Obɔlɔ Lɛ—kasemɔ Bɔ Ni Etamɔ Lɛ He Nii
“Mi lɛ maha minikpakpaianii lɛ fɛɛ abaho yɛ ohiɛ, ni mapae Yehowa gbɛi lɛ yɛ ohiɛ.”—2 MOSE 33:19.
1. Mɛni hewɔ woo ni akɛaaha Bɔlɔ lɛ sa lɛ lɛ?
BƆFO Yohane, mɔ ni ŋma Biblia lɛ mli naagbee wolo lɛ ŋma sane ni mli kwɔ ni ajaje yɛ Bɔlɔ lɛ he akɛ: “[Yehowa, NW] bo ji mɔ ni sa akɛ oŋɔ anunyam kɛ agbojee kɛ hewalɛ lɛ, ejaakɛ bo obɔ nii fɛɛ, ni osuɔmɔnaa amɛyɔɔ ni abɔ amɛ.” (Kpojiemɔ 4:11) Taakɛ nikasemɔ ni tsɔ hiɛ lɛ ha ale lɛ, bei pii lɛ nibii ni ŋmɛnɛŋmɛnɛ beaŋ jeŋ nilee naa lɛ kɛ yiŋtoi ni wɔɔdamɔ nɔ wɔhe wɔye akɛ nibii fɛɛ a-Bɔlɔ lɛ yɛ lɛ fataa he.
2, 3. (a) Mɛni ehe hiaa ni gbɔmɛi akase yɛ Bɔlɔ lɛ he? (b) Mɛni hewɔ shishinumɔ bɛ Bɔlɔ lɛ ni akɛ lɛ aaakpe hiɛ kɛ hiɛ diɛŋtsɛ lɛ mli lɛ?
2 Bɔ ni ehe hiaa akɛ wɔkpɛlɛ nɔ akɛ Bɔlɔ lɛ yɛ lɛ, nakai nɔŋŋ ehe hiaa akɛ wɔkase bɔ ni eji ha—ákɛ eji mɔ ko ni yɔɔ diɛŋtsɛ, ni hiɛ sui kɛ gbɛ̀i ni gbalaa gbɔmɛi kɛbɛŋkɛɔ ehe. He fɛɛ he ni ofee nakai kɛyashɛ lɛ, ani efeŋ nɔ ni sɛɛnamɔ yɔɔ he akɛ ooole lɛ jogbaŋŋ? Nakai feemɔ biii ni okɛ lɛ akpe hiɛ kɛ hiɛ, tamɔ bɔ ni wɔkɛ adesai krokomɛi kpeɔ lɛ.
3 Yehowa ji ŋulamii lɛ po a-Jɛɛhe, ni wɔ hulu lɛ ji ŋulami ni edalɛ ka teŋ. Ani obaasumɔ ni obɔ mɔdɛŋ obɛŋkɛ hulu lɛ diɛŋtsɛ he kpaakpa? Dabi! Gbɔmɛi pii kwɛɔ jogbaŋŋ yɛ amɛhiŋmɛi ni amɛkɛaakwɛ lɛ fioo, aloo ni amɛaaha ekpɛmɔ ni naa wa lɛ ashã amɛhewolo nɔ yɛ be kakadaŋŋ mli lɛ po he. Eteŋ gbɛ dɔlɛ lɛ shɛɔ dɔlɛ susumɔ 15,000,000 degrees Celsius (27,000,000°F.). Yɛ hiŋmɛitswaa fɛɛ hiŋmɛitswaa mli lɛ, nɛkɛ nuklea flɔnɔɔ nɛɛ tsakeɔ nibii ni tsiimɔ shɛɔ tɔn akpekpei ejwɛ efeɔ lɛ hewalɛ ni abaanyɛ akɛtsu nɔ ko. Efã nyɛkɛsiɔɔ ko pɛ shɛɔ shikpɔŋ nɛɛ nɔ akɛ dɔlɛ kɛ la, shi efalɛ nɛɛ po haa wala fɛɛ hiɔ shi yɛ biɛ. Esa akɛ nakai shishijee anɔkwalei lɛ aha wɔnaa akpɛ wɔhe yɛ Bɔlɔ lɛ hewalɛ ni yɔɔ naakpɛɛ lɛ he. Yesaia baanyɛ aŋma jogbaŋŋ yɛ “[Bɔlɔ lɛ] nyɛmɔ ni fa kɛ ehewalɛ kpele” lɛ he.—Yesaia 40:26.
4. Mɛni Mose bi, ni te Yehowa here nɔ eha tɛŋŋ?
4 Kɛlɛ, ani ole akɛ, beni Israelbii lɛ shi Mizraim yɛ afi 1513 D.Ŋ.B. lɛ sɛɛ nyɔji fioo ko lɛ, Mose kpa Bɔlɔ lɛ fai, akɛ: “Ha mana onunyam lɛ.” (2 Mose 33:18) Akɛni okaiɔ akɛ Nyɔŋmɔ ji hulu lɛ po Jɛɛhe hewɔ lɛ, belɛ obaanyɛ onu nɔ hewɔ ni ekɛɛ Mose akɛ: “Onyɛŋ mihiɛ ona; shi mɔ ko mɔ ko enaŋ mi, ni eyi aaaná wala” lɛ shishi. Bɔlɔ lɛ ŋmɛ Mose gbɛ koni eyatee ehe yɛ Sinai Gɔŋ lɛ nɔ he ko beni ‘E-hoɔ lɛ.’ Mose na Nyɔŋmɔ ‘sɛɛ,’ kɛ́ aaawie he nakai, ena Bɔlɔ lɛ anunyam lɛ sɛɛ kpɛmɔ ko.—2 Mose 33:20-23; Yohane 1:18.
5. Yɛ mɛɛ gbɛ nɔ Bɔlɔ lɛ tsu nɔ ni Mose tsui shweɔ lɛ he nii, ni mɛni enɛ tsɔɔ?
5 Bɔ ni Mose shweɔ ni ele Bɔlɔ lɛ jogbaŋŋ lɛ efeee efolo. Eyɛ faŋŋ akɛ beni ewieɔ kɛtsɔɔ ŋwɛibɔfo ko nɔ lɛ, Nyɔŋmɔ ho Mose he ni ejaje akɛ: “Yehowa, Yehowa, Nyɔŋmɔ musuŋtsɔlɔ kɛ durolɔ ni toɔ tsui, ni mɔbɔnalɛ kɛ anɔkwale fa pii, ni hiɛɔ mɔbɔnalɛ mli ehaa mɛi akpei abɔ, ni ŋɔɔ tɔmɔ kɛ efɔŋ kɛ esha efaa, ni ehaaa mɔ ko mɔ ko aŋɔ ehe aye kwraa.” (2 Mose 34:6, 7) Enɛ tsɔɔ akɛ wɔ-Bɔlɔ lɛ ni wɔɔle lɛ jogbaŋŋ lɛ kɔɔɔ gbɔmɔtso su ko ni aaana lɛ he, shi bɔ ni eji ha, esu kɛ baŋ kɛ esui komɛi lɛ ni wɔɔnu shishi jogbaŋŋ kɛmɔ shi lɛ.
6. Wɔ gbɔmɔtso mli nii ni gbeɔ muawai lɛ yɛ naakpɛɛ yɛ mɛɛ gbɛ nɔ?
6 Gbɛ kome ni wɔɔnyɛ wɔtsɔ nɔ wɔfee enɛ ji Nyɔŋmɔ sui lɛ ni wɔɔtsɔ nibii ni ebɔ lɛ anɔ wɔyoo. Susumɔ ogbɔmɔtsoŋ nii ni gbeɔ muawai yɛ omli lɛ he okwɛ. Scientific American lɛ wie yɛ sane ko ni kɔɔ gbɔmɔtso mli nii ni gbeɔ muawai lɛ ahe akɛ: “Dani aaafɔ mɔ ko kɛyashi gbele mli lɛ, gbɔmɔtso mli nii ni gbeɔ muawai ahe gbɛjianɔtoo lɛ hiɛ hiɔ ehe nɔ be fɛɛ be. Lá kulibii kɛ lá mli wala yibii srɔtoi babaoo . . . buɔ wɔhe kɛjɛɔ lá mli helai kɛ muawai ahe. Kɛji akɛ nakai hefamɔ nibii lɛ bɛ lɛ, adesai nyɛŋ ahi wala mli.” Mɛni ji nakai gbɛjianɔtoo lɛ jɛɛhe? Sane ko ni aŋma yɛ nakai wolo tɛtrɛɛ lɛ mli lɛ kɛɛ akɛ: “Wala yibii babaoo ni ato naa ni yɔɔ naakpɛɛ ni kɛ amɛhe yeɔ sharamɔ ni buɔ gbɔmɔtso lɛ he kɛjɛɔ muawai ni kɛ helai baa lɛ ahe lɛ jɛ shishijee wala yibii fioo ni baa klɛŋklɛŋ aaafee otsii nɛɛhu yɛ hɔŋɔɔ sɛɛ lɛ amli.” Yoo ni eŋɔ hɔ lɛ kɛ gbɔmɔtso mli nii ni gbeɔ muawai lɛ eko haa bi ni daa yɛ emusuŋ lɛ. Yɛ sɛɛ mli lɛ, etsɔɔ fufɔ ni ehaa lɛ nɔ ekɛ wala yibii ni gbeɔ muawai kɛ gbɔmɔtso mli nui ni tamɔ tsofa ni afutu ni he yɔɔ sɛɛnamɔ haa ebi fufɔo lɛ.
7. Mɛni wɔbaasusu yɛ wɔgbɔmɔtso mli nii ni gbeɔ muawai lɛ ahe, ni te ehaa wɔmuɔ sane naa wɔhaa tɛŋŋ?
7 Oyɛ yiŋtoo kpakpa ni ooodamɔ nɔ omu sane naa akɛ, ogbɔmɔtso mli nii ni gbeɔ muawai ahe gbɛjianɔtoo lɛ fe nɔ fɛɛ nɔ ni ŋmɛnɛŋmɛnɛ beaŋ tsofa baanyɛ ekɛha. No hewɔ lɛ, bi ohe akɛ: ‘Mɛni enɛ tsɔɔ yɛ e-Feelɔ kɛ Halɔ lɛ he?’ Gbɛjianɔtoo nɛɛ ‘ni pueɔ klɛŋklɛŋ aaafee otsii nɛɛhu yɛ hɔŋɔɔ sɛɛ,’ ni efee klalo akɛ eeefã gbekɛ ni afɔ lɛ ehee lɛ he lɛ jieɔ nilee kɛ nii ni atsɔɔ hiɛ asusuɔ he diɛŋtsɛ kpo. Shi ani wɔbaanyɛ wɔyoo nibii babaoo po yɛ Bɔlɔ lɛ he kɛjɛ gbɛjianɔtoo nɛɛ mli? Mɛni wɔteŋ mɛi pii wieɔ yɛ Albert Schweitzer kɛ mɛi krokomɛi ni kɛ amɛshihilɛ tsu nii koni amɛná tsofa amɛha mɛi ni ehia amɛ lɛ ahe? Bei pii lɛ, wɔkɛɔ akɛ gbɔmɛi ni amɛmusuŋ tsɔɔ amɛ yɛ mɛi ahe nɛɛ ji gbɔmɛi kpakpai. Kɛ akɛto he lɛ, mɛni wɔbaanyɛ wɔkɛɛ yɛ wɔ-Bɔlɔ lɛ, mɔ ni kɛ gbɔmɔtsoŋ nii ni gbeɔ muawai lɛ haa niiatsɛmɛi kɛ ohiafoi fɛɛ lɛ he? Eyɛ faŋŋ akɛ, eyɛ suɔmɔ, ekwɛɛɛ mɛi ahiɛaŋ, eyɛ musuŋtsɔlɛ, ni eja pɛ. Ani enɛ kɛ bɔ ni Mose tsɔɔ bɔ ni Bɔlɔ lɛ ni enu ehe lɛ ji lɛ mli eha lɛ kpãaa gbee?
Ejieɔ Bɔ Ni Etamɔ Ha lɛ Kpo
8. Yehowa jieɔ ehe kpo etsɔɔ wɔ yɛ mɛɛ gbɛ krɛdɛɛ nɔ?
8 Shi kɛlɛ, gbɛ kroko ni wɔɔtsɔ nɔ wɔle wɔ-Bɔlɔ lɛ jogbaŋŋ ji—kɛtsɔ Biblia lɛ nɔ. Enɛ he hiaa waa diɛŋtsɛ ejaakɛ nibii yɛ ni kɔɔ ehe ni jeŋ nilee kɛ jeŋ muu fɛɛ lɛ nyɛɛɛ ajie amɛ kpo kwraa kɛ nibii krokomɛi ni Biblia lɛ feɔ lɛ faŋŋ jogbaŋŋ. Klɛŋklɛŋ nɔ lɛ he nɔkwɛmɔnɔ ji Bɔlɔ lɛ diɛŋtsɛ gbɛi. Biblia lɛ pɛ tsɔɔ Bɔlɔ lɛ gbɛi kɛ eshishinumɔ. Yɛ Hebri Biblia ni akɛ niji ŋmala lɛ amli lɛ, egbɛi lɛ jeɔ kpo aaafee shii 7,000 akɛ daaŋ gbɛɛmɔ niŋmaa okadii ejwɛ ni abaanyɛ aŋmala amɛ akɛ YHWH aloo JHVH, ní afɔɔ lɛ tsɛmɔ akɛ Yehowa [Jehovah] yɛ Ŋleshi wiemɔ mli lɛ.—2 Mose 3:15; 6:3.
9. Mɛni ji Bɔlɔ lɛ diɛŋtsɛ gbɛi lɛ shishi, ni mɛni wɔbaanyɛ wɔkɛɛ yɛ enɛ he?
9 Bɔni afee ni wɔle Bɔlɔ lɛ jogbaŋŋ lɛ, ehe miihia ni wɔyoo akɛ ejeee “Klɛŋklɛŋ Mɔ ni Ha Nɔ Ko Ba” aloo “Mi Ji” ko ni bɛ faŋŋ kɛkɛ. Lɛ diɛŋtsɛ egbɛi lɛ tsɔɔ nakai. Eji Hebri feemɔ wiemɔ su ko ni eshishi ji ‘batsɔ’ loo ‘ha ba.’a (Okɛto 1 Mose 27:29; Jajelɔ 11:3 he.) Nyɔŋmɔ gbɛi lɛ shishi tsɔɔ “Ehaa Ebaa Mli” ni emaa nɔ mi akɛ etoɔ eyiŋ ni etsuɔ he nii hu. Kɛtsɔ egbɛi lɛ ni wɔɔle kɛ ekɛ nitsumɔ nɔ lɛ, wɔbaanyɛ wɔyoo jogbaŋŋ akɛ ehaa shiwoi baa mli ni ehaa eyiŋtoi hu baa mli diɛŋtsɛ.
10. Mɛɛ shishinumɔ ni he hiaa wɔbaanyɛ wɔná kɛjɛ Klɛŋklɛŋ Mose Wolo lɛ mli saji ni aŋmala lɛ amli?
10 Biblia lɛ ji Nyɔŋmɔ yiŋtoi kɛ esu kɛ baŋ he nilee jɛɛhe. Saji ni aŋmala ashwie shi yɛ Klɛŋklɛŋ Mose Wolo lɛ mli lɛ jieɔ lɛ kpo akɛ be ko lɛ toiŋjɔlɛ yɛ adesai kɛ Nyɔŋmɔ teŋ, ni amɛyɛ shihilɛ ni shishinumɔ yɔɔ mli ni sɛɛ baakɛ he gbɛkpamɔ. (1 Mose 1:28; 2:7-9) Yɛ bɔ ni egbɛi lɛ shishinumɔ ji lɛ kɛ gbeekpamɔ naa lɛ, wɔbaanyɛ wɔná nɔmimaa akɛ, Yehowa baaha piŋmɔ kɛ nijiaŋwujee ni adesa kɛkpe yɛ be kakadaŋŋ mli lɛ aba naagbee. Wɔkaneɔ yɛ eyiŋtoo ni baa mli lɛ he akɛ: “Aŋɔ jeŋ ni anaa nɛɛ ato yiŋtoo ni feɔ yaka shishi, jeee yɛ lɛ diɛŋtsɛ esuɔmɔnaa, shi kɛtsɔ Bɔlɔ lɛ suɔmɔnaa nɔ, mɔ ni yɛ be mli ni efeɔ lɛ nakai lɛ, ekɛ hiɛnɔkamɔ ha lɛ koni gbi ko lɛ . . . eha ená Nyɔŋmɔ bii lɛ anunyam heyeli lɛ mli gbɛfaŋnɔ.”—Romabii 8:20, 21, The New Testament Letters, ni J. W. C. Wand ŋma.
11. Mɛni hewɔ wɔbaanyɛ wɔsusu Biblia mli saji ahe lɛ, ni te atsɔɔ saji nɛɛ ateŋ ekome mli aha tɛŋŋ?
11 Biblia lɛ hu baanyɛ aye abua wɔ koni wɔle wɔ-Bɔlɔ lɛ jogbaŋŋ kɛ shishinumɔ akɛ, ejieɔ enifeemɔ kɛ bɔ ni efee enii eha yɛ be mli ni ekɛ blema Israel yeɔ lɛ kpo. Susumɔ nɔkwɛmɔnɔ ni kɔɔ Elisha kɛ Naeman ni ji Arambii ni he tsɛ̃ɔ amɛ lɛ asafoiatsɛ nukpa lɛ he okwɛ. Beni okaneɔ nɛkɛ sane nɛɛ yɛ 2 Maŋtsɛmɛi yitso 5 lɛ, obaana akɛ Israel gbekɛ yoo fioo ko ni aŋɔ lɛ nom lɛ wo hewalɛ akɛ Elisha ni yɔɔ Israel lɛ baanyɛ atsa Naeman kpiti lɛ eha lɛ. Naeman tee jɛmɛ ni eekpa gbɛ akɛ Elisha baafɔ̃ enine yɛ ŋkunyaayeli nifeemɔ gbɛ ko nɔ ni ekɛtsa lɛ. Yɛ no najiaŋ lɛ, Elisha kɛɛ Aramnyo lɛ akɛ eyaju ehe yɛ Yordan Faa lɛ mli. Eyɛ mli akɛ ehe bahia ni Naeman tsuji lɛ atsɔ eyiŋ koni ekpɛlɛ nɔ moŋ, shi beni efee nakai lɛ, atsa lɛ. Naeman kɛ nikeenii ni jara wawai ha, shi Elisha heee. Yɛ sɛɛ mli lɛ ehefatalɔ ko ju shi kɛtee Naeman ŋɔɔ ni etsɔ amale nɔ ehe nibii ni jara wa lɛ ekomɛi. Nɔ ni jɛ anɔkwale ni eyeee lɛ mli ba ji kpiti hela ni akɛtswa lɛ. Enɛ ji adesa shihilɛ mli sane ko ni mɔɔ mɔ tsui—nɔ ni wɔbaanyɛ wɔkase nii kɛjɛ mli.
12. Wɔbaanyɛ wɔjɛ Elisha kɛ Naeman sane lɛ mli wɔmu mɛɛ saji anaa yɛ Bɔlɔ lɛ he?
12 Sane lɛ tsɔɔ yɛ gbɛ ni yɔɔ miishɛɛ nɔ akɛ, jeŋ muu fɛɛ Bɔlɔ Kpeteŋkpele lɛ bɛ ŋwɛi shɔŋŋ tsɔ̃ bɔ ni ekɛ duromɔ aaayoo gbekɛ yoo fioo ko, nɔ ni tamɔɔɔ nii ni yaa nɔ daa yɛ maji pii amli ŋmɛnɛ lɛ. Eyeɔ odase hu akɛ Bɔlɔ lɛ edurooo weku loo maŋ kome ko pɛ. (Bɔfoi lɛ Asaji 10:34, 35) Nɔ ni yɔɔ miishɛɛ ji akɛ, yɛ nɔ najiaŋ ni eeekpa gbɛ ni gbɔmɛi kɛ—nifeemɔ gbɛ ni anaa daa ni “helatsalɔi” komɛi ni hi shi yɛ be ni eho lɛ mli kɛ ŋmɛnɛ kɛaatsu nii lɛ—Bɔlɔ lɛ kɛ nilee ni yɔɔ naakpɛɛ tsu nii. Ele bɔ ni atsaa kpiti ahaa. Agbɛnɛ hu ejie saneshishinumɔ kɛ jalɛ saneyeli kpo akɛni eŋmɛɛɛ gbɛ ni shishiumɔ aye omanye hewɔ. Agbɛnɛ hu, ani enɛ kɛ Yehowa su kɛ baŋ ni Mose nu he lɛ kpãaa gbee? Eyɛ mli akɛ nakai Biblia mli sane lɛ yɛ kuku moŋ, shi kwɛ nii ni wɔbaanyɛ wɔkase kɛjɛ mli ni kɔɔ bɔ ni wɔ-Bɔlɔ lɛ ji ha lɛ he!—Lala 33:5; 37:28.
13. Feemɔ bɔ ni wɔbaanyɛ wɔná nikasemɔi ni sɛɛnamɔi yɔɔ mli kɛjɛ Biblia mli saji amli lɛ he nɔkwɛmɔnɔ.
13 Saji krokomɛi ni kɔɔ Israel trumufeemɔ kɛ bɔ ni Nyɔŋmɔ tsu he nii eha lɛ he lɛ yeɔ odase akɛ Yehowa susuɔ mɔ he lɛɛlɛŋ. Biblia lɛ kɛɔ akɛ, Israelbii lɛ ka lɛ nɔtonɔto ni amɛwo emli la ni edɔ lɛ. (Lala 78:40, 41) No hewɔ lɛ, Bɔlɔ lɛ yɛ henumɔi, ni esusuɔ nɔ ni adesa feɔ lɛ he. Nibii pii hu yɛ ni abaanyɛ akase kɛjɛ saji ni kɔɔ aŋkroaŋkroi ni ale amɛ jogbaŋŋ lɛ ahe. Beni ahala David ni ebatsɔ Israel maŋtsɛ lɛ, Nyɔŋmɔ kɛɛ Samuel akɛ: “Gbɔmɔ lɛ ekwɛɔ kponɔgbɛ nii, shi Yehowa lɛ tsui ekwɛɔ!” (1 Samuel 16:7) Hɛɛ, Bɔlɔ lɛ kwɛɔ bɔ ni wɔji yɛ mligbɛ, jeee kponɔgbɛ nii kɛkɛ. Kwɛ bɔ ni ehaa wɔtsui nyɔɔ wɔmli!
14. Mɛni wɔbaanyɛ wɔfee ni sɛɛnamɔ yɔɔ he yɛ be mli ni wɔkaneɔ Hebri Ŋmalɛi lɛ?
14 Aŋmala Biblia lɛ mli woji lɛ ateŋ 39 dani Yesu be lɛ shɛ, ni ehe miihia ni wɔkane. Esaaa akɛ enɛ feɔ Biblia mli saji loo yinɔsane ni aakase kɛkɛ. Kɛji akɛ wɔmiisumɔ ni wɔkase bɔ ni wɔ-Bɔlɔ lɛ ji diɛŋtsɛ lɛ, belɛ esa akɛ wɔjwɛŋ nakai saji lɛ anɔ, ni ekolɛ wɔsusu akɛ, ‘Sane kuku nɛɛ jieɔ mɛni kpo yɛ esu kɛ baŋ he? Nɛkɛ sui nɛɛ ateŋ te nɔ ni anaa lɛ jogbaŋŋ yɛ biɛ?’b Nakai feemɔ baanyɛ aye abua mɛi ni yiŋ feɔ amɛ kɔshikɔshi lɛ po, koni amɛna akɛ esa akɛ Biblia lɛ afee nɔ ni jɛ Nyɔŋmɔ ŋɔɔ, koni no afee shishitoo ni baaha amɛbale e-Ŋmalɔ ni yɔɔ suɔmɔ lɛ jogbaŋŋ.
Tsɔɔlɔ Kpele ko Yeɔ Ebuaa Wɔ Koni Wɔle Bɔlɔ Lɛ
15. Mɛni hewɔ esa akɛ Yesu nifeemɔi kɛ etsɔɔmɔi lɛ afee nɔ ni tsɔɔ mɔ nii lɛ?
15 Wɔkpɛlɛ nɔ akɛ, nɔ ko bibioo pɛ gbɔmɛi ni amɛyiŋ feɔ amɛ kɔshikɔshi yɛ shihilɛ mli ni Bɔlɔ lɛ yɔɔ lɛ he lɛ, aloo amɛsusumɔ yɛ Nyɔŋmɔ he lɛ bɛ faŋŋ lɛ baale yɛ Biblia lɛ he. Ekolɛ okɛ aŋkroaŋkroi komɛi ni nyɛɛɛ atsɔɔ kɛji Mose hi shi dani Mateo ba loo eba yɛ Mateo sɛɛ ni leee nɔ ko nɔ ko kwraa yɛ Yesu nifeemɔi loo etsɔɔmɔi ahe lɛ ekpe pɛŋ. Enɛ yɛ mɔbɔ waa, ejaakɛ mɔ ko baanyɛ akase Bɔlɔ lɛ he nii babaoo kɛjɛ Tsɔɔlɔ Kpele, ni ji Yesu ŋɔɔ. Akɛni ekɛ Nyɔŋmɔ ehi shi akɛ mɔ ni bɛŋkɛ lɛ kpaakpa hewɔ lɛ, ebaanyɛ ejie bɔ ni wɔ-Bɔlɔ lɛ ji lɛ kpo etsɔɔ. (Yohane 1:18; 2 Korintobii 4:6; Hebribii 1:3) Ni efee nakai. Yɛ anɔkwale mli lɛ, ewie be ko akɛ: “Mɔ ni ena mi lɛ, ena tsɛ lɛ.”—Yohane 14:9.
16. Sane ni Yesu kɛ Samaria yoo lɛ gba lɛ feɔ mɛni he nɔkwɛmɔnɔ?
16 Susumɔ nɔkwɛmɔnɔ nɛɛ he okwɛ. Be ko beni gbɛfãa eha etɔ Yesu lɛ, ekɛ Samariayoo ko gba sane yɛ Sikar maŋ lɛ masɛi. Egba lɛ anɔkwalei ni mli kwɔlɔ, ni damɔ bɔ ni ehe hiaa ni ‘aja Tsɛ lɛ yɛ mumɔ kɛ anɔkwale mli’ lɛ nɔ. Yudafoi ni yɔɔ nakai be lɛ mli lɛ tsiɔ amɛhe kɛjɛɔ Samariabii lɛ ahe. Nɔ ni tamɔɔɔ nakai lɛ, Yesu jie bɔ ni Yehowa sumɔɔ akɛ ekpɛlɛ hii kɛ yei anɔkwafoi ni jɛ jeŋmaji fɛɛ mli lɛ anɔ lɛ kpo, taakɛ wɔkadi yɛ sane ni kɔɔ Elisha kɛ Naeman he lɛ mli lɛ. Esa akɛ enɛ ama nɔ mi kɛha wɔ akɛ, Yehowa ekpɛlɛɛɛ jamɔ mli hetsɛ̃ ni kwɛɛɛ nii kɛyaaa shɔŋŋ ni egbɛ eshwã je lɛŋ fɛɛ ŋmɛnɛ lɛ nɔ. Wɔbaanyɛ wɔkadi anɔkwale ni eji akɛ Yesu miisumɔ ni etsɔɔ yoo ko nii, ni yɛ enɛ mli lɛ eji yoo ni nuu ni ekɛ lɛ yɔɔ lɛ jeee ewu. Yɛ nɔ najiaŋ ni eeewie eshi lɛ lɛ, Yesu kɛ lɛ ye yɛ bulɛ mli, yɛ gbɛ ni baanyɛ aye abua lɛ diɛŋtsɛ lɛ nɔ. Yɛ no sɛɛ lɛ, Samariabii krokomɛi bo Yesu toi ni amɛmu sane naa akɛ: “Wɔna wɔle akɛ, anɔkwale, mɔ nɛ ji je lɛ walaherelɔ” lɛ.—Yohane 4:2-30, 39-42; 1 Maŋtsɛmɛi 8:41-43; Mateo 9:10-13.
17. Sane ni kɔɔ Lazaro shitee lɛ he lɛ kɛ mɛɛ sane naamuu baa?
17 Nyɛhaa wɔsusua nɔkwɛmɔnɔ kroko ni tsɔɔ bɔ ni wɔɔfee wɔkase Bɔlɔ lɛ he nii kɛtsɔ Yesu nifeemɔi kɛ etsɔɔmɔi ni wɔɔle babaoo lɛ nɔ. Susumɔ be mli ni Yesu shieŋtsɛ Lazaro gbo lɛ he. No mli lɛ Yesu etsɔ hiɛ ejie ehewalɛ ni ekɛaaha gbohii aba wala mli ekoŋŋ lɛ kpo momo. (Luka 7:11-17; 8:40-56) Shi te efee enii eha tɛŋŋ beni ena ni Lazaro nyɛmi yoo Maria foɔ lɛ? Yesu “huŋ yɛ mumɔ mli ni ekpokpo.” Efeee mɔ ni sane lɛ kɔɔɔ ehe aloo ni eeetsi ehe; ‘efo.’ (Yohane 11:33-35) Ni enɛ jeee henumɔ kpojiemɔ ko kɛkɛ. Enɛ kanya Yesu koni efee nɔ̃ kpakpa ko—etee Lazaro shi. Obaanyɛ osusu bɔ ni enɛ ye ebua bɔfoi lɛ koni amɛhiɛ asɔ Bɔlɔ lɛ henumɔi kɛ nifeemɔi lɛ jogbaŋŋ lɛ he. Esa akɛ eye ebua wɔ kɛ mɛi krokomɛi koni amɛnu Bɔlɔ lɛ su kɛ baŋ kɛ egbɛ̀i ashishi.
18. Te esa akɛ gbɔmɛi anu Biblia lɛ kasemɔ he amɛha tɛŋŋ?
18 Yiŋtoo ko bɛ ni wɔɔdamɔ nɔ ni wɔha wɔhiɛ agbo Biblia lɛ kɛ Bɔlɔ lɛ he nii babaoo ni wɔɔkase lɛ he. Biblia lɛ jeee wolo ni ebe eho. Mɔ ni kase enɛ, ni ebatsɔ̃ Yesu hefatalɔ ni kɛ lɛ bɔ kpaakpa ji Yohane. Yɛ sɛɛ mli lɛ eŋma akɛ: “Wɔle akɛ Nyɔŋmɔ bi lɛ eba, ni ebaha wɔ jwɛŋmɔ koni wɔle anɔkwafo lɛ; ni wɔyɛ anɔkwafo lɛ mli, yɛ ebi Yesu Kristo lɛ mli; mɔ nɛ ji anɔkwa Nyɔŋmɔ lɛ kɛ naanɔ wala lɛ.” (1 Yohane 5:20) Kadimɔ akɛ “jwɛŋmɔ” ni wɔkɛaatsu nii koni wɔná “anɔkwafo lɛ” ni ji Bɔlɔ lɛ he nilee lɛ baanyɛ ekɛ mɔ aya “naanɔ wala” mli.
Te Ooofee Tɛŋŋ Oye Obua Mɛi Krokomɛi Koni Amɛkase Ehe Nii?
19. Mɛni áfee koni akɛye abua gbɔmɛi ni amɛyiŋ feɔ amɛ kɔshikɔshi lɛ?
19 Odaseyelii babaoo he miihia koni mɛi komɛi ahe aye akɛ Bɔlɔ musuŋtsɔlɔ ko yɛ ni susuɔ wɔhe koni amɛyoo bɔ ni eji. Gbɔmɛi akpekpei toi akpekpei abɔ yɛ ni amɛyiŋ feɔ amɛ kɔshikɔshi lolo yɛ Bɔlɔ lɛ he, aloo bɔ ni amɛsusuɔ ehe amɛhaa lɛ kɛ nɔ ni anaa yɛ Biblia lɛ mli lɛ kpãaa gbee. Te ooofee tɛŋŋ oye obua amɛ? Yɛ 1998 kɛ 1999 Yehowa Odasefoi akpokpaa wulu kɛ majimaji ateŋ kpeei ni amɛfee lɛ shishi lɛ, ajie dɛŋdade hee ko ni hi jogbaŋŋ kɛmɔ shi yɛ wiemɔi srɔtoi amli lɛ kpo—Is There a Creator Who Cares About You? wolo lɛ.
20, 21. (a) Mɛɛ gbɛ nɔ aaatsɔ ni akɛ Creator wolo lɛ atsu nii yɛ omanyeyeli mli? (b) Gbaa niiashikpamɔi ni tsɔɔ bɔ ni Creator wolo lɛ kɛ nitsumɔ efee nɔ ni mɔɔ shi jogbaŋŋ lɛ.
20 Eji wolo ni baaha hemɔkɛyeli ni oyɔɔ yɛ wɔ-Bɔlɔ lɛ mli kɛ hiɛsɔɔ ni oyɔɔ kɛha esu kɛ baŋ kɛ egbɛ̀i lɛ aya hiɛ. Mɛni hewɔ enɛ ji anɔkwale lɛ? Ejaakɛ aje gbɛ ato Is There a Creator Who Cares About You? wolo lɛ he gbɛjianɔ yɛ otii ni yɔɔ jwɛŋmɔ mli nɛɛ hewɔ. Saneyitso ko ni jeɔ kpo yɛ wolo lɛ mli fɛɛ ji ‘Mɛni baaha shishinumɔ aba oshihilɛ mli?’ Aŋmala emli saji lɛ yɛ gbɛ ni baaha gbɔmɛi ni le woloŋ saŋŋ lɛ po anya he waa nɔ. Kɛlɛ, ewieɔ nibii ni wɔ fɛɛ wɔshweɔ waa lɛ ahe. Obaana saji ni ŋɔɔ ni tsɔɔ mɔ yiŋ kɛha nikanelɔi ni jeɔ shihilɛ mli ni Bɔlɔ lɛ yɔɔ lɛ he ŋwane lɛ. Wolo lɛ etsɔɔɔ akɛ nikanelɔ lɛ heɔ Bɔlɔ ko eyeɔ. Bɔ ni atsu jeŋ nilee he nibii ni akpá shi ana nyɛsɛɛ nɛɛ nɔŋŋ lɛ kɛ ehe susumɔi ahe nii aha lɛ baamɔ mɛi ni amɛyiŋ feɔ amɛ kɔshikɔshi lɛ atsuii. Anɔkwa saji ni tamɔ nɛkɛ lɛ baawaje mɛi ni heɔ Nyɔŋmɔ nɔ amɛyeɔ lɛ po ahemɔkɛyeli.
21 Abaana yɛ wolo hee nɛɛ kasemɔ mli akɛ efãi komɛi kɛ Biblia mli yinɔsane he naamuamɔ haa yɛ gbɛ ni maa Nyɔŋmɔ su kɛ baŋ lɛ nɔ mi, ni eyeɔ ebuaa nikanelɔi lɛ koni amɛbale Nyɔŋmɔ jogbaŋŋ. Mɛi babaoo ni ekane momo lɛ ewie bɔ ni enɛ efee anɔkwale yɛ amɛshihilɛ mli lɛ he. (Kwɛmɔ sane ni aŋma ni nyiɛ enɛ sɛɛ lɛ, yɛ baafai 25 kɛ 26.) Eba akɛ eeeba lɛ nakai yɛ bo hu ogbɛfaŋ yɛ be mli ni otaoɔ ole wolo lɛ mli saji jogbaŋŋ koni okɛtsu nii ni okɛye obua mɛi krokomɛi ni amɛbale amɛ-Bɔlɔ lɛ jogbaŋŋ lɛ.
[Shishigbɛ niŋmai]
a Beni Jesuit woloŋlelɔ M. J. Gruenthaner ji The Catholic Biblical Quarterly lɛ woloŋmalɔ nukpa lɛ, kɛ nɛkɛ feemɔ wiemɔ nɛɛ to nɔ ni ekɛɛ yɛ feemɔ wiemɔ ko ni tamɔ nakai lɛ he, akɛ “etsɔɔɔ shihilɛ ko ni bɛ faŋŋ kɔkɔɔkɔ, shi moŋ etsɔɔ nɔ ni yɔɔ shihilɛ mli loo nɔ ko ni jieɔ ehe kpo diɛŋtsɛ be fɛɛ be.”
b Beni fɔlɔi gbaa amɛbii lɛ Biblia mli saji lɛ, amɛbaanyɛ amɛye amɛbua amɛbii lɛ kɛtsɔ sanebimɔi ni tamɔ nɛkɛ ni amɛaatee amɛ shi lɛ nɔ. Enɛ baaha gbekɛbii lɛ ale Nyɔŋmɔ, ni amɛbaakase bɔ ni amɛaafee ni amɛjwɛŋ e-Wiemɔ lɛ nɔ hu.
Ani Okadi?
◻ Mose bale Yehowa jogbaŋŋ yɛ Sinai Gɔŋ lɛ nɔ yɛ mɛɛ gbɛ nɔ?
◻ Mɛni hewɔ Biblia lɛ kasemɔ yeɔ buaa ni aleɔ bɔ ni Nyɔŋmɔ ji lɛ?
◻ Beni wɔkaneɔ Biblia lɛ, mɛni wɔbaanyɛ wɔfee koni wɔtsi wɔbɛŋkɛ wɔ-Bɔlɔ lɛ he kpaakpa?
◻ Mɛɛ gbɛjianɔ oto koni okɛ Creator wolo lɛ atsu nii?
[Mfoniri ni yɔɔ baafa 20]
Wɔ gbɔmɔtso mli nibii ni wuɔ shiɔ muawai ahe gbɛjianɔtoo lɛ tsɔɔ mɛni yɛ wɔ-Bɔlɔ lɛ he?
[Mfoniri ni yɔɔ baafa 21]
Ŋshɔ ni Egbo Wolo Kpoi lɛ fã ko ni ama Tetragrammaton (ni ji Nyɔŋmɔ gbɛi yɛ Hebri wiemɔ mli) lɛ nɔ mi yɛ mli
[He ni Sane lɛ Jɛ]
Courtesy of the Shrine of the Book, Israel Museum, Jerusalem
[Mfoniri ni yɔɔ baafa 23]
Mɛni wɔbaanyɛ wɔkase kɛjɛ bɔ ni Yesu fee enii eha yɛ awerɛho ni Maria ye lɛ he lɛ mli?