Yitso Nyɔŋmai Enyɔ Kɛ Kpaanyɔ
Akɛ Paradeiso Eba Ekoŋŋ!
1. Mɛni hewɔ jamɔi pii kɛ paradeiso shihilɛ he hiɛnɔkamɔ haa lɛ?
“YAKA gbɛkpamɔ kɛha paradeiso shihilɛ fata gbɛkpamɔi foji ní kã adesai ajwɛŋmɔ nɔ daa lɛ ahe. Ekolɛ no ji nɔ ni mli wa fe fɛɛ ní ehi shi be kakadaŋŋ. Anaa bɔ ni ashweɔ paradeiso ahaa lɛ he odaseyeli yɛ jamɔ shihilɛi fɛɛ mli.” Nakai ji bɔ ni The Encyclopedia of Religion lɛ kɛɔ. Nɛkɛ gbɛkpamɔ nɛɛ ji adebɔɔ naa nɔ, ejaakɛ Biblia lɛ kɛɔ wɔ akɛ adesai ashihilɛ je shishi yɛ Paradeiso—ni ji abɔɔ fɛfɛo ko ní hela kɛ gbele bɛ mli lɛ mli. (1 Mose 2:8-15) Ebɛ naakpɛɛ akɛ je lɛŋ jamɔi lɛ ateŋ babaoo kɛ wɔsɛɛ be mli shihilɛ yɛ paradeiso ko loo ekroko mli he hiɛnɔkamɔ haa.
2. Nɛgbɛ wɔbaanyɛ wɔná wɔsɛɛ be mli Paradeiso lɛ he anɔkwa hiɛnɔkamɔ yɛ?
2 Wɔbaanyɛ wɔkane wɔsɛɛ be mli Paradeiso he anɔkwa hiɛnɔkamɔ lɛ he sane yɛ Biblia lɛ mli hei babaoo. (Yesaia 51:3) Ákɛ nɔkwɛmɔnɔ lɛ, Yesaia gbalɛ lɛ fã ní aŋma afɔ̃ shi yɛ yitso 35 lɛ tsɔɔ bɔ ni abaatsake kpokpai ni ji ŋã kplanaai lɛ ni amɛaatsɔmɔ tamɔ abɔɔi kɛ ŋmɔji ní baa nii babaoo. Shwilafoi baana nii, mumuii baanyɛ awie, ni toimulɔi baanyɛ anu nii. Awerɛho loo ŋkɔmɔyeli ehiŋ Paradeiso ní awo shi yɛ he nɛɛ mli, ní tsɔɔ akɛ gbele tete po ehiŋ shi dɔŋŋ. Mɛɛ shiwoo ní yɔɔ naakpɛɛ nɛ! Te esa akɛ anu wiemɔi nɛɛ ashishi aha tɛŋŋ? Ani amɛkɛ hiɛnɔkamɔ ko haa wɔ ŋmɛnɛ? Yesaia wolo lɛ yitso nɛɛ he susumɔ kɛ sanebimɔi nɛɛ ahetooi baaha.
Shikpɔŋ ní Tsɔ Amaŋfɔ lɛ Mli Efili Lɛ
3. Taakɛ Yesaia gbalɛ lɛ tsɔɔ lɛ, mɛɛ tsakemɔ ko baaba yɛ shikpɔŋ lɛ gbɛfaŋ?
3 Yesaia gbalɛ ní jɛ mumɔŋ ní kɔɔ Paradeiso ní akɛaaba ekoŋŋ lɛ he lɛ jeɔ shishi kɛ nɛkɛ wiemɔi nɛɛ, akɛ: “Ŋã kpataa kɛ shikpɔŋ gbiŋ lɛ aaanyá, ŋã kplanaa lɛ hu mli aaafili lɛ, ni eeegba afofro tamɔ fɔfɔi! Eeegba afofro babaoo ni emli aaafili lɛ, ni emli aaafili lɛ kɛ miishɛɛ kɛ nyamɔ sɔŋŋ; aaaŋɔ Lebanon anunyam lɛ aha lɛ, kɛ Karmel kɛ Sharon wulamɔ lɛ hu. Amɛaana Yehowa anunyam lɛ, kɛ wɔ-Nyɔŋmɔ lɛ wulamɔ lɛ hu.”—Yesaia 35:1, 2.
4. Mɛɛ be, ni te fee tɛŋŋ ni Yudafoi lɛ amaŋ shikpɔŋ lɛ batsɔ tamɔ ŋã kpalanaa hu?
4 Yesaia ŋmala wiemɔi nɛɛ aaafee afi 732 D.Ŋ.B. Aaafee afii 125 sɛɛ lɛ, Babilonbii lɛ bakpata Yerusalem hiɛ, ni amɛŋɔ Yuda maŋ lɛ mli bii lɛ nom kɛtee. Ashi amɛmaŋ shikpɔŋ lɛ afɔ̃ shi ní mɔ ko mɔ ko bɛ nɔ, etsɔ amaŋfɔ. (2 Maŋtsɛmɛi 25:8-11, 21-26) Kɛtsɔ nɛkɛ gbɛ nɔ lɛ, kɔkɔbɔɔ ní Yehowa kɛha akɛ kɛ́ Israelbii lɛ yeee anɔkwa lɛ, amɛbaaya nomŋɔɔ mli lɛ ba mli anɔkwale. (5 Mose 28:15, 36, 37; 1 Maŋtsɛmɛi 9:6-8) Beni Hebribii amaŋ lɛ batsɔ nomii yɛ maŋsɛɛ shikpɔŋ nɔ lɛ, amɛshi amɛŋmɔji ní agbala nujɔɔi awo mli jogbaŋŋ lɛ kɛ amɛ yeli tsei lɛ ní mɔ ko mɔ ko kwɛɛɛ aahu afii 70, ni ebatsɔ tamɔ ŋã kpalanaa.—Yesaia 64:10; Yeremia 4:23-27; 9:10-12.
5. (a) Akɛ paradeiso shihilɛi ku sɛɛ kɛba shikpɔŋ lɛ nɔ ekoŋŋ yɛ mɛɛ gbɛ nɔ? (b) Gbɔmɛi ‘naa Yehowa anunyam lɛ’ yɛ mɛɛ shishinumɔ naa?
5 Shi kɛlɛ, Yesaia gbalɛ lɛ gba efɔ̃ shi akɛ shikpɔŋ lɛ ehiŋ shi amaŋfɔ kɛyaŋ naanɔ. Abaaha eku sɛɛ etsɔ paradeiso diɛŋtsɛ ekoŋŋ. Akɛ “Lebanon anunyam lɛ” kɛ “Karmel kɛ Sharon wulamɔ lɛ hu” baaha lɛ.a Yɛ mɛɛ gbɛ nɔ? Beni amɛku amɛsɛɛ kɛjɛ nomŋɔɔ mli lɛ, Yudafoi lɛ nyɛ amɛhu amɛŋmɔji lɛ ekoŋŋ ni amɛgbála nujɔɔi amɛwo mli, ni amɛshikpɔŋ lɛ ku sɛɛ etsɔ shikpɔŋ ní baa nii tamɔ bɔ ni eji tsutsu lɛ. Abaanyɛ akɛ enɛ he yijiemɔ aha Yehowa pɛ. Esuɔmɔnaa nii kɛ esɛɛfimɔ kɛ ejɔɔmɔ pɛ ji nɔ ni ha Yudafoi lɛ nyɛ amɛná paradeiso shihilɛi ní tamɔ nɛkɛ mli ŋɔɔmɔ lɛ. Gbɔmɛi nyɛɔ amɛnaa “Yehowa anunyam lɛ, kɛ [amɛ]-Nyɔŋmɔ lɛ wulamɔ lɛ hu” kɛ́ amɛkpɛlɛ nɔ akɛ Yehowa nine yɛ tsakemɔ ní yɔɔ naakpɛɛ ní eba amɛshikpɔŋ lɛ nɔ lɛ mli.
6. Mɛɛ Yesaia wiemɔi lɛ amlibaa ní he hiaa wɔnaa?
6 Shi kɛlɛ, Yesaia wiemɔi lɛ yɛ emlibaa ní he hiaa waa, yɛ Israel shikpɔŋ ní amɛku sɛɛ amɛba nɔ ekoŋŋ lɛ hewɔ. Yɛ mumɔŋ shishinumɔ naa lɛ, Israel yaje shihilɛ gbiŋ, ní tamɔ shia ŋã nɔ shihilɛ mli aahu afii babaoo. Beni nomii lɛ yɔɔ Babilon lɛ, atsĩ jamɔ krɔŋŋ naa kwraa. No mli lɛ amɛbɛ sɔlemɔtsu, amɛbɛ afɔleshaa latɛ, ni amɛbɛ osɔfoi akuu ní ato amɛhe gbɛjianɔ. Afo daa gbi afɔleshaai asɛɛ kwraa. Agbɛnɛ, Yesaia miigba shihilɛ nɛɛ tsakemɔ kwraa eefɔ̃ shi. Najiaŋdamɔlɔi ní jɛ Israel akutsei 12 lɛ fɛɛ mli ku amɛsɛɛ kɛtee Yerusalem, yɛ hii tamɔ Zerubabel, Ezra, kɛ Nehemia hiɛnyiɛmɔ shishi, ni amɛsaa amɛma sɔlemɔtsu lɛ ekoŋŋ, ni amɛjá Yehowa yɛ heyeli mli. (Ezra 2:1, 2) Lɛɛlɛŋ, mumɔŋ paradeiso nɛ!
Amɛná Ekãa yɛ Mumɔ lɛ Mli
7, 8. Mɛni hewɔ ehe hiaa ní Yudafoi nomii lɛ aná jwɛŋmɔ kpakpa lɛ, ni Yesaia wiemɔi lɛ kɛ hewalɛwoo haa yɛ mɛɛ gbɛ nɔ?
7 Yesaia yitso 35 lɛ mli wiemɔi lɛ hiɛ miishɛɛ he okadi ko. Gbalɔ lɛ miijaje wɔsɛɛ be kpakpa ko eetsɔɔ maŋ ní eshwa ehe lɛ. Yɛ anɔkwale mli lɛ, ewie kɛ nɔmimaa kɛ gbɛkpamɔ kpakpa. Afii ohai enyɔ sɛɛ, beni amɛsɛɛkuu kɛ amɛshikpɔŋ nɔ baa lɛ bɛŋkɛɔ lɛ, nakai nɔmimaa kɛ gbɛkpamɔ kpakpa lɛ he miihia Yudafoi nomii lɛ. Yehowa tsɔ Yesaia nɔ ewo amɛ ŋaa yɛ gbalɛ wiemɔ mli akɛ: “Nyɛwajea niji ní mli eje wui lɛ, nyɛwoa nakutsei ní egbɔjɔ lɛ hewalɛ! Mɛi ni tsui fãa lɛ, nyɛkɛa amɛ akɛ: Nyɛwajea nyɛhe, nyɛkashea gbeyei! Naa, nyɛ-Nyɔŋmɔ lɛ miiba kɛ oweletɔɔ kɛ Nyɔŋmɔ najiaŋtoo, ni eeehere nyɛyiwala hu.”—Yesaia 35:3, 4.
8 Nomŋɔɔ be kakadaŋŋ lɛ naagbee ji be kɛha nifeemɔ. Persia Maŋtsɛ Koresh, ni ji dɛŋdade ní Yehowa kɛtsu nii ní ekɛtɔ Babilon nɔ owele lɛ, ejaje akɛ esa akɛ ayato Yehowa jamɔ shishi ekoŋŋ yɛ Yerusalem. (2 Kronika 36:22, 23) Esa akɛ Hebri wekui akpei abɔ ato amɛ gbɛjianɔ koni amɛfã gbɛ ní yɔɔ oshara lɛ kɛjɛ Babilon kɛya Yerusalem. Kɛ́ amɛyashɛ jɛmɛ lɛ, ebaabi ní amɛmamɔ shihilɛhei ní hi bɔ ni sa, koni amɛsaa amɛhe hu kɛha nitsumɔ kpele ni ji sɔlemɔtsu lɛ kɛ maŋtiase lɛ ní amɛaasaa amɛma ekoŋŋ lɛ. Enɛ fɛɛ bafee nitsumɔ ní jeɔ mɔ nijiaŋ wui waa kɛha Yudafoi ní yɔɔ Babilon lɛ ateŋ mɛi komɛi. Shi kɛlɛ, jeee be ni afeɔ gbedee, loo asheɔ gbeyei nɛ. Esa akɛ Yudafoi lɛ awowoo amɛhe hewalɛ ní amɛná Yehowa mli hekɛnɔfɔɔ. Ema nɔ mi eha amɛ akɛ ebaahere amɛyiwala.
9. Mɛɛ shiwoo ní yɔɔ nyam akɛha Yudafoi ní baaku amɛsɛɛ lɛ?
9 Mɛi ní aha amɛye amɛhe kɛjɛ Babilon nomŋɔɔ mli lɛ baaná yiŋtoo kpakpa ní amɛaadamɔ nɔ amɛmli afili amɛ, ejaakɛ wɔsɛɛ be ní yɔɔ nyam miimɛ amɛ kɛ́ amɛku amɛsɛɛ kɛtee Yerusalem lɛ. Yesaia gba efɔ̃ shi akɛ: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaalá kɛ nyamɔ.”—Yesaia 35:5, 6a.
10, 11. Mɛni hewɔ esa akɛ Yesaia wiemɔi lɛ aná mumɔŋ shishinumɔ kɛha Yudafoi ní ku amɛsɛɛ lɛ, ni mɛni amɛtsɔɔ?
10 Eka shi faŋŋ akɛ, Yehowa susuɔ ewebii lɛ amumɔŋ shihilɛ he. Akɛ afii 70 ní amɛyaye yɛ nomŋɔɔ mli lɛ egbala amɛtoi yɛ amɛ tsutsu hemɔkɛyeli kwamɔ lɛ hewɔ. Ni kɛlɛ, beni ekɛ tsɔsemɔ lɛ haa amɛ lɛ, Yehowa haaa ewebii lɛ atsɔmɔ shwilafoi, toimulɔi, obubuafoi, kɛ mumuii. No hewɔ lɛ, Israel maŋ lɛ ní ekɛ amɛ ku sɛɛ kɛba ekoŋŋ lɛ biii ní etsa amɛgbɔmɔtsoŋ helai. Yehowa saa nɔ ni laaje lɛ, ni ji mumɔŋ hewalɛ kpakpa lɛ ekoŋŋ.
11 Atsá Yudafoi ní shwa amɛhe lɛ kɛ shishinumɔ akɛ amɛná jwɛŋmɔ yɛ mumɔŋ ekoŋŋ—no ji amɛmumɔŋ ninamɔ kɛ nyɛmɔ ní amɛyɔɔ ní amɛnuɔ Yehowa wiemɔ, ní amɛboɔ toi, ní amɛwieɔ hu lɛ. Amɛbale bɔ ni ehe hiaa ní amɛbɛŋkɛ Yehowa kpaakpa lɛ. Amɛtsɔ amɛjeŋba kpakpa lɛ nɔ amɛkɛ miishɛɛ ‘lá’ yijiemɔ lalai amɛha amɛ-Nyɔŋmɔ lɛ. Mɔ ní tsutsu ko lɛ eji ‘obubuafo’ lɛ he tswaa shi ni enáa ekãa yɛ jamɔ ní ekɛhaa Yehowa lɛ mli. ‘Etumɔɔ’ yɛ mfonirifeemɔŋ, ‘taakɛ ofrote tumɔɔ lɛ.’
Yehowa Ha Ewebii Ná Hejɔɔmɔ
12. Yehowa kɛ nu babaoo baajɔɔ shikpɔŋ lɛ kɛyashi nɛgbɛ?
12 Ewa akɛ aaafee paradeiso he mfoniri ní nu bɛ jɛmɛ. Klɛŋklɛŋ Paradeiso ni hi Eden lɛ ná nu babaoo diɛŋtsɛ. (1 Mose 2:10-14) Shikpɔŋ ní akɛha Israel lɛ hu ji “shikpɔŋ ní faai kɛ nubui kɛ kpaakpoi yɔɔ nɔ.” (5 Mose 8:7) Belɛ, eja gbɛ jogbaŋŋ akɛ Yesaia kɛ shiwoo ní haa mɔ he jɔɔ lɛ nɛɛ ha, akɛ: “Nui aaatue yɛ ŋã kpataa nɔ, ni faai aaaho yɛ ŋã olɛŋlɛ nɔ. Shia ŋã ní nɔ edɔ aaatsɔ kpaakpo, ni shikpɔŋ ní nu bɛ nɔ aaatsɔ nui ní baa sɔŋŋ; ni ŋãŋgbeei ashihilɛhe, he ni amɛbumɔɔ lɛ, jwɛi kɛ gãlãi kɛ ntoo aaakwɛ̃ yɛ jɛi.” (Yesaia 35:6b, 7) Kɛ́ Israelbii lɛ miikwɛ shikpɔŋ lɛ nɔ ekoŋŋ lɛ, hei ní tsɔmɔ amaŋfɔ be ko, ní tsutsu lɛ ŋãŋgbeei nyiɛɔ jɛmɛ lɛ fɛɛ baafee fɛo kɛ jwɛi fɔ́ ní yɔɔ frɔfrɔ. Shikpɔŋ gbiŋ ní mulu yɔɔ nɔ waa lɛ baatsake ni ebaatsɔ he ni “ŋmiamɔ” yɔɔ, he ni adaa kɛ jwɛi krokomɛi ní kwɛ̃ɔ yɛ nu mli lɛ baanyɛ akwɛ̃ yɛ.—Hiob 8:11.
13. Mɛɛ mumɔŋ nu babaoo abaaha maŋ ní akɛ amɛ eku sɛɛ kɛba ekoŋŋ lɛ anine ashɛ nɔ?
13 Shi, nɔ ni he hiaa fe enɛ ji mumɔŋ nu ni ji anɔkwale ní Yudafoi ní akɛ amɛ eku sɛɛ kɛba ekoŋŋ lɛ baaná mli ŋɔɔmɔ lɛ. Yehowa baaha amɛ nilee, hewalɛwoo, kɛ miishɛjemɔ kɛtsɔ e-Wiemɔ lɛ nɔ. Kɛfata he lɛ, hii anɔkwafoi ní edara yɛ afii amli kɛ lumɛi lɛ baafee “tamɔ faai yɛ ŋã kpataa nɔ.” (Yesaia 32:1, 2) Mɛi ní woɔ jamɔ krɔŋŋ he hewalɛ, tamɔ Ezra, Hagai, Yeshua, Nehemia, Zakaria, Zerubabel, baafee Yesaia gbalɛ lɛ mlibaa he odaseyeli ní hiɛ kamɔ lɛɛlɛŋ.—Ezra 5:1, 2; 7:6, 10; Nehemia 12:47.
“Gbɛ Krɔŋkrɔŋ Lɛ”
14. Tsɔɔmɔ bɔ ni gbɛfãa kɛjɛ Babilon kɛmiiya Yerusalem ji lɛ mli.
14 Shi, dani Yudafoi nomii lɛ baanyɛ aná heloonaa kɛ mumɔŋ paradeiso shihilɛi ní tamɔ nɛkɛ mli ŋɔɔmɔ lɛ, ebaabi ní amɛfã gbɛ kakadaŋŋ ní yɔɔ oshara lɛ, kɛjɛ Babilon kɛbaho Yerusalem. Kɛ́ amɛtsɔ gbɛ ní yɔɔ tɛ̃ɛ nɔ lɛ, no lɛ amɛbaatsɔ shikpɔŋ gbiŋ, ní enɔ yɔɔ olɛŋlɛ, ni lɛɛmɔ aaashɛ kilomitai 800 nɔ kɛya. Gbɛ kroko ní nɔ nyiɛmɔ waaa tsɔ lɛ baabi ní amɛnyiɛ kilomitai 1,600 kɛya. Gbɛ̀i enyɔ lɛ fɛɛ baabi ní amɛye nyɔji abɔ yɛ kɔɔyɔŋ tsakemɔi srɔtoi amli, kɛ oshara hu ni ji kooloi awuiyelɔi kɛ gbɔmɛi ní feɔ amɛnii tamɔ kooloi fɛɛ ní amɛkɛ amɛ aaakpe. Shi kɛlɛ, mɛi ní heɔ Yesaia gbalɛ lɛ amɛyeɔ lɛ haooo amɛhe fe nine. Mɛni hewɔ?
15, 16. (a) Mɛɛ hebuu Yehowa kɛha Yudafoi anɔkwafoi lɛ yɛ amɛ gbɛfãa kɛmiiya amɛmaŋ lɛ mli? (b) Mɛɛ shishinumɔ kroko naa Yehowa kɛ gbɛjegbɛ ní nɔ yɔɔ shweshweeshwe ha Yudafoi lɛ?
15 Yehowa tsɔ Yesaia nɔ ewo shi akɛ: “Aaaje gbɛjegbɛ yɛ jɛi kɛ gbɛ ko ni aaatsɛ lɛ gbɛ krɔŋkrɔŋ lɛ; mɔ ko ni he tseee enyiɛŋ nɔ; ejaakɛ amɛ aje aha, ni mɛi ni nyiɛɔ nɔ lɛ, kɛ́ kwashiai tete ni lɛ, amɛduŋ gbɛ. Jata ko jata ko ehiŋ jɛi, ni kooloo awuiyelɔ ko enyiɛŋ nɔ, anaŋ amɛ yɛ jɛi kwraa; mɛi ní ajie amɛ lɛ aaanyiɛ nɔ.” (Yesaia 35:8, 9) Yehowa eku sɛɛ ehe ewebii lɛ ekoŋŋ! Amɛji ‘emɛi ní ejie amɛ,’ ni eema nɔ mi eeha amɛ akɛ ebaakwɛ amɛnɔ shweshweeshwe kɛya amɛmaŋ. Ani gbɛ diɛŋtsɛ ko yɛ ní agbá, ní awó nɔ, ní abuɔ he, kɛjɛ Babilon kɛyaa Yerusalem? Dabi, shi nɔmimaa yɛ hebuu ní Yehowa kɛbaaha ewebii lɛ yɛ amɛgbɛfãa lɛ mli lɛ he aahu akɛ etamɔ nɔ ni amɛnyiɛ gbɛjegbɛ ní tamɔ nɛkɛ nɔ.—Okɛto Lala 91:1-16 he.
16 Abu Yudafoi lɛ ahe hu kɛjɛ mumɔŋ osharai ahe. “Gbɛ krɔŋkrɔŋ lɛ” ji mfonirifeemɔŋ gbɛ. Mɛi ni bɛ bulɛ kɛha krɔŋkrɔŋ nii loo amɛhe tseee yɛ mumɔŋ lɛ esaaa kɛhaaa gbɛfãa yɛ nɔ. Ataooo amɛ yɛ shikpɔŋ ní aku sɛɛ akɛ amɛ eba nɔ ekoŋŋ lɛ nɔ. Akanyaa mɛi ní akpɛlɛ amɛnɔ lɛ yɛ gbɛ kpakpa nɔ. Amɛkuuu amɛsɛɛ kɛyaaa Yuda kɛ Yerusalem yɛ maŋhedɔɔ mli henɔwomɔ mumɔ mli, aloo ní amɛyadi amɛ diɛŋtsɛ amɛhiamɔ nii asɛɛ. Yudafoi ní jwɛŋmɔ yɔɔ mumɔŋ nibii anɔ lɛ yɔseɔ akɛ yiŋtoo titri hewɔ ní amɛkuɔ amɛsɛɛ lɛ ji ní amɛyasaa amɛto Yehowa jamɔ krɔŋŋ shishi ekoŋŋ yɛ nakai shikpɔŋ lɛ nɔ.—Ezra 1:1-3.
Yehowa Webii Amli Fili Amɛ
17. Yesaia gbalɛ lɛ shɛje Yudafoi anɔkwafoi lɛ amii yɛ amɛnomŋɔɔ be kakadaŋŋ lɛ mli yɛ mɛɛ gbɛ nɔ?
17 Yesaia gbalɛ lɛ yitso 35 lɛ baa naagbee kɛ wiemɔ ní yɔɔ miishɛɛ nɛɛ, akɛ: “Mɛi ní Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala; naanɔ miishɛɛ aaahi amɛyiteaŋ, amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi.” (Yesaia 35:10) Ekolɛ Yudafoi nomii ní kɛ amɛhiɛ fɔ̃ gbalɛ nɛɛ nɔ kɛha miishɛjemɔ kɛ hiɛnɔkamɔ beni amɛyɔɔ nomŋɔɔ mli lɛ baasusu bɔ ni baafee ní emli otii srɔtoi lɛ fɛɛ baaba mli lɛ he. Eeenyɛ efee akɛ ekolɛ amɛnuuu gbalɛ lɛ fãi babaoo ashishi. Ni kɛlɛ, ebafee faŋŋ diɛŋtsɛ akɛ “[amɛaaku] amɛsɛɛ kɛaaba ekoŋŋ, ni amɛaaba Zion.”
18. Akɛ mlifilimɔ kɛ miishɛɛ ye awerɛho kɛ ŋtsɔidɔɔmɔ ní amɛhi mli yɛ Babilon lɛ najiaŋ yɛ amɛshikpɔŋ ní akɛ amɛ ba nɔ ekoŋŋ lɛ nɔ yɛ mɛɛ gbɛ nɔ?
18 No hewɔ lɛ, yɛ afi 537 D.Ŋ.B. lɛ, hii aaashɛ 50,000 (ní tsuji ni fa fe 7,000 fata he) kɛ yei kɛ gbekɛbii fã gbɛ ní heɔ nyɔji ejwɛ lɛ kɛku amɛsɛɛ kɛtee Yerusalem, kɛ hekɛnɔfɔɔ kwraa yɛ Yehowa mli. (Ezra 2:64, 65) Nyɔji fioo pɛ sɛɛ lɛ, amɛma Yehowa afɔleshaa latɛ lɛ, ni amɛfee nibii fɛɛ klalo kɛha sɔlemɔtsu lɛ maa kwraa kɛmɔ shi. Yesaia gbalɛ ní eye afii 200 lɛ eba mli. Akɛ mlifilimɔ kɛ miishɛɛ eye awerɛho kɛ ŋtsɔidɔɔmɔ ní maŋ lɛ hi mli beni amɛyɔɔ Babilon lɛ najiaŋ yɛ amɛshikpɔŋ ní akɛ amɛ eba nɔ ekoŋŋ lɛ nɔ. Yehowa eha eshiwoo lɛ eba mli. Akɛ paradeiso—diɛŋtsɛ kɛ mumɔŋ nɔ̃ fɛɛ—eku sɛɛ eba ekoŋŋ!
Maŋ Hee ko Fɔmɔ
19. Mɛni hewɔ abaanyɛ akɛɛ akɛ Yesaia gbalɛ lɛ ná emlibaa ní yashɛɔ he ko pɛ yɛ afii ohai ekpaa D.Ŋ.B. lɛ?
19 Shi kɛlɛ, Yesaia yitso 35 lɛ mlibaa yɛ afii ohai ekpaa D.Ŋ.B. lɛ yashɛɔ he ko pɛ. Paradeiso shihilɛi ní Yudafoi ní aha amɛku amɛsɛɛ kɛba lɛ ná mli ŋɔɔmɔ lɛ sɛɛ etsɛɛɛ. Yɛ be ko sɛɛ lɛ, akɛ amale jamɔ mli tsɔɔmɔi kɛ maŋhedɔɔ bawo jamɔ krɔŋŋ lɛ he muji. Yudafoi lɛ babote awerɛhoyeli kɛ ŋtsɔidɔɔmɔ shihilɛ mli ekoŋŋ yɛ mumɔŋ. Yɛ naagbee lɛ, Yehowa kpoo amɛ kwraa akɛ emaŋ. (Mateo 21:43) Toigbele gbɛ ní amɛkɔ ekoŋŋ lɛ hewɔ lɛ, amɛmlifilimɔ lɛ sɛɛ etsɛɛɛ. Enɛ fɛɛ tsɔɔ akɛ Yesaia yitso 35 lɛ baaná emlibaa kroko ní da.
20. Mɛɛ Israel hee ko ba shihilɛ mli yɛ Ŋ.B. klɛŋklɛŋ afii oha lɛ mli?
20 Yɛ Yehowa diɛŋtsɛ be mli lɛ, Israel kroko, ni ji mumɔŋ nɔ̃, ba shihilɛ mli. (Galatabii 6:16) Yesu saa gbɛ kɛha Israel hee nɛɛ fɔmɔ yɛ eshikpɔŋ nɔ sɔɔmɔ nitsumɔ be lɛ mli. Esaa eto jamɔ krɔŋŋ shishi ekoŋŋ, ni etsɔ enitsɔɔmɔi lɛ anɔ eha anɔkwale nui bɔi hoo ekoŋŋ. Etsá mɛi ni he yeɔ lɛ, yɛ gbɔmɔtsoŋ kɛ mumɔŋ fɛɛ. Miishɛɛ bolɔmɔ jije beni ajajeɔ Nyɔŋmɔ Maŋtsɛyeli lɛ he sanekpakpa lɛ atsɔɔ lɛ. Egbele kɛ eshitee lɛ sɛɛ otsii kpawo mli lɛ, Yesu ní awo ehiɛ nyam lɛ to Kristofoi asafo, ni ji mumɔŋ Israel ní Yudafoi kɛ mɛi krokomɛi fɛɛ ní akɛ Yesu lá ní efɔse eshwie shi lɛ ekpɔ̃ amɛ lɛ yɔɔ mli, ní afɔ́ amɛ akɛ Nyɔŋmɔ mumɔŋ bii kɛ Yesu nyɛmimɛi, ní akɛ mumɔ krɔŋkrɔŋ efɔ amɛ mu lɛ shishi.—Bɔfoi lɛ Asaji 2:1-4; Romabii 8:16, 17; 1 Petro 1:18, 19.
21. Yɛ klɛŋklɛŋ afii oha lɛ mli Kristofoi asafo lɛ gbɛfaŋ lɛ, mɛɛ nibii komɛi ní ba abaanyɛ abu lɛ akɛ eji Yesaia gbalɛ lɛ fãi komɛi amlibaa?
21 Beni bɔfo Paulo ŋmaa wolo kɛyaha mumɔŋ Israel mli bii lɛ, etsɛ́ Yesaia 35:3 lɛ mli wiemɔi lɛ asɛɛ ni ekɛɛ akɛ: “Nyɛwajea niji ní mli eje wui kɛ nakutsei ní egbɔjɔ lɛ.” (Hebribii 12:12) Belɛ, eka shi faŋŋ akɛ, Yesaia yitso 35 lɛ mli wiemɔi lɛ ná emlibaa yɛ Ŋ.B. klɛŋklɛŋ afii oha lɛ mli. Yɛ eshishinumɔ diɛŋtsɛ naa lɛ, Yesu kɛ ekaselɔi lɛ tsɔ naakpɛɛ gbɛ nɔ amɛha shwilafoi na nii ni toimulɔi hu nu nii. Amɛye amɛbua “obubuafoi” lɛ ni amɛnyiɛ, kɛ mumuii lɛ hu ni amɛbɔi wiemɔ ekoŋŋ. (Mateo 9:32; 11:5; Luka 10:9) Nɔ ni he hiaa fe no ji akɛ, mɛi ní yɔɔ jalɛ tsuii lɛ ye amɛhe kɛjɛ apasa jamɔ mli ni amɛbaná mumɔŋ paradeiso mli ŋɔɔmɔ yɛ Kristofoi asafo lɛ mli. (Yesaia 52:11; 2 Korintobii 6:17) Taakɛ eji yɛ Yudafoi ní ku amɛsɛɛ kɛjɛ Babilon lɛ agbɛfaŋ lɛ, heyelilɔi nɛɛ na akɛ mumɔ kpakpa ní yɔɔ ekãa he miihia.—Romabii 12:11.
22. Te fee tɛŋŋ ni Kristofoi anɔkwafoi ní taoɔ anɔkwale lɛ yɛ ŋmɛnɛŋmɛnɛ beaŋ lɛ yaje Babilon nomŋɔɔ mli hu?
22 Ni wɔgbii nɛɛ amli hu? Ani Yesaia gbalɛ lɛ yɛ mlibaa kroko, nɔ ni kɔɔ Kristofoi asafo lɛ he ŋmɛnɛ, ní eye emuu kwraa kɛmɔ shi? Hɛɛ. Yɛ bɔfoi lɛ agbele sɛɛ lɛ, anɔkwale Kristofoi ní afɔ amɛ mu lɛ ayifalɛ nɔ gbɔ́ kwraa, ni amale Kristofoi, ni ji “jwɛi” lɛ shwere babaoo yɛ je lɛŋ. (Mateo 13:36-43; Bɔfoi lɛ Asaji 20:30; 2 Petro 2:1-3) Yɛ afii ohai 19 lɛ mli po, beni aŋkroaŋkroi anɔkwafoi bɔi amɛhe tsimɔ kɛmiijɛ Kristendom he ní amɛbɔi jamɔ krɔŋŋ sɛɛgbɛ taomɔ lɛ, tsɔɔmɔi ní damɔɔɔ ŋmalɛi anɔ lɛ tee nɔ ewo shishinumɔ ní amɛyɔɔ lɛ he muji. Yɛ afi 1914 lɛ, akɛ Yesu tá maŋtsɛsɛi nɔ akɛ Mesia Maŋtsɛ, shi yɛ no sɛɛ nɔŋŋ lɛ, shihilɛ lɛ bafee tamɔ nɔ ni hiɛnɔkamɔ bɛ mli kɛha anɔkwafoi nɛɛ ní taoɔ anɔkwale lɛ. Yɛ gbalɛ mlibaa mli lɛ, jeŋmaji lɛ ‘kɛ amɛ wu ni amɛye amɛnɔ kunim,’ ni agbe mɔdɛŋ ní nɛkɛ Kristofoi anɔkwafoi nɛɛ bɔɔ ní amɛshiɛ sanekpakpa lɛ amɛtsɔɔ lɛ kwraa. Yɛ naagbee lɛ, amɛtee Babilon nomŋɔɔ mli.—Kpojiemɔ 11:7, 8.
23, 24. Yesaia wiemɔi lɛ eba mli yɛ Nyɔŋmɔ webii ateŋ kɛjɛ afi 1919 kɛbaa nɛɛ yɛ mɛɛ gbɛi anɔ?
23 Shi kɛlɛ, nibii tsake yɛ afi 1919 lɛ mli. Yehowa jie ewebii lɛ kɛjɛ nomŋɔɔ mli. Amɛje shishi amɛkpoo apasa tsɔɔmɔi ní tsutsu ko lɛ ewo amɛjamɔ lɛ he muji lɛ kwraa. Nɔ ni jɛ mli ba ji akɛ, amɛná tsamɔ mli ŋɔɔmɔ. Amɛbabote mumɔŋ paradeiso shihilɛ, ní yaa nɔ emli lɛɛɔ ŋmɛnɛ yɛ shikpɔŋ lɛ nɔ fɛɛ lɛ mli. Yɛ mumɔŋ shishinumɔ naa lɛ, shwilafoi miikase bɔ ni afeɔ anaa nii ni toimulɔi hu miikase bɔ ni afeɔ anuɔ nii—ni amɛhiɛ miiba amɛhe nɔ jogbaŋŋ yɛ Nyɔŋmɔ mumɔ krɔŋkrɔŋ lɛ nitsumɔ gbɛfaŋ, ni amɛmiina bɔ ni ehe hiaa ní amɛbɛŋkɛ Yehowa be fɛɛ be. (1 Tesalonikabii 5:6; 2 Timoteo 4:5) Akɛni amɛjeee mumuii dɔŋŋ hewɔ lɛ, anɔkwa Kristofoi miishwe akɛ ‘amɛaalá,’ ní amɛjaje Biblia mli anɔkwalei lɛ amɛtsɔɔ mɛi krokomɛi. (Romabii 1:15) Mɛi ni tsutsu ko lɛ amɛgbɔjɔ yɛ mumɔŋ, loo amɛji “obubuafoi” lɛ miijie ekãa kɛ miishɛɛ kpo agbɛnɛ. Amɛmiinyɛ ‘amɛmiitumɔ tamɔ ofrote’ yɛ mfonirifeemɔŋ.
24 Kristofoi ní akɛ amɛ eku sɛɛ kɛba ekoŋŋ nɛɛ nyiɛɔ “gbɛ krɔŋkrɔŋ lɛ” nɔ. Nɛkɛ “gbɛ,” ni jɛɔ Babilon Kpeteŋkpele lɛ mli kɛyaa mumɔŋ paradeiso mli lɛ, naa egbele kɛha jálɔi fɛɛ ní he tse yɛ mumɔŋ lɛ. (1 Petro 1:13-16) Amɛbaanyɛ amɛkɛ amɛhiɛ afɔ̃ Yehowa nɔ kɛha hebuu, ní amɛná hekɛnɔfɔɔ akɛ Satan yeŋ omanye yɛ etutuamɔi ní tamɔ kooloi anifeemɔi, ní ekɛbɔɔ mɔdɛŋ ní ekɛkpata anɔkwa jamɔ hiɛ lɛ mli kɔkɔɔkɔ. (1 Petro 5:8) Aŋmɛɛɛ toigbolɔi kɛ mɛi fɛɛ ní feɔ amɛnii tamɔ kooloi awuiyelɔi lɛ agbɛ ní amɛfite mɛi ní nyiɛ Nyɔŋmɔ gbɛ krɔŋkrɔŋ lɛ nɔ lɛ. (1 Korintobii 5:11) Akɛni amɛyɛ nɛkɛ hebuu shihilɛ nɛɛ mli hewɔ lɛ, mɛi ní Yehowa ekpɔ̃ amɛ—ni ji mɛi ní afɔ amɛ mu lɛ kɛ “tooi krokomɛi” lɛ—náa miishɛɛ yɛ anɔkwa Nyɔŋmɔ kome lɛ sɔɔmɔ mli.—Yohane 10:16.
25. Ani Yesaia yitso 35 lɛ baaná emlibaa diɛŋtsɛ yɛ heloonaa? Tsɔɔmɔ mli.
25 Ni wɔsɛɛ be mli hu? Ani be ko baaba ní Yesaia gbalɛ lɛ baaba mli diɛŋtsɛ yɛ heloonaa? Hɛɛ. Naakpɛɛ tsamɔi ní Yesu kɛ ebɔfoi lɛ tsá mɛi yɛ klɛŋklɛŋ afii oha lɛ mli lɛ feɔ bɔ ni Yehowa sumɔɔ, kɛ nyɛmɔ ní eyɔɔ ní ekɛaatsu nakai tsamɔi lɛ ahe nii yɛ gbɛ ní mli lɛɛ nɔ wɔsɛɛ lɛ he mfoniri. Lalai ní jɛ mumɔŋ lɛ wieɔ naanɔ wala ní aaaná yɛ toiŋjɔlɛ shihilɛi amli yɛ shikpɔŋ nɔ lɛ he. (Lala 37:9, 11, 29) Yesu kɛ Paradeiso shihilɛ he shiwoo ha. (Luka 23:43) Biblia lɛ kɛ paradeiso diɛŋtsɛ he hiɛnɔkamɔ haa, kɛjɛɔ eshishijee aahu kɛyashiɔ enaagbee wolo lɛ nɔ tɔ̃ɔ. Nakai beaŋ lɛ, shwilafoi, toimulɔi, obubuafoi, kɛ mumuii fɛɛ baaná gbɔmɔtsoŋ tsamɔ diɛŋtsɛ ní hiɔ shi daa. Awerɛho kɛ ŋtsɔidɔɔmɔ sɛɛ baafo. Miishɛɛ baahi shi lɛɛlɛŋ kɛya naanɔi anaanɔ, daa.—Kpojiemɔ 7:9, 16, 17; 21:3, 4.
26. Yesaia wiemɔi lɛ woɔ Kristofoi hewalɛ ŋmɛnɛ yɛ mɛɛ gbɛ nɔ?
26 Eyɛ mli akɛ anɔkwa Kristofoi miimɛ shikpɔŋ nɔ Paradeiso diɛŋtsɛ ní akɛbaaba ekoŋŋ lɛ moŋ, shi amɛnáa mumɔŋ paradeiso lɛ mli jɔɔmɔi lɛ amli ŋɔɔmɔ bianɛ po. Amɛkɛ gbɛkpamɔ kpakpa kpeeɔ kaai kɛ amanehului anaa. Akɛni amɛyɛ Yehowa mli hekɛnɔfɔɔ ní yɔɔ shiŋŋ hewɔ lɛ, amɛwowooɔ amɛhe hewalɛ, ni amɛboɔ ŋaawoo nɛɛ toi, akɛ: “Nyɛwajea niji ní mli eje wui lɛ, nyɛwoa nakutsei ní egbɔjɔ lɛ hewalɛ! Mɛi ni tsui fãa lɛ, nyɛkɛa amɛ akɛ: Nyɛwajea nyɛhe, nyɛkashea gbeyei!” Amɛyɛ hekɛnɔfɔɔ kwraa yɛ gbalɛ mli nɔmimaa wiemɔ nɛɛ mli, akɛ: “Naa, nyɛ-Nyɔŋmɔ lɛ miiba kɛ oweletɔɔ kɛ Nyɔŋmɔ najiaŋtoo, ni eeehere nyɛyiwala hu.”—Yesaia 35:3, 4.
[Shishigbɛ niŋmaa]
a Ŋmalɛi lɛ wieɔ blema Lebanon he akɛ eji shikpɔŋ ní baa nii, kɛ emli kooi fɛfɛji kɛ tseneduru tsei wuji ní kwɔlɔ, ní anyɛɔ akɛtoɔ Eden Trom lɛ he. (Lala 29:5; 72:16; Ezekiel 28:11-13) Ale Sharon yɛ efaai kɛ kooi ní odum tsei yɔɔ mli lɛ hewɔ; Karmel hé gbɛi yɛ eweintromii, yeli tsei, kɛ egɔji ní fɔfɔii fɛfɛji ehà nɔ fɛɛ lɛ hewɔ.
[Baafa muu mfoniri ni yɔɔ baafa 370]
[Mfonirii ni yɔɔ baafa 375]
Shia ŋã nɔ shikpɔji baatsɔmɔ hei ní nu babaoo yɔɔ, hei ní gãlãi kɛ ntoo kwɛ̃ɔ yɛ
[Mfoniri ni yɔɔ baafa 378]
Yesu tsá mɛi ni he yeɔ lɛ, yɛ mumɔŋ kɛ gbɔmɔtsoŋ fɛɛ