
12. (a) Te ebaa lɛ tɛŋŋ ni ‘aŋamɔɔ blohuiaŋ shinaai lɛ’? (b) Te osusuɔ Maŋtsɛyeli jajelɔi ni amɛgbɔlɔ lɛ ahe ohaa tɛŋŋ?
12 Jajelɔ lɛ tee nɔ akɛ, “ni aaaŋamɔ blohuiaŋ shinaai lɛ, ni wiɛmɔ gbɛɛmɔ naa aaaba shi, ni loofɔlɔ gbee aaaha ate shi, ni yei lalɔi lɛ fɛɛ aaaba shi lɛ.” (Jajelɔ 12:4) Daaŋ shinaai enyɔ lɛ—naabui lɛ—gbeleee jogbaŋŋ dɔŋŋ aloo egbeleee kwraa koni ekɛtsɔɔ nɔ ni yɔɔ mɛi ni egbɔlɔ ní sɔmɔɔɔ Nyɔŋmɔ lɛ “shia” loo gbɔmɔtso lɛ mli. Akɛ nɔ ko nɔ ko eyaaa maŋ shihilɛ mli “blohuiaŋ” dɔŋŋ. Ni kɛlɛ, Maŋtsɛyeli jajelɔi ni yɔɔ ekãa ni amɛgbɔlɔ lɛ hu? (Hiob 41:14) Ekolɛ amɛbaanyiɛ blɛoo kɛjɛ shia kɛya shia ni mɛi komɛi kɛ tɔlɛ baawie, shi amɛjieɔ Yah yi kɛ̃!—Lala 113:1.
13. Te jajelɔ lɛ tsɔɔ mɛi ni amɛgbɔlɔ lɛ anaagbai krokomɛi amli eha tɛŋŋ, shi mɛni ji anɔkwale yɛ Kristofoi ni egbɔlɔ lɛ ahe?
13 Wiɛ tsɔne gbɛɛmɔ baa shi beni akɛ tɛŋloo ni nyanyɔji bɛ mli taa niyenii lɛ. Nuumo wɔɔɔ jogbaŋŋ yɛ esaa nɔ. Loofɔlɔ bolɔmɔ po gbáa enaa. Lalai fioo komɛi pɛ eláa, ni hewalɛ bɛ elala lɛ hu mli. “Yei lalɔi lɛ fɛɛ”—alalai ni amɛlaa lɛ—‘baa shi.’ Mɛi krokomɛi alala kɛ saŋku gbee ni mɛi ni egbɔlɔ lɛ nuɔ lɛ eŋɔɔɔ. Shi kɛlɛ, mɛi ni amɛgbɔlɔ ni afɔ amɛ mu lɛ kɛ amɛnanemɛi, ni amɛteŋ mɛi komɛi jeee oblahii kɛ oblayei tsɔ̃ lɛ yaa nɔ amɛholeɔ amɛgbeei anɔ yɛ yijiemɔ lalai amli amɛhaa Nyɔŋmɔ yɛ Kristofoi akpeei ashishi. Kwɛ miishɛɛ ni wɔná akɛ wɔyɛ mɛnɛɛmɛi yɛ wɔmasɛi, ni amɛjieɔ Yehowa yi yɛ asafo lɛ mli!—Lala 149:1.
14. Mɛɛ gbeyeishemɔi haoɔ mɛi ni egbɔlɔ lɛ?
14 Kwɛ awerɛho shihilɛ ni mɛi ni egbɔlɔ lɛ yɔɔ mli, titri lɛ mɛi ni ku amɛhiɛ amɛshwie Bɔlɔ lɛ nɔ lɛ! Jajelɔ lɛ kɛɛ akɛ: “Asaŋ asheɔ nii ni kwɔlɔ agbeyei, ni gbeyei nii sɔŋŋ yɔɔ gbɛ lɛ nɔ, ni ŋmeitso aaagba afoforo, ni agã aaanyiɛ shɔ̃ɔ, ni tsinebaa sɛɛ aaafo: ejaakɛ gbɔmɔ miiya enaanɔ shia lɛ, ni yarafeelɔi miifo shi yɛ blohuiaŋ.” (Jajelɔ 12:5) Mɛi ni amɛ afii etee hiɛ lɛ ateŋ mɛi pii sheɔ gbeyei akɛ amɛaagbee shi kɛjɛ atrakwei ni kwɔlɔ lɛ anɔ. Nɔ ko ni yɔɔ ŋwɛi shɔŋŋ ni amɛkwɛɔ lɛ po baanyɛ aha amɛhiɛ adĩ amɛ. Amɛsheɔ gbɛjegbɛi anɔ ni amɛaaya ni gbɔmɛi pii yɔɔ nɔ lɛ agbeyei akɛni amɛsusuɔ akɛ amɛbaapila loo julɔi aaatutua amɛ lɛ hewɔ.
15. Te ebaa lɛ tɛŋŋ ni ‘ŋmeitso gbaa afoforo,’ ni te ‘agã nyiɛɔ shɔɔ’ ehaa tɛŋŋ?
15 “Ŋmeitso aaagba afoforo” yɛ nuumo gbɛfaŋ, ni eyɛ faŋŋ akɛ enɛ tsɔɔ akɛ eeje waŋ, kɛkɛ lɛ etsɔ futaa tamɔ snoo. Yitsɔi ni etsɔ waŋ lɛ shwieɔ shi tamɔ ŋmeitso ni egba afoforo yɛŋ feɔ lɛ. Beni ‘enyiɛɔ blɛoo kɛyaa’ ni ekolɛ edɔ ni eniji jwere ehe loo ekɛ eniji emamɔ ehɛ ni ekɛmiijɔɔ ehe kɛ enakutsei ni bɛ fɛo ni eje kpo lɛ haa etamɔɔ agã. Shi kɛji wɔteŋ mɔ ko tamɔ nakai fioo lɛ, ha mɛi krokomɛi akadi akɛ wɔyɛ Yehowa baalabii asafo ni yɔɔ hewalɛ, ni he yɔɔ oya lɛ ateŋ!—Kwɛmɔ Buu-Mɔɔ, May 1, 1998, baafai 8-13 lɛ.
16. (a) ‘Tsinebaa ni sɛɛ foɔ’ lɛ tsɔɔ mɛni? (b) Mɛni ji gbɔmɔ ‘naanɔ shia’ lɛ, ni mɛɛ okadii ni tsɔɔ gbele ni baa anaa faŋŋ?
16 Mɔ ni egbɔ lɛ tsinebaa nii naa baa shi, kɛji akɛ niyenii ni ma ehiɛ lɛ ŋɔɔ tamɔ taami lɛ po. Jeeŋmɔ beebe ajɛ akɛ aduawai ni tamɔ taamii nɛɛ tsu nii koni akɛtee akɔnɔ shi. ‘Tsinebaa ni sɛɛ foɔ’ lɛ tsɔɔ akɛ kɛji akɛ nuumo tsinebaa nii ba shi lɛ, nɛkɛ aduawa nɛɛ po nyɛɛɛ atee ekɔnɔ shi kɛha niyenii. Nɛkɛ nibii nɛɛ tsɔɔ akɛ eebɛŋkɛ “enaanɔ shia lɛ,” ni ji gbonyobu lɛ. Ebaafee eshia kɛya naanɔ kɛji akɛ ekaiii e-Bɔlɔ lɛ, ní edi gbɛ fɔŋ sɛɛ bɔ ni Nyɔŋmɔ kaiŋ lɛ yɛ gbohiiashitee lɛ mli lɛ. Gbele ni baa he okadii jeɔ kpo kɛjɛɔ ŋkɔmɔyeli gbeei kɛ kɛ̃ɛmɔ he wiemɔi ni jeɔ kpo kɛjɛɔ mɔ ni egbɔ lɛ daaŋ shinaai lɛ amli lɛ mli.
17. Mɛɛ gbɛ nɔ atsɔɔ ajieɔ “jwiɛtɛi kpãa lɛ,” ni “shika tɔ lɛ” baanyɛ adamɔ shi aha mɛni?
17 Awoɔ wɔ hewalɛ ni wɔkai wɔ-Bɔlɔ lɛ “be mli ni jwiɛtɛi kpãa lɛ nako atse, ni shika tɔ lɛ fɛko, ni gbɛ́ lɛ ejwako yɛ faa lɛ naa, ni nubu lɛ he koklolonto lɛ ekuko” lɛ. (Jajelɔ 12:6) “Jwiɛtɛi kpãa” lɛ baanyɛ afee mliteŋ wu lɛ. Gbele baa kɛ̃ yɛ be mli ni afite nɛkɛ gbɛ ni yɔɔ naakpɛɛ ni atsɔɔ nɔ akɛ henumɔŋ kanyamɔi haa ansɔ lɛ kwraa lɛ. “Shika tɔ” lɛ baanyɛ afee ansɔ lɛ, ni yɔɔ yitsoŋoŋo ni tamɔ tɔ, ni akɛtsa mliteŋ wu lɛ mli lɛ. Ejara wa tamɔ shika, ejaakɛ kɛ ansɔ lɛ kpa nitsumɔ lɛ, nɔ ni jɛɔ mli baa ji gbele.
18. Mɛni ji mfonirifeemɔŋ ‘gbɛ́ ni yɔɔ faa naa’ lɛ, ni mɛni baa kɛ ejwa?
18 ‘Gbɛ́ ni yɔɔ faa lɛ naa lɛ’ ji tsui lɛ, ní nine shɛɔ lá babaoo nɔ, ní ekuɔ sɛɛ ekɛhaa ekoŋŋ koni ekpa shi yɛ gbɔmɔtso muu lɛ fɛɛ mli lɛ. Yɛ gbele mli lɛ, tsui lɛ tsɔɔ tamɔ gbɛ́ ni ejwa, ejwa yɛ faa lɛ naa ejaakɛ enyɛɛɛ ehe lá, ní ebaa yi, ní eku sɛɛ eshi lá ni he hiaa ni baalɛ gbɔmɔtso lɛ ni ewo lɛ hewalɛ lɛ dɔŋŋ. ‘Nubu lɛ he koklolonto ni eku lɛ’ tsɔmɔɔɔ ehe dɔŋŋ, ni ehaa lá ni haa wala lɛ sɛɛ foɔ. Nɛkɛ gbɛ nɔ Yehowa tsɔ ejie bɔ ni lá bɔleɔ shi lɛ kpo etsɔɔ Salomo jeeŋmɔ dani afii ohai 17 lɛ mli tsofafeelɔ William Harvey fee he nɔkwɛmɔnɔ akɛ ebɔleɔ shi lɛ.
19. Wiemɔi ni yɔɔ Jajelɔ 12:7 lɛ baa mli yɛ gbele mli yɛ mɛɛ gbɛ nɔ?
19 Jajelɔ lɛ kɛfata he akɛ: “Ni sũ lɛ aaaku esɛɛ aya shikpɔŋ, bɔ ni eyɔɔ lɛ nɔŋŋ, ni mumɔ lɛ aaaku esɛɛ aya Nyɔŋmɔ ni ŋɔha lɛ ŋɔɔ.” (Jajelɔ 12:7) Akɛni nubu lɛ he “koklolonto” lɛ eku hewɔ lɛ, adesa gbɔmɔtso lɛ, ni shishijee lɛ akɛ shikpɔŋ sũ fee lɛ, kuɔ esɛɛ kɛyaa sũ lɛŋ ekoŋŋ. (1 Mose 2:7; 3:19) Susuma lɛ gboɔ ejaakɛ mumɔ, loo wala hewalɛ ni Nyɔŋmɔ kɛha lɛ kuɔ sɛɛ kɛyaa ni eyahiɔ wɔ-Bɔlɔ lɛ ŋɔɔ.—Ezekiel 18:4, 20; Yakobo 2:26.
Mɛɛ Wɔsɛɛ Be Yɔɔ Kɛha Mɛi ni Kaiɔ Lɛ?
20. Mɛni Mose biɔ beni esɔle taakɛ áŋma afɔ̃ shi yɛ Lala 90:12 lɛ?
20 Salomo tsɔɔ bɔ ni ehe hiaa ni wɔkai wɔ-Bɔlɔ Kpeteŋkpele lɛ yɛ gbɛ ni mɔɔ shi jogbaŋŋ nɔ. Eji anɔkwale akɛ, kɛ akɛto he lɛ, wala shihilɛ ni yɔɔ kuku ni haomɔ yɔɔ mli lɛ jeee fɛɛ ni yɔɔ kɛha mɛi ni haa Yehowa hiɔ amɛjwɛŋmɔ mli ni jɛɔ amɛtsui muu fɛɛ mli amɛfeɔ esuɔmɔnaa nii lɛ. Kɛji akɛ amɛji oblahii loo oblayei aloo amɛdara hu lɛ, su kome lɛ nɔŋŋ amɛyɔɔ tamɔ Mose ni sɔle akɛ: “Tsɔɔmɔ wɔ wɔgbii lɛ kanemɔ, bɔni afee ni wɔná nilee tsui” lɛ. Nyɔŋmɔ gbalɔ heshibalɔ lɛ kɛ hiɛdɔɔ sumɔ ni Yehowa atsɔɔ lɛ kɛ gbɔmɛi ni yɔɔ Israel lɛ nii, koni amɛkɛ nilee aŋmɛ ‘amɛgbii ni ji afii lɛ’ amɛkwɛ, koni amɛkɛtsu nii yɛ gbɛ ni Nyɔŋmɔ kpɛlɛɔ nɔ lɛ nɔ.—Lala 90:10, 12.
21 Oblahii kɛ oblayei Kristofoi titri ji mɛi ni esa akɛ amɛtswa amɛfai shi akɛ amɛbaabo jajelɔ lɛ ŋaawoo akɛ aha Bɔlɔ lɛ ahi jwɛŋmɔ mli lɛ toi. Mɛɛ hegbɛi fɛfɛji amɛná nɛkɛ akɛ amɛkɛ sɔɔmɔ krɔŋkrɔŋ aaaha Nyɔŋmɔ! Shi kɛlɛ, yɛ afii ni wɔye lɛ fɛɛ sɛɛ lɛ, kɛji akɛ wɔkase wɔgbii lɛ akanemɔ ni wɔkɛwo Yehowa hiɛ nyam yɛ “naagbee be” nɛɛ mli lɛ, ekolɛ wɔbaanyɛ wɔya nɔ wɔkane amɛ kɛya naanɔ. (Daniel 12:4; Yohane 17:3) Shi kɛ wɔɔfee nakai lɛ, ja wɔkai wɔ-Bɔlɔ Kpeteŋkpele lɛ. Esa akɛ wɔtsu gbɛnaa nii ni kã wɔnɔ yɛ Nyɔŋmɔ hiɛ lɛ fɛɛ he nii.
Te Obaaha Hetoo Oha Tɛŋŋ?
◻ Mɛni hewɔ awoɔ oblahii kɛ oblayei ahewalɛ ni amɛkai amɛ-Bɔlɔ lɛ?
◻ Mɛni ji Ŋmalɛ mli nɔkwɛmɔnii komɛi ni kɔɔ mɛi ni kai amɛ-Bɔlɔ Kpeteŋkpele lɛ ahe?
◻ Mɛni jɛɔ gbɔlɛ mli kɛbaa ní Salomo tsɔɔ mli?
◻ Mɛɛ wɔsɛɛ be yɔɔ kɛha mɛi ni haa Yehowa hiɔ amɛjwɛŋmɔ mli lɛ?
21. Kɛji akɛ wɔɔkane wɔgbii ni wɔkɛwo Yehowa hiɛ nyam lɛ, mɛni esa akɛ wɔfee?
[Mfonirii ni yɔɔ baafa 15]
David, Israel gbekɛ yoo ni aŋɔ lɛ nom lɛ, Hana, kɛ Simeon kai Yehowa
[Mfonirii ni yɔɔ baafa 16]
Yehowa Odasefoi ni amɛgbɔlɔ lɛ kɛ sɔɔmɔ krɔŋkrɔŋ haa wɔ-Bɔlɔ Kpeteŋkpele lɛ yɛ miishɛɛ mli