Yitso Nyɔŋmai Etɛ
“Nyɛshɛjea Mimaŋ lɛ Mii”
1. Mɛni ji gbɛ kome ní Yehowa tsɔɔ nɔ eshɛjeɔ wɔmii?
YEHOWA ji “miishɛjemɔ Nyɔŋmɔ.” Gbɛ kome ni etsɔɔ nɔ eshɛjeɔ wɔmii ji kɛtsɔ shiwoi ní eha aŋmala ashwie shi yɛ e-Wiemɔ lɛ mli lɛ nɔ. (Romabii 15:4, 5) Ákɛ nɔkwɛmɔnɔ lɛ, kɛ́ mɔ ko ní osumɔɔ lɛ waa gbó lɛ, mɛni aaanyɛ afee miishɛjemɔ nɔ̃ fe gbɛkpamɔ ni oooná akɛ abaatee nakai osuɔlɔ lɛ shi yɛ Nyɔŋmɔ jeŋ hee lɛ mli? (Yohane 5:28, 29) Ni shiwoo ní Yehowa kɛha akɛ etsɛŋ ni ebaafo efɔŋfeemɔ fɛɛ sɛɛ ni ebaatsake shikpɔŋ nɛɛ ní efee lɛ paradeiso lɛ hu? Ani ejeee miishɛjemɔ akɛ oooná gbɛkpamɔ akɛ oyi baaná wala kɛyabote nakai Paradeiso ni baa lɛ mli ní ogbooo dɔŋŋ?—Lala 37:9-11, 29; Kpojiemɔ 21:3-5.
2. Mɛni hewɔ wɔbaanyɛ wɔkɛ wɔhe afɔ̃ Nyɔŋmɔ shiwoi anɔ lɛ?
2 Ani wɔbaanyɛ wɔkɛ wɔhe afɔ̃ Nyɔŋmɔ shiwoi anɔ lɛɛlɛŋ? Hɛɛ, wɔbaanyɛ wɔkɛ wɔhe afɔ̃ nɔ! Anyɛɔ akɛ he fɔ̃ɔ nakai Shiwolɔ lɛ nɔ kwraa kɛmɔɔ shi. Eyɛ nyɛmɔ kɛ suɔmɔ fɛɛ ní ekɛaatsu ewiemɔ lɛ he nii. (Yesaia 55:10, 11) Ajie enɛ kpo yɛ gbɛ ní mli wa waa nɔ yɛ Yehowa wiemɔ ní etsɔ gbalɔ Yesaia nɔ ewie akɛ ebaasaa eto anɔkwa jamɔ ema shi ekoŋŋ yɛ Yerusalem lɛ nɔ. Ha wɔsusu nakai gbalɛ lɛ he wɔkwɛ, taakɛ ejeɔ kpo yɛ Yesaia yitso 40 lɛ, ejaakɛ nakai feemɔ baanyɛ awo hemɔkɛyeli ni wɔyɔɔ yɛ Yehowa, Mɔ ni Haa shiwoi Baa Mli lɛ mli lɛ mli hewalɛ.
Shiwoo ní Shɛjeɔ Mɔ Mii
3, 4. (a) Mɛɛ miishɛjemɔ wiemɔi ni he baahia Nyɔŋmɔ webii lɛ yɛ sɛɛ mli Yesaia ŋmala eshwie shi? (b) Mɛni hewɔ abaaŋɔ Yuda kɛ Yerusalem maji lɛ amli bii lɛ nom kɛya Babilon lɛ, ni be enyiɛ amɛ nyɔŋyeli lɛ baaye?
3 Yɛ afii ohai kpaanyɔ D.Ŋ.B. lɛ, gbalɔ Yesaia ŋmala miishɛjemɔ wiemɔi ní he baahia Yehowa webii yɛ sɛɛ mli lɛ eshwie shi. Beni ekɛɛ Maŋtsɛ Hezekia Yerusalem hiɛkpatamɔ ní baa lɛ kɛ bɔ ni abaaŋɔ Yudafoi lɛ anom kɛya Babilon lɛ sɛɛ nɔŋŋ lɛ, kɛkɛ ni Yesaia je Yehowa wiemɔi ní woɔ shi akɛ ekɛ amɛ baaku sɛɛ kɛba amɛmaŋ ekoŋŋ lɛ shishi, ni ekɛɛ: “Nyɛshɛjea, nyɛshɛjea mimaŋ lɛ mii! nyɛ-Nyɔŋmɔ lɛ kɛɛ! Nyɛkɛ Yerusalem awiea tsuijurɔ naa, ní nyɛjajea nyɛtsɔɔa lɛ, akɛ agbe etawuu be lɛ naa, akɛ akɛ enishaianii lɛ efà lɛ, akɛ ená toi enyɔ kɛjɛ Yehowa dɛŋ yɛ ehe eshai lɛ fɛɛ hewɔ!”—Yesaia 40:1, 2.
4 ‘Miishɛjemɔ,’ ni ji Yesaia yitso 40 lɛ shishijee wiemɔ lɛ, tsɔɔ shɛɛ sane ni ji be kpakpa kɛ hiɛnɔkamɔ ni yɔɔ Yesaia wolo lɛ fã ní eshwɛ lɛ mli lɛ mli jogbaŋŋ. Akɛni Yuda kɛ Yerusalem maji lɛ amli bii lɛ etsɔmɔ hemɔkɛyeli kwalɔi hewɔ lɛ, abaaŋɔ amɛ nom kɛya Babilon yɛ afi 607 D.Ŋ.B. Shi nakai Yudafoi nomii lɛ sɔmɔŋ Babilonbii lɛ kɛyaŋ naanɔ. Dabi, amɛ nyɔŋyeli be lɛ baahi shi kɛyashi be mli ni amɛnishaianii lɛ “efà.” Be enyiɛ nɛkɛ ebaaye? Taakɛ gbalɔ Yeremia tsɔɔ lɛ, afii 70. (Yeremia 25:11, 12) Yɛ no sɛɛ lɛ, Yehowa baanyiɛ shwɛɛnii ní eshwa amɛhe lɛ ahiɛ kɛjɛ Babilon kɛku amɛsɛɛ kɛba Yerusalem. Yɛ Yuda amaŋfɔfeemɔ afi ni ji 70 lɛ mli lɛ, kwɛ miishɛjemɔ ní eeeji kɛha nomii lɛ akɛ amɛaana akɛ be ní awo shi kɛha amɛkpɔmɔ lɛ ebɛŋkɛ!—Daniel 9:1, 2.
5, 6. (a) Mɛni hewɔ gbɛfaa kakadaŋŋ kɛjɛ Babilon kɛyaa Yerusalem lɛ etsĩŋ Nyɔŋmɔ shiwoo lɛ mlibaa naa lɛ? (b) Mɛɛ hewalɛ Yudafoi ní akɛ amɛ baaku sɛɛ kɛba amɛmaŋ shikpɔŋ nɔ ekoŋŋ lɛ baaná yɛ jeŋmaji krokomɛi anɔ?
5 Gbɛfaa kɛjɛ Babilon kɛyaa Yerusalem lɛ shɛɔ kilomitai 800 kɛyashi 1,600, ni enɛ damɔ gbɛ ní mɔ lɛ baatsɔ nɔ lɛ nɔ. Ani gbɛfaa kakadaŋŋ nɛɛ baatsĩ Nyɔŋmɔ shiwoo lɛ mlibaa naa? Dabi kɔkɔɔkɔ! Yesaia ŋma akɛ: “Mɔ ko gbee miibo yɛ ŋã lɛ nɔ akɛ: Nyɛjajea Yehowa gbɛ lɛ, nyɛjajea gbɛjegbɛ ko yɛ ŋã kpataa lɛ nɔ nyɛhaa wɔ-Nyɔŋmɔ lɛ! Awó jɔɔ fɛɛ jɔɔ nɔ, ní aha gɔji kɛ ŋmeŋmei fɛɛ aba shi, ní aha hei ni yɔɔ dokoidokoi lɛ afee trɛnɛ̃ɛ, ní hei ni yɔɔ gɔjigɔji lɛ afee kplanaa. Ní ajie Yehowa anunyam lɛ kpo, ní heloo fɛɛ tswɛ̃m ana; Ejaakɛ Yehowa naa enɛ jɛ!”—Yesaia 40:3-5.
6 Dani Bokagbɛ nɔyelɔi baaje gbɛfaa shishi lɛ, bei pii lɛ amɛhaa mɛi yaa ni amɛyasáa gbɛ lɛ ni amɛyajieɔ enɔ tɛi ní dara lɛ, ni amɛgbálaa gbɛ̀i ni amɛsáa nɔ, ni amɛkumɔɔ ni amɛtsaa ŋmeŋmei ní nɔ kwɔlɔ lɛ po amɛshwieɔ shi. Yɛ Yudafoi ní kuɔ amɛsɛɛ lɛ agbɛfaŋ lɛ, ebaafee tamɔ nɔ ni Nyɔŋmɔ diɛŋtsɛ nyiɛ amɛhiɛ, ni eejie gbɛtsii nii fɛɛ yɛ amɛgbɛ nɔ. Ejaakɛ, amɛji Yehowa webii ní egbɛi kã amɛnɔ, ni kɛ́ eha shiwoo ní ekɛha amɛ akɛ ekɛ amɛ baaku sɛɛ kɛba amɛmaŋ shikpɔŋ nɔ ekoŋŋ lɛ ba mli lɛ, ebaaha enunyam lɛ aje kpo faŋŋ yɛ jeŋmaji lɛ fɛɛ ahiɛ. Ni amɛmiisumɔ jio amɛsumɔɔɔ jio, abaanyɛ nakai jeŋmaji lɛ anɔ ni amɛbaana akɛ Yehowa ji Mɔ ni Haa eshiwoi Baa Mli.
7, 8. (a) Mɛɛ mlibaa wiemɔi ni yɔɔ Yesaia 40:3 lɛ ná yɛ Ŋ.B. klɛŋklɛŋ afii oha lɛ mli? (b) Mɛɛ mlibaa ní da Yesaia gbalɛ lɛ ná yɛ afi 1919 mli?
7 Sɛɛkuu ní ba yɛ afii ekpaa D.Ŋ.B. lɛ jeee gbalɛ nɛɛ mlibaa pɛ ní ebaaná. Emlibaa kroko hu ba yɛ Ŋ.B. klɛŋklɛŋ afii oha lɛ mli. No mli lɛ, Yohane Baptisilɔ lɛ ji mɔ gbee ní “miibo yɛ ŋã lɛ nɔ” lɛ, yɛ Yesaia 40:3 lɛ mlibaa mli. (Luka 3:1-6) Yohane kɛ Yesaia wiemɔi lɛ to lɛ diɛŋtsɛ ehe, yɛ mumɔ lɛ tsirɛmɔ naa. (Yohane 1:19-23) Kɛjɛ afi 29 Ŋ.B. kɛbaa lɛ, Yohane bɔi gbɛ saamɔ kɛha Yesu Kristo.a Yohane sanejajemɔ ní tsɔ̃ hiɛ nɛɛ tée gbɔmɛi amiishɛɛ shi ní amɛtao Mesia ní awo shi yɛ ehe lɛ, koni amɛ hu amɛbo lɛ toi ní amɛnyiɛ esɛɛ. (Luka 1:13-17, 76) Yehowa baatsɔ Yesu nɔ enyiɛ mɛi ní eshwa amɛhe lɛ ahiɛ kɛya heyeli ní Nyɔŋmɔ Maŋtsɛyeli lɛ pɛ baanyɛ ekɛha lɛ mli—no ji heyeli kɛmiijɛ esha kɛ gbele nyɔŋyeli mli. (Yohane 1:29; 8:32) Yesaia wiemɔi lɛ ná amɛmlibaa ní da beni akpɔ̃ mumɔŋ Israel shwɛɛnii lɛ kɛjɛ Babilon Kpeteŋkpele lɛ dɛŋ yɛ afi 1919, ní akɛ amɛ ku sɛɛ kɛba anɔkwa jamɔ mli ekoŋŋ lɛ.
8 Shi, mɛi ni yɔɔ hegbɛ akɛ amɛaaná shiwoo lɛ klɛŋklɛŋ mlibaa lɛ he sɛɛ—ni ji Yudafoi nomii ní yɔɔ Babilon lɛ hu? Ani amɛbaanyɛ amɛkɛ amɛhe afɔ̃ shiwoo ní Yehowa kɛha akɛ ekɛ amɛ baaku sɛɛ kɛba amɛmaŋ shikpɔŋ ní amɛsumɔɔ waa lɛ nɔ ekoŋŋ lɛ nɔ diɛŋtsɛ? Hɛɛ, amɛbaanyɛ! Agbɛnɛ Yesaia kɛ daa gbi shihilɛ mli wiemɔi kɛ nɔkwɛmɔnii ní mli kã shi faŋŋ tsu nii ni ekɛha amɛná yiŋtoi ní mli wa ní amɛaadamɔ nɔ amɛná hekɛnɔfɔɔ kwraa kɛmɔ shi akɛ Yehowa baaye ewiemɔ lɛ nɔ.
Nyɔŋmɔ ní E-Wiemɔ Hiɔ Shi Kɛyaa Naanɔ
9, 10. Te Yesaia wie srɔtofeemɔ ní yɔɔ bɔ ni adesa wala sɛɛ etsɛɛɛ, kɛ bɔ ni Nyɔŋmɔ “wiemɔ” lɛ hiɔ shi daa lɛ teŋ lɛ he eha tɛŋŋ?
9 Klɛŋklɛŋ lɛ, Mɔ ni wo shi akɛ ebaaha amɛku amɛsɛɛ amɛba amɛmaŋ ekoŋŋ lɛ wiemɔi hiɔ shi kɛyaa naanɔ. Yesaia ŋma akɛ: “Gbee ko kɛɛ: Bolɔmɔ! Ni ekɛɛ: Té mibolɔ mikɛɛ tɛŋŋ? Heloo fɛɛ lɛ jwɛi ni, ni ehefɛo lɛ fɛɛ tamɔ ŋã nɔ fɔfɔi: jwɛi gbĩɔ, fɔfɔi hu ŋãlãa; ejaakɛ Yehowa mumɔ ní emuɔ lɛ tswaa kɛtsɔɔ nɔ. Lɛɛlɛŋ, jwɛi ji maŋ lɛ! Jwɛi gbĩɔ, ni fɔfɔi hu ŋãlãa: shi wɔ-Nyɔŋmɔ lɛ wiemɔ lɛ aaadamɔ shi kɛaatee naanɔ!”—Yesaia 40:6-8.
10 Israelbii lɛ le jogbaŋŋ akɛ jwɛi ehiii shi kɛyaaa naanɔ. Kɛ́ eshɛ hulutsoo be lɛ, hulu lɛ dɔlɛ ní naa wa waa lɛ tsakeɔ lɛ kɛjɛɔ eŋmɔŋ ni etsɔɔ egbĩŋ. Yɛ shishinumɔi komɛi anaa lɛ, adesa wala tamɔ jwɛi fɔ́—eshihilɛ be yɛ kukuoo. (Lala 103:15, 16; Yakobo 1:10, 11) Yesaia miitsɔɔ srɔtofeemɔ ní yɔɔ bɔ ni adesa wala hoɔ eyaa oyá, kɛ bɔ ni Nyɔŋmɔ “wiemɔ,” loo eyiŋtoo ní ejaje etsɔɔ lɛ hiɔ shi daa lɛ teŋ. Hɛɛ, “wɔ-Nyɔŋmɔ lɛ wiemɔ lɛ” hiɔ shi kɛyaa naanɔ. Kɛ́ Nyɔŋmɔ wie lɛ, nɔ ko kwraa nyɛŋ afite ewiemɔi lɛ loo etsĩ amɛmlibaa naa.—Yoshua 23:14.
11. Mɛni hewɔ wɔbaanyɛ wɔkɛ wɔhe afɔ̃ Yehowa nɔ akɛ ebaaha shiwoi ní yɔɔ e-Wiemɔ ní aŋma lɛ mli lɛ aba mli lɛ?
11 Ŋmɛnɛ, wɔyɛ Yehowa yiŋtoo ní ejaje etsɔɔ lɛ ní aŋmala ashwie shi ákɛ Biblia lɛ. Biblia lɛ kɛ shitee-kɛ-woo ní naa wa waa ekpe, yɛ afii ohai abɔ ní eho lɛ mli, ni wiemɔi ashishitsɔɔlɔi ní yɔɔ ekãa kɛ mɛi krokomɛi kɛ amɛwala wo oshara mli koni amɛkɛbaa yi. Ni kɛlɛ, amɛmɔdɛŋbɔi lɛ pɛ kɛkɛ etsɔɔɔ bɔ ni fee ní ehi shi aahu kɛbashi ŋmɛnɛ lɛ mli. Esa akɛ akɛ bɔ ni fee ní ehi shi lɛ he yijiemɔ fɛɛ aha Yehowa, ni ji “Nyɔŋmɔ hiɛkalɔ kɛ daa shihilɔ” kɛ e-Wiemɔ lɛ Yibaalɔ lɛ. (1 Petro 1:23-25) Susumɔ enɛ he okwɛ: Akɛni Yehowa ebaa e-Wiemɔ ní aŋma lɛ yi hewɔ lɛ, ani wɔnyɛŋ wɔkɛ wɔhe afɔ̃ enɔ akɛ ebaaha shiwoi ní yɔɔ mli lɛ aba mli?
Nyɔŋmɔ ní He Wa ní kɛ Mlihilɛ Kwɛɔ Etooi Lɛ
12, 13. (a) Mɛni hewɔ abaanyɛ akɛ he afɔ̃ sɛɛkuu he shiwoo lɛ nɔ lɛ? (b) Mɛɛ sanekpakpa yɔɔ kɛha Yudafoi nomii lɛ, ni mɛni hewɔ amɛbaanyɛ amɛná hekɛnɔfɔɔ lɛ?
12 Yesaia haa wɔ yiŋtoo ni ji enyɔ hewɔ ní abaanyɛ akɛ he afɔ̃ sɛɛkuu he shiwoo lɛ nɔ lɛ. Mɔ ni kɛ shiwoo lɛ ha lɛ ji Nyɔŋmɔ ni he wa, ni kɛ mlihilɛ kwɛɔ ewebii. Yesaia tee nɔ akɛ: “Kwɔɔ kɛya gɔŋ ní kwɔ ko nɔ, bo sanekpakpa jajelɔ Zion! wó ogbee nɔ kɛ hewalɛ, sanekpakpa jajelɔ Yerusalem! Wó nɔ, kaashe gbeyei; kɛɛmɔ Yuda maji lɛ akɛ: Naa, nyɛ-Nyɔŋmɔ lɛ nɛ! Naa, Nuntsɔ Yehowa miiba kɛ hewalɛ, ni enine lɛ aaaye nɔ aha lɛ; naa, ehiɛ enyɔmɔwoo lɛ kɛmiiba, ni enajiaŋtoo lɛ nyiɛ ehiɛ! Eeelɛ̀ etoiku lɛ tamɔ tookwɛlɔ; eeehiɛ etoobii lɛ yɛ ekpɔkɔiaŋ, ni eeehole amɛ eshãkã etsitsi, ni too nyɛmɛi lɛ hu, eeekpala amɛ blɛoo.”—Yesaia 40:9-11.
13 Biblia beaŋ lɛ, nɔ ni yei fɔɔ feemɔ ji akɛ, amɛyeɔ kunimyelii ahe gbi jurɔ, ni amɛbolɔɔ loo amɛláa sanekpakpa ni ji tai ní aye kunim yɛ mli loo heyeli ní baa lɛ he lala. (1 Samuel 18:6, 7; Lala 68:12) Yesaia tsɔɔ yɛ gbalɛ wiemɔ mli akɛ sanekpakpa ko yɛ kɛha Yudafoi nomii lɛ, adafitswaa ní abaanyɛ akɛ ekãa abolɔ waa atsɔɔ, kɛjɛ gɔji ayiteŋ po—Yehowa baanyiɛ ewebii lɛ ahiɛ kɛku sɛɛ kɛba amɛmaŋ Yerusalem ní amɛsumɔɔ waa lɛ ekoŋŋ! Amɛbaanyɛ amɛná hekɛnɔfɔɔ, ejaakɛ Yehowa baaba “kɛ hewalɛ.” No hewɔ lɛ, nɔ ko kwraa bɛ ní baanyɛ atsĩ enaa ní eshiwoo lɛ akaba mli.
14. (a) Te Yesaia fee mlijɔlɛ gbɛ ní Yehowa baatsɔ nɔ enyiɛ ewebii ahiɛ lɛ he mfoniri eha tɛŋŋ? (b) Mɛɛ nɔkwɛmɔnɔ ko feɔ bɔ ni tookwɛlɔi kɛ mlijɔlɛ kwɛɔ amɛtooi lɛ he mfoniri? (Kwɛmɔ akrabatsa ní yɔɔ baafa 405 lɛ.)
14 Shi kɛlɛ, Nyɔŋmɔ ní he wa nɛɛ yɛ su srɔto ko kwraa ni ji mlijɔlɛ. Yesaia kɛ miishɛɛ tsɔɔ bɔ ni Yehowa baanyiɛ ewebii lɛ ahiɛ kɛku sɛɛ kɛba amɛmaŋ shikpɔŋ nɔ ekoŋŋ lɛ mli. Yehowa tamɔ tookwɛlɔ ní yɔɔ suɔmɔ, ní hiɛɔ etoobii lɛ yɛ ekpɔkɔiaŋ, ni ekɛ amɛ shãkãa “etsitsi.” Eka shi faŋŋ akɛ wiemɔ ni ji “etsitsi” ni yɔɔ biɛ lɛ miitsɔɔ atade lɛ ŋwɛigbɛ hei ní dɔrɔɔ tamɔ kotoku lɛ. Biɛ ji he ni bei komɛi lɛ tookwɛlɔi lɛ kɛ toobii ní afɔ́ amɛ eŋmɔŋ, ní nyɛɛɛ amɛkɛ tooku lɛ anyiɛ lɛ woɔ. (2 Samuel 12:3) Ŋwanejee ko bɛ he akɛ tookwɛlɔi ashihilɛ mli nifeemɔ ní kanyaa henumɔi nɛɛ maa suɔmɔ henumɔ ní Yehowa yɔɔ kɛha ewebii ní aŋɔ amɛ nom lɛ nɔ mi. Eka shi faŋŋ akɛ, abaanyɛ akɛ he afɔ̃ Nyɔŋmɔ ní he wa, ní kɛlɛ emli jɔ nɛɛ nɔ akɛ ebaaha nɔ ni ewo shi yɛ he lɛ aba mli!
15. (a) Mɛɛ be Yehowa ba “kɛ hewalɛ” lɛ, ni namɔ ji ‘nine ní yeɔ nɔ haa lɛ’ lɛ? (b) Mɛɛ sanekpakpa esa akɛ akɛ ekãa ajaje atsɔɔ?
15 Yesaia wiemɔi lɛ hiɛ gbalɛ mli shishinumɔ babaoo kɛha wɔgbii nɛɛ. Yehowa “kɛ hewalɛ” ba yɛ afi 1914 ni eto e-Maŋtsɛyeli lɛ shishi yɛ ŋwɛi. ‘Nine ní yeɔ nɔ haa lɛ’ ji e-Bi, Yesu Kristo, mɔ ni Yehowa kɛ lɛ etá eŋwɛi maŋtsɛsɛi lɛ nɔ lɛ. Yɛ afi 1919 lɛ, Yehowa kpɔ̃ etsuji ní yɔɔ shikpɔŋ nɔ ní afɔ amɛ mu lɛ kɛjɛ Babilon Kpeteŋkpele lɛ nyɔŋyeli mli ni amɛje shishi akɛ amɛaato Nyɔŋmɔ hiɛkalɔ kɛ anɔkwafo lɛ jamɔ krɔŋŋ lɛ shishi kɛmɔ shi. Enɛ ji sanekpakpa ko ní esa akɛ akɛ ekãa ajaje atsɔɔ, tamɔ nɔ ni akɛ bolɔmɔ miijaje kɛmiijɛ gɔji ayiteŋ bɔni afee ní sanejajemɔ lɛ ajije kɛya shɔŋŋ. Belɛ, nyɛhaa wɔholea wɔgbeei anɔ ní wɔkɛ ekãa ahaa mɛi krokomɛi alea akɛ Yehowa Nyɔŋmɔ esaa ekɛ ejamɔ krɔŋŋ ema shi ekoŋŋ yɛ shikpɔŋ nɛɛ nɔ!
16. Mɛɛ gbɛ nɔ Yehowa tsɔɔ enyiɛɔ ewebii ahiɛ ŋmɛnɛ, ni mɛɛ nɔkwɛmɔnɔ enɛ feɔ?
16 Yesaia 40:10, 11 lɛ mli wiemɔi lɛ he yɛ sɛɛnamɔ diɛŋtsɛ kɛha wɔ ŋmɛnɛ. Eji miishɛjemɔ akɛ wɔɔle mlijɔlɛ gbɛ ní Yehowa tsɔɔ nɔ enyiɛɔ ewebii ahiɛ lɛ. Taakɛ bɔ ni tookwɛlɔ nuɔ etooi aŋkroaŋkroi—ní etoobii bibii ní nyɛɛɛ amɛkɛ tooku ní eshwɛ lɛ anyiɛ lɛ fata he lɛ—ahiamɔ nii ashishi lɛ, nakai Yehowa hu nuɔ etsuji anɔkwafoi lɛ ateŋ mɔ fɛɛ mɔ fatɔɔi ashishi. Kɛfata he lɛ, Yehowa toɔ okadi ehaa Kristofoi tookwɛlɔi lɛ ákɛ Tookwɛlɔ ní mli jɔ. Esa akɛ onukpai lɛ kɛ asafoku lɛ aye yɛ mlijɔlɛ mli, ní amɛkase suɔmɔ kɛ mɔ hesusumɔ ní Yehowa diɛŋtsɛ jieɔ lɛ kpo lɛ. Esa akɛ amɛha bɔ ni Yehowa nuɔ he yɛ etooku lɛ mli bii lɛ ateŋ mɔ fɛɛ mɔ, “ni ekɛ lɛ diɛŋtsɛ e-Bi lɛ lá he lɛ” he ehaa lɛ ahi amɛjwɛŋmɔ mli be fɛɛ be.—Bɔfoi lɛ Asaji 20:28, NW.
Ehe Wa Fe Fɛɛ, Ele Nii Fe Fɛɛ
17, 18. (a) Mɛni hewɔ Yudafoi nomii lɛ baanyɛ aná hekɛnɔfɔɔ yɛ amɛsɛɛkuu he shiwoo lɛ mli lɛ? (b) Mɛɛ saji ní teeɔ gbeyeishemɔ shi Yehowa bi?
17 Yudafoi nomii lɛ baanyɛ aná hekɛnɔfɔɔ yɛ amɛsɛɛkuu he shiwoo lɛ mli ejaakɛ Nyɔŋmɔ he wa fe fɛɛ, ni ele nii hu fe fɛɛ. Yesaia kɛɔ akɛ: “Namɔ susuɔ nui lɛ yɛ ekɔkɔŋ, ni ekɛ klakate susuɔ ŋwɛii, ni ekɛ kaa nɔ̃ kaa shikpɔŋ sũ, ni eŋmɛɔ gɔji lɛ yɛ ŋsɛni mli kɛ ŋmeŋmei hu yɛ niŋmɛɛ nii amli? Namɔ kaa Yehowa Mumɔ lɛ ekwɛɔ, ni mɛɛ ŋaawolɔ tsɔɔ lɛ nii? Namɔ ekɛtoɔ ajina, ni etsɔɔ lɛ nii, ni etsɔɔ lɛ kojomɔ gbɛ, ni etsɔɔ lɛ nilee, ni ehaa eleɔ sanesɛɛkɔmɔ gbɛ?”—Yesaia 40:12-14.
18 Enɛɛmɛi ji sanebimɔi ní teeɔ gbeyeishemɔ shi ní esa akɛ Yudafoi nomii lɛ asusu he. Ani adesai foji baanyɛ atsĩ ŋshɔ kpeteŋkpele lɛ yimɔ naa? Eka shi faŋŋ akɛ dabi! Ni kɛlɛ, Yehowa hiɛ lɛ, ŋshɔ babaoo ní ehà shikpɔŋ lɛ nɔ lɛ tamɔ nu kuli yɛ ekɔkɔ mli.b Ani adesai ní he waaa nɛɛ baanyɛ asusu ŋwɛi ní lɛɛ shwaŋŋ, ní eyi kɛ ŋulamii lɛ, aloo amɛŋmɛ shikpɔŋ nɔ gɔji kɛ ŋmeŋmei lɛ yɛ ŋsɛni mli? Dabi. Ni kɛlɛ, Yehowa susuɔ ŋwɛi yɛ gbɛ ní yɔɔ mlɛo kwraa nɔ, tamɔ bɔ ni gbɔmɔ kɛ klakate kome—ni ji gbɛ ní kã gɔŋti kɛ wao sɛɛkpélɔ lɛ teŋ kɛji agbɛ waobii amli jogbaŋŋ kɛyatá lɛ susuɔ nɔ ko lɛɛmɔ lɛ. Enɛ tsɔɔ akɛ, Nyɔŋmɔ baanyɛ aŋmɛ gɔji kɛ ŋmeŋmei lɛ yɛ ŋsɛni mli. Ani adesai ateŋ mɛi ni le nii fe fɛɛ lɛ po baanyɛ atsɔɔ Nyɔŋmɔ nɔ ni esa akɛ efee yɛ shihilɛi ní yɔɔ amrɔ nɛɛ lɛ amli, loo amɛtsɔɔ lɛ nɔ ni esa akɛ efee wɔsɛɛ? Eka shi faŋŋ akɛ dabi!
19, 20. Mɛɛ mfonirifeemɔ wiemɔi ní mli kã shi faŋŋ Yesaia kɛtsu nii ni ekɛma bɔ ni Yehowa je agbo ha lɛ nɔ mi?
19 Ni shikpɔŋ nɔ jeŋmaji ní he wa lɛ hu—ani amɛbaanyɛ amɛte shi amɛwo Nyɔŋmɔ beni ehaa eshiwoo wiemɔ lɛ baa mli lɛ? Yesaia ha hetoo kɛtsɔ bɔ ni jeŋmaji lɛ ji, ni etsɔɔ mli lɛ nɔ, akɛ: “Naa, jeŋmaji lɛ tamɔ nu kuli yɛ blage he, ni abuɔ amɛ tamɔ mulu kuli ní kpɛtɛ ŋsɛni he; naa, eholeɔ ŋshɔkpɔi lɛ anɔ tamɔ mulu! Ni Lebanon shɛɛɛ lai ní ashãa, ni emli kooloi lɛ hu shɛɛɛ shãa afɔle. Jeŋmaji lɛ fɛɛ jeee nɔ ko yɛ ehiɛ, ebuɔ amɛ akɛ amɛjeee fɛifɛi kɛ yakayaka nii hu.”—Yesaia 40:15-17.
20 Kɛha Yehowa lɛ, jeŋmaji lɛ fɛɛ tamɔ nu kuli ní etse kɛjɛ goga he kɛmiiba ebagbee shi. Amɛtamɔ mulu bɔdɔbɔdɔ ní shwieɔ ŋsɛni mli, ní tsiimɔ shɛɛɛ nɔ ko kwraa lɛ.c Ŋɔɔ lɛ akɛ ekolɛ mɔ ko ema afɔleshaa latɛ kpeteŋkpele ko, ni ebaashã tsei ní yɔɔ Lebanon gɔji lɛ anɔ lɛ fɛɛ ákɛ lai yɛ afɔleshaa latɛ lɛ nɔ. Agbɛnɛ hu ŋɔɔ lɛ akɛ ekɛ kooloi ní nyiɛɔ nakai gɔji lɛ anɔ lɛ fɛɛ baashã afɔlei. Afɔleshaa ní tamɔ nakai po efeŋ nɔ ni sa kɛha Yehowa. Oookɛɛ nɔ ni Yesaia kɛto nii ahe kɛbashi biɛ lɛ faaa lɛ, ekɛ wiemɔi ní mli wa fe nakai po tsu nii agbɛnɛ—ákɛ jeŋmaji lɛ fɛɛ “shɛɛɛ nɔ ko kwraa” yɛ Yehowa hiɛ.—Yesaia 40:17, New Revised Standard Version.
21, 22. (a) Te Yesaia ma bɔ ni anyɛŋ akɛ mɔ ko kwraa ato Yehowa he lɛ nɔ mi eha tɛŋŋ? (b) Mɛɛ sanenaamuu Yesaia sane naatsɔɔmɔ ní mli kã shi faŋŋ lɛ kɛ wɔ yaa he? (d) Mɛɛ sane ko ní ja yɛ jeŋ nilee naa gbalɔ Yesaia ŋma efɔ̃ shi? (Kwɛmɔ akrabatsa ní yɔɔ baafa 412 lɛ.)
21 Bɔni afee ní ema nɔ mi lolo akɛ anyɛŋ akɛ mɔ ko kwraa ato Yehowa he lɛ, Yesaia tee nɔ etsɔɔ mɛi ni kɛ shika, jwiɛtɛi, loo tso feɔ amaga lɛ akwashiafeemɔ. Kwɛ kwashiafeemɔ ní eji akɛ aaasusu akɛ abaanyɛ akɛ amaga ní tamɔ nɛkɛ afee Mɔ ní “[tá] shikpɔŋ lɛ yiteŋ ati lɛ nɔ,” ní eyeɔ enɔ bii lɛ anɔ lɛ he mfoniri yɛ gbɛ ní sa nɔ!—Kanemɔ Yesaia 40:18-24.
22 Sane naatsɔɔmɔi ní mli kã shi faŋŋ nɛɛ fɛɛ kɛ wɔ yaa sanenaamuu kome pɛ he—ákɛ, nɔ ko nɔ ko nyɛŋ atsĩ Yehowa ní he wa fe fɛɛ, ní ele nii fe fɛɛ, ní anyɛɛɛ akɛ mɔ ko kwraa ato ehe lɛ naa ní eshiwoo akaba mli. Kwɛ bɔ ni Yesaia wiemɔi lɛ shɛje Yudafoi nomii ní yɔɔ Babilon, ni shweɔ ní amɛku amɛsɛɛ kɛba amɛmaŋ shikpɔŋ nɔ lɛ amii ní ewo amɛ hewalɛ hu! Ŋmɛnɛ, wɔ hu wɔbaanyɛ wɔná hekɛnɔfɔɔ akɛ shiwoi ní Yehowa kɛha yɛ wɔ wɔsɛɛ he lɛ hu baaba mli diɛŋtsɛ.
“Namɔ Bɔ Enɛɛmɛi?”
23. Mɛɛ yiŋtoo hewɔ Yudafoi nomii lɛ baanyɛ aná hiɛnɔkamɔ lɛ, ni mɛni nɔ mi Yehowa ma yɛ lɛ diɛŋtsɛ ehe agbɛnɛ?
23 Yiŋtoo kroko hewɔ ní Yudafoi nomii lɛ baanyɛ aná hiɛnɔkamɔ lɛ hu yɛ. Mɔ ni kɛ kpɔmɔ he shiwoo lɛ ha lɛ ji nibii fɛɛ a-Bɔlɔ kɛ hewalɛ fɛɛ Jɛɛhe lɛ. Bɔni afee ní ema enyɛmɔ ní sa kadimɔ waa lɛ nɔ mi lɛ, Yehowa gbala jwɛŋmɔ kɛtee enyɛmɔ ní jeɔ kpo yɛ adebɔɔ mli lɛ nɔ ni ekɛɛ: “Namɔ he nyɛkɛ mi aaato, ni ekɛ mi aaaye egbɔ? Mɔ krɔŋkrɔŋ lɛ kɛɛ. Nyɛholea nyɛhiŋmɛi anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ mɔ ni ejieɔ amɛsafo lɛ kpo yɛ yibɔ naa, ni etsɛɔ amɛ fɛɛ kɛ amɛgbɛii; enyɛmɔ ni fa kɛ ehewalɛ kpele lɛ hewɔ lɛ amɛteŋ ekome folo po eshwɛɛɛ.”—Yesaia 40:25, 26.
24. Beni ewieɔ ehaa lɛ diɛŋtsɛ ehe lɛ, Yehowa tsɔɔ akɛ mɔ ko mɔ ko kɛ lɛ yeee egbɔ yɛ mɛɛ gbɛ nɔ?
24 Israel Mɔ Krɔŋkrɔŋ lɛ miiwie kɛmiiha lɛ diɛŋtsɛ ehe. Bɔni afee ní ekɛtsɔɔ akɛ mɔ ko mɔ ko kɛ lɛ yeee egbɔ lɛ, Yehowa gbala jwɛŋmɔ kɛtee ŋwɛi ŋulamii lɛ anɔ. Yehowa kudɔɔ ŋwɛi ŋulamii lɛ fɛɛ, taakɛ asraafoiatsɛ nyɛɔ etoɔ esraafoi lɛ fɛɛ ahe gbɛjianɔ ní ekudɔɔ amɛ fɛɛ lɛ. Kɛ́ ekɛɛ eebua amɛnaa lɛ, ‘amɛteŋ ekome folo po elaajeŋ.’ Eyɛ mli akɛ ŋulamii lɛ ayi fá babaoo diɛŋtsɛ moŋ, shi ekɛ amɛ fɛɛ amɛgbɛi tsɛɔ amɛ, ekolɛ, amɛgbɛi aŋkroaŋkro loo kadimɔ nii ko ní tamɔ gbɛi. Taakɛ asraafoi ní feɔ toiboo lɛ ji lɛ, amɛhiɔ amɛgbɛhei ni amɛnyiɛɔ gbɛjianɔtoo kpakpa sɛɛ, ejaakɛ amɛ Hiɛnyiɛlɔ lɛ yɛ ‘nyɛmɔ’ kɛ ‘hewalɛ kpele’ ní fá babaoo diɛŋtsɛ. No hewɔ lɛ, Yudafoi nomii lɛ yɛ yiŋtoo ní amɛaadamɔ nɔ amɛná hekɛnɔfɔɔ. Bɔlɔ lɛ, ní kudɔɔ ŋulamii lɛ, yɛ hewalɛ ní ekɛaafi etsuji asɛɛ.
25. Te esa akɛ wɔhere ninefɔɔ ní jɛ ŋwɛi ní aŋma yɛ Yesaia 40:26 lɛ nɔ wɔha tɛŋŋ, ni mɛni baajɛ mli aba?
25 Wɔteŋ namɔ baanyɛ ate shi awo ninefɔɔ ni jɛ ŋwɛi, ní aŋma afɔ̃ shi yɛ Yesaia 40:26 lɛ, akɛ: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa” lɛ? Nibii ni ŋmɛnɛŋmɛnɛ beaŋ ŋulamii ahe nilelɔi ena lɛ tsɔɔ akɛ, ŋwɛi kɛ ŋulamii ni yɔɔ jɛmɛ lɛ yɛ naakpɛɛ kwraa fe bɔ ni anaa amɛ ahaa yɛ Yesaia gbii lɛ amli. Ŋulamii ahe nilelɔi ní kɛ amɛshwɛdei ní naa wa waa lɛ pɛiɔ ŋwɛiniiaŋ lɛ buɔ akɔntaa akɛ ŋulamii afalɛ ní yɔɔ jeŋ muu fɛɛ ní akɛ hiŋmɛi naa lɛ shɛɔ ŋulamii kushai akpekpei akpei 125. Hɛɛ, ni ŋulamii kushai nɛɛ ateŋ ekome—ni ji Milky Way ŋulamii akuu lɛ—hiɛ, taakɛ akɔntaabui komɛi tsɔɔ lɛ, ŋulamii ní fa fe akpekpei akpei 100! Esa akɛ nilee ní tamɔ nɛkɛ aha wɔná bulɛ ní mli kwɔ yɛ wɔtsuii amli wɔha wɔ-Bɔlɔ lɛ, ní wɔná hekɛnɔfɔɔ kwraa yɛ eshiwoo wiemɔ lɛ mli.
26, 27. Te awie bɔ ni nomii ní yɔɔ Babilon lɛ ahenumɔi ji lɛ he aha tɛŋŋ, ni mɛɛ nibii esa akɛ amɛle?
26 Akɛni Yehowa le akɛ nomŋɔɔ afii lɛ baaha Yudafoi nomii lɛ anijiaŋ aje wui hewɔ lɛ, ekɛ mumɔ tsirɛ Yesaia ni etsɔ hiɛ eŋmala hewalɛwoo wiemɔi nɛɛ eshwie shi akɛ: “Belɛ bo Yakob, mɛɛba okɛɔ, ni bo Israel, owieɔ akɛ: Aŋɔ migbɛ lɛ atee Yehowa, ni mikojomɔ eho mi-Nyɔŋmɔ lɛ hiɛ lɛ? Ani oleee, ani onuko? naanɔ Nyɔŋmɔ lɛ, Yehowa ni bɔ shikpɔŋ lɛ naagbeehei lɛ, egbɔjɔɔɔ ni asaŋ etɔɔɔ lɛ, ni ejwɛŋmɔ lɛ anyɛɛɛ mli atao.”—Yesaia 40:27, 28.d
27 Yesaia ŋmala Yehowa wiemɔi ní tsɔɔ bɔ ni nomii ní yɔɔ Babilon, ní kɛ amɛmaŋ shikpɔŋ jɛkɛmɔ feɔ kilomitai ohai abɔ lɛ nuɔ he amɛhaa. Mɛi komɛi susuɔ akɛ akɛ ‘amɛgbɛ’—ni ji amɛshihilɛ ní mli wa lɛ—etée Nyɔŋmɔ loo enaaa. Amɛsusuɔ akɛ jeee Yehowa he sane ko ji yiwaa kɛ amanehului ní amɛnaa lɛ. Akai amɛ yɛ nibii ní esa akɛ amɛle, kɛ́ jeee kɛjɛ amɛ diɛŋtsɛ amɛniiashikpamɔ mli lɛ, no lɛ kɛ hoo lɛ, kɛjɛ adafitswaa ní akɛha amɛ lɛ amli lɛ ahe. Yehowa baanyɛ ahere ewebii ayiwala, ni eesumɔ ní efee nakai hu. Lɛ ji naanɔ Nyɔŋmɔ lɛ kɛ shikpɔŋ muu lɛ fɛɛ Bɔlɔ. No hewɔ lɛ, eyɛ hewalɛ ní ejie lɛ kpo yɛ adebɔɔ mli lɛ lolo, ni ehewalɛ shɛɔ Babilon ní yɔɔ hewalɛ waa lɛ po nɔ. Etɔɔɔ Nyɔŋmɔ ní tamɔ nɛkɛ ní eeeha ewebii anine anyɛ shi. Esaaa akɛ kulɛ amɛkpaa gbɛ akɛ amɛaanu Yehowa nifeemɔi fɛɛ ashishi kɛmɔ shi, ejaakɛ eshishinumɔ—loo sɛɛyoomɔ, sanesɛɛkɔmɔ, kɛ shishinamɔ—mli kwɔ fe bɔ ni amɛaanyɛ amɛnu shishi.
28, 29. (a) Yehowa kai ewebii lɛ akɛ ebaaye ebua mɛi ni egbɔjɔ lɛ yɛ mɛɛ gbɛ nɔ? (b) Mɛɛ nɔkwɛmɔnɔ akɛtsu nii ni akɛfee bɔ ni Yehowa haa etsuji hewalɛ lɛ he mfoniri?
28 Yehowa tee nɔ etsɔ Yesaia nɔ ekɛ hewalɛwoo ha nomii ní nijiaŋ eje wui lɛ, akɛ: “Lɛ ehaa mɔ ni egbɔjɔ lɛ hewalɛ, ni mɔ ni bɛ nyɛmɔ lɛ ehaa ehewalɛ fáa. Oblahii ni eje nɔ lɛ, amɛgbɔjɔɔ ni etɔɔ amɛ, ni mɛi ni eshɛ oblahii tete lɛ, amɛgbeegbeeɔ shi; shi mɛi ni hiɛ kã Yehowa nɔ lɛ náa hewalɛ hee, amɛholeɔ amɛfiji anɔ tamɔ okropɔŋi, amɛjoɔ foi, ni etɔɔɔ amɛ, amɛnyiɛɔ hu, ni amɛgbɔjɔɔɔ.”—Yesaia 40:29-31.
29 Beni ewieɔ bɔ ni ehe hiaa ní eha mɔ ni etɔ lɛ lɛ hewalɛ lɛ he lɛ, no mli lɛ ekolɛ nɔ ni yɔɔ Yehowa jwɛŋmɔ mli ji gbɛ kakadaŋŋ ní esa akɛ nomii lɛ afã kɛku amɛsɛɛ kɛya amɛmaŋ lɛ. Yehowa kai ewebii lɛ akɛ eji esu akɛ eyeɔ ebuaa mɛi ni etɔ amɛ, ní amɛkɛ amɛhe fɔ̃ɔ enɔ kɛhaa yelikɛbuamɔ lɛ. Adesai ateŋ mɛi ní yɔɔ gbɔmɔtsoŋ hewalɛ fe fɛɛ—ni ji “oblahii ni eje nɔ” kɛ “mɛi ni eshɛ oblahii”—po nyɛɔ amɛgbɔjɔɔ yɛ tɔlɛ hewɔ ni deŋmegbomɔ haa amɛtɛrɛɔ amɛgbeɔ shi. Ni kɛlɛ, Yehowa ewo shi akɛ ekɛ hewalɛ—hewalɛ ní akɛaajo foi ní akɛaanyiɛ, ní etɔɔɔ mɔ—baaha mɛi ní kɛ amɛhiɛ fɔ̃ɔ enɔ lɛ. Akɛ bɔ ni etamɔ nɔ ni waaa kwraa kɛha okropɔŋ, ni ji loofɔlɔ ni he wa, ni nyɛɔ ehiɔ kɔɔyɔɔ mli ŋmɛlɛtswai abɔ lɛ akɛ eeefiliki lɛ, tsuɔ nii ni akɛfeɔ bɔ ni Yehowa haa etsuji hewalɛ lɛ he mfoniri.e Akɛni Yudafoi nomii lɛ yɛ ŋwɛi sɛɛfimɔ he gbɛkpamɔi ní tamɔ nɛkɛ hewɔ lɛ, amɛbɛ yiŋtoo ní amɛaadamɔ nɔ ni amɛha amɛnijiaŋ aje wui.
30. Anɔkwa Kristofoi ni yɔɔ ŋmɛnɛ lɛ baanyɛ aná miishɛjemɔ kɛjɛ Yesaia yitso 40 lɛ naagbee kukuji lɛ amli yɛ mɛɛ gbɛ nɔ?
30 Yesaia yitso 40 lɛ naagbee kukuji nɛɛ hiɛ miishɛjemɔ wiemɔi kɛha anɔkwa Kristofoi ni yɔɔ nibii agbɛjianɔtoo fɔŋ nɛɛ naagbee gbii lɛ amli lɛ. Akɛni nɔnyɛɛi kɛ naagbai ní kɛ nijiaŋwujee baa lɛ fa babaoo hewɔ lɛ, ehaa wɔtsui nyɔɔ wɔmli akɛ wɔɔle akɛ jaramɔ shihilɛi ní wɔkɛkpeɔ kɛ nibii fɔji ní baa wɔnɔ lɛ jeee nɔ ni Nyɔŋmɔ enaaa. Wɔbaanyɛ wɔná nɔmimaa akɛ nibii fɛɛ a-Bɔlɔ, ni ji Mɔ ni “enilee hu aleee naa” lɛ baajaje nibii fɔji fɛɛ yɛ lɛ diɛŋtsɛ ebe mli kɛ lɛ diɛŋtsɛ egbɛ nɔ. (Lala 147:5, 6) Shi dani nakai be lɛ aaashɛ lɛ, ehe ehiaaa ní wɔkɛ wɔ diɛŋtsɛ wɔhewalɛ kpeeɔ shihilɛ nɛɛ naa. Yehowa, mɔ ni esɛɛfimɔ ní wɔnáa lɛ etãaa lɛ, baanyɛ aha etsuji hewalɛ—“hewalɛ ní fá kɛteke nɔ” po—yɛ haomɔ be mli.—2 Korintobii 4:7.
31. Mɛɛ hiɛnɔkamɔ he shiwoo Yesaia gbalɛ lɛ hiɛ kɛha Yudafoi nomii ni hi Babilon lɛ, ni wɔbaanyɛ wɔná hekɛnɔfɔɔ kwraa kɛmɔ shi yɛ mɛni mli?
31 Susumɔ nakai Yudafoi nomii ni hi Babilon yɛ afii ohai ekpaa D.Ŋ.B. lɛ ahe okwɛ. Amɛmaŋ Yerusalem ní amɛsumɔɔ waa lɛ kã shi amaŋfɔ, ni esɔlemɔtsu lɛ etsɔ koikoi, yɛ he ko ní kɛ amɛ jɛkɛmɔ feɔ kilomitai ohai abɔ. Yesaia gbalɛ lɛ hiɛ mumɔŋ sɛɛyoomɔ kɛ hiɛnɔkamɔ he shiwoo ní shɛjeɔ mɔ mii kɛha amɛ—ákɛ Yehowa kɛ amɛ baaku sɛɛ kɛba amɛmaŋ shikpɔŋ nɔ ekoŋŋ! Yɛ afi 537 D.Ŋ.B. lɛ, Yehowa nyiɛ ewebii lɛ ahiɛ kɛtee amɛmaŋ, ni ekɛma nɔ mi akɛ eji Mɔ ni Haa shiwoi Baa Mli. Wɔ hu wɔbaanyɛ wɔná hekɛnɔfɔɔ kwraa yɛ Yehowa mli. E-Maŋtsɛyeli lɛ he shiwoi ní awie he yɛ gbɛ ní yɔɔ miishɛɛ nɔ yɛ Yesaia gbalɛ lɛ mli lɛ, baaba mli lɛɛlɛŋ. Sanekpakpa diɛŋtsɛ nɛ—shɛɛ sane ní kɛ hiɛnɔkamɔ haa adesai fɛɛ!
[Shishigbɛ niŋmai]
a Yesaia gba efɔ̃ shi akɛ abaasaa gbɛ aha Yehowa. (Yesaia 40:3) Shi kɛlɛ, Sanekpakpai lɛ kɛ nakai gbalɛ lɛ toɔ nɔ ni Yohane Baptisilɔ lɛ fee ní ekɛsaa gbɛ eha Yesu Kristo lɛ he. Mɛi ní akɛ mumɔ tsirɛ amɛ ní amɛŋmala Kristofoi a-Hela Ŋmalɛi lɛ kɛ gbalɛ lɛ to he yɛ nɛkɛ gbɛ nɔ ejaakɛ Yesu damɔ shi kɛha e-Tsɛ lɛ, ni eba yɛ e-Tsɛ lɛ gbɛi amli.—Yohane 5:43; 8:29.
b Abu akɔntaa ni ana akɛ “ŋshɔi lɛ fɛɛ atsiimɔ shɛɔ aaafee mɛtrik tɔn akpeiakpei toi akpeiakpei toi akpeiakpe 1.35 (1.35 x 1018), aloo aaafee Shikpɔŋ muu lɛ fɛɛ tsiimɔ mlijaa 4400 mli 1.”—Encarta 97 Encyclopedia.
c The Expositor’s Bible Commentary lɛ kɛɔ akɛ: “Bokagbɛ ní Bɛŋkɛ lɛ jara nɔ nihɔɔlɔi ebuuu nu kuli bibioo ni yɔɔ goga ní akɛsusuɔ nii lɛ mli, loo mulu fioo ní yɔɔ ŋsɛni mli beni aŋmɛɔ loo aloo aduawai ahaa nihelɔ lɛ akɛ ehe miihia.”
d Yɛ Yesaia 40:28 lɛ, wiemɔ ni ji “naanɔ” lɛ shishi ji “kɛya naanɔ,” ejaakɛ Yehowa ji “naanɔi amaŋtsɛ lɛ.”—1 Timoteo 1:17.
e Okropɔŋ hiɔ kɔɔyɔɔ mli yɛ ŋwɛi shɔŋŋ, ni hewalɛ fioo ko pɛ ekɛfeɔ nakai. Efeɔ nakai kɛtsɔɔ kɔɔyɔɔ mli dɔlɛ loo kɔɔyɔɔ kulɔkulɔ ní yaa ŋwɛigbɛ, ní ekɛtsuɔ nii yɛ hesaa mli lɛ nɔ.
[Akrabatsa/Mfoniri ni yɔɔ baafa 404, 405]
Yehowa, Tookwɛlɔ ní Yɔɔ Suɔmɔ
Yesaia kɛ Yehowa to tookwɛlɔ ní yɔɔ suɔmɔ ní hiɛɔ etoobii lɛ yɛ ekpɔkɔiaŋ lɛ he. (Yesaia 40:10, 11) Eka shi faŋŋ akɛ Yesaia kɛ nɔkwɛmɔnɔ ní yɔɔ miishɛɛ nɛɛ damɔ blema tookwɛlɔi adaa gbi shihilɛi amli nifeemɔi anɔ. Ŋmɛnɛŋmɛnɛ beaŋ nikwɛlɔ ko ni miikwɛ tookwɛlɔi yɛ Hermon Gɔŋ lɛ nɔ yɛ Boka Teŋgbɛ lɛ bɔ amaniɛ akɛ: “Tookwɛlɔ fɛɛ tookwɛlɔ kwɛɔ etooi lɛ jogbaŋŋ koni ekɛna bɔ ni amɛyaa nɔ amɛhaa. Kɛ́ ena toobi ko ní afɔ lɛ etsɛko kwraa lɛ, ewoɔ lɛ ewoɔ . . . etade agbo lɛ mli, ejaakɛ enajiaŋ waaa bɔ ni ebaanyɛ enyiɛ enyɛ sɛɛ. Kɛ́ ekpɔkɔiaŋ yí lɛ, ekɛ toobii lɛ shwieɔ ekɔɔji anɔ, ni ehiɛɔ amɛnaji amli, aloo ekɛ amɛ woɔ baagi loo kɛntɛŋ ní ma teji sɛɛ lɛ mli, ni amɛhiɔ mli aahu kɛyashiɔ beni toobii nɛɛ baanyɛ anyiɛ amɛnyɛmɛi asɛɛ.” Ani ejeee miishɛjemɔ akɛ wɔɔle akɛ wɔmiisɔmɔ Nyɔŋmɔ ni yɔɔ suɔmɔ kɛ mlihilɛ ní tamɔ nɛkɛ kɛha ewebii?
[Akrabatsa/Mfoniri ni yɔɔ baafa 412]
Te Shikpɔŋ lɛ Shɔ̃ɔ Su Yɔɔ Hã Tɛŋŋ?
Yɛ blema beaŋ lɛ, adesai babaoo he amɛye akɛ shikpɔŋ lɛ yɛ tɛtrɛɛ. Shi, mra mli yɛ afii ohai ekpaa D.Ŋ.B. lɛ, Hela jeŋ nilelɔ Pythagoras ka eyiŋ ewie akɛ esa akɛ shikpɔŋ lɛ afee kokroo. Kɛ́ nakai eji po lɛ, afii ohai enyɔ dani Pythagoras ka eyiŋ etsɔɔ esusumɔ nɛɛ, gbalɔ Yesaia jaje kɛ wiemɔi ní mli kã shi faŋŋ, kɛ nɔmimaa hu akɛ: ‘Lɛ etá shikpɔŋ lɛ yiteŋ ati lɛ nɔ.’ (Yesaia 40:22) Abaanyɛ atsɔɔ Hebri wiemɔ chugh ní atsɔɔ shishi yɛ biɛ akɛ “ati” lɛ shishi hu akɛ “kutruku.” Nɔ ni yɔɔ miishɛɛ ji akɛ, nɔ ko kutruku pɛ anyɛɔ anaa lɛ kokroo kɛjɛɔ he fɛɛ he ní akwɛɔ kɛjɛɔ.f Belɛ, gbalɔ Yesaia ŋma sane ní ja yɛ jeŋ nilee shishinumɔ naa, ní blema adesãi amli saji bɛ mli nɛɛ efɔ̃ shi mra kwraa kɛtsɔ ebe lɛ mli nilee hiɛ.
[Shishigbɛ niŋmaa]
f Kɛ́ aawie he ŋmiiŋmi lɛ, shikpɔŋ lɛ su yɛ kokroo kɛ tɛtrɛɛ fioo. Eyɛ tɛtrɛɛ fioo yɛ kooyigbɛ kɛ wuoyigbɛ atii lɛ anɔ.
[Mfoniri ni yɔɔ baafa 403]
Yohane Baptisilɔ lɛ ji gbee ní “miibo yɛ ŋã lɛ nɔ” lɛ