Hejɔlɛ Shihilɛ—Nɛgbɛ Abaana Yɛ?
SANE edɔ obalaŋtai enyɔ lɛ, amɛbɛ hiɛnɔkamɔ—amɛbɛ nitsumɔ. Taakɛ Time wolo tɛtrɛɛ lɛ tsɔɔ lɛ, “amɛkɛ ododobɛŋ ko ni akɛ rɔba efee tsa he ni kar lɛ lasu lɛ jɛɔ lɛ kɛba kar lɛ mli yɛ he ni amɛkamɔ lɛ, ni amɛkɛ mamashwɛi tsimɔ ehe fɔji lɛ fɛɛ.” Wolo ni amɛŋma ni tsɔɔ nɔ ni ha amɛgbe amɛhe lɛ ha fɛ̃i gbɛ̃i kũ mɛi pii: “Mɛni eshwɛ dɔŋŋ ni wɔbaahi shi wɔha bianɛ, akɛni wɔteŋ mɔ ko bɛ nitsumɔ ko lɛ?”
Amɛniɛbɔɔi ni tamɔ nɛkɛ tsɔɔ nijiaŋwujeei babaoo ni gbɔmɛi nuɔ he ŋmɛnɛ lɛ mli. Nibii ajara ni ewa, nitsumɔ ni bɛ kɛ tooyeli ni abiɔ yɛ nibii sɔrɔtoi ahe lɛ he jatsui lɛ edara ni eesa wɔteŋ mɔ fɛɛ mɔ he yɛ gbɛ kome loo gbɛ kroko nɔ. Kɛha wekui komɛi lɛ, nɔ ni etsɔɔ ji ni yei lɛ atsu nii, ni yɛ bei komɛi hu lɛ ebiɔ ni gbekɛbii lɛ atsu nitsumɔ ko. Nɔ ni eba mɛi krokomɛi anɔ hu ji ni amɛfee tsakemɔi wuji yɛ amɛniyeli mli, hiɛtserɛjiemɔ kɛ shiai ni amɛhiɔ mli lɛ po mli. Shika ni akɛto yɛ shikatoohe lɛ po nyɛɛɛ afee nɔ ni akɛdamɔɔ sɛɛ yɛ nibii ajara ni waa babaoo lɛ hewɔ. Ojogbaŋŋ Biblia gbalɔ lɛ wie akɛ nɛkɛ be nɛɛ baafee “jaramɔ bei ni mli wa.”—2 Timoteo 3:1-5.
Nibii ajara ni waa nɛɛ po esa niiatsɛmɛi ahe. (Kpojiemɔ 6:6) Bɔni atee ni amɛfo “afabaŋ” amɛwo amɛhe yɛ nibii ajara ni waa nɛɛ hewɔ lɛ, mɛi komɛi kɛ amɛshika woɔ jarayeli mli, tsui amli, maŋsɛɛ shika loo ojarawa tɛi amli. Shi nibii ni tsakeɔ ni baa trukaa lɛ po edũ jarayelɔi ni hiɛ yɔɔ amɛhe nɔ waa lɛ po. Ákɛ nɔkwɛmɔ nɔ lɛ, kaimɔ bɔ ni shikatsuru ni kulɛ amɛjara ji Amerika shika dɔla 875 ŋsɛnii tɛ bibioo kome lɛ gbee shi kɛbashɛ dɔla 650 ni yɛ sɛɛ mli kwraa lɛ ebashɛ Amerika shika dɔla 300 pɛ lɛ. Enɛ haa mɛi ni kɛ amɛshika woɔ guɔyeli nibii amli lɛ ahiɛ hiɔ amɛhe nɔ jogbaŋŋ ni amɛkɛ hekpokpomɔ kwɛɔ shika ni amɛkɛwowoo nitsumɔi amli nɛɛ. Enɛ kaiɔ wɔ Biblia mli wiemɔ ni yɔɔ Jajelɔ 5:12, (NW) lɛ: “Nibii pii ni niiatsɛ yɔɔ lɛ haaa ewɔ.”
“AMƐAAFEE YEYEEYE”
Shi ani shikahelɛtemɔ he nilelɔi aaanyɛ anyiɛ wɔhiɛ kɛjɛ basabasafeemɔ nɛɛ mli? Te amɛaafee tɛŋŋ amɛfee nakai hu yɛ be mli ni amɛkɛ amɛhe kpaaa gbee lɛ? Akɛ nɔkwɛmɔ nɔ lɛ, ŋɔɔ maji ni bɛŋkɛ amɛhe tamɔ Britania kɛ Franse ni nyiɛ amɛshikahelɛtemɔ he nilelɔi kpanakui lɛ asɛɛ lɛ nɛkɛ. Ni kɛlɛ nɛkɛ maji enyɔ nɛɛ nyiɛɔ shikahelɛtemɔ he gbɛjianɔtooi sɔrɔtoi enyɔ sɛɛ. Britania bɔɔ mɔdɛŋ ni eba nibii ajara ni waa lɛ shi kɛtsɔ shika ni nɔyeli lɛ fiteɔ lɛ ni eeeba lɛ shi kɛ hekpa babaoo ni aheɔ lɛ hu gbɛ ni eŋmɛɔ lɛ nɔ. Shi Franse kɛ ehe woɔ oshara ni ji nibii ajarawalɛ ni aŋmɛɔ gbɛ lɛ mli kɛtsɔɔ shika babaoo ni nɔyeli lɛ fiteɔ kɛtsuɔ nibii sɔrɔtoi koni ekɛto nitsumɔi ahe gbɛjianɔ eha maŋbii lɛ nɔ. Yɛ be mli ni ewieɔ nibii ni kɛ amɛhe kpaaa gbee nɛɛ he lɛ, Time wolo tɛtrɛɛ lɛ jaje akɛ, “Nileei sɔrɔtoi enyɔ nɛɛ ateŋ jɛkɛɛɛ tsɔ ko, ni yɛ mɛi pii ahiɛ lɛ, omanye ni amɛaaye lɛ kɛ amɛhe yeɔ egbɔ.”
Biblia lɛ gba fɔ shi pɛpɛɛpɛ akɛ “jeŋmaji afimɔ lɛ aaaba shikpɔŋ lɛ nɔ, ni amɛaafee yeyeeye.” (Luka 21:25) No hewɔ lɛ kɛji akɛ jeŋ shikahelɛtemɔ he naagbai lɛ eha je lɛŋ hiɛnyiɛlɔi lɛ po ehao lɛ, mɛɛ hegbɛ gbɔmɔ folo nɛɛ yɔɔ akɛ eeenyɛ eje mli? Ani ŋaawoo jɛɛhe ko ni anyɛɔ akɛ he fɔɔ nɔ yɛ? Ani nibii yɛ ni abaanyɛ akɛ he awo mli ni baaha wɔna wɔsɛɛ be ni hejɔlɛ yɔɔ mli?