Yehowa—Mɔ Ni Sa Gbeyeishemɔ Shi Esumɔɔ Mɔ
YEHOWA NYƆŊMƆ bi akɛ, “Belɛ namɔ he nyɛkɛ mi aaato”? Wiemɔ ni nɔ kwɔ fe fɛɛ lɛ po nyɛŋ atsɔɔ Nyɔŋmɔ hewalɛ kɛ anunyam ni eko kɛ lɛ yeee egbɔ lɛ mli kɛmɔ shi. Lɛ diɛŋtsɛ efɔɔ nine etsɛɔ wɔ koni wɔkwɛ ŋwɛi akɛ: “Nyɛholea nyɛhiŋmɛii anɔ kɛyaa ŋwɛi, ni nyɛkwɛa: Namɔ bɔ enɛɛmɛi? Lɛ mɔ ni ejieɔ amɛsafoi akpo yɛ yibɔ naa, ni etsɛɔ amɛ fɛɛ kɛ amɛgbɛi lɛ; enyɛmɔ ni fa kɛ ehewalɛ kpele lɛ hewɔ lɛ amɛteŋ ekome folo po eshwɛɛɛ.”—Yesaia 40: 25, 26.
Ŋulamii akpekpei abɔ ni wɔnyɛɔ wɔkɛ wɔhiŋmɛii naa lɛ ji ŋulamii akpekpei toi akpei 100 ni yɔɔ wɔ ŋulamii kuikui nɛɛ pɛ mli lɛ fã nyɛkɛsiɔɔ ko pɛ! Shi Yehowa ekane ni ewo ŋulamii fɛɛ ni yɔɔ je muu fɛɛ lɛ gbɛi! Agbɛnɛ susumɔ hewalɛ kpele ni aŋa yi awo enɛɛmɛi fɛɛ mli lɛ he okwɛ. Dɔlɛ ni yɔɔ wɔ hulu nɛɛ teŋ lɛ shɛɔ hulu la naawalɛ akpekpei 27. Mɛɛ “hewalɛ kpele” Yehowa yɔɔ nɛkɛ, dani enyɛ ebɔ nɛkɛ nuklea flɔnɔi akpekpei toi akpei abɔ nɛɛ!
Belɛ ni wɔɔnu Yehowa shishi kɛmɔ shi lɛ, ebɛ wɔnyɛmɔ mli. Elihu kɛɛ: “Ofe lɛ, wɔninaaa lɛ, ehewalɛ tekeɔ nɔ; . . . no hewɔ lɛ adesai ashe lɛ gbeyei.” (Hiob 37:23, 24) Shi Yehowa miitao babaoo fe woo loo gbeyeishemɔ. Biblia Iɛ fa akɛ: “Ni suɔmɔ Yehowa, o-Nyɔŋmɔ lɛ, kɛ otsui fɛɛ kɛ osusuma fɛɛ kɛ ohewalɛ fɛɛ!” (5 Mose 6:5) Shi ani wɔbaanyɛ wɔsumɔ mɔ ko ni wɔnuuu lɛ shishi jogbaŋŋ? Hɛɛ, ejaakɛ eyɛ mli akɛ ŋwɛi shɔŋŋ Yehowa hiɔ moŋ, shi ekɛ adesai ni yeee emuu lɛ yeɔ yɛ suɔmɔ mli ni eŋmɛɔ amɛ gbɛ koni kɛ hoo lɛ amɛnu ehe saji ashishi fioo ko.—Okɛto Lala 113:5-9 he.
‘Ehiŋmɛii,’ ‘Etoi,’ Kɛ ‘Ehiɛ’
Gbɛ kome ni Yehowa tsɔɔ nɔ eyeɔ ebuaa wɔ ni wɔnu lɛ shishi ji ni eŋmɛ wɔ gbɛ ni wɔtsɔɔ bɔ ni lɛ diɛŋtsɛ eji yɛ adesai awiemɔi anaa. Bɔfo Petro kɛɛ: “Ejaakɛ Nuŋtsɔ Yehowa hiŋmɛii ka jalɔi ahe, ni eboɔ amɛfaikpamɔi atoi: shi mɛi ni feɔ nifɔjianii lɛ.Nuŋtsɔ lɛ ejie ehiɛ eka amɛ.”—1 Petro 3:12; Okɛto 2 Mose 15:6; Ezekiel 20:33; Luka 11: 20 he.
Shi nibii ni akɛtoɔ okadi nɛ, shi esaaa akɛ aŋɔɔ nɔ akɛ nakai eji yɛ heloo naa, taakɛ bɔ ni kɛ́ Ŋmalɛ lɛ tsɛ Nyɔŋmɔ akɛ “hulu,” “tsɛŋ,” aloo “Tɛsaa” lɛ belɛ no etsɔɔɔ akɛ nakai eji lɛlɛŋ lɛ. (Lala 84:11; 5 Mose 32:4, 31) Shi mɛi komɛi kɛɔ akɛ, ‘ani Biblia lɛ ekɛɛɛ akɛ abɔ wɔ yɛ “esubaŋ” nɔ?’ (1 Mose 1:26, 27) Hɛɛ, shi ni aaakɛɛ akɛ Nyɔŋmɔ yɛ heloo naabu, gugɔ kɛ toii lɛ kɛ naagbai ni hiɛdɔɔ yɔɔ mli baa. Ani nɔ ni Ofe lɛ nuɔ nɔŋŋ ji wiemɔi ni gbɛɛmɔi tereɔ kɛbaa etoiŋ lɛ? Dabi, ejaakɛ Biblia lɛ tsɔɔ akɛ Nyɔŋmɔ baanyɛ “anu” wiemɔi ni awieɔ yɛ tsui mli ni egbɛɛɛ yɛ daaŋ lɛ po. (1 Mose 24:42-45) Ni asaŋ enyɛmɔ ni ekɛ “naa nii” lɛ hu damɔɔɔ nɔ ni la kpɛɔ shwieɔ nɔ ni enaa lɛ nɔ.—Lala 139:2, 8-13; Hebribii 4:13.
No hewɔ lɛ gbɔmɔ ni yeɔ emuu lɛ jieɔ Nyɔŋmɔ sui tamɔ suɔmɔ kɛ jalɛsaneyeli kpo, shi jeee no ko ni ekɛ ehiŋmɛi ena diɛŋtsɛ yɛ Nyɔŋmɔ he. Kristofoi titri ji mɛi ni jieɔ nɛkɛ sui nɛɛ akpo yɛ be mli ni amɛboɔ ŋaawoo ni bɔfo Paulo kɛha nɛɛ toi lɛ, ni ewo hewalɛ akɛ: “Ni nyɛwo gbomɔ hee ni tsɔɔ ehee ekoŋŋ kɛyaa nilee mli yɛ mɔ ni bɔ lɛ lɛ subaŋ lɛ naa.”—Kolosebii 3:10.
Enunyam He Ninaai
Yɛ blema bei amli lɛ, Yehowa tsuji komɛi na hegbɛ ekɛ amɛnine aaashɛ Yehowa ŋwɛi anunyam lɛ he ninaai anɔ. Ezekiel ji nɛkɛ gbɔmɛi nɛɛ ateŋ mɔ kome. (Ezekiel 1:1) Anyɛɛɛ atsɔɔ nɔ ni ena yɛ ninaa mli lɛ mli! No hewɔ lɛ Ezekiel kɛ okadi nibii sɔrɔtoi to he, ni yɛ bei komɛi emli lɛ ejeɔ shishi ekɛɔ akɛ nɔ ni ena lɛ “tamɔ nɔ ko” ni tamɔ heloo mli nɔ ko. Akɛ nɔkwɛmɔ nɔ lɛ, gbalɔ lɛ kɛɛ:
Ni nɔ ko ni tamɔ maŋtsɛsɛi ni esu tamɔ safiro tɛ jeɔ kpo yɛ atatu ni yɔɔ amɛyiteŋ lɛ nɔ, ni kɛ akwɛ lɛ, nɔ ko ni tamɔ gbɔmɔ yɛ nɔ ko ni tamɔ maŋtsɛsɛi lɛ nɔ lɛ yiteŋgbɛ. Ni mina akɛ ejije tamɔ shika ni kpɛɔ; ni kɛjɛ ehɛ su lɛ nɔ kɛyaa eŋwɛigbɛ lɛ, la ebɔle lɛ kɛkpe, ni asaŋ kɛjɛ ehɛsu lɛ nɔ kɛkpelekeɔ shi lɛ mina akɛ etamɔ la, ni kpɛmɔ ebɔle lɛ kɛkpe. Bɔ ni kwaabuɛtɛ ni yɔɔ atatu mli yɛ nugbɔnɛmɔ gbi nɔ lɛ su yɔɔ lɛ, nakai kpɛmɔ ni bɔle lɛ kɛkpe lɛ yɔɔ. Enɛ ji Yehowa anunyam lɛ kpɛmɔ lɛ kpojiemɔ.”—Ezekiel 1:26-28.
Mɛɛ anunyam po Ezekiel tsɔɔ mli nɛkɛ! Bɔfo Yohane na Yehowa he ninaa ko ni tamɔ nakai ni eŋma akɛ: “Ni naa, maŋtsɛsɛi ko ma shi yɛ ŋwɛi, ni mɔ ko ta maŋtsɛsɛi lɛ nɔ. Ni mɔ ni ta nɔ lɛ, kɛ akwɛ lɛ lɛ, etamɔ yaspi kɛ sardi tɛ, ni kwaabuɛtɛ bɔle maŋtsɛsɛi lɛ he, ni kɛ akwɛ lɛ, etamɔ smaragde tɛ.” (Kpojiemɔ 4:1-3) Eyɛ mli ákɛ akɛ nii ni yɔɔ nyam kɛ fɛo ni tamɔ nɛkɛ etsɔɔ bɔ ni Yehowa ji lɛ mli moŋ, shi afeee ehe mfoniri akɛ eji Nyɔŋmɔ yiwalɔ. Shi moŋ nɔ ni anaa lɛ yɛ kpoo, nɔ ni kɛ hejɔlɛ baa tamɔ kwaabuɛtɛ.—Okɛto 1 Mose 9:12-16 he.
Yɛ anɔkwale ni eji akɛ Nyɔŋmɔ ŋmɛ gbɛ ni ana bɔ ni egbojee ji yɛ ŋwɛi lɛ mli fioo lɛ tsɔɔ akɛ ehiɛ hejɔlɛ jwɛŋmɔ ko yɛ adesai ahe. Yɛ anɔkwale mli lɛ, belɛ mɛi ni sumɔɔ Nyɔŋmɔ lɛ baanyɛ abɛŋkɛ lɛ kɛ hekɛnɔfɔɔ akɛ “sɔlemɔ Toibolɔ.”—Lala 65:3, NW.
Gbɔmɔ Hiob wie yɛ Nyɔŋmɔ he akɛ: “Naa, egbɛi lɛ anaabu naabui kɛkɛ nɛ, ni ehe ablɛbi fioo kɛkɛ wɔnuɔ nɛɛ!” (Hiob 26:14) Lɛlɛŋ, babaoo yɛ ni wɔbaakase yɛ Yehowa Nyɔŋmɔ, mɔ ni kɛ naanɔ gbɛkpamɔ akɛ amɛaahi shi daa ejɔɔ etsuji lɛ he. (Yohane 17:3) Shi “naanɔi anaanɔ” po haŋ wɔná be bɔ ni sa ni wɔkɛaana “nitsumɔ ni Nyɔŋmɔ tsuɔ kɛjɛɔ shishijee kɛyaa naagbee” lɛ shishi—Jajelɔ 3:11.
Shi, nɔ ni gbɔmɛi ni tsui ja lɛ le aloo amɛkaseɔ lɛ baanyɛ akanya amɛ ni amɛsumɔ akɛ amɛaabo Yehowa toi. (1 Yohane 5:3) Ani oji gbɔmɛi aŋkroaŋkroi nɛɛ ateŋ mɔ ko? Toiboo ni aaafee aha Nyɔŋmɔ lɛ bɛ mlɛo yɛ be fɛɛ mli. Shi kɛji akɛ obale Yehowa Nyɔŋmɔ kɛ esuɔmɔ gbɛi lɛ lɛlɛŋ lɛ, belɛ nɔ ko bɛ ni eeefee nɔ ni wa tsɔ aha bo. No hewɔ lɛ ani otswa ofai shi, akɛ obaale nɛkɛ Nyɔŋmɔ ni sa gbeyeishemɔ shi esumɔɔ mɔ nɛɛ he saji babaoo kɛmɔ shi?
[Mfoniri ni yɔɔ baafa 6]
Gbɔmɛi tamɔ Ezekiel kɛ Yohane na ninaai ni haa wɔnáa Yehowa ni sa gbeyeishemɔ Iɛ he nilee fioo ko
[Mfoniri ni yɔɔ baafa 7]
Bɔ ni Nyɔŋmɔ bɔ ŋulamii Iɛ eha ni ewo amɛ gbɛi hu lɛ haa wɔnáa ehewalɛ ni bɛ naagbee Iɛ he nilee fioo ko