Yitso Enyɔ

Gbalɛ Mli Miishɛjemɔ Wiemɔi ní Kɔɔ Ohe

Yesaia 41:1-29

 1. Mɛni hewɔ esa akɛ wɔná Yesaia gbalɛ lɛ he miishɛɛ lɛ?

YESAIA ŋma wolo ní egbɛi kã nɔ lɛ aaafee afii 3,000 ní eho nɛ, shi ehe yɛ sɛɛnamɔ diɛŋtsɛ kɛha wɔ ŋmɛnɛ. Wɔbaanyɛ wɔkase shishitoo mlai ní he hiaa kɛjɛ yinɔsane mli nibii ní eŋmala lɛ amli. Ni wɔbaanyɛ wɔtswa wɔhemɔkɛyeli wɔma shi kɛtsɔ gbalɛi ní eŋmala eshwie shi yɛ Yehowa gbɛi amli lɛ kasemɔ nɔ. Hɛɛ, Yesaia ji Nyɔŋmɔ hiɛkalɔ lɛ gbalɔ. Yehowa kɛ mumɔ tsirɛ lɛ ni eŋma yinɔsane kɛtsɔ hiɛ—koni etsɔɔ bɔ ni nibii baaba lɛ aha dani amɛba mli. Yehowa kɛ nakai feemɔ tsɔɔ akɛ ebaanyɛ egba wɔsɛɛ be mli sane ní ekudɔ wɔsɛɛ be mli nifeemɔi hu. Yɛ Yesaia wolo lɛ kasemɔ sɛɛ lɛ, anɔkwa Kristofoi ená nɔmimaa akɛ Yehowa baaha nibii fɛɛ ní ewo shi yɛ he lɛ aba mli.

 2. Te shihilɛ ní yɔɔ Yerusalem lɛ tamɔ tɛŋŋ beni Yesaia ŋma egbalɛ wolo lɛ, ni mɛɛ tsakemɔ ko baaba?

² Beni Yesaia ŋma egbalɛ lɛ egbe naa lɛ, no mli lɛ Yerusalem eje hegbeyeiwoo ní Ashurbii kɛba lɛ mli. No mli lɛ sɔlemɔtsu lɛ ma shi lolo, ni gbɔmɛi miitsu amɛ daa gbi shihilɛ mli nitsumɔi tamɔ bɔ ni amɛfee aahu afii ohai abɔ lɛ pɛpɛɛpɛ. Shi kɛlɛ, nakai shihilɛ lɛ baatsake. Be ko baashɛ ní abaaloo Yudafoi amaŋtsɛmɛi lɛ anii ní amɛyɔɔ lɛ kɛya Babilon, ni Yudafoi oblahii baasɔmɔ akɛ piafoi yɛ nakai maŋtiase lɛ mli.a (Yesaia 39:6, 7) Enɛ baaba mli yɛ nɔ ni fe afii 100 sɛɛ.—2 Maŋtsɛmɛi 24:12-17; Daniel 1:19.

 3. Mɛɛ shɛɛ sane anaa yɛ Yesaia yitso 41 lɛ mli?

³ Shi, Nyɔŋmɔ shɛɛ sane ní ekɛha kɛtsɔ Yesaia nɔ lɛ jeee hiɛkpatamɔ he shɛɛ sane kɛkɛ. Ewolo lɛ yitso 40 lɛ jeɔ shishi kɛ wiemɔ ni tsɔɔ ‘Miishɛjemɔ.’b Nɔmimaa wiemɔ ní akɛha Yudafoi lɛ akɛ amɛ loo amɛbii baaku amɛsɛɛ kɛba amɛ diɛŋtsɛ amɛmaŋ shikpɔŋ nɔ lɛ baashɛje amɛmii. Yitso 41 lɛ tsáa nakai miishɛjemɔ shɛɛ sane lɛ nɔ, ni egbaa efɔ̃ɔ shi akɛ Yehowa baatée maŋtsɛ ko ní he wa shi koni eha ŋwɛi suɔmɔnaa nii aba mli. Ehiɛ nɔmimaa wiemɔi, ni ewoɔ hewalɛ ní akɛ he afɔ̃ Nyɔŋmɔ nɔ. Ejieɔ apasa nyɔŋmɔi ní jeŋmajiaŋbii lɛ kɛ amɛhiɛ fɔ̃ɔ amɛnɔ lɛ hu kpo ákɛ nyɔŋmɔi ní bɛ hewalɛ ko. Yɛ fɛɛ mli lɛ, saji babaoo yɛ mli ní woɔ mɔ hemɔkɛyeli hewalɛ, yɛ Yesaia gbii lɛ amli kɛ wɔgbii nɛɛ amli hu.

Yehowa Miitswa Jeŋmaji lɛ Mpoa

 4. Mɛɛ wiemɔi Yehowa kɛtswa jeŋmaji lɛ mpoa lɛ?

⁴ Yehowa wie kɛtsɔ egbalɔ lɛ nɔ akɛ: “Nyɛ ŋshɔkpɔi, nyɛbuaa nyɛnaa yɛ mihiɛ, ní majimaji lɛ hu aná hewalɛ hee! Ha ni amɛtsi amɛbɛŋkɛ, ní amɛbawie, wɔ fɛɛ wɔkpe ní wɔkojo!” (Yesaia 41:1) Yehowa kɛ nɛkɛ wiemɔi nɛɛ miitswa jeŋmaji ní teɔ shi woɔ ewebii lɛ mpoa. Ha amɛbadamɔ ehiɛ ní amɛmĩa ní amɛwie! Taakɛ wɔbaana yɛ sɛɛ mli lɛ, Yehowa biɔ, taakɛ kojolɔ biɔ yɛ saneyelihe lɛ ní nɛkɛ jeŋmaji nɛɛ kɛ odaseyeli ní tsɔɔ akɛ amɛ amagai lɛ ji nyɔŋmɔi diɛŋtsɛ lɛ aha. Ani nyɔŋmɔi nɛɛ baanyɛ agba yiwalaheremɔ nifeemɔi kɛha mɛi ní jáa amɛ lɛ loo kojomɔi amɛshi amɛhenyɛlɔi lɛ? Kɛ́ nakai ni lɛ, ani amɛbaanyɛ amɛha gbalɛi nɛɛ aba mli? Hetoo lɛ ji dabi. Yehowa pɛ ji mɔ ni baanyɛ afee nibii nɛɛ.

 5. Tsɔɔmɔ bɔ ni Yesaia gbalɛi lɛ yɔɔ mlibaa ní fe ekome lɛ mli.

⁵ Beni wɔsusuɔ Yesaia gbalɛ lɛ he lɛ, nyɛhaa ni ehia wɔjwɛŋmɔ mli akɛ, taakɛ eji yɛ Biblia gbalɛi babaoo agbɛfaŋ lɛ, ewiemɔi lɛ hu yɛ mlibaa ní fe shi kome. Yɛ afi 607 D.Ŋ.B. lɛ, Yuda baaya nomŋɔɔ mli yɛ Babilon. Shi kɛlɛ, Yesaia gbalɛ lɛ jieɔ lɛ kpo akɛ Yehowa baajie Israelbii ní yɔɔ nomŋɔɔ mli yɛ jɛmɛ lɛ. Enɛ ba mli yɛ afi 537 D.Ŋ.B. Nakai jiemɔ lɛ yɛ ehenɔ ní kɛ lɛ yeɔ egbɔ, ní ba yɛ afii ohai 20 lɛ shishijee gbɛ. Yɛ klɛŋklɛŋ jeŋ ta lɛ mli lɛ, Yehowa tsuji ní afɔ amɛ mu, ní yɔɔ shikpɔŋ nɔ lɛ tsɔ yiwaa be ko mli. Yɛ afi 1918 mli lɛ, nɔnyɛɛ ní jɛ Satan je lɛ mli—ní Kristendom ni ji Babilon Kpeteŋkpele lɛ fã titri fe fɛɛ lɛ wo he hewalɛ lɛ—ha shiɛmɔ nitsumɔ ní ato he gbɛjianɔ jogbaŋŋ lɛ sɛɛ fo kwraa. (Kpojiemɔ 11:5-10) Amɔmɔ Buu Mɔɔ Asafo lɛ hiɛnyiɛlɔi lɛ ekomɛi ni ayawo amɛ tsuŋ yɛ amale naafolɔmɔi ahewɔ. Ebafee tamɔ nɔ ni je lɛ eye kunim yɛ ta ní ewuɔ eshiɔ Nyɔŋmɔ tsuji lɛ mli. Kɛkɛ ni, taakɛ eba mli yɛ afi 537 D.Ŋ.B. lɛ, Yehowa tsu amɛjiemɔ he nii trukaa ní akpaaa gbɛ. Yɛ afi 1919 lɛ, aŋmɛɛ onukpai ní ayawo amɛ tsuŋ lɛ ahe, ni sɛɛ mli lɛ ajie naafolɔmɔi ní akɛshi amɛ lɛ kwraa. Kpee wulu ko ní afee yɛ Cedar Point, Ohio, yɛ September 1919 lɛ wo Yehowa webii lɛ hewalɛ waa ni amɛje nitsumɔ ni ji Maŋtsɛyeli lɛ he sanekpakpa shiɛmɔ lɛ shishi ekoŋŋ. (Kpojiemɔ 11:11, 12) Kɛjɛ nakai beaŋ kɛbashi amrɔ nɛɛ, shiɛmɔ nitsumɔ lɛ mlilɛɛmɔ etee hiɛ yɛ gbɛ ní sa kadimɔ waa nɔ. Kɛfata he lɛ, Yesaia wiemɔi lɛ amli babaoo baaná amɛmlibaa ní yɔɔ naakpɛɛ yɛ Paradeiso shikpɔŋ ní baaba lɛ nɔ. Enɛ hewɔ lɛ, Yesaia wiemɔi ní ewie jeeŋmɔ beebe lɛ kɔɔ jeŋmaji kɛ gbɔmɛi fɛɛ ahe ŋmɛnɛ.

Atée Kpɔlɔ ko Shi

 6. Te gbalɔ lɛ wie wɔsɛɛ be mli kunimyelɔ ko he eha tɛŋŋ?

⁶ Yehowa tsɔ Yesaia nɔ egba kunimyelɔ ko ní baahere Nyɔŋmɔ webii ayiwala kɛjɛ Babilon, ní ekɛ kojomɔ hu aba amɛhenyɛlɔi lɛ anɔ lɛ efɔ̃ shi. Yehowa bi akɛ: “Namɔ tée mɔ ko shi kɛjɛ bokagbɛ, mɔ ni jalɛ kɛ lɛ kpeɔ yɛ he fɛɛ he ní eyaa lɛ? Eŋɔɔ jeŋmaji ehaa yɛ ehiɛ, ni ehaa eyeɔ maŋtsɛmɛi anɔ; eŋɔɔ amɛ ehaa eklante lɛ tamɔ mulu, ni ekɛ amɛ haa egãi lɛ tamɔ tutuu ní kɔɔyɔɔ looɔ. Enyiɛɔ amɛsɛɛ, efoɔ mli shweshweeshwe kɛtsɔɔ gbɛ ní enane yiko nɔ dã nɔ. Namɔ tsu enɛ? namɔ fee? Mɔ ni tsɛ́ yinɔbii fɛɛ kɛjɛ shishijee lɛ ni: mi, Yehowa, mi ji klɛŋklɛŋ mɔ lɛ, ni sɛɛkpeebii ateŋ hu, mi nɔŋŋ ni!”—Yesaia 41:2-4.

 7. Namɔ ji kunimyelɔ ní baa lɛ, ni mɛni ebaatsu?

⁷ Namɔ ji mɔ ni abaatée lɛ shi kɛjɛ hulushiteehe, yɛ bokagbɛ nɛɛ? He ni Medo-Persia kɛ Elam maji lɛ jwere lɛ yɛ Babilon bokagbɛ. Jɛmɛ ji he ni Koresh ni ji Persianyo lɛ, kɛ esraafoi ní he wa waa lɛ baashi akó kɛjɛ. (Yesaia 41:25; 44:28; 45:1-4, 13; 46:11) Eyɛ mli akɛ Koresh jeee Yehowa jálɔ moŋ, shi efeɔ enii yɛ Yehowa, ni ji Nyɔŋmɔ ní ja lɛ suɔmɔnaa nii kɛ gbeekpãmɔ naa. Koresh yeɔ maŋtsɛmɛi anɔ, ni agbɛɔ amɛ ashwãa tamɔ mulu yɛ ehiɛ. Yɛ kunimyeli sɛɛtiumɔ mli lɛ, ehoɔ “shweshweeshwe,” loo yɛ toiŋjɔlɛ mli yɛ gbɛ̀i ní efɔɔɔ nɔ nyiɛmɔ lɛ anɔ, ni eyeɔ gbɛtsii nii fɛɛ anɔ kunim. Aaafee afi 539 D.Ŋ.B. lɛ, Koresh yashɛ Babilon maŋtiase ní he wa lɛ mli ni ebutu lɛ. Enɛ hewɔ lɛ, eŋmɛɛ Nyɔŋmɔ webii lɛ ahe koni amɛku amɛsɛɛ amɛya Yerusalem ní amɛyasaa amɛto jamɔ krɔŋŋ shishi ekoŋŋ.—Ezra 1:1-7.c

 8. Mɛni Yehowa pɛ baanyɛ afee lɛ?

⁸ Enɛ hewɔ lɛ, Yehowa tsɔ Yesaia nɔ egba Koresh shitee efɔ̃ shi kɛtsɔ hiɛ kwraa dani afɔ́ nakai maŋtsɛ lɛ. Anɔkwa Nyɔŋmɔ lɛ pɛ baanyɛ agba nɔ ko ní tamɔ nɛkɛ ní eba mli pɛpɛɛpɛ hu. Mɔ ko bɛ ní kɛ Yehowa yeɔ egbɔ yɛ jeŋmaji lɛ apasa nyɔŋmɔi lɛ ateŋ. Yehowa yɛ yiŋtoo kpakpa ní ekɛaajaje akɛ: “Mikɛ minunyam lɛ haŋ mɔ kroko.” Yehowa pɛ baanyɛ akɛɛ yɛ gbɛ ní ja nɔ akɛ: “Mi ji klɛŋklɛŋ mɔ kɛ sɛɛkpee mɔ, ni Nyɔŋmɔ ko bɛ, ja mi!”—Yesaia 42:8; 44:6, 7.

Gbɔmɛi ní Ŋmiŋmi Emɔmɔ Amɛ lɛ kɛ Amɛhiɛ Fɔ̃ Amagai Anɔ

9-11. Te jeŋmaji lɛ fee amɛnii yɛ Koresh tafãa lɛ he amɛha tɛŋŋ?

⁹ Agbɛnɛ Yesaia tsɔɔ bɔ ni jeŋmaji lɛ baafee amɛnii amɛha yɛ wɔsɛɛ be mli kunimyelɔ nɛɛ he, ni ekɛɛ: “Ŋshɔkpɔi lɛ na ni amɛshe gbeyei, shikpɔŋ lɛ naagbeehei lɛ ahe kpokpo; amɛtsi amɛbɛŋkɛ ni amɛba. Mɔ fɛɛ mɔ ye bua enaanyo, ni ekɛɛ enyɛmi akɛ: Ná tsui! Ŋaalɔ lɛ woɔ shika serelɔ lɛ hewalɛ, mɔ ni kɛ hamle jajeɔ nii ahiɛ lɛ hu feɔ mɔ ni tswiaa nii yɛ sɔ̃ɔ tɛ nɔ lɛ nakai nɔŋŋ, ni ekɛɔ yɛ sɔomɔ lɛ hewɔ akɛ: Ehi! ni ekɛ plɛkoobii kalaa ní ekakpɔ.”—Yesaia 41:5-7.

¹⁰ Beni Yehowa kwɛɔ wɔsɛɛ be aaafee afii 200 kɛtsɔɔ hiɛ lɛ, ekwɛ nibii ni baaya nɔ yɛ je lɛŋ. Asraafoi ní he wa waa ní yɔɔ Koresh shishi lɛ ahe yɛ oya, ni amɛyeɔ mɛi fɛɛ ní teɔ shi woɔ amɛ lɛ anɔ. Gbɔmɛi—mɛi ní yɔɔ ŋshɔkpɔi lɛ anɔ, yɛ hei ní yɔɔ shɔŋŋ lɛ tete po—ahe kpokpoɔ kɛji amɛna akɛ eebɛŋkɛ amɛ lɛ. Amɛkɛ gbeyeishemɔ feɔ ekome kɛteɔ shi amɛwoɔ mɔ ni Yehowa etsɛ́ lɛ kɛjɛ bokagbɛ koni ebatsu kojomɔ he nii lɛ. Amɛbɔɔ mɔdɛŋ akɛ amɛaawowoo amɛhe hewalɛ, ni amɛkɛɔ akɛ: “Ná tsui!”

¹¹ Ŋaalɔi feɔ ekome kɛtsuɔ nii ni amɛsɔ̃ɔ amaga nyɔŋmɔi koni amɛhere gbɔmɛi lɛ ayiwala. Kapintɛfonyo gbɔɔ tso, ni no sɛɛ lɛ ewoɔ shika serelɔ lɛ hewalɛ koni esere dade, ekolɛ shika diɛŋtsɛ ní ekɛkpɛtɛ he. Nishɔ̃lɔ kɛ hamle tswiaa dade lɛ ni ehaa ehiɛ feɔ trotro ni ekwɛɔ ákɛ sɔomɔ lɛ hi jogbaŋŋ. Ekolɛ hefɛoyeli fioo ko hewɔ ni atsĩ tã akɛ akɛ plɛkoobii kalaa lɛ koni ekakpɔ loo ewɔtsɔ, tamɔ bɔ ni Dagon amaga lɛ kpá egbee shi yɛ Yehowa adeka lɛ hiɛ lɛ.—1 Samuel 5:4.

Kaashe Gbeyei!

12. Mɛɛ hewalɛwoo wiemɔi Yehowa kɛha Israel?

¹² Agbɛnɛ Yehowa gbala ejwɛŋmɔ kɛba ewebii lɛ anɔ. Ákɛ mɛi ní tamɔɔɔ jeŋmaji ní kɛ amɛhiɛ fɔ̃ɔ amagai ní wala bɛ amɛmli lɛ anɔ lɛ, esaaa ní mɛi ní kɛ amɛhiɛ fɔ̃ɔ anɔkwa Nyɔŋmɔ lɛ nɔ lɛ sheɔ gbeyei. Yehowa hewalɛwoo wiemɔi lɛ je shishi kɛ kaimɔ ní ekai amɛ akɛ Israel ji eshieŋtsɛ Abraham shwiei lɛ. Yesaia bɔ Yehowa wiemɔi lɛ ahe amaniɛ, yɛ wiemɔ kuku ní tsɔɔ musuŋtsɔlɛ kpele nɛɛ mli akɛ: “Shi bo, mitsulɔ Israel, bo Yakob ní mihalao, mishieŋtsɛ Abraham seshi; bo ní mimɔ omli kɛjɛ shikpɔŋ lɛ naagbeehei lɛ kɛba, ni mitsɛo kɛjɛ ekoji lɛ anɔ, ni mikɛɛo akɛ: Mitsulɔ jio, mihalao ni mishɛŋo mifɔŋ lɛ! Kaashe gbeyei, shi mi, mikɛo yɔɔ! Kaakwɛkwɛɛ ohe, shi mi ji o-Nyɔŋmɔ lɛ! Mawajeo, ni maye mabuao; ni mahiɛ omli kɛ mijalɛ ninejurɔ lɛ.”—Yesaia 41:8-10.

13. Mɛni hewɔ Yehowa wiemɔi lɛ baashɛje Yudafoi nomii lɛ amii lɛ?

¹³ Kwɛ bɔ ni wiemɔi nɛɛ baafee miishɛjemɔ wiemɔi kɛha Yudafoi anɔkwafoi ní atsĩ amɛnaa ákɛ nomii yɛ maŋsɛɛ shikpɔŋ nɔ lɛ! Kwɛ hewalɛwoo ní eeeji akɛ amɛaanu ní Yehowa miitsɛ amɛ akɛ “mitsulɔ” yɛ be mli ní amɛji nomii, ni ji Babilon maŋtsɛ lɛ tsuji lɛ! (2 Kronika 36:20) Eyɛ mli akɛ Yehowa baagbala amɛtoi yɛ anɔkwa ní amɛyeee lɛ hewɔ moŋ, shi ekpooŋ amɛ. Israel maŋ lɛ, Yehowa nɔ̃ ni, jeee Babilon nɔ̃ ni. Yiŋtoo ko bɛ ní Nyɔŋmɔ tsuji lɛ baadamɔ nɔ amɛshe gbeyei yɛ kunimyelɔ Koresh bɛŋkɛmɔ lɛ hewɔ. Yehowa baafata ewebii lɛ ahe ni ebaaye ebua amɛ.

14. Yehowa wiemɔi ní ekɛ Israel wie lɛ shɛjeɔ Nyɔŋmɔ webii amii ŋmɛnɛ yɛ mɛɛ gbɛ nɔ?

¹⁴ Nakai wiemɔi lɛ ewo Nyɔŋmɔ tsuji hewalɛ ni ewaje amɛ aahu kɛbashi wɔgbii nɛɛ amli tɔ̃ɔ. Afi 1918 mli tɔ̃ɔ ni amɛshwe akɛ amɛaale nɔ ni ji Yehowa suɔmɔnaa nii kɛha amɛ. Amɛshwe ní amɛná kpɔmɔ kɛjɛ amɛmumɔŋ nomŋɔɔ shihilɛ lɛ mli. Ŋmɛnɛ, wɔ hu wɔshweɔ ní wɔná heyeli kɛjɛ nɔnyɛɛi ní Satan, kɛ je lɛ, kɛ emuu ní wɔ diɛŋtsɛ wɔyeee lɛ kɛbaa wɔnɔ lɛ mli. Shi wɔnuɔ shishi akɛ Yehowa le be pɔtɛɛ kɛ gbɛ ní eeetsɔ nɔ efee nii yɛ ewebii agbɛfaŋ. Taakɛ gbekɛbii bibii ji lɛ, wɔhiɛɔ enine ní he wa waa lɛ mli, kɛ hekɛnɔfɔɔ akɛ ebaaye ebua wɔ ní wɔnyɛ wɔkpee naa. (Lala 63:8, 9) Yehowa buɔ mɛi ní sɔmɔɔ lɛ lɛ akɛ amɛjara wa waa. Efĩɔ wɔsɛɛ ŋmɛnɛ tamɔ bɔ ni efĩ ewebii asɛɛ kɛtsɔ afi 1918 kɛ afi 1919 jaramɔ bei lɛ amli lɛ kɛ bɔ ni efĩ Israelbii anɔkwafoi lɛ asɛɛ be ko ní eho jeeŋmɔ lɛ.

15, 16. (a) Mɛni baaba Israel henyɛlɔi lɛ anɔ, ni Israel je gɔ̃gɔ̃mi yɛ mɛɛ gbɛ̀i anɔ? (b) Mɛɛ tutuamɔ ko ní etsɛŋ ní ebaaba hewɔ ni Yehowa wiemɔi lɛ woɔ mɔ hewalɛ waa ŋmɛnɛ lɛ?

¹⁵ Susumɔ nɔ ni Yehowa tee nɔ ewie kɛtsɔ Yesaia nɔ lɛ he okwɛ: “Naa, mɛi fɛɛ ní amɛmli ewoo la lɛ ahiɛ aaagboi ni amɛhiɛ aaashwie shi; mɛi ní kɛo béɔ lɛ aaafee shwɛm, ni amɛhiɛ aaakpata. Mɛi ní kɛo ená lɛ, oootao amɛ, shi onaŋ amɛ, mɛi ní kɛo wuɔ lɛ aaafee shwɛm, ni amɛaatã. Ejaakɛ mi, Yehowa, o-Nyɔŋmɔ lɛ, mihiɛ oninejurɔ mli, ni miikɛɛo akɛ: Kaashe gbeyei! maye mabuao! Kaashe gbeyei, bo gɔ̃gɔ̃mi Yakob, nyɛ Israelbii ní nyɛyi faaa! maye mabuao, Yehowa kɛɛ, ni okpɔ̃lɔ ji Israel Mɔ krɔŋkrɔŋ lɛ.”—Yesaia 41:11-14.

¹⁶ Israel henyɛlɔi lɛ yeŋ kunim. Mɛi ní mli ewo la amɛwo Israel lɛ ahiɛ baagboi. Mɛi ní wuuɔ amɛshiɔ lɛ lɛ ahiɛ baakpata. Eyɛ mli akɛ Israelbii nomii lɛ tamɔ gɔ̃gɔ̃mi ní he waaa, ní bɛ hefamɔ nɔ̃ ko ní nuguɔ yɛ mulu mli moŋ, shi Yehowa baaye ebua amɛ. Kwɛ hewalɛwoo ní enɛ ji yɛ “naagbee gbii” nɛɛ amli fɛɛ, beni anɔkwa Kristofoi kpeeɔ nyɛ̃ɛ ní je lɛŋ bii pii etswa amɛfai shi akɛ amɛkɛbaaba amɛnɔ lɛ naa lɛ! (2 Timoteo 3:1) Ni kwɛ bɔ ni Yehowa shiwoo lɛ woɔ mɔ hewalɛ ehaa, yɛ tutuamɔ ní etsɛŋ ní Satan, mɔ ní atsɛɔ lɛ yɛ gbalɛ mli ákɛ “Gog ní yɔɔ Magog shikpɔŋ lɛ nɔ” lɛ kɛbaaba lɛ hewɔ! Yɛ Gog tutuamɔ ní naa wa lɛ shishi lɛ, Yehowa webii lɛ baafee tamɔ mɛi ní bɛ hefamɔ nɔ̃ ko, tamɔ gɔ̃gɔ̃mi—tamɔ gbɔmɛi ní “amɛbɛ gbogbo” ni amɛbɛ “agbó sɛɛ adabãŋi loo agbói hu lɛ!” Ni kɛlɛ, esaaa akɛ mɛi ní kɛ amɛhiɛ fɔ̃ɔ Yehowa nɔ lɛ ahe kpokpoɔ kɛ gbeyeishemɔ. Ofe lɛ diɛŋtsɛ baawuu ní ekɛhere amɛyiwala.—Ezekiel 38:2, 11, 14-16, 21-23; 2 Korintobii 1:3.

Miishɛjemɔ Kɛha Israel

17, 18. Te Yesaia wie hewalɛ ní abaaha Israel lɛ he eha tɛŋŋ, ni mɛɛ emlibaa wɔyɔɔ nɔmimaa yɛ he?

¹⁷ Yehowa tee nɔ eshɛje ewebii lɛ amii akɛ: “Naa, miiŋɔo miifee ŋmãagbeemɔ tsɔne hee ko ní naa ba kɛ enaa nyanyɔji, ni ooogbee gɔji lɛ ni oooshi amɛ bɔdɔbɔdɔ, ni ooofee ŋmeŋmei lɛ hu tamɔ tutuu. Ooosha amɛmli, ni kɔɔyɔɔ aaaloo amɛ kɛaatee, ni lasuogbele aaagbɛ amɛ ashwã; shi bo lɛ, omli aaafilio yɛ Yehowa mli, ni oooshwã ofɔ̃ Israel Mɔ krɔŋkrɔŋ lɛ nɔ.”—Yesaia 41:15, 16.

¹⁸ Abaaha Israel hewalɛ koni ekɛfee nii ní ekɛba ehenyɛlɔi ní tamɔ gɔji lɛ ashi kwraa, yɛ mumɔŋ shishinumɔ naa. Kɛ́ Israel ku esɛɛ kɛjɛ nomŋɔɔ mli lɛ, ebaaye henyɛlɔi ní baabɔ mɔdɛŋ akɛ amɛaatsĩ sɔlemɔtsu lɛ maa kɛ Yerusalem gbogboi lɛ tswaa naa lɛ anɔ kunim. (Ezra 6:12; Nehemia 6:16) Shi kɛlɛ, Yehowa wiemɔi lɛ baaba mli yɛ gbɛ ní mli lɛɛ nɔ yɛ “Nyɔŋmɔ Israel lɛ” nɔ. (Galatabii 6:16) Yesu ewo Kristofoi ní afɔ amɛ mu lɛ ashi akɛ: “Kunimyelɔ lɛ kɛ mɔ ni toɔ minitsumɔi lɛ kɛyashiɔ naagbee lɛ, maha lɛ hegbɛ yɛ jeŋmaji lɛ anɔ, ni ekɛ dadetso aaakpala amɛ ni eeejwara amɛ tamɔ ajwaraa sũ gbɛ́i lɛ, taakɛ bɔ ni mi hu miná kɛjɛ mitsɛ ŋɔɔ lɛ.” (Kpojiemɔ 2:26, 27) Be mli ni Kristo nyɛmimɛi ní atée amɛ shi kɛtee ŋwɛi anunyam mli lɛ baaná Yehowa Nyɔŋmɔ henyɛlɔi lɛ ahiɛkpatamɔ mli gbɛfaŋnɔ lɛ baashɛ kɛ̃.—2 Tesalonikabii 1:7, 8; Kpojiemɔ 20:4, 6.

19, 20. Mɛni Yesaia ŋma yɛ Israel ní akɛ amɛ aaaku sɛɛ kɛba he ko ní yɔɔ fɛo lɛ he, ni enɛ ba mli yɛ mɛɛ gbɛ nɔ?

¹⁹ Agbɛnɛ, Yehowa kɛ mfonirifeemɔŋ wiemɔ ma shiwoo ní ekɛha akɛ ebaaha ewebii lɛ heyeli lɛ nɔ mi ekoŋŋ. Yesaia ŋma akɛ: “Mɛi ní nii yɔɔ mɔbɔ kɛ ohiafoi lɛ, amɛmiitao nu, shi eko bɛ, amɛlilɛii anɔ egbi kɛ kumai; shi mi, Yehowa, mahere amɛ nɔ kɛ̃, mi, Israel Nyɔŋmɔ lɛ, mikwaŋ amɛ. Magbele faai anaa yɛ gɔji kpataai anɔ, ni maje nubui hu yɛ jɔɔi ateŋ; maha ŋã nɔ atsɔ nu kpaakpo, ní shikpɔŋ gbiŋ hu atsɔ nui ní baa. Maha tseneduru tsei akwɛ̃ yɛ ŋã nɔ, kɛ yɔɔi tsei, mirto tsei kɛ mũ tsei; matɛo sɛsɛo kɛ papao, kɛ tsei ní nyɛɔ jalɛ yɛ ŋã kpataa nɔ, koni amɛ fɛɛ tswɛ̃m amɛna ní amɛle ni amɛkɛto amɛtsuiŋ ní amɛjwɛŋ he, akɛ Yehowa nine fee enɛ, ni Israel Mɔ krɔŋkrɔŋ lɛ bɔ.”—Yesaia 41:17-20.

²⁰ Eyɛ mli akɛ Israelbii ní aŋɔ amɛ nom lɛ yɛ jeŋ hewalɛ ní yɔɔ nii waa lɛ maŋtiase mli moŋ, shi jɛmɛ tamɔ shia ŋã ní nu bɛ nɔ kɛha amɛ. Amɛnuɔ he tamɔ David beni eteeɔ ehe kɛjɛɔ Maŋtsɛ Saul dɛŋ lɛ. Yɛ afi 537 D.Ŋ.B. lɛ, Yehowa gbele gbɛ eha amɛ koni amɛku amɛsɛɛ kɛba Yuda ní amɛbasaa amɛma esɔlemɔtsu lɛ yɛ Yerusalem, ní amɛto anɔkwa jamɔ amɛma shi ekoŋŋ. Yehowa hu jɔɔ amɛ yɛ enɛ hewɔ. Yesaia gba efɔ̃ shi yɛ sɛɛ mli gbalɛ ko mli akɛ: “Yehowa eshɛje Zion mii, eshɛje emaŋfɔi lɛ fɛɛ amii, ni eha eŋã lɛ nɔ etsɔ tamɔ Eden, ni eŋã olɛŋlɛ lɛ nɔ etsɔ tamɔ Yehowa trom.” (Yesaia 51:3) Enɛ ba mli diɛŋtsɛ beni Yudafoi lɛ ku amɛsɛɛ kɛba amɛmaŋ shikpɔŋ nɔ lɛ sɛɛ.

21. Mɛɛ nibii ni atswaa amaa shi ekoŋŋ ba yɛ ŋmɛnɛŋmɛnɛ beaŋ, ni mɛni baaba wɔsɛɛ?

²¹ Nɔ ko ni tamɔ enɛ ba mli yɛ ŋmɛnɛŋmɛnɛ beaŋ beni Koresh Kpeteŋkpele, Kristo Yesu, kpɔ̃ esɛɛnyiɛlɔi ní afɔ amɛ mu lɛ kɛjɛ mumɔŋ nomŋɔɔ mli koni amɛnyɛ amɛtsu nii ní amɛto jamɔ krɔŋŋ amɛma shi ekoŋŋ lɛ. Akɛ mumɔŋ paradeiso, ni ji mfonirifeemɔŋ Eden trom jɔɔ nakai gbɔmɛi anɔkwafoi lɛ. (Yesaia 11:6-9; 35:1-7) Etsɛŋ, kɛ́ Nyɔŋmɔ kpata ehenyɛlɔi lɛ ahiɛ lɛ, abaatsake shikpɔŋ muu lɛ fɛɛ ni abaafee lɛ paradeiso diɛŋtsɛ, tamɔ bɔ ni Yesu wo efɔŋfeelɔ lɛ shi yɛ piŋmɔ tso lɛ nɔ lɛ.—Luka 23:43.

Mpoa ní Atswaa Israel Henyɛlɔi Lɛ

22. Mɛɛ wiemɔi Yehowa kɛtswaa jeŋmaji lɛ mpoa ekoŋŋ?

²² Agbɛnɛ Yehowa ku esɛɛ kɛba sane ní ekɛ jeŋmaji lɛ kɛ amɛ amaga nyɔŋmɔi lɛ ená lɛ nɔ ekoŋŋ ni ekɛɛ: “Nyɛkɛ nyɛsane lɛ abaa! Yehowa kɛɛ; nyɛkɛ nyɛsane naatsɔɔmɔi lɛ abɛŋkɛa! Yakob maŋtsɛ lɛ kɛɛ. Ha amɛkɛba ní amɛbajaje nɔ ni baaba amɛtsɔɔ wɔ! Nii ní yɔɔ tsutsu lɛ, nyɛtsɔa nii ni ji, ní wɔkɛto wɔtsuiiaŋ ní wɔle amɛnaagbee; aloo nyɛtsɔa wɔ nii ní baaba. Nyɛjajea nii ní baaba wɔsɛɛ nyɛtsɔa, koni wɔná wɔle akɛ nyɔŋmɔi ji nyɛ; hɛɛ, nyɛfea ekpakpa loo efɔŋ ko, ní wɔkwɛkwɛɛ wɔhe, ní wɔ fɛɛ wɔna! Naa, nyɛjeee nɔ ko nɔ ko, ni nyɛnitsumɔ lɛ hu jeee fɛifɛi, mɔ ni halaa nyɛ lɛ, aahi lɛ.” (Yesaia 41:21-24) Ani jeŋmaji lɛ anyɔŋmɔi lɛ nyɛɔ amɛgbaa nɔ ni baaba wɔsɛɛ ni ebaa mli pɛpɛɛpɛ, ni amɛkɛtsɔɔ akɛ amɛyɛ nilee ní fe adebɔɔ mli nɔ̃? Kɛ́ amɛnyɛɔ lɛ, no lɛ eka shi faŋŋ akɛ esa akɛ nɔ ko anyɛ ajɛ mli aba, nɔ̃ kpakpa loo nɔ̃ fɔŋ, ní amɛkɛfĩ amɛwiemɔ lɛ sɛɛ. Shi, yɛ anɔkwale mli lɛ, amaga nyɔŋmɔi lɛ nyɛɛɛ nɔ ko nɔ ko amɛfee ni amɛtamɔ nibii ní bɛ shihilɛ mli nɔŋŋ pɛpɛɛpɛ.

23. Mɛni hewɔ Yehowa kã he etsɔ egbalɔi lɛ anɔ ebu wɔŋjamɔ fɔ́ shii abɔ lɛ?

²³ Yɛ wɔgbii nɛɛ amli lɛ, ekolɛ mɛi komɛi baasusu nɔ hewɔ ní Yehowa tsɔ Yesaia kɛ enanemɛi gbalɔi lɛ anɔ efite be babaoo ni ekɛbu kwashiafeemɔ ní yɔɔ wɔŋjamɔ mli lɛ fɔ́ lɛ he. Ekolɛ bɔ ni sɛɛnamɔ ko kwraa bɛ amagai ní adesai fee lɛ ahe lɛ yɛ faŋŋ kɛha mɛi pii ŋmɛnɛ. Shi kɛlɛ, kɛ́ ato apasa hemɔkɛyeli gbɛjianɔtoo ko shishi ní akpɛlɛ nɔ yɛ hei babaoo pɛ lɛ, ewa akɛ aaajie kwraa kɛjɛ mɛi ní heɔ yeɔ lɛ ajwɛŋmɔi amli. Ŋmɛnɛŋmɛnɛ beaŋ hemɔkɛyelii babaoo yɛ ní nilee bɛ mli kwraa tamɔ bɔ ni hemɔkɛyeli ní mɛi yɔɔ akɛ amagai ní wala bɛ amɛmli lɛ ji nyɔŋmɔi diɛŋtsɛ lɛ pɛpɛɛpɛ. Ni kɛlɛ, gbɔmɛi kɛ amɛhe kpɛtɛɔ hemɔkɛyelii nɛɛ ahe, yɛ naataamɔi ní kɔneɔ mɔ yiŋ ní akɛteɔ shi awoɔ amɛ lɛ fɛɛ sɛɛ. Mɛi komɛi lɛ, ja amɛnu anɔkwale lɛ shii abɔ dani etsirɛɔ amɛ ni amɛnaa nilee ní yɔɔ amɛhiɛ ní amɛkɛaafɔ̃ Yehowa nɔ lɛ mli.

24, 25. Te Yehowa wie Koresh he ekoŋŋ eha tɛŋŋ, ni mɛɛ gbalɛ kroko enɛ haa wɔkaiɔ?

²⁴ Yehowa wie yɛ Koresh he ekoŋŋ akɛ: “Mitée mɔ ko shi kɛjɛ kooyigbɛ ni eeba, ni eeetsɛ migbɛi kɛaajɛ hulu shiteehe, ni eeenaa nɔyelɔi tamɔ anaa sũ, loo tamɔ nishɔ̃lɔ kpɔtɔɔ sũ!” (Yesaia 41:25)d Ákɛ mɔ ni tamɔɔɔ jeŋmaji lɛ anyɔŋmɔi lɛ, Yehowa baanyɛ afee nibii srɔtoi. Kɛ́ eha Koresh jɛ bokagbɛ, ni ji “hulushiteehe” lɛ kɛba lɛ, Nyɔŋmɔ baajie nyɛmɔ ní eyɔɔ ní ekɛgbaa nɔ ni baaba wɔsɛɛ, ní no sɛɛ lɛ ekudɔɔ wɔsɛɛ be mli saji ni ekɛhaa egbalɛi baa mli lɛ kpo faŋŋ.

²⁵ Wiemɔi nɛɛ haa wɔkaiɔ bɔfo Yohane gbalɛ wiemɔi ní tsɔɔ bɔ ni maŋtsɛmɛi ní abaakanya amɛ ní amɛfee nii yɛ wɔbe nɛɛ mli lɛ ji lɛ. Wɔkaneɔ yɛ Kpojiemɔ 16:12 lɛ akɛ abaasaa gbɛ aha “maŋtsɛmɛi ní jɛ hulushiteehe lɛ.” Nɛkɛ maŋtsɛmɛi nɛɛ jeee mɔ ko mɔ ko fe Yehowa Nyɔŋmɔ kɛ Yesu Kristo. Taakɛ bɔ ni Koresh kpɔ̃ Nyɔŋmɔ webii yɛ be ko ní eho jeeŋmɔ lɛ mli lɛ, nakai nɔŋŋ maŋtsɛmɛi ní he wa waa nɛɛ baakpata Yehowa henyɛlɔi lɛ ahiɛ kwraa, ni amɛbaabu ewebii lɛ ahe kɛtsɔ amanehulu kpeteŋkpele lɛ mli kɛya jalɛ jeŋ hee ko mli.—Lala 2:8, 9; 2 Petro 3:13; Kpojiemɔ 7:14-17.

Yehowa Nɔ Kwɔ Fe Fɛɛ!

26. Mɛɛ sane Yehowa bi agbɛnɛ, ni ani aha hetoo?

²⁶ Yehowa jaje anɔkwale ní eji akɛ lɛ ekome pɛ ji anɔkwa Nyɔŋmɔ lɛ shikome ekoŋŋ. Ebi akɛ: “Namɔ jaje kɛjɛ shishijee, koni wɔle? loo namɔ jaje dani eba mli ní wɔkɛɛ akɛ: Enɔ̃ ja!? Mɔ ko mɔ ko bɛ ní jajeɔ, mɔ ko mɔ ko bɛ ní haa anuɔ, ni mɔ ko mɔ ko bɛ ní nuɔ nyɛwiemɔi lɛ!” (Yesaia 41:26) Amaga nyɔŋmɔ ko kwraa etswako adafi akɛ kunimyelɔ ko baaba ebajie mɛi ní kɛ amɛhiɛ fɔ̃ɔ enɔ lɛ dã. Wala bɛ nyɔŋmɔi nɛɛ eko kwraa mli, amɛwieee. Jeee nyɔŋmɔi kwraa ji amɛ.

27, 28. Mɛɛ anɔkwale ko ní he hiaa ama nɔ mi yɛ Yesaia 41 lɛ naagbee kukuji lɛ amli, ni namɛi pɛ jajeɔ enɛ amɛtsɔɔ?

²⁷ Yɛ Yehowa gbalɛ wiemɔi ní kanyaa mɔ nɛɛ he amaniɛbɔɔ sɛɛ lɛ, Yesaia ma oti ko ní he hiaa waa nɔ mi, akɛ: “Mi tsutsu mikɛɛ Zion akɛ: Naa, amɛ nɛ! ni Yerusalem hu, miha lɛ sanekpakpa jajelɔ ko! Shi kɛ́ mikwɛ lɛ, mɔ ko mɔ ko bɛ, ni ŋaawolɔ ko bɛ amɛteŋ, ní kɛ́ mibi amɛ ní amɛaaha mi hetoo. Naa, amɛ fɛɛ lɛ yakayakanii ji amɛ, ni amɛnitsumɔi lɛ hu jeee fɛifɛi, amɛmagai lɛ hu kɔɔyɔɔ kɛ nibii foji ni!”—Yesaia 41:27-29.

²⁸ Yehowa ji klɛŋklɛŋ mɔ. Lɛ ji mɔ ní nɔ kwɔ fe fɛɛ! Lɛ ji anɔkwa Nyɔŋmɔ lɛ, mɔ ni tswaa ewebii ajiemɔ he adafi, ní ejajeɔ sanekpakpa etsɔɔ amɛ lɛ. Ni e-Dasefoi lɛ pɛ jajeɔ egbojee lɛ amɛtsɔɔ jeŋmaji lɛ. Yehowa kɛ hefɛoyeli gbeɔ mɛi ní kɛ amɛhiɛ fɔ̃ɔ amaga jamɔ nɔ lɛ ahe guɔ, ni bulɛ ní ebɛ kɛha amɛmagai lɛ haa etsɛɔ amɛ “kɔɔyɔɔ kɛ nibii foji.” Kwɛ yiŋtoo ní mli wa ní wɔɔdamɔ nɔ wɔkpɛtɛ anɔkwa Nyɔŋmɔ lɛ he! Yehowa pɛ ji mɔ ni sa wɔ hekɛnɔfɔɔ kɛ hiɛnɔkamɔ.

[Shishigbɛ niŋmai]

[Mfoniri ni yɔɔ baafa 19]

Eyɛ mli akɛ Koresh ji wɔŋjalɔ moŋ, shi ahala lɛ ní ebatsu Nyɔŋmɔ nitsumɔ lɛ

[Mfoniri ni yɔɔ baafa 21]

Jeŋmaji lɛ kɛ amɛhiɛ fɔ̃ɔ amagai ní wala bɛ amɛmli lɛ anɔ

[Mfonirii ni yɔɔ baafa 27]

Israel ‘baagbee gɔji lɛ,’ tamɔ bɔ ni “ŋmãagbeemɔ tsɔne” gbeeɔ nii lɛ