Ani Abaanyɛ Ahi Shi Kɛya Naanɔ Lɛɛlɛŋ?
“Tsɔɔlɔ, mɛɛ nɔ̃ kpakpa po mafee, ni maná naanɔ wala?”—MATEO 19:16.
1. Mɛni abaanyɛ awie yɛ wɔ adesa wala sɛɛkɛlɛ lɛ he?
PERSIA Maŋtsɛ Xerxes I, ní ale lɛ yɛ Biblia lɛ mli akɛ Ahashweros lɛ miikwɛ esraafoi lɛ dani amɛyawuu ta yɛ afi 480 D.Ŋ.B. lɛ. (Ester 1:1, 2) Taakɛ Helanyo yinɔsaneŋmalɔ Herodotus tsɔɔ lɛ, maŋtsɛ lɛ fó beni ekwɛɔ esraafoi lɛ. Mɛni hewɔ? Xerxes wie akɛ: “Kɛ́ miisusu bɔ ni adesa wala be yɔɔ kuku hã lɛ he lɛ, ehaa miyeɔ awerɛho. Ejaakɛ yɛ biɛ afii oha sɛɛ lɛ, nɛkɛ hii nɛɛ fɛɛ ateŋ mɔ kome po ehiŋ wala mli.” Ekolɛ bo hu okɛ awerɛho ekadi akɛ wala be yɛ kuku, ni ákɛ, mɔ ko mɔ ko sumɔɔɔ ni egbɔ, ehe aye, ní egbo. Oo, eji wɔɔnyɛ wɔná wala mli ŋɔɔmɔ yɛ oblahiiaŋ kɛ oblayeiaŋ gbɔmɔtsoŋ hewalɛ kpakpa kɛ miishɛɛ mli kulɛ!—Hiob 14:1, 2.
2. Mɛɛ hiɛnɔkamɔ mɛi pii yɔɔ, ni mɛni hewɔ?
2 Nɔ ni sa kadimɔ waa ji akɛ, The New York Times Magazine ni je kpo yɛ September 28, 1997 lɛ, hiɛ saneyitso ni kaneɔ akɛ: “Amɛmiitao ni Amɛhi Wala Mli.” Etsɛ́ nibii amlitaolɔ ko wiemɔi nɛɛ asɛɛ akɛ: “Miheɔ miyeɔ diɛŋtsɛ akɛ wɔbaanyɛ wɔfee klɛŋklɛŋ yinɔbii ni hiɔ shi kɛyaa naanɔ lɛ!” Ekolɛ bo hu oheɔ oyeɔ akɛ abaanyɛ ahi shi kɛya naanɔ. Obaanyɛ osusu nakai, ejaakɛ Biblia lɛ woɔ shi akɛ wɔbaanyɛ wɔhi shi kɛya naanɔ yɛ shikpɔŋ nɛɛ nɔ. (Lala 37:29; Kpojiemɔ 21:3, 4) Kɛlɛ, mɛi komɛi heɔ yeɔ akɛ, abaanyɛ ahi shi kɛya naanɔ yɛ yiŋtoi krokomɛi ni damɔɔɔ nɔ ni anaa yɛ Biblia lɛ mli lɛ anɔ lɛ hewɔ. Yiŋtoi nɛɛ ateŋ enyɔoo ko ni wɔɔsusu he lɛ baaye abua wɔ ni wɔle akɛ naanɔ wala baanyɛ aba diɛŋtsɛ.
Abɔ Wɔ ni Wɔhi Shi Kɛya Naanɔ
3, 4. (a) Mɛni hewɔ mɛi komɛi heɔ yeɔ akɛ esa akɛ wɔnyɛ wɔhi shi kɛya naanɔ lɛ? (b) Mɛni David wie yɛ gbɛ ni atsɔ nɔ afee lɛ lɛ he?
3 Yiŋtoo kome ni hãa mɛi babaoo heɔ yeɔ akɛ esa akɛ adesai anyɛ ahi shi kɛya naanɔ lɛ kɔɔ bɔ ni afee wɔ ahã yɛ naakpɛɛ gbɛ nɔ lɛ he. Ákɛ nɔkwɛmɔnɔ lɛ, bɔ ni ashɔ̃ wɔ ahã yɛ wɔnyɛ fɔmɔ kotoku mli lɛ yɛ naakpɛɛ diɛŋtsɛ. Nilelɔ ko ni le gbɔlɛ he nii jogbaŋŋ lɛ ŋma akɛ: “Beni adebɔɔ etsu naakpɛɛ nii ni kɛ wɔ jɛɔ hɔŋɔɔ mli kɛyaa fɔmɔ mli, kɛtsaa nɔ kɛyaa dalɛ yɛ bɔlɛnamɔ gbɛfaŋ kɛ onukpa tsɔmɔ mli lɛ he nii egbe naa lɛ, ehala akɛ etoŋ nɔ ko ni tamɔ nɔ ni yɔɔ mlɛo ni baatsĩ gbɔlɛ naa koni ekɛhiɛ nakai naakpɛɛ nii lɛ amli kɛya naanɔ lɛ he gbɛjianɔ.” Hɛ̃ɛ, kɛ wɔsusu naakpɛɛ gbɛ ni atsɔ nɔ afee wɔ lɛ he lɛ, sanebimɔ lɛ yaa nɔ lolo akɛ, Mɛni hewɔ esa akɛ wɔgboi?
4 Afii akpei abɔ ni eho nɛ ni Biblia ŋmalɔ David susu nakai naakpɛɛ nii lɛ nɔŋŋ he, eyɛ mli akɛ enyɛɛɛ ena musu lɛ mli diɛŋtsɛ taakɛ jeŋ nilelɔi nyɛɔ amɛnaa lɛ ŋmɛnɛ lɛ. David jwɛŋ bɔ ni afee lɛ diɛŋtsɛ aha lɛ he, beni eŋma akɛ, ‘abu ehe beni anaaa lɛ yɛ enyɛ musuŋ’ lɛ. Ekɛɛ yɛ nakai be lɛ mli akɛ ‘afee esabai.’ Ewie bɔ ni afee ‘ewui’ hu beni taakɛ ewie lɛ, “afee mi yɛ teemɔ mli” lɛ. Kɛkɛ ni David wie beni eji “lá kuli” lɛ he ni ewie nakai lá kuli ni yɔɔ enyɛ musuŋ lɛ he akɛ: “Aŋma fɛɛ yɛ owolo lɛ mli.”—Lala 139:13-16.
5. Mɛɛ naakpɛɛ nii kɔɔ bɔ ni ashɔ̃ wɔ aha yɛ musuŋ lɛ he?
5 Eka shi faŋŋ akɛ David feemɔ yɛ enyɛ musuŋ lɛ he wolo ko ni aŋma afɔ̃ shi diɛŋtsɛ ko bɛ. Shi yɛ be mli ni David susuɔ bɔ ni afee ‘esabai,’ ‘ewui,’ kɛ egbɔmɔtso lɛ fai krokomɛi lɛ aha lɛ he lɛ, etamɔ nɔ ni efee lɛ akɛ enɛɛmɛi ni ba lɛ damɔ gbɛjianɔtoo ko nɔ—akɛ, taakɛ eji lɛ, ‘áŋma yɛ wolo mli.’ Etamɔ nɔ ni hɔ ni áŋɔ yɛ enyɛ musuŋ lɛ yɛ tsũ agbo ko ni woji kɛ famɔi ni tsɔɔ bɔ ni afeɔ adesa fufɔoo ko ahaa lɛ eyi mli obɔ, ni akɛ nɛkɛ famɔi ni yɔɔ hwanyaŋŋ nɛɛ haa hɔ fɛɛ hɔ ni jeɔ shishi lɛ. No hewɔ lɛ, Science World wolo tɛtrɛɛ lɛ kɛ mfoniri feemɔŋ wiemɔ tsuɔ nii akɛ ‘hɔ fɛɛ hɔ ni daa yɛ musuŋ lɛ yɛ ehe woji ni ábua naa ato.’
6. Mɛɛ odaseyelii yɔɔ ni tsɔɔ akɛ, taakɛ David ŋma lɛ, ‘bɔ ni atsɔ afee wɔ lɛ yɛ naakpɛɛ’?
6 Ani osusu bɔ ni wɔgbɔmɔtsei lɛ tsuɔ nii yɛ naakpɛɛ gbɛ nɔ lɛ he pɛŋ? Wala shishijee he nikaselɔ Jared Diamond wie akɛ: “Wɔkɛ wala yibii heei toɔ nɔ ni eha wɔ mlinii amli lɛ najiaŋ yɛ gbii fioo ko sɛɛ daa, nɔ ni ha wɔ shamɔ tɔ lɛ mli lɛ hu shikome yɛ daa nyɔji enyɔ mli, ni wɔ lá mli wala yibii tsuji lɛ hu shikome yɛ daa nyɔji ejwɛ mli.” Emu sane naa akɛ: “Adebɔɔ famɔɔ wɔ ni etsaraa wɔ ekoŋŋ daa gbi.” Mɛni ji nɔ ni enɛ tsɔɔ diɛŋtsɛ? Etsɔɔ akɛ, yɛ afii abɔ ni ekolɛ wɔkɛaahi shi lɛ fɛɛ sɛɛ lɛ—kɛji akɛ afii 8, 80, aloo 800 po lɛ—wɔgbɔmɔtso lɛ yaa nɔ ehiɔ shi ehee. Jeŋ nilelɔ ko bu naa akɛ: “Yɛ afi mli lɛ, wɔkɛ atɔm krokomɛi ni wɔkɛwoɔ wɔmli kɛtsɔ kɔɔyɔɔ, niyenii, kɛ nɔ ni wɔnuɔ nɔ lɛ baaye atɔm ni yɔɔ wɔmli amrɔ nɛɛ lɛ falɛ aaashɛ emlijaa oha mli 98 najiaŋ.” Lɛɛlɛŋ, taakɛ David jie yi lɛ, ‘afee wɔ yɛ naakpɛɛ gbɛ nɔ.’—Lala 139:14.
7. Yɛ bɔ ni abɔ wɔ heloo gbɔmɔtsei lɛ aha hewɔ lɛ, te mɛi komɛi emu sane naa amɛha tɛŋŋ?
7 Yɛ bɔ ni afee wɔ gbɔmɔtsei ahã lɛ hewɔ lɛ, nilelɔ ko ni le gbɔlɛ he sane jogbaŋŋ lɛ wie akɛ: “Nɔ hewɔ ni esa akɛ gbɔlɛ aba lɛ mli bɛ faŋŋ.” No hewɔ lɛ, etamɔ nɔ ni esa akɛ wɔhi shi kɛya naanɔ lɛɛlɛŋ. Ni no hewɔ ni adesai bɔɔ mɔdɛŋ ní amɛnine ashɛ oti nɛɛ nɔ kɛtsɔ amɛ jeŋ nilee nɔ lɛ. Etsɛko tsɔ̃ ni Dr. Alvin Silverstein kɛ hekɛnɔfɔɔ ŋma yɛ ewolo ni atsɛɔ lɛ Conquest of Death lɛ mli akɛ: “Wɔbaatao yiŋtoo titri ni yɔɔ wala sɛɛ lɛ mli jogbaŋŋ. Wɔbaanu . . . bɔ ni feɔ ni gbɔmɔ gbɔɔ lɛ shishi.” Ni mɛni baajɛ enɛ mli aba? Eka ehiɛ egba efɔ̃ shi akɛ: “Gbɔmɛi ni ‘egbɔlɔ’ ehiŋ shi dɔŋŋ, ejaakɛ nilee ni baahã aye gbele nɔ kunim lɛ kɛ oblanyo kɛ oblayoo gbɔmɔtso ni baahi shi kɛya naanɔ hu baaba.” Kɛji akɛ wɔsusu bɔ ni ŋmɛnɛŋmɛnɛ jeŋ nilee etao bɔ ni afee gbɔmɔ aha lɛ mli eha lɛ he lɛ, ani naanɔ wala he susumɔ lɛ tamɔ nɔ ko ni nyɛŋ aba mli? Yiŋtoo kroko ni mli wa waa hu yɛ ni aaadamɔ nɔ ahe aye akɛ naanɔ wala baanyɛ aba.
Bɔ ni Ashweɔ ni Ahi Shi Kɛya Naanɔ Lɛ
8, 9. Mɛɛ adebɔɔ naa shwelɛ ko gbɔmɛi etao akɛ amɛaaná yɛ yinɔsane be fɛɛ mli?
8 Ani oyɔse akɛ, ní aaahi shi kɛya naanɔ lɛ ji adebɔɔ naa nii ni adesa shweɔ? Datrɛfonyo ko ŋma yɛ Germany wolo tɛtrɛɛ ko mli akɛ: “Ekolɛ naanɔ wala he oti titri ni ataoɔ ni ashɛ he lɛ etsɛ tamɔ adesa pɛpɛɛpɛ.” Beni The New Encyclopædia Britannica lɛ wieɔ blema Europabii komɛi ahemɔkɛyelii ahe lɛ, ekɛɛ akɛ: “Gbɔmɛi ni abuɔ amɛ waa lɛ baahi shi kɛya naanɔ yɛ asa ko ni kpɛlɛɔ kaŋkaŋ ni akɛ shika tsuru ewo yiteŋ lɛ mli.” Ni, oo, kwɛ gbɛ̀i srɔtoi babaoo ni gbɔmɛi etsɔ nɔ aahu yɛ mɔdɛŋ ni amɛbɔɔ ni amɛnine ashɛ nakai naanɔ wala ni amɛshweɔ lɛ nɔ!
9 The Encyclopedia Americana lɛ kɛɔ akɛ nɔ ni fe afii 2,000 nɛ, yɛ China lɛ, “maŋtsɛmɛi wuji kɛ maŋbii [foji] fɛɛ, ŋmɛɛ nitsumɔ he amɛfɔ̃ shi kwraa, yɛ Tao osɔfoi ahiɛnyiɛmɔ shishi, ákɛ amɛyaatao tsofa ni hãa mɔ wala”—nɔ ni akɛɛ atsɛɔ lɛ oblahiiaŋ kɛ oblayeiaŋ hewalɛ nuhiŋmɛi lɛ. Gbɔmɛi ehe eye yɛ yinɔsane be fɛɛ mli akɛ, kɛ amɛnu tsofai srɔtoi ni afutu loo amɛnu nui komɛi po lɛ, amɛbaanyɛ amɛhi shi ní amɛgbɔɔɔ.
10. Mɛɛ mɔdɛŋ ábɔ yɛ ŋmɛnɛŋmɛnɛ beaŋ koni wala sɛɛkɛlɛ afee nɔ ni nine baanyɛ ashɛ nɔ?
10 Ŋmɛnɛŋmɛnɛ beaŋ mɔdɛŋ ni abɔɔ ní akɛtsu naanɔ wala ni gbɔmɔ shweɔ ni yɔɔ emli lɛ he nii lɛ hu sa kadimɔ waa diɛŋtsɛ. Nɔkwɛmɔnɔ ni ale jogbaŋŋ ji nifeemɔ ni ji gbɔmɔ ni hela ko egbe lɛ, ní akɛ gbonyo lɛ woɔ ais mli lɛ. Áfee enɛ kɛ hiɛnɔkamɔ akɛ, kɛ́ aná tsofa kɛha nakai hela lɛ, akɛ lɛ baaba wala mli ekoŋŋ wɔsɛɛ. Mɛi ni kɛ nifeemɔ, ni atsɛɔ lɛ cryonics, ni ji gbonyo ni akɛtoɔ ais mli kɛ hiɛnɔkamɔ akɛ ekolɛ abaanyɛ atsĩɛ ehiɛ wɔsɛɛ nɛɛ ba lɛ ateŋ mɔ kome ŋma akɛ: “Kɛ́ wɔ gbɛkpamɔ lɛ bafee nɔ ni sa, ní abale bɔ ni atsáa loo asáa nibii fɛɛ ni efite—ní gbɔjɔmɔi ni gbɔlɛ kɛbaa lɛ fata he lɛ—no lɛ mɛi ni ‘gboiɔ’ amrɔ nɛɛ baaná wala sɛɛkɛlɛ ni bɛ naagbee wɔsɛɛ.”
11. Mɛni hewɔ gbɔmɛi shweɔ ni amɛhi shi kɛya naanɔ lɛ?
11 Ekolɛ obaabi akɛ, mɛni hewɔ naanɔ wala ni ashweɔ nɛɛ ehe shi yɛ wɔjwɛŋmɔ mli waa nakai lɛ? Ani akɛni “[Nyɔŋmɔ] eŋɔ naanɔ ewo gbɔmɔ jwɛŋmɔ mli” hewɔ? (Jajelɔ 3:11, Revised Standard Version) Enɛ ji sane ko ni esa akɛ akɛ hiɛdɔɔ diɛŋtsɛ asusu he! Susumɔ enɛ he okwɛ: Mɛni hewɔ naanɔ shihilɛ ni ashweɔ yɔɔ wɔmli—shwe ni wɔsheɔ akɛ wɔhi shi daa lɛ—kɛ́ ejeee wɔ-Bɔlɔ lɛ yiŋtoo akɛ nɔ ni wɔshweɔ nɛɛ aba mli lɛ? Ni ani ebaafee nɔ ni suɔmɔ yɔɔ mli yɛ egbɛfaŋ akɛ ekɛ naanɔ wala he shwelɛ aaabɔ wɔ, kɛkɛ lɛ eha wɔnijiaŋ eje wui kwraa kɛtsɔ nakai shwelɛ lɛ ni ehaŋ wɔnine ashɛ nɔ kɔkɔɔkɔ lɛ nɔ?—Lala 145:16.
Namɔ Esa akɛ Wɔkɛ Wɔhiɛ Afɔ̃ Enɔ?
12. Mɛɛ hekɛnɔfɔɔ mɛi komɛi yɔɔ, shi ani oheɔ oyeɔ akɛ edamɔ shishitoo ni ma shi shiŋŋ nɔ?
12 Shi nɛgbɛ, loo mɛni nɔ esa akɛ wɔkɛ wɔhiɛnɔkamɔ kɛha naanɔ wala namɔ afɔ̃? Yɛ adesai atsɔnei ahe nilee ni yɔɔ afii ohai 20 nɛɛ loo 21 lɛ mli lɛ nɔ? The New York Times Magazine lɛ mli sane ni ji “Amɛmiitao ni Amɛhi Wala Mli” lɛ wie “nyɔŋmɔ: ni ji tsɔnei ahe nilee” kɛ “miishɛɛ ni ajieɔ lɛ kpo yɛ nɔ ni tsɔnei ahe nilee baanyɛ afee he” lɛ he. Awie akɛ nibii amlitaolɔ ko po kɛ “miishɛɛ hekɛnɔfɔɔ wie . . . akɛ nine baashɛ ŋaa gbɛ̀i ni atsɔɔ nɔ atsuɔ wala yibii ahilɛ mli hiɛyaa he nii lɛ nɔ yɛ be ni sa mli, koni ehere [wɔ] yiwala kɛtsɔ gbɔlɛ sɛɛ ni eeefo, ekolɛ etsake lɛ sɛɛsɛɛ kwraa lɛ nɔ.” Shi, yɛ anɔkwale mli lɛ, gbɔmɔ mɔdɛŋbɔɔ efee efolo kwraa yɛ gbɔlɛ ni eeetsi naa loo yɛ gbele ni eeeye nɔ kunim lɛ mli.
13. Yɛ mɛɛ gbɛ nɔ bɔ ni afee wɔ ansɔ lɛ aha lɛ tsɔɔ akɛ ato ni wɔhi shi kɛya naanɔ?
13 Ani enɛ tsɔɔ akɛ gbɛ ko kwraa bɛ ni aaanyɛ atsɔ nɔ aná naanɔ wala? Jeee nakai kwraa! Gbɛ ko yɛ! Esa akɛ bɔ ni afee wɔ ansɔ lɛ aha, kɛ enyɛmɔ ni yɔɔ naakpɛɛ, ní husu bɛ nii ni eeenyɛ ekase lɛ he lɛ atsɔ̃ wɔyiŋ yɛ enɛ he. Wala bɔɔ nii amli molɛkiul ahe nilelɔ James Watson tsɛ́ wɔ ansɔ lɛ akɛ “nii ni yɔɔ haŋtsii fe fɛɛ ni wɔkpá shi wɔna kɛbashi amrɔ nɛɛ yɛ wɔjeŋ muu lɛ fɛɛ mli.” Ni fãji ahe nilelɔ Richard Restak wie akɛ: “Nɔ ko nɔ ko bɛ jeŋ muu lɛ fɛɛ mli hé ko kwraa ni wɔle ni bɛŋkɛɔ lɛ bibioo kwraa po.” Mɛni hewɔ wɔyɔɔ ansɔ ni baanyɛ ekɛ saji babaoo ni husu bɛ he ato ni etsu he nii, kɛ gbɔmɔtso ni afee ní ehi shi kɛya naanɔ, kɛji afeee wɔ kɛ yiŋtoo akɛ wɔná naanɔ wala mli ŋɔɔmɔ?
14. (a) Mɛɛ sane naamuu ni kɔɔ adesa wala he Biblia ŋmalɔi tsɔɔ? (b) Mɛni hewɔ esa akɛ wɔkɛ wɔhiɛ afɔ̃ Nyɔŋmɔ nɔ shi jeee gbɔmɔ nɔ lɛ?
14 Belɛ, mɛɛ sane naamuu pɛ ni nilee yɔɔ mli, ni ji anɔkwale wɔɔnyɛ wɔshɛ he? Ani okpɛlɛŋ nɔ akɛ Feelɔ ko ni yɔɔ nilee, ni yɔɔ hewalɛ fe fɛɛ ji mɔ ni fee wɔ ni ebɔ wɔ? (Hiob 10:8; Lala 36:10Ga Bible; 100:3; Maleaki 2:10; Bɔfoi lɛ Asaji 17:24, 25) No hewɔ lɛ, ani esaaa akɛ wɔkɛ nilee boɔ Biblia mli lalatsɛ lɛ fãmɔ ni jɛ mumɔŋ lɛ toi, akɛ: “Nyɛkaŋɔa nyɛhiɛ nyɛfɔ̃a lumɛi loo gbɔmɔ bi ko ni yelikɛbuamɔ ko bɛ edɛŋ lɛ nɔ”? Mɛni hewɔ esaaa akɛ wɔkɛ wɔhiɛ fɔ̃ɔ gbɔmɔ nɔ lɛ? Ejaakɛ taakɛ lalatsɛ lɛ ŋma lɛ, “kɛ́ emumɔ je emli lɛ, ekuɔ esɛɛ kɛyaa esũ lɛ mli ekoŋŋ; nakai gbi lɛ nɔŋŋ eyiŋtoi lɛ laajeɔ.” Yɛ anɔkwale mli lɛ, yɛ hegbɛ ni amɛyɔɔ akɛ amɛaanyɛ amɛhi shi kɛya naanɔ lɛ fɛɛ sɛɛ lɛ, gbɔmɛi nyɛɛɛ nɔ ko nɔ ko afee kɛ gbele nina amɛ. Lalatsɛ lɛ mu sane naa akɛ: “Ajɔɔ mɔ ni . . . ehiɛ kã Yehowa, e-Nyɔŋmɔ lɛ, nɔ lɛ.”—Lala 146:3-5.
Ani Eji Nyɔŋmɔ Yiŋtoo Lɛɛlɛŋ?
15. Mɛni tsɔɔ akɛ eji Nyɔŋmɔ yiŋtoo akɛ wɔhi shi kɛya naanɔ?
15 Shi, ekolɛ ooobi akɛ, Ani eji Yehowa yiŋtoo lɛɛlɛŋ akɛ wɔná naanɔ wala mli ŋɔɔmɔ? Hɛɛ, eji eyiŋtoo! E-Wiemɔ lɛ woɔ shi shii abɔ. Biblia lɛ maa nɔ mi kɛhaa wɔ akɛ: “Nyɔŋmɔ duromɔ keenɔ lɛ naanɔ wala ni.” Nyɔŋmɔ tsulɔ Yohane ŋma akɛ: “Enɛ ji shi ni [Nyɔŋmɔ] ewo wɔ lɛ, naanɔ wala lɛ.” Ebɛ naakpɛɛ mɔ akɛ oblanyo ko bi Yesu akɛ: “Tsɔɔlɔ, mɛɛ nɔ̃ kpakpa po mafee, ni maná naanɔ wala?” (Romabii 6:23; 1 Yohane 2:25; Mateo 19:16) Yɛ anɔkwale mli lɛ, bɔfo Paulo ŋma yɛ “naanɔ wala lɛ he nɔhiɛkamɔ lɛ naa, nɔ̃ wala ni Nyɔŋmɔ ni maleee lɛ wo shi eha dani abɔ jeŋ bei lɛ” he sane.—Tito 1:2.
16. Mɛɛ shishinumɔ naa ekolɛ Nyɔŋmɔ kɛ naanɔ wala he shiwoo ha “dani abɔ jeŋ bei lɛ” yɛ?
16 Ákɛ Nyɔŋmɔ kɛ naanɔ wala he shiwoo ha “dani abɔ jeŋ bei lɛ” tsɔɔ mɛni? Mɛi komɛi susuɔ akɛ bɔfo Paulo miitsɔɔ akɛ dani aaabɔ klɛŋklɛŋ nuu kɛ yoo, Adam kɛ Hawa lɛ, no mli lɛ Nyɔŋmɔ eto eyiŋ akɛ esa akɛ adesai ahi shi kɛya naanɔ. Shi kɛji akɛ Paulo miitsɔɔ be ko yɛ be mli ni abɔ adesai lɛ sɛɛ kɛ be mli ni Yehowa jaje eyiŋtoo nɛɛ lɛ, belɛ eyɛ faŋŋ lolo akɛ nɔ ni fata Nyɔŋmɔ suɔmɔnaa nii ahe ji ni adesai ahi shi kɛya naanɔ.
17. Mɛni hewɔ ashwie Adam kɛ Hawa kɛjɛ Eden trom lɛ mli lɛ, ni mɛni hewɔ akɛ kerubim badamɔ enaa gbɛ lɛ he lɛ?
17 Biblia lɛ kɛɔ akɛ, yɛ Eden abɔɔ lɛ mli lɛ, ‘Yehowa Nyɔŋmɔ hã wala tso kwɛ̃ kɛjɛ shikpɔŋ sũ lɛŋ.’ Yiŋtoo ni ha ashwie Adam kɛjɛ trom lɛ mli lɛ ji koni “ekakpã enine mli, ni etse wala tso lɛ yibii lɛ hu eko, ni eye, ni ehiɛ miikã kɛmiiya naanɔ,” hɛɛ, ni ehi shi kɛmiiya naanɔ! Beni eshwie Adam kɛ Hawa kɛjɛ trom lɛ mli lɛ sɛɛ lɛ, Yehowa ŋɔ kerubim “kɛ lalilɛi klante ni tsɔmɔɔ ehe eto Eden trom lɛ hiɛ yɛ bokagbɛ, koni ebu wala tso lɛ naa gbɛ lɛ he.”—1 Mose 2:9; 3:22-24.
18. (a) Mɛni wala tso lɛ yeli baatsɔɔ aha Adam kɛ Hawa? (b) Nakai tso lɛ yeli damɔ shi kɛha mɛni?
18 Eji aŋmɛ Adam kɛ Hawa gbɛ ni amɛye nakai wala tso lɛ yibii lɛ eko kulɛ, mɛni ebaatsɔɔ kɛha amɛ? Kulɛ, ebaafee hegbɛ ni amɛná akɛ amɛaahi shi kɛya naanɔ yɛ Paradeiso! Biblia mli saji ahe nilelɔ ko kɛɛ akɛ: “Eka shi faŋŋ akɛ wala tso lɛ yɛ hewalɛ ko ni abaanyɛ atsɔ nɔ ahã adesa gbɔmɔtso lɛ aye ehe kɛjɛ gbɔjɔmɔ ni gbɔlɛ kɛbaa lɛ, loo efitemɔ ni yagbeɔ naa yɛ gbele mli lɛ he.” Ewie po akɛ “tsofa hewalɛ yɛ paradeiso lɛ mli baai lɛ amli, ní baanyɛ aku nibii ni jɛɔ gbɔlɛ mli baa lɛ anaa.” Shi kɛlɛ, Biblia lɛ ewieee akɛ wala tso lɛ diɛŋtsɛ yɛ hewalɛi komɛi ni haa wala. Shi moŋ tso lɛ feɔ naanɔ wala he nɔmimaa ni Nyɔŋmɔ kɛhaa mɔ ní ebaaŋmɛ lɛ gbɛ akɛ eye eyibii lɛ eko lɛ he mfoniri kɛkɛ.—Kpojiemɔ 2:7.
Nyɔŋmɔ Yiŋtoo Tsakeko
19. Mɛni hewɔ Adam gbo, ni mɛni hewɔ wɔ, ni ji eshwiei lɛ hu gboiɔ lɛ?
19 Beni Adam fee esha lɛ, elaaje hegbɛ ni eyɔɔ kɛha naanɔ wala lɛ kɛha lɛ diɛŋtsɛ ehe kɛ eshwiei ní no mli lɛ afɔko amɛ lɛ fɛɛ. (1 Mose 2:17) Beni ebatsɔ eshafeelɔ, yɛ etoigbele lɛ hewɔ lɛ, ebatsɔ mɔ ni tɔ̃mɔ eba ehe, mɔ ni yeee emuu. Kɛjɛ nakai be lɛ mli kɛbaa lɛ, Adam gbɔmɔtso lɛ batsɔ nɔ ni kɛ́ wɔɔkɛɛ lɛ, aakudɔ lɛ kɛha gbele. Taakɛ Biblia lɛ kɛɔ lɛ, akɛ, “esha dɛŋ nyɔmɔwoo lɛ gbele ni.” (Romabii 6:23) Agbɛnɛ hu, Adam shwiei ni yeee emuu lɛ hu batsɔmɔ mɛi ni aakudɔ amɛ kɛha gbele, jeee kɛha naanɔ wala. Biblia lɛ tsɔɔ mli akɛ: “Gbɔmɔ kome [Adam] nɔ esha tsɔ̃ kɛba je lɛŋ, ni gbele tsɔ̃ esha nɔ kɛba, ni no hã gbele lɛ tsɛŋe gbɔmɛi fɛɛ, ejaakɛ amɛ fɛɛ amɛfee esha.”—Romabii 5:12.
20. Mɛni tsɔɔ akɛ ato ni adesai ahi shi kɛya naanɔ yɛ shikpɔŋ nɔ?
20 Shi eji Adam efeee esha kulɛ mɛni baaba? Eji egbooo Nyɔŋmɔ nɔ toi, ni aha lɛ hegbɛ akɛ eye wala tso lɛ yibii lɛ eko kulɛ, mɛni baaba? Nɛgbɛ ebaaná Nyɔŋmɔ nikeenii ni ji naanɔ wala lɛ mli ŋɔɔmɔ yɛ? Yɛ ŋwɛi? Dabi! Nyɔŋmɔ ewieee nɔ ko yɛ ŋwɛi ni ekɛ Adam baaya he. Ahã lɛ nitsumɔ yɛ biɛ yɛ shikpɔŋ nɛɛ nɔ. Biblia lɛ tsɔɔ mli akɛ, “Yehowa Nyɔŋmɔ hã tsei fɛɛ ni kɛ́ akwɛ ni aaaba mɔ tsine ni amɛhi hã yeli hu kwɛ̃ kɛjɛ shikpɔŋ sũ lɛŋ,” ni ekɛfata he akɛ: “Yehowa Nyɔŋmɔ ŋɔ gbɔmɔ lɛ ni ekɛ lɛ bato Eden trom lɛ mli, koni ehu mli ni ebu he.” (1 Mose 2:9, 15) Beni abɔ Hawa akɛ Adam hefatalɔ lɛ sɛɛ lɛ, akɛ nitsumɔi krokomɛi fata he aha amɛyi enyɔ lɛ fɛɛ yɛ biɛ yɛ shikpɔŋ lɛ nɔ. Nyɔŋmɔ kɛɛ amɛ akɛ: “Nyɛfɔa ni nyɛyi afáa ni nyɛyia shikpɔŋ lɛ nɔ obɔ̃, ni nyɛnaanaa nɔ, ni nyɛyea ŋshɔŋlooi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.”—1 Mose 1:28.
21. Mɛɛ naakpɛɛ gbɛkpamɔi klɛŋklɛŋ adesai lɛ ná mli ŋɔɔmɔ?
21 Susumɔ shikpɔŋ nɔ gbɛkpamɔi ni yɔɔ naakpɛɛ ni nakai famɔi ni jɛ Nyɔŋmɔ ŋɔɔ lɛ kɛhaa Adam kɛ Hawa lɛ he okwɛ! Amɛbaakwɛ ni amɛtsɔse bihii kɛ biyei ni yɔɔ gbɔmɔtsoŋ hewalɛ ni eye emuu yɛ shikpɔŋ nɔ Paradeiso lɛ mli. Beni amɛbii ni amɛsumɔɔ amɛ nɛɛ daraa lɛ, amɛkɛ amɛ baaná fɔmɔ ni baaha amɛyi afa kɛ abɔɔ lɛ mli nitsumɔ ni ŋɔɔ ni amɛkɛkwraa nakai Paradeiso lɛ mli gbɛfaŋnɔ. Akɛni amɛkwɛɔ kooloi lɛ fɛɛ nɔ hewɔ lɛ, adesai amii baashɛ amɛhe waa. Susumɔ miishɛɛ ni amɛaaná akɛ amɛaalɛɛ Eden trom lɛ husui amli koni yɛ naagbee lɛ, shikpɔŋ muu lɛ fɛɛ abatsɔ paradeiso lɛ he okwɛ! Ani okɛ bii ni eye emuu baaná shihilɛ mli ŋɔɔmɔ yɛ shikpɔŋ nɔ shia fɛfɛo ni tamɔ nɛkɛ mli, ní osusuuu gbɔlɛ kɛ gbele he kwraa? Hã adebɔɔ mli henumɔi ni yɔɔ bo diɛŋtsɛ otsui mli lɛ ahã nakai sanebimɔ lɛ hetoo.
22. Mɛni hewɔ wɔbaanyɛ wɔná nɔmimaa akɛ Nyɔŋmɔ tsakeee eyiŋtoo kɛha shikpɔŋ lɛ?
22 Ojogbaŋŋ, belɛ beni Adam kɛ Hawa gbo toi ni ashwie amɛ kɛjɛ Eden trom lɛ mli lɛ, ani Nyɔŋmɔ tsake eyiŋtoo kɛha adesai akɛ amɛhi shi kɛya naanɔ yɛ Paradeiso yɛ shikpɔŋ nɔ lɛ? Dabi kwraa! Ejaakɛ kɛ́ Nyɔŋmɔ fee nakai lɛ, etsɔɔ akɛ ekpɛlɛ nɔ akɛ enine enyɛ shi yɛ nyɛmɔ ni eyɔɔ ni ekɛaatsu eshishijee yiŋtoo lɛ he nii lɛ mli. Wɔbaanyɛ wɔná nɔmimaa akɛ Nyɔŋmɔ feɔ nɔ ni ewoɔ shi yɛ he lɛ, taakɛ lɛ diɛŋtsɛ ejajeɔ lɛ, akɛ: “Nakai miwiemɔ ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!”—Yesaia 55:11.
23. (a) Mɛni maa nɔ mi ekoŋŋ akɛ eji Nyɔŋmɔ yiŋtoo akɛ mɛi ni sumɔɔ jalɛ nifeemɔ lɛ ahi shi kɛya naanɔ yɛ shikpɔŋ nɔ? (b) Mɛni wɔbaasusu he yɛ enɛ sɛɛ?
23 Ákɛ Nyɔŋmɔ yiŋtoo kɛha shikpɔŋ lɛ tsakeko lɛ, áfee enɛ faŋŋ yɛ Biblia lɛ mli, yɛ he ni Nyɔŋmɔ woɔ shi yɛ akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.” Yesu Kristo po kɛɛ yɛ e-Gɔŋ nɔ Shiɛmɔ lɛ mli akɛ, mɛi ni he jɔ lɛ, shikpɔŋ lɛ aaatsɔ amɛnɔ̃. (Lala 37:29; Mateo 5:5) Kɛlɛ, te wɔɔfee tɛŋŋ wɔná naanɔ wala, ni mɛni esa akɛ wɔfee ni wɔná wala ni tamɔ nɛkɛ mli ŋɔɔmɔ? Abaasusu enɛ he yɛ nikasemɔ ni nyiɛ enɛ sɛɛ lɛ mli.
Te Obaaha Hetoo Oha Tɛŋŋ?
◻ Mɛni hewɔ mɛi pii heɔ yeɔ akɛ naanɔ wala baanyɛ aba lɛ?
◻ Mɛni esa akɛ no atsɔ̃ wɔyiŋ akɛ ato ni wɔhi shi kɛya naanɔ?
◻ Mɛni ji Nyɔŋmɔ shishijee yiŋtoo kɛha adesai kɛ shikpɔŋ lɛ?
◻ Mɛni hewɔ wɔbaanyɛ wɔná nɔmimaa akɛ Nyɔŋmɔ baaha eshishijee yiŋtoo lɛ aba mli lɛ?