“Ehãa Mɔ Ni Etɔ Lɛ Lɛ Hewalɛ”

 1. Mɛɛ naagbai wɔkɛkpeɔ? Shi mɛni hewɔ Yehowa náa etsuji anɔkwafoi lɛ ahe miishɛɛ waa? (Kwɛmɔ mfonirii ni yɔɔ nikasemɔ lɛ shishijee lɛ.)

JE NƐƐ mli shihilɛ wa waa. Nyɛteŋ mɛi pii yɛ ni helai ni naa wala kɛ nyɛ miitswia shi. Mɛi komɛi yɛ ni eyɛ mli akɛ amɛ diɛŋtsɛ lɛ, amɛgbɔlɔ moŋ nɛ, shi amɛmiikwɛ amɛwekumɛi ni egbɔlɔ. Etɔɔ nyɛteŋ mɛi komɛi hu waa dani nyɛnyɛɔ nyɛhãa nyɛweku lɛ amɛhiamɔ nii. Ni wɔle akɛ, nyɛteŋ mɛi pii yɛ ni nyɛkɛ naagbai ni tamɔ nɔ ni wɔtsĩ tã nɛɛ enyɔ loo nɔ ni fe nakai miikpe shi kome! Naagbai nɛɛ hãa nyɛfiteɔ shika babaoo, ehãa etɔɔ nyɛ bliboo, ni ehãaa nyɛná dekã nyɛhã nyɛhe. Shi yɛ fɛɛ mli lɛ, nyɛyɛ hemɔkɛyeli ni mli wa akɛ, Yehowa baaye abua nyɛ, ni nyɛle akɛ, tamɔ bɔ ni ewo shi lɛ, wɔsɛɛ lɛ nibii baahi. Yehowa náa nyɛhe miishɛɛ waa yɛ nyɛhemɔkɛyeli nɛɛ hewɔ!

 2. Mɛɛ gbɛ nɔ Yesaia 40:29 lɛ baanyɛ awo wɔ hewalɛ? Mɛɛ nɔ ko ni yɔɔ oshara waa kɛ́ wɔkwɛɛɛ ni ahi lɛ, wɔbaafee?

² Shi ani bei komɛi lɛ, onuɔ he akɛ onyɛɛɛ dɔŋŋ ejaakɛ onaagbai lɛ miisu otsui tsɔ? Kɛ́ nakai lɛ, ná ole akɛ, jeee bo pɛ onuɔ he nakai. Biblia lɛ hãa wɔleɔ akɛ, Nyɔŋmɔ tsuji anɔkwafoi ni hi shi yɛ blema lɛ ateŋ mɛi komɛi hu nu he akɛ amɛnyɛɛɛ dɔŋŋ yɛ naagbai ni amɛkɛkpe lɛ ahewɔ. (1 Maŋ. 19:4; Hiob 7:7) Ani ole nɔ ni ye ebua amɛ ni amɛnyɛ amɛfi shi? Amɛkɛ amɛhiɛ fɔ̃ Yehowa nɔ koni ewaje amɛ, ni ewaje amɛ lɛɛlɛŋ. Biblia lɛ kɛɔ yɛ Nyɔŋmɔ he akɛ, “Ehãa mɔ ni etɔ lɛ lɛ hewalɛ.” (Yes. 40:29) Mɔbɔ sane ji akɛ, ŋmɛnɛ lɛ, Nyɔŋmɔ tsuji komɛi susuɔ akɛ, kɛ́ amɛkpa Yehowa jamɔ fioo lɛ, no baahã amɛnyɛ amɛkpee amɛnaagbai lɛ anaa ni amɛhe ajɔ amɛ. Amɛnuɔ he akɛ Yehowa sɔɔmɔ lɛ ji jatsu moŋ fe jɔɔmɔ. No hewɔ lɛ, amɛkpa Biblia lɛ kanemɔ, amɛyaaa asafoŋ kpeei, ni amɛyaaa shiɛmɔ hu. Enɛ pɛpɛɛpɛ Satan miisumɔ ni amɛfee.

 3. (a) Mɛni kɛ́ wɔfee lɛ, Satan nine shɛŋ wɔnɔ? (b) Mɛni he wɔbaasusu yɛ nikasemɔ nɛɛ mli?

³ Abonsam sumɔɔɔ ni wɔhe waa yɛ hemɔkɛyeli lɛ mli, ni ele krɛdɛɛ akɛ, kɛ́ wɔkaneɔ Biblia lɛ daa, wɔyaa asafoŋ kpeei be fɛɛ be, ni wɔfooo shiɛmɔ mli lɛ, wɔhe waa. No hewɔ lɛ, kɛ́ ohao, loo onu he akɛ etɔ bo waa lɛ, kaatsi ohe kɛje Yehowa he. Moŋ lɛ, bɛŋkɛmɔ lɛ kpaakpa fe tsutsu lɛ po, ejaakɛ ‘ebaahã ohe awa, ni ebaawaje bo.’ (1 Pet. 5:10; Yak. 4:8) Yɛ nikasemɔ nɛɛ mli lɛ, wɔbaasusu shihilɛi enyɔ ni baanyɛ ahã ekãa ni wɔkɛsɔmɔɔ Nyɔŋmɔ lɛ naa aba shi lɛ ahe, ni wɔkwɛ bɔ ni kɛ́ wɔkɛ Biblia mli shishitoo mlai tsu nii lɛ, ebaahã wɔnyɛ wɔfi shi. Shi dani wɔbaafee nakai lɛ, nyɛhãa wɔsusua Yesaia 40:26-31 lɛ he fioo. Ŋmalɛ nɛɛ baahã wɔna akɛ Yehowa yɛ hewalɛ waa, ni ebaanyɛ ewaje wɔ.

 4. Mɛni wɔbaanyɛ wɔkase yɛ Yesaia 40:26 lɛ mli?

⁴ Kanemɔ Yesaia 40:26. Mɔ ko mɔ ko nyɛko akane ŋulamii fɛɛ ni yɔɔ ŋwɛiniiaŋ lɛ. Jeŋ shikpalɔi heɔ amɛyeɔ akɛ, ŋulamii aaafee akpekpe toi akpei 400 ni yɔɔ ŋulami kusha ni wɔshikpɔŋ lɛ yɔɔ mli, ni atsɛɔ lɛ Milky Way lɛ pɛ mli. Shi kɛ̃lɛ, Yehowa ehã ŋulamii lɛ eko fɛɛ eko gbɛ́i. Mɛni enɛ tsɔɔ wɔ yɛ Yehowa he? Kɛ́ Yehowa gbalaa ejwɛŋmɔ kɛyaa ŋulamii ni wala bɛ amɛmli lɛ eko fɛɛ eko nɔ lɛ, enyiɛ nɔŋŋ ni esusuŋ bo ni ojɛɔ otsuiŋ osɔmɔɔ lɛ, jeee yɛ nɔnyɛɛ naa, shi moŋ yɛ suɔmɔ ni oyɔɔ kɛhã lɛ lɛ hewɔ lɛ he? (Lala 19:1, 3, 14) Wɔ-Tsɛ ni wɔsumɔɔ lɛ waa lɛ le bo jogbaŋŋ kɛmɔ shi. Biblia lɛ kɛɛ ‘oyiteŋtsɔi po lɛ, ekane fɛɛ.’ (Mat. 10:30) Yehowa miisumɔ ni ole akɛ ‘ele shihilɛ ni mɛi ni sane ko bɛ amɛhe lɛ tsɔɔ mli.’ (Lala 37:18) Enaa naagbai fɛɛ ni okɛkpeɔ lɛ, ni ebaanyɛ ehã bo hewalɛ ni okɛkpee fɛɛ naa.

 5. Mɛni hewɔ wɔbaanyɛ wɔhe wɔye akɛ Yehowa baanyɛ awaje wɔ?

⁵ Kanemɔ Yesaia 40:28. Yehowa yɛ hewalɛ waa, ni ehewalɛ lɛ etãaa. Susumɔ hewalɛ ni ehãa hulu lɛ he okwɛ. Nuu ko ni ŋmaa jeŋ shikpamɔ he sane, ni atsɛɔ lɛ David Bodanis lɛ wie akɛ: “Hewalɛ ni jɛɔ hulu lɛ mli yɛ sɛkɛnsi kome mli lɛ, tamɔ hewalɛ ni jeɔ kpo kɛ́ [atɔmiki okpɛlɛmii akpekpe toi akpei abɔ] fɛlɛ.” Niiamlipɛilɔ kroko hu bu akɔntaa akɛ, hewalɛ ni ‘jɛɔ hulu lɛ mli yɛ sɛkɛnsi kome mli lɛ baanyɛ ahã aná sarawa hewalɛ ni akɛtsu nibii fɛɛ ni akɛ sarawa hewalɛ tsuɔ lɛ he nii afii 200,000’! Ani mɔ ni hãa hulu lɛ hewalɛ lɛ nyɛŋ ahã wɔ hewalɛ ni he hiaa wɔ lɛ koni wɔnyɛ wɔkpee naagbai fɛɛ ni wɔkɛkpeɔ lɛ naa?

 6. Mɛni hewɔ Yesu kɔɔŋtso lɛ teremɔ waaa lɛ? Ni te esa akɛ enɛ ahã wɔfee wɔnii wɔhã tɛŋŋ?

⁶ Kanemɔ Yesaia 40:29. Yehowa sɔɔmɔ lɛ hãa wɔnáa miishɛɛ waa. Yesu kɛɛ ekaselɔi lɛ akɛ: “Nyɛwóa mikɔɔŋtso lɛ nyɛfɔ̃a nyɛnɔ.” Ni ewie kɛfata he akɛ: “Nyɛhe baajɔ nyɛ. Ejaakɛ mikɔɔŋtso lɛ teremɔ waaa, ni mijatsu lɛ etsiii.” (Mat. 11:28-30) Nɔ ni ewie nɛɛ ji anɔkwale waa! Bei komɛi lɛ, kɛ́ be shɛ ni wɔbaaya asafoŋ kpee loo shiɛmɔ lɛ, wɔnuɔ he akɛ etɔ wɔ waa. Shi kɛ́ wɔtee wɔba lɛ, te wɔnuɔ he tɛŋŋ? Wɔmii shɛɔ wɔhe, ni wɔnuɔ he akɛ wɔbaanyɛ wɔkpee shihilɛ mli naagbai lɛ anaa jogbaŋŋ fe be ni wɔshiɔ wɔyaa lɛ. Yesu kɔɔŋtso lɛ teremɔ waaa lɛɛlɛŋ!

 7. Gbaa niiashikpamɔ ko ni tsɔɔ akɛ wiemɔi ni yɔɔ Mateo 11:28-30 lɛ ji anɔkwale.

⁷ Susumɔ nyɛmi yoo ko ni wɔbaatsɛ lɛ Kayla lɛ niiashikpamɔ lɛ he okwɛ. Eeye helai srɔtoi. Eko hãa etɔɔ lɛ waa, eko hu hãa ehaoɔ, ni ekroko hu hãa eyitso gbaa lɛ waa. Bei komɛi lɛ, ewaa waa kɛhãa lɛ akɛ ebaaya asafoŋ kpee. Be ko be ni emia ehiɛ etee asafoŋ kpee lɛ, ewie akɛ: “Wiemɔ ni ahã lɛ kɔɔ nijiaŋwujee he. Wielɔ lɛ hã wiemɔ lɛ tamɔ nɔ ni eyɛ mishihilɛ lɛ mli ni enuɔ mi shishi. Enɛ hã mihiŋmɛiiaŋ kpala nu. No hã mina akɛ esa akɛ mabɔ mɔdɛŋ maya asafoŋ kpee be fɛɛ be.” Kayla mii shɛ ehe waa akɛ emia ehiɛ etee asafoŋ kpee nakai gbi lɛ!

8, 9. Mɛni bɔfo Paulo tsɔɔ lɛ be ni ewie akɛ: “Kɛ́ migbɔjɔ lɛ, no moŋ mináa hewalɛ” lɛ?

⁸ Kanemɔ Yesaia 40:30. Esa akɛ wɔteŋ mɔ fɛɛ mɔ ahã anɔkwa sane nɛɛ ahi ejwɛŋmɔ mli. No ji, kɛ́ wɔhe esa waa po lɛ, nibii komɛi yɛ ni wɔnyɛŋ wɔfee yɛ wɔ diɛŋtsɛ wɔhewalɛ naa. Hã wɔsusu bɔfo Paulo he wɔkwɛ. No mli lɛ, enyɛɔ efeɔ nibii babaoo, shi jeee nɔ fɛɛ nɔ ni etaoɔ efee lɛ enyɛɔ efeɔ. Be ko lɛ, ekɛɛ Yehowa bɔ ni enuɔ he ehãa lɛ, shi Yehowa kɛɛ lɛ akɛ: “Mihewalɛ lɛ yeɔ emuu yɛ gbɔjɔmɔ mli.” Paulo nu nɔ ni Yehowa kɛɛ lɛ lɛ shishi. No hewɔ lɛ, ekɛɛ akɛ: “Kɛ́ migbɔjɔ lɛ, no moŋ mináa hewalɛ.” (2 Kor. 12:7-10) Mɛni etaoɔ etsɔɔ lɛ?

⁹ Paulo yɔse akɛ, kɛ́ ka ekome lɛ, enyɛŋ efee nibii babaoo, ja mɔ ko ni yɔɔ hewalɛ waa eye ebua lɛ. Kɛ́ Paulo gbɔjɔ lɛ, Nyɔŋmɔ mumɔ krɔŋkrɔŋ lɛ baanyɛ ahã lɛ hewalɛ ni he hiaa lɛ lɛ. Jeee no pɛ, shi Nyɔŋmɔ mumɔ lɛ baanyɛ ahã Paulo hewalɛ hu ni ekɛtsu nibii ni enyɛŋ etsu yɛ lɛ diɛŋtsɛ ehewalɛ naa lɛ. Nyɔŋmɔ baanyɛ afee nakai nɔŋŋ ahã wɔ hu. Kɛ́ hewalɛ ni wɔyɔɔ lɛ jɛ Yehowa ŋɔɔ lɛ, belɛ wɔyɛ hewalɛ lɛɛlɛŋ!

10. Mɛɛ gbɛ nɔ Yehowa ye ebua David ni enyɛ edamɔ naagbai ni ekɛkpe lɛ anaa?

¹⁰ Nyɔŋmɔ mumɔ krɔŋkrɔŋ lɛ waje David shii abɔ. No hewɔ lɛ, ewie yɛ lala ko ni efo lɛ mli akɛ: “Oyeɔ obuaa mi ni minyɛɔ miwuɔ mishiɔ ojotswalɔi ata; Nyɔŋmɔ hewalɛ mikɛtuɔ gbogbo.” (Lala 18:29) Wɔnaagbai lɛ ekomɛi tamɔ gbogboi ni kwɔlɔ, ni wɔ diɛŋtsɛ wɔnyɛŋ wɔtsu amɛhe nii akɛ ja Yehowa eye ebua wɔ.

11. Mɛɛ gbɛ nɔ mumɔ krɔŋkrɔŋ lɛ yeɔ ebuaa wɔ koni wɔnyɛ wɔdamɔ wɔnaagbai lɛ anaa? Okɛ enɛ he nɔkwɛmɔnɔ ahã.

¹¹ Kanemɔ Yesaia 40:31. Okropɔŋi filikiɔ kɛyaa ŋwɛi shɔŋŋ ni amɛfãa gbɛ kakadaŋŋ ni amɛtswaaa amɛfijiaŋ. Jeee amɛ diɛŋtsɛ amɛhewalɛ pɛ naa amɛnyɛɔ amɛfeɔ nakai. Kɛ́ okropɔŋ lɛ filiki kɛshɛ he ni kɔɔyɔɔ mli edɔ yɛ lɛ, kɔɔyɔɔ lɛ woɔ enɔ kɛyaa ŋwɛi, ni no hewɔ lɛ, ekɛ lɛ diɛŋtsɛ ehewalɛ pii tsuuu nii kɛfilikiii. No hewɔ lɛ, kɛ́ okɛ naagba ko ni mli wa waa kpe lɛ, kaimɔ okropɔŋ. Kpa Yehowa fai ni ekɛ “yelikɛbualɔ lɛ, mumɔ krɔŋkrɔŋ lɛ,” awó onɔ loo ekɛwaje bo. (Yoh. 14:26) Miishɛɛ sane ji akɛ, wɔbaanyɛ wɔbi Nyɔŋmɔ ni ehã wɔ emumɔ krɔŋkrɔŋ lɛ be fɛɛ be ni ehe baahia wɔ, leebi jio, shwane jio, gbɛkɛ jio. Be titri ni wɔbaanyɛ wɔnu he akɛ Nyɔŋmɔ yelikɛbuamɔ he miihia wɔ ji, be ni naagba ko eba wɔ kɛ mɔ ko teŋ yɛ asafo lɛ mli. Shi mɛni hewɔ naagbai baa wɔ kɛ wɔnyɛmimɛi Kristofoi lɛ ateŋ?

12, 13. (a) Mɛni hewɔ naagbai baa wɔ kɛ wɔnyɛmimɛi lɛ ateŋ? (b) Mɛni Yosef sane lɛ hãa wɔnaa yɛ Yehowa he?

¹² Naagbai baa wɔ kɛ wɔnyɛmimɛi Kristofoi lɛ ateŋ ejaakɛ wɔ fɛɛ wɔyeee emuu. Bei komɛi lɛ, wɔnyɛmimɛi lɛ baanyɛ awie loo amɛfee nɔ ko ni baagba wɔnaa, ni wɔ hu wɔbaanyɛ wɔwie loo wɔfee nɔ ko ni baagba amɛnaa. Enɛ baanyɛ aka wɔhemɔkɛyeli lɛ waa. Shi yɛ nakai beiaŋ nɔŋŋ lɛ, eji hegbɛ ni wɔná ni wɔkɛbaatsɔɔ akɛ wɔyeɔ Yehowa anɔkwa. Yɛ mɛɛ gbɛ nɔ? Eyɛ mli akɛ wɔnyɛmimɛi lɛ yeee emuu moŋ, shi Yehowa sumɔɔ amɛ, ni esa akɛ wɔ hu wɔsumɔ amɛ. Kɛ́ wɔkɛ wɔnyɛmimɛi lɛ fee ekome kɛtsu nii lɛ, no tsɔɔ akɛ wɔyeɔ Yehowa anɔkwa.

¹³ Yosef sane lɛ hãa wɔnaa akɛ, Yehowa ŋmɛɔ gbɛ ni akaa etsuji. Be ni Yosef ji oblanyo fioo lɛ, enyɛmimɛi hii lɛ ye ehe awuŋa ni amɛhɔ̃ɔ lɛ akɛ nyɔŋ kɛtee Ejipt. (1 Mo. 37:28) Yehowa na nɔ ni tee nɔ lɛ, ni ekã shi faŋŋ akɛ, edɔ lɛ waa akɛ afee enaanyo Yosef jalɔ lɛ niseniianii. Kɛ̃lɛ, efeee shihilɛ lɛ he nɔ ko. Sɛɛ mli lɛ, afolɔ Yosef naa akɛ eetao eto Potifar ŋa lɛ kabonaa, ni awo lɛ tsuŋ, shi no hu Yehowa efeee he nɔ ko. Ani enɛ tsɔɔ akɛ Nyɔŋmɔ kwa Yosef? Dabi kwraa. Biblia lɛ kɛɔ akɛ: ‘Yehowa hã nɔ fɛɛ nɔ ni Yosef fee lɛ ye omanye.’​—1 Mo. 39:21-23.

14. Mɛɛ yiŋtoo titri hewɔ ni esaaa akɛ ‘wɔhãa’ wɔmli fuɔ? Ni kɛ́ wɔhãaa wɔmli afu lɛ, mɛɛ gbɛ nɔ wɔgbɔmɔtso lɛ náa he sɛɛ?

¹⁴ Susumɔ David sane lɛ hu he okwɛ. Afee David nibii gbohii, ni mɛi fioo pɛ kɛ nɔ ni ekɛkpe lɛ eko ekpe pɛŋ. Kɛ̃lɛ, Nyɔŋmɔ naanyo nɛɛ ebɛɛɛ mɔ ko mɔ ko ewooo emli koni no aye lɛ awui. Shi moŋ eŋma akɛ: “Kaahã omli fu, ni kaahã omli wo la hu; Kaahã omli wo la ni oyafee efɔŋ.” (Lala 37:8) Yiŋtoo titri hewɔ ni esaaa akɛ ‘wɔhãa’ wɔmli fuɔ ji akɛ wɔmiisumɔ ni wɔkase Yehowa. Yehowa lɛ, “jeee wɔhe eshai lɛ anaa ekɛ wɔ yeɔ yɛ.” (Lala 103:10) Kɛ́ ‘wɔhãaa’ wɔmli afu lɛ, eyeɔ ebuaa wɔgbɔmɔtso lɛ hu. Mlifu baanyɛ ahã wɔ-BP aya ŋwɛi, ni ebaanyɛ ehã wɔflufla lɛ hu naagbai. Mlifu baanyɛ aye wɔmlɛbo kɛ wɔgbɔmɔtso lɛ henii ni hãaa sikli afa pii yɛ wɔlá mli lɛ awui, ni ehãaa gbɔmɔtso lɛ agbɛlɛ niyenii jogbaŋŋ. Kɛ́ wɔmli fu lɛ, wɔsusuuu nii ahe jogbaŋŋ. Ni kɛ́ wɔmli fu waa lɛ, bei komɛi lɛ, ehãa wɔhaoɔ be kplaŋŋ. Biblia lɛ kɛɔ akɛ “tsui ni mli jɔ lɛ, eji wala kɛhã gbɔmɔtso lɛ.” (Abɛi 14:30) Kɛ́ wɔnyɛmi Kristofonyo ko fee wɔ nɔ ko ni edɔ wɔ lɛ, te wɔbaafee tɛŋŋ wɔsaa wɔ kɛ lɛ teŋ? Kɛ́ wɔkɛ ŋaawoi ni yɔɔ Biblia lɛ mli lɛ tsu nii lɛ, wɔbaanyɛ wɔsaa wɔ kɛ lɛ teŋ.

15, 16. Kɛ́ mɔ ko efee wɔ dɔlɛ nii ko, ni wɔmiiya ni wɔyasaa wɔ kɛ lɛ teŋ lɛ, te esa akɛ wɔya lɛ wɔhã tɛŋŋ?

¹⁵ Kanemɔ Efesobii 4:26. Kɛ́ mɛi ni yɔɔ asafo lɛ sɛɛ lɛ ye wɔ sane fɔŋ ko lɛ, efeee wɔ naakpɛɛ. Shi kɛ́ nyɛmi ko loo wɔweku lɛ mli nyo ko fee wɔ nɔ ko loo ewie nɔ ko ni edɔ wɔ waa lɛ, egbaa wɔnaa waa. Kɛ́ wɔnyɛɛɛ wɔku wɔhiɛ wɔfɔ̃ nɔ lɛ, mɛni esa akɛ wɔfee? Ani wɔbaabɛ mɔ lɛ wɔwo wɔmli, ni ekolɛ wɔhiɛ ehe mlifu mli afii pii? Aloo wɔkɛ Biblia mli ŋaawoo akɛ wɔsaa wɔ kɛ mɔ lɛ teŋ amrɔ nɔŋŋ lɛ baatsu nii? Kɛ́ wɔtsuuu sane lɛ he nii oya lɛ, ebaawa kɛhã wɔ akɛ wɔbaasaa wɔ kɛ mɔ lɛ teŋ.

¹⁶ Kɛ́ nyɛmi ko ewie nɔ ko loo efee nɔ ko ni edɔ bo waa, ni ofee aahu, shi onyɛɛɛ ojie kɛje ojwɛŋmɔ mli lɛ, mɛni obaanyɛ ofee kɛsaa okɛ lɛ teŋ? Klɛŋklɛŋ lɛ, sɔlemɔ waa ohã Yehowa. Kpa lɛ fai ni eye ebua bo ni sane ni okɛ onyɛmi lɛ baagba lɛ aya lɛ jogbaŋŋ. Kaimɔ akɛ, onyɛmi lɛ, lɛ hu Yehowa naanyo ji lɛ. (Lala 25:14) Nyɔŋmɔ sumɔɔ esane. Yehowa mli hi yɛ enanemɛi anɔ, ni eesumɔ ni wɔ hu wɔfee nakai nɔŋŋ. (Abɛi 15:23; Mat. 7:12; Kol. 4:6) No sɛɛ lɛ, susumɔ sane ni okɛyaafɔ̃ onyɛmi lɛ hiɛ kɛ bɔ ni obaawie lɛ ohã lɛ he jogbaŋŋ. Kaamu sane naa akɛ ehiɛ kã he waa ni efee nɔ ni efee lɛ; kɔ lɛ akɛ ejeee gbɛ. Hã ehi ojwɛŋmɔ mli akɛ, ekolɛ nɔ ko ni ofee lɛ hu fata he ni nibii tee lɛ bɔ ni etee lɛ lɛ. Kɛ́ otee onyɛmi lɛ ŋɔɔ lɛ, obaanyɛ oje sane lɛ shishi akɛ, “Ekolɛ, enɛ jeee nɔ ko ni esa akɛ makɔ lɛ sane ko, shi nyɛ lɛ, nɔ ni owie lɛ hã minu he akɛ . . .” Kɛ́ sane lɛ eyabaaa lɛ bɔ ni otaoɔ lɛ, taomɔ be kroko ni oya eŋɔɔ ekoŋŋ koni oyasaa okɛ lɛ teŋ. Kɛyashi be ni obaaya onyɛmi lɛ ŋɔɔ ekoŋŋ lɛ, yaa nɔ osɔle ohã lɛ; bi Yehowa koni ejɔɔ lɛ. Bi Nyɔŋmɔ ni eye ebua bo koni okɛ ojwɛŋmɔ ama onyɛmi lɛ sui kpakpai lɛ anɔ. Bɔ fɛɛ bɔ ni sane lɛ naa baayakpa ahã lɛ, ná nɔmimaa akɛ Yehowa hiɛ sɔɔ mɔdɛŋ ni obɔɔ koni osaa okɛ onyɛmi lɛ, ni ji Nyɔŋmɔ naanyo lɛ, teŋ lɛ.

17. Kɛ́ wɔfee esha lɛ, namɛi Yehowa tsɔɔ amɛnɔ eyeɔ ebuaa wɔ? Ni mɛni hewɔ esa akɛ wɔkɛ gbɛjianɔtoo nɛɛ atsu nii?

¹⁷ Mɛi komɛi nuɔ he akɛ esha ko ni yɔɔ hiɛdɔɔ ni amɛfee lɛ hewɔ lɛ, amɛsaaa mɛi ni sɔmɔɔ Yehowa. Kɛ́ mɔ ko henilee yi lɛ nɛkɛ lɛ, enáaa toiŋjɔlɛ kɛ miishɛɛ, ni ehewalɛ fɛɛ tãa. Be ko lɛ, Maŋtsɛ David henilee bu lɛ fɔ, ni ewie bɔ ni enu he ehã lɛ he akɛ: “Be ni mibu minaa lɛ, miwui lɛ amli gbɔjɔ yɛ kɛ̃ɛmɔ ni mikɛ̃mɔɔ gbi muu fɛɛ lɛ hewɔ. Ejaakɛ jetsɛremɔ kɛ jenamɔ fɛɛ lɛ, onine tsii yɛ minɔ.” Miishɛɛ sane ji akɛ, David fee ekãa ni etsu sane lɛ he nii bɔ ni sa Yehowa tsulɔ. Ewie akɛ: “Agbɛnɛ, mijaje mihe esha lɛ mitsɔɔ bo,” ni ekɛfata he akɛ, “ni okɛ mitɔmɔ lɛ he eshai lɛ ke mi.” (Lala 32:3-5) Kɛ́ ofee esha ko ni yɔɔ hiɛdɔɔ lɛ, ná ole akɛ, Yehowa efee klalo akɛ ebaaye ebua bo ni ohe awa yɛ hemɔkɛyeli lɛ mli ekoŋŋ. Shi esa akɛ ohã eye ebua bo kɛtsɔ asafoŋ onukpai lɛ anɔ. (Abɛi 24:16; Yak. 5:13-15) Feemɔ enɛ oya nɔŋŋ! Eji wala kɛ gbele sane! Shi kɛ́ be ko ni eho lɛ, ofee esha ko ni akɛke bo, shi loloolo lɛ, ohenilee miiyi bo yɛ he lɛ, mɛni esa akɛ ofee?

18. Mɛɛ gbɛ nɔ Paulo nɔkwɛmɔnɔ lɛ baanyɛ aye abua mɛi ni nuɔ he akɛ amɛsaaa mɛi ni sɔmɔɔ Yehowa lɛ?

¹⁸ Tɔmɔi komɛi ni bɔfo Paulo tɔ̃ dani ebatsɔ Kristofonyo lɛ hao lɛ yɛ be kɛ beiaŋ. Ewie akɛ: “Miji bibioo kwraa yɛ bɔfoi lɛ ateŋ, ni misaaa mɔ ni atsɛɔ lɛ bɔfo po, ejaakɛ miwa Nyɔŋmɔ asafo lɛ yi.” Shi ekɛfata he akɛ: “Nyɔŋmɔ dromɔ naa miji mɔ ni miji nɛɛ.” (1 Kor. 15:9, 10) Paulo yeee emuu, shi Yehowa na lɛ akɛ mɔ ni sa akɛ esɔmɔɔ akɛ bɔfo, ni eshwe ni Paulo diɛŋtsɛ hu ayɔse enɛ. Kɛ́ otsake otsui yɛ esha ni ofee be ko ni eho lɛ hewɔ, ni okpa Yehowa fai yɛ he, ni ehe miihia ni ona onukpai lɛ yɛ he, ni ofee nakai lɛ, bɔ fɛɛ bɔ ni fee lɛ, Yehowa baana bo mɔbɔ. Hemɔ nɔ ni Yehowa ewie lɛ oye, ni okpɛlɛ nɔ akɛ, ekɛ ohe eke bo lɛɛlɛŋ!​—Yes. 55:6, 7.

19. Mɛni ji afi 2018 afi ŋmalɛ lɛ? Ni mɛni hewɔ eji ŋmalɛ ko ni sa jogbaŋŋ lɛ?

¹⁹ Akɛni je lɛ miibɛŋkɛ enaagbee hewɔ lɛ, wɔkɛ kai babaoo ni naa wawai baakpe. Shi wɔbaanyɛ wɔná nɔmimaa akɛ, Yehowa, mɔ ni hãa “mɔ ni etɔ lɛ lɛ hewalɛ ni ehãa mɛi ni bɛ hewalɛ lɛ náa hewalɛ waa” lɛ, baahã bo nɔ fɛɛ nɔ ni he baahia bo koni onyɛ ofi shi. (Yes. 40:29; Lala 55:22; 68:19) Be fɛɛ be ni wɔbaaya asafoŋ kpee yɛ Maŋtsɛyeli Asa lɛ nɔ yɛ afi 2018 mli lɛ, afi ŋmalɛ lɛ baakai wɔ anɔkwa sane ni he hiaa nɛɛ. Ekɛɔ akɛ: “Mɛi ni kɛ amɛhiɛ fɔ̃ɔ Yehowa nɔ lɛ baaná hewalɛ ekoŋŋ.”​—Yes. 40:31.