Yitso Kpawo
Kuu Osɛɛ Kɛba Yehowa Jamɔ He Ekoŋŋ
1. Mɛni ji Babilon nyɔŋmɔi titrii lɛ ateŋ enyɔ komɛi agbɛi, ni mɛni agba afɔ̃ shi yɛ amɛhe?
KƐ́ ISRAEL tee nomŋɔɔ mli yɛ Babilon lɛ, apasa jamɔ baabɔle ehe fɛɛ kɛbaakpe. Yɛ Yesaia beaŋ lɛ, no mli lɛ Yehowa webii lɛ yɛ amɛ diɛŋtsɛ amɛshikpɔŋ nɔ lolo, ní amɛyɛ sɔlemɔtsu kɛ osɔfoyeli gbɛjianɔtoo lɛ. Ni kɛlɛ, Nyɔŋmɔ maŋ ní ejɔɔ amɛhe nɔ amɛha lɛ lɛ mli bii pii eŋmɛɛ amɛhe amɛha wɔŋjamɔ. Belɛ, ehe miihia ní asaa amɛ kɛtsɔ hiɛ koni Babilon apasa nyɔŋmɔi lɛ ahe gbeyeishemɔ akaye amɛnɔ loo alaka amɛ ní amɛyasɔmɔ amɛ. No hewɔ lɛ, beni Yesaia wieɔ Babilon nyɔŋmɔi wuji lɛ ateŋ enyɔ he yɛ gbalɛ wiemɔ mli lɛ, ekɛɛ akɛ: “Bel eba shi, Nebo ekoto shi; amɛmagai lɛ akɛha gbɛfaa kooloi kɛ jatsuteremɔ kooloi: nii ní nyɛtereɔ kɛfoɔ shi lɛ etsɔ jatsu kɛ tsiimɔ ní haa tɔɔ amɛ.” (Yesaia 46:1) Bel ji amaga nyɔŋmɔ wulu fe fɛɛ yɛ Kaldeabii lɛ ateŋ. Akɛ bulɛ haa Nebo ákɛ nilee kɛ nikasemɔ nyɔŋmɔ. Anaa bulɛ ní mɛi babaoo yɔɔ kɛha nɛkɛ nyɔŋmɔi enyɔ nɛɛ yɛ anɔkwale ní eji akɛ akɛ amɛgbɛi fataa Babilonbii pii agbɛi diɛŋtsɛ he lɛ mli—Belshazar, Nabopolasar, Nebukadnezar, kɛ Nebuzaradan, kɛ́ wɔɔtsĩ fioo komɛi atã.
2. Te ama bɔ ni Babilon nyɔŋmɔi lɛ nyɛŋ nɔ ko kwraa amɛfee lɛ nɔ mi aha tɛŋŋ?
2 Yesaia kɛɔ akɛ Bel “eba shi” ni Nebo “ekoto shi.” Abaaba nɛkɛ apasa nyɔŋmɔi nɛɛ ashi kwraa. Kɛ́ Yehowa tsu ekojomɔ nifeemɔi lɛ ahe nii eshi Babilon lɛ, nɛkɛ nyɔŋmɔi nɛɛ nyɛŋ amɛbaye amɛbua mɛi ní jáa amɛ lɛ. Amɛnyɛŋ amɛhere amɛ diɛŋtsɛ po amɛyiwala! Atereŋ Bel kɛ Nebo kɛnyiɛŋ yɛ hiɛnyamwoo nyiɛmɔ kɛ shifoo mli dɔŋŋ, tamɔ bɔ ni afɔɔ feemɔ yɛ Babilonbii Afi Hee Gbi gbijurɔyeli lɛ mli lɛ. Shi moŋ, ehe baahia ní mɛi ní jáa amɛ lɛ abaloo amɛ kɛya tamɔ jatsu folo ko kɛkɛ. Yijiemɔ kɛ woo kɛ jámɔ ní akɛhaa amɛ lɛ sɛɛ baafo ni ebaatsɔ hefɛoyeli kɛ heguɔgbee.
3. (a) Mɛni baaha Babilonbii lɛ ahe ajɔ̃ amɛhe? (b) Mɛni abaanyɛ akase ŋmɛnɛ kɛjɛ nɔ ni ba Babilon nyɔŋmɔi lɛ anɔ lɛ mli?
3 Kwɛ hejɔ̃mɔ sane ni eji kɛha Babilonbii lɛ akɛ amɛaale akɛ amɛ amagai ní amɛsumɔɔ waa lɛ ebatsɔmɔ jatsui foji kɛkɛ ní kooloi ní tereɔ jatsu lɛ baatere kɛya! Nakai nɔŋŋ hu ŋmɛnɛ, je lɛ nyɔŋmɔi—ni ji nibii ní gbɔmɛi kɛ amɛhiɛ fɔ̃ɔ nɔ kɛ nibii ní amɛfiteɔ amɛhewalɛ yɛ he ní amɛkɛ amɛwala po fɔ̃ɔ shi amɛhaa lɛ—ji lakamɔi. Ninámɔ, tawuu nibii, hiɛtserɛjiemɔi, nɔyelɔi, jakumaŋ loo amɛhe okadii ní yɔɔ, kɛ nibii krokomɛi babaoo ebatsɔmɔ nibii ní akɛ jamɔ kɛ woo haa amɛ. Abaajie bɔ ni nyɔŋmɔi nɛɛ ahe bɛ sɛɛnamɔ ko kwraa lɛ kpo faŋŋ yɛ Yehowa diɛŋtsɛ be ní eto mli.—Daniel 11:38; Mateo 6:24; Bɔfoi lɛ Asaji 12:22; Filipibii 3:19; Kolosebii 3:5; Kpojiemɔ 13:14, 15.
4. Babilon nyɔŋmɔi lɛ ‘baa shi’ ni ‘amɛkotoɔ shi’ yɛ mɛɛ shishinumɔ naa?
4 Beni emaa bɔ ni Babilon nyɔŋmɔi lɛ nyɛɛɛ nɔ ko kwraa amɛfee lɛ nɔ mi lolo lɛ, gbalɛ lɛ tee nɔ akɛ: “Amɛkoto shi, amɛ fɛɛ amɛba shi; amɛnyɛɛɛ jatsu lɛ amɛjie, ni amɛ diɛŋtsɛ lɛ, aŋɔ amɛ nom.” (Yesaia 46:2) Babilon nyɔŋmɔi lɛ tamɔ mɛi ní ‘ekoto shi’ loo ‘amɛdɔrɔ amɛmli,’ tamɔ nɔ ni apila amɛ yɛ ta mli loo mɛi ní gbɔlɛ eha amɛgbɔjɔ. Amɛnyɛɛɛ amɛha jatsu lɛ afee huyɛɛ fioo po loo amɛha kooloi ní baa shi ní tere amɛ lɛ anyɛ aye amɛhe. No hewɔ lɛ, eyɛ mli akɛ Yehowa webii ní ekɛ amɛ efee kpaŋmɔ lɛ yɛ nomŋɔɔ mli yɛ Babilon moŋ, shi ani esa akɛ amɛkɛ woo aha amɛ? Dabi! Yɛ nakai gbɛ nɔ nɔŋŋ lɛ, beni Yehowa tsuji ní afɔ amɛ mu lɛ yɔɔ mumɔŋ nomŋɔɔ mli po lɛ, amɛkɛ woo haaa “Babilon kpeteŋkpele lɛ” apasa nyɔŋmɔi ní nyɛɛɛ atsĩ eshigbeemɔ ní ba yɛ afi 1919 mli lɛ naa, ní nyɛŋ ahere eyiwala kɛjɛ amanehulu ní baaba enɔ yɛ ‘amanehulu kpeteŋkpele’ lɛ mli hu lɛ.—Kpojiemɔ 18:2, 21; Mateo 24:21.
5. Kristofoi ni yɔɔ ŋmɛnɛ lɛ tsiɔ amɛhe kɛjɛɔ tɔmɔi ní Babilonbii wɔŋjalɔi lɛ tɔ̃ lɛ ahe yɛ mɛɛ gbɛ nɔ?
5 Anɔkwa Kristofoi ni yɔɔ ŋmɛnɛ lɛ kulaaa shi amɛhaaa amagai srɔtoi ni yɔɔ lɛ eko kwraa. (1 Yohane 5:21) Sɛŋmɔtso bibii ní akɛtsotsoroɔ kuɛ, ashinaoi ní akɛsɔleɔ, kɛ hetselɔi amagai jeee nibii ní haa anyɛɔ abɛŋkɛɔ Bɔlɔ lɛ babaoo. Amɛnyɛŋ amɛdamɔ mli amɛha wɔ yɛ ehiɛ. Yɛ klɛŋklɛŋ afii oha lɛ mli lɛ, Yesu tsɔɔ ekaselɔi lɛ gbɛ kpakpa ní atsɔɔ nɔ ajáa Nyɔŋmɔ beni ekɛɛ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ; mɔ ko baaa tsɛ lɛ ŋɔɔ, akɛ ja etsɔ minɔ. Kɛji nyɛkpa nɔ ko he fai yɛ migbɛi anɔ lɛ, mafee.”—Yohane 14:6, 14.
“Mitere Nyɛ Kɛjɛ Fɔmɔhe Lɛ”
6. Esoro Yehowa yɛ jeŋmaji lɛ anyɔŋmɔi lɛ ahe yɛ mɛɛ gbɛ nɔ?
6 Beni Yehowa jie sɛɛnamɔ ní bɛ Babilon amaga nyɔŋmɔi lɛ ajamɔ he lɛ kpo faŋŋ sɛɛ lɛ, ekɛɛ ewebii lɛ akɛ: “Nyɛboa mi toi, nyɛ Yakob we, mɛi fɛɛ ní eshwɛ yɛ Israel we lɛ, nyɛ mɛi ní mihiɛ nyɛ kɛjɛ musuŋ beebe, ní mitere nyɛ kɛjɛ fɔmɔhe lɛ.” (Yesaia 46:3) Kwɛ srɔtofeemɔ ní yɔɔ Yehowa kɛ Babilon amagai ní ashɔ̃ lɛ ateŋ! Babilon nyɔŋmɔi lɛ nyɛɛɛ nɔ ko nɔ ko amɛfee amɛha mɛi ní jáa amɛ lɛ. Kɛ́ amɛbaatsi amɛhe lɛ, ja kooloi ní tereɔ jatsu lɛ eko tere amɛ kɛtee. Nɔ ni tamɔɔɔ enɛ lɛ, Yehowa etee nɔ etere ewebii lɛ aahu. Ehiɛ amɛmli aahu kɛjɛ “fɔmɔhe” lɛ, kɛjɛ be mli ní ato maŋ lɛ shishi lɛ. Esa akɛ bɔ ni Yehowa etere Yudafoi lɛ aahu lɛ he kaimɔi ní yɔɔ miishɛɛ lɛ awo amɛ hewalɛ ní amɛkwa amaga jamɔ kwraa, ní amɛkɛ amɛhiɛ afɔ̃ enɔ ákɛ amɛ-Tsɛ kɛ Naanyo.
7. Kwɛmɔ ní suɔmɔ yɔɔ mli ní Yehowa kɛhaa ejálɔi lɛ nɔ kwɔ kwraa fe kwɛmɔ ní adesai fɔlɔi kɛhaa amɛbii lɛ yɛ mɛɛ gbɛ nɔ?
7 Yehowa yɛ musuŋtsɔlɛ wiemɔi kɛha ewebii lɛ lolo: “Ni kɛyashi gbɔlɛ mli lɛ, mi nɔŋŋ ni, ni kɛyashi waŋjee mli hu mi nɔŋŋ matere: mi mifee, ni mi nɔŋŋ mahiɛ, mi nɔŋŋ matere, ni majie.” (Yesaia 46:4) Bɔ ni Yehowa kwɛɔ ewebii anɔ lɛ fe bɔ ni adesa fɔlɔ ní susuɔ ebii ahe fe fɛɛ lɛ feɔ ehaa amɛ. Beni gbekɛbii lɛ daraa lɛ, ekolɛ amɛhe gbɛnaa nii ní fɔlɔi lɛ nuɔ he akɛ ekã amɛnɔ lɛ baa shi kwraa. Kɛ́ fɔlɔi lɛ gbɔlɔ lɛ, bei pii lɛ gbekɛbii lɛ kwɛɔ amɛ. Ejeee nakai kɔkɔɔkɔ yɛ Yehowa gbɛfaŋ. Ekpaaa ebii ni ji adesai lɛ akwɛmɔ kɔkɔɔkɔ—yɛ amɛgbɔlɛ beaŋ po. Nyɔŋmɔ jálɔi ní yɔɔ ŋmɛnɛ lɛ kɛ amɛhiɛ fɔ̃ɔ amɛ-Bɔlɔ lɛ nɔ ni amɛsumɔɔ lɛ, ni amɛnáa miishɛjemɔ kpele kɛjɛɔ Yesaia gbalɛ wiemɔi nɛɛ amli. Ehe ehiaaa ní amɛfee yeyeeye yɛ gbii loo afii abɔ ní eshwɛ ní amɛkɛbaahi shi yɛ nibii agbɛjianɔtoo nɛɛ mli lɛ he. Yehowa ewo shi akɛ ‘ebaaya nɔ etere’ mɛi ní egbɔlɔ lɛ, ni ebaaha amɛ hewalɛ ní he hiaa amɛ koni amɛnyɛ amɛŋmɛ amɛtsui shi ní amɛya nɔ amɛye anɔkwa. Ebaatere amɛ, ebaawo amɛ hewalɛ, ni ebaajie amɛ.—Hebribii 6:10.
Kwɛmɔ Jogbaŋŋ yɛ Ŋmɛnɛŋmɛnɛ Beaŋ Amagai Ahe
8. Mɛɛ esha ní naajiemɔ bɛ he Yesaia nanemɛi maŋbii lɛ ekomɛi fee?
8 Feemɔ nijiaŋwujee ní mɛɔ Babilonbii ní kɛ amɛhiɛ fɔ̃ɔ amagai, ní abaana faŋŋ akɛ amɛhe bɛ sɛɛnamɔ ko kwraa lɛ anɔ lɛ he mfoniri okwɛ! Ani esa akɛ Israel ahe aye akɛ abaanyɛ akɛ nakai nyɔŋmɔi lɛ ato Yehowa he? Eka shi faŋŋ akɛ dabi. Yehowa bi yɛ gbɛ ni ja nɔ akɛ: “Namɔ he nyɛkɛ mi aaato, ni ekɛ mi aaaye egbɔ? Namɔ nyɛkɛ mi aaasusu ni ekɛ mi aaafee pɛ?” (Yesaia 46:5) Kwɛ bɔ ni Yesaia nanemɛi maŋbii lɛ ateŋ mɛi komɛi bɛ naajiemɔ ko kwraa akɛ amɛtsɔ amɛhe kɛtee amagai ní ewieee, ni wala bɛ amɛmli, ní amɛnyɛɛɛ nɔ ko kwraa amɛfee lɛ ajamɔ he! Yɛ maŋ ní le Yehowa lɛ agbɛfaŋ lɛ, amɛhe ní amɛkɛaafɔ̃ amagai ní wala bɛ amɛmli, ní amɛbɛ hefãmɔ nɔ ko, ní akɛ adesai aniji fee lɛ anɔ lɛ ji kwashiafeemɔ diɛŋtsɛ.
9. Tsɔɔmɔ amaga jalɔi lɛ ekomɛi asusumɔi ní nilee bɛ mli lɛ mli.
9 Susumɔ amaga jálɔi asusumɔ ní nilee bɛ mli kwraa nɛɛ he okwɛ. Gbalɛ lɛ yaa nɔ akɛ: “Amɛfɔteɔ shika kɛjɛɔ fotro mli amɛshwieɔ shi, ni amɛŋmɛɔ jwiɛtɛi hu yɛ nsɛni mli; amɛbɔɔ shika ŋaalɔ apaa ni efeɔ nyɔŋmɔ ko ni amɛkotoɔ shi ni amɛjáa lɛ!” (Yesaia 46:6) Amaga jálɔi sumɔɔ ní amɛfite shika babaoo ní amɛkɛfee amɛnyɔŋmɔ lɛ, tamɔ nɔ ni amaga ní jara wa lɛ yɛ hewalɛ babaoo ní akɛhereɔ mɔ yiwala fe amaga ní akɛ tso fee. Ni kɛlɛ, mɔdɛŋbɔɔ fɛɛ ní akɛwoɔ efeemɔ mli, loo bɔ ni nibii ní akɛfee lɛ jara wa ha lɛ fɛɛ sɛɛ lɛ, amaga ní wala bɛ mli lɛ, amaga ní wala bɛ mli ni, enyɛŋ nɔ ko efee.
10. Te awie bɔ ni sɛɛnamɔ ko kwraa bɛ amagajamɔ mli lɛ he aha tɛŋŋ?
10 Beni emaa kwashiafeemɔ ní amagajamɔ ji lɛ nɔ mi lolo lɛ, gbalɛ lɛ tee nɔ akɛ: “Amɛŋɔɔ lɛ amɛtswaa amɛkɔŋ, amɛtereɔ lɛ ni amɛkɛ lɛ yamaa emaahe, ni emaa shi, etsiii ehe kɛjɛɛɛ emaahe lɛ: abolɔɔ atsɛɔ lɛ, shi ehereee nɔ; enyɛɛɛ mɔ yiwala ehere kɛjɛ haomɔ mli.” (Yesaia 46:7) Kwɛ bɔ ni eyɔɔ ŋmɔlɔ ha akɛ aaasɔle aha amaga ní nyɛɛɛ anu wiemɔ loo efee nɔ ko kwraa lɛ! Lalatsɛ lɛ tsɔɔ bɔ ni sɛɛnamɔ ko kwraa bɛ nakai nibii ní ajáa amɛ lɛ ahe lɛ mli akɛ: “Amɛmagai lɛ, jwiɛtɛi kɛ shikaŋ, gbɔmɛi aninenaa nitsumɔi ni. Amɛyɛ naabu, shi amɛwieee; amɛyɛ hiŋmɛii, shi amɛnaaa nii; amɛyɛ toii, shi amɛnuuu nii; amɛyɛ gugɔ, shi amɛfũuu nii; amɛyɛ niji, shi amɛmɔɔɔ nɔ̃ mli; amɛyɛ naji hu, shi amɛnyiɛɛɛ, ni amɛtswaaa amɛsɛ̃ŋ hu. Mɛi ní fee amɛ lɛ tamɔ amɛ nɔŋŋ, kɛ mɔ fɛɛ mɔ hu ní kɛ ehiɛ fɔ̃ɔ amɛnɔ lɛ.”—Lala 115:4-8.
“Nyɛfia Shi”
11. Mɛni baaye abua mɛi ni didãa lɛ ní ‘amɛfi shi’?
11 Beni Yehowa fee bɔ ni sɛɛnamɔ ko kwraa bɛ amagajamɔ mli lɛ faŋŋ sɛɛ lɛ, agbɛnɛ etsɔɔ ewebii lɛ yiŋtoi ahewɔ ní esa akɛ amɛsɔmɔ lɛ lɛ, ni ekɛɛ: “Nyɛkaia enɛ, ni nyɛfia shi; nyɛkɛwoa nyɛtsuiiaŋ, nyɛ nɔtɔlɔi! Nyɛkaia blema nii ní jɛ teteete lɛ, ákɛ mi nɔŋŋ mi ji Mawu, ni mɔ ko bɛ sɛɛ dɔŋŋ, mi ji Nyɔŋmɔ, ni mɔ ko mɔ ko tamɔɔɔ mi.” (Yesaia 46:8, 9) Esa akɛ mɛi ni didãa yɛ anɔkwa jamɔ kɛ wɔŋjamɔ teŋ lɛ akai blema nibii ní eho lɛ. Esa akɛ amɛkai nibii ní Yehowa efee lɛ. Enɛ baaye abua amɛ ní amɛfi shi ní amɛfee nɔ ni ja. Ebaaye ebua amɛ ní amɛku amɛsɛɛ kɛba Yehowa jamɔ mli ekoŋŋ.
12, 13. Mɛɛ tai ní mli wa waa Kristofoi wuɔ, ni te amɛaafee tɛŋŋ amɛye omanye yɛ mli?
12 Hewalɛwoo wiemɔi nɛɛ ahe miihia lolo ŋmɛnɛ. Taakɛ Israelbii lɛ ji lɛ, esa akɛ anɔkwa Kristofoi awuu ashi kaai kɛ emuu ní amɛ diɛŋtsɛ amɛyeee lɛ. (Romabii 7:21-24) Kɛfata he lɛ, amɛkɛ henyɛlɔ ko ní anaaa lɛ, shi ehe wa waa miiwuu mumɔŋ ta ko ní mli wa. Bɔfo Paulo kɛɛ akɛ: “Jeee heloo kɛ lá wɔkɛná nɔmɔ lɛ, shi moŋ wɔkɛ onukpayelii kɛ hegbɛi kɛ je nɛŋ lumɛi ni yɔɔ benɛ be duŋ lɛ mli lɛ, kɛ mumɔi fɔji asafo ni yɔɔ ŋwɛiniiaŋ lɛ.”—Efesobii 6:12.
13 Satan kɛ edaimonioi lɛ baafee nɔ fɛɛ nɔ ní amɛaanyɛ ní amɛkɛjie Kristofoi kɛjɛ anɔkwa jamɔ he. Kɛ́ Kristofoi baawu ta lɛ yɛ omanyeyeli mli lɛ, no lɛ ehe miihia ní amɛnyiɛ Yehowa ŋaawoo lɛ sɛɛ ní amɛfi shi. Yɛ mɛɛ gbɛ nɔ? Bɔfo Paulo tsɔɔ mli akɛ: “Nyɛwoa Nyɔŋmɔ tawuu nii lɛ fɛɛ, koni nyɛnyɛ abonsam ŋaatsɔɔi lɛ anaa nyɛdamɔ.” Yehowa haaa etsuji awuu ta kɛji ewulako amɛ jogbaŋŋ. Nibii ni fata amɛmumɔŋ tawuu nii lɛ ahe lɛ ekomɛi ji ‘hemɔkɛyeli tsɛ̃ŋ lɛ, nɔ ni amɛkɛaanyɛ mɔ fɔŋ lɛ gãimlibii ní tsoɔ lɛ fɛɛ amɛgbe lɛ.’ (Efesobii 6:11, 16) Mlatɔ̃lɔi ji Israelbii lɛ ejaakɛ amɛkpoo mumɔŋ nibii ní Yehowa to he gbɛjianɔ eha amɛ lɛ. Eji amɛsusuɔ hewalɛ nibii ní Yehowa efee eha amɛ shii abɔ lɛ ahe kulɛ, amɛkpaleŋ kɛyaŋ amaga jamɔ ní yɔɔ nyaŋemɔ lɛ mli kɔkɔɔkɔ. Eba akɛ wɔɔkase nii kɛjɛ amɛ nɔkwɛmɔnɔ lɛ mli, ní wɔtswa wɔfai shi akɛ wɔdidãaŋ yɛ ta ní wɔwuɔ koni wɔfee nɔ ni ja lɛ mli kɔkɔɔkɔ.—1 Korintobii 10:11.
14. Mɛɛ nyɛmɔ Yehowa gbala jwɛŋmɔ kɛtee nɔ koni ekɛtsɔɔ akɛ lɛ pɛ ji anɔkwa Nyɔŋmɔ lɛ?
14 Yehowa ji ‘Mɔ ní jɛɔ shishijee ejajeɔ naagbee nii lɛ, ni ejɛɔ blema beebe ejajeɔ nii ní anáko afee lɛ; Mɔ ni kɛɔ akɛ: Miyiŋtoo lɛ aaaba mli, ni nibii fɛɛ ni sa mihiɛ lɛ mafee.’ (Yesaia 46:10) Mɛɛ nyɔŋmɔ kroko baanyɛ ekɛ ehe ato Yehowa he yɛ enɛ gbɛfaŋ? Nyɛmɔ ní Bɔlɔ lɛ nyɛɔ egbaa nɔ ni baaba wɔsɛɛ lɛ ji Nyɔŋmɔ ní eji lɛ he odaseyeli ní sa kadimɔ waa. Shi kɛlɛ, ebiɔ babaoo fe wɔsɛɛ be mli nii ní atsɔɔ hiɛ aleɔ kɛkɛ koni eha nibii ni egba efɔ̃ shi lɛ aba mli pɛpɛɛpɛ. Wiemɔ ní ewie akɛ “miyiŋtoo lɛ aaaba mli” lɛ maa bɔ ni Nyɔŋmɔ yiŋtoo ní ma shi shiŋŋ lɛ tsakeee lɛ nɔ mi. Akɛni husu bɛ Yehowa hewalɛ lɛ he hewɔ lɛ, nɔ ko nɔ ko bɛ jeŋ muu fɛɛ ní baanyɛ atsĩ enaa ní ekanyɛ etsu esuɔmɔnaa nii ahe nii. (Daniel 4:35) No hewɔ lɛ, wɔbaanyɛ wɔná nɔmimaa akɛ gbalɛi fɛɛ ní kpaako amɛbaaba mli lɛ baaba mli lɛɛlɛŋ yɛ Nyɔŋmɔ diɛŋtsɛ be ní eto mli.—Yesaia 55:11.
15. Mɛɛ Yehowa nyɛmɔ ní ekɛgbaa wɔsɛɛ be saji lɛ he nɔkwɛmɔnɔ ní sa kadimɔ waa agbalaa wɔjwɛŋmɔ kɛyaa nɔ?
15 Yesaia gbalɛ lɛ mli wiemɔi ní nyiɛ sɛɛ lɛ gbalaa wɔjwɛŋmɔ kɛyaa nyɛmɔ ní Yehowa yɔɔ ní ekɛgbaa nibii ní baaba wɔsɛɛ, ní no sɛɛ lɛ ehaa ewiemɔi baa mli pɛpɛɛpɛ lɛ he nɔkwɛmɔnɔ ní sa kadimɔ waa nɔ, akɛ: “Miitsɛ́ okropɔŋ ko kɛmiijɛ boka, kɛ miyiŋtoo naa nuu lɛ kɛmiijɛ maŋsɛɛ shɔŋŋ. Mi miwie, ni mi nɔŋŋ maha aba mli; mito miyiŋ, ni mafee hu!” (Yesaia 46:11) Ákɛ ‘Mɔ ni jɛɔ shishijee ejajeɔ naagbee nii lɛ,’ Yehowa Nyɔŋmɔ baakudɔ saji ní yaa nɔ yɛ adesai ashihilɛ mli lɛ bɔni afee ní ekɛtsu eyiŋtoo he nii. Ebaatsɛ́ Koresh ‘kɛjɛ hulushiteehe,’ loo Persia ní yɔɔ bokagbɛ, he ni Koresh maŋtiase ní esumɔɔ fe fɛɛ, ni ji Pasargadae baahi lɛ. Koresh baafee tamɔ “okropɔŋ,” ni ebaajɛ ŋwɛi ebayi Babilon nɔ trukaa ní ehiɛ bɛ ehe nɔ.
16. Te Yehowa ma bɔ ni egbalɛ ní kɔɔ Babilon he lɛ baaba mli lɛɛlɛŋ lɛ nɔ mi eha tɛŋŋ?
16 Yehowa kɛ wiemɔi ni ji, “Mi miwie, ni mi nɔŋŋ maha aba mli” lɛ maa bɔ ni egbalɛ ní kɔɔ Babilon he lɛ baaba mli lɛɛlɛŋ lɛ nɔ mi. Yɛ be mli ni nɔ ko kɛkɛ tsirɛɔ adesai ní yeee emuu lɛ ni amɛwoɔ shi kɛkɛ lɛ, Bɔlɔ lɛ haaa ewiemɔ ko afee efolo kɔkɔɔkɔ. Akɛni Yehowa ji Nyɔŋmɔ ní “maleee” hewɔ lɛ, wɔbaanyɛ wɔná nɔmimaa akɛ kɛ́ ‘eto eyiŋ’ lɛ, ‘ebaafee hu.’—Tito 1:2.
Tsuii ní Bɛ Hemɔkɛyeli
17, 18. Namɛi abaanyɛ awie amɛhe akɛ “tsuisalɔi” lɛ (a) yɛ blema beaŋ? (b) ŋmɛnɛ?
17 Yehowa gbala ejwɛŋmɔ kɛtee Babilonbii lɛ anɔ shikome ekoŋŋ yɛ gbalɛ wiemɔ mli ni ekɛɛ: “Nyɛboa mi toi, nyɛ tsuisalɔi, ní nyɛkɛ jalɛ teŋ ejekɛ lɛ!” (Yesaia 46:12) Wiemɔ ni ji “tsuisalɔi” lɛ miitsɔɔ gbɔmɛi ní kuɛŋ ti ní amɛtswa amɛfai shi akɛ amɛteɔ shi amɛwoɔ Nyɔŋmɔ suɔmɔnaa nifeemɔ lɛ. Ŋwanejee ko bɛ he akɛ, Babilonbii lɛ kɛ Nyɔŋmɔ teŋ jɛkɛ. Nyɛ̃ɛ ní amɛyɔɔ kɛha Yehowa kɛ ewebii lɛ tsirɛ amɛ ni amɛkpata Yerusalem kɛ esɔlemɔtsu lɛ hiɛ ni amɛloo emli bii lɛ kɛtee nomŋɔɔ mli.
18 Ŋmɛnɛ, mɛi ni yɔɔ yiŋkɔshikɔshifeemɔ tsuii ní heee yeee lɛ kɛ kuɛŋtimɔ kpooɔ akɛ amɛaabo Maŋtsɛyeli sane lɛ ní ashiɛɔ yɛ shikpɔŋ muu lɛ fɛɛ nɔ lɛ toi. (Mateo 24:14) Amɛsumɔɔɔ ní amɛkpɛlɛ Yehowa nɔ akɛ Maŋtsɛ ní sa. (Lala 83:19; Kpojiemɔ 4:11) Akɛni amɛtsuii ‘kɛ jalɛ teŋ jɛkɛ’ hewɔ lɛ, amɛteɔ shi amɛwoɔ esuɔmɔnaa nii. (2 Timoteo 3:1-5) Taakɛ Babilonbii lɛ ji lɛ, amɛbooo Yehowa toi.
Nyɔŋmɔ Yiwalaheremɔ lɛ Ekpeŋ Sɛɛ
19. Yehowa baatsu jalɛ nifeemɔ ko he nii yɛ Israel gbɛfaŋ yɛ mɛɛ gbɛ nɔ?
19 Yesaia yitso 46 lɛ naagbee wiemɔi lɛ maa Yehowa sui lɛ fãi komɛi anɔ mi: “Mikɛ mijalɛ lɛ ebɛŋkɛ, ebɛ shɔŋŋ, ni miyiwalaheremɔ lɛ hu etsɛŋ. Ni mikɛ yiwalaheremɔ aaaha yɛ Zion, ni mikɛ minunyam lɛ aaaha Israel.” (Yesaia 46:13) Jiemɔ ní Nyɔŋmɔ baajie Israel lɛ baafee jalɛ nifeemɔ. Eŋmɛŋ gbɛ ní ewebii lɛ atsɛ fe nine yɛ nomŋɔɔ mli. Zion yiwalaheremɔ baaba yɛ be ni sa mli, “etsɛŋ.” Yɛ amɛ heŋmɛɛmɔ kɛmiijɛ nomŋɔɔ mli lɛ sɛɛ lɛ, Israelbii lɛ baatsɔmɔ nikwɛmɔ nii kɛha jeŋmaji ní ebɔle amɛ kɛkpe lɛ. Kpɔmɔ ní Yehowa baakpɔ̃ emaŋ lɛ baafee ehewalɛ ní ekɛhereɔ mɔ yiwala lɛ he odaseyeli. Ebaajie bɔ ni Babilon nyɔŋmɔi ni ji Bel kɛ Nebo he bɛ sɛɛnamɔ ko kwraa lɛ kpo faŋŋ ni mɔ fɛɛ mɔ baana, ni ebaakpa hewalɛ ní amɛbɛ lɛ he mama.—1 Maŋtsɛmɛi 18:39, 40.
20. Te Kristofoi aaafee tɛŋŋ amɛná nɔmimaa akɛ Yehowa ‘yiwalaheremɔ lɛ ekpeŋ sɛɛ’?
20 Yɛ afi 1919 lɛ, Yehowa jie ewebii lɛ kɛjɛ mumɔŋ nomŋɔɔ mli. Ekpeee sɛɛ. Nakai nifeemɔ lɛ, kɛ nifeemɔi ní ba yɛ blema beaŋ beni Babilon gbee shi yɛ Koresh hiɛ lɛ, woɔ wɔ hewalɛ ŋmɛnɛ. Yehowa ewo shi akɛ ekɛ nibii agbɛjianɔtoo fɔŋ nɛɛ, ní apasa jamɔ fata he lɛ, baaba naagbee. (Kpojiemɔ 19:1, 2, 17-21) Kɛ́ Kristofoi miikwɛ nibii yɛ adesai ashishinumɔ naa lɛ, ekolɛ amɛteŋ mɛi komɛi baanu he akɛ amɛyiwalaheremɔ lɛ sɛɛ etsɛ. Shi kɛlɛ, tsuishitoo ní Yehowa kɛ́tsu nii aahu kɛyashi be ní lɛ diɛŋtsɛ eto ní ekɛbaaha nakai shiwoo lɛ aba mli lɛ ji jalɛ nifeemɔ lɛɛlɛŋ. Ejaakɛ, “[Yehowa sumɔɔɔ] akɛ mɛi komɛi alaaje, shi moŋ akɛ mɛi fɛɛ atsake amɛtsui.” (2 Petro 3:9) No hewɔ lɛ, ná nɔmimaa akɛ, taakɛ eba yɛ blema Israel gbii lɛ amli lɛ, ‘yiwalaheremɔ lɛ ekpeŋ sɛɛ.’ Lɛɛlɛŋ, beni yiwalaheremɔ gbi lɛ bɛŋkɛɔ lɛ, Yehowa jɛɔ suɔmɔ mli eyaa nɔ ekɛ ninefɔɔ nɛɛ haa lolo, akɛ: “Nyɛtaoa Yehowa, be mli ní eeeha ana lɛ, nyɛtsɛ́a lɛ, be mli ní ebɛŋkɛ! Ha ní mɔ fɔŋ akwa egbɛ̀i lɛ, ni nɔ̃ sha feelɔ akwa ejwɛŋmɔi lɛ, ní eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu!”—Yesaia 55:6, 7.
[Mfonirii ni yɔɔ baafa 94]
Babilon nyɔŋmɔi lɛ ebuuu ehe kɛjɛɛɛ hiɛkpatamɔ mli
[Mfonirii ni yɔɔ baafa 98]
Esa akɛ Kristofoi ni yɔɔ ŋmɛnɛ lɛ akwɛ jogbaŋŋ yɛ ŋmɛnɛŋmɛnɛ beaŋ amagai ahe
[Mfonirii ni yɔɔ baafa 101]
Ná ekãa ní okɛfee nɔ ni ja