Yitso Nyɔŋmai Enyɔ Kɛ Enumɔ
Maŋtsɛ lɛ kɛ Elumɛi Lɛ
1, 2. Mɛni abaanyɛ akɛɛ yɛ Yesaia Ŋshɔ ní Egbo Wolokpo lɛ mli niŋmaa lɛ he?
KƐBAA afi 1940 afii lɛ naagbee gbɛ lɛ, ayana wolokpoi babaoo ní sa kadimɔ waa yɛ tɛkpoloi komɛi amli yɛ Ŋshɔ ní Egbo lɛ masɛi, yɛ Palestina. Abale amɛ akɛ Ŋshɔ ní Egbo Wolokpoi lɛ, ni aheɔ ayeɔ akɛ aŋmala aaafee afi 200 D.Ŋ.B. kɛ afi 70 Ŋ.B. teŋgbɛ. Amɛteŋ nɔ ni ale fe fɛɛ ji Yesaia wolokpo ní aŋma yɛ Hebri wiemɔ mli yɛ kooloi awolo ní tsɛɔ nɔ lɛ. Shwɛ fioo ní wolokpo nɛɛ aye emuu, ni esoro emli ŋmalɛ lɛ yɛ Masorete ŋmalɛ ní akɛ niji ŋmala ní aŋmala aaafee afii 1,000 sɛɛ lɛ he bibioo pɛ. Enɛ hewɔ lɛ, wolokpo lɛ feɔ bɔ ni Biblia ŋmalɛ ní akɛha wɔ lɛ ja kɛmɔ shi lɛ he mfoniri.
2 Oti ko ní sa kadimɔ waa yɛ Yesaia Ŋshɔ ní Egbo Wolokpo lɛ he ji akɛ, woloŋmalɔ ko kɛ okadi ni ji “X” ekadi wolo lɛ fã ni ale ŋmɛnɛ akɛ Yesaia yitso 32 lɛ naabu gbɛ. Wɔleee nɔ hewɔ ní woloŋmalɔ lɛ fee okadi ní tamɔ nɛkɛ yɛ wolo lɛ naabu, shi wɔle akɛ nɔ krɛdɛɛ ko yɛ Biblia Krɔŋkrɔŋ nɛɛ fã nɛɛ mli ní sa kadimɔ waa.
Nɔyeli Kɛha Jalɛ kɛ Jalɛsaneyeli
3. Mɛɛ nɔkwɛmɔ gbɛjianɔtoo agba afɔ̃ shi yɛ Yesaia kɛ Kpojiemɔ woji lɛ amli?
3 Yesaia yitso 32 lɛ jeɔ shishi kɛ gbalɛ ko ní yɔɔ miishɛɛ ní miiná emlibaa ní sa kadimɔ waa yɛ wɔgbii nɛɛ amli: “Naa, maŋtsɛ ko baaye maŋtsɛ yɛ jalɛ naa, ni lumɛi hu, baaye lumɛi yɛ kojomɔ naa.” (Yesaia 32:1) Hɛɛ, ‘Naa!’ Nɛkɛ sane jajemɔ nɛɛ haa wɔkaiɔ sane jajemɔ ko ní tamɔ nakai nɔŋŋ ní anaa yɛ Biblia lɛ naagbee gbalɛ wolo lɛ mli lɛ, akɛ: “Ni mɔ ni ta maŋtsɛsɛi lɛ nɔ lɛ kɛɛ: Naa, miifee nii fɛɛ ehee.” (Kpojiemɔ 21:5) Biblia mli woji ni ji Yesaia kɛ Kpojiemɔ, ní be ní kã amɛŋmalamɔ teŋ lɛ shɛɔ aaafee afii 900 lɛ fɛɛ kɛ nɔkwɛmɔ gbɛjianɔtoo hee ko mlitsɔɔmɔ ní haa mɔ náa miishɛɛ haa—no ji “ŋwɛi hee,” ni feɔ Maŋtsɛ, Kristo Yesu, ní akɛ lɛ tá maŋtsɛsɛi nɔ yɛ afi 1914, kɛ ehefatalɔi nɔyelɔi 144,000 ní “ahé kɛjɛ gbɔmɛi ateŋ” lɛ—kɛ “shikpɔŋ hee,” ni ji adesai aweku ní efee ekome yɛ jeŋ fɛɛ lɛ.a (Kpojiemɔ 14:1-4; 21:1-4; Yesaia 65:17-25) Kristo kpɔmɔ afɔleshaa lɛ ji nɔ ni haa anyɛɔ atsuɔ gbɛjianɔtoo nɛɛ fɛɛ he nii.
4. Mɛɛ shikpɔŋ hee lɛ shishijee yɔɔ bianɛ?
4 Beni bɔfo Yohane na nɛkɛ hefatalɔi nɔyelɔi 144,000 nɛɛ anaasɔomɔ kwraa yɛ ninaa mli lɛ sɛɛ lɛ, ebɔ amaniɛ akɛ: “Mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli damɔ maŋtsɛsɛi lɛ hiɛ kɛ toobi lɛ hiɛ.” Náa shikpɔŋ hee lɛ shishijee—ni ji asafo babaoo ní amrɔ nɛɛ amɛyifalɛ shɛɔ akpekpei abɔ, ní abua amɛnaa afata mɛi 144,000 ní edara yɛ afii amli lɛ ateŋ mɛi ní eshwɛ ní amɛyi faaa lɛ ahe lɛ. Asafo babaoo nɛɛ ayi baaná wala kɛfo amanehulu kpeteŋkpele ní bɛŋkɛɔ oyayaayai lɛ, ni anɔkwafoi ní abaatee amɛ shi lɛ kɛ mɛi akpekpei akpei abɔ krokomɛi ní abaaha amɛ hegbɛ ní amɛkɛjie hemɔkɛyeli kpo lɛ baafata amɛhe yɛ Paradeiso shikpɔŋ lɛ nɔ. Akɛ naanɔ wala baajɔɔ mɛi fɛɛ ní feɔ nakai lɛ.—Kpojiemɔ 7:4, 9-17, wɔma efã ko nɔ mi.
5-7. Mɛɛ nitsumɔ “lumɛi” ní agba afɔ̃ shi lɛ tsuɔ yɛ Nyɔŋmɔ asafoku lɛ mli?
5 Shi kɛlɛ, shii abɔ ní jeŋ ní nyɛ̃ɛ eyi lɛ obɔ̃ nɛɛ yɔɔ lolo lɛ, ehe miihia ní asafo babaoo lɛ mli bii lɛ aná hebuu. Akɛ enɛ miiha babaoo kɛtsɔ “lumɛi” ni ‘yeɔ lumɛi yɛ kojomɔ naa’ lɛ anɔ. Mɛɛ gbɛjianɔtoo ní nɔ bɛ nɛ! Awie “lumɛi” nɛɛ ahe babaoo lolo yɛ Yesaia gbalɛ wiemɔi ní yɔɔ miishɛɛ lɛ mli akɛ: “Mɔ fɛɛ mɔ aaatsɔ tamɔ abobaahe yɛ kɔɔyɔɔ naa kɛ teemɔhe yɛ nyɔŋmɔnɛmɔ naa, tamɔ faai yɛ ŋã kpataa nɔ loo tɛsaa kpele ko ni haa hɔ̃ɔŋ yɛ shikpɔŋ gbiŋ nɔ.”—Yesaia 32:2.
6 Amrɔ nɛɛ ni wɔyɔɔ jeŋ fɛɛ haomɔ be mli nɛɛ, ehe miihia ní aná “lumɛi,” hɛɛ, onukpai ní ‘baakwɛ tooiku lɛ fɛɛ nɔ,’ ní amɛkwɛ Yehowa tooi lɛ ní amɛtsu jalɛsaneyeli he nii yɛ Yehowa jalɛ shishitoo mlai lɛ kɛ gbeekpamɔ naa. (Bɔfoi lɛ Asaji 20:28) Esa akɛ “lumɛi” nɛɛ ashɛ taomɔ nii ní atsɔɔ yɛ 1 Timoteo 3:2-7 kɛ Tito 1:6-9 lɛ ahe.
7 Yesu wie yɛ egbalɛ kpeteŋkpele ní tsɔɔ bɔ ni “je nɛŋ naagbee lɛ,” ni ji haomɔ be lɛ baafee aha lɛ mli akɛ: “Nyɛkahaa no miifãa nyɛtsui.” (Mateo 24:3-8) Mɛni hewɔ ŋmɛnɛ je nɛŋ shihilɛi ní yɔɔ oshara lɛ efãaa Yesu sɛɛnyiɛlɔi lɛ atsui lɛ? Yiŋtoo kome hewɔ ji akɛ, “lumɛi” lɛ—afɔ amɛ mu jio, amɛfata “tooi krokomɛi” lɛ ahe jio—amɛkɛ anɔkwayeli miibu asafoku lɛ he. (Yohane 10:16) Amɛkɛ ekãa kwɛɔ amɛnyɛmimɛi hii kɛ yei lɛ anɔ, yɛ shihilɛi ní yɔɔ gbeyei tamɔ wekui ateŋ tai kɛ seshii ashishibulemɔ po mli. Akɛni wɔyɛ jeŋ ní bɛ mumɔŋ shihilɛ kpakpa mli hewɔ lɛ, amɛkwɛɔ akɛ susumai ní egbɔjɔ lɛ náa hejɔɔmɔ kɛtsɔ Nyɔŋmɔ Wiemɔ, ni ji Biblia mli anɔkwalei ní tswaa mɔ emaa shi lɛ nɔ.
8. Yehowa miitsɔse “lumɛi” ní jɛ tooi krokomɛi lɛ ateŋ lɛ ni ekɛ amɛ miitsu nii yɛ mɛɛ gbɛ nɔ?
8 Ayɔse mɛi ni ji “lumɛi” lɛ faŋŋ, yɛ afii 50 ní eho lɛ amli. Aatsɔse “lumɛi” ni fata tooi krokomɛi lɛ ahe lɛ ákɛ “lumɔ” kuu ní miida fiofio bɔni afee ni yɛ amanehulu kpeteŋkpele lɛ sɛɛ lɛ, mɛi ní he esa yɛ amɛteŋ lɛ afee mɛi ni efee klalo kɛha halamɔ koni amɛsɔmɔ yɛ nɔkwɛmɔ gbɛhei amli yɛ “shikpɔŋ hee” lɛ nɔ. (Ezekiel 44:2, 3; 2 Petro 3:13) Yɛ mumɔŋ gbɛtsɔɔmɔ kɛ hejɔɔmɔ ní amɛkɛhaa yɛ be mli ní amɛnyiɛɔ hiɛ yɛ Maŋtsɛyeli sɔɔmɔ lɛ mli lɛ hewɔ lɛ, amɛmiijie amɛhe kpo akɛ amɛji “tɛsaa kpele ko ní haa hɔ̃ɔŋ,” ni amɛhaa asafoku lɛ náa hejɔlɛ yɛ ejamɔ nɔkwɛmɔ shishi.b
9. Mɛɛ shihilɛi tsɔɔ akɛ “lumɛi” ahe miihia ŋmɛnɛ?
9 Hebuu ní tamɔ nɛkɛ he miihia Kristofoi ní ejɔɔ amɛhe nɔ lɛ waa, yɛ Satan jeŋ fɔŋ nɛɛ naagbee gbii ní yɔɔ oshara nɛɛ mli. (2 Timoteo 3:1-5, 13) Amale tsɔɔmɔ kɛ lakamɔ wiemɔi ahe kɔɔyɔɔ ni naa wa waa miitswa. Ahum srɔtoi miitswa ákɛ tai ní aawu yɛ jeŋmaji lɛ ateŋ kɛ amɛmli diɛŋtsɛ, kɛ tutuamɔ hu ní akɛbaa Yehowa Nyɔŋmɔ anɔkwa jálɔi lɛ anɔ tɛ̃ɛ lɛ. Yɛ jeŋ ní mumɔŋ nuhɔmɔ eha egbi nɛɛ mli lɛ, anɔkwale nu faai ní yɔɔ krɔŋŋ ní awoko mli muji he miihia Kristofoi waa koni amɛnu ní amɛkɛgbe amɛmumɔŋ kumai lɛ. Miishɛɛ sane ji akɛ, Yehowa ewo shi akɛ e-Maŋtsɛ ní yeɔ nɔ lɛ baatsɔ enyɛmimɛi ní afɔ amɛ mu lɛ kɛ tooi krokomɛi lɛ ateŋ “lumɛi” ní yeɔ buaa amɛ lɛ anɔ ekɛ hewalɛwoo kɛ gbɛtsɔɔmɔ aha mɛi ní ehao kɛ mɛi ní nijiaŋ eje wui lɛ yɛ nɛkɛ hiamɔ be nɛɛ mli. Enɛ hewɔ lɛ, Yehowa baakwɛ ní jalɛ nifeemɔ kɛ jalɛsaneyeli aye nɔ.
Wɔ Hiŋmɛii, Toii, kɛ Tsuii ní Wɔkɛaabo Toi
10. Mɛɛ gbɛjianɔ Yehowa eto koni ewebii ‘ana’ ní ‘amɛnu’ mumɔŋ nibii?
10 Te asafo babaoo lɛ ehere Yehowa teokrase gbɛjianɔtoo lɛ nɔ eha tɛŋŋ? Gbalɛ lɛ tsáa nɔ akɛ: “Ashwilaŋ ninalɔi ahiŋmɛii, ninulɔi atoii hu aaanu nii jogbaŋŋ.” (Yesaia 32:3) Afii ní eho lɛ amli fɛɛ lɛ, Yehowa eto gbɛjianɔ kɛha gbɛtsɔɔmɔ kɛ etsuji ní jara wa kɛha lɛ lɛ amumɔŋ dalɛ. Teokrase Sɔɔmɔ Skul lɛ kɛ kpeei krokomɛi ní ayaa yɛ Yehowa Odasefoi asafoi fɛɛ amli yɛ je lɛŋ fɛɛ lɛ; kpokpaa wulu nɔ, maŋ, kɛ majimaji ateŋ kpeei wuji; kɛ tsɔsemɔ krɛdɛɛ ní akɛhaa “lumɛi” lɛ koni amɛkwɛ asafoku lɛ nɔ yɛ suɔmɔ mli lɛ fɛɛ eye ebua ni anyɛ atswa jeŋ muu fɛɛ nyɛmifeemɔ gbɛjianɔtoo ní efee ekome, ní mɛi akpekpei abɔ yɔɔ mli ama shi. He fɛɛ he ní tookwɛlɔi nɛɛ yɔɔ yɛ shikpɔŋ nɛɛ nɔ lɛ, amɛfee klalo akɛ amɛaabo tsakemɔi ní baa yɛ anɔkwale wiemɔ ní agbɛɔ ashwãa lɛ shishinumɔ mli lɛ toi ní amɛkpɛlɛ nɔ. Akɛni amɛyɛ henilee ní akɛ Biblia lɛ etsɔse lɛ hewɔ lɛ, amɛfee klalo akɛ amɛaanu ní amɛbo toi.—Lala 25:10.
11. Mɛni hewɔ Nyɔŋmɔ webii wieɔ kɛ nɔmimaa bianɛ, shi jeee kɛ momohaa ní nɔmimaa bɛ he lɛ?
11 Kɛkɛ ni gbalɛ lɛ wo ŋaa akɛ: “Mɛi ni tsui yɔɔ flòflò lɛ aaakase nilee, ni momohalɔi alilɛi aaawie pɛpɛɛpɛ ni emli aaatse.” (Yesaia 32:4) Mɔ ko mɔ ko he akafee oyá ní emu saji anaa yɛ nɔ ni ja kɛ nɔ ni ejaaa he. Biblia lɛ kɛɔ akɛ: “Kɛ́ ona nuu ní he yɔɔ oyá kɛ wiemɔ lɛ, hiɛnɔkamɔ yɛ ha kwashia fe lɛ.” (Abɛi 29:20; Jajelɔ 5:2) Dani afi 1919 aaashɛ lɛ, no mli lɛ Babilon susumɔi komɛi po ewo Yehowa webii lɛ ahe muji. Shi kɛjɛ nakai afi lɛ nɔ kɛbaa nɛɛ, Yehowa eha amɛná eyiŋtoi ahe shishinumɔ ní mli kã shi faŋŋ. Amɛna akɛ anɔkwalei ní ejie lɛ kpo etsɔɔ amɛ lɛ jeee nɔ ni jɛ kpalakpalafeemɔ mli, shi moŋ asusu he jogbaŋŋ, ni amrɔ nɛɛ amɛmiiwie kɛ hemɔkɛyeli ni nɔmimaa yɔɔ he, shi jeee kɛ momohaa ní nɔmimaa bɛ he.
“Kwashia”
12. Namɛi ji ‘kwashiai’ lɛ ŋmɛnɛ, ni amɛjieee mlihilɛ kpo yɛ mɛɛ gbɛ nɔ?
12 No sɛɛ lɛ, Yesaia gbalɛ lɛ jie srɔtofeemɔ ko kpo: “Atsɛ́ŋ kwashia akɛ ablade dɔŋŋ, ni shishiulɔ hu abuŋ lɛ oje dɔŋŋ. Shi kwashia wieɔ kwashiai awiemɔ.” (Yesaia 32:5, 6a) Namɔ ji “kwashia” lɛ? Maŋtsɛ David kɛ hetoo lɛ haa shii enyɔ sɔŋŋ, tamɔ nɔ ni ekɛmiima nɔ mi, akɛ: “Kwashia kɛɔ yɛ etsuiŋ akɛ: Nyɔŋmɔ ko bɛ! Amɛfite, amɛnifeemɔ nii lɛ yɛ nyaŋemɔ; mɔ ko mɔ ko bɛ ní feɔ ekpakpa po.” (Lala 14:1; 53:2) Yɛ anɔkwale mli lɛ, mɛi ní kɛɔ akɛ amɛheee Nyɔŋmɔ nɔ amɛyeee lɛ kɛɔ akɛ Yehowa ko bɛ. Yɛ naagbee lɛ, nakai nɔŋŋ “nilelɔi” kɛ mɛi krokomɛi ní feɔ amɛnii tamɔ nɔ ni Nyɔŋmɔ ko bɛ, ní amɛheɔ amɛyeɔ akɛ amɛbuŋ amɛhe akɔntaa amɛhaŋ mɔ ko lɛ hu kɛɔ. Anɔkwale lɛ bɛ gbɔmɛi nɛɛ amli. Mlihilɛ ko bɛ amɛtsuii amli. Amɛbɛ sanekpakpa ko ní kɔɔ suɔmɔ he. Kɛ́ akɛ amɛ to anɔkwa Kristofoi ahe lɛ, amɛshashaoɔ shi akɛ amɛaaye amɛbua mɛi ní ehia amɛ ní amɛyɔɔ haomɔ mli lɛ, loo amɛyeee amɛbuaaa amɛ kwraa po.
13, 14. (a) Ŋmɛnɛŋmɛnɛ beaŋ hemɔkɛyeli kwalɔi feɔ efɔŋ yɛ mɛɛ gbɛ nɔ? (b) Hemɔkɛyeli kwalɔi bɔɔ mɔdɛŋ ní mɛi ni hɔmɔ kɛ kumai yeɔ amɛ lɛ anine akashɛ mɛni nɔ, shi mɛni baajɛ mli aba yɛ naagbee?
13 Nɛkɛ kwashiai nɛɛ ateŋ mɛi babaoo banáa nyɛ̃ɛ amɛhaa mɛi ní fãa Nyɔŋmɔ anɔkwale lɛ he lɛ. “Etsui hu tsuɔ nishaianii, ni eyeɔ kutumpɔo sane, ni ewieɔ sakasaka eshiɔ Yehowa.” (Yesaia 32:6b) Kwɛ bɔ ni enɛ ji anɔkwale yɛ ŋmɛnɛŋmɛnɛ beaŋ hemɔkɛyeli kwalɔi ahe! Yɛ Europa kɛ Asia maji pii amli nɛkɛ lɛ, hemɔkɛyeli kwalɔi kɛ mɛi krokomɛi ní teɔ shi woɔ anɔkwale lɛ efee ekome, ni amɛwieɔ amale diɛŋtsɛ amɛtsɔɔ nɔyelɔi lɛ, kɛ yiŋtoo akɛ no baaha agu Yehowa Odasefoi anitsumɔ lɛ loo atsĩ amɛnaa. Amɛjieɔ “tsulɔ fɔŋ” lɛ mumɔ lɛ kpo, mɔ ni Yesu gba yɛ ehe efɔ̃ shi akɛ: “Kɛji nakai tsulɔ fɔŋ lɛ aaakɛɛ yɛ etsui mli akɛ: Minuntsɔ lɛ miitsi ebaa be lɛ eeto; ni eeebɔi enanemɛi tsuji lɛ yii, ni ekɛ dãatɔlɔi lɛ aaaye ni ekɛ amɛ aaanu lɛ: nakai tsulɔ lɛ nuntsɔ lɛ aaaba yɛ gbi nɔ ní ekwɛɛɛ lɛ gbɛ kɛ ŋmɛlɛtswaa nɔ ní eleee, ni eeetserɛ emli ni eeeha lɛ egbɛfaŋnɔ yɛ osatofoi lɛ ateŋ. Jɛi yaafó kɛ nyanyɔji ashishikpemɔ aaahi.”—Mateo 24:48-51.
14 Yɛ nakai beaŋ nɔŋŋ lɛ, hemɔkɛyeli kwalɔ lɛ haa “mɔ ni hɔmɔ yeɔ lɛ lɛ susuma kãa efolo, ni mɔ ni kumai yeɔ lɛ lɛ ehaaa ená nu enu.” (Yesaia 32:6d) Anɔkwale lɛ henyɛlɔi bɔɔ mɔdɛŋ ní gbɔmɛi ní anɔkwale lɛ he hɔmɔ yeɔ amɛ lɛ anine akashɛ mumɔŋ niyenii nɔ, ni amɛbɔɔ mɔdɛŋ ní mɛi ní kumai yeɔ amɛ lɛ akaná nu ní haa mɔ hejɔɔmɔ, ni ji Maŋtsɛyeli shɛɛ sane lɛ ní amɛnu. Shi nɔ ni baajɛ mli aba yɛ naagbee lɛ baafee nɔ ni Yehowa tsɔ egbalɔi lɛ ateŋ mɔ kroko hu nɔ ejaje etsɔɔ ewebii lɛ, akɛ: “Amɛkɛo aaawu, shi amɛnyɛŋo; ejaakɛ mikɛo yɛ, ni majieo, Yehowa kɛɛ.”—Yeremia 1:19; Yesaia 54:17.
15. Namɛi titri ji ‘shishiulɔi’ lɛ ŋmɛnɛ, mɛɛ “amale wiemɔi” amɛwoɔ he hewalɛ, ni mɛni jɛɔ mli baa?
15 Kɛjɛ afii ohai 20 lɛ teŋgbɛ afii lɛ amli kɛbaa nɛɛ, jeŋba shara etee nɔ egbɛ eshwã babaoo yɛ Kristendom shikpɔji lɛ anɔ. Mɛni hewɔ? Gbalɛ lɛ gba yiŋtoo lɛ ekome efɔ̃ shi akɛ: “Shishiulɔ ŋaa lɛ, efɔŋ ni; etoɔ efɔŋ he ŋaa, koni ekɛ amale wiemɔi akpata mɛi ni nii yɔɔ mɔbɔ lɛ ahiɛ, kɛ́ ohiafoi miiwie nɔ ni ja tete lɛ.” (Yesaia 32:7) Yɛ wiemɔi nɛɛ amlibaa mli lɛ, osɔfoi lɛ titri ji mɛi ni amɛteŋ mɛi babaoo ená subaŋ ko ní ŋmɛɔ nɔ fɛɛ nɔ feemɔ gbɛ yɛ bɔlɛnamɔ ní tsɔɔ gbalashihilɛ hiɛ, kɛ mɛi ní boteko gbalashihilɛ mli ní amɛhiɔ shi yɛ he kome, kɛ hii ní kɛ hii náa bɔlɛ lɛ he—yɛ anɔkwale mli lɛ, yɛ “ajwamaŋbɔɔ kɛ nyaŋemɔ nitsumɔ fɛɛ” he. (Efesobii 5:3) Enɛ hewɔ lɛ, amɛkɛ amale wiemɔi ‘kpataa’ amɛ asafoku lɛ ‘hiɛ.’
16. Mɛni haa anɔkwa Kristofoi náa miishɛɛ lɛ?
16 Nɔ ni tamɔɔɔ nakai lɛ, kwɛ bɔ ni gbalɔ lɛ wiemɔi ní nyiɛ sɛɛ lɛ amlibaa haa mɔ he jɔɔ lɛ! “Shi ablade lɛ abladei anii ahe ejwɛŋɔ, ni abladei anii ahe hu ekãa.” (Yesaia 32:8) Yesu diɛŋtsɛ wo nihamɔ he hewalɛ beni ekɛɛ akɛ: “Nyɛhaa, ni aaaha nyɛ; susumɔ nɔ̃ kpakpa ní anyɛ nɔ ní ahoso ní eyi eteke nɔ mɛi aaaŋɔshãkã nyɛtsitsi; ejaakɛ nɔ susumɔ nɔ̃ ní nyɛkɛsusuɔ lɛ, no nɔŋŋ aaaku sɛɛ aŋɔsusu aha nyɛ.” (Luka 6:38) Bɔfo Paulo hu gbala jwɛŋmɔ kɛtee jɔɔmɔi ní mɛi ní nine kpɔ́ɔ lɛ náa lɛ nɔ beni eŋma akɛ: “Akai Nuntsɔ Yesu wiemɔi lɛ, akɛ lɛ diɛŋtsɛ ekɛɛ: ‘Nɔ̃ hamɔ mli yɛ jɔɔmɔ fe hemɔ.’” (Bɔfoi lɛ Asaji 20:35) Anɔkwa Kristofoi náa miishɛɛ, jeee kɛtsɔ heloonaa ninamɔ loo shihilɛ mli gbɛihemɔ nɔ, shi moŋ kɛtsɔ nihamɔ nɔ—tamɔ bɔ ni Yehowa, amɛ-Nyɔŋmɔ lɛ, ji nihalɔ lɛ pɛpɛɛpɛ. (Mateo 5:44, 45) Amɛnáa miishɛɛ kpele fe fɛɛ kɛjɛɔ Nyɔŋmɔ suɔmɔnaa nifeemɔ, kɛ amɛsuɔmɔ mli ní amɛjɛɔ amɛkɛ amɛhe haa koni amɛha mɛi krokomɛi ale “Nyɔŋmɔ ni ajɔɔ lɛ lɛ anunyam sanekpakpa” lɛ nɔ.—1 Timoteo 1:11.
17. Namɛi tamɔ ‘yei ní yitsei kamɔ amɛyisɛɛ’ ní Yesaia wie amɛhe lɛ ŋmɛnɛ?
17 Yesaia gbalɛ lɛ tsáa nɔ akɛ: “Nyɛ yei ní nyɛhe ejɔ nyɛ lɛ, nyɛtea shi nyɛboa migbee toi! Nyɛ biyei hu, ní nyɛyitsei kamɔ nyɛyisɛɛ lɛ, nyɛfea toi nyɛhaa miwiemɔ lɛ! Wɔsɛɛ afi ko lɛ nyɛhe aaakpokpo, nyɛ yei ní nyɛyitsei kamɔ nyɛyisɛɛ nɛɛ; ejaakɛ wein yibii atsemɔ sɛɛ aaafo, tsei ayibii anaabuamɔ baŋ dɔŋŋ. Nyɛ yei ní nyɛhe ejɔ nyɛ lɛ, nyɛhe ajoa, ni nyɛ mɛi ní nyɛyitsei kamɔ nyɛyisɛɛ lɛ, nyɛhe akpokpoa!” (Yesaia 32:9-11a) Ekolɛ yei nɛɛ asubaŋ lɛ haa wɔkaiɔ mɛi ní kɛɔ ŋmɛnɛ akɛ amɛsɔmɔɔ Nyɔŋmɔ, shi amɛnáaa ekãa yɛ esɔɔmɔ mli lɛ. Anaa nɛkɛ mɛi nɛɛ yɛ “Babilon kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ” jamɔi lɛ amli. (Kpojiemɔ 17:5) Ákɛ nɔkwɛmɔnɔ lɛ, Kristendom jamɔi lɛ amli bii lɛ tamɔ bɔ ni Yesaia wie “yei” nɛɛ ahe eha lɛ pɛpɛɛpɛ. Amɛhe ‘ejɔ amɛ,’ ni jeee amɛhe sane ko ji kojomɔ kɛ hosomɔ ní etsɛŋ ní akɛbaaba amɛnɔ lɛ kwraa.
18. Namɛi akɛ famɔ ha amɛ akɛ ‘amɛkɛ kpekpe aŋmɔ̃lɔ̃ amɛhɛi’ lɛ, ni mɛni hewɔ?
18 Belɛ, akɛ famɔ miiha apasa jamɔ akɛ: “Nyɛkpɔlɔa nyɛtadei ní nyɛhe akã ní nyɛkɛ kpekpe aŋmɔ̃lɔ̃a nyɛhɛi! Nyɛaashimɔ nyɛtsitsii yɛ ŋmɔji ní yɔɔ fɛo lɛ ahewɔ, yɛ weintsei ní woɔ yibii pii lɛ ahewɔ. Ŋmeii kɛ kpitikpitii aaakwɛ̃ yɛ mimaŋ lɛ shikpɔŋ lɛ nɔ, hɛɛ, yɛ nyamɔ maŋ lɛ mli miishɛɛnamɔ tsũi lɛ fɛɛ ayiteaŋ!” (Yesaia 32:11b-13) Etamɔ nɔ ni wiemɔ ni ewie akɛ “Nyɛkpɔlɔa nyɛtadei ní nyɛhe akã” lɛ etsɔɔɔ akɛ amɛbaajie amɛhe yayai kwraa. Eji blema kusum akɛ awoɔ kponɔgbɛ atade loo nɔhaanɔ afɔ̃ɔ shishigbɛ atade nɔ. Bei pii lɛ, kponɔgbɛ atade lɛ ji nɔ ni akɛyooɔ mɔ. (2 Maŋtsɛmɛi 10:22, 23; Kpojiemɔ 7:13, 14) Enɛ hewɔ lɛ gbalɛ lɛ kɛ famɔ miiha apasa jamɔ mli bii lɛ akɛ amɛjie amɛ kponɔgbɛ atadei—ni ji kwa ní amɛkwaa amɛtsɛɔ amɛhe Nyɔŋmɔ tsuji lɛ—ní yɛ no najiaŋ lɛ, amɛwo kpekpe atadei, ni ji amɛkojomɔ ní baa lɛ he awerɛhoyeli he okadi lɛ. (Kpojiemɔ 17:16) Anáaa yibiiwoo ni ji Nyɔŋmɔ gbeyeishemɔ su ko kwraa yɛ Kristendom jamɔ gbɛjianɔtoi, ní kɛɔ akɛ amɛji Nyɔŋmɔ “nyamɔ maŋ” lɛ mli, aloo yɛ jeŋ apasa jamɔ maŋtsɛyeli lɛ mli bii ní eshwɛ lɛ ateŋ. Amɛnɔyeli shikpɔŋ ní amɛtsuɔ nii yɛ mli lɛ woɔ “ŋmeii kɛ kpitikpitii” ni ji hiɛ ní akuɔ afɔ̃ɔ nii anɔ kɛ kwamɔ.
19. Mɛɛ “Yerusalem” hemɔkɛyeli kwalɔ lɛ shihilɛ ko Yesaia kpá he mama?
19 Shihilɛ fɔŋ ní baa lɛ he mfoniri nɛɛ mli lɛɛɔ kɛyaa “Yerusalem” hemɔkɛyeli kwalɔ lɛ hei srɔtoi fɛɛ: “Aaakwa mɔji lɛ, ni aaashi maŋ ní mli yɔɔ sɔkɔsɔkɔ lɛ afɔ̃ shi, gɔŋkpɔ lɛ [Ofel] kɛ buu mɔɔ lɛ aaatsɔmɔ kooloi abui kɛaatee naanɔ, kɛ ŋãŋ tejii amiishɛɛ nɔ̃ kɛ kooloo kui alɛ̀ɛhe.” (Yesaia 32:14) Hɛɛ, Ofel ni ji gɔŋkpɔ lɛ po fata he. Ofel ji Yerusalem fã ko ní kã gɔŋ nɔ, ní haa anáa hefamɔhe ní he wa kɛha maŋ lɛ. Wiemɔ ni awie akɛ Ofel baatsɔ kooloi abui lɛ tsɔɔ amaŋfɔfeemɔ kwraa ni baaba maŋtiase lɛ nɔ. Yesaia wiemɔi lɛ tsɔɔ akɛ “Yerusalem” hemɔkɛyeli kwalɔ lɛ—ni ji Kristendom—hiɛ bɛ ehe nɔ yɛ Nyɔŋmɔ suɔmɔnaa nifeemɔ he. Etsɔ nɔ ni baaa nii yɛ mumɔŋ, ni anaaa anɔkwale kɛ jalɛsaneyeli ko kwraa yɛ emli—etamɔ kooloo diɛŋtsɛ kɛmɔ shi.
Shihilɛ Srɔto ko Ní Yɔɔ Nyam!
20. Mɛni ejɛ Nyɔŋmɔ mumɔ lɛ ní efɔse eshwie ewebii anɔ lɛ mli eba?
20 No sɛɛ lɛ, Yesaia kɛ hiɛnɔkamɔ ní yɔɔ miishɛɛ ha mɛi ní feɔ Yehowa suɔmɔnaa nii lɛ. Amaŋfɔfeemɔ fɛɛ amaŋfɔfeemɔ ní aaaba Nyɔŋmɔ diɛŋtsɛ webii anɔ lɛ baahi shi “kɛyashi beyinɔ ní aaafɔse Mumɔ kɛaajɛ ŋwɛi ashwie wɔnɔ, ní ŋã nɔ aaatsɔ abɔɔ, ní aaabu abɔɔ hu akɛ koo.” (Yesaia 32:15) Miishɛɛ sane ji akɛ, kɛjɛ afi 1919 kɛbaa nɛɛ, Yehowa efɔse emumɔ lɛ eshwie ewebii anɔ babaoo kɛteke nɔ, ni kɛ́ wɔɔkɛɛ lɛ, esaa efee abɔɔ ní woɔ yibii ekoŋŋ, ni ji Odasefoi ní afɔ amɛ mu lɛ, ni nɔ ni enyiɛ sɛɛ kɛba hu ji koo ní yaa nɔ elɛɛɔ, ni ji tooi krokomɛi lɛ. Shweremɔ kɛ hiɛyaa ji otii ní anaa faŋŋ yɛ egbɛjianɔtoo ni yɔɔ shikpɔŋ nɔ ŋmɛnɛ lɛ mli. Nyɔŋmɔ webii jieɔ “Yehowa anunyam lɛ, kɛ wɔ-Nyɔŋmɔ lɛ wulamɔ lɛ” kpo yɛ mumɔŋ paradeiso ní akɛba ekoŋŋ lɛ mli, yɛ be mli ni amɛjajeɔ e-Maŋtsɛyeli ní baa lɛ amɛtsɔɔ yɛ je lɛŋ fɛɛ lɛ.—Yesaia 35:1, 2.
21. Nɛgbɛ anaa jalɛ, kpoofeemɔ, kɛ shweshweeshwe shihilɛ yɛ ŋmɛnɛ?
21 Agbɛnɛ, bó Yehowa shiwoo ní yɔɔ nyam lɛ toi: “Kojomɔ aaahi shi yɛ ŋã lɛ nɔ, ni jalɛ hu aaahe shi yɛ abɔɔ lɛŋ. Ni nii ní jalɛ lɛ aaatsu ji hejɔlɛ, ni jalɛ lɛ mli sɛɛnamɔ ji hejɔɔmɔ kɛ toiŋjɔlɛ kɛaatee naanɔ.” (Yesaia 32:16, 17) Kwɛ bɔ ni enɛ tsɔɔ bɔ ni Yehowa webii amumɔŋ shihilɛ ji ŋmɛnɛ lɛ mli jogbaŋŋ diɛŋtsɛ! Kɛ́ akɛmiito adesai ateŋ mɛi babaoo, ní hetsɛ̃, yiwalɛ nifeemɔ, kɛ mumɔŋ ohia futaa eha amɛmli egbála lɛ ahe lɛ, anɔkwa Kristofoi efee ekome yɛ jeŋ fɛɛ, eyɛ mli akɛ amɛjɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli.” Amɛhiɔ shi, amɛtsuɔ nii, ni amɛsɔmɔɔ yɛ Nyɔŋmɔ jalɛ lɛ kɛ gbeekpamɔ naa, ni amɛfeɔ nakai kɛ hiɛnɔkamɔ akɛ yɛ naagbee lɛ, amɛbaaná anɔkwa toiŋjɔlɛ kɛ shweshweeshwe shihilɛ mli ŋɔɔmɔ kɛya naanɔ.—Kpojiemɔ 7:9, 17.
22. Mɛɛ srɔtofeemɔ yɔɔ Nyɔŋmɔ webii ashihilɛ kɛ mɛi ni yɔɔ apasa jamɔ mli lɛ ashihilɛ lɛ teŋ?
22 Yesaia 32:18 lɛ miiná emlibaa bianɛ yɛ mumɔŋ paradeiso lɛ mli. Ekɛɔ akɛ: “Mimaŋ lɛ aaahi shi yɛ hejɔlɛ shia, kɛ shihilɛhe ní yɔɔ shweshweeshwe, kɛ hejɔɔmɔhe ní yɔɔ kpoo.” Shi yɛ amale Kristofoi lɛ agbɛfaŋ lɛ, “beni koo lɛ aaagbee shi lɛ, nyɔŋmɔŋtɛi aaanɛ, ni aaaba maŋ lɛ shi kwrakwra.” (Yesaia 32:19) Hɛɛ, Yehowa kojomɔ efee klalo ní ebaaba amale maŋ ni ji apasa jamɔ nɔ, tamɔ ahum ní naa wa ní nyɔŋmɔŋtɛi miinɛ yɛ mli, ni ebaafite “koo” ni ji esɛɛfilɔi lɛ fɛɛ kwraa, ni ebaakpata amɛhiɛ kɛya naanɔ!
23. Mɛɛ jeŋ muu fɛɛ nitsumɔ ko bɛŋkɛɔ enaagbee, ni te esa akɛ abu mɛi ní náa mli gbɛfaŋnɔ lɛ aha tɛŋŋ?
23 Gbalɛ lɛ fã nɛɛ baa naagbee akɛ: “Ajɔɔ nyɛ mɛi ní nyɛdũɔ nii yɛ faai fɛɛ naa, ní nyɛŋmɛɔ tsina kɛ teji nane gbɛ lɛ.” (Yesaia 32:20) Tsina kɛ teji ji nitsumɔ kooloi ní Nyɔŋmɔ webii ni hi shi yɛ blema lɛ kɛhuɔ amɛŋmɔji amli ní amɛkɛdũɔ dumɔ wui. Ŋmɛnɛ, Yehowa webii kɛ woji akalamɔ tsɔnei, elɛktrɔnik dɛŋdadei, ŋmɛnɛŋmɛnɛ beaŋ tsũi kɛ tsɔnei ní fãa gbɛ, kɛ nɔ ni fe fɛɛ lɛ, teokrase gbɛjianɔtoo ní efee ekome tsuɔ nii ni amɛkɛkalaa ni amɛjaa Biblia kasemɔ woji akpekpei toi akpei abɔ. Nitsulɔi ní ejɛ amɛsuɔmɔ mli amɛkɛ amɛhe eha, kɛ dɛŋdadei nɛɛ tsuɔ nii ni amɛkɛdũɔ Maŋtsɛyeli anɔkwale dumɔ wui lɛ yɛ shikpɔŋ lɛ fɛɛ nɔ, “yɛ faai fɛɛ naa” diɛŋtsɛ. Ábua hii kɛ yei akpekpei abɔ ní sheɔ Nyɔŋmɔ gbeyei lɛ anaa momo, ni mɛi krokomɛi babaoo diɛŋtsɛ miifata amɛhe. (Kpojiemɔ 14:15, 16) Yɛ anɔkwale mli lɛ, abuɔ amɛ fɛɛ akɛ “ajɔɔ” amɛ!
[Shishigbɛ niŋmai]
a Ekolɛ “maŋtsɛ” ní awie ehe yɛ Yesaia 32:1 lɛ kɔ́ Maŋtsɛ Hezekia he kɛjɛ shishijee. Shi kɛlɛ, Yesaia yitso 32 lɛ mlibaa titri kɔ́ɔ Maŋtsɛ, Kristo Yesu he.
b Kwɛmɔ March 1, 1999, Buu-Mɔɔ, ní Watch Tower Bible and Tract Society of Pennsylvania fee lɛ baafai 13-18.
[Mfonirii ni yɔɔ baafa 331]
Akɛ okadi ni ji “X” ekadi Yesaia yitso 32 lɛ, yɛ Ŋshɔ ní Egbo Wolokpoi lɛ amli
[Mfonirii ni yɔɔ baafa 333]
‘Lumɔ’ fɛɛ ‘lumɔ’ tamɔ abobaahe yɛ kɔɔyɔɔ naa, teemɔhe yɛ nyɔŋmɔnɛmɔ naa, nu yɛ shia ŋã nɔ, kɛ hɔ̃ɔŋ yɛ hulu ní tsoɔ lɛ nɔ
[Mfoniri ni yɔɔ baafa 338]
Kristofonyo náa miishɛɛ kpele kɛjɛɔ sanekpakpa lɛ ní ekɛ mɛi krokomɛi gbaa he sane lɛ mli