Yitso Ejwɛ
“Nyɛ Ji Midasefoi”!
1. Te Yehowa kɛ gbalɛ tsuɔ nii ehaa tɛŋŋ, ni te esa akɛ ewebii afee amɛnii yɛ gbalɛi ní eba mli lɛ ahe amɛha tɛŋŋ?
NYƐMƆ ní ayɔɔ ní akɛgbaa nɔ ni baaba wɔsɛɛ lɛ ji nɔ kome ní haa esoroɔ anɔkwa Nyɔŋmɔ lɛ kɛjɛɔ apasa nyɔŋmɔi fɛɛ ahe. Shi kɛ́ Yehowa gba gbalɛ ko lɛ, eyɛ nibii babaoo yɛ ejwɛŋmɔ mli fe Nyɔŋmɔ ní eji lɛ he odaseyeli kɛkɛ. Taakɛ afee he nɔkwɛmɔnɔ yɛ Yesaia yitso 43 lɛ, Yehowa haa gbalɛ feɔ Nyɔŋmɔ ní eji kɛ suɔmɔ ní eyɔɔ kɛha ewebii ní ekɛ amɛ efee kpaŋmɔ lɛ fɛɛ he odaseyeli. Nakai nɔŋŋ esaaa akɛ ewebii nɛɛ yooɔ gbalɛ ní eba mli lɛ faŋŋ ní kɛlɛ amɛfeɔ dioo; shi moŋ esa akɛ amɛye nɔ ni amɛna lɛ he odase. Hɛɛ, esa akɛ amɛtsɔmɔ Yehowa odasefoi!
2. (a) Mɛni ji Israel mumɔŋ shihilɛ yɛ Yesaia be lɛ mli? (b) Yehowa gbele ewebii lɛ ahiŋmɛii yɛ mɛɛ gbɛ nɔ?
2 Dɔlɛ sane ji akɛ, yɛ Yesaia gbii lɛ amli lɛ, no mli lɛ Israel shihilɛ yɛ mɔbɔ aahu akɛ Yehowa bu gbɔmɛi lɛ akɛ mumɔŋ kpajelɔi. “Okɛ maŋ shwilafo ní yɔɔ hiŋmɛii lɛ aba, kɛ toimulɔi hu ní yɔɔ toii lɛ!” (Yesaia 43:8) Te gbɔmɛi ní eshwila ní amɛmu toi yɛ mumɔŋ lɛ aaafee tɛŋŋ amɛsɔmɔ Yehowa akɛ edasefoi ní yɔɔ wala mli hu? Gbɛ koome pɛ yɔɔ. Esa akɛ agbele amɛhiŋmɛii kɛ amɛtoii yɛ naakpɛɛ gbɛ nɔ. Ni eka shi faŋŋ akɛ Yehowa gbele hu! Yɛ mɛɛ gbɛ nɔ? Klɛŋklɛŋ lɛ, Yehowa kɛ toigbalamɔ ní mli wa ba amɛnɔ—kooyigbɛ maŋtsɛyeli ni ji Israel maŋ lɛ mli bii lɛ tee nomŋɔɔ mli yɛ afi 740 D.Ŋ.B., ni Yuda maŋ lɛ mli bii lɛ hu tee yɛ afi 607 D.Ŋ.B. No sɛɛ lɛ, Yehowa kɛ hewalɛ fee nii yɛ ewebii lɛ agbɛfaŋ ni ekpɔ̃ amɛ ni ekɛ shwɛɛnii ní eshwa amɛhe, ní ewo amɛ hewalɛ hee lɛ ku amɛsɛɛ kɛba amɛmaŋ shikpɔŋ nɔ yɛ afi 537 D.Ŋ.B. Yɛ anɔkwale mli lɛ, Yehowa yɛ nɔmimaa waa akɛ anyɛŋ afite eyiŋtoo ní kɔɔ enɛ he, aahu akɛ ewie Israel kpɔmɔ lɛ he aaafee afii 200 kɛtsɔ hiɛ, tamɔ nɔ ni amɛkpɔmɔ lɛ eba mli momo.
3. Mɛɛ hewalɛwoo Yehowa kɛha wɔsɛɛ be mli nomii lɛ?
3 “Bɔ ni Yehowa ní bɔ bo, Yakob, ní eshɔ̃ bo, Israel, lɛ kɛɛ nɛ: Kaashe gbeyei, ejaakɛ mikpɔ̃o; mitsɛ́o kɛ ogbɛi; minɔ̃ jio! Ejaakɛ kɛji oofo nu lɛ, mikɛo yɛ, ni kɛji oofo faai hu, amɛsuŋo. Kɛji onyiɛ la mli lɛ, oshãŋ, ni lalilɛi hu eshãŋo. Shi mi, Yehowa, mi ji o-Nyɔŋmɔ lɛ, Israel Mɔ krɔŋkrɔŋ, oyiwalaherelɔ lɛ!”—Yesaia 43:1-3a.
4. Yehowa ji Israel Bɔlɔ yɛ mɛɛ gbɛ nɔ, ni mɛɛ nɔmimaa ekɛha ewebii lɛ yɛ amɛsɛɛkuu kɛmiiba amɛmaŋ shikpɔŋ nɔ ekoŋŋ lɛ gbɛfaŋ?
4 Yehowa yɛ Israel he miishɛɛ krɛdɛɛ ko ejaakɛ enɔ̃ ji maŋ lɛ. Lɛ diɛŋtsɛ efee amɛ emaŋ yɛ kpaŋmɔ ní ekɛ Abraham fee lɛ mlibaa mli. (1 Mose 12:1-3) Enɛ hewɔ lɛ, Lala 100:3 lɛ kɛɔ akɛ: “Nyɛnáa nyɛlea akɛ Yehowa lɛ, lɛ ji Nyɔŋmɔ! Lɛ efee wɔ, ni lɛ enii ji wɔ, emaŋ kɛ elɛɛhe lɛ tooi ji wɔ.” Ákɛ Israel Bɔlɔ kɛ e-Kpɔlɔ lɛ, Yehowa kɛ ewebii lɛ baaku amɛsɛɛ kɛba amɛmaŋ shikpɔŋ nɔ shweshweeshwe. Gbɛtsii nii, tamɔ nui, faai ní eyi kɛteke nɔ, kɛ shia ŋãi ní nɔ dɔɔ waa etsĩŋ amɛnaa loo eyeŋ amɛ awui ko, tamɔ bɔ ni nibii ní tamɔ nakai etsĩii amɛblematsɛmɛi lɛ anaa beni amɛnyiɛ gbɛ nɔ kɛyaa Shiwoo Shikpɔŋ lɛ nɔ afii akpe ní etsɔ hiɛ lɛ.
5. (a) Yehowa wiemɔi lɛ shɛjeɔ mumɔŋ Israel mii yɛ mɛɛ gbɛ nɔ? (b) Namɛi ji mumɔŋ Israel hefatalɔi lɛ, ni namɛi akɛfee amɛhe mfoniri?
5 Yehowa wiemɔi lɛ kɛ miishɛjemɔ haa ŋmɛnɛŋmɛnɛ beaŋ shwɛɛnii ni ji mumɔŋ Israel, ní akɛ mumɔ efɔ́ emli bii lɛ, ní amɛji “bɔɔ nɔ hee” lɛ. (2 Korintobii 5:17) Akɛni amɛkɛ ekãa ebadamɔ ‘nui’ ni ji adesai lɛ ahiɛ hewɔ lɛ, amɛná Nyɔŋmɔ hebuu ní suɔmɔ yɔɔ mli lɛ mli ŋɔɔmɔ kɛtsɔ mfonirifeemɔŋ nu afuai amli. La ní jɛ amɛhenyɛlɔi lɛ aŋɔɔ lɛ yeko amɛ awui ko, shi moŋ, akɛtsu nii ni akɛtsuu amɛhe. (Zakaria 13:9; Kpojiemɔ 12:15-17) Yehowa ekpã hebuu kɛ kwɛmɔ mli eha “asafo babaoo” ni ji “tooi krokomɛi” lɛ ní ebafata Nyɔŋmɔ mumɔŋ maŋ lɛ he lɛ hu. (Kpojiemɔ 7:9; Yohane 10:16) Akɛ “futufutu gbɔmɛi babaoo” ní fata Israelbii lɛ ahe yɛ Mizraim Shimɔ lɛ mli, kɛ mɛi hu ní jeee Yudafoi ní kɛ nomii ní aha amɛye amɛhe lɛ ku amɛsɛɛ kɛjɛ Babilon lɛ fee mɛnɛɛmɛi ahe mfoniri.—2 Mose 12:38; Ezra 2:1, 43, 55, 58.
6. Mɛɛ gbɛ nɔ Yehowa jie ehe kpo yɛ ákɛ Nyɔŋmɔ ni yeɔ jalɛ sane yɛ kpɔmɔ ní ekɛha (a) heloonaa Israel lɛ mli? (b) mumɔŋ Israel lɛ mli?
6 Yehowa wo shi akɛ ebaakpɔ̃ ewebii lɛ kɛbaajɛ Babilon kɛtsɔ Media kɛ Persia asraafoi lɛ anɔ. (Yesaia 13:17-19; 21:2, 9; 44:28; Daniel 5:28) Ákɛ Nyɔŋmɔ ní yeɔ jalɛ sane lɛ, Yehowa kɛ kpɔmɔ nii ko ni sa baawo ‘enitsulɔi’ ni ji Medo-Persiabii lɛ nyɔmɔ yɛ Israel najiaŋ. “Miŋɔ Mizraim miha akɛ okpɔmɔ nii, kɛ Kush kɛ Seba hu yɛ onajiaŋ. Akɛni ojara wa yɛ mihiɛ ni ohiɛ eba nyam, ní mi lɛ, misumɔɔ osane hewɔ lɛ, mikɛ gbɔmɛi aaaha yɛ onajiaŋ, kɛ majimaji hu yɛ owala hewɔ.” (Yesaia 43:3b, 4) Yinɔsane maa nɔ mi akɛ Persia Maŋtsɛyeli lɛ ye Mizraim, Kush, kɛ Seba ní bɛŋkɛ jɛmɛ lɛ nɔ kunim, taakɛ Nyɔŋmɔ gba efɔ̃ shi lɛ pɛpɛɛpɛ. (Abɛi 21:18) Yɛ afi 1919 lɛ, Yehowa tsɔ Yesu Kristo nɔ ejie mumɔŋ Israel shwɛɛnii lɛ kɛjɛ nomŋɔɔ mli yɛ gbɛ ní tamɔ nakai nɔŋŋ nɔ. Shi kɛlɛ, nyɔmɔwoo ko he ehiaaa Yesu yɛ enitsumɔi lɛ ahewɔ. Jeee nɔyelɔ wɔŋjalɔ ji lɛ. Ni lɛ diɛŋtsɛ emumɔŋ nyɛmimɛi ji mɛi ní ekpɔ̃ lɛ. Kɛfata he lɛ, yɛ afi 1914 lɛ, no mli lɛ Yehowa eŋɔ ‘jeŋmaji lɛ eha lɛ ákɛ egboshinii kɛ shikpɔŋ lɛ naagbeehei lɛ hu ákɛ egbɛfaŋnɔ’ momo.—Lala 2:8.
7. Te Yehowa nuɔ he yɛ ewebii ní hi shi yɛ blema kɛ mɛi ni yɔɔ ŋmɛnɛŋmɛnɛ beaŋ fɛɛ lɛ ahe ehaa tɛŋŋ?
7 Kadimɔ bɔ ni Yehowa jie henumɔi ní mlihilɛ yɔɔ mli, ní eyɔɔ kɛha nomii ní akpɔ̃ amɛ lɛ kpo faŋŋ lɛ. Ekɛɛ amɛ akɛ ‘amɛjara wa’ ni ‘amɛhiɛ yɛ nyam’ kɛha lɛ, ni ‘esumɔɔ’ amɛsane hu. (Yeremia 31:3) Enuɔ hu nakai nɔŋŋ—kɛ babaoo po—yɛ etsuji anɔkwafoi lɛ ahe ŋmɛnɛ. Akɛ Kristofoi ní afɔ amɛ mu lɛ eba amɛkɛ Nyɔŋmɔ teŋ wekukpaa mli, jeee kɛtsɔ fɔmɔ nɔ, shi moŋ kɛtsɔ Nyɔŋmɔ mumɔ krɔŋkrɔŋ lɛ nitsumɔ nɔ yɛ amɛhenɔjɔɔmɔ akɛ aŋkroaŋkro kɛha amɛ-Bɔlɔ lɛ sɛɛ. Yehowa egbala mɛnɛɛmɛi kɛba e-Bi lɛ kɛ lɛ diɛŋtsɛ eŋɔɔ ni eŋmala emlai kɛ eshishitoo mlai lɛ yɛ amɛtsuii ní kpɛlɛɔ sane nɔ lɛ anɔ.—Yeremia 31:31-34; Yohane 6:44.
8. Mɛɛ nɔmimaa wiemɔ Yehowa kɛ nomii lɛ wie, ni te amɛbaanu amɛkpɔmɔ lɛ he amɛha tɛŋŋ?
8 Beni Yehowa kɛ nɔmimaa haa nomii lɛ lolo lɛ, ekɛfata he akɛ: “Kaashe gbeyei, shi mi, mikɛo yɔɔ; maŋɔ oseshi kɛaajɛ boka kɛba, ni mabua onaa kɛaajɛ anaigbɛ; makɛɛ kooyigbɛ akɛ: Jiemɔ oha! kɛ wuoyigbɛ hu akɛ: Kaatsi naa! Ŋɔɔ mibihii lɛ kɛjɛ shɔŋŋ kɛba, kɛ mibiyei lɛ hu kɛjɛ shikpɔŋ lɛ naagbeehe lɛ; mɔ fɛɛ mɔ ní aŋɔ migbɛi awo lɛ, mɔ ni mibɔ lɛ miha minunyam, mɔ ni mishɔ̃ lɛ ní mifee lɛ lɛ!” (Yesaia 43:5-7) Shikpɔŋ lɛ nɔ hei ní yɔɔ shɔŋŋ fe fɛɛ lɛ po efeŋ hei ní jɛkɛ ní Yehowa nyɛŋ ashɛ jɛmɛ kɛji be shɛ ní esa akɛ ekpɔ̃ ebihii kɛ ebiyei lɛ, ní ekɛ amɛ aku sɛɛ kɛba amɛmaŋ shikpɔŋ nɔ ekoŋŋ lɛ. (Yeremia 30:10, 11) Ŋwanejee ko bɛ he akɛ, kpɔmɔ nɛɛ baaha jiemɔ ní ajie maŋ lɛ kɛjɛ Mizraim be ko ní eho lɛ afee nɔ ko bibioo kwraa yɛ amɛhiɛ.—Yeremia 16:14, 15.
9. Yehowa kɛ ekpɔmɔ nifeemɔi lɛ tsáa egbɛi lɛ nɔ yɛ mɛɛ gbɛ̀i enyɔ nɔ?
9 Yehowa kɛ kaimɔ ní ekai ewebii lɛ akɛ akɛ egbɛi tsɛɔ amɛ lɛ ma shi ní ewo akɛ ebaakpɔ̃ Israel lɛ nɔ mi. (Yesaia 54:5, 6) Kɛfata he lɛ, Yehowa kɛ egbɛi kpɛtɛɔ jiemɔ he shiwoi ní ekɛha lɛ he. Yɛ nakai feemɔ mli lɛ, emaa nɔ mi akɛ kɛ́ egbalɛ wiemɔ lɛ ba mli lɛ, akɛ ehe anunyam lɛ baaha lɛ. Akɛ woo ní esa akɛ akɛha Nyɔŋmɔ hiɛkalɔ koome pɛ lɛ haŋ Babilon nɔ kunimyelɔ lɛ po.
Aaka Nyɔŋmɔi lɛ Aakwɛ
10. Mɛɛ mpoatswaa Yehowa kɛfɔ̃ jeŋmaji lɛ kɛ amɛnyɔŋmɔi lɛ ahiɛ?
10 Agbɛnɛ Yehowa kɛ shiwoo ní ekɛha akɛ ebaakpɔ̃ Israel lɛ fee nɔdaamɔ nɔ kɛha sane ko ní abaakojo jeŋmaji lɛ anyɔŋmɔi lɛ yɛ he yɛ jeŋ muu fɛɛ saneyelihe ko. Wɔkaneɔ akɛ: “Ha jeŋmaji lɛ fɛɛ naa abakpe shi, ní majimaji lɛ hu abua amɛhe naa. [Amɛnyɔŋmɔi lɛ ateŋ] namɔ aaanyɛ enɛ ajaje, ní eeeha wɔnu tsutsu saji lɛ? [Amɛnyɔŋmɔi lɛ aha] amɛdasefoi lɛ aba, ní abu amɛ bem, ní amɛnu, ní amɛkɛɛ akɛ: Eyɛ mli!” (Yesaia 43:9) Yehowa kɛ mpoatswaa ko ní mli wa waa fɔ̃ je lɛŋ jeŋmaji lɛ ahiɛ. Nɔ ni ekɛɔ lɛ shishi ji akɛ: ‘Nyɛhaa nyɛnyɔŋmɔi lɛ agbaa nɔ ni baaba wɔsɛɛ ní eba mli pɛpɛɛpɛ hu ní amɛkɛtsɔɔ akɛ nyɔŋmɔi ji amɛ.’ Akɛni anɔkwa Nyɔŋmɔ lɛ pɛ baanyɛ agba wɔsɛɛ be sane ní etɔ̃ɔɔ hewɔ lɛ, kaa nɛɛ baakpá amalelɔi fɛɛ ahe mama. (Yesaia 48:5) Shi Ofe lɛ kɛ mla naa taomɔ nii ko hu fata he: Esa akɛ mɛi fɛɛ ní kɛɔ akɛ anɔkwa nyɔŋmɔi ji amɛ lɛ kɛ odasefoi aba, ní amɛbaye nibii ní amɛgba akɛ ebaaba mli lɛ kɛ amɛmlibaa fɛɛ he odase. Taakɛ akpaa gbɛ lɛ, Yehowa ejieee ehe kɛjɛɛɛ mla naa taomɔ nii nɛɛ mli.
11. Mɛɛ nitsumɔ Yehowa kɛwo etsulɔ lɛ dɛŋ, ni mɛni Yehowa jie lɛ kpo yɛ Nyɔŋmɔ ní eji lɛ he?
11 Akɛni apasa nyɔŋmɔi lɛ bɛ hewalɛ hewɔ lɛ, amɛnyɛɛɛ amɛkɛ odasefoi aba. No hewɔ lɛ, eyɛ hiɛgbele ákɛ adeka ní odasefoi damɔɔ mli yɛ kojomɔhe lɛ kã shi efolo. Shi be eshɛ ní Yehowa kɛbaama Nyɔŋmɔ ní eji lɛ nɔ mi agbɛnɛ. Ekwɛ he ni ewebii lɛ damɔ lɛ, ni ekɛɛ: “Nyɛ ji midasefoi, kɛ mitsulɔ ní mihala, koni nyɛle, ní nyɛhe mi nyɛye, ní nyɛná nyɛle akɛ mi nɔŋŋ ni. Atsɔko mihiɛ ashɔ̃ko nyɔŋmɔ ko, ni eko eko baŋ yɛ misɛɛ! Mi, mi nɔŋŋ, mi ji Yehowa lɛ, ni yiwalaherelɔ ko bɛ, ja mi! Mi nɔŋŋ mijaje, ni mihere mɛi ayiwala, ni miha anu hu, ni mɔkpɔŋ ko bɛ nyɛteŋ; no hewɔ lɛ nyɛ ji midasefoi, . . . ni mi, mi ji Mawu lɛ! Dani gbi ko aaaba jeŋ lɛ mi nɔŋŋ ni, ni mɔ ko bɛ ní aaajie mɔ yɛ midɛŋ; kɛ́ mifee nɔ ko lɛ, namɔ aaaku [minine] naa?”—Yesaia 43:10-13.
12, 13. (a) Mɛɛ odaseyeli babaoo Yehowa webii yɔɔ ní amɛkɛaaha? (b) Abale Yehowa gbɛi lɛ waa yɛ ŋmɛnɛŋmɛnɛ beaŋ yɛ mɛɛ gbɛ nɔ?
12 Yɛ Yehowa wiemɔi lɛ anɔheremɔ naa lɛ, etsɛɛɛ kɛkɛ ni adeka ní odasefoi damɔɔ mli lɛ yi kɛteke nɔ kɛ odasefoi babaoo ní yɔɔ miishɛɛ. Amɛ odaseyeli lɛ yɛ faŋŋ ni anyɛɛɛ aje he ŋwane. Taakɛ Yoshua fee lɛ, amɛye odase akɛ ‘nɔ fɛɛ nɔ ní Yehowa wie lɛ eba mli anɔkwale. Wiemɔ kome folo po ekaaa shi.’ (Yoshua 23:14) Yehowa webii kaiɔ Yesaia, Yeremia, Ezekiel, kɛ gbalɔi krokomɛi ní etamɔ nɔ ni amɛkɛ gbee kome gba Yuda nomŋɔɔ kɛ amɛjiemɔ kɛmiijɛ nomŋɔɔ mli yɛ naakpɛɛ gbɛ nɔ lɛ awiemɔi lɛ lolo. (Yeremia 25:11, 12) Atsĩ Yuda kpɔlɔ, ni ji Koresh tã kɛtsɔ hiɛ kwraa dani afɔ́ lɛ!—Yesaia 44:26–45:1.
13 Yɛ odaseyeli babaoo ní yɔɔ nɛɛ hewɔ lɛ, namɔ baanyɛ akɛɛ akɛ jeee Yehowa ji anɔkwa Nyɔŋmɔ kome lɛ? Ákɛ mɔ ni tamɔɔɔ wɔŋjalɔi anyɔŋmɔi lɛ, Yehowa pɛ ji mɔ ní abɔɔɔ lɛ; lɛ ekome pɛ ji anɔkwa Nyɔŋmɔ lɛ.a Enɛ hewɔ lɛ, gbɔmɛi ní Yehowa gbɛi kã amɛnɔ lɛ yɛ hegbɛ krɛdɛɛ ní yɔɔ miishɛɛ waa akɛ amɛaagba enifeemɔi ní yɔɔ naakpɛɛ lɛ amɛtsɔɔ yinɔi ní baaba wɔsɛɛ lɛ kɛ mɛi krokomɛi ní biɔ ehe sane lɛ. (Lala 78:5-7) Yehowa Odasefoi ní yɔɔ ŋmɛnɛŋmɛnɛ beaŋ lɛ ená hegbɛ akɛ amɛaajaje Yehowa gbɛi lɛ yɛ shikpɔŋ lɛ fɛɛ nɔ, yɛ gbɛ ní tamɔ nakai nɔŋŋ nɔ. Yɛ afi 1920 afii lɛ amli lɛ, Biblia Kaselɔi lɛ tee nɔ amɛbayɔse bɔ ni Nyɔŋmɔ gbɛi, ni ji Yehowa lɛ he hiaa waa lɛ jogbaŋŋ. Kɛkɛ ni yɛ July 26, 1931 lɛ, Asafo lɛ sɛinɔtalɔ, Joseph F. Rutherford, kɛ yiŋkpɛɛ ko ní yitso ji “Gbɛi Hee Ko” lɛ ha yɛ kpee wulu ko ní afee yɛ Columbus, yɛ Ohio lɛ shishi. Wiemɔi ni ji, “Wɔmiisumɔ ní ale wɔ ní atsɛ́ wɔ kɛ gbɛi ko, ni ji, Yehowa odasefoi” lɛ, ha kpeeyalɔi lɛ ná miishɛɛ waa, ni amɛkɛ gbee ní wa kpɛlɛ yiŋkpɛɛ lɛ nɔ akɛ “Hɛɛ!” Kɛjɛ nakai beaŋ kɛbaa nɛɛ, Yehowa gbɛi lɛ eje kpo faŋŋ yɛ je lɛŋ fɛɛ.—Lala 83:19.
14. Yehowa kai Israelbii lɛ yɛ mɛni he, ni mɛni hewɔ kaimɔ nɛɛ ba yɛ be ní sa mli lɛ?
14 Yehowa kwɛɔ mɛi ni hiɛɔ egbɛi lɛ mli yɛ bulɛ mli lɛ anɔ, ni ebuɔ amɛ akɛ amɛtamɔ “ehiŋmɛi mli ajaŋmalatɛ.” Ekai Israelbii lɛ yɛ enɛ he, ni ekɛɛ amɛ bɔ ni ejie amɛ kɛjɛ Mizraim ní enyiɛ amɛhiɛ kɛtsɔ ŋã lɛ nɔ shweshweeshwe lɛ. (5 Mose 32:10, 12) No mli lɛ nyɔŋmɔ kpɔ̃ŋ ko fataaa amɛhe, ejaakɛ amɛ diɛŋtsɛ amɛkɛ amɛhiŋmɛii na bɔ ni eba Mizraim nyɔŋmɔi lɛ ashi kwraa lɛ. Hɛɛ, Mizraim nyɔŋmɔi ní ajáa amɛ lɛ fɛɛ nyɛɛɛ abu Mizraim he loo amɛtsĩ Israel naa ní amɛkashi amɛmaŋ lɛ mli. (2 Mose 12:12) Nakai nɔŋŋ Babilon hu ní he wa, ní kɛ́ hoo kwraa lɛ anaa apasa nyɔŋmɔi agbatsũi aaashɛ 50 yɛ emaŋtiasei lɛ amli lɛ, nyɛŋ atsĩ Ofe lɛ naa beni ehaa ewebii yeɔ amɛhe lɛ. Eyɛ faŋŋ akɛ, yɛ Yehowa sɛɛ lɛ, “yiwalaherelɔ ko bɛ.”
Ta Okpɔŋɔi Gbeegbee Shi, Tsuŋwoohei Anaa Gbele
15. Mɛni Yehowa gba efɔ̃ shi yɛ Babilon he?
15 “Bɔ ni Yehowa, nyɛkpɔ̃lɔ lɛ, ni ji Israel Mɔ krɔŋkrɔŋ lɛ, kɛɛ nɛ: Nyɛ hewɔ mitsu kɛtee Babel tɔ̃ɔ, ni miŋɔ amɛ fɛɛ mitswia shi ákɛ foijelɔi, kɛ Kaldeabii lɛ hu yɛ amɛnyamɔ lɛji lɛ amli. Mi, Yehowa, ji nyɛ-Mɔ krɔŋkrɔŋ lɛ, Israel bɔlɔ lɛ, nyɛmaŋtsɛ lɛ. Bɔ ni Yehowa,—mɔ ni je gbɛ yɛ ŋshɔ lɛ mli, kɛ tempɔŋ hu yɛ nui ní naa wa lɛ amli lɛ, mɔ ni jie shwiilii kɛ okpɔŋɔi kɛ ta kɛ hewalɛ kpo, ní amɛ fɛɛ tswɛ̃m amɛkamɔ shi ní amɛteee shi dɔŋŋ, ní amɛtã, ní amɛgboi tamɔ kane mli odonti lɛ,—kɛɛ nɛ.”—Yesaia 43:14-17.
16. Mɛni baaba Babilon, Kaldeabii jarayelɔi lɛ, kɛ mɔ fɛɛ mɔ ní baate shi akɛ eefã Babilon he lɛ nɔ?
16 Babilon tamɔ tsuŋwoohe kɛha nomii lɛ kɛ shishinumɔ akɛ etsĩɔ amɛnaa ní amɛkaku amɛsɛɛ kɛtee Yerusalem. Shi Babilon hefãmɔ nii lɛ jeee gbɛtsii nii ko kwraa kɛha Ofe lɛ, Mɔ ni be ko ní eho lɛ “[eje] gbɛ yɛ [Ŋshɔ Tsuru] lɛ mli, kɛ tempɔŋ hu yɛ nui ní naa wa lɛ amli”—ni ji Yordan mli nui lɛ amli lɛ. (2 Mose 14:16; Yoshua 3:13) Yɛ nakai gbɛ nɔ nɔŋŋ lɛ, Yehowa nitsulɔ, ni ji Koresh, baaha Eufrate faa kpeteŋkpele lɛ agbĩ, ni ebaaha etabilɔi lɛ anyɛ abote maŋtiase lɛ mli. Kaldeabii jarayelɔi ní kɛ lɛji fãa gbɛ kɛnyiɛɔ Babilon nujɔɔi—ni ji lɛji anyiɛmɔhei kɛha jarayeli abalaa lɛji wuji akpei abɔ kɛ bontoi ní tereɔ Babilonbii anyɔŋmɔi lɛ—amli lɛ baabo kɛ yaafo kɛ dɔlɛ beni amɛmaŋtiase ní he wa lɛ gbeeɔ shi lɛ. Taakɛ Farao shwiilii lɛ fee yɛ Ŋshɔ Tsuru lɛ mli lɛ, nakai nɔŋŋ Babilon shwiilii ní joɔ foi waa lɛ hu nyɛŋ nɔ ko kwraa amɛfee. Amɛhereŋ eyiwala. Bɔ ni mu kane mli odonti ní tsoɔ lɛ gbee waaa lɛ, nakai nɔŋŋ tutualɔi lɛ baakpata mɔ fɛɛ mɔ ní baate shi akɛ eefã ehe lɛ hiɛ kwraa.
Yehowa Nyiɛ Ewebii lɛ Ahiɛ Kɛtee Amɛmaŋ Shweshweeshwe
17, 18. (a) Mɛɛ nɔ̃ “hee” Yehowa gba efɔ̃ shi? (b) Esaaa akɛ gbɔmɛi lɛ kaiɔ tsutsu nii lɛ yɛ mɛɛ gbɛ nɔ, ni mɛni hewɔ?
17 Beni Yehowa kɛ kpɔmɔ nifeemɔi ní etsu momo lɛ toɔ nɔ ni etsɛŋ ní ebaafee lɛ he lɛ, ewie akɛ: “Nyɛkakaia tsutsu saji lɛ, ni nyɛkajwɛŋa klɛŋklɛŋ nii lɛ ahe hu! Naa, mibafee nɔ ko hee, ebaapue amrɔ nɛɛ: aso nyɛnáŋ nyɛle? Hɛɛ, maje gbɛ yɛ ŋã lɛ nɔ, kɛ faai hu yɛ ŋã olɛŋlɛ lɛ nɔ. Ŋãŋ kooloi tete aaawo mihiɛ nyam, ŋãŋ gbeei kɛ dugumai fɛɛ; ejaakɛ maha nu aba ŋã lɛ nɔ, kɛ faai hu yɛ ŋã olɛŋlɛ lɛ nɔ, ni maha mimaŋ lɛ, mɛi ní mihala lɛ, anu. Maŋ ní mishɔ̃ miha mihe, koni amɛgba miyijiemɔ lɛ.”—Yesaia 43:18-21.
18 Kɛ́ Yehowa kɛɛ akɛ, “nyɛkakaia tsutsu saji lɛ,” etsɔɔɔ akɛ eetao ní etsuji lɛ ajie yiwalaheremɔ nifeemɔi ní etsu be ko ní eho lɛ kwraa kɛjɛ amɛjwɛŋmɔi amli. Yɛ anɔkwale mli lɛ, nifeemɔi nɛɛ amli babaoo ji Israel yinɔsane ní ajɛ ŋwɛi aŋmala yɛ mumɔ naa lɛ fã, ni Yehowa wo akpɔ akɛ akai heyeli kɛmiijɛ Mizraim lɛ daa afi yɛ Hehoo gbijurɔyeli lɛ mli. (3 Mose 23:5; 5 Mose 16:1-4) Shi kɛlɛ, Yehowa miitao ní ewebii lɛ adamɔ “nɔ ko hee” nɔ amɛwo ehiɛ nyam agbɛnɛ—nɔ ko ní amɛ diɛŋtsɛ amɛbaaná mli niiashikpamɔ yɛ klɛŋklɛŋ be mli kwraa. Jeee amɛjiemɔ kɛmiijɛ Babilon lɛ pɛ fata enɛ he, shi moŋ amɛgbɛfãa kɛmiiba amɛmaŋ yɛ naakpɛɛ gbɛ nɔ, ní ekolɛ amɛbaatsɔ shia ŋã diɛŋtsɛ ni yɔɔ tɛ̃ɛ lɛ nɔ lɛ hu fata he. Kɛ́ amɛbashɛ nakai shikpɔŋ gbiŋ lɛ nɔ lɛ, Yehowa baagbá “gbɛ” eha amɛ, ni ebaatsu naakpɛɛ nitsumɔi ní haa akaiɔ nɔ ni efee eha Israelbii lɛ yɛ Mose gbii lɛ amli lɛ—yɛ anɔkwale mli lɛ, ebaalɛ̀ mɛi ní kuɔ amɛsɛɛ lɛ yɛ ŋã lɛ nɔ ni ekɛ faai kpakpai diɛŋtsɛ amli nui baagbe amɛkumai. Nibii ní Yehowa baaha amɛ lɛ baafá aahu akɛ ebaaha kooloi awuiyelɔi po awo Nyɔŋmɔ hiɛ nyam ni amɛtutuaŋ gbɔmɛi lɛ.
19. Mumɔŋ Israel shwɛɛnii lɛ kɛ amɛhefatalɔi lɛ nyiɛɔ “gbɛ krɔŋkrɔŋ lɛ” nɔ yɛ mɛɛ gbɛ nɔ?
19 Nakai nɔŋŋ hu yɛ afi 1919 mli lɛ, aha mumɔŋ Israel shwɛɛnii lɛ ye amɛhe kɛjɛ Babilon nomŋɔɔ mli, ni amɛyí mli kɛtsɔ gbɛ ko ní Yehowa esaa eto amɛ, ni ji “gbɛ krɔŋkrɔŋ lɛ” nɔ. (Yesaia 35:8) Ákɛ mɛi ní tamɔɔɔ Israelbii lɛ, ehe ehiaaa ní amɛfã gbɛ kɛtsɔ shia ŋã ni nɔ edɔ nɔ, kɛjɛ maŋ loo shikpɔŋ kome nɔ kɛya ekroko nɔ, ni amɛgbɛfãa lɛ baaa naagbee yɛ nyɔji fioo komɛi asɛɛ tamɔ nɔ ni amɛyashɛ Yerusalem. Shi, “gbɛ krɔŋkrɔŋ lɛ” kɛ Kristofoi ní afɔ amɛ mu lɛ ateŋ shwɛɛnii lɛ tee mumɔŋ paradeiso mli. Yɛ amɛ gbɛfaŋ lɛ, amɛkãa he amɛnyiɛɔ “gbɛ krɔŋkrɔŋ lɛ” nɔ, akɛni esa akɛ amɛfã gbɛ kɛtsɔ nibii agbɛjianɔtoo nɛɛ mli lɛ hewɔ. Bei abɔ ní amɛyaa nɔ amɛnyiɛɔ tempɔŋ lɛ nɔ—bei abɔ ní amɛnyiɛɔ yɛ hetsemɔ kɛ krɔŋkrɔŋfeemɔ he tɛi ní Nyɔŋmɔ efolɔ eshwie shi lɛ anaa lɛ—amɛkãa he amɛhiɔ mumɔŋ paradeiso lɛ mli. Ni kwɛ miishɛɛ ní eji kɛha amɛ akɛ amɛhefatalɔi asafo babaoo ní “amɛjeee Israelbii lɛ” ebafata amɛhe! Ákɛ mɛi ní esoro amɛ kwraa yɛ mɛi ní kɛ amɛhiɛ fɔ̃ɔ Satan gbɛjianɔtoo lɛ nɔ lɛ ahe lɛ, shwɛɛnii lɛ kɛ amɛhefatalɔi lɛ fɛɛ yaa nɔ amɛnáa mumɔŋ okpɔlɔŋmɛɛ kpele mli ŋɔɔmɔ kɛjɛɔ Yehowa dɛŋ. (Yesaia 25:6; 65:13, 14) Akɛni amɛyooɔ Yehowa jɔɔmɔi ní yɔɔ ewebii anɔ lɛ hewɔ lɛ, mɛi babaoo ní tamɔ kooloi ni hiɛ yɔɔ la lɛ etsake amɛgbɛ̀i ni amɛwoɔ anɔkwa Nyɔŋmɔ lɛ hiɛ nyam.—Yesaia 11:6-9.
Yehowa Jie Edɔlɛ Kpo
20. Israel ní hi shi yɛ Yesaia gbii lɛ amli lɛ yeee Yehowa anɔkwa yɛ mɛɛ gbɛ nɔ?
20 Blema lɛ, Israel shwɛɛnii ní akɛ amɛ ku sɛɛ kɛba amɛmaŋ ekoŋŋ lɛ ji gbɔmɛi ní etsake kɛ́ akɛ amɛ to Yesaia yinɔbii fɔji lɛ ahe. Yehowa wie sɛɛkpee bii lɛ ahe akɛ: “Bo, Yakob, otsɛɛɛ mi, ni bo, Israel, ogbaaa ohe naa yɛ mihe! Okɛ oshãa afɔle tooi lɛ ebahaaa mi, ni asaŋ okɛ ofɔlei lɛ wooo mihiɛ nyam; mikɛ niyenii afɔlei gbaaa onaa, ni mihaaa atɔo kɛ krɔbɔo; okɛ jwiɛtɛi heee kalamo ohaaa mi, ni ohaaa matɔ kɛ ofɔlei afɔ lɛ; moŋ, okɛ ohe eshai lɛ hao mi, ni oha etɔ mi kɛ onishaianii lɛ!”—Yesaia 43:22-24.
21, 22. (a) Mɛni hewɔ abaanyɛ akɛɛ akɛ Yehowa taomɔ nii lɛ jeee jatsu ní tsii lɛ? (b) Yɛ naagbee lɛ, gbɔmɛi lɛ ha Yehowa moŋ sɔmɔ amɛ yɛ mɛɛ gbɛ nɔ?
21 Kɛ́ Yehowa wie akɛ, “mikɛ niyenii afɔlei gbaaa onaa, ni mihaaa atɔo kɛ krɔbɔo” lɛ, no etsɔɔɔ akɛ eekɛɛ akɛ abiii afɔleshaa kɛ krɔbɔo (ni ji tsofa-kɛ-ŋma krɔŋkrɔŋ lɛ fã lɛ) yɛ amɛdɛŋ dɔŋŋ. Yɛ anɔkwale mli lɛ, enɛɛmɛi ji anɔkwa jamɔ ní atsuɔ he nii yɛ Mla kpaŋmɔ lɛ shishi lɛ fã. Nakai nɔŋŋ eji yɛ “kalamo,” ni ji kaanee tso ní jeɔ ŋma, ní ji tsofa-kɛ-ŋma ní akɛfutuɔ mu krɔŋkrɔŋ ní akɛfɔɔ mɔ mu lɛ mli lɛ hu gbɛfaŋ. Israelbii lɛ kuɔ amɛhiɛ amɛshwieɔ nibii nɛɛ kɛ nitsumɔ nɔ yɛ sɔlemɔwe sɔɔmɔ lɛ mli. Shi ani taomɔ nii nɛɛ ji jatsu ní tsii? Dabi kwraa! Yehowa taomɔ nii lɛ ahe nitsumɔ waaa kɛ́ akɛmiito apasa nyɔŋmɔi lɛ anɔ̃ he. Ákɛ nɔkwɛmɔnɔ lɛ, apasa nyɔŋmɔ Molek bi ní akɛ gbekɛbii ashã afɔle aha lɛ—nɔ ko ní Yehowa biko dã lɛ!—5 Mose 30:11; Mika 6:3, 4, 8.
22 Eji Israelbii lɛ yɛ mumɔŋ sɛɛyoomɔ kulɛ, amɛnuŋ he akɛ ‘etɔ amɛ yɛ Yehowa he’ kɔkɔɔkɔ. Kulɛ kɛ́ amɛkwɛ e-Mla lɛ mli lɛ, amɛbaana suɔmɔ kpele ní eyɔɔ kɛha amɛ, ni amɛbaajɛ miishɛɛ mli amɛkɛ ‘fɔ,’ ni ji amɛfɔleshaai lɛ amli hei ní hi fe fɛɛ lɛ aha lɛ. Shi yɛ no najiaŋ lɛ, amɛkɛ hiɛjoomɔ tsĩ fɔ lɛ naa amɛha amɛhe. (3 Mose 3:9-11, 16) Kwɛ bɔ ni maŋ fɔŋ nɛɛ kɛ amɛhe eshai lɛ ha etɔ Yehowa—yɛ naagbee lɛ, amɛha lɛ moŋ esɔmɔ amɛ!—Nehemia 9:28-30.
Tsɔsemɔ kɛ Yibiiwoo Baa
23. (a) Mɛni hewɔ toigbalamɔ ní Yehowa kɛha lɛ sa lɛ? (b) Mɛni fata toigbalamɔ ní Nyɔŋmɔ kɛha Israel lɛ he?
23 Eyɛ mli akɛ toigbalamɔ ní Yehowa kɛha lɛ mli wa, ni esa nakai moŋ, shi etsuɔ yiŋtoo ní ehiɛ lɛ he nii, ni ehaa enyɛɔ ejieɔ mɔbɔnalɛ kpo. “Mi nɔŋŋ mi ji mɔ ni gbeɔ onɔtɔmɔi lɛ yɛ mi diɛŋtsɛ mihewɔ, ni ohe eshai lɛ hu mikaiŋ dɔŋŋ. Kaimɔ mi, ní wɔkojo; jajemɔ osane lɛ, koni abuo bem! Oklɛŋklɛŋ tsɛ lɛ fee esha, ni mɛi ní damɔɔ mli haao [“naajielɔi,” “NW” shishigbɛ niŋmaa] lɛ tɔ̃ minɔ: hewɔ lɛ mibule he krɔŋkrɔŋ lɛ lumɛi lɛ, ni mifee Yakob musu, ni mikɛ Israel ha heguɔgbee.” (Yesaia 43:25-28) Taakɛ je lɛŋ jeŋmaji fɛɛ ji lɛ, Israel jɛ Adam, mɔ ni ji ‘klɛŋklɛŋ mɔ’ lɛ mli. No hewɔ lɛ, Israelnyo ko bɛ ní baanyɛ abu ehe “bem.” “Mɛi ní damɔɔ mli” haa Israel—etsɔɔlɔi, loo Mla lɛ naajielɔi lɛ po—efee esha amɛshi Yehowa ni amɛtsɔɔ gbɔmɛi lɛ amalei. No hewɔ lɛ, Yehowa baaŋɔ emaŋ muu lɛ fɛɛ eha ní afee amɛ “musu” kɛ “heguɔgbee.” Ebaabule mɛi fɛɛ ní sɔmɔɔ yɛ “[ehe] krɔŋkrɔŋ lɛ,” loo esɔlemɔwe lɛ hu.
24. Mɛni ji klɛŋklɛŋ yiŋtoo hewɔ ni Yehowa kɛ ewebii—ni hi shi yɛ blema kɛ ŋmɛnɛŋmɛnɛ beaŋ fɛɛ lɛ—ahe keɔ amɛ lɛ, ni kɛlɛ, te enuɔ he yɛ amɛhe ehaa tɛŋŋ?
24 Shi kadimɔ akɛ, ŋwɛi mɔbɔnalɛ ní baajɛ mli aba lɛ efeŋ nɔ ni jɛ Israel heshwamɔ lɛ hewɔ kɛkɛ; ebaafee nɔ ni akɛha yɛ Yehowa diɛŋtsɛ hu hewɔ. Hɛɛ, egbɛi lɛ he baa sane lɛ mli. Eji eŋmɛɛ Israel he ní amɛhi nomŋɔɔ lɛ mli daa kulɛ, mɛi ni naa nɔ ni yaa nɔ lɛ baagbe egbɛi lɛ he guɔ. (Lala 79:9; Ezekiel 20:8-10) Nakai nɔŋŋ hu ŋmɛnɛ, adesai ayiwalaheremɔ yeɔ gbɛhe ni ji enyɔ yɛ Yehowa gbɛi lɛ hetsemɔ kɛ emaŋtsɛyeli lɛ bembuu sɛɛ. Shi yɛ fɛɛ sɛɛ lɛ, Yehowa sumɔɔ mɛi ní kpɛlɛɔ etsɔsemɔ nɔ kɛmɔɔ shi, ní amɛjáa lɛ yɛ mumɔ kɛ anɔkwale mli lɛ asane. Ejieɔ suɔmɔ ní eyɔɔ kɛhaa mɛnɛɛmɛi lɛ kpo—ekɔɔɔ he eko akɛ afɔ amɛ mu loo amɛji tooi krokomɛi—kɛtsɔ Yesu Kristo afɔleshaa lɛ ní edamɔɔ nɔ etsumɔɔ amɛhe eshai lɛ nɔ.—Yohane 3:16; 4:23, 24.
25. Mɛɛ nibii ni yɔɔ naakpɛɛ Yehowa baafee yɛ wɔsɛɛ ní ebɛŋkɛ kpaakpa lɛ mli, ni wɔbaanyɛ wɔjie hiɛsɔɔ ní wɔyɔɔ kɛha enɛ lɛ kpo bianɛ yɛ mɛɛ gbɛ nɔ?
25 Kɛfata he lɛ, etsɛŋ ni Yehowa baajie suɔmɔ ní eyɔɔ kɛha asafo babaoo ni ji ejálɔi anɔkwafoi lɛ kpo beni efeɔ nɔ ko hee yɛ amɛhewɔ kɛtsɔ kpɔmɔ ní eeekpɔ̃ amɛ kɛaajɛ “amanehulu kpeteŋkpele lɛ” mli kɛya “shikpɔŋ hee” ní atsuu nɔ lɛ nɔ lɛ. (Kpojiemɔ 7:14; 2 Petro 3:13) Amɛbaaye Yehowa hewalɛ lɛ kpojiemɔ ní yɔɔ naakpɛɛ fe fɛɛ ní adesai ena pɛŋ lɛ he odase. Nakai nifeemɔ lɛ gbɛkpamɔ ní nɔmimaa yɔɔ he lɛ haa shwɛɛnii ní afɔ amɛ mu lɛ kɛ mɛi fɛɛ ní baafee asafo babaoo lɛ mli bii lɛ náa miishɛɛ ni amɛhiɔ shi daa gbi yɛ nitsumɔ ni nɔ kwɔ nɛɛ kɛ gbeekpamɔ naa, akɛ: “Nyɛ ji midasefoi”!—Yesaia 43:10.
[Shishigbɛ niŋmaa]
a Yɛ jeŋmaji lɛ ablema saji amli lɛ, nyɔŋmɔi lɛ ateŋ babaoo yɛ ní “afɔ́” amɛ ní amɛ hu amɛfɔ́ “bii.”
[Mfoniri ni yɔɔ baafa 48, 49]
Yehowa baafi Yudafoi lɛ asɛɛ beni amɛkuɔ amɛsɛɛ kɛyaa amɛmaŋ Yerusalem
[Mfonirii ni yɔɔ baafa 52]
Yehowa tswaa jeŋmaji lɛ mpoa ní amɛkɛ odasefoi aba kɛha amɛnyɔŋmɔi lɛ
1. Baal amaga ní akɛ ayawa efee 2. Ashtarot amagai bibii ní akɛ sũ eshɔ̃ 3. Mizraim nyɔŋmɔi etɛ ní efee ekome, ni ji Horus, Osiris, kɛ Isis 4. Hela nyɔŋmɔi Athena (abɛku) kɛ Afrodito
[Mfonirii ni yɔɔ baafa 58]
“Nyɛ ji midasefoi.”—Yesaia 43:10