Yitso Ekpaa

Yehowa—“Mawu Jalɔ kɛ Yiwalaherelɔ”

Yesaia 45:1-25

1, 2. Mɛɛ nɔmimaa wiemɔi akɛha yɛ Yesaia yitso 45 lɛ, ni mɛɛ sanebimɔi abaasusu he?

ANYƐƆ akɛ he fɔ̃ɔ Yehowa shiwoi anɔ. Lɛ ji Nyɔŋmɔ ní jieɔ nibii akpo kɛ nibɔɔ Nyɔŋmɔ lɛ. Éjie ehe kpo shii abɔ akɛ Mawu jalɔ kɛ yiwalaherelɔ kɛha gbɔmɛi ní jɛ jeŋmaji fɛɛ mli. Enɛɛmɛi ji nɔmimaa wiemɔi ní yɔɔ miishɛɛ ní anaa yɛ Yesaia yitso 45 lɛ mli lɛ ekomɛi.

² Kɛfata he lɛ, nyɛmɔ ní Yehowa yɔɔ ni ekɛgbaa nɔ ni baaba wɔsɛɛ lɛ he nɔkwɛmɔnɔ ní sa kadimɔ waa yɛ Yesaia yitso 45 lɛ mli. Nyɔŋmɔ mumɔ lɛ ye ebua Yesaia ni eto ehiɛ ekwɛ maji ní yɔɔ shɔŋŋ lɛ, ni esusu nibii ni baaba yɛ afii ohai abɔ ní baaba lɛ amli lɛ ahe, ni etsirɛ lɛ ni etsɔɔ bɔ ni sane ko ní baaba, ní Yehowa, mɔ ni ji anɔkwa gbalɛ Nyɔŋmɔ lɛ pɛ baanyɛ agba afɔ̃ shi ní eba mli pɛpɛɛpɛ hu lɛ baaba lɛ aha. Mɛni ji nakai sane ní baaba lɛ? Te esa Nyɔŋmɔ webii ni hi shi yɛ Yesaia gbii lɛ amli lɛ ahe eha tɛŋŋ? Te ehe hiaa kɛha wɔ tɛŋŋ ŋmɛnɛ? Nyɛhaa wɔpɛia gbalɔ lɛ wiemɔi lɛ amli wɔkwɛa.

Yehowa Wiemɔi ní Ewie Eshi Babilon

 3. Mɛɛ wiemɔi ní mli kã shi faŋŋ Yesaia 45:1-3a lɛ kɛtsɔɔ Koresh kunimyeli lɛ mli?

³ “Bɔ ni Yehowa kɛɔ mɔ ni efɔ lɛ mu ni ji Koresh lɛ nɛ, mɔ ni mimɔ eninejurɔ mli, koni maba jeŋmaji ashi yɛ ehiɛ, ní mafɛne maŋtsɛmɛi ahɛfii nii, ní magbele shinaai yɛ ehiɛ, ní akaŋmɛ agbói lɛ amli lɛ: Mi nɔŋŋ manyiɛ ohiɛ, ni maha hei ni yɔɔ dokoidokoi lɛ afee trɛnɛ̃ɛ, ni majwara akɔɔble shinaai lɛ, ni mafolɔ amɛsɛɛ adabaŋi lɛ amli, ni mikɛ duŋ mli jwetrii lɛ aaahão, kɛ teemɔhei anii ní jara wa lɛ.”—Yesaia 45:1-3a.

 4. (a) Mɛni hewɔ Yehowa tsɛ́ Koresh akɛ ‘emɔ ni efɔ lɛ mu’ lɛ? (b) Yehowa baakwɛ ní Koresh aye kunim yɛ mɛɛ gbɛ nɔ?

⁴ Yehowa tsɔ Yesaia nɔ ekɛ Koresh wie tamɔ nɔ ni eyɛ shihilɛ mli, eyɛ mli akɛ yɛ Yesaia gbii lɛ amli lɛ, no mli lɛ afɔ́ko Koresh. (Romabii 4:17) Akɛni Yehowa tsɔ hiɛ ehala Koresh koni ebatsu nitsumɔ pɔtɛɛ ko he nii hewɔ lɛ, abaanyɛ awie Koresh he akɛ eji “mɔ ni” Nyɔŋmɔ “efɔ lɛ mu.” Akɛni Nyɔŋmɔ nyiɛ ehiɛ hewɔ lɛ, ebaaye jeŋmaji anɔ kunim, ni ebaaha maŋtsɛmɛi afee gbedee ni amɛnyɛŋ amɛte shi amɛwo lɛ. Kɛkɛ lɛ, kɛ́ Koresh tutua Babilon lɛ, Yehowa baakwɛ ní eha agbele maŋtiase lɛ naa agbói lɛ ashwie shi, ni ebaaha amɛtsɔmɔ agbói ni he bɛ sɛɛnamɔ ko, tamɔ nɔ ni akumɔ ashwie shi. Ebaanyiɛ Koresh hiɛ, ni ebaajie gbɛtsii nii fɛɛ kɛjɛ ehiɛ. Yɛ naagbee lɛ, Koresh asraafoi lɛ baaye maŋtiase lɛ nɔ kunim, ni amɛnine baashɛ ‘eteemɔhei anii ní jara wa,’ ni ji ejwetrii ní akɛto duŋ mli nitoohei lɛ anɔ. Nɔ ni Yesaia gba efɔ̃ shi nɛ. Ani ewiemɔi lɛ ba mli anɔkwale?

5, 6. Mɛɛ be, ni mɛɛ gbɛ nɔ gbalɛ ní kɔɔ Babilon nɔ kunimyeli he lɛ ba mli anɔkwale yɛ?

⁵ Yɛ afi 539 D.Ŋ.B.—beni Yesaia ŋma gbalɛ nɛɛ efɔ̃ shi lɛ sɛɛ aaafee afii 200 lɛ—Koresh bashɛ Babilon gbogboi lɛ ahe lɛɛlɛŋ ni etutua maŋtiase lɛ. (Yeremia 51:11, 12) Shi kɛlɛ, enɛ jeee Babilonbii lɛ ahe sane ko kwraa. Amɛnuɔ he akɛ anyɛŋ aye amɛmaŋtiase lɛ nɔ kunim kɔkɔɔkɔ. Egbogboi ní nɔ kwɔlɔ waa lɛ miikwɛ nujɔɔi wuji ní Eufrate Faa lɛ, ní feɔ maŋ lɛ hefamɔ gbɛjianɔtoo lɛ fã lɛ mli nui lɛ eyimɔ amɛ obɔ̃bɔ̃ lɛ anɔ. Nɔ ni fe afii oha sɔŋŋ eho, ní henyɛlɔ ko kwraa nyɛko atutua Babilon ní eye enɔ kunim! Yɛ anɔkwale mli lɛ, Babilon nɔyelɔ ní yɔɔ maŋtiase lɛ mli, ni ji Belshazar, nuɔ he akɛ eyɛ shweshweeshwe aahu akɛ eŋmɛ emaŋtsɛwe lɛ mli bii lɛ fɛɛ okpɔlɔ kpeteŋkpele ko. (Daniel 5:1) Nakai gbɛkɛ lɛ—ni ji October 5 loo 6 gbɛkɛ lɛ—Koresh gbe tawuu mli ŋaa nifeemɔ ko naa kwraa.

⁶ Koresh asraafoi lɛ ateŋ ŋaalɔi lɛ tee faa lɛ yitsogbɛ kɛjɛ Babilon, ni amɛtsa nujɔɔ yɛ Eufrate Faa lɛ naabu, ni amɛha emli nui lɛ ho kɛtsɔ mli, no hewɔ lɛ nu lɛ eyaaa wuoyigbɛ kɛbɛŋkɛɛɛ maŋtiase lɛ dɔŋŋ. Etsɛɛɛ kɛkɛ ni faa lɛ mli nu falɛ ní yɔɔ Babilon kɛ ehewɔ lɛ ba shi kwraa bɔ ni Koresh asraafoi lɛ nyɛ amɛnyiɛ kɛtsɔ nu fioo ní eshwɛ lɛ mli kɛbote maŋtiase lɛ teŋ tuuntu. (Yesaia 44:27; Yeremia 50:38) Nɔ ni yɔɔ naakpɛɛ ji akɛ, agbele agbói ni yɔɔ faa lɛ naa lɛ fɛɛ ashwie shi, tamɔ bɔ ni Yesaia gba efɔ̃ shi lɛ pɛpɛɛpɛ. Koresh asraafoi lɛ ké yuu kɛyashwie Babilon nɔ, ni amɛŋɔ maŋtsɛwe lɛ, ni amɛgbe Maŋtsɛ Belshazar. (Daniel 5:30) Agbe enɔ kunimyeli lɛ naa kwraa yɛ gbɛkɛ kome pɛ mli. Aye Babilon nɔ kunim, ni gbalɛ lɛ eba mli kwraa kɛmɔ shi.

 7. Bɔ ni Yesaia gbalɛ ní kɔɔ Koresh he lɛ ba mli yɛ gbɛ ní sa kadimɔ waa nɔ lɛ woɔ Kristofoi hewalɛ yɛ mɛɛ gbɛ nɔ?

⁷ Bɔ ni gbalɛ nɛɛ mlibaa ja kɛmɔ shi lɛ wajeɔ Kristofoi ahemɔkɛyeli ŋmɛnɛ. Ehaa amɛ yiŋtoo ní mli wa ní amɛaadamɔ nɔ amɛhe amɛye akɛ anyɛɔ akɛ he fɔ̃ɔ Biblia gbalɛi ní bako mli lɛ hu anɔ kɛmɔɔ shi. (2 Petro 1:20, 21) Yehowa jálɔi le akɛ nifeemɔ ní akɛ Babilon shigbeemɔ ni ba yɛ afi 539 D.Ŋ.B. lɛ fee he mfoniri—ni ji “Babilon Kpeteŋkpele lɛ” shigbeemɔ lɛ—hu eba mli momo kɛjɛ afi 1919 tɔ̃ɔ. Ni kɛlɛ, amɛmiikpa nakai ŋmɛnɛŋmɛnɛ beaŋ jamɔ gbɛjianɔtoo lɛ hiɛkpatamɔ, kɛ maŋkwramɔ gbɛjianɔtoo ní yɔɔ Satan kudɔmɔ shishi lɛ jiemɔ ní awo shi yɛ he lɛ, kɛ Satan ní akɛ lɛ baawo bu kwɔŋkwɔŋ mli lɛ, kɛ ŋwɛi hee kɛ shikpɔŋ hee lɛ baa lɛ fɛɛ gbɛ. (Kpojiemɔ 18:2, 21; 19:19-21; 20:1-3, 12, 13; 21:1-4) Amɛle akɛ Yehowa gbalɛi lɛ jeee shiwoi foji, shi moŋ amɛji wɔsɛɛ be mli nibii ní baaba mli lɛɛlɛŋ lɛ amlitsɔɔmɔ. Kɛ́ anɔkwa Kristofoi kai Yesaia gbalɛ lɛ mli saji fɛɛ ní kɔɔ Babilon shigbeemɔ he lɛ amlibaa fitsofitso lɛ, ehaa hekɛnɔfɔɔ ní amɛyɔɔ lɛ mli waa. Amɛle akɛ Yehowa haa ewiemɔ baa mli be fɛɛ be.

Nɔ Hewɔ ní Yehowa Baaná Koresh He Miishɛɛ

 8. Mɛni ji yiŋtoo kome hewɔ ní Yehowa ha Koresh ye Babilon nɔ kunim lɛ?

⁸ Beni Yehowa etsɔɔ mɔ ni baaye Babilon nɔ kunim kɛ bɔ ni eeefee enɛ eha lɛ sɛɛ lɛ, etee nɔ etsɔɔ yiŋtoo kome hewɔ ní ebaaha Koresh aye enɔ kunim nɛɛ mli. Beni Yehowa kɛ Koresh wieɔ yɛ gbalɛ wiemɔ mli lɛ, ekɛɛ akɛ ebaafee enɛ “koni oná ole akɛ mi ji Yehowa, mɔ ni tsɛ́o kɛ ogbɛi, ni ji Israel Nyɔŋmɔ lɛ.” (Yesaia 45:3b) Eja gbɛ jogbaŋŋ akɛ jeŋ hewalɛ ni ji ejwɛ yɛ Biblia yinɔsane mli lɛ nɔyelɔ lɛ kpɛlɛɔ nɔ akɛ ekunimyeli kpele fe fɛɛ lɛ jɛ sɛɛfimɔ ní mɔ ko ní nɔ kwɔ fe lɛ—ni ji Yehowa, Jeŋ Muu Fɛɛ Maŋtsɛ lɛ kɛha lɛ lɛ hewɔ. Esa akɛ Koresh akpɛlɛ nɔ akɛ mɔ ni tsɛ lɛ, loo ekɛ nitsumɔ wo edɛŋ ji Yehowa, Israel Nyɔŋmɔ lɛ. Biblia lɛ mli sane lɛ tsɔɔ akɛ Koresh kpɛlɛ nɔ hu akɛ ekunimyeli kpele lɛ jɛ Yehowa ŋɔɔ.—Ezra 1:2, 3.

 9. Mɛɛ yiŋtoo ni ji enyɔ hewɔ ni Yehowa ha Koresh baye Babilon nɔ kunim lɛ?

⁹ Yehowa tsɔɔ yiŋtoo ni ji enyɔ hewɔ ni ekɛ Koresh ba ní ebaye Babilon nɔ kunim lɛ mli, akɛ: “Mitsulɔ Yakob kɛ Israel ní mihala lɛ hewɔ ni mitsɛ́o kɛ ogbɛi, ni miwoo gbɛi, dani ole mi po.” (Yesaia 45:4) Babilon nɔ kunim ní Koresh ye lɛ hoso shikpɔŋ muu lɛ fɛɛ. Ebafee jeŋ hewalɛ kome shigbeemɔ kɛ jeŋ hewalɛ kroko shitee, ni ená hewalɛ ní sɛɛ tsɛɔ waa yɛ yinɔsane mli yɛ yinɔi babaoo ní ba yɛ sɛɛ mli lɛ anɔ. Shi, ekolɛ jeŋmaji ní ebɔle lɛ kɛkpe, ní kɛ hehiamɔ kwɛɔ nibii ni yaa nɔ lɛ anaa baakpɛ amɛhe waa akɛ amɛaale akɛ nibii nɛɛ fɛɛ ba mli yɛ nomii akpei fioo komɛi ní “he ehiaaa,” ni yɔɔ Babilon—ni ji Yudafoi, Yakob seshibii lɛ ahewɔ. Shi kɛlɛ, yɛ Yehowa hiɛ lɛ, nɛkɛ blema Israel maŋ lɛ mli bii ní yi ná wala nɛɛ jeee mɛi ní he ehiaaa. Amɛji ‘etsulɔ.’ Yɛ shikpɔŋ lɛ nɔ jeŋmaji lɛ fɛɛ ateŋ lɛ, amɛ pɛ ji maŋ ní ‘ehala.’ Eyɛ mli akɛ Koresh leee Yehowa kɛtsɔɔɔ hiɛ moŋ, shi Yehowa kɛ lɛ tsu nii akɛ mɔ ni E-hala lɛ koni ebutu maŋtiase ní ekpɛlɛɛɛ ní eŋmɛɛɔ enomii lɛ ahe lɛ. Ejeee Nyɔŋmɔ yiŋtoo akɛ ewebii ní ehala amɛ lɛ kɛ awerɛho ahi maŋsɛɛ shikpɔŋ nɔ kɛya naanɔ.

10. Mɛni ji yiŋtoo ní he hiaa fe fɛɛ hewɔ ní Yehowa kɛ Koresh tsu nii ní ekɛ Babilon Jeŋ Hewalɛ lɛ ba naagbee lɛ?

¹⁰ Yiŋtoo ni ji etɛ, ní he hiaa waa ní no hewɔ Yehowa kɛ Koresh tsu nii ní ekɛbutu Babilon lɛ hu yɛ. Yehowa wie akɛ: “Mi ji Yehowa, ni mɔ ko bɛ dɔŋŋ, misɛɛ lɛ Nyɔŋmɔ ko Nyɔŋmɔ ko bɛ! Mimiao, dani ole mi po, koni amɛle kɛjɛ hulushiteehe kɛ anaigbɛ, akɛ misɛɛ lɛ mɔ ko mɔ ko bɛ. Mi ji Yehowa, ni mɔ ko bɛ dɔŋŋ.” (Yesaia 45:5, 6) Hɛɛ, Babilon Jeŋ Hewalɛ lɛ shigbeemɔ lɛ ji Nyɔŋmɔ ní Yehowa ji lɛ kpojiemɔ, odaseyeli kɛha mɔ fɛɛ mɔ akɛ lɛ ekome pɛ esa akɛ ajá lɛ. Akɛni aŋmɛɛ Nyɔŋmɔ webii lɛ ahe hewɔ lɛ, aŋkroaŋkroi ní jɛ jeŋmaji babaoo mli—kɛjɛ boka kɛtee anai—baaba amɛbakpɛlɛ nɔ akɛ Yehowa kome pɛ ji anɔkwa Nyɔŋmɔ lɛ.—Maleaki 1:11.

11. Mɛɛ gbɛ nɔ Yehowa jie hewalɛ ní eyɔɔ ní ekɛaaha eyiŋtoo ní kɔɔ Babilon he lɛ aba mli lɛ kpo yɛ?

¹¹ Kaimɔ akɛ aŋma Yesaia gbalɛ nɛɛ aaafee afii 200 dani nibii ní ewie he lɛ ba mli. Shi ekolɛ mɛi komɛi yɛ ní kɛ́ amɛnu lɛ, amɛaabi akɛ, ‘Ani Yehowa yɛ hewalɛ lɛɛlɛŋ ní ekɛaaha eba mli?’ Taakɛ yinɔsane yeɔ he odase lɛ, hetoo lɛ ji hɛɛ. Yehowa tsɔɔ nɔ hewɔ ní nilee yɔɔ mli akɛ aaahe aye akɛ ebaanyɛ eha nɔ ni ekɛɛ lɛ aba mli lɛ mli, akɛ: “Mishɔ̃ɔ la, ni mibɔɔ duŋ hu; mi mihaa hejɔlɛ baa, ni mibɔɔ efɔŋ; mi, Yehowa, lɛ nɔŋŋ mifeɔ enɛɛmɛi fɛɛ!” (Yesaia 45:7) Nɔ fɛɛ nɔ ní abɔ—kɛjɛ la nɔ kɛyashi duŋ nɔ—kɛ yinɔsane mli nɔ fɛɛ nɔ—kɛjɛ toiŋjɔlɛ nɔ kɛyashi amanehulu nɔ—fɛɛ yɛ Yehowa kudɔmɔ shishi. Taakɛ bɔ ni ebɔ jetsɛremɔ la kpɛmɔ kɛ gbɛkɛ duŋ lɛ, nakai nɔŋŋ ebaaha Israel aná toiŋjɔlɛ ni ekɛ amanehulu baaba Babilon nɔ. Yehowa yɛ hewalɛ ní ekɛaabɔ jeŋ muu lɛ fɛɛ, ni eyɛ hewalɛ hu ní ekɛaaha egbalɛi aba mli. Enɛ woɔ Kristofoi ni yɔɔ ŋmɛnɛ, ní kɛ mɔdɛŋbɔɔ diɛŋtsɛ pɛiɔ egbalɛ wiemɔ lɛ mli lɛ hewalɛ waa.

12. (a) Mɛɛ yibii Yehowa haa mfonirifeemɔŋ ŋwɛii kɛ shikpɔŋ lɛ woɔ? (b) Mɛɛ shiwoo ní shɛjeɔ mɔ mii yɔɔ Yesaia 45:8 lɛ mli wiemɔi lɛ amli kɛha Kristofoi ŋmɛnɛ?

¹² Eja gbɛ jogbaŋŋ akɛ Yehowa kɛ nibii ní fɔɔ mli baa yɛ adebɔɔ mli lɛ tsu nii ni ekɛfee nibii ni mɛɔ Yudafoi nomii lɛ he mfoniri: “Nyɛ ŋwɛii, nyɛtserea kɛjɛa yiteŋgbɛ nyɛshwiea shi, ní atatui lɛ afɔse jalɛ ashwie shi! Shikpɔŋ lɛ hu agbele enaa ní yiwalaheremɔ aba, ní ekɛ jalɛ akwɛ̃ shikome: mi, Yehowa, mibɔ enɛ!” (Yesaia 45:8) Taakɛ bɔ ni ŋwɛi diɛŋtsɛ haa nugbɔ ní haa wala lɛ nɛɔ eshwieɔ shi lɛ, nakai Yehowa baaha jalɛ hewalɛi ajɛ mfonirifeemɔŋ ŋwɛii anɛ ashwie ewebii lɛ anɔ. Ni taakɛ shikpɔŋ lɛ diɛŋtsɛ gbeleɔ enaa ní ehaa akpaa ŋmɔshi nibii babaoo lɛ, nakai nɔŋŋ Yehowa baaha mfonirifeemɔŋ shikpɔŋ lɛ awo nifeemɔi ní kɛ ejalɛ yiŋtoo lɛ kpãa gbee—titri lɛ yiwalaheremɔ kɛha ewebii ní yɔɔ nomŋɔɔ mli yɛ Babilon lɛ. Yɛ afi 1919 mli lɛ, Yehowa ha ‘ŋwɛi’ kɛ ‘shikpɔŋ’ wo yibii ni ji nifeemɔi yɛ gbɛ ní tamɔ nakai nɔŋŋ nɔ koni ekɛkpɔ̃ ewebii lɛ. Kɛ́ Kristofoi na nibii nɛɛ ŋmɛnɛ lɛ, ehaa amɛnáa miishɛɛ waa. Mɛni hewɔ? Ejaakɛ nakai nifeemɔi lɛ wajeɔ amɛhemɔkɛyeli, beni amɛkwɛɔ be mli ní mfonirifeemɔŋ ŋwɛi, ni ji Nyɔŋmɔ Maŋtsɛyeli lɛ kɛ jɔɔmɔi baaba jalɛ shikpɔŋ nɔ lɛ gbɛ lɛ. Yɛ nakai beaŋ lɛ, jalɛ nifeemɔ kɛ yiwalaheremɔ ní baajɛ mfonirifeemɔŋ ŋwɛii kɛ shikpɔŋ lɛ ŋɔɔ lɛ nɔ baakwɔ kwraa fe nɔ ni ba beni abutu blema Babilon lɛ. Mɛɛ naagbee mlibaa ní yɔɔ nyam diɛŋtsɛ enɛ baaji kɛha Yesaia wiemɔi lɛ nɛkɛ!—2 Petro 3:13; Kpojiemɔ 21:1.

Jɔɔmɔi ní Maŋtsɛ ní Yehowa Ji lɛ Nɔkpɛlɛmɔ Kɛbaa

13. Mɛni hewɔ jwɛŋmɔ bɛ mli akɛ adesai aaate shi awo Yehowa yiŋtoi lɛ?

¹³ Yɛ wɔsɛɛ be mli jɔɔmɔi ní yɔɔ miishɛɛ lɛ mlitsɔɔmɔ nɛɛ sɛɛ lɛ, gbalɛ lɛ mli wiemɔi lɛ tsake kwraa, ni Yesaia jaje kpóo ní bɔ he enyɔ: “Kpóo ha mɔ ni kɛ efeelɔ lɛ béɔ, mɔ ni ji ŋɛsukó tamɔ shikpɔŋ sũ ŋɛsukói lɛ eko nɔŋŋ! Aso sũ aaakɛɛ eshɔ̃lɔ akɛ: Mɛni ofeɔ nɛɛ? aloo oninenaa nitsumɔ aaakɛɛ akɛ: Ebɛ niji! lo? Kpóo ha mɔ ni kɛɔ etsɛ akɛ: Mɛɛba ofɔ́? aloo yoo akɛ: Mɛɛba okɔ̃mɔ?” (Yesaia 45:9, 10) Eyɛ faŋŋ akɛ, Israelbii lɛ teɔ shi amɛwoɔ nɔ ni Yehowa egba efɔ̃ shi lɛ. Eeenyɛ eba akɛ, amɛheee amɛyeee akɛ Yehowa baaŋmɛ gbɛ ní ewebii lɛ aya nomŋɔɔ mli. Aloo ekolɛ amɛnaa tɔmɔ yɛ wiemɔ ní awieɔ akɛ wɔŋjalɔi amaŋ ko nɔ maŋtsɛ ji mɔ ni baakpɔ̃ Israel, yɛ maŋtsɛ ní jɛ David we lɛ moŋ najiaŋ lɛ he. Bɔni afee ní Yesaia kɛfee bɔ ni jwɛŋmɔ bɛ shitee-kɛ-wooi nɛɛ amli lɛ he mfoniri lɛ, ekɛ shitee-kɛ-wolɔi lɛ to gbɛshɔ̃lɔ sũ kɛ sũ nii kukuji ní ekumɔ ní baaka akɛ eeete shi ewo nilee ní efeelɔ lɛ yɔɔ lɛ he. Nɔ̃ tuuntu ní nishɔ̃lɔ lɛ shɔ̃ lɛ moŋ miikɛɛ nishɔ̃lɔ lɛ agbɛnɛ akɛ ebɛ niji loo hewalɛ ní akɛshɔ̃ɔ nii. Mɛɛ kwashiai asane nɛ! Shitee-kɛ-wolɔi lɛ tamɔ gbekɛbii bibii ní miika akɛ amɛaawie amɛshi hegbɛ ní amɛfɔlɔi yɔɔ lɛ.

14, 15. Mɛni wiemɔi ni ji “Mɔ krɔŋkrɔŋ” lɛ kɛ ‘Feelɔ’ lɛ jieɔ lɛ kpo yɛ Yehowa he?

¹⁴ Yesaia kɛ Yehowa hetoo ní ekɛha shitee-kɛ-wolɔi nɛɛ ha, akɛ: “Bɔ ni Yehowa, Israel Mɔ krɔŋkrɔŋ kɛ efeelɔ lɛ, kɛɛ nɛ: Nii ní baaba lɛ nyɛbia mi; shi mibii kɛ mininenaa nitsumɔ lɛ nyɛshia nyɛhaa mi! Mi mifee shikpɔŋ lɛ, ni mibɔ gbɔmɛi mito nɔ; mi miniji gbele ŋwɛi mli, ni mifã amɛsafo lɛ fɛɛ. Mi nɔŋŋ mitee lɛ shi yɛ jalɛ naa, ni majaje egbɛ̀i lɛ fɛɛ: lɛ nɔŋŋ eeesaa eto mimaŋ lɛ ni eeeŋmɛɛ minomi lɛ ahe, jeee yinii anaa, ni jeee nyɔɔŋnii anaa: bɔ ni Yehowa Zebaot kɛɛ ji no.”—Yesaia 45:11-13.

¹⁵ Yehowa kɛ wiemɔ ní ewie lɛ diɛŋtsɛ ehe akɛ “Mɔ krɔŋkrɔŋ” lɛ miima bɔ ni eyɔɔ krɔŋkrɔŋ lɛ nɔ mi. Ni ekɛ tsɛmɔ ní etsɛɔ ehe akɛ ‘Feelɔ’ lɛ miima hegbɛ ní ekɛkpɛɔ eyiŋ ákɛ Bɔlɔ, yɛ bɔ ni esa akɛ nibii aya nɔ aha lɛ he lɛ nɔ mi. Yehowa nyɛɔ etswaa Israelbii lɛ adafi yɛ nibii ní baaba lɛ ahe, ni ekwɛɔ eninenaa nitsumɔ, ni ji emaŋ lɛ nɔ jogbaŋŋ. Shikome ekoŋŋ lɛ, etsɔɔ akɛ shishitoo mlai ní kɔɔ adebɔɔ kɛ nibii akpojiemɔ he lɛ kɛ amɛhe yɛ tsakpãa. Ákɛ jeŋ muu lɛ fɛɛ Bɔlɔ lɛ, Yehowa yɛ hegbɛ akɛ ekudɔɔ nibii ní baa mli lɛ yɛ gbɛ ní ekpɛ eyiŋ yɛ he lɛ nɔ. (1 Kronika 29:11, 12) Yɛ sane ní wɔsusuɔ he nɛɛ gbɛfaŋ lɛ, Jeŋ Muu Fɛɛ Nɔyelɔ lɛ ekpɛ eyiŋ akɛ ebaatée Koresh, ni ji wɔŋjalɔ lɛ shi ákɛ Israel kpɔ̃lɔ. Eyɛ mli akɛ be ní Koresh baaba lɛ yɛ wɔsɛɛ be mli lolo moŋ, shi nɔmimaa yɛ he waa tamɔ bɔ ni ayɔɔ nɔmimaa waa akɛ ŋwɛi kɛ shikpɔŋ yɛ lɛ. Belɛ, Israelbii lɛ ateŋ namɔ baaka akɛ ebaawie eshi Tsɛ lɛ, ni ji “Yehowa Zebaot”?

16. Mɛni hewɔ esa akɛ Yehowa tsuji aba amɛhe shi amɛha lɛ lɛ?

¹⁶ Nɛkɛ Yesaia wolo lɛ mli kukuji nɛɛ nɔŋŋ hiɛ yiŋtoo kroko hu hewɔ ní esa akɛ Nyɔŋmɔ tsuji aba amɛhe shi amɛha lɛ lɛ. Eyiŋkpɛi lɛ yɛ kɛha etsuji lɛ ahilɛ-kɛhamɔ be fɛɛ be. (Hiob 36:3) Efee mlai koni eye ebua ewebii ní amɛná he sɛɛ. (Yesaia 48:17) Yudafoi ní hi shi yɛ Koresh gbii lɛ amli, ní kpɛlɛ maŋtsɛ ní Yehowa ji lɛ nɔ lɛ na akɛ enɛ ji anɔkwale. Koresh, ni fee nii yɛ Yehowa jalɛ lɛ kɛ gbeekpamɔ naa lɛ, ha amɛ hegbɛ akɛ amɛshi Babilon kɛya amɛmaŋ koni amɛyasaa amɛma sɔlemɔtsu lɛ ekoŋŋ. (Ezra 6:3-5) Nakai nɔŋŋ hu ŋmɛnɛ, mɛi ni kɛ Nyɔŋmɔ mlai tsuɔ nii yɛ amɛ daa gbi shihilɛi amli, ní amɛbaa amɛhe shi amɛhaa emaŋtsɛyeli lɛ, náa jɔɔmɔi babaoo.—Lala 1:1-3; 19:8; 119:105; Yohane 8:31, 32.

Jɔɔmɔi Kɛha Jeŋmaji Krokomɛi

17. Yɛ Israel sɛɛ lɛ, namɛi hu baaná Yehowa yiwalaheremɔ nifeemɔi lɛ ahe sɛɛ, ni yɛ mɛɛ gbɛ nɔ?

¹⁷ Jeee Israel pɛ baafee maŋ ní baaná Babilon shigbeemɔ lɛ he sɛɛ. Yesaia kɛɔ akɛ: “Bɔ ni Yehowa kɛɛ nɛ: Mizraim nitsumɔ nii kɛ Kush jarayeli mli sɛɛnamɔ kɛ Sebabii, ni ji gbɔmɛi kakadaji lɛ, aaaho kɛaaba oŋɔɔ ni amɛaatsɔmɔ onii, amɛaanyiɛ osɛɛ, gboklɛi amli amɛaanyiɛ kɛaaba, amɛaakoto bo ni amɛaakpao fai akɛ: Lɛɛlɛŋ, omli Mawu yɔɔ, ni Nyɔŋmɔ ko bɛ sɛɛ dɔŋŋ!” (Yesaia 45:14) Yɛ Mose gbii lɛ amli lɛ, “futufutu gbɔmɛi babaoo” ní amɛjeee Israelbii fata Israelbii lɛ ahe yɛ amɛ Gbɛfaa kɛmiijɛ Mizraim lɛ mli. (2 Mose 12:37, 38) Yɛ nakai gbɛ nɔŋŋ nɔ lɛ, gbɔi hu baafata Yudafoi nomii ni kuɔ amɛsɛɛ kɛjɛɔ Babilon kɛyaa amɛmaŋ lɛ ahe. Ányɛŋ mɛi ní amɛjeee Yudafoi nɛɛ anɔ akɛ amɛfata he kɛya, shi moŋ ‘amɛ diɛŋtsɛ amɛaaho kɛaaba.’ Kɛ́ Yehowa wie akɛ, “amɛaakoto bo” ni “amɛaakpao fai” lɛ, belɛ eetsɔɔ heshibaa kɛ bulɛ ní nɛkɛ gbɔi nɛɛ baajɛ amɛ diɛŋtsɛ amɛsuɔmɔ mli amɛjie lɛ kpo amɛtsɔɔ Israel lɛ. Kɛ́ amɛwo gboklɛi lɛ, no lɛ ebaafee nɔ ni amɛjɛ amɛsuɔmɔ mli amɛwo, ni tsɔɔ suɔmɔ ní amɛyɔɔ akɛ amɛaasɔmɔ Nyɔŋmɔ webii ní ekɛ amɛ efee kpaŋmɔ lɛ, mɛi ní amɛaakɛɛ amɛ akɛ: “Omli Mawu yɔɔ” lɛ. Amɛbaajá Yehowa akɛ mɛi ní etsake kɛba Yuda jamɔ mli, yɛ kpaŋmɔ ní ekɛ Israel fee lɛ mli gbɛjianɔtoi lɛ anaa.—Yesaia 56:6.

18. Namɛi ená kpɔ̃mɔ ní Yehowa kpɔ̃ “Nyɔŋmɔ Israel lɛ” he sɛɛ ŋmɛnɛ, ni yɛ mɛɛ gbɛ̀i anɔ?

¹⁸ Kɛjɛ afi 1919 beni aŋmɛɛ “Nyɔŋmɔ Israel lɛ” he kɛjɛ mumɔŋ nomŋɔɔ mli lɛ kɛbaa nɛɛ, Yesaia wiemɔi lɛ ená emlibaa ní da fe nɔ ni ba yɛ Koresh gbii lɛ amli lɛ. Gbɔmɛi akpekpei abɔ ní yɔɔ shikpɔŋ lɛ nɔ fɛɛ ejie suɔmɔ ní amɛyɔɔ akɛ amɛaasɔmɔ Yehowa lɛ kpo. (Galatabii 6:16; Zakaria 8:23) Taakɛ ‘nitsulɔi’ kɛ ‘jarayelɔi’ ní Yesaia tsĩ amɛ tã lɛ ji lɛ, amɛjɛɔ miishɛɛ mli amɛkɛ amɛgbɔmɔtsoŋ hewalɛ kɛ shika gbɛfaŋ nibii ní amɛyɔɔ lɛ haa kɛfiɔ anɔkwa jamɔ sɛɛ. (Mateo 25:34-40; Marko 12:30) Amɛjɔ́ɔ amɛhe nɔ amɛhaa Nyɔŋmɔ ni amɛnyiɛɔ egbɛ̀i lɛ anɔ, ni amɛtsɔmɔɔ etsuji yɛ miishɛɛ mli. (Luka 9:23) Amɛjáa Yehowa pɛ, ni amɛnáa sɛɛnamɔi ní jɛɔ naanyobɔɔ ní amɛkɛ Yehowa “tsulɔ anɔkwafo kɛ nilelɔ,” ní kɛ Nyɔŋmɔ yɔɔ kpaŋmɔ wekukpaa krɛdɛɛ mli lɛ náa lɛ mli kɛbaa lɛ mli ŋɔɔmɔ. (Mateo 24:45-47; 26:28; Hebribii 8:8-13) Eyɛ mli akɛ amɛbɛ nakai kpaŋmɔ lɛ mli moŋ, shi nakai ‘nitsulɔi’ kɛ ‘jarayelɔi’ lɛ náa he sɛɛ ni amɛyeɔ mlai ní kɔɔ he lɛ anɔ, ni amɛkɛ ekãa jajeɔ akɛ: “Nyɔŋmɔ ko bɛ sɛɛ dɔŋŋ!” Kwɛ bɔ ni eyɔɔ miishɛɛ akɛ wɔ diɛŋtsɛ wɔkɛ wɔhiŋmɛii miiye shweremɔ ní nɛkɛ anɔkwa jamɔ sɛɛfilɔi nɛɛ shwereɔ babaoo lɛ he odase ŋmɛnɛ!—Yesaia 60:22.

19. Mɛni baaba mɛi ni yaa nɔ amɛjáa amagai lolo lɛ anɔ?

¹⁹ Beni gbalɔ lɛ jie lɛ kpo akɛ gbɔmɛi ní jɛ jeŋmaji lɛ amli baafata he kɛjá Yehowa sɛɛ lɛ, ejaje akɛ: “Asonɔkwa, bo ji Mawu ní etee ehe, Israel Nyɔŋmɔ, yiwalaherelɔ!” (Yesaia 45:15) Eyɛ mli akɛ Yehowa tsĩɔ ehe naa yɛ ehewalɛ lɛ kpojiemɔ mli bianɛ moŋ, shi wɔsɛɛ lɛ eteeŋ ehe dɔŋŋ. Ebaajie ehe kpo akɛ lɛ ji Israel Nyɔŋmɔ lɛ, ewebii lɛ a-Yiwalaherelɔ lɛ. Shi kɛlɛ, Yehowa efeŋ mɛi ni kɛ amɛhiɛ fɔ̃ɔ amagai anɔ lɛ a-Yiwalaherelɔ. Yesaia wie nakai gbɔmɛi lɛ ahe akɛ: “Amɛhiɛ aaagboi, ni amɛ fɛɛ amɛhiɛ aaashwie shi, mɛi ní feɔ amagai lɛ, amɛ fɛɛ amɛaanyiɛ kɛ hiɛshishwiemɔ.” (Yesaia 45:16) Amɛ hiɛshishwiemɔ lɛ mli baawa kwraa fe be kukuoo mli hiɛgbele kɛ hiɛshishwiemɔ henumɔ ko kɛkɛ. Ebaafee gbele—nɔ ni Yehowa tsá nɔ ewo Israel shi yɛ he lɛ sɛɛsɛɛ.

20. Israel baaná “naanɔ yiwalaheremɔ” mli niiashikpamɔ yɛ mɛɛ gbɛ nɔ?

²⁰ “Shi Yehowa aaahere Israel yiwala kɛ naanɔ yiwalaheremɔ: nyɛhiɛ gboiŋ ni asaŋ nyɛhiɛ eshwieŋ shi gbi ko gbi ko kɛyashi naanɔ.” (Yesaia 45:17) Yehowa ewo naanɔ yiwalaheremɔ he shi kɛha Israel, shi enɛ damɔ nɔ ko nɔ. Esa akɛ Israel aya nɔ ‘ekɛ Yehowa afee ekome.’ Kɛ́ Israel ku nakai ekomefeemɔ lɛ mli kɛtsɔ kpoomɔ ní ekpoo Yesu akɛ Mesia lɛ nɔ lɛ, “naanɔ yiwalaheremɔ” he gbɛkpamɔ ní eyɔɔ ákɛ maŋ lɛ baaŋmɛɛ lɛ kwraa. Shi kɛlɛ, mɛi komɛi yɛ Israel ní baajie Yesu mli hemɔkɛyeli kpo, ni mɛnɛɛmɛi baafee Nyɔŋmɔ Israel lɛ, ní baaye heloonaa Israel najiaŋ lɛ shishijee bii. (Mateo 21:43; Galatabii 3:28, 29; 1 Petro 2:9) Mumɔŋ Israel hiɛ eshwieŋ shi kɔkɔɔkɔ. Abaaŋɔ lɛ awo “naanɔ kpaŋmɔ” ko mli.—Hebribii 13:20.

Anyɛɔ akɛ He Fɔ̃ɔ Yehowa Nɔ, yɛ Adebɔɔ kɛ Saji Akpojiemɔ Mli

21. Yehowa jieɔ ehe kpo akɛ anyɛɔ akɛ he fɔ̃ɔ enɔ kɛmɔɔ shi yɛ adebɔɔ kɛ saji akpojiemɔ mli yɛ mɛɛ gbɛ nɔ?

²¹ Ani Yudafoi lɛ baanyɛ amɛkɛ amɛhe afɔ̃ naanɔ yiwalaheremɔ he shiwoo ní Yehowa kɛha Israel lɛ nɔ? Yesaia haa hetoo akɛ: “Bɔ ni Yehowa, mɔ ni bɔ ŋwɛi lɛ, Nyɔŋmɔ, mɔ ni shɔ̃ shikpɔŋ lɛ ni efee ni ekɛma shi, ni ebɔɔɔ lɛ efolo, shi eshɔ̃ lɛ ni ahi nɔ lɛ, kɛɛ nɛ: Mi ji Yehowa, ni mɔ ko bɛ sɛɛ dɔŋŋ! Jeee teemɔhe ko miwie yɛ, jeee shikpɔŋ ní ewo duŋ lɛ nɔ he ko; mikɛko Yakob seshibii lɛ akɛ: Nyɛtaoa mi yakatswaa! Mi ji Yehowa ní wieɔ jalɛ lɛ, ní jajeɔ nii ní ja lɛ!” (Yesaia 45:18, 19) Enɛ ji shii ejwɛ nɔ kɛ naagbee nɔ̃ yɛ yitso nɛɛ mli ní Yesaia jeɔ gbalɛ wiemɔ ní mli wa shishi kɛ wiemɔ kuku ni ji: ‘Bɔ ni Yehowa kɛɛ nɛ.’ (Yesaia 45:1, 11, 14) Mɛni Yehowa kɛɛ? Ekɛɔ akɛ adebɔɔ kɛ saji akpojiemɔ fɛɛ mli lɛ, anyɛɔ akɛ he fɔ̃ɔ enɔ. Ebɔɔɔ shikpɔŋ lɛ “efolo.” Nakai nɔŋŋ hu ekɛɛɛ emaŋ, ni ji Israel, ní amɛtao esɛɛgbɛ “yakatswaa.” Taakɛ bɔ ni Nyɔŋmɔ baatsu eyiŋtoi ní kɔɔ shikpɔŋ lɛ he lɛ ahe nii lɛ, nakai nɔŋŋ Nyɔŋmɔ baatsu eyiŋtoo ní kɔɔ ewebii ni ehala amɛ lɛ ahe lɛ hu he nii. Kɛ́ akɛto mɛi ní sɔmɔɔ apasa nyɔŋmɔi lɛ awiemɔi ní anuuu shishi jogbaŋŋ lɛ ahe lɛ, Yehowa wieɔ faŋŋ ni mɛi fɛɛ nuɔ. Ewiemɔi lɛ jalɛ wiemɔi ni, ni amɛbaaba mli anɔkwale. Mɛi ní sɔmɔɔ lɛ lɛ sɔmɔŋ lɛ yakatswaa.

22. (a) Yudafoi nomii ní yɔɔ Babilon lɛ baanyɛ aná nɔmimaa yɛ mɛni he? (b) Mɛɛ nɔmimaa Kristofoi ní yɔɔ ŋmɛnɛ lɛ yɔɔ?

²² Kɛha Nyɔŋmɔ webii ni yɔɔ nomŋɔɔ mli yɛ Babilon lɛ, nakai wiemɔi lɛ ji shiwoo wiemɔi ní tsɔɔ akɛ Shiwoo Shikpɔŋ lɛ eyaŋ nɔ ekãŋ shi amaŋfɔ. Abaasaa abahi nɔ ekoŋŋ. Ni Yehowa shiwooi ní ekɛha amɛ lɛ ba mli anɔkwale. Kɛ́ wɔɔlɛɛ mli lɛ, Yesaia wiemɔi lɛ ji shiwoo wiemɔi kɛha Nyɔŋmɔ webii ní yɔɔ ŋmɛnɛ lɛ akɛ shikpɔŋ lɛ hiɛ kpataŋ ní eeetsɔ amaŋfɔ—nɔ ko ní la eshã, taakɛ mɛi komɛi heɔ yeɔ lɛ, aloo nɔ ni akɛ nuklea okplɛmii baakpata hiɛ, taakɛ mɛi krokomɛi sheɔ gbeyei lɛ. Nyɔŋmɔ eto eyiŋ akɛ shikpɔŋ lɛ baahi shi kɛya naanɔ, ni akɛ paradeiso hefɛo baawula lɛ ni mɛi ni baahi nɔ lɛ baafee jalɔi. (Lala 37:11, 29; 115:16; Mateo 6:9, 10; Kpojiemɔ 21:3, 4) Hɛɛ, taakɛ eji yɛ Israel gbɛfaŋ lɛ, Yehowa wiemɔi lɛ baafee nɔ ni anyɛɔ akɛ he fɔ̃ɔ nɔ.

Yehowa Kpã Emɔbɔnalɛ lɛ Mli

23. Mɛni baaba mɛi ní jáa amagai lɛ anɔ, ni mɛni baa mɛi ní jáa Yehowa lɛ anɔ?

²³ Ama Israel yiwalaheremɔ lɛ nɔ mi yɛ Yehowa wiemɔi ní nyiɛ sɛɛ lɛ mli, akɛ: “Nyɛbuaa nyɛhe naa kɛbaa, nyɛ fɛɛ tswɛ̃m nyɛbabɛŋkɛa, nyɛ mɛi ní nyɛje mli yɛ jeŋmaji lɛ amli lɛ: mɛi ní tereɔ amɛmaga tso, ní amɛkpaa nyɔŋmɔ ko ní nyɛɛɛ mɔ yiwala ahere fai lɛ, amɛleee nɔ ko. Nyɛjajea ní nyɛkɛbaa, hɛɛ, nyɛ fɛɛ nyɛyaa ajina! Namɔ ha anu enɛ kɛjɛ teteete? namɔ jaje enɛ kɛjɛ blema beebe? Aso jeee mi, Yehowa ni? ni misɛɛ lɛ Nyɔŋmɔ ko bɛ dɔŋŋ; Mawu jalɔ kɛ yiwalaherelɔ, ni misɛɛ lɛ mɔ ko mɔ ko bɛ dɔŋŋ!” (Yesaia 45:20, 21) Yehowa kɛ fãmɔ ha ‘mɛi ní eje mli lɛ’ ní amɛkɛ amɛyiwalaheremɔ lɛ ato nɔ ni baa mɛi ní jáa amagai lɛ anɔ lɛ he. (5 Mose 30:3; Yeremia 29:14; 50:28) Akɛni wɔŋjalɔi sɔleɔ amɛhaa nyɔŋmɔi ní bɛ hewalɛ, ní nyɛŋ amɛyiwala ahere ní amɛsɔmɔɔ amɛ hu hewɔ lɛ, “amɛleee nɔ ko.” Amɛjamɔ lɛ feɔ yaka—nɔ ni sɛɛnamɔ ko bɛ he. Shi, mɛi ní jáa Yehowa lɛ naa akɛ eyɛ hewalɛ ní ekɛaaha nibii ní egba “kɛjɛ teteete,” ní ewebii ní yɔɔ nomŋɔɔ mli yɛ Babilon lɛ ayiwalaheremɔ fata he lɛ fɛɛ aba mli. Yehowa hewalɛ kɛ wɔsɛɛ be nii ní enyɛɔ eleɔ kɛtsɔɔ hiɛ nɛɛ haa esoroɔ lɛ kwraa yɛ nyɔŋmɔi krokomɛi fɛɛ ahe. Eji “Mawu jalɔ kɛ yiwalaherelɔ” lɛɛlɛŋ.

‘Yiwalaheremɔ Ji Wɔ-Nyɔŋmɔ lɛ Nɔ̃’

24, 25. (a) Mɛɛ ninefɔɔ Yehowa kpãa mli, ni mɛni hewɔ nɔmimaa yɔɔ eshiwoo lɛ he akɛ ebaaba mli lɛ? (b) Mɛni Yehowa biɔ yɛ gbɛ ní ja nɔ?

²⁴ Yehowa mɔbɔnalɛ lɛ tsirɛ lɛ ni ekpã ninefɔɔ nɛɛ mli akɛ: “Nyɛtsɔmɔa nyɛhe kɛbaa miŋɔɔ, koni ahere nyɛyiwala, nyɛ shikpɔŋ lɛ naagbeehei lɛ fɛɛ, ejaakɛ mi ji Mawu, ni mɔ ko bɛ dɔŋŋ! Mikã mi diɛŋtsɛ mihe kitã, ni wiemɔ ko eje jalɛ naabu lɛŋ, ni ekuŋ esɛɛ dɔŋŋ: Ákɛ nakutso fɛɛ nakutso aaakula shi aha mi, ni lilɛi fɛɛ lilɛi aaakã kitã, ni aaakɛɛ yɛ mihe akɛ: Yehowa mli kɛkɛ jalɛ kɛ hewalɛ yɔɔ; eŋɔɔ mɛi aaaba, ni mɛi fɛɛ ní mli ewo lɛ la lɛ ahiɛ aaagboi. Yehowa mli Israel seshi fɛɛ aaaye bem yɛ, enɔ amɛaashwã amɛaafɔ̃.”—Yesaia 45:22-25.

²⁵ Yehowa wo Israel shi akɛ ebaahere mɛi ni yɔɔ Babilon ní kuɔ amɛsɛɛ kɛbaa eŋɔɔ lɛ ayiwala. Ákɛ egbalɛ baafee efolo lɛ ji nɔ ko ní nyɛŋ aba mli ejaakɛ Yehowa yɛ shwelɛ kɛ nyɛmɔ fɛɛ ní ekɛaahere ewebii lɛ ayiwala. (Yesaia 55:11) Anyɛɔ akɛ he fɔ̃ɔ Nyɔŋmɔ wiemɔi anɔ diɛŋtsɛ, shi anyɛɔ akɛ he fɔ̃ɔ nɔ po fe nakai kɛji Yehowa kɛ ekitakamɔ fata he kɛma nɔ mi lɛ. (Hebribii 6:13) Ebiɔ heshibaa (“nakutso fɛɛ nakutso aaakula shi”) kɛ naashiwoo (“lilɛi fɛɛ lilɛi aaakã kitã”) kɛjɛɔ mɛi fɛɛ ní taoɔ ní amɛná ehiɛ duromɔ lɛ adɛŋ yɛ gbɛ ní ja nɔ. Abaahere Israelbii lɛ ateŋ mɛi ní yaa nɔ amɛjáa Yehowa lɛ ayiwala. Amɛbaanyɛ amɛkɛ nɔ ni Yehowa feɔ ehaa amɛ lɛ ashwã.—2 Korintobii 10:17.

26. Te “asafo babaoo” ni jɛ jeŋmaji fɛɛ amli lɛ ehere ninefɔɔ ní Yehowa kɛha akɛ amɛku amɛsɛɛ amɛba eŋɔɔ lɛ nɔ amɛha tɛŋŋ?

²⁶ Shi, ninefɔɔ ní Nyɔŋmɔ kɛhaa akɛ aku sɛɛ kɛba eŋɔɔ lɛ bɛ kɛha nomii ni hi blema Babilon lɛ pɛ. (Bɔfoi lɛ Asaji 14:14, 15; 15:19; 1 Timoteo 2:3, 4) Ekɛ ninefɔɔ nɛɛ miiha lolo, ni “asafo babaoo . . . ni jɛ jeŋmaŋ fɛɛ jeŋmaŋ” ehere nɔ ni amɛjajeɔ akɛ: “Yiwalaheremɔ ji wɔ-Nyɔŋmɔ . . . lɛ, kɛ toobi lɛ [Yesu] nɔ̃!” (Kpojiemɔ 7:9, 10; 15:4) Daa afi lɛ, mɛi heei akpei ohai abɔ haa asafo babaoo lɛ ayifalɛ lɛ yaa hiɛ babaoo kɛtsɔ Nyɔŋmɔ ŋɔɔ ní amɛbaa, kɛ kpɛlɛmɔ ní amɛkpɛlɛɔ emaŋtsɛyeli lɛ nɔ kwraa, kɛ jajemɔ ní amɛjajeɔ faŋŋ akɛ amɛtu amɛhe amɛha lɛ lɛ nɔ. Kɛfata he lɛ, amɛkɛ anɔkwayeli fiɔ mumɔŋ Israel, ni ji ‘Abraham seshi’ lɛ sɛɛ. (Galatabii 3:29) Amɛjieɔ suɔmɔ ní amɛyɔɔ kɛha Yehowa jalɛ nɔyeli lɛ kpo kɛtsɔɔ sanejajemɔ nɛɛ nɔ yɛ jeŋ fɛɛ, akɛ: “Yehowa mli kɛkɛ jalɛ kɛ hewalɛ yɔɔ.”a Yɛ bɔfo Paulo wolo ní eŋma eyaha Romabii lɛ mli lɛ, etsɛ́ bɔ ni Septuagint lɛ tsɔɔ Yesaia 45:23 lɛ shishi eha lɛ sɛɛ ni ekɛtsɔɔ akɛ yɛ naagbee lɛ, mɔ fɛɛ mɔ ní yɔɔ wala mli lɛ baakpɛlɛ Nyɔŋmɔ maŋtsɛyeli lɛ nɔ ni amɛbaaya nɔ amɛjie egbɛi lɛ yi daa.—Romabii 14:11; Filipibii 2:9-11; Kpojiemɔ 21:22-27.

27. Mɛni hewɔ Kristofoi ni yɔɔ ŋmɛnɛ lɛ baanyɛ aná Yehowa shiwoi amli hekɛnɔfɔɔ kɛmɔ shi lɛ?

²⁷ Mɛni hewɔ asafo babaoo lɛ mli bii lɛ baanyɛ aná hekɛnɔfɔɔ akɛ Nyɔŋmɔ ŋɔɔ ní amɛaaba lɛ tsɔɔ yiwalaheremɔ lɛ? Ejaakɛ anyɛɔ akɛ he fɔ̃ɔ Yehowa shiwoi anɔ, taakɛ gbalɛ wiemɔi ní anaa yɛ Yesaia yitso 45 lɛ tsɔɔ faŋŋ lɛ. Taakɛ bɔ ni Yehowa yɔɔ hewalɛ kɛ nilee ní ekɛbɔ ŋwɛi kɛ shikpɔŋ lɛ, nakai nɔŋŋ hu eyɔɔ hewalɛ kɛ nilee ní ekɛaaha egbalɛi aba mli anɔkwale. Ni taakɛ bɔ ni ekwɛ ni Koresh he gbalɛ lɛ ba mli pɛpɛɛpɛ lɛ, nakai nɔŋŋ hu ebaaha Biblia gbalɛ fɛɛ gbalɛ ní miimɛ amɛmlibaa lolo lɛ fɛɛ aba mli. No hewɔ lɛ, Yehowa jálɔi baanyɛ aná hekɛnɔfɔɔ akɛ etsɛŋ ni Yehowa baajie ehe kpo ekoŋŋ akɛ “Mawu jalɔ kɛ yiwalaherelɔ.”

[Shishigbɛ niŋmaa]

[Mfonirii ni yɔɔ baafa 80, 81]

Yehowa, mɔ ni fee la ní ebɔ duŋ lɛ, baanyɛ eha toiŋjɔlɛ aba ni ebaanyɛ ekɛ amanehulu hu aba

[Mfoniri ni yɔɔ baafa 83]

Yehowa baaha “ŋwɛi” anɛ jɔɔmɔi ashwie shi ni “shikpɔŋ lɛ” hu baawo yiwalaheremɔ

[Mfoniri ni yɔɔ baafa 84]

Ani esa akɛ sũ nii kukuji ní ekumɔ lɛ ate shi awo nilee ní amɛfeelɔ lɛ yɔɔ lɛ?

[Mfoniri ni yɔɔ baafa 89]

Yehowa ebɔɔɔ shikpɔŋ lɛ efolo