Sanebimɔi Ni Jɛ Kanelɔi Adɛŋ

Ŋmalɛ nɛɛ hãa mɔ susuɔ nii ahe waa. Ekɛɔ akɛ: “Kɛ́ ona akɛ awaa ohiafo yi, ni atsɔɔ kojomɔ hiɛ abuɔ shi ni afeee jalɛ nii yɛ okpokpaa lɛ nɔ lɛ, kaahã efee bo naakpɛɛ. Ejaakɛ onukpa ko ni nɔ kwɔ fe nakai onukpa lɛ miikwɛ lɛ, ni onukpai krokomɛi hu yɛ ni nɔ kwɔlɔ fe amɛ.”​—Jaj. 5:8.

Kɛ́ wɔmiikwɛ lɛ hiɛiaŋhiɛiaŋ lɛ, etamɔ nɔ ni ŋmalɛ nɛɛ kɔɔ adesai ni ji nɔyelɔi loo amralofoi lɛ pɛ ahe. Shi kɛ́ wɔsusu he kɛtee shɔŋŋ lɛ, etamɔ nɔ ni etsɔɔ wɔ nɔ ko yɛ Yehowa hu he, ni nɔ ni etsɔɔ wɔ lɛ shɛjeɔ wɔmii ni ewoɔ wɔ hewalɛ waa.

Nɔyelɔi komɛi waa ohiafoi ayi, ni amɛtsɔɔ kojomɔ hiɛ amɛbuɔ shi. Nɔyelɔi ni tamɔ nɛkɛ lɛ ahe Jajelɔ 5:8 lɛ kɔɔ. Ŋmalɛ lɛ miikɛɛ amɛ akɛ, esa akɛ amɛkai akɛ, ekolɛ mɔ ko ni nɔ kwɔ fe amɛ, loo ni yɔɔ hegbɛ fe amɛ yɛ nɔyeli lɛ mli lɛ miikwɛ amɛ. Anɔkwa, ekolɛ mɛi ni nɔ kwɔlɔ fe amɛ lɛ diɛŋtsɛ lɛ, mɛi yɛ ni nɔ kwɔlɔ fe amɛ. Dɔlɛ sane ji akɛ, bei komɛi lɛ, ebaa lɛ akɛ nɔyelɔi nɛɛ fɛɛ yeee jalɛ sane, ni no hãa mɛi ni yɔɔ amɛshishi lɛ piŋɔ waa.

Shi kɛ́ efee tamɔ nɔ ni wɔbɛ mɔ ko ni baaye wɔsane ehã wɔ po lɛ, wɔle akɛ, Yehowa miikwɛ adesa nɔyelɔi fɛɛ, ni enɛ ni wɔle lɛ shɛjeɔ wɔmii. Wɔbaanyɛ wɔshɛ wɔjatsu lɛ wɔfɔ̃ Nyɔŋmɔ nɔ ni wɔbi lɛ ni eye ebua wɔ. (Lala 55:22; Fip. 4:6, 7) Wɔle akɛ, “Yehowa hiŋmɛii kpaa shi yɛ shikpɔŋ lɛ nɔ fɛɛ, koni ekɛ ehewalɛ lɛ aye abua mɛi ni kɛ amɛtsui fɛɛ ehã lɛ lɛ.”​—2 Kro. 16:9.

No hewɔ lɛ, Jajelɔ 5:8 lɛ kaiɔ wɔ anɔkwa sane ko, no ji, nɔyelɔ fɛɛ nɔyelɔ yɛ mɔ ko ni nɔ kwɔ fe lɛ. Nɔ ni fe fɛɛ lɛ, ekaiɔ wɔ hu akɛ, Yehowa ji Nɔyelɔ Ni Nɔ Kwɔ Fe Fɛɛ. Amrɔ nɛɛ, eetsɔ e-Bi Yesu Kristo, ni ji Maŋtsɛyeli lɛ nɔ Maŋtsɛ lɛ, nɔ eeye nɔ. Yehowa, wɔ-Nyɔŋmɔ Ofe lɛ, miina nɔ fɛɛ nɔ ni yaa nɔ, ni lɛ kɛ e-Bi lɛ yeɔ jalɛ sane yɛ nibii fɛɛ amli.