Yitso Enyɔ
Tsɛ ko Kɛ Ebii Atuatselɔi
1, 2. Tsɔɔmɔ bɔ ni fee ni Yehowa baná bii atuatselɔi lɛ mli.
EKWƐƆ ebii jogbaŋŋ diɛŋtsɛ, tamɔ bɔ ni fɔlɔ fɛɛ fɔlɔ ni yɔɔ suɔmɔ baafee lɛ. Ekɛ afii babaoo ekwɛ akɛ amɛyeɔ nii, amɛwoɔ atade, ni amɛyɛ wɔɔhe. Kɛ́ ehe miihia lɛ, etsɔseɔ amɛ. Shi egbálaaa amɛtoi fe nine kɔkɔɔkɔ; be fɛɛ be lɛ, ekɛhaa “bɔ ni sa kɛkɛ.” (Yeremia 30:11) Belɛ, wɔbaanyɛ wɔsusu dɔlɛ ní tsɛ ni yɔɔ suɔmɔ nɛɛ nuɔ he lɛ he jogbaŋŋ, beni ewie wiemɔ nɛɛ, akɛ: “Milɛ̀ bii ni amɛdara, miwó amɛnɔ hu; shi amɛ lɛ, amɛtse mihiɛ atua!”—Yesaia 1:2b.
2 Shi, bii atuatselɔi ní awieɔ amɛhe yɛ biɛ nɛɛ ji Yudabii lɛ, ni tsɛ ní áfee lɛ nidɔɔnii lɛ ji Yehowa Nyɔŋmɔ. Kwɛ bɔ ni eyɔɔ dɔlɛ ha! Yehowa kɛ nibii kpakpai elɛ̀ Yudeabii lɛ, ni ewó amɛnɔ kɛtee gbɛhe ni nɔ kwɔ mli yɛ jeŋmaji lɛ ateŋ. Ekai amɛ yɛ sɛɛ mli kɛtsɔ gbalɔ Ezekiel nɔ akɛ: “Misaa miwoo atade ni aye mli ŋaabii, ni miwoo nuŋgbee wolo tokotai, ni mikɛ klala kpakpa fĩ ohɛ, ni mikɛ seda ha ohe.” (Ezekiel 16:10) Ni kɛlɛ, bei pii lɛ, Yudabii lɛ ahiɛ esɔɔɔ nɔ ni Yehowa efee eha amɛ lɛ. Shi moŋ, amɛte shi amɛwo lɛ, loo amɛtse atua.
3. Mɛni hewɔ Yehowa tsɛɔ ŋwɛi kɛ shikpɔŋ koni amɛbaye Yuda atuatsemɔ lɛ he odase lɛ?
3 Yiŋtoo kpakpa hewɔ ni Yehowa je saji ní ewie yɛ ebii atuatselɔi lɛ ahe lɛ shishi kɛ wiemɔ nɛɛ, akɛ: “Ŋwɛi, bo toi, ni shikpɔŋ feemɔ toi! shi Yehowa miiwie.” (Yesaia 1:2a) Afii ohai abɔ komɛi ní eho nɛ lɛ, kɛ́ wɔɔkɛɛ lɛ, ŋwɛi kɛ shikpɔŋ nu ní akɛ kɔkɔbɔɔ ni mli kã shi faŋŋ miiha Israelbii lɛ yɛ nibii ni baajɛ toigbele mli aba lɛ ahe. Mose wie akɛ: “Ŋmɛnɛ miitsɛ ŋwɛi kɛ shikpɔŋ ní amɛye odase amɛshi nyɛ, akɛ kpatamɔ nyɛhiɛ baakpata oya kɛaajɛ shikpɔŋ ní nyɛbaafo Yordan kɛya ní nyɛyaŋɔ lɛ nɔ.” (5 Mose 4:26) Agbɛnɛ yɛ Yesaia gbii lɛ amli lɛ, Yehowa miitsɛ ŋwɛi ní anaaa lɛ kɛ shikpɔŋ ní anaa lɛ ní amɛbaye Yuda atuatsemɔ lɛ he odase.
4. Te Yehowa hala akɛ ekɛ ehe baaha Yuda eha tɛŋŋ?
4 Bɔ ni shihilɛ lɛ mli wa waa lɛ biɔ ní atsu he nii yɛ gbɛ ni yɔɔ tɛ̃ɛ nɔ. Shi kɛlɛ, yɛ shihilɛi ni mli wa waa nɛɛ po mli lɛ, esa kadimɔ—ni eji miishɛɛ sane hu—akɛ Yehowa kɛ ehe hãa Yuda ákɛ tsɛ ní yɔɔ suɔmɔ moŋ fe nɔtsɛ ní ehe amɛ kɛkɛ. Yɛ nakai feemɔ mli lɛ, Yehowa miikpa ewebii lɛ fai ní amɛsusu sane lɛ he taakɛ tsɛ ní nuɔ jaramɔ kɛ dɔlɛ he, yɛ ebii ní ekɔ gbɛ fɔŋ hewɔ lɛ baasusu he lɛ. Ekolɛ fɔlɔi ni yɔɔ Yuda lɛ ekomɛi baanyɛ akai bɔ ni amɛnu jaramɔ shihilɛ ni tamɔ nɛkɛ he pɛŋ lɛ, ni nɔkwɛmɔnɔ nɛɛ tsirɛɔ amɛ. Bɔ fɛɛ bɔ ni eji lɛ, Yehowa miihe ejaje esane ní ekɛshiɔ Yuda lɛ.
Kooloi ní Bɛ Jwɛŋmɔ po Le Nii Fe Amɛ
5. Kɛ akɛmiito Israel he lɛ, tsina kɛ teji jieɔ anɔkwayeli henumɔ kpo yɛ mɛɛ gbɛ nɔ?
5 Yehowa wie kɛtsɔ Yesaia nɔ akɛ: “Tsina le etsɛ, ni teji hu le enuntsɔ niyenii anɔ̃: shi Israel lɛ, lɛ lɛ eleee, mimaŋ lɛ hu jwɛŋŋ nɔ̃!” (Yesaia 1:3)a Tsina kɛ teji ji kooloi ní akɛgbalaa jatsui, ní mɛi ni yɔɔ Boka Teŋgbɛ lɛ le jogbaŋŋ. Lɛɛlɛŋ, Yudeabii lɛ ejeŋ he ŋwane akɛ nakai kooloi ní baa shi lɛ po jieɔ anɔkwayeli henumɔ, henumɔ ni mli wa waa akɛ amɛnuntsɔ nii ji amɛ lɛ kpo. Yɛ enɛ gbɛfaŋ lɛ, susumɔ nɔ ni Biblia mli saji amlitaolɔ ko na gbi ko gbɛkɛnaashi yɛ Boka Teŋgbɛ maŋtiase ko mli lɛ he okwɛ: “Ní kooloi akuu lɛ bote agbó lɛ mli nɔŋŋ pɛ kɛkɛ ni amɛbɔi gbɛɛ-kɛ-shwãmɔ. Tsina fɛɛ tsina le enuntsɔ jogbaŋŋ, kɛ gbɛ ní yaa eshia, ni edũuu gbɛ yɛ blohuiaŋ gbɛ̀i leleooi ni yɔɔ lɔgɔligii kɛ kɔ̃ɔdɔ̃ŋ lɛ anɔ shikome po. Ni yɛ teji lɛ gbɛfaŋ lɛ, enyiɛ tɛ̃ɛ kɛtee shinaa lɛ naa, ni etsá nɔ kɛtee ‘enuntsɔ kooloi aniyenii anɔ̃’ lɛ he.”
6. Yuda maŋbii lɛ fee amɛnii akɛ mɛi ni jwɛŋŋ nɔ̃ yɛ mɛɛ gbɛ nɔ?
6 Akɛni ŋwanejee ko bɛ he akɛ afɔɔ shihilɛi ni tamɔ nɛkɛ namɔ yɛ Yesaia gbii lɛ amli hewɔ lɛ, oti ni yɔɔ Yehowa shɛɛ sane lɛ mli lɛ yɛ faŋŋ: Kɛ́ kooloo ni bɛ jwɛŋmɔ po yooɔ enuntsɔ kɛ eniyenii anɔ̃ lɛ, no lɛ mɛɛ naajiemɔ Yudabii lɛ baanyɛ amɛkɛha yɛ kwamɔ ní amɛkwa Yehowa lɛ he? Lɛɛlɛŋ, ‘amɛjwɛŋŋ nii anɔ̃.’ Etamɔ nɔ ni amɛleee akɛ amɛshweremɔ kɛ amɛshihilɛ diɛŋtsɛ damɔ Yehowa nɔ. Yɛ anɔkwale mli lɛ, eji mɔbɔnalɛ he odaseyeli akɛ Yehowa yaa nɔ etsɛɔ Yudeabii lɛ lolo akɛ “mimaŋ”!
7. Mɛni ji gbɛ̀i komɛi ni wɔɔnyɛ wɔtsɔ nɔ wɔjie wɔhe kpo akɛ wɔhiɛ sɔɔ nibii ni Yehowa haa wɔ lɛ?
7 Wɔsumɔŋ ni wɔfee wɔnii kɔkɔɔkɔ tamɔ mɛi ni susuuu nii ahe, kɛtsɔ hiɛsɔɔ ní wɔnáŋ wɔha nibii fɛɛ ni Yehowa efee eha wɔ lɛ nɔ! Yɛ no najiaŋ lɛ, esa akɛ wɔkase lalatsɛ David, mɔ ni kɛɛ akɛ: “Mada Yehowa shi kɛ mitsui fɛɛ, magba onaakpɛɛ nitsumɔi lɛ fɛɛ.” (Lala 9:2) Yehowa he nilee ní wɔɔya nɔ wɔná be fɛɛ be lɛ baawo wɔ hewalɛ yɛ enɛ gbɛfaŋ, ejaakɛ Biblia lɛ kɛɔ akɛ “Mɔ krɔŋkrɔŋ lɛ lee ji sanesɛɛkɔmɔ.” (Abɛi 9:10) Yehowa dɛŋ jɔɔmɔi anɔjwɛŋmɔ daa gbi baaye abua wɔ ni wɔda lɛ shi, ní wɔkaku wɔhiɛ wɔfɔ̃ wɔŋwɛi Tsɛ lɛ nɔ. (Kolosebii 3:15) Yehowa kɛɛ: “Mɔ ni shãa shidaa afɔle lɛ eewo mihiɛ nyam, ni eeje gbɛ ní matsɔ nɔ matsɔɔ lɛ Nyɔŋmɔ yiwalaheremɔ lɛ!”—Lala 50:23.
“Israel Mɔ krɔŋkrɔŋ lɛ” Ahorabɔɔ ni Yɔɔ Naakpɛɛ
8. Mɛni hewɔ abaanyɛ atsɛ Yuda maŋbii lɛ akɛ “jeŋmaŋ ni feɔ esha” lɛ?
8 Yesaia tsá eshɛɛ sane lɛ nɔ kɛ wiemɔi ni mli wa waa kɛha Yuda maŋ lɛ, akɛ: “Ao! jeŋmaŋ ni feɔ esha, maŋ ni sɔ̃ kã amɛnɔ, efɔŋfeelɔi ashwiei, bii ni efite! Amɛkwa Yehowa, amɛgbe Israel Mɔ krɔŋkrɔŋ lɛ he guɔ, amɛku amɛsɛɛ kɛtee!” (Yesaia 1:4) Nifeemɔi fɔji baanyɛ atĩa aahu akɛ amɛbatsɔɔ tamɔ jatsu ko ni tsii yɛ mɔ nɔ. Yɛ Abraham gbii lɛ amli lɛ, Yehowa tsɔɔ bɔ ni Sodom kɛ Gomora eshai lɛ ji lɛ mli akɛ “etsii naakpa.” (1 Mose 18:20) Amrɔ nɛɛ aana nɔ ko ni tamɔ nakai faŋŋ yɛ Yudabii lɛ ahe, ejaakɛ Yesaia wie akɛ “sɔ̃ kã amɛnɔ.” Kɛfata he lɛ, etsɛɔ amɛ “efɔŋfeelɔi ashwiei, bii ni efite.” Hɛɛ, Yudeabii lɛ tamɔ gbekɛbii fɔji. “Amɛku amɛsɛɛ,” aloo taakɛ New Revised Standard Version lɛ kɛɔ lɛ, “amɛtse amɛhe kwraa kɛjɛ” amɛ-Tsɛ “he.”
9. Te wiemɔ kuku ni ji “Israel Mɔ krɔŋkrɔŋ lɛ” he hiaa ha tɛŋŋ?
9 Yudabii lɛ kɛ amɛgbɛ fɔŋ ní amɛkɔ lɛ miitsɔɔ bulɛ ní amɛbɛ kwraa kɛha “Israel Mɔ krɔŋkrɔŋ lɛ.” Te wiemɔ kuku nɛɛ, ní anaa shii 25 sɔŋŋ yɛ Yesaia wolo lɛ mli lɛ he hiaa ha tɛŋŋ? Ní aaafee krɔŋkrɔŋ lɛ tsɔɔ akɛ mɔ lɛ he tse ni eyɛ krɔŋŋ. Yehowa yɛ krɔŋkrɔŋ diɛŋtsɛ kɛmɔ shi. (Kpojiemɔ 4:8) Be fɛɛ be ní Israelbii lɛ aaana wiemɔi ní akpɛ́ yɛ shika hiɛtamɔ nii ni kpɛlɛɔ lɛ nɔ, yɛ osɔfonukpa lɛ fai lɛ hiɛ lɛ, akaiɔ amɛ yɛ anɔkwa sane nɛɛ he akɛ: “Krɔŋkrɔŋ hã Yehowa.” (2 Mose 39:30) No hewɔ lɛ, Yesaia kɛ tsɛmɔ ni etsɛ́ Yehowa akɛ “Israel Mɔ krɔŋkrɔŋ lɛ” miima bɔ ni hiɛdɔɔ yɔɔ esha ní Yuda efee lɛ he lɛ nɔ mi. Ejaakɛ, atuatselɔi nɛɛ miiku kita ni awo amɛ blematsɛmɛi lɛ akɛ: “Nyɛfea nyɛhe krɔŋkrɔŋ, koni nyɛhi krɔŋkrɔŋ, ejaakɛ krɔŋkrɔŋ ji mi” lɛ mli diɛŋtsɛ!—3 Mose 11:44.
10. Wɔbaanyɛ wɔkwa bulɛ ni anáaa ahaaa “Israel Mɔ krɔŋkrɔŋ lɛ” yɛ mɛɛ gbɛ nɔ?
10 Esa akɛ Kristofoi ni yɔɔ ŋmɛnɛ lɛ afee bɔ fɛɛ bɔ ni amɛaanyɛ ní amɛkanyiɛ Yuda nɔkwɛmɔnɔ ni ji bulɛ ní amɛnáaa kɛhaaa “Israel Mɔ krɔŋkrɔŋ lɛ” sɛɛ. Esa akɛ amɛkase Yehowa krɔŋkrɔŋfeemɔ lɛ. (1 Petro 1:15, 16) Ni ehe miihia ní ‘amɛnyɛ̃ efɔŋ.’ (Lala 97:10) Nifeemɔi ni he tseee, tamɔ bɔlɛnamɔ mli jeŋba shara, wɔŋjamɔ, juu, kɛ dãatɔɔ baanyɛ afite Kristofoi asafo lɛ. No hewɔ ni ashwieɔ mɛi ní sumɔɔɔ ní amɛkpa nɛkɛ nifeemɔi nɛɛ kɛjɛɔ asafo lɛ mli lɛ. Yɛ naagbee lɛ, ahaŋ mɛi ni kɔɔ shihilɛ gbɛ ni he tseee, ni amɛshwaaa amɛhe lɛ aná jɔɔmɔi ní Nyɔŋmɔ Maŋtsɛyeli nɔyeli lɛ kɛaaba lɛ amli ŋɔɔmɔ. Yɛ anɔkwale mli lɛ, nɛkɛ nifeemɔi fɔji nɛɛ fɛɛ feɔ “Israel Mɔ krɔŋkrɔŋ lɛ” heguɔgbee kpele diɛŋtsɛ.—Romabii 1:26, 27; 1 Korintobii 5:6-11; 6:9, 10.
Amɛhe Miiye Kɛjɛ Amɛyiteŋ Kɛbashi Amɛnajiashi
11, 12. (a) Tsɔɔmɔ Yuda shihilɛ gbonyo lɛ mli. (b) Mɛni hewɔ esaaa akɛ Yuda nii feɔ wɔ mɔbɔ lɛ?
11 No sɛɛ lɛ Yesaia bɔ mɔdɛŋ akɛ ekɛ Yudabii lɛ aaasusu saji ahe kɛtsɔ wiemɔ ní ewie yɛ bɔ ni amɛhe yeɔ hãa lɛ nɔ. Ewie akɛ: “Mɛɛ hewɔ aaakã he atswia nyɛ nii, ni nyɛyaa sɛɛsɛɛ lolo nɛɛ?” Enɛ tsɔɔ akɛ, Yesaia miibi amɛ akɛ: ‘Ani bɔ ni nyɛna amanehulu lɛ faaa? Mɛni hewɔ esa akɛ nyɛkɛ efɔŋ babaoo aba nyɛnɔ lolo kɛtsɔ atua ní nyɛyaa nɔ nyɛtseɔ lɛ nɔ?’ Yesaia tee nɔ akɛ: “Yitso muu lɛ fɛɛ he miiye, ni tsui muu lɛ hu egbɔjɔ! Kɛjɛ naneshi aahu kɛyashi yiteŋ fɛɛ lɛ he ko he ko bɛ ní eye emuu.” (Yesaia 1:5, 6a) Yuda he miiye kɛ hela ko ni yɔɔ nyaŋemɔ—ehe miiye yɛ mumɔŋ kɛjɛ eyiteŋ kɛbashi enajiashi. Ana hela ni yeɔ lɛ lɛ akɛ emli wa waa diɛŋtsɛ!
12 Ani esa akɛ Yuda nii afee wɔ mɔbɔ? Dabi kwraa! Afii ohai komɛi ni tsɔ hiɛ lɛ amli lɛ, abɔ Israel maŋ muu lɛ fɛɛ kɔkɔ yɛ gbɛ ni sa nɔ, yɛ toigbele he toigbalamɔ he. Nɔ ni akɛɛ amɛ lɛ fã ko ji akɛ: “Yehowa aaaha asanei ní jaraa ní anyɛŋ atsá ahão atsɛ̃rɛ̃ onakutsei kɛ oshwuɔji ahe, kɛjɛ onaneshi aahu kɛyashi oyiteŋ pampam.” (5 Mose 28:35) Amrɔ nɛɛ Yuda miina nibii ní ejɛ kuɛŋtimɔ gbɛ ní ekɔ nɛɛ mli eba lɛ mli amanehulu yɛ mfonirifeemɔŋ shishinumɔ naa. Eji Yudabii lɛ bo Yehowa toi kulɛ, amɛbaanyɛ amɛjo nɛkɛ nibii nɛɛ fɛɛ anaa foi.
13, 14. (a) Mɛɛ pilamɔi akɛba Yuda nɔ? (b) Ani Yuda amanehului lɛ ha esaa esusu atuatsemɔ gbɛ ni ekɔ lɛ he ekoŋŋ?
13 Yesaia tee nɔ etsɔɔ Yuda shihilɛ ní yɔɔ mɔbɔ lɛ mli lolo, akɛ: “Shi pilamɔi kɛ hei ní etɛrɛtɛrɛi kɛ faji ŋmɔji sɔŋŋ; anyamɔko, ni afimɔko nɔ, ni atoko nɔ mu hu!” (Yesaia 1:6b) Gbalɔ lɛ wie gbɛ̀i etɛ ní atsɔɔ nɔ ayeɔ he awui lɛ he yɛ biɛ: pilamɔi (nii ní foɔ mɔ, tamɔ bɔ ni klante loo kakla foɔ mɔ lɛ), hewolonɔ tserɛmɔ (hewolonɔ gbálamɔ ní yii kɛbaa lɛ), kɛ faji ŋmɔji (faji heei ní atoko nɔ, ní tamɔ nɔ ni ehiii tsamɔ). Nɔ ni etsɔɔ lɛ ji nuu ko ni aje gbɛ agbala etoi waa yɛ gbɛ fɛɛ ni abaanyɛ asusu he nɔ, ni egbɔmɔtso lɛ he ko kwraa bɛ ni eje pilamɔ mli. Yuda yɛ haomɔ kɛ jaramɔ shihilɛ mli lɛɛlɛŋ.
14 Ani Yuda shihilɛ ni yɔɔ mɔbɔ lɛ tsirɛ lɛ koni eku esɛɛ kɛba Yehowa ŋɔɔ? Dabi! Yuda tamɔ atuatselɔ ni awie ehe yɛ Abɛi 29:1 lɛ, akɛ: “Mɔ ni afɔɔ lɛ kãmɔ ni ekuɛŋ ti lɛ, trukaa aaakumɔ lɛ ni tsabaa bɛ.” Etamɔ nɔ ni maŋ lɛ eshɛ shɔŋŋ tsɔ fe bɔ ni eeehi lɛ tsamɔ. Taakɛ Yesaia wie he lɛ, epilamɔi lɛ “anyamɔko, ni afimɔko nɔ, ni atoko nɔ mu hu!”b Yɛ shishinumɔ ko naa lɛ, Yuda tamɔ mɔ ko ni ehe eyi obɔ kɛ faji ni gbooo, ní afimɔko nɔ.
15. Wɔbaanyɛ wɔbu wɔhe kɛjɛ mumɔŋ hela he yɛ mɛɛ gbɛ̀i anɔ?
15 Beni wɔkaseɔ nii kɛjɛɔ nɔ ni ba Yuda nɔ lɛ mli lɛ, esa akɛ wɔhiɛ ahi wɔhe nɔ yɛ mumɔŋ hela he. Taakɛ gbɔmɔtsoŋ hela ji lɛ, ebaanyɛ esa wɔteŋ mɔ fɛɛ mɔ he. Ejaakɛ, kɛ hoo lɛ, wɔteŋ namɔ yɔɔ ni heloonaa akɔnɔi náaa enɔ hewalɛ? Hiɛjoomɔ kɛ ŋɔɔmɔyeli he akɔnɔ ni tekeɔ nɔ baanyɛ ahe shi yɛ wɔtsuii amli. No hewɔ lɛ, esa akɛ wɔtsɔse wɔhe koni ‘wɔhi efɔŋ kwraa,’ ní ‘wɔkpɛtɛ ekpakpa he.’ (Romabii 12:9) Esa akɛ wɔjie Nyɔŋmɔ mumɔ lɛ yibii lɛ hu kpo yɛ wɔ daa gbi shihilɛi amli. (Galatabii 5:22, 23) Kɛ wɔfee nakai lɛ, ebaaha wɔtsi wɔhe kɛjɛ shihilɛ ni hao Yuda—ni ji mumɔŋ hela ní ye lɛ kɛjɛ eyiteŋ aahu kɛbashi enajiashi lɛ he.
Shikpɔŋ ni Etsɔ Amaŋfɔ
16. (a) Te Yesaia tsɔɔ bɔ ni Yuda shikpɔŋ lɛ shikamɔ yɔɔ lɛ mli eha tɛŋŋ? (b) Mɛni hewɔ mɛi komɛi kɛɔ akɛ eeenyɛ efee akɛ ekolɛ awie nɛkɛ wiemɔi nɛɛ yɛ Ahaz nɔyeli beaŋ lɛ, shi te esa akɛ wɔnu shishi wɔha tɛŋŋ?
16 Agbɛnɛ, Yesaia shĩ bɔ ni etsɔɔ saji amli kɛ tsofafeemɔ wiemɔi lɛ ni etsake kɛtee bɔ ni Yuda shikpɔŋ lɛ shikamɔ yɔɔ lɛ nɔ. Ewie tamɔ mɔ ko ni miikwɛ ŋa kplanaa ko ni tawuu efite lɛ lɛ gãa, ni ekɛɛ: “Nyɛshikpɔŋ lɛ etsɔ amaŋfɔ, nyɛmaji lɛ akɛ la eshã; nyɛŋmɔji lɛ, gbɔi miiye yɛ nyɛhiɛ, etsɔ amaŋfɔ, tamɔ nɔ ni gbɔi ebutu!” (Yesaia 1:7) Woloŋlelɔi komɛi kɛɔ akɛ eyɛ mli akɛ anaa wiemɔi nɛɛ yɛ Yesaia wolo lɛ shishijee gbɛ moŋ, shi ekolɛ gbalɔ lɛ wie yɛ sɛɛ mli yɛ enitsumɔ lɛ mli, ekolɛ yɛ Maŋtsɛ Ahaz yiwalɔ lɛ nɔyeli beaŋ. Amɛkɛɔ akɛ shweremɔ babaoo ba yɛ Uzia nɔyeli be lɛ mli tsɔ fe nɔ ni sa akɛ awie he yɛ gbɛ gbonyo ni tamɔ nɛkɛ nɔ. Wɔkpɛlɛɔ nɔ akɛ, anyɛŋ akɛɛ kɛ nɔmimaa kɛji akɛ ato Yesaia wolo lɛ mli saji anaa yɛ be he akɔntaabuu naa. Shi kɛlɛ, ekolɛ Yesaia wiemɔi ni kɔɔ amaŋfɔfeemɔ he lɛ ji gbalɛ mli wiemɔi. Beni ewieɔ wiemɔi ni yɔɔ yiteŋgbɛ lɛ, eeenyɛ efee akɛ ekolɛ Yesaia kɛ ŋaa gbɛ ko ni anaa yɛ hei krokomɛi yɛ Biblia lɛ mli lɛ miitsu nii—no ji wiemɔ ni awieɔ wɔsɛɛ be nifeemɔ ko he tamɔ nɔ ni eba mli momo, ni akɛmaa bɔ ni ayɔɔ nɔmimaa yɛ gbalɛ lɛ mlibaa he lɛ nɔ mi lɛ.—Okɛto Kpojiemɔ 11:15 he.
17. Mɛni hewɔ esaaa akɛ bɔ ni awie amaŋfɔfeemɔ he aha yɛ gbalɛ wiemɔ mli lɛ feɔ Yudabii lɛ naakpɛɛ lɛ?
17 Bɔ fɛɛ bɔ ni fee lɛ, esaaa akɛ bɔ ni awie Yuda amaŋfɔfeemɔ lɛ he yɛ gbalɛ wiemɔ mli lɛ feɔ nɛkɛ gbɔmɛi kuɛŋtilɔi kɛ toigbolɔi nɛɛ naakpɛɛ. Afii ohai abɔ komɛi ni etsɔ hiɛ lɛ, Yehowa bɔ amɛ kɔkɔ yɛ nɔ ni baaba kɛji amɛtse atua lɛ he. Ekɛɛ: “Mi diɛŋtsɛ po makpata shikpɔŋ lɛ hiɛ, bɔ ni nyɛhenyɛlɔi ni aaahi nɔ lɛ tete hiɛ aaafee amɛ yaa. Shi nyɛ diɛŋtsɛ lɛ, magbɛ nyɛ mashwã jeŋmaji lɛ ateŋ, ni magbala klante kɛnyiɛ nyɛsɛɛ, ni shikpɔŋ lɛ aaatsɔ olɛŋlɛ, ni nyɛmaji lɛ aaatsɔmɔ amaŋfɔi.”—3 Mose 26:32, 33; 1 Maŋtsɛmɛi 9:6-8.
18-20. Mɛɛ be Yesaia 1:7, 8 lɛ mli wiemɔi lɛ ba mli, ni Yehowa ‘shwɛ shwɛɛnɔ̃ fioo ko’ yɛ be nɛɛ mli yɛ mɛɛ gbɛ nɔ?
18 Eyɛ faŋŋ akɛ Yesaia 1:7, 8 lɛ mli wiemɔi lɛ ba mli yɛ Ashur tutuamɔi ni kɛ Israel hiɛkpatamɔ ba lɛ, kɛ hiɛkpatamɔ kɛ amanehulu babaoo ni ba yɛ Yuda hu lɛ bei amli. (2 Maŋtsɛmɛi 17:5, 18; 18:11, 13; 2 Kronika 29:8, 9) Shi kɛlɛ, akpataaa Yuda hiɛ kwraa kɛmɔɔɔ shi. Yesaia kɛɔ akɛ: “Aaashi Zion biyoo lɛ tamɔ weintrom mli asese ko, tamɔ agorigo ŋmɔ mli wɔɔhe, tamɔ maŋ ni awo he ka.”—Yesaia 1:8.
19 Yɛ hiɛkpatamɔ lɛ mli fɛɛ lɛ abaashi “Zion biyoo lɛ,” ni ji Yerusalem. Shi ebaafee tamɔ maŋ ko ni tutuamɔ waaa kwraa—tamɔ weintrom mli asese ko loo bulɔ agba bibioo ko yɛ agorigo ŋmɔ mli. Afii ohai 19 lɛ mli woloŋlelɔ ko kai Yesaia wiemɔi lɛ beni efãa gbɛ yɛ Nilo faa lɛ hiɛ ní ena asesei ni tamɔ enɛɛmɛi lɛ, ni ewie akɛ “amɛhi fioo fe afabaŋ ni afo ní akɛmiitsĩ kooyigbɛ kɔɔyɔɔ naa.” Kɛ́ akpa ŋmɔshi nibii agbe naa yɛ Yuda lɛ, ashĩɔ asesei nɛɛ ni amɛwuleɔ amɛshwieɔ shi ni amɛfiteɔ. Shi kɛlɛ, bɔ fɛɛ bɔ ni Yerusalem baafee tamɔ maŋ ni he waaa yɛ Ashur asraafoi ni yeɔ mɔ fɛɛ mɔ nɔ kunim lɛ ahiɛ lɛ, ebaaya nɔ ehi shi.
20 Yesaia mu nɛkɛ gbalɛ mli wiemɔ nɛɛ naa akɛ: “Efee akɛ Yehowa Zebaot eshwɛɛɛ shwɛɛnɔ̃ bibioo ko ehaaa wɔ kulɛ, wɔtsɔ tamɔ Sodom, ni wɔfee tamɔ Gomora pɛ!” (Yesaia 1:9)c Kɛ amɛkɛ Ashur ni he wa lɛ kpe lɛ, yɛ naagbee lɛ Yehowa baaye abua Yuda. Ákɛ maŋ ní tamɔɔɔ Sodom kɛ Gomora lɛ, akpataŋ Yuda hiɛ kwraa. Ebaaya nɔ ehi shi.
21. Beni Babilon kpata Yerusalem hiɛ sɛɛ lɛ, mɛni hewɔ Yehowa ‘shwɛ shwɛɛnɔ̃ fioo ko’ lɛ?
21 Nɔ ni fe afii 100 sɛɛ lɛ, Yuda baje hegbeyeiwoo shishi ekoŋŋ. Gbɔmɛi lɛ ekaseee nii kɛjɛɛɛ toigbalamɔ ni akɛha amɛ kɛtsɔ Ashur nɔ lɛ mli. “Amɛ lɛ, Nyɔŋmɔ bɔfoi lɛ ahe fɛo moŋ amɛyeɔ, ni amɛgbeɔ ewiemɔi lɛ ahe guɔ ni amɛliɔ egbalɔi lɛ.” Enɛ hewɔ lɛ, “Yehowa mlifu te shi wo emaŋ lɛ ni tsabaa ko bɛ dɔŋŋ.” (2 Kronika 36:16) Babilonbii amaŋtsɛ Nebukadnezar baye Yuda nɔ kunim, ni yɛ be nɛɛ mli lɛ, nɔ ko kwraa eshwɛɛɛ, “tamɔ weintrom mli asese ko.” Akpata Yerusalem po hiɛ. (2 Kronika 36:17-21) Shi kɛlɛ, Yehowa ‘shwɛ shwɛɛnɔ̃ fioo ko.’ Eyɛ mli akɛ Yuda tee nɔ ehi shi afii 70 yɛ nomŋɔɔ mli moŋ, shi Yehowa kwɛ ni eha maŋ lɛ, kɛ titri lɛ, David wekukpaa ni kɛ Mesia ni awo shi yɛ ehe lɛ baaba lɛ tee nɔ ehi shi.
22, 23. Mɛni hewɔ Yehowa ‘shwɛ shwɛɛnɔ̃ fioo ko’ yɛ klɛŋklɛŋ afii oha lɛ mli lɛ?
22 Yɛ klɛŋklɛŋ afii oha lɛ mli lɛ, Israel tsɔ̃ enaagbee amanehulu mli akɛ Nyɔŋmɔ webii ni ekɛ amɛ efee kpaŋmɔ. Beni Yesu kɛ ehe tsɔɔ akɛ Mesia ni awo shi yɛ ehe lɛ, maŋ lɛ kpoo lɛ, ni no hewɔ lɛ, Yehowa hu kpoo amɛ. (Mateo 21:43; 23:37-39; Yohane 1:11) Ani maŋ krɛdɛɛ ni Yehowa aaana yɛ shikpɔŋ nɔ lɛ naagbee nɛ? Dabi. Bɔfo Paulo tsɔɔ akɛ Yesaia 1:9 lɛ yɛ emlibaa kroko ni baaba wɔsɛɛ. Beni etsɛɔ wiemɔi asɛɛ kɛjɛɔ Septuagint shishitsɔɔmɔ lɛ mli lɛ, eŋma akɛ: “Taakɛ bɔ ni Yesaia ekɛɛ eto momo lɛ akɛ: ‘Efee akɛ tai a-Nyɔŋmɔ lɛ eshwɛɛɛ seshi ko ehaaa wɔ kulɛ, wɔtamɔ Sodoma, ni wɔtsɔmɔ tamɔ Gomora pɛ.’”—Romabii 9:29.
23 Yɛ nɛkɛ be nɛɛ mli lɛ, mɛi ni yi ná wala lɛ ji Kristofoi ni afɔ amɛ mu, ni ná Yesu Kristo mli hemɔkɛyeli lɛ. Mɛi ni bafata he klɛŋklɛŋ ji Yudafoi ni he ye lɛ. Sɛɛ mli lɛ, akɛ Jeŋmajiaŋbii ni heɔ yeɔ lɛ hu bafata amɛhe. Amɛ fɛɛ amɛfeɔ ekome kɛfeɔ Israel hee, ni ji “Nyɔŋmɔ Israel lɛ.” (Galatabii 6:16; Romabii 2:29) Nɛkɛ “seshi” nɛɛ yi ná wala kɛtsɔ Yudafoi anibii agbɛjianɔtoo lɛ hiɛkpatamɔ ni ba yɛ afi 70 Ŋ.B. lɛ mli. Yɛ anɔkwale mli lɛ, “Nyɔŋmɔ Israel lɛ” kɛ wɔ yɛ lolo ŋmɛnɛ. Amrɔ nɛɛ jeŋmajiaŋbii aŋkroaŋkroi heyelilɔi akpekpei abɔ, ni feɔ “asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” ebafata amɛhe.—Kpojiemɔ 7:9.
24. Mɛni esa akɛ mɛi fɛɛ ahiɛ ahi amɛhe nɔ yɛ he kɛ́ amɛmiitao ni amɛyi aná wala kɛfo adesai amanehulu kpeteŋkpele fe fɛɛ lɛ?
24 Etsɛŋ ni je nɛɛ kɛ Harmagedon ta lɛ baakpe. (Kpojiemɔ 16:14, 16) Eyɛ mli akɛ enɛ baafee amanehulu be ni mli wa fe tutuamɔ ni Ashurbii lɛ loo Babilonbii lɛ yatutua Yuda lɛ, ni emli baawa fe hiɛkpatamɔ ni Romabii lɛ kɛba Yuda nɔ yɛ afi 70 Ŋ.B. lɛ moŋ, shi mɛi komɛi ayi baaná wala kɛjɛ mli. (Kpojiemɔ 7:14) Belɛ, kwɛ bɔ ni ehe hiaa waa akɛ, wɔ fɛɛ wɔɔsusu wiemɔi ni Yesaia kɛ Yuda wie lɛ ahe jogbaŋŋ! Ebafee yibaamɔ kɛha anɔkwafoi ni hi shi yɛ nakai beaŋ lɛ. Ni amɛbaanyɛ amɛtsɔɔ yibaamɔ kɛha mɛi ni heɔ yeɔ ŋmɛnɛ lɛ.
[Shishigbɛ niŋmai]
a Yɛ sane nɛɛ mli lɛ, “Israel” miitsɔɔ Yuda akutsei enyɔ maŋtsɛyeli lɛ.
b Yesaia wiemɔi lɛ jieɔ tsofafeemɔ mli nifeemɔi ni akɛtsuɔ nii yɛ ebeaŋ lɛ kpo. Biblia mli saji amlitaolɔ E. H. Plumptre tsɔɔ mli akɛ: “Fala ni ewo nu ‘ní afiɔ nɔ’ loo ‘anyamɔɔ’ lɛ ji nifeemɔ gbɛ ni akɛtsuɔ nii klɛŋklɛŋ ni akɛkaa nu ni yɔɔ mli lɛ jiemɔ; no sɛɛ lɛ, taakɛ eba yɛ Hezekia gbɛfaŋ lɛ (yitso xxxviii. 21), akɛ falanɔfii tsofa ‘fiɔ nɔ,’ ni no sɛɛ lɛ akɛ mu ni kanyaa mɔ loo tsofa mu toɔ nɔ, ni ekolɛ, taakɛ eyɔɔ Luka x. 34 lɛ, akɛ mu kɛ wein tsumɔɔ fala lɛ nɔ.”
c Commentary on the Old Testament, ni C. F. Keil kɛ F. Delitzsch fee lɛ kɛɔ akɛ: “Gbalɔ lɛ wiemɔi lɛ ebashɛ efãi lɛ ekome naagbee yɛ biɛ. Nɔ ni tsɔɔ anɔkwale ni eji akɛ aja mli yɛ biɛ awo fãi enyɔ ni hiɛ amɛhe mli, yɛ niŋmaa lɛ mli ji bɔ ni ashi gbɛ yɛ kuku 9 kɛ 10 lɛ teŋ lɛ. Nɛkɛ gbɛ ni atsɔɔ nɔ ahaa fãi wuji loo bibii hiɛɔ amɛhe kwraa, kɛtsɔ gbɛi ni ashĩɔ yɛ teŋ loo kɛtsɔ liamɔ ni afoɔ nɔ amrɔ nɔŋŋ lɛ nɔ lɛ, sɛɛ etsɛ kwraa fe gbeeŋ-gbɛɛmɔ kɛ wiemɔ nɔwomɔ okadii ní akɛtsuɔ nii lɛ, ni edamɔ nifeemɔ gbɛ ko ni yaa sɛɛ shɔŋŋ yɛ blema beaŋ tɔ̃ɔ lɛ nɔ.”
[Mfoniri ni yɔɔ baafa 20]
Ákɛ maŋ ní tamɔɔɔ Sodom kɛ Gomora lɛ, Yuda kaŋ shi amaŋfɔ kɛyaŋ naanɔ