Yitso Etɛ
“Mɔ ni Mihala ní Mináa Ehe Tsui Lɛ!”
1, 2. Mɛni hewɔ Kristofoi yɔɔ Yesaia yitso 42 lɛ he miishɛɛ waa ŋmɛnɛ lɛ?
“YEHOWA kɛɛ, nyɛ ji midasefoi, kɛ mitsulɔ ní mihala.” (Yesaia 43:10) Yehowa sane jajemɔ nɛɛ, ní gbalɔ Yesaia ŋma efɔ̃ shi yɛ afii ohai kpaanyɔ D.Ŋ.B. lɛ, tsɔɔ akɛ Yehowa webii ni hi shi yɛ blema, ní ekɛ amɛ fee kpaŋmɔ lɛ ji maŋ ni ji odasefoi. Amɛji Nyɔŋmɔ tsulɔ ní ehala. Aaafee afii 2,600 sɛɛ, yɛ afi 1931 lɛ, Kristofoi ní afɔ amɛ mu lɛ jaje akɛ nɛkɛ wiemɔi nɛɛ kɔɔ amɛhe. Amɛhala gbɛi ni ji Yehowa Odasefoi lɛ, ni amɛkɛ amɛtsui muu fɛɛ kpɛlɛ gbɛnaa nii ní fata Nyɔŋmɔ tsuji ni yɔɔ shikpɔŋ nɔ ní amɛaaji lɛ he lɛ nɔ.
2 Yehowa Odasefoi kɛ miishɛɛ shweɔ waa akɛ amɛaasa Nyɔŋmɔ hiɛ. Enɛ hewɔ lɛ, amɛteŋ mɔ fɛɛ mɔ yɛ Yesaia yitso 42 lɛ he miishɛɛ ní mli wa waa diɛŋtsɛ, ejaakɛ efeɔ tsulɔ ní Yehowa kpɛlɛɔ enɔ, kɛ tsulɔ kroko ní ekpɛlɛɛɛ enɔ lɛ ahe mfoniri ní mli ka shi faŋŋ ehaa amɛ. Gbalɛ nɛɛ kɛ emlibaa hesusumɔ haa ayɔseɔ nɔ ni haa mɔ náa Nyɔŋmɔ nɔkpɛlɛmɔ kɛ nɔ ni haaa mɔ aná enɔkpɛlɛmɔ lɛ faŋŋ.
“Mikɛ Mimumɔ lɛ Eshwie Enɔ”
3. Mɛni Yehowa tsɔ Yesaia nɔ egba efɔ̃ shi yɛ “mitsulɔ” lɛ he?
3 Yehowa tsɔ Yesaia nɔ egba tsulɔ ko ní baa, ní lɛ diɛŋtsɛ ebaakpɛlɛ enɔ lɛ he sane efɔ̃ shi, akɛ: “Naa, mitsulɔ mɔ ni mihiɛ emli, mɔ ni mihala ní mináa ehe tsui lɛ! Mikɛ Mimumɔ lɛ eshwie enɔ, ni ekɛ kojomɔ aaatee ayaha jeŋmaji lɛ. Ebolɔŋ ni ewóŋ egbee nɔ, ni ehaŋ anu egbee yɛ blohuiaŋ. Gãlã ní amĩa lɛ, ekuŋ, ni kane mli odonti ní tsoɔ sulii lɛ, egbeŋ, ni eeejie kojomɔ kpo yɛ anɔkwale naa. Esane naa ejɔŋ, ni enijiaŋ ejeŋ wui kɛyashi beyinɔ ní ekɛ kojomɔ aaama shi yɛ shikpɔŋ lɛ nɔ, ni ŋshɔkpɔi lɛ aaakwɛ emla lɛ gbɛ.”—Yesaia 42:1-4.
4. Namɔ ji ‘mɔ ni ahala lɛ’ ní agba yɛ ehe afɔ̃ shi lɛ, ni te wɔfeɔ tɛŋŋ wɔleɔ enɛ?
4 Namɔ ji Tsulɔ ní awieɔ ehe yɛ biɛ lɛ? Ashiii wɔ ní wɔyiŋ afee wɔ kɔshikɔshi yɛ ehe. Wɔnaa wiemɔi nɛɛ ní atsɛ yisɛɛ yɛ Mateo Sanekpakpa lɛ mli ni eekɔ Yesu Kristo he. (Mateo 12:15-21) Yesu ji Tsulɔ ní enáa ehe tsui lɛ, ‘mɔ ni ehala lɛ.’ Mɛɛ be Yehowa kɛ emumɔ lɛ shwie Yesu nɔ? Yɛ afi 29 Ŋ.B., yɛ Yesu baptisimɔ be lɛ mli. Sane ní ajɛ mumɔŋ aŋma afɔ̃ shi lɛ wieɔ bɔ ni nakai baptisimɔ lɛ tee nɔ eha lɛ he ni ekɛɔ akɛ beni Yesu wó ehe nɔ kɛjɛ nu lɛ mli lɛ, “ŋwɛi gbele, ni Mumɔ krɔŋkrɔŋ lɛ kpeleke shi kɛ su ní tamɔ okpo su kɛba enɔ; ni gbee ko jɛ ŋwɛi kɛɛ: Bo ji misuɔmɔ bi lɛ, bo ohe tsuijurɔ mináa!” Yehowa diɛŋtsɛ tsɔ nɛkɛ gbɛ nɔ etsɔɔ mɔ ni ji e-Tsulɔ ní enáa ehe tsui lɛ. Yesu sɔɔmɔ nitsumɔ ní nyiɛ no sɛɛ kɛ naakpɛɛ nitsumɔi ní etsu lɛ ye odase akɛ Yehowa mumɔ lɛ yɛ enɔ lɛɛlɛŋ.—Luka 3:21, 22; 4:14-21; Mateo 3:16, 17.
‘Ekɛ Kojomɔ Baaba Ebaha Jeŋmaji Lɛ’
5. Mɛni hewɔ jalɛsaneyeli mlitsɔɔmɔ he bahia yɛ Ŋ.B. klɛŋklɛŋ afii oha lɛ mli lɛ?
5 Mɔ ni Yehowa Ehala Lɛ lɛ kɛ anɔkwa jalɛsaneyeli “aaatee ayaha,” loo ebaaha eje kpo faŋŋ. “Eeejaje kojomɔ etsɔɔ jeŋmaji lɛ.” (Mateo 12:18) Kwɛ bɔ ni enɛ he bahia yɛ Ŋ.B. klɛŋklɛŋ afii oha lɛ mli! Yudafoi ajamɔ mli hiɛnyiɛlɔi lɛ tsɔɔ jalɛsaneyeli kɛ jalɛ nifeemɔ he shishinumɔ ní ejaaa. Amɛbɔ mɔdɛŋ ákɛ amɛaashɛ jalɛ he kɛtsɔ mla gbɛjianɔtoo ní yɔɔ kpɛŋŋ—ní amɛmli babaoo ji amɛ diɛŋtsɛ amɛmlai lɛ asɛɛnyiɛmɔ nɔ. Mɔbɔnalɛ kɛ musuŋtsɔlɛ ko kwraa bɛ amɛ jalɛsaneyeli ní yɔɔ kpɛŋŋ yɛ mla naa lɛ mli.
6. Yesu ha ale anɔkwa jalɛsaneyeli yɛ mɛɛ gbɛ̀i anɔ?
6 Nɔ ni tamɔɔɔ nakai lɛ, Yesu jie bɔ ni Nyɔŋmɔ susuɔ jalɛsaneyeli he ehaa lɛ kpo. Yesu kɛ nɔ ni etsɔɔ kɛ bɔ ni ehi shi eha lɛ tsɔɔ akɛ anɔkwa jalɛsaneyeli jieɔ musuŋtsɔlɛ kɛ mɔbɔnalɛ kpo. Susumɔ e-Gɔŋ nɔ Shiɛmɔ ní ehe gbɛi waa lɛ he okwɛ. (Mateo, yitsei 5-7) Mɛɛ bɔ ni esa akɛ atsu jalɛsaneyeli kɛ jalɛ nifeemɔ he nii aha lɛ mlitsɔɔmɔ ní mli kã shi faŋŋ po nɛ! Kɛ́ wɔkane Sanekpakpai lɛ amli saji lɛ, ani musuŋtsɔlɛ ní Yesu yɔɔ kɛha ohiafoi kɛ mɛi ní naa amanehulu lɛ kanyaaa wɔhenumɔi? (Mateo 20:34; Marko 1:41; 6:34; Luka 7:13) Ekɛ eshɛɛ sane ní shɛjeɔ mɔ mii lɛ ha mɛi pii ní tamɔ gãlãi ní amĩa, ní edɔrɔ kɔmɔɔ ní agbalagbalaa amɛ mai lɛ. Amɛtamɔ kane mli odonti ní tsoɔ sulii, ní eshwɛ fioo ní amɛnaagbee kpɛmɔ bibioo lɛ hu baagbo. Yesu ekũuu “gãlã ní amĩa lɛ” ni egbeee “kane mli odonti ní tsoɔ sulii lɛ” hu. Shi moŋ, ewiemɔi kɛ nifeemɔi ní jieɔ suɔmɔ kɛ musuŋtsɔlɛ kpo lɛ hole heshibalɔi lɛ atsuii anɔ.—Mateo 11:28-30.
7. Mɛni hewɔ gbalɛ lɛ nyɛ ewie akɛ Yesu ‘bolɔŋ ni ewóŋ egbee nɔ yɛ blohuiaŋ’ lɛ?
7 Shi kɛlɛ, mɛni hewɔ gbalɛ lɛ wie akɛ Yesu ‘bolɔŋ ni ewóŋ egbee nɔ, ni ehaŋ anu egbee yɛ blohuiaŋ’ lɛ? Ejaakɛ ejieee lɛ diɛŋtsɛ ehe yi, tamɔ bɔ ni mɛi pii fee yɛ egbii lɛ amli lɛ. (Mateo 6:5) Beni etsáa kpitiyelɔ ko lɛ, ekɛɛ nuu ní etsá lɛ lɛ akɛ: “Kaakwɛ ní okɛɛ mɔ ko nɔ ko.” (Marko 1:40-44) Yɛ nɔ najiaŋ ní Yesu aaatao gbɛi ní eeeha gbɔmɛi adamɔ ehe saji ní amɛnuɔ yɛ mɛi anaa lɛ anɔ amɛmu saji anaa yɛ ehe lɛ, eetao ní amɛdamɔ odaseyeli ní amɛnaa faŋŋ lɛ nɔ ní amɛ diɛŋtsɛ amɛyoo akɛ lɛ ji Kristo lɛ, Yehowa Tsulɔ ní efɔ lɛ mu lɛ.
8. (a) Yesu kɛ ‘kojomɔ baha jeŋmaji lɛ’ yɛ mɛɛ gbɛ nɔ? (b) Mɛni Yesu abɛbua ní kɔɔ Samarianyo kpakpa lɛ he lɛ tsɔɔ wɔ yɛ jalɛsaneyeli he?
8 Tsulɔ ní Ahala Lɛ lɛ kɛ “kojomɔ aaatee ayaha jeŋmaji lɛ.” Yesu fee enɛ. Kɛfata musuŋtsɔlɛ su ní jalɛsaneyeli ní Nyɔŋmɔ gbeyeishemɔ yɔɔ mli lɛ jieɔ lɛ kpo ní ema nɔ mi lɛ he lɛ, Yesu tsɔɔ hu akɛ esa akɛ ajie enɛ kpo atsɔɔ gbɔmɛi fɛɛ. Be ko lɛ, Yesu kai nuu ko ní le Mla lɛ jogbaŋŋ lɛ akɛ esa akɛ esumɔ Nyɔŋmɔ kɛ enaanyo gbɔmɔ. Kɛkɛ ni nuu lɛ bi Yesu akɛ: “Ni namɔ ji minaanyo?” Ekolɛ eekpa gbɛ akɛ Yesu baaha lɛ hetoo akɛ: “Onaanyo Yudanyo.” Shi Yesu gba lɛ Samarianyo kpakpa lɛ he abɛbua lɛ. Yɛ abɛbua lɛ mli lɛ, Samarianyo ji mɔ ni baye ebua nuu ní ojotswalɔi lɛ tutua lɛ lɛ, yɛ be mli ni Levinyo kɛ osɔfo yeee buaaa lɛ lɛ. Esa akɛ nibilɔ lɛ akpɛlɛ nɔ akɛ yɛ nɛkɛ be nɛɛ mli lɛ, Samarianyo ní abuuu lɛ lɛ ji naanyo lɛ, shi jeee Levinyo loo osɔfo lɛ. Yesu mu ebɛbua lɛ naa kɛ ŋaawoo nɛɛ akɛ: “Bo hu yaa ni oyafee nakai nɔŋŋ.”—Luka 10:25-37; 3 Mose 19:18.
“Esane Naa Ejɔŋ, ni Enijiaŋ Ejeŋ Wui”
9. Bɔ ni anɔkwa jalɛsaneyeli ji lɛ he shishinumɔ ní wɔɔná lɛ baasa wɔhe yɛ mɛɛ gbɛ nɔ?
9 Akɛni Yesu ha bɔ ni anɔkwa jalɛsaneyeli ji lɛ fee faŋŋ hewɔ lɛ, ekaselɔi lɛ kase bɔ ni ajieɔ nɛkɛ su nɛɛ kpo. Esa akɛ wɔ hu wɔfee nakai. Klɛŋklɛŋ kwraa lɛ, ehe miihia ní wɔkpɛlɛ ekpakpa kɛ efɔŋ he tɛi ní Nyɔŋmɔ efolɔ eshwie shi lɛ anɔ, ejaakɛ lɛ eyɔɔ hegbɛ akɛ etsɔɔ nɔ ni ji jalɛsaneyeli kɛ jalɛ nifeemɔ. Yɛ be mli ní wɔbɔɔ mɔdɛŋ ní wɔfee nii yɛ Yehowa gbɛ nɔ lɛ, wɔjeŋba ní ja lɛ baajie nɔ ni anɔkwa jalɛsaneyeli ji lɛ kpo etsɔɔ faŋŋ.—1 Petro 2:12.
10. Mɛni hewɔ wɔhe ní wɔkɛaawo shiɛmɔ kɛ nitsɔɔmɔ nitsumɔ lɛ mli lɛ fata jalɛsaneyeli kpojiemɔ he lɛ?
10 Wɔjieɔ anɔkwa jalɛsaneyeli hu kpo yɛ be mli ní wɔkɛ wɔhe woɔ shiɛmɔ kɛ nitsɔɔmɔ nitsumɔ lɛ mli kɛ ekãa lɛ. Yehowa ejɛ mlihilɛ mli ekɛ lɛ diɛŋtsɛ, kɛ e-Bi lɛ, kɛ eyiŋtoi ahe nilee ní hereɔ mɔ yiwala lɛ eha. (Yohane 17:3) Efeeŋ nɔ ni sa loo eja gbɛ akɛ wɔɔtsĩ nakai nilee lɛ naa wɔha wɔ pɛ wɔhe. Salomo kɛɛ akɛ: “Mɛi ni sa ejurɔfeemɔ lɛ, kaakama amɛ, kɛji efeemɔ yɛ odɛŋ hewalɛ mli lɛ.” (Abɛi 3:27) Belɛ nyɛhaa wɔgbaa nɔ ni wɔle yɛ Nyɔŋmɔ he lɛ wɔtsɔɔa gbɔmɛi fɛɛ, ní amɛ hewolonɔ su, weku, loo maŋ ní amɛjɛ mli lɛ kɔɔɔ he eko.—Bɔfoi lɛ Asaji 10:34, 35.
11. Te esa akɛ wɔkɛ mɛi krokomɛi aye aha tɛŋŋ, yɛ Yesu kasemɔ mli?
11 Kɛfata he lɛ, anɔkwa Kristofonyo kɛ mɛi krokomɛi yeɔ taakɛ Yesu fee lɛ. Mɛi pii kɛ naagbai ní haa mɔ nijiaŋ jeɔ wui kpeɔ, ni musuŋtsɔlɛ kɛ hewalɛwoo he hiaa amɛ. Kristofoi ní ejɔɔ amɛhe nɔ lɛ ateŋ mɛi komɛi po kɛ haomɔ shihilɛi babaoo kpeɔ aahu akɛ ehaa amɛbafeɔ tamɔ gãlãi ní amĩa loo kane mli odonti ní miitso sulii. Ani sɛɛfimɔ ní wɔkɛaaha amɛ lɛ he ehiaaa amɛ? (Luka 22:32; Bɔfoi lɛ Asaji 11:23) Kwɛ miishɛɛ ní eji akɛ wɔɔfee anɔkwa Kristofoi asafo ní bɔɔ mɔdɛŋ akɛ amɛaakase Yesu yɛ jalɛsaneyeli kpojiemɔ mli lɛ fã!
12. Mɛni hewɔ wɔbaanyɛ wɔná hekɛnɔfɔɔ akɛ etsɛŋ ni jalɛsaneyeli baafee nɔ ni yɔɔ diɛŋtsɛ kɛha mɛi fɛɛ lɛ?
12 Ani be ko baaba ní mɛi fɛɛ baaná jalɛsaneyeli? Hɛɛ, be ko baaba. Mɔ ní Yehowa Ehala Lɛ lɛ, “esane naa ejɔŋ, ni enijiaŋ ejeŋ wui kɛyashi beyinɔ ní ekɛ kojomɔ aaama shi yɛ shikpɔŋ lɛ nɔ.” Etsɛŋ ni Maŋtsɛ ní akɛ lɛ etá maŋtsɛsɛi nɔ, ni ji Kristo Yesu ní atée lɛ shi lɛ, ‘baatɔ owele yɛ mɛi ni leee Nyɔŋmɔ lɛ anɔ.’ (2 Tesalonikabii 1:6-9; Kpojiemɔ 16:14-16) Nyɔŋmɔ Maŋtsɛyeli lɛ baaye adesai anɔyeli najiaŋ. Jalɛsaneyeli kɛ jalɛ nifeemɔ baafá kɛteke nɔ. (Abɛi 2:21, 22; Yesaia 11:3-5; Daniel 2:44; 2 Petro 3:13) Yehowa tsuji ni yɔɔ he fɛɛ he—mɛi ní yɔɔ hei ní yɔɔ shɔŋŋ, “ŋshɔkpɔi lɛ” anɔ po lɛ—kɛ gbɛkpamɔ ní mli wa waa miimɛ nakai gbi lɛ.
‘Maŋɔ Lɛ Mafee Jeŋmaji lɛ Ala’
13. Mɛni Yehowa gba efɔ̃ shi yɛ e-Tsulɔ ní Ehala Lɛ lɛ he?
13 Yesaia tee nɔ akɛ: “Bɔ ni Nyɔŋmɔ Yehowa,—mɔ ni bɔ ŋwɛi ní egbele mli, ní elɛɛ shikpɔŋ kɛ emli nibaa nii lɛ amli, ní ekɛ susuma haa enɔ bii lɛ, ní ekɛ mumɔ haa mɛi ní nyiɛɔ nɔ lɛ,—kɛɛ nɛ.” (Yesaia 42:5) Bɔ ni Yehowa, Bɔlɔ lɛ ji diɛŋtsɛ mlitsɔɔmɔ ní mli wa nɛ! Yehowa hewalɛ lɛ he kaimɔ nɛɛ haa shishinumɔ baa ewiemɔ nɛɛ he waa diɛŋtsɛ. Yehowa kɛɛ akɛ: “Mi, Yehowa, mitsɛ́o yɛ jalɛ mli, ni mimɔ onine mli, ni mibaa oyi ni miŋɔo mifee maŋ lɛ kpaŋmɔ kɛ jeŋmaji lɛ ala; koni ogbele shwilafoi ahiŋmɛii, ní ojie mɛi ní awo amɛ tsuŋ kɛ mɛi ní tara duŋ mli lɛ hu kɛjɛ gboklɛfoi atsũ lɛŋ.”—Yesaia 42:6, 7.
14. (a) Mɛni Yehowa Tsulɔ ni ekpɛlɛ enɔ lɛ nine mli ní emɔ lɛ tsɔɔ? (b) Mɛɛ gbɛfaŋnɔ Tsulɔ ní Ahala Lɛ lɛ tsuɔ he nii?
14 Jeŋ muu fɛɛ Bɔlɔ Kpeteŋkpele lɛ, wala Halɔ kɛ Yibaalɔ lɛ diɛŋtsɛ mɔ e-Tsulɔ ní Ehala Lɛ lɛ nine mli ni ewo shi akɛ ekɛ sɛɛfimɔ ní baamɔ shi, ní baahi shi daa baaha. Kwɛ hewalɛwoo ní enɛ ji! Kɛfata he lɛ, Yehowa haa ehiɔ shi shweshweeshwe koni eŋɔ lɛ efee “maŋ lɛ kpaŋmɔ.” Kpaŋmɔ ji yelikɛfuamɔ, gbeekpamɔ, shiwoo ní hiɛdɔɔ yɔɔ mli. Eji mla ní nɔmimaa diɛŋtsɛ yɔɔ he. Hɛɛ, Yehowa eŋɔ e-Tsulɔ lɛ efee “kitakamɔ kɛha gbɔmɛi lɛ.”—An American Translation.
15, 16. Yesu sɔmɔ ákɛ “jeŋmaji lɛ ala” yɛ mɛɛ gbɛ nɔ?
15 Ákɛ “jeŋmaji lɛ ala” lɛ, Tsulɔ ní awo shi yɛ ehe lɛ baagbele “shwilafoi ahiŋmɛii” ni ebaakpɔ̃ “mɛi ní tara duŋ mli lɛ hu.” Yesu fee enɛ. Yesu tsɔ anɔkwale lɛ he odase ní eye lɛ nɔ ewo eŋwɛi Tsɛ lɛ gbɛi lɛ hiɛ nyam. (Yohane 17:4, 6) Ekpá jamɔ mli amalei ahe mama, ni eshiɛ Maŋtsɛyeli lɛ he sanekpakpa lɛ, ni egbele gbɛ kɛha mɛi ni yɔɔ jamɔ mli nyɔŋyeli mli lɛ koni amɛná mumɔŋ heyeli. (Mateo 15:3-9; Luka 4:43; Yohane 18:37) Ebɔ kɔkɔ eshi duŋ mli nitsumɔi lɛ ni ekpá Satan he mama akɛ lɛ ji “malemɔ tsɛ” lɛ kɛ “je nɛŋ lumɔ lɛ.”—Yohane 3:19-21; 8:44; 16:11.
16 Yesu kɛɛ akɛ: “Mi ji je lɛ mli la lɛ.” (Yohane 8:12) Ema nɔ mi yɛ gbɛ ní sa kadimɔ waa nɔ akɛ nakai eji beni ekɛ ewala ákɛ adesa ní eye emuu lɛ ha ákɛ kpɔmɔ nɔ lɛ. Enɛ hewɔ lɛ, Yesu gbele gbɛ kɛha mɛi ní jieɔ hemɔkɛyeli kpo lɛ koni amɛná eshaifaa, kɛ amɛkɛ Nyɔŋmɔ teŋ wekukpaa ní ekpɛlɛɔ nɔ, kɛ naanɔ wala he gbɛkpamɔ. (Mateo 20:28; Yohane 3:16) Yesu tsɔ emuuyeli ní ehiɛ mli yɛ eshihilɛ be fɛɛ mli lɛ nɔ efĩ maŋtsɛ ní Yehowa ji lɛ sɛɛ ni eha Abonsam fee amalelɔ. Yesu ji mɔ ni gbeleɔ shwilafoi ahiŋmɛii, kɛ mɛi ní awo amɛ tsũŋ yɛ mumɔŋ duŋ shihilɛ mli lɛ akpɔ̃lɔ lɛɛlɛŋ.
17. Wɔsɔmɔɔ akɛ la hiɛlɔi yɛ mɛɛ gbɛ̀i anɔ?
17 Yesu kɛɛ ekaselɔi lɛ yɛ Gɔŋ nɔ Shiɛmɔ lɛ mli akɛ: “Nyɛ ji je lɛŋ la lɛ.” (Mateo 5:14) Ani wɔ hu wɔjeee la hiɛlɔi? Wɔná hegbɛ akɛ wɔɔtsɔɔ mɛi krokomɛi gbɛ kɛba Yehowa, mɔ ni ji anɔkwa sɛɛyoomɔ Jɛɛhe lɛ ŋɔɔ kɛtsɔ wɔshihilɛ gbɛ kɛ wɔshiɛmɔ nitsumɔ lɛ nɔ. Wɔhaa aleɔ Yehowa gbɛi lɛ, ni wɔfiɔ E-maŋtsɛyeli lɛ sɛɛ, ni wɔshiɛɔ E-Maŋtsɛyeli lɛ wɔtsɔɔ ákɛ adesai ahiɛnɔkamɔ koome pɛ, ni wɔkɛ nakai feemɔ kaseɔ Yesu. Kɛfata he lɛ, ákɛ la hiɛlɔi lɛ, wɔkpáa jamɔ mli amalei ahe mama, ni wɔbɔɔ kɔkɔ yɛ duŋ mli nitsumɔi ní he tseee lɛ ahe, ni wɔkpáa Satan, mɔ fɔŋ lɛ he mama.—Bɔfoi lɛ Asaji 1:8; 1 Yohane 5:19.
“Nyɛlaa Lala Hee Nyɛhaa Yehowa”
18. Mɛni Yehowa haa ewebii leɔ?
18 Agbɛnɛ Yehowa gbala ejwɛŋmɔ kɛtee ewebii lɛ anɔ, ni ekɛɛ: “Mi ji Yehowa, migbɛi ji no, ni mikɛ minunyam lɛ haŋ mɔ kroko, ni mikɛ miyijiemɔ lɛ hu haŋ amagai! Naa, tsutsu nii lɛ eba mli, ni nibii heei mijajeɔ nɛɛ, miiha nyɛnu he dani epue.” (Yesaia 42:8, 9) Jeee nyɔŋmɔi ní he bɛ sɛɛnamɔ lɛ eko gba gbalɛ ní kɔɔ “mitsulɔ” lɛ he lɛ, shi moŋ anɔkwa Nyɔŋmɔ ní hiɛ kã lɛ diɛŋtsɛ gba. Bɔ fɛɛ bɔ ní fee lɛ ebaaba mli anɔkwale, ni eba mli nakai hu. Yehowa Nyɔŋmɔ ji nibii heei a-Kpojielɔ lɛɛlɛŋ, ni ehaa ewebii nuɔ he dani amɛbaa mli. Te esa akɛ wɔfee wɔnii yɛ he wɔha tɛŋŋ?
19, 20. (a) Mɛɛ lala ko esa akɛ alá? (b) Namɛi láa Yehowa yijiemɔ lala lɛ ŋmɛnɛ?
19 Yesaia ŋma akɛ: “Nyɛláa lala hee nyɛhaa Yehowa, nyɛláa nyɛjiea eyi kɛjɛa shikpɔŋ lɛ naagbeehe lɛ! Nyɛ mɛi ní nyɛnyiɛɔ ŋshɔ hiɛ, kɛ nibii fɛɛ ní yɔɔ emli lɛ, ŋshɔkpɔi lɛ, kɛ mɛi ní hiɔ nɔ lɛ! Nyɛhaa ŋã kɛ enɔ maji lɛ aholea amɛgbeei anɔ, kɛ akrowai ní Kedar yɔɔ mli lɛ; nyɛhaa mɛi ní hiɔ tɛsaai amli lɛ aláa nyamɔ lala, nyɛhaa amɛbɔ oshe kɛjɛa gɔji lɛ ayiteaŋ! Amɛkɛ anunyam aha Yehowa, ní amɛjaje eyijiemɔ lɛ yɛ ŋshɔkpɔi lɛ anɔ!”—Yesaia 42:10-12.
20 Awoɔ mɛi ni yɔɔ maŋtiasei, akrowai ní yɔɔ ŋã nɔ, ŋshɔkpɔi, kɛ “Kedar,” loo kui ní ebɔ nsarai yɛ ŋã nɔ hei srɔtoi—ni ji gbɔmɛi ní yɔɔ he fɛɛ he lɛ—hewalɛ ní amɛlá yijiemɔ lala amɛha Yehowa. Kwɛ bɔ ni eyɔɔ miishɛɛ ha akɛ gbɔmɛi akpekpei abɔ ehere gbalɛ mli tsɛmɔ nɛɛ nɔ yɛ wɔgbii nɛɛ amli! Amɛkpɛlɛ Nyɔŋmɔ Wiemɔ lɛ mli anɔkwale lɛ nɔ, ni amɛkpɛlɛ Yehowa nɔ akɛ amɛ-Nyɔŋmɔ. Yehowa webii miilá lala hee nɛɛ—ni amɛkɛ anunyam miiha Yehowa—yɛ shikpɔji ní fa fe 230 nɔ. Kwɛ miishɛɛ ni eji akɛ aalá lala nɛɛ kɛ gbeewalɛ yɛ kusumii, kɛ wiemɔi, kɛ hewolonɔ sui srɔtoi amli!
21. Mɛni hewɔ Nyɔŋmɔ webii ahenyɛlɔi lɛ yeŋ omanye yɛ Yehowa yijiemɔ lala lɛ naatsii mli lɛ?
21 Ani shitee-kɛ-wolɔi baanyɛ ate shi amɛwo Nyɔŋmɔ ní amɛha akpa yijiemɔ lala nɛɛ lamɔ? Amɛnyɛŋ kɔkɔɔkɔ! “Yehowa aaafa tamɔ kãkãlɔ ko, eeetée hiɛdɔɔ shi tamɔ tabilɔ; eeebolɔ ni eeebɔ oshe; ekɛ ehenyɛlɔi lɛ aaaye dɛ̃ŋdɛ̃ŋ!” (Yesaia 42:13) Mɛɛ hewalɛ baanyɛ ate shi awo Yehowa? Aaafee afii 3,500 ní eho nɛ lɛ, gbalɔ Mose kɛ Israelbii lɛ kɛ gbeewalɛ lá akɛ: “Yehowa lɛ, tawulɔ ni; Yehowa ji egbɛi. Farao shwiilii lɛ kɛ eta lɛ eloo ewo ŋshɔŋ; eshwiiliiatsɛmɛi ní ahala lɛ hu ashiu amɛ yɛ Ŋshɔ tsuru lɛŋ.” (2 Mose 15:3, 4) Yehowa ye asraafoi ata ní he wa fe fɛɛ yɛ nakai beaŋ lɛ nɔ kunim. Kɛ́ Yehowa je kpo ákɛ tawulɔ ní he wa lɛ, Nyɔŋmɔ webii ahenyɛlɔ ko kwraa bɛ ní baaye omanye.
“Mibu Minaa Aahu”
22, 23. Mɛni hewɔ Yehowa ‘bu enaa aahu’ nakai lɛ?
22 Kɛ́ Yehowa miitsu kojomɔ he nii eeshi ehenyɛlɔi po lɛ, ekwɛɛɛ hiɛaŋ ni eyeɔ jalɛ sane hu. Ekɛɛ akɛ: “Mibu minaa aahu, mifee dioo, mimia mihiɛ: shi mabolɔ tamɔ yoo ni kɔmɔɔ, makɛ̃mɔ ni mamu hɛɛhɛɛ. Makpata gɔji kɛ gɔŋkpɔi ahiɛ, ni maha amɛnɔ jwɛi fɛɛ agbi, ni maha faai atsɔmɔ faakpɔi, ni maha kpaakpoi hu amii!”—Yesaia 42:14, 15.
23 Dani Yehowa baatsu kojomɔ nifeemɔ ko he nii lɛ, eŋmɛɔ gbɛ ní be aho koni efɔŋfeelɔi lɛ anyɛ aná hegbɛ ní amɛkɛku amɛsɛɛ kɛjɛ amɛgbɛ̀i fɔji lɛ anɔ. (Yeremia 18:7-10; 2 Petro 3:9) Susumɔ Babilonbii ní fee Yerusalem amaŋfɔ yɛ afi 607 D.Ŋ.B., be mli ní amɛji jeŋ hewalɛ ní yeɔ nɔ lɛ sane lɛ he okwɛ. Yehowa ŋmɛ enɛ gbɛ koni ekɛgbala Israelbii lɛ atoi yɛ anɔkwa ní amɛyeee lɛ hewɔ. Shi kɛlɛ, Babilonbii lɛ yɔseee gbɛfaŋnɔ ní amɛtsuɔ he nii lɛ. Amɛkɛ Nyɔŋmɔ webii lɛ ye kɛ yiwalɛ ní mli wa kwraa fe bɔ ni Nyɔŋmɔ kojomɔ biɔ ní amɛfee. (Yesaia 47:6, 7; Zakaria 1:15) Kwɛ bɔ ni ebaadɔ anɔkwa Nyɔŋmɔ lɛ akɛ eeena ewebii lɛ ní amɛmiina amanehulu! Shi etsĩ ehe naa ní efeee he nɔ ko kɛyashi be ní eto lɛ. Kɛkɛ ni ekɔ̃mɔ—tamɔ yoo ní miifɔ́—ni ekpɔ̃ ewebii ní ekɛ amɛ efee kpaŋmɔ lɛ ni ekɛ amɛ ba ákɛ maŋ ní yɔɔ heyeli. Kɛha enɛ feemɔ lɛ, eha Babilon gbĩ kwraa ni ekpata maŋ lɛ kɛ ehefãmɔ nii lɛ ahiɛ yɛ afi 539 D.Ŋ.B.
24. Mɛɛ gbɛkpamɔ Yehowa gbele naa kɛha ewebii Israel?
24 Kwɛ bɔ ni Nyɔŋmɔ webii baaná miishɛɛ amɛha, beni yɛ afii pii ní amɛkɛhi nomŋɔɔ mli lɛ sɛɛ lɛ, yɛ naagbee lɛ amɛmaŋ gbɛ bagbele kɛha amɛ ekoŋŋ lɛ! (2 Kronika 36:22, 23) Amɛmii baashɛ amɛhe waa akɛ amɛaaná Yehowa shiwoo lɛ mlibaa mli niiashikpamɔ, akɛ: “Mikɛ shwilafoi aaatsɔ gbɛ ko ni amɛleee nɔ, ni maha amɛnyiɛ tempɔŋ ko ni amɛleee nɔ; maŋɔ duŋ mafee la yɛ amɛhiɛ, ni he ni yɔɔ dokoidokoi lɛ maha afee tɛrɛnɛɛ. Nii nɛɛ mafee maha amɛ ni miŋmɛŋ he.”—Yesaia 42:16.
25. (a) Yehowa webii ní yɔɔ ŋmɛnɛ lɛ baanyɛ aná nɔmimaa yɛ mɛni he? (b) Mɛni esa akɛ efee wɔfaishitswaa?
25 Te wiemɔi nɛɛ kɔɔ wɔhe tɛŋŋ ŋmɛnɛ? Ojogbaŋŋ, be kakadaŋŋ nɛ—afii ohai abɔ—ní Yehowa eŋmɛ jeŋmaji lɛ agbɛ ní amɛfee amɛnii bɔ ni amɛsumɔɔ. Shi kɛlɛ, be ní eto ní ekɛbaatsu saji ahe nii kwraa lɛ ebɛŋkɛ. Etée gbɔmɛi akuu ko shi yɛ ŋmɛnɛŋmɛnɛ beaŋ koni amɛye egbɛi lɛ he odase. Akɛni ejie shitee-kɛ-woo fɛɛ ní akɛshiɔ amɛ lɛ hewɔ lɛ, eha gbɛ lɛ efee tɛrɛnɛɛ eha amɛ koni amɛjá lɛ “yɛ mumɔ kɛ anɔkwale mli.” (Yohane 4:24) Ewo shi akɛ: “Miŋmɛŋ he,” ni eye ewiemɔ lɛ nɔ. Shi mɛi ní yaa nɔ amɛjáa apasa nyɔŋmɔi lɛ hu? Yehowa kɛɛ akɛ: “Shi mɛi ní kɛ amɛhiɛ fɔ̃ɔ amagai anɔ, ní amɛkɛɔ amagai ní ashwie akɛ: Nyɛji wɔnyɔŋmɔi lɛ! amɛaaku amɛsɛɛ, ni amɛhiɛ aaagboi.” (Yesaia 42:17) Kwɛ bɔ ni ehe hiaa ní wɔya nɔ wɔye Yehowa anɔkwa, taakɛ e-Mɔ ní Ehala Lɛ lɛ fee lɛ!
‘Tsulɔ ní Emu Toi ní Eshwila’
26, 27. Israel fee ehe ‘tsulɔ toimulɔ kɛ shwilafo’ yɛ mɛɛ gbɛ nɔ, ni mɛni jɛ mli ba?
26 Nyɔŋmɔ Tsulɔ ní Ehala, ni ji Yesu Kristo tee nɔ eye anɔkwa aahu kɛtee gbele mli. Shi, Yehowa webii ni ji Israel fee ehe tsulɔ ní yeee anɔkwa, toimulɔ kɛ shwilafo yɛ mumɔŋ shishinumɔ naa. Yehowa kɛɛ, beni ekɛ amɛ wieɔ lɛ akɛ: “Nyɛ toimulɔi, nyɛboa toi; nyɛ shwilafoi, nyɛkwɛa ní nyɛnaa nii! Namɔ eshwila tamɔ mitsulɔ lɛ? Namɔ emu toi tamɔ mibɔfo ní mitsu lɛ? Namɔ eshwila tamɔ mɔ ni kɛ mi bɔ naanyo lɛ? Namɔ eshwila tamɔ Yehowa tsulɔ lɛ? Ona nibii babaoo; shi oyooo; etoii anaa kã, shi enuuu nii. Esa Yehowa hiɛ yɛ ejalɛ lɛ hewɔ, akɛ eeeha mla lɛ ada ni eeewo ehiɛ nyam.”—Yesaia 42:18-21.
27 Kwɛ awerɛho ní eji akɛ Israel efeee nɔ ni hi kwraa! Emli bii lɛ gbá afã kɛtee jeŋmaji lɛ adaimonioi anyɔŋmɔi lɛ ajamɔ mli shii abɔ. Yehowa tee nɔ etsu etsuji kɛtee amɛŋɔɔ aahu, shi ewebii lɛ booo amɛ toi. (2 Kronika 36:14-16) Yesaia gba nibii ní jɛ mli ba lɛ efɔ̃ shi akɛ: “Lɛ lɛ, maŋ ní atswa lɛ ojo ní ahà lɛ ni; adũ amɛ fɛɛ yɛ bui amli, aŋɔ amɛ atee gboklɛfoi atsuiaŋ; amɔmɔ amɛ, ni jielɔ ko bɛ; ahà amɛ, ni mɔ ko bɛ ní kɛɔ akɛ: Okɛku sɛɛ oha! Nyɛteŋ namɔ aaabo enɛ toi? ní eka etoi ní enu nii ni baaba lɛ? Namɔ kɛ Yakob ha ní ahà lɛ, ni ekɛ Israel ha ojotswalɔi? Ani jeee Yehowa ní wɔfee esha wɔshi lɛ lɛ ni, mɔ ni amɛkpɛlɛɛɛ egbɛ̀i lɛ anɔ nyiɛmɔ, ní amɛbooo emla lɛ toi lɛ? No hewɔ lɛ efɔse mlifu ní naa wa kɛ ta ní mli wa hu eshwie amɛnɔ; ni eshɛre la ewo amɛhe kɛkpe, shi amɛleee; eshã amɛ, shi amɛkɛwooo amɛtsui mli.”—Yesaia 42:22-25.
28. (a) Mɛni wɔbaanyɛ wɔkase kɛjɛ Yuda maŋbii lɛ anɔkwɛmɔnɔ lɛ mli? (b) Mɛɛ gbɛ nɔ wɔɔtsɔ wɔtao Yehowa nɔkpɛlɛmɔ?
28 Akɛni maŋbii lɛ yeee anɔkwa hewɔ lɛ, Yehowa ŋmɛ gbɛ ni atswa Yuda shikpɔŋ lɛ ojo ni ahà enɔ nii fɛɛ yɛ afi 607 D.Ŋ.B. Babilonbii lɛ kɛ la shã Yehowa sɔlemɔwe lɛ, ni amɛfee Yerusalem amaŋfɔ, ni amɛŋɔ Yudafoi lɛ nom kɛtee. (2 Kronika 36:17-21) Eba akɛ wɔkɛ kɔkɔbɔɔ nɔkwɛmɔnɔ nɛɛ aaato wɔtsuii amli, ní wɔkatswa Yehowa gbɛtsɔɔmɔi wɔfɔ̃ afã loo wɔku wɔhiɛ wɔfɔ̃ e-Wiemɔ ní aŋma lɛ nɔ kɔkɔɔkɔ. Shi moŋ, eba akɛ wɔɔtao Yehowa nɔkpɛlɛmɔ kɛtsɔ Kristo Yesu, ni ji Tsulɔ ní Yehowa diɛŋtsɛ kpɛlɛɔ enɔ lɛ kasemɔ nɔ. Taakɛ Yesu fee lɛ, eba akɛ wɔɔha ale anɔkwa jalɛsaneyeli kɛtsɔ wɔwiemɔ kɛ nifeemɔ nɔ. Kɛ́ wɔfee nakai lɛ, wɔbaaya nɔ wɔhi Yehowa webii ateŋ, ni wɔbaasɔmɔ akɛ la hiɛlɔi ní jieɔ anɔkwa Nyɔŋmɔ lɛ yi ni wɔkɛ anunyam haa lɛ.
[Mfonirii ni yɔɔ baafa 33]
Anɔkwa jalɛsaneyeli jieɔ musuŋtsɔlɛ kɛ mɔbɔnalɛ kpo
[Mfoniri ni yɔɔ baafa 34]
Yesu tsɔɔ yɛ Samarianyo naanyo kpakpa lɛ he abɛbua lɛ mli akɛ anɔkwa jalɛsaneyeli saa gbɔmɛi fɛɛ ahe
[Mfonirii ni yɔɔ baafa 36]
Wɔjieɔ jalɛsaneyeli ní Nyɔŋmɔ gbeyeishemɔ yɔɔ mli kpo kɛtsɔ hewalɛwoo kɛ mlihilɛ kpojiemɔ nɔ
[Mfonirii ni yɔɔ baafa 39]
Wɔjieɔ jalɛsaneyeli ní Nyɔŋmɔ gbeyeishemɔ yɔɔ mli kpo kɛtsɔɔ wɔshiɛmɔ nitsumɔ lɛ nɔ
[Mfoniri ni yɔɔ baafa 40]
Akɛ Tsulɔ ní akpɛlɛ enɔ lɛ ha akɛ “jeŋmaji lɛ ala”