Yitso Nyɔŋmai Enyɔ Kɛ Ekpaa
“Maŋbii lɛ Ateŋ Mɔ ko Ekɛɛŋ akɛ: Migbɔjɔ”
1. Mɛni hewɔ wiemɔi ni yɔɔ Yesaia 33:24 lɛ shɛjeɔ mɔ mii lɛ?
“BƆƆ nii lɛ fɛɛ kɛ wɔ dɔmɔɔ ŋtsɔi ni amɛkɛ wɔ kɔ̃mɔɔ kɛbashi ŋmɛnɛŋmɛnɛ.” Nakai ji bɔ ni bɔfo Paulo wie. (Romabii 8:22) Yɛ hiɛyaa ní eba yɛ tsofafeemɔ he nilee mli lɛ fɛɛ sɛɛ lɛ, hela kɛ gbele miiya nɔ eehao adesai aweku lɛ lolo. Belɛ, kwɛ bɔ ni shiwoo ní gbeɔ Yesaia gbalɛ lɛ fã nɛɛ naa lɛ yɔɔ naakpɛɛ diɛŋtsɛ ha! Bo diɛŋtsɛ feemɔ be mli ni “maŋbii lɛ ateŋ mɔ ko ekɛɛŋ akɛ: Migbɔjɔ” lɛ he mfoniri okwɛ. (Yesaia 33:24) Mɛɛ be, ni mɛɛ gbɛ nɔ gbalɛ nɛɛ baaba mli yɛ?
2, 3. (a) Israel maŋ lɛ he miiye yɛ mɛɛ gbɛ nɔ? (b) Nyɔŋmɔ kɛ Ashur tsu nii ákɛ tsɔsemɔ “tso” yɛ mɛɛ gbɛ nɔ?
2 Yesaia ŋma ewolo lɛ yɛ be mli ní Nyɔŋmɔ webii ní ekɛ amɛ efee kpaŋmɔ lɛ ahe miiye yɛ mumɔŋ. (Yesaia 1:5, 6) Amɛbote hemɔkɛyeli kwamɔ kɛ jeŋba shara mli vii aahu akɛ ehe miihia ní amɛná tsɔsemɔ ní mli wa waa kɛjɛ Yehowa Nyɔŋmɔ ŋɔɔ. Yehowa kɛ Ashur tsu nii akɛ “tso” ní ekɛbaatsu nakai tsɔsemɔ lɛ he nii. (Yesaia 7:17; 10:5, 15) Klɛŋklɛŋ lɛ, Israel akutsei nyɔŋma kooyigbɛ maŋtsɛyeli lɛ gbee shi yɛ Ashurbii lɛ ahiɛ yɛ afi 740 D.Ŋ.B. (2 Maŋtsɛmɛi 17:1-18; 18:9-11) Afii fioo komɛi asɛɛ lɛ, Ashur Maŋtsɛ Sanherib je tutuamɔ ko ní mli wa waa shishi eshi Yuda maŋtsɛyeli ni yɔɔ wuoyigbɛ lɛ. (2 Maŋtsɛmɛi 18:13; Yesaia 36:1) Beni Ashur asraafoi ní kpataa nɔ fɛɛ nɔ hiɛ lɛ hoɔ kɛtsɔɔ shikpɔŋ lɛ nɔ lɛ, ebafee faŋŋ akɛ anyɛŋ atsĩ Yuda hiɛkpatamɔ kwraa ní baa lɛ naa.
3 Shi Ashur miiteke hegbɛ ní aha lɛ akɛ egbala Nyɔŋmɔ webii atoi lɛ, ni ekɛ hiɛjoomɔ miidi lɛ diɛŋtsɛ ehiɛnyam taomɔ sɛɛ kɛha je lɛ nɔ kunimyeli. (Yesaia 10:7-11) Ani Yehowa baaŋmɛ gbɛ ní ekɛ yiwalɛ aye ewebii anɔ ní egbalaaa etoi? Ani abaatsá maŋ lɛ mumɔŋ hela lɛ? Wɔkaneɔ bɔ ni Yehowa haa sanebimɔi nɛɛ ahetoo ehaa, yɛ Yesaia yitso 33 lɛ mli.
Fitelɔ lɛ Fitemɔ
4, 5. (a) Mɛɛ shihilɛ tsakemɔ baaba Ashur nɔ? (b) Mɛɛ sɔlemɔ Yesaia sɔle eha Yehowa webii lɛ?
4 Gbalɛ lɛ jeɔ shishi akɛ: “Kpóo ha bo fitelɔ ní bo lɛ afitekoo, bo nihàlɔ ní bo lɛ ahakoo! Kɛ́ ogbe fitemɔ lɛ naa lɛ, bo hu aaafiteo; ni kɛ́ ofɔ̃ɔ nihàa lɛ, bo hu aaahao.” (Yesaia 33:1) Yesaia kɛ fitelɔ lɛ, ni ji Ashur wie tɛ̃ɛ. Beni ehewalɛ yashɛ he ni mli wa fe fɛɛ lɛ, ebafee tamɔ nɔ ni anyɛŋ aye nakai maŋ ní tutuaa mɔ lɛ nɔ kunim. ‘Efite maji, shi lɛ lɛ afiteee lɛ,’ ni ekpata Yuda maŋtiasei lɛ ahiɛ, ni eloo Yehowa we lɛ jwetrii lɛ fɛɛ po kɛtee—ni efee enɛ tamɔ mɔ ko ní anyɛŋ etoi agbala! (2 Maŋtsɛmɛi 18:14-16; 2 Kronika 28:21) Shi, agbɛnɛ nibii baatsɔ sɛɛsɛɛ kwraa. Yesaia kɛ ekãa jaje akɛ: “Bo hu aaafiteo.” Kwɛ bɔ ni gbalɛ nɛɛ ji miishɛjemɔ kɛha anɔkwafoi lɛ!
5 Ehe baahia ní Yehowa anɔkwa jálɔi lɛ kɛ amɛhiɛ afɔ̃ enɔ kɛha yelikɛbuamɔ, yɛ nakai be ní yɔɔ gbeyei lɛ mli. Enɛ hewɔ lɛ, Yesaia sɔle akɛ: “Yehowa, duromɔ wɔ, shi bo gbɛ wɔkwɛɔ! Tsɔ [hewalɛ kɛ sɛɛfimɔ] nine oha amɛ daa leebi, kɛ wɔyiwalaheremɔ hu yɛ fimɔ be lɛ mli! Majimaji joɔ foi yɛ hoofeemɔ gbee naa, ni kɛ́ owó ohe nɔ lɛ, jeŋmaji lɛ gbɛɔ shwãa.” (Yesaia 33:2, 3) Yesaia sɔle yɛ gbɛ ní ja nɔ akɛ Yehowa ajie E-webii lɛ tamɔ bɔ ni E-fee shii abɔ yɛ blema beaŋ lɛ. (Lala 44:4; 68:2) Ni Yesaia sɔlemɔ nɛɛ sɛɛ nɔŋŋ kɛkɛ ni egba hetoo ní Yehowa kɛbaaha lɛ efɔ̃ shi!
6. Mɛni baaba Ashur nɔ, ni mɛni hewɔ enɛ sa jogbaŋŋ lɛ?
6 “Aaakɔlɔ [nyɛ Ashurbii lɛ] nyɛnomŋɔɔ nii, tamɔ baalabii kɔlɔɔ nii; ni tamɔ bɔ ni otukpɛi nyiɛɔ tsukutsuku lɛ, nakai aaanyiɛ tsukutsuku kɛaaba nɔ.” (Yesaia 33:4) Yuda le bɔ ni kooloi ni filikilɔi nɛɛ atutuamɔ kpataa nii ahiɛ ehaa lɛ jogbaŋŋ. Shi amrɔ nɛɛ, abaakpata Yuda henyɛlɔi lɛ ahiɛ kwraa. Abaaye Ashur nɔ kunim butuu, ni no baanyɛ esraafoi lɛ anɔ ní amɛjo foi, ni amɛbaashi hàa nii babaoo yɛ amɛsɛɛ ni Yuda maŋbii lɛ baaloo! Eja gbɛ jogbaŋŋ akɛ Ashur, ni ale lɛ akɛ yiwalɔ lɛ, baaná enibii ní aaahà lɛ mli niiashikpamɔ.—Yesaia 37:36.
Ŋmɛnɛŋmɛnɛ Beaŋ Ashur
7. (a) Namɔ abaanyɛ akɛto Israel maŋ ní he ye yɛ mumɔŋ lɛ he ŋmɛnɛ? (b) Namɔ Yehowa kɛbaatsu nii akɛ “tso” ní ekɛkpata Kristendom hiɛ?
7 Te Yesaia gbalɛ lɛ kɔɔ wɔgbii nɛɛ ahe ehaa tɛŋŋ? Abaanyɛ akɛ Israel maŋ ni he yeɔ yɛ mumɔŋ lɛ ato Kristendom ní yeee anɔkwa lɛ he. Bɔ ni Yehowa kɛ Ashur tsu nii ákɛ “tso” ní ekɛgbala Israel toi lɛ, nakai nɔŋŋ ekɛ “tso” baatsu nii ní ekɛgbala kristendom—kɛ apasa jamɔ maŋtsɛyeli ni ji “Babilon kpeteŋkpele lɛ” fã ni eshwɛ lɛ hu toi. (Yesaia 10:5; Kpojiemɔ 18:2-8) Nakai “tso” lɛ baafee Jeŋmaji Ekomefeemɔ lɛ mli jeŋmaji lɛ—ni ji gbɛjianɔtoo ko ní afee ehe mfoniri yɛ Kpojiemɔ wolo lɛ mli akɛ kooloo ní tsuɔ tamɔ muneele, ní eyɔɔ yitsei kpawo kɛ akolontoi nyɔŋma lɛ.—Kpojiemɔ 17:3, 15-17.
8. (a) Namɔ abaanyɛ akɛto Sanherib he ŋmɛnɛ? (b) Namɛi ŋmɛnɛŋmɛnɛ beaŋ Sanherib baaná ekãa akɛ ebaafa kɛyatutua amɛ lɛ, ni mɛni baajɛ mli aba?
8 Kɛ́ ŋmɛnɛŋmɛnɛ beaŋ Ashur nyiɛ kɛmiifite nii yɛ apasa jamɔ nɔyelihe lɛ mli fɛɛ lɛ, ebaafee tamɔ nɔ ni anyɛŋ atsĩ enaa. Akɛni esu tamɔ Sanherib su hewɔ lɛ, Satan Abonsam baaná ekãa akɛ éfã kɛyatutua—jeee hemɔkɛyeli kwalɔi agbɛjianɔtoi ní sa toigbalamɔ lɛ kɛkɛ, shi moŋ anɔkwa Kristofoi hu. Gbɔmɛi akpekpei abɔ ní eshi Satan je lɛ, ní Babilon Kpeteŋkpele lɛ fata lɛ he lɛ mli kɛba lɛ, ebafata Yehowa mumɔŋ bii ní afɔ amɛ mu lɛ ateŋ mɛi ní eshwɛ lɛ ahe, ni amɛkɔ amɛshidaamɔ kɛha Yehowa Maŋtsɛyeli lɛ. Akɛni Satan, ni ji “je nɛŋ nyɔŋmɔ” lɛ mli efu yɛ bulɛ kɛ hiɛnyam ní anɔkwa Kristofoi kɛhaaa lɛ lɛ he hewɔ lɛ, ebaafa kɛ tutuamɔ wulu diɛŋtsɛ kɛaaba amɛnɔ. (2 Korintobii 4:4; Ezekiel 38:10-16) Bɔ fɛɛ bɔ ni ŋwanejee ko bɛ he akɛ tutuamɔ nɛɛ baafee gbeyei eha lɛ, ehe ebahiaŋ ní Yehowa webii ahe akpokpo kɛ gbeyeishemɔ. (Yesaia 10:24, 25) Amɛyɛ nɔmimaa ní jɛ Nyɔŋmɔ ŋɔɔ akɛ ebaafee “[amɛ]yiwalaheremɔ hu yɛ fimɔ be lɛ mli.” Ekɛ ehe baawo sane lɛ mli, ni ekɛ hiɛkpatamɔ kwraa baaba Satan kɛ esafoku lɛ nɔ. (Ezekiel 38:18-23) Taakɛ eba yɛ blema beaŋ lɛ, abaahà mɛi ní bɔɔ mɔdɛŋ ní amɛhà Nyɔŋmɔ webii anii lɛ diɛŋtsɛ hu anii! (Okɛto Abɛi 13:22b he.) Abaatse Yehowa gbɛi lɛ he, ni abaawo mɛi ní yi baaná wala lɛ nyɔmɔ akɛni amɛtao “ŋaa kɛ nilee babaoo; [kɛ] Yehowa gbeyeishemɔ” sɛɛgbɛ lɛ hewɔ.—Kanemɔ Yesaia 33:5, 6.
Kɔkɔbɔɔ Kɛha Mɛi ní Bɛ Hemɔkɛyeli Lɛ
9. (a) Mɛni Yuda ‘kãkãlɔi’ lɛ kɛ “hejɔlɛ bɔfoi” lɛ baafee? (b) Te Ashur baafee enii yɛ toiŋjɔlɛ he mɔdɛŋbɔi ní baajɛ Yuda lɛ he eha tɛŋŋ?
9 Shi, mɛni baaba mɛi ní yɔɔ Yuda ní amɛbɛ hemɔkɛyeli lɛ anɔ? Yesaia kɛ wiemɔi ní yɔɔ gbeyei tsɔɔ amɛhiɛkpatamɔ ní baaba yɛ Ashur dɛŋ lɛ mli. (Kanemɔ Yesaia 33:7.) Yuda asraafoi ‘kãkãlɔi’ lɛ baabolɔ kɛ gbeyeishemɔ yɛ Ashurbii lɛ atutuamɔ lɛ hewɔ. “Hejɔlɛ bɔfoi,” ni ji maŋ najiaŋdamɔlɔi ní atsu amɛ ní amɛkɛ Ashurbii ní sumɔɔ tawuu lɛ ayafee toiŋjɔlɛ he kpaŋmɔ lɛ kɛ hefɛoyeli kɛ hiɛshishwiemɔ baakpe. Amɛbaafó yoo yɛ omanye ní amɛyeŋ lɛ hewɔ. (Okɛto Yeremia 8:15 he.) Ashur ní yitsoŋ wa waa lɛ enaŋ amɛ mɔbɔ. (Kanemɔ Yesaia 33:8, 9.) Ekɛ yitsoŋwalɛ baaku ehiɛ efɔ̃ kpaŋmɔi ní ekɛ Yuda maŋ lɛ mli bii lɛ efee lɛ anɔ. (2 Maŋtsɛmɛi 18:14-16) Ashur ‘baagbe’ Yuda ‘maji lɛ ahe guɔ,’ ni ebaana amɛ akɛ mɛi ní ebuuu ní sa hefɛoyeli, ni ebuŋ adesa wala kwraa ehaŋ nɔ ko. Shihilɛ lɛ baafite kwraa aahu akɛ, kɛ́ wɔɔkɛɛ lɛ, shikpɔŋ lɛ diɛŋtsɛ baaye awerɛho. Nakai nɔŋŋ Lebanon, Sharon, Bashan, kɛ Karmel hu baaye awerɛho yɛ hiɛkpatamɔ lɛ hewɔ.
10. (a) Kristendom ‘kãkãlɔi’ lɛ baatsɔmɔ mɛi ní nyɛɛɛ nɔ ko kwraa amɛfee yɛ mɛɛ gbɛ nɔ? (b) Namɔ baabu anɔkwa Kristofoi ahe yɛ Kristendom haomɔ gbi lɛ nɔ?
10 Ŋwanejee ko bɛ he akɛ shihilɛi ní tamɔ nɛkɛ baate shi yɛ wɔsɛɛ be ni ebɛŋkɛ lɛ mli beni jeŋmaji lɛ jeɔ tutuamɔ ní amɛkɛbaaba jamɔ nɔ lɛ shishi lɛ. Taakɛ eba yɛ Hezekia gbii lɛ amli lɛ, shi ní aaate ashi asraafoi ní kpataa nii ahiɛ nɛɛ baafee efolo. Kristendom ‘kãkãlɔi’—ni ji emaŋkwralɔi, kɛ mɛi ní kɛ shika fiɔ esɛɛ, kɛ mɛi krokomɛi ní yɔɔ hewalɛ lɛ—nyɛŋ amɛfee nɔ ko ní amɛkɛye amɛbua lɛ. Abaaku maŋkwramɔ kɛ shika gbɛfaŋ ‘kpaŋmɔi,’ loo gbeekpamɔi ní afee koni akɛbu Kristendom nibii ahe lɛ fɛɛ mli. (Yesaia 28:15-18) Mɔdɛŋ fɛɛ ní aaabɔ akɛ aaatsĩ hiɛkpatamɔ naa kɛtsɔ maŋ saji amli ŋaalee nɔ lɛ baafee efolo. Jarayeli nitsumɔi fɛɛ asɛɛ baafo, beni atsĩɔ Kristendom nibii ni eyɔɔ kɛ enitsumɔi ní enáa sɛɛ kɛjɛɔ mli lɛ anaa loo akpataa hiɛ lɛ. Mɔ fɛɛ mɔ ní yɔɔ naanyobɔɔ henumɔi kɛha Kristendom lolo lɛ nyɛŋ nɔ ko kwraa efee, fe akɛ eeedamɔ sɛɛ fɛlɛŋŋ ni eeeye ehiɛkpatamɔ lɛ he awerɛho. (Kpojiemɔ 18:9-19) Ani abaakpata anɔkwa Kristojamɔ hiɛ kɛfata amale nɔ̃ lɛ he? Dabi, ejaakɛ Yehowa diɛŋtsɛ kɛ nɔmimaa wiemɔ nɛɛ eha akɛ: “Agbɛnɛ mate shi, agbɛnɛ mawó miyi nɔ, agbɛnɛ mawó mihe nɔ!” (Yesaia 33:10) Yɛ naagbee lɛ, Yehowa kɛ ehe baawo mli yɛ anɔkwafoi, tamɔ Hezekia hewɔ, ni ebaatsĩ Ashur ta ní efã lɛ naa.—Lala 12:6.
11, 12. (a) Mɛɛ be wiemɔ ni yɔɔ Yesaia 33:11-14 lɛ ná amɛmlibaa, ni yɛ mɛɛ gbɛ nɔ? (b) Mɛɛ kɔkɔbɔɔ Yehowa wiemɔi lɛ kɛhaa ŋmɛnɛ?
11 Mɛi ní yeee anɔkwa lɛ nyɛŋ amɛkɛ amɛhiɛ afɔ̃ hebuu nɛɛ nɔ. Yehowa kɛɛ akɛ: “Nyɛhiɛ jwɛi musũ, nyɛbaafɔ́ gbetselii; nyɛmumɔ ní nyɛmuɔ lɛ ji la ní baashã nyɛ! Ni aaashã maji lɛ akɛ kaaloo, tamɔ ŋmei ní afolɔ ashwie shi ní ashãa yɛ la mli. Nyɛ mɛi ní nyɛyɔɔ shɔŋŋ lɛ, nyɛnua nii ní mifee lɛ! ni nyɛ mɛi ní nyɛbɛŋkɛ lɛ, nyɛyooa mihewalɛ lɛ! Eshafeelɔi ní yɔɔ Zion lɛ ahe miikpokpo, ni ŋmiŋmi emɔmɔ osatofoi lɛ [amɛkɛɔ akɛ] Wɔteŋ namɔ aaahi la ní shãa nii masɛi? ni wɔteŋ namɔ aaahi la ní etsɛ̃ kɛyaa naanɔ lɛ masɛi?” (Yesaia 33:11-14) Eka shi faŋŋ akɛ, wiemɔi nɛɛ kɔɔ be mli ni Yuda kɛ henyɛlɔ hee, ni ji Babilon kpe lɛ he. Yɛ Hezekia gbele sɛɛ lɛ, Yuda ku sɛɛ kɛtee egbɛ̀i fɔji lɛ anɔ ekoŋŋ. Afii nyɔŋmai fioo ní nyiɛ sɛɛ kɛba lɛ amli lɛ, shihilɛ ní yɔɔ Yuda lɛ bafite kwraa aahu kɛyashɛ he ni agbɛnɛ esa akɛ maŋ muu lɛ fɛɛ ana Nyɔŋmɔ mlifu la lɛ mli amanehulu.—5 Mose 32:22.
12 Gbɛjianɔtoi kɛ ŋaai fɔji ní gbɔmɛi toigbolɔi lɛ tsɔɔ ní amɛkɛjo Nyɔŋmɔ kojomɔ naa foi lɛ bafee nɔ ni sɛɛnamɔ ko kwraa bɛ he, tamɔ gbetselii pɛpɛɛpɛ. Yɛ anɔkwale mli lɛ, maŋ lɛ henɔwomɔ kɛ atuatsemɔ mumɔ lɛ diɛŋtsɛ baaha nifeemɔi ni baaya nɔ aahu kɛyabote ehiɛkpatamɔ mli lɛ aje shishi. (Yeremia 52:3-11) Mɛi fɔji lɛ ‘aaashã tamɔ ashãa kaaloo lɛ’—abaakpata amɛhiɛ kwraa! Beni amɛsusuɔ hiɛkpatamɔ ní baa nɛɛ he lɛ, ŋmiŋmi mɔmɔ Yuda maŋ lɛ mli bii atuatselɔi lɛ yɛ gbɛ ní yɔɔ gbeyei nɔ. Wiemɔi ní Yehowa kɛ Yuda ní yeee anɔkwale lɛ wie lɛ feɔ shihilɛ ní Kristendom mli bii lɛ yɔɔ mli ŋmɛnɛ lɛ he mfoniri. Kɛ́ amɛbooo Nyɔŋmɔ kɔkɔbɔɔ lɛ toi lɛ, no lɛ wɔsɛɛ be fɔŋ ko miimɛ amɛ.
‘Ní Aaanyiɛ yɛ Jalɛ Mli’
13. Mɛɛ shiwoo akɛha mɔ ni “nyiɛɔ yɛ jalɛ mli” lɛ, ni mɛɛ gbɛ nɔ eba mli yɛ Yeremia gbɛfaŋ?
13 Yehowa tee nɔ ewie, ni ekɛtsɔɔ srɔtofeemɔ ko akɛ: “Mɔ ni nyiɛɔ yɛ jalɛ mli, ní ewieɔ nii ni ja; mɔ ni hiɔ wieyeli mli nii, ní ekpalaa edɛŋ, koni ekata nyɔɔŋ nii ahe; mɔ ni tsimɔɔ etoii ní ekanu lá shishwiemɔ he sane, ní emiaa ehiŋmɛii, koni ekana nɔ̃ fɔŋ lɛ: lɛ lɛ eeehi ŋwɛi shɔŋŋ, tɛsaai amli mɔji aaatsɔmɔ ebobaahe; aaaŋɔ eniyenii aha lɛ, enu hu emĩiŋ.” (Yesaia 33:15, 16) Taakɛ bɔfo Petro wie yɛ sɛɛ mli lɛ, “[Yehowa, NW] le bɔ ni efeɔ ejieɔ jalɔi yɛ kaa mli, kɛ bɔ ni efeɔ etoɔ mɛi fɔji yɛ piŋmɔ mli kɛyashi kojomɔ gbi lɛ nɔ.” (2 Petro 2:9) Yeremia ná kpɔmɔ ní tamɔ nɛkɛ mli niiashikpamɔ. Beni Babilonbii lɛ bawo amɛmaŋ lɛ he ká lɛ, eba lɛ akɛ esa akɛ gbɔmɛi lɛ “[aŋmɛ] aboloo amɛye kɛ tsuiyeli.” (Ezekiel 4:16) Yei komɛi po ye amɛ diɛŋtsɛ amɛmusuŋ bii. (Yaafo 2:20) Ni kɛlɛ, Yehowa kwɛ ni ahere Yeremia yiwala.
14. Mɛɛ gbɛ nɔ Kristofoi ni yɔɔ ŋmɛnɛ lɛ aaatsɔ ‘amɛnyiɛ yɛ jalɛ mli’?
14 Nakai nɔŋŋ esa akɛ Kristofoi ní yɔɔ ŋmɛnɛ lɛ hu ‘anyiɛ yɛ jalɛ mli,’ ní amɛnyiɛ tɛi ní Yehowa efolɔ eshwie shi lɛ asɛɛ daa. (Lala 15:1-5) Esa akɛ ‘amɛwie nii ni ja,’ ní amɛkpoo amale kɛ nii ní jeee anɔkwale. (Abɛi 3:32) Ekolɛ afɔɔ shishiumɔ kɛ nyɔɔŋ nihamɔ yɛ shikpɔji pii anɔ, shi amɛyɛ nyaŋemɔ kɛha mɔ fɛɛ mɔ ní “nyiɛɔ yɛ jalɛ mli” lɛ. Esa akɛ Kristofoi aná “henilee kpakpa” hu be fɛɛ be yɛ nitsumɔ mli gbɛ̀i kɛ nifeemɔi amli, ní amɛbɔ mɔdɛŋ waa ní amɛtsi amɛhe kɛjɛ ojotswaa loo shishiumɔ ŋaatsɔɔi ahe. (Hebribii 13:18; 1 Timoteo 6:9, 10) Mɔ fɛɛ mɔ ní ‘etsimɔ etoi koni ekanu láshishwiemɔ he sane, ni emia ehiŋmɛii hu koni ekana nɔ fɔŋ’ lɛ baahala lalai ní eboɔ toi kɛ nibii ní ekɛjieɔ ehiɛtserɛ lɛ mli. (Lala 119:37) Yehowa baabu ejálɔi ní hiɔ shi yɛ tɛi ní efolɔ eshwie shi nɛɛ anaa lɛ ahe ni ebaawaje amɛ yɛ ekojomɔ gbi lɛ nɔ.—Zefania 2:3.
Amɛ-Maŋtsɛ lɛ Namɔ
15. Mɛɛ shiwoo baawaje Yudafoi nomii anɔkwafoi lɛ?
15 No sɛɛ lɛ, Yesaia kɛ wɔsɛɛ be he mfoniri ni yɔɔ miishɛɛ nɛɛ ha, akɛ: “Ohiŋmɛii aaana maŋtsɛ lɛ yɛ ehefɛo lɛ mli, amɛaana shikpɔŋ ní lɛɛ tɛtrɛɛ. Otsui aaajwɛŋ ŋmiŋmi lɛ he: nɛgbɛ mɔ ni kaneɔ shika lɛ yɔɔ? nɛgbɛ mɔ ni ŋmɛɔ lɛ yɔɔ? nɛgbɛ mɔ ni kaneɔ mɔji lɛ yɔɔ? Shi onaŋ maŋ ní sane wa lɛ, maŋ ní ewiemɔ wa ní anuuu, ní wieɔ kɛ momohaa lilɛi ní anaaa shishi lɛ.” (Yesaia 33:17-19) Mesia Maŋtsɛ ní baaye nɔ wɔsɛɛ lɛ he shiwoo ní akɛha lɛ kɛ e-Maŋtsɛyeli lɛ baawaje Yudafoi anɔkwafoi lɛ yɛ afii nyɔŋmai abɔ ní amɛkɛbaahi nomŋɔɔ mli yɛ Babilon lɛ mli, eyɛ mli akɛ amɛbaanyɛ amɛna nakai Maŋtsɛyeli lɛ yɛ shɔŋŋ kɛkɛ. (Hebribii 11:13) Kɛ́ Mesia lɛ nɔyeli lɛ ba mli lɛɛlɛŋ lɛ, Babilonbii lɛ ayiwalɛ nifeemɔi lɛ baafee tsutsu nii ní akaiɔ kɛkɛ. Mɛi ni yi baaná wala yɛ Ashur tutuamɔ lɛ mli lɛ kɛ miishɛɛ baabi akɛ: “Nɛgbɛ yiwalɔ lɛ onukpai, mɛi ní he wɔ tóo, ní amɛtutua wɔ, ní amɛhe wɔ onia lɛ yɔɔ?”—Yesaia 33:18, Moffatt.
16. Kɛjɛ mɛɛ be Nyɔŋmɔ webii enyɛ ‘amɛna’ Mesia Maŋtsɛ lɛ, ni mɛni ejɛ mli eba?
16 Eyɛ mli akɛ Yesaia wiemɔi lɛ maa sɛɛkuu kɛmiijɛ Babilon nomŋɔɔ mli lɛ nɔ mi moŋ, shi ebaabi ní Yudafoi nomii aŋkroaŋkroi lɛ amɛ gbohiiashitee lɛ, dani amɛná gbalɛ lɛ fã nɛɛ mlibaa ní eye emuu kɛmɔ shi mli ŋɔɔmɔ. Ni Nyɔŋmɔ tsuji ní yɔɔ ŋmɛnɛ lɛ hu? Kɛjɛ afi 1914 kɛbaa nɛɛ, Yehowa webii enyɛ ‘amɛna,’ loo amɛyoo Mesia Maŋtsɛ lɛ, ni ji Yesu Kristo, yɛ emumɔŋ hefɛo lɛ fɛɛ mli. (Lala 45:3; 118:22-26) Nɔ ni ejɛ mli eba ji akɛ, ákpɔ̃ amɛ kɛjɛ Satan gbɛjianɔtoo fɔŋ lɛ nɔnyɛɛ kɛ ekudɔmɔ shishi. Amɛnáa mumɔŋ shweshweeshwe shihilɛ mli ŋɔɔmɔ yɛ Zion, ni ji Nyɔŋmɔ Maŋtsɛyeli lɛ nɔyelihe lɛ shishi.
17. (a) Mɛɛ shiwoi akɛha yɛ Zion gbɛfaŋ? (b) Yehowa shiwoi ní ekɛha yɛ Zion gbɛfaŋ lɛ ba mli yɛ Mesia Maŋtsɛyeli lɛ kɛ esɛɛfilɔi ní yɔɔ shikpɔŋ nɔ lɛ anɔ yɛ mɛɛ gbɛ nɔ?
17 Yesaia tee nɔ akɛ: “Kwɛmɔ Zion, ni ji wɔgbijurɔyeli maŋ lɛ, ni ohiŋmɛii aaana Yerusalem, shia ní yɔɔ shweshweeshwe, buu ní atsiii, ní afamɔɔɔ ehe shiŋmlitsei lɛ gbi ko gbi ko, ní ehe taŋkpeei lɛ eko eko tseee lɛ. Shi Yehowa ni ji anunyamtsɛ lɛ aaahi shi yɛ jɛi aha wɔ, tamɔ nɔ ni faai kɛ ŋsutɛ̃ŋi ní lɛɛ ebɔle wɔ, ni ahinkɛse kɛ emli tablɔ̃i nyɛŋ jɛi aya, ni lɛlɛ wulu ko nyɛɛɛ afo.” (Yesaia 33:20, 21) Yesaia maa nɔ mi kɛhaa wɔ akɛ anyɛŋ afã loo akpata Nyɔŋmɔ Mesia Maŋtsɛyeli lɛ hiɛ. Kɛfata he lɛ, eyɛ faŋŋ akɛ hebuu nɛɛ mli lɛɛɔ kɛbaa Maŋtsɛyeli lɛ sɛɛfilɔi anɔkwafoi ní yɔɔ shikpɔŋ nɔ ŋmɛnɛ lɛ anɔ. Kɛ́ kaai ní mli wa waa miiba aŋkroaŋkroi pii anɔ po lɛ, Nyɔŋmɔ Maŋtsɛyeli lɛ shishibii lɛ yɛ nɔmimaa akɛ mɔdɛŋ ní abɔɔ ní akpata amɛhiɛ ákɛ asafo lɛ eko kwraa yeŋ omanye. (Yesaia 54:17) Yehowa baabu ewebii lɛ ahe tamɔ bɔ ni faa ni mli kwɔ ní elɛɛ, loo nu jɔɔ buɔ maŋtiase he lɛ. Henyɛlɔ fɛɛ henyɛlɔ ní baaba ní ebatutua amɛ lɛ—kɛ́ ehe wa waa tamɔ “ahinkɛse” aloo “lɛlɛ wulu” po lɛ—ekɛ ehiɛkpatamɔ baakpe!
18. Mɛɛ gbɛnaa nii Yehowa kpɛlɛɔ nɔ?
18 Shi, mɛni hewɔ mɛi ní sumɔɔ Nyɔŋmɔ Maŋtsɛyeli lɛ yɔɔ nɔmimaa waa yɛ ŋwɛi hebuu mli lɛ? Yesaia tsɔɔ mli akɛ: “Yehowa ji wɔ Kojolɔ, Yehowa ji wɔ Mlawolɔ, Yehowa ji wɔ Maŋtsɛ; lɛ diɛŋtsɛ ebaahere wɔyiwala.” (Yesaia 33:22, “NW”) Yehowa kpɛlɛɔ gbɛnaa nii ni ji ewebii, ní kpɛlɛɔ egbɛhe akɛ Maŋtsɛ ní Nɔ Kwɔ Fe Fɛɛ lɛ nɔ lɛ, ahebuu kɛ amɛkudɔmɔ lɛ nɔ. Mɛnɛɛmɛi jɛɔ amɛsuɔmɔ mli amɛbaa amɛhe shi amɛhaa enɔyeli kɛtsɔ e-Mesia Maŋtsɛ lɛ nɔ, ni amɛkpɛlɛɔ nɔ akɛ Yehowa yɛ hegbɛ, jeee ní ekɛaawo mlai kɛkɛ, shi moŋ ní ekwɛ akɛ ayeɔ nɔ hu. Shi kɛlɛ, akɛni Yehowa sumɔɔ jalɛ kɛ jalɛsaneyeli hewɔ lɛ, enɔyeli kɛtsɔ e-Bi lɛ nɔ lɛ, efeŋ jatsu kɛhaŋ mɛi ní jáa lɛ lɛ. Shi moŋ, ‘amɛnáa he sɛɛ’ kɛtsɔ amɛhe shi ní amɛbaa amɛhaa enɔyeli lɛ nɔ. (Yesaia 48:17) Ekwaŋ enɔkwafoi lɛ kɔkɔɔkɔ.—Lala 37:28.
19. Te Yesaia wie bɔ ni Yehowa webii anɔkwafoi lɛ ahenyɛlɔi lɛ nyɛŋ nɔ ko kwraa amɛfee lɛ he eha tɛŋŋ?
19 Yesaia kɛɛ Yehowa webii anɔkwafoi lɛ ahenyɛlɔi lɛ akɛ: “Otaŋkpeei lɛ amli egbɔjɔ, amɛnyɛɛɛ lɛlɛŋtso lɛ amɛhiɛ, amɛnyɛɛɛ abalaa lɛ amɛshĩ! No lɛ aaaja nomŋɔɔ nii ní ahà babaoo lɛ mli, obubuafoi tete aaahà nii.” (Yesaia 33:23) Henyɛlɔ fɛɛ henyɛlɔ ní baabɛŋkɛ amɛ lɛ baafee mɔ ní nyɛɛɛ nɔ ko kwraa efee ekɛshi Yehowa, tamɔ ta lɛlɛ ní etaŋkpeei amli egbɔjɔ, ní elɛlɛŋtso ewɔtsɔ, ní enyɛɛɛ eshĩ abalaa. Nyɔŋmɔ henyɛlɔi lɛ ahiɛkpatamɔ lɛ baaha aná hàa nii babaoo aahu akɛ obubuafoi tete po baaná hàa nii lɛ eko amɛloo kɛya. No hewɔ lɛ, wɔbaanyɛ wɔná hekɛnɔfɔɔ akɛ Yehowa baatsɔ Maŋtsɛ Yesu Kristo nɔ eye ehenyɛlɔi lɛ anɔ kunim yɛ “amanehulu kpeteŋkpele” ní baa lɛ mli.—Kpojiemɔ 7:14.
Tsamɔ Ko
20. Mɛɛ tsamɔ Nyɔŋmɔ webii baaná, ni mɛɛ be?
20 Yesaia gbalɛ lɛ fã nɛɛ baa naagbee kɛ shiwoo ko ní yɔɔ miishɛɛ waa, akɛ: “Maŋbii lɛ ateŋ mɔ ko ekɛɛŋ akɛ: Migbɔjɔ! Ejaakɛ mɛi ní yɔɔ mli lɛ, aaaŋɔ amɛnishaianii lɛ afa amɛ.” (Yesaia 33:24) Gbɔjɔmɔ ní Yesaia wieɔ he lɛ ji mumɔŋ nɔ titri, ejaakɛ ekɛ esha, loo ‘nishaianii’ yɛ tsakpaa. Yɛ wiemɔi nɛɛ ahe nitsumɔ mli klɛŋklɛŋ kwraa lɛ, Yehowa wo shi akɛ ebaatsá maŋ lɛ yɛ mumɔŋ, yɛ amɛkpɔmɔ kɛmiijɛ Babilon nomŋɔɔ mli lɛ sɛɛ. (Yesaia 35:5, 6; Yeremia 33:6; okɛto Lala 103:1-5 he.) Akɛni akɛ amɛtsutsu eshai lɛ eke amɛ hewɔ lɛ, Yudafoi ní baaku amɛsɛɛ lɛ baasaa amɛto jamɔ krɔŋŋ shishi ekoŋŋ yɛ Yerusalem.
21. Yehowa jálɔi ní yɔɔ ŋmɛnɛ lɛ náa mumɔŋ tsamɔ yɛ mɛɛ gbɛ̀i anɔ?
21 Shi kɛlɛ, Yesaia gbalɛ lɛ yɛ emlibaa yɛ ŋmɛnɛŋmɛnɛ beaŋ. Yehowa webii ní yɔɔ ŋmɛnɛ lɛ hu ená mumɔŋ tsamɔ mli ŋɔɔmɔ. Aha amɛye amɛhe kɛjɛ apasa tsɔɔmɔi tamɔ susuma ní gbooo, Triniti lɛ, kɛ hɛl la lɛ he. Amɛnáa jeŋba he gbɛtsɔɔmɔ, ni ehaa amɛyeɔ amɛhe kɛjɛɔ jeŋba shara mli nifeemɔi ahe ni eyeɔ ebuaa amɛ ni amɛfeɔ yiŋkpɛi kpakpai. Ni kɛtsɔ Yesu Kristo kpɔmɔ afɔleshaa lɛ nɔ lɛ, amɛná shidaamɔ kpakpa yɛ Nyɔŋmɔ hiɛ ni amɛnáa henilee kpakpa mli ŋɔɔmɔ. (Kolosebii 1:13, 14; 1 Petro 2:24; 1 Yohane 4:10) Nɛkɛ mumɔŋ tsamɔ nɛɛ yɛ heloonaa sɛɛnamɔi hu. Ákɛ nɔkwɛmɔnɔ lɛ, Kristofoi ahe ní amɛtsiɔ kɛjɛɔ bɔlɛnamɔ mli jeŋba shara kɛ tawa kɛ nitsumɔ he lɛ buɔ amɛhe kɛjɛɔ bɔlɛnamɔ mli helai kɛ kansai komɛi ní amɛaaná lɛ ahe.—1 Korintobii 6:18; 2 Korintobii 7:1.
22, 23. (a) Mɛɛ mlibaa ní yɔɔ nyam Yesaia 33:24 baaná wɔsɛɛ? (b) Mɛni ji anɔkwa jálɔi afaishitswaa ŋmɛnɛ?
22 Kɛfata he lɛ, wiemɔi ní yɔɔ Yesaia 33:24 lɛ baaná amɛmlibaa wulu yɛ Harmagedon sɛɛ, yɛ Nyɔŋmɔ jeŋ hee lɛ mli. Yɛ Mesia Maŋtsɛyeli lɛ nɔyeli shishi lɛ, adesai baaná gbɔmɔtsoŋ tsamɔ kpeteŋkpele kɛfata amɛmumɔŋ tsamɔ lɛ he. (Kpojiemɔ 21:3, 4) Yɛ Satan nibii agbɛjianɔtoo lɛ hiɛkpatamɔ sɛɛ nɔŋŋ lɛ, ŋwanejee ko bɛ he akɛ naakpɛɛ nii ni tamɔ nɔ ni Yesu fee beni eyɔɔ shikpɔŋ nɔ lɛ baaba yɛ je lɛŋ fɛɛ. Shwilafoi baana nii, toimulɔi baanu nii, ni obubuafoi baanyiɛ! (Yesaia 35:5, 6) Enɛ baaha mɛi fɛɛ ní baafo amanehulu kpeteŋkpele lɛ aná nitsumɔ ni yɔɔ nyam, ni ji shikpɔŋ lɛ fɛɛ ní akɛaaba paradeiso shihilɛ mli lɛ mli gbɛfaŋnɔ.
23 Sɛɛ mli, kɛ́ gbohiiashitee lɛ je shishi lɛ, ŋwanejee ko bɛ he akɛ abaatee mɛi ní baaba wala mli ekoŋŋ lɛ ashi kɛ gbɔmɔtsoŋ hewalɛ kpakpa. Shi beni akɛ kpɔmɔ afɔleshaa lɛ jarawalɛ lɛ tsuɔ nii kɛyaa hiɛ babaoo lɛ, heloonaa sɛɛnamɔi babaoo baajɛ mli aba, aahu kɛyashi be ní abaahole adesai anɔ kɛyashɛ emuuyeli mli. Nakai beaŋ jalɔi lɛ ‘ahiɛ baatsɛ̃’ yɛ shishinumɔ diɛŋtsɛ naa. (Kpojiemɔ 20:5, 6) No mli lɛ, “Maŋbii lɛ ateŋ mɔ ko ekɛɛŋ akɛ: Migbɔjɔ,” yɛ mumɔŋ kɛ heloonaa shishinumɔ fɛɛ mli. Mɛɛ shiwoo ní yɔɔ miishɛɛ po nɛ! Eba akɛ anɔkwa jálɔi fɛɛ ni yɔɔ ŋmɛnɛ lɛ baatswa amɛfai shi akɛ amɛaafata mɛi ni baaná emlibaa mli niiashikpamɔ lɛ ahe!
[Mfoniri ni yɔɔ baafa 344]
Yesaia kɛ hekɛnɔfɔɔ sɔle eha Yehowa
[Mfonirii ni yɔɔ baafa 353]
Kpɔmɔ afɔleshaa lɛ hewɔ lɛ, Yehowa webii yɛ shidaamɔ ní he tse yɛ ehiɛ
[Mfoniri ni yɔɔ baafa 354]
Yɛ jeŋ hee lɛ mli lɛ, abaatsa helai babaoo