Yitso Kpaanyɔ
Apasa Jamɔ—Atsɔ Hiɛ Ana Enaagbee ní Yɔɔ Naakpɛɛ
1, 2. (a) Mɛni hewɔ mɛi komɛi susuɔ akɛ etamɔ nɔ ni enyɛŋ eba akɛ tsakemɔ wulu ko baaba yɛ je lɛŋ jamɔ shihilɛ gbɛfaŋ lɛ? (b) Te wɔfeɔ tɛŋŋ wɔleɔ akɛ Yesaia yitso 47 lɛ mli wiemɔi lɛ kɔɔ wɔsɛɛ be he lɛ? (d) Mɛni hewɔ “Babilon kpeteŋkpele lɛ” ji gbɛi ní sa kɛha apasa jamɔi fɛɛ kutuu lɛ?
“NYƆŊMƆ Jamɔ Eku Sɛɛ Eba Ekoŋŋ.” No ji shɛɛ wiemɔ ní sane ko ní aŋma yɛ The New York Times Magazine lɛ mli lɛ jaje. Sane ní aŋma lɛ tsɔɔ mli akɛ etamɔ nɔ ni Nyɔŋmɔ jamɔ yɛ gbɔmɛi akpekpei abɔ atsuii kɛ amɛjwɛŋmɔi anɔ hewalɛ waa lolo. No hewɔ lɛ, ekolɛ ebaawa akɛ abaahe aye akɛ tsakemɔ kpele ko miihe aba yɛ je lɛŋ jamɔ shihilɛ gbɛfaŋ. Shi átsɔɔ tsakemɔ ní tamɔ nɛkɛ yɛ Yesaia yitso 47 lɛ mli.
2 Yesaia wiemɔi lɛ ba mli afii 2,500 ní eho nɛ. Shi, atsɛ́ wiemɔi ní aŋmala yɛ Yesaia 47:8 lɛ sɛɛ yɛ Kpojiemɔ wolo lɛ mli, ni atsɔɔ bɔ ni ekɔɔ wɔsɛɛ be he ehaa. Biblia lɛ gbaa gbɛjianɔtoo ko ní tamɔ yoo ajwamaŋ, ní atsɛɔ lɛ “Babilon kpeteŋkpele lɛ”—jeŋ apasa jamɔ maŋtsɛyeli lɛ naagbee efɔ̃ɔ shi yɛ jɛmɛ. (Kpojiemɔ 16:19) Gbɛi ni ji “Babilon” ní akɛtsɛɔ je lɛŋ apasa jamɔi lɛ sa jogbaŋŋ diɛŋtsɛ, ejaakɛ blema Babilon ji he ni apasa jamɔ ná eshishijee kɛjɛ. Kɛjɛ jɛmɛ lɛ, egbɛ eshwã kɛtee shikpɔŋ lɛ koji ejwɛ lɛ fɛɛ nɔ. (1 Mose 11:1-9) Shwɛ fioo ni kulɛ jamɔi fɛɛ, ní Kristendom fata he lɛ, akpɛlɛ jamɔ mli tsɔɔmɔi ní je shishi kɛjɛ Babilon, tamɔ susuma ní gbooo, hɛl la, kɛ nyɔŋmɔi etɛ ní efee ekome ní ajáa amɛ lɛ nɔ.a Ani Yesaia gbalɛ lɛ haa wɔ sɛɛyoomɔ yɛ nɔ ni baaba Nyɔŋmɔ jamɔ nɔ wɔsɛɛ lɛ he?
Aba Babilon Shi Kɛtee Mulu Mli
3. Tsɔɔmɔ bɔ ni Babilon Jeŋ Hewalɛ lɛ da ha lɛ mli.
3 Bó ŋwɛi sane jajemɔ ní mli wa waa nɛɛ toi: “Kpelekemɔ shi, ní obatá mulu mli, bo oblayoo, Babel biyoo! Tá shikpɔŋ, maŋtsɛsɛi ko bɛ, bo Kaldeabii abiyoo! Shi akãŋ he atsɛŋo oje kɛ mɔ ní ahiɛɔ lɛ dɔdɔɔdɔ dɔŋŋ.” (Yesaia 47:1) Akɛ Babilon eta maŋtsɛsɛi nɔ afii babaoo akɛ jeŋ hewalɛ ní yeɔ nɔ. Ehi shi akɛ “maŋtsɛyelihei anunyam”—ni ji jamɔ, jarayeli, kɛ asraafoi amaŋ ní eshwere waa. (Yesaia 13:19) Beni Babilon nɔyeli hewalɛ lɛ nɔ bakwɔ fe fɛɛ lɛ, emaŋtsɛyeli lɛ mli lɛɛ kɛba wuoyigbɛ tɔ̃ɔ kɛbashɛ Mizraim husu lɛ naa. Ni beni eye Yerusalem nɔ kunim yɛ afi 607 D.Ŋ.B. lɛ, efee tamɔ nɔ ni Nyɔŋmɔ diɛŋtsɛ po nyɛɛɛ atsĩ ekunimyeli lɛ naa! Enɛ hewɔ lɛ, enaa ehe ákɛ “oblayoo,” mɔ ni tutuamɔ ko jɛŋ maŋsɛɛ kɛbaŋ enɔ kɔkɔɔkɔ.b
4. Mɛni baaba Babilon nɔ?
4 Shi kɛlɛ, abaajie nɛkɛ “oblayoo” henɔwolɔ nɛɛ kɛbaajɛ maŋtsɛsɛi ní eta nɔ akɛ jeŋ hewalɛ ní ajeee he ŋwane nɛɛ nɔ ni abaaha ‘etá mulu mli’ yɛ hiɛshishwiemɔ mli. (Yesaia 26:5) Abuŋ lɛ akɛ “oje kɛ mɔ ní ahiɛɔ lɛ dɔdɔɔdɔ dɔŋŋ,” tamɔ maŋnyɛ ní ahiɛɔ lɛ fɔfɔle lɛ. Enɛ hewɔ lɛ Yehowa wo akpɔ akɛ: “Kɔlɔmɔ wiɛbii moŋ ní oyawiɛ mã, jiemɔ ohiɛhàa nɔ̃ lɛ, wó omama yuu lɛ nɔ, jiemɔ oshwuɔ kpo, ní oyafo faai!” (Yesaia 47:2) Yɛ be mli ní Babilon eye Yuda maŋ muu lɛ fɛɛ nɔ nyɔŋ sɛɛ lɛ, akɛ lɛ diɛŋtsɛ hu baaye akɛ nyɔŋ agbɛnɛ! Mediabii kɛ Persiabii ní jie lɛ kɛjɛ egbɛhe ni ji nɔyeli hewalɛ ní eyɔɔ lɛ mli lɛ, baanyɛ enɔ ni ebaatsu nitsumɔ ni yɔɔ hiɛgbele eha amɛ.
5. (a) Abaajie Babilon ‘hiɛhàa nɔ̃ kɛ mama yuu’ lɛ yɛ mɛɛ gbɛ nɔ? (b) Mɛni ekolɛ famɔ ní akɛbaaha lɛ akɛ yaa “ní oyafo faai” lɛ tsɔɔ?
5 Enɛ hewɔ lɛ, abaajie Babilon ‘hiɛhàa nɔ̃ kɛ emama yuu lɛ,’ ni etsutsu agbojee kɛ anunyam lɛ he kadimɔ nii ní eshwɛ lɛ fɛɛ baaŋmɛɛ lɛ. Enɔyelɔi haolɔi lɛ kɛ famɔ baaha lɛ akɛ yaa “ní oyafo faai.” Ekolɛ akɛ famɔ baaba Babilonbii lɛ ekomɛi ní amɛyatsu nyɔji anitsumɔ diɛŋtsɛ yɛ agbo naa. Aloo ekolɛ gbalɛ lɛ miitsɔɔ akɛ abaagbala amɛteŋ mɛi komɛi kɛfo faai diɛŋtsɛ beni akɛ amɛ yaa nomŋɔɔ mli lɛ. Bɔ fɛɛ bɔ ni fee lɛ, Babilon efaŋ gbɛ yɛ anunyam mli tamɔ bɔ ni atereɔ maŋnyɛ kɛfoɔ faa beni etá sɛi loo akpakai mli lɛ. Shi moŋ, ebaatsɔ tamɔ nyɔŋ ní esa akɛ eŋmɛɛ bulɛ kɛ ehiɛ ní gboɔ nɔ̃ ní ekɛsaa ehe lɛ he, beni ewoɔ emama nɔ ní ejieɔ eshwuɔji etsɔɔ koni enyiɛ kɛfo faa lɛ. Kwɛ hiɛgbele ní eji!
6. (a) Abaajie Babilon yayaiaŋ kpo yɛ mɛɛ shishinumɔ naa? (b) “Gbɔmɔ ko etsiŋ” Nyɔŋmɔ ‘naa’ yɛ mɛɛ gbɛ nɔ? (Kwɛmɔ shishigbɛ niŋmaa lɛ.)
6 Yehowa tsá ehefɛoyeli lɛ nɔ akɛ: “Aaajie oyayaiaŋ kpo, aaana ohiɛgbele lɛ! Matɔ owele, ni gbɔmɔ ko etsiŋ minaa!” (Yesaia 47:3)c Hɛɛ, hiɛgbele kɛ hiɛshishwiemɔ baaba Babilon nɔ. Abaajie efɔŋ ní efeɔ eshiɔ Nyɔŋmɔ webii kɛ yiwalɛ ní ekɛbaa amɛnɔ lɛ kpo faŋŋ ni abaana. Adesa ko nyɛŋ atsĩ Nyɔŋmɔ oweletɔɔ lɛ naa!
7. (a) Te Yudafoi nomii lɛ baafee amɛnii yɛ Babilon shigbeemɔ lɛ he adafitswaa lɛ he amɛha tɛŋŋ? (b) Mɛɛ gbɛ nɔ Yehowa baatsɔ ekpɔ̃ ewebii lɛ?
7 Beni amɛhi nomŋɔɔ mli aahu afii 70 yɛ Babilon ní he wa lɛ sɛɛ lɛ, Nyɔŋmɔ webii lɛ amli baafili amɛ waa diɛŋtsɛ yɛ eshigbeemɔ lɛ hewɔ. Amɛkɛ miishɛɛ baakɛɛ akɛ: “Wɔkpɔ̃lɔ lɛ, Yehowa Zebaot ji egbɛi, Israel Mɔ krɔŋkrɔŋ lɛ!” (Yesaia 47:4) Yɛ Mose Mla lɛ shishi lɛ, kɛ́ Israelnyo ko hɔ̃ɔ ehe ewo nyɔŋyeli mli koni ekɛwo ehe nyɔji lɛ, no lɛ kpɔ̃lɔ (ni ji ewekunyo tuuntu) baanyɛ eyahe lɛ, loo eyakpɔ̃ lɛ kɛjɛ nyɔŋyeli lɛ mli. (3 Mose 25:47-54) Akɛni abaahɔ̃ɔ Yudafoi lɛ kɛya Babilon nyɔŋyeli mli hewɔ lɛ, ehe baahia ní akpɔ̃ amɛ, loo aha amɛye amɛhe. Kɛha nyɔji lɛ, bei pii lɛ kunimyeli etsɔɔɔ nɔ ko, fe amɛnuntsɔmɛi lɛ atsakemɔ kɛkɛ. Shi Yehowa baakanya Maŋtsɛ Koresh kunimyelɔ lɛ koni eŋmɛɛ Yudafoi lɛ ahe kɛjɛ nyɔŋyeli mli. Akɛ Mizraim, Kush, kɛ Seba baaha Koresh ákɛ ‘kpɔmɔ nii’ yɛ Yudafoi lɛ anajiaŋ. (Yesaia 43:3) Belɛ, eja gbɛ jogbaŋŋ akɛ atsɛɔ Israel Kpɔ̃lɔ lɛ akɛ “Yehowa Zebaot.” Babilon asraafoi ata ní tamɔ nɔ ni he wa waa lɛ yɛ wudɔɔ kwraa kɛ́ akɛ amɛ to Yehowa ŋwɛibɔfoi atai ní anaaa amɛ lɛ ahe.
Yitsoŋwalɛ He Nyɔmɔwoo
8. Babilon ‘baabote duŋ mli’ yɛ mɛɛ shishinumɔ naa?
8 Yehowa wó heguɔgbee wiemɔ ní ekɛshiɔ Babilon yɛ gbalɛ wiemɔ mli lɛ nɔ ekoŋŋ akɛ: “Tá shi dioo ní obote duŋ mli, bo Kaldeabii abiyoo! Shi akãŋ he atsɛŋo akɛ maŋtsɛyelii lɛ awura dɔŋŋ!” (Yesaia 47:5) Nɔ ko nɔ ko eshwɛŋ haŋ Babilon, fe duŋ kɛ duŋ kabitii kɛkɛ. Eyeŋ maŋtsɛyelii krokomɛi anɔ akɛ awula yitsoŋwalɔ dɔŋŋ.—Yesaia 14:4.
9. Mɛni hewɔ Yehowa mli fũ Yudafoi lɛ?
9 Mɛni hewɔ po ni Nyɔŋmɔ ŋmɛ Babilon gbɛ ni ebaye ewebii awui lɛ? Yehowa tsɔɔ mli akɛ: “Mimli wo mimaŋ lɛ la, mibule minɔyeli nɔ̃ lɛ, ni mikɛ amɛ wo odɛŋ.” (Yesaia 47:6a) Yehowa yɛ yiŋtoo kpakpa ní eeedamɔ nɔ emli afũ Yudafoi lɛ. Tsutsu lɛ, ebɔ amɛ kɔkɔ akɛ kɛ́ amɛgbo e-Mla lɛ nɔ toi lɛ, nɔ ni baajɛ mli aba ji amɛshwiemɔ kɛmiijɛ amɛshikpɔŋ lɛ nɔ. (5 Mose 28:64) Beni amɛkɛ amɛhe yawo wɔŋjamɔ kɛ bɔlɛnamɔ mli jeŋba shara mli lɛ, Yehowa jɛ suɔmɔ mli etsu gbalɔi koni amɛyaye amɛbua amɛ kɛba jamɔ krɔŋŋ mli ekoŋŋ. Shi “amɛ lɛ, Nyɔŋmɔ bɔfoi lɛ ahe fɛo moŋ amɛyeɔ, ni amɛgbeɔ ewiemɔi lɛ ahe guɔ ni amɛliɔ egbalɔi lɛ aahu kɛyashi beyinɔ ni Yehowa mlifu te shi wo emaŋ lɛ ni tsabaa ko bɛ dɔŋŋ.” (2 Kronika 36:16) No hewɔ lɛ Nyɔŋmɔ ŋmɛ gbɛ ni abule egboshinii, ni ji Yuda, beni Babilon batutua shikpɔŋ lɛ ní ebule E-sɔlemɔtsu krɔŋkrɔŋ lɛ.—Lala 79:1; Ezekiel 24:21.
10, 11. Mɛni hewɔ Yehowa mli efũ Babilon, eyɛ mli akɛ eji esuɔmɔnaa nii akɛ eye ewebii anɔ kunim lɛ?
10 Yɛ no hewɔ lɛ, ani jeee Nyɔŋmɔ suɔmɔnaa nii kɛkɛ Babilon feɔ beni eyeɔ Yudafoi lɛ anɔ nyɔŋ lɛ? Dabi, ejaakɛ Nyɔŋmɔ wie akɛ: “Omusuŋ etsɔɔɔo yɛ amɛhe, oha opã lɛ tsii yɛ nuumo po nɔ; ni okɛɛ: Mafee awura kɛyashi naanɔ! hewɔ lɛ okɛ nii nɛɛ wooo otsuiŋ, ni ojwɛŋŋ enaagbee he.” (Yesaia 47:6b, 7) Nyɔŋmɔ woko Babilon akpɔ akɛ efee nii kɛ yitsoŋwalɛ kɛteke nɔ, ní ekana ‘hiimeji lɛ po’ mɔbɔ. (Yaafo 4:16; 5:12) Nakai nɔŋŋ hu ewoko amɛ hewalɛ akɛ amɛye Yudafoi nomii lɛ ahe fɛo ní amɛná amɛpiŋmɔ lɛ he miishɛɛ.—Lala 137:3.
11 Babilon nyɛɛɛ ayoo akɛ Yudafoi lɛ anɔ ní eyeɔ lɛ baahi shi be kukuoo kɛkɛ. Ebooo kɔkɔbɔɔ ní Yesaia kɛha akɛ, yɛ be ko sɛɛ lɛ, Yehowa baaha ewebii aye amɛhe lɛ toi. Efeɔ enii tamɔ nɔ ni aha lɛ hegbɛ akɛ eye Yudafoi lɛ anɔ daa, ní ekã he ehi shi akɛ awula yɛ jeŋmaji ní sɔmɔɔ lɛ lɛ anɔ kɛya naanɔ. Ebooo shɛɛ sane ní akɛha lɛ akɛ eyiwalɛ nɔyeli lɛ baaba “enaagbee” lɛ toi!
Agba Babilon Shigbeemɔ Afɔ̃ Shi
12. Mɛni hewɔ atsɛɔ Babilon akɛ ‘yoo ní sumɔɔ jeŋ ŋɔɔmɔyeli’ lɛ?
12 Yehowa jaje akɛ: “Agbɛnɛ bó enɛ toi, bo ní osumɔɔ jeŋ ŋɔɔmɔyeli, ní otá shi ní ohe ejɔo, ní okɛɔ yɛ otsui mli akɛ: Mi ji mi, ni misɛɛ lɛ mɔ ko bɛ dɔŋŋ, mitáŋ shi akɛ yoo okulafo, ni mileŋ bɔ ni akpakpaa mɔ bii yɛ ehe.” (Yesaia 47:8) Ale gbɛi ní Babilon ená yɛ jeŋ ŋɔɔmɔyeli mli lɛ jogbaŋŋ diɛŋtsɛ. Afii ohai enumɔ D.Ŋ.B. yinɔsaneŋmalɔ Herodotus wieɔ Babilonbii lɛ “akusum ko ní yɔɔ hiɛgbele fe fɛɛ,” ni ji taomɔ nii ní abiɔ yɛ yei fɛɛ adɛŋ akɛ amɛkɛ amɛhe awo ajwamaŋbɔɔ mli ní amɛkɛjie bulɛ kpo amɛtsɔɔ amɛ suɔmɔ nyɔŋmɔyoo lɛ he. Blema yinɔsaneŋmalɔ Curtius hu wie akɛ: “Muji nifeemɔ ko bɛ ní baanyɛ ateke maŋtiase lɛ mli bii ajeŋba; jeŋba kpɔtɔmɔ shihilɛ diɛŋtsɛ ko bɛ ní baanyɛ atée ahoshwibɔɔ he kanyamɔi kɛ lakamɔi ashi fe amɛnɔ̃ lɛ.”
13. Bɔ ni Babilon sumɔɔ ŋɔɔmɔyeli waa lɛ baaha eshigbeemɔ lɛ aba oya yɛ mɛɛ gbɛ nɔ?
13 Bɔ ni Babilon sumɔɔ ŋɔɔmɔyeli waa lɛ baaha eshigbeemɔ lɛ aba oya. Gbi gbɛkɛ ní baatsɔ ehiɛkpatamɔ lɛ hiɛ lɛ, emaŋtsɛ lɛ kɛ ebladei lɛ baaŋmɛ okpɔlɔ, ni amɛbaanu dãa aahu ni amɛbaalului. Enɛ hewɔ lɛ, amɛsusuŋ Medo-Persia asraafoi ní baa amɛbatutua maŋtiase lɛ he po. (Daniel 5:1-4) Akɛni Babilon ‘tá shi ní ehe ejɔ lɛ’ hewɔ lɛ, ebaasusu akɛ egbogboi wuji ní tamɔ nɔ ni anyɛɛɛ akwɔ kɛ enujɔɔi lɛ baabu ehe kɛjɛ tutuamɔ mli. Ekɛɔ ehe akɛ “mɔ ko bɛ” ní baanyɛ ebahe egbɛhe ní nɔ kwɔ lɛ kɛjɛ edɛŋ kɔkɔɔkɔ. Esusuuu he akɛ ebaanyɛ etsɔ “yoo okulafo,” ní emaŋtsɛ wulu kɛ ‘ebii,’ loo maŋbii lɛ fɛɛ baaje edɛŋ kwraa. Shi kɛlɛ, gbogbo ko bɛ ní baanyɛ abu ehe kɛjɛ Yehowa Nyɔŋmɔ oweletɔɔ nine lɛ dɛŋ! Yehowa baakɛɛ yɛ sɛɛ mli akɛ: “Kɛ́ Babel kwɔ kɛtee ŋwɛi po, ni eha emɔji lɛ kwɔlɔ bɔ ni mɔ ko nyɛɛɛ abɛŋkɛ po lɛ, mi nɔŋŋ kɛ̃ miŋɔɔ ehiɛkpatalɔi aaajɛ aba enɔ!”—Yeremia 51:53.
14. Babilon baana ‘bii agbele kɛ okulafo tsɔmɔ’ mli amanehulu yɛ mɛɛ gbɛ̀i anɔ?
14 Mɛni baaba Babilon nɔ? Yehowa tee nɔ akɛ: “Shi nibii enyɔ nɛɛ aaaba onɔ trukaa yɛ gbi kome nɔ, aaakpakpaa obii yɛ ohe ni oootsɔ okulafo hu; enɛɛmɛi fɛɛ aaaba onɔ yɛ okunyaayelii ní fá lɛ kɛ okablɛfimɔi babaoo lɛ mli.” (Yesaia 47:9) Hɛɛ, Babilon hegbɛ ní nɔ kwɔ ákɛ jeŋ hewalɛ lɛ baaba naagbee trukaa. Yɛ blema Bokagbɛbii ashikpɔji anɔ lɛ, okulafo tsɔmɔ kɛ bii agbele ji amanehulu kɛ niiashikpamɔi ní mli wa fe fɛɛ ní baanyɛ aba yoo nɔ. Wɔleee Babilon “bii” abɔ ní hiɛ kpata yɛ gbi gbɛkɛ ní egbee shi lɛ.d Shi, yɛ be ko sɛɛ lɛ, abaashi maŋtiase lɛ afɔ̃ shi amaŋfɔ. (Yeremia 51:29) Ebaana amanehulu ákɛ okulafo hu ejaakɛ abaakpá emaŋtsɛmɛi lɛ kɛjɛ maŋtsɛsɛi lɛ nɔ.
15. Yɛ Babilon yitsoŋ ní wa yɛ Yudafoi lɛ anɔ lɛ sɛɛ lɛ, mɛɛ yiŋtoo kroko hewɔ ni Yehowa mli fũ lɛ lɛ?
15 Shi kɛlɛ, jeee bɔ ni Babilon wa Yudafoi lɛ ayi waa lɛ pɛ ji yiŋtoo hewɔ ní Yehowa mli fũ lɛ lɛ. ‘Ekunyaayeli ní fá babaoo lɛ’ hu woɔ emli la. Nyɔŋmɔ Mla ní ekɛha Israel lɛ buɔ mumɔi atsɛmɔ nifeemɔi fɔ́; ni kɛlɛ Babilon kɛ ehe woɔ ŋkunyaayeli nifeemɔi amli waa. (5 Mose 18:10-12; Ezekiel 21:21) Wolo ko ní atsɛɔ lɛ Social Life Among the Assyrians and Babylonians lɛ kɛɔ akɛ Babilonbii “hiɔ shi yɛ daimonioi babaoo ní amɛheɔ amɛyeɔ akɛ amɛbɔle amɛ kɛkpe lɛ ahe gbeyeishemɔ ni yaa nɔ daa mli.”
Hiɛ ní Akɛfɔ̃ɔ Nifɔjianii Anɔ
16, 17. (a) Babilon kɛ ‘ehe fɔ̃ɔ enifɔjianii’ lɛ nɔ yɛ mɛɛ gbɛ nɔ? (b) Mɛni hewɔ anyɛŋ atsĩ Babilon naagbee ní baa lɛ naa lɛ?
16 Ani Babilon ŋkunyaayelɔi lɛ baahere eyiwala? Yehowa haa hetoo akɛ: “Okɛ ohiɛ fɔ̃ɔ onifɔjianii lɛ anɔ, okɛɔ akɛ: Mɔ ko enaaa mi! Oŋaa kɛ onilee lɛ eha odũ gbɛ, ni okɛɔ yɛ otsui mli akɛ: Mi ji mi, ni misɛɛ lɛ mɔ ko bɛ dɔŋŋ!” (Yesaia 47:10) Babilon susuɔ akɛ ebaanyɛ etsɔ ejeŋ nilee kɛ jamɔ mli nilee, asraafoi ahewalɛ ní eyɔɔ, kɛ eyitsoŋ ní wa yɛ hiɛtɛ̃ɛ mli lɛ nɔ ehiɛ gbɛhe ní eyɔɔ ákɛ jeŋ hewalɛ lɛ mli. Enuɔ he akɛ mɔ ko bɛ ní baanyɛ ‘ana’ lɛ, ni tsɔɔ akɛ, mɔ ko bɛ ní baaha ebu enifɔjianii lɛ ahe akɔntaa. Ni enaaa henyɛlɔ ko ní baanyɛ ajɛ he ko abatutua lɛ. Ekɛɔ ehe akɛ: “Mi ji mi, ni misɛɛ lɛ mɔ ko bɛ dɔŋŋ!”
17 Shi kɛlɛ, Yehowa bɔ kɔkɔ kɛtsɔ egbalɔi lɛ ateŋ mɔ kroko nɔ akɛ: “Ani mɔ ko aaanyɛ atee ehe yɛ teemɔhei komɛi, ní minaŋ lɛ lo?” (Yeremia 23:24; Hebribii 4:13) No hewɔ lɛ Yehowa jaje akɛ: “Efɔŋ aaaba onɔ, oleŋ bɔ ni ooofee okpá yɛ onɔ; ni oshara aaasharao, ni onyɛŋ okpata; ni hiɛkpatamɔ aaaba onɔ trukaa ní oleee [ohe] be.” (Yesaia 47:11) Babilon nyɔŋmɔi lɛ loo ashwai ní emumɔi atsɛlɔi lɛ feɔ ní ‘amɛkɛkpáa efɔŋ yɛ enɔ’ lɛ nyɛŋ atsĩ amanehulu ní baa—ní tamɔɔɔ amanehului ní ena dã lɛ eko kwraa lɛ naa!
Babilon Ŋaawolɔi lɛ Anine Nyɛ Shi
18, 19. Babilon he ní ekɛfɔ̃ɔ eŋaawolɔi lɛ anɔ lɛ kɛ amanehulu baaba yɛ mɛɛ gbɛ nɔ?
18 Yehowa kɛ hefɛoyeli wiemɔi ní yɔɔ dɔlɛ waa fã lɛ akɛ: “Agbɛnɛ tee shi odamɔ shi kɛ okablɛfimɔi, kɛ okunyaayelii babaoo ní ogbo he deŋme kɛjɛ ogbekɛbiiashi lɛ: akɛ aleee nɔ̃ ooonyɛ okɛfee nɔ ko, akɛ aleee nɔ ohe aaafee gbeyei lo!” (Yesaia 47:12) Aatswa Babilon mpoa ní ‘ete shi edamɔ shi,’ loo ní eya nɔ yɛ ehe ní ekɛfɔ̃ɔ ashwaiafeemɔ nɔ lɛ mli, ní ekatsake. Ejaakɛ kɛ hoo lɛ, ákɛ maŋ lɛ, egbo deŋme babaoo yɛ ŋkunyaayeli nifeemɔi ní etee nɔ aahu kɛjɛ ‘egbekɛbiiashi’ tɔ̃ɔ lɛ mli.
19 Shi Yehowa ye ehe fɛo, ni ekɛɛ: “Oŋaawoo pii lɛ eha etɔo: ha mɛi ní le ŋwɛi nii lɛ kɛ ŋulamiiaŋkwɛlɔi lɛ ní kɛ́ nyɔŋ je ní amɛtsɔɔ nii ni baaba onɔ lɛ ate shi, ni amɛhere oyiwala!” (Yesaia 47:13)e Babilon kɛ eŋaawolɔi lɛ anine ní baanyɛ shi kwraa lɛ baakpe. Lɛɛlɛŋ, akɛ afii ohai abɔ ekwɛ ŋulamiiaŋ aahu ni eha Babilonbii aŋulamiiaŋkwɛmɔ etee hiɛ babaoo. Shi gbi gbɛkɛ ní ebaagbee shi lɛ, bɔ ni eŋulamiiaŋkwɛlɔi lɛ anine baanyɛ shi kwraa lɛ baajie lɛ kpo faŋŋ akɛ sɛɛnamɔ ko kwraa bɛ kalamɔ he.—Daniel 5:7, 8.
20. Mɛni baaba Babilon ŋaawolɔi lɛ anɔ?
20 Yehowa wie ni ekɛmu gbalɛ lɛ fã nɛɛ naa akɛ: “Naa, amɛtamɔ gbetselii, la aaashã amɛ: amɛnyɛŋ amɛhe amɛjie kɛjɛ lalilɛi lɛ dɛŋ; ejeee ŋãi kɛ la ní awereɔ, loo la ko ní ataraa he. Mɛi ní ogbo amɛhe deŋme lɛ, bɔ ni amɛbatsɔmɔ amɛhao nɛ, mɛi ní kɛo ye jara kɛjɛ ogbekɛbiiashi lɛ ateŋ mɔ fɛɛ mɔ aaadũ gbɛ kɛaatee enɔ̃ mli; mɔ ko mɔ ko bɛ ní aaahere oyiwala.” (Yesaia 47:14, 15) Hɛɛ, etsɛŋ ni jaramɔ bei ní tamɔ la baaba nɛkɛ amale ŋaawolɔi nɛɛ anɔ. Efeŋ hejɔlɛ la ní gbɔmɛi nyɛɔ amɛwereɔ ní amɛhe feɔ kulɔkulɔ lɛ, shi moŋ ebaafee la ní shãa nii, la ní kpataa nii ahiɛ, ni ebaakpa amale ŋaawolɔi lɛ ahe mama akɛ amɛhe bɛ sɛɛnamɔ ko kwraa, tamɔ gbetselii. Belɛ, ebɛ naakpɛɛ akɛ Babilon ŋaawolɔi lɛ baajo foi yɛ tsuifãa mli! Akɛni Babilon naagbee sɛɛfimɔ nɔ̃ lɛ etee hewɔ lɛ, mɔ ko bɛ dɔŋŋ ní baahere eyiwala. Akɛ nɔ ni ekɛba Yerusalem nɔ lɛ nɔŋŋ pɛpɛɛpɛ baaba lɛ hu enɔ.—Yeremia 11:12.
21. Mɛɛ gbɛ nɔ, ni mɛɛ be Yesaia gbalɛ wiemɔi lɛ fee anɔkwale?
21 Yɛ afi 539 D.Ŋ.B. lɛ, nɛkɛ wiemɔi ní jɛ mumɔŋ nɛɛ bɔi mlibaa. Mediabii kɛ Persiabii asraafoi ní yɔɔ Koresh hiɛnyiɛmɔ shishi lɛ ye maŋtiase lɛ nɔ kunim, ni amɛgbe maŋtsɛ ní yɔɔ mli lɛ, ni ji Belshazar. (Daniel 5:1-4, 30) Yɛ gbɛkɛ kome pɛ mli lɛ, abutu Babilon kɛjɛ jeŋ nɔyeli gbɛhe ní eyɔɔ mli lɛ mli. Nɛkɛ gbɛ nɔ tsɔ ni Shembii anɔyeli hewalɛ lɛ ba naagbee, ni je lɛ yaje Aryanbii akudɔmɔ shishi agbɛnɛ. Babilon diɛŋtsɛ bote fitemɔ ko ní tsá nɔ aahu afii ohai abɔ lɛ mli. Beni shɛɔ afii ohai ejwɛ Ŋ.B. lɛ, no mli lɛ etsɔ “kóikói” kwraa agbɛnɛ. (Yeremia 51:37) Bɔ ni Yesaia gbalɛ lɛ ba mli kɛmɔ shi eha nɛ.
Ŋmɛnɛŋmɛnɛ Beaŋ Babilon Ko
22. Mɛɛ nikasemɔ ní kɔɔ henɔwomɔ he Babilon shigbeemɔ lɛ tsɔɔ wɔ?
22 Yesaia gbalɛ lɛ haa wɔ saji babaoo ni esa akɛ wɔsusu he. Nɔ̃ kome ji akɛ, emaa osharai ní yɔɔ henɔwomɔ kɛ hewoo mli lɛ nɔ mi waa. Babilon henɔwolɔ lɛ shigbeemɔ lɛ feɔ Biblia mli abɛbua nɛɛ he nɔkwɛmɔnɔ, akɛ: “Hewoo nyiɛɔ hiɛkpatamɔ hiɛ, ni hetsɔɔmɔ mumɔ nyiɛɔ shigbeemɔ hiɛ.” (Abɛi 16:18) Bei komɛi lɛ, henɔwomɔ yeɔ wɔ bɔɔ su ní yeee emuu lɛ nɔ, shi kɛ́ ‘wɔwó wɔhe nɔ’ lɛ, ebaanyɛ ekɛ wɔ ayawo “jɛmɔ kɛ abonsam tsɔne mli.” (1 Timoteo 3:6, 7) Belɛ, wɔɔfee jogbaŋŋ akɛ wɔɔbo Yakobo ŋaawoo nɛɛ toi, akɛ: “Nyɛbaa nyɛhe shi yɛ [Yehowa, NW] hiɛ, ni eeewó nyɛnɔ.”—Yakobo 4:10.
23. Yesaia gbalɛ lɛ yeɔ ebuaa wɔ ni wɔnáa mɛɛ hekɛnɔfɔɔ?
23 Nɛkɛ gbalɛ wiemɔi nɛɛ hu yeɔ buaa wɔ ni wɔnáa Yehowa, mɔ ni he wa kwraa fe ehenyɛlɔi fɛɛ lɛ mli hekɛnɔfɔɔ. (Lala 24:8; 34:8; 50:15; 91:14, 15) Enɛ ji kaimɔ wiemɔ ní shɛjeɔ mɔ mii yɛ nɛkɛ jaramɔ gbii nɛɛ amli. Hekɛnɔfɔɔ ní wɔyɔɔ yɛ Yehowa mli lɛ woɔ wɔfai shi ní wɔtswa akɛ wɔɔya nɔ wɔhi shi ákɛ mɛi ní shwamɔ ko bɛ amɛhe yɛ ehiɛ lɛ mli hewalɛ, ejaakɛ wɔle akɛ “gbɔmɔ [ni he bɛ shwamɔ ko] lɛ, aaahi aha lɛ wɔsɛɛ.” (Lala 37:37, 38) Nilee yɛ mli be fɛɛ be ákɛ wɔkɛ wɔhe afɔ̃ Yehowa nɔ ní wɔkɛ wɔhe akafɔ̃ wɔ diɛŋtsɛ wɔmɔdɛŋbɔɔi anɔ beni wɔkɛ Satan “nifeemɔ ní yɔɔ nigii” lɛ kpeɔ lɛ.—Efesobii 6:10-13, NW shishigbɛ niŋmaa.
24, 25. (a) Mɛni hewɔ nilee bɛ ŋulamiiaŋkwɛmɔ mli lɛ, ni kɛlɛ mɛni hewɔ mɛi pii kɛ amɛhe woɔ mli lɛ? (b) Mɛni ji yiŋtoi komɛi ahewɔ ní Kristofoi tsiɔ amɛhe kɛjɛɔ apasa hemɔkɛyeli he kwraa lɛ?
24 Nɔ ni sa kadimɔ waa ji akɛ, abɔɔ wɔ kɔkɔ yɛ mumɔi atsɛmɔ nifeemɔi, titri lɛ ŋulamiiaŋkwɛmɔ he. (Galatabii 5:20, 21) Beni Babilon gbee shi lɛ, hewalɛ ní ŋulamiiaŋkwɛmɔ ená yɛ gbɔmɛi anɔ lɛ sɛɛ efooo. Nɔ ni yɔɔ miishɛɛ ji akɛ, wolo ko ni atsɛɔ lɛ Great Cities of the Ancient World lɛ tsɔɔ mli akɛ ŋulamii akui ní Babilonbii lɛ kadi hei ní amɛyɔɔ lɛ yɛ woji amli lɛ “etsi amɛhe” kɛjɛ hei ní amɛyɔɔ blema lɛ, “ni enɛ eha susumɔ [ni ji ŋulamiiaŋkwɛmɔ] lɛ ebafee nɔ ni shishinumɔ bɛ mli.” Shi kɛlɛ, ŋulamiiaŋkwɛmɔ kã he eeshwere lolo, ni adafitswaa woji pii ŋmalaa nibii ní ŋulamiiaŋkwɛmɔ he tao fata he lɛ koni mɛi ni kaneɔ lɛ anyɛ akwɛ mli.
25 Mɛni haa gbɔmɛi—ní amɛteŋ mɛi babaoo le woloŋ jogbaŋŋ lɛ—kwɛɔ ŋulamiiaŋ loo amɛkɛ amɛhe woɔ apasa hemɔkɛyeli nifeemɔi krokomɛi ní nilee bɛ mli lɛ amli lɛ? The World Book Encyclopedia lɛ kɛɔ akɛ: “Ekolɛ apasa hemɔkɛyelii baaya nɔ aná shihilɛ mli gbɛfaŋnɔ bei abɔ ní gbɔmɛi sheɔ amɛhe gbeyei ní amɛbɛ nɔmimaa yɛ wɔsɛɛ be shihilɛ he lɛ.” Ekolɛ gbeyeishemɔ kɛ yiŋkɔshikɔshifeemɔ baatsirɛ gbɔmɛi ni amɛbaaná apasa hemɔkɛyelii. Shi, Kristofoi tsiɔ amɛhe kwraa kɛjɛɔ apasa hemɔkɛyeli he. Amɛsheee gbɔmɔ gbeyei—Yehowa ji amɛ sɛɛfimɔ nɔ̃. (Lala 6:5-11) Ni amɛyiŋ efeee amɛ kɔshikɔshi yɛ wɔsɛɛ be he; amɛle Yehowa yiŋtoi ní ejie lɛ kpo etsɔɔ lɛ, ni amɛyɛ nɔmimaa akɛ “Yehowa ajina lɛ damɔɔ shi shiŋŋ kɛyaa naanɔ.” (Lala 33:11) Kɛ́ wɔha wɔshihilɛ kɛ Yehowa ajina lɛ kpã gbee lɛ, emaa wɔsɛɛ be ní yɔɔ miishɛɛ, ní hiɔ shi kɛyaa naanɔ nɔ mi ehaa wɔ.
26. “Nilelɔi ajwɛŋmɔi lɛ” efee “yaka nii” yɛ mɛɛ gbɛ nɔ?
26 Mɛi komɛi eka akɛ amɛaatsɔ “jeŋ nilee” mli gbɛ̀i anɔ amɛle wɔsɛɛ be mli saji yɛ nyɛsɛɛ afii nɛɛ amli. Ayɛ nikasemɔ ko ní atsɛɔ lɛ futurology, ni eshishitsɔɔmɔ ji “nibii ní baanyɛ aba wɔsɛɛ lɛ ahe nikasemɔ, ní damɔ bɔ ni nibii yaa nɔ bianɛ lɛ nɔ.” Ákɛ nɔkwɛmɔnɔ lɛ, afi 1972 mli tɔ̃ɔ ni nilelɔi kɛ nitsumɔtsɛmɛi akuu ko ni atsɛɔ amɛ Club of Rome lɛ ka amɛhiɛ amɛgba amɛfɔ̃ shi akɛ beni baashɛ afi 1992 lɛ, no mli lɛ je lɛ shika tsuru, jwiɛtɛinu, sãnyãa, kɛ mu ní yɔɔ shikpɔŋ lɛ mli lɛ fɛɛ etã kwraa. Ojogbaŋŋ, je lɛ kɛ naagbai ní yɔɔ gbeyei ekpe aahu kɛjɛ afi 1972 kɛbaa, shi nakai shihilɛ ní amɛgba akɛ ebaaba lɛ ejaaa yɛ gbɛ̀i srɔtoi fɛɛ nɔ. Shikpɔŋ lɛ kã he eyɛ shika tsuru, jwiɛtɛinu, sãnyãa, kɛ mu lolo. Yɛ anɔkwale mli lɛ, gbɔmɔ egbo deŋme aahu akɛ ebaabɔ mɔdɛŋ ní egba nɔ ni baaba wɔsɛɛ, shi be fɛɛ be lɛ, anyɛɛɛ akɛ he afɔ̃ nɔ ni ekaa ehiɛ egbaa efɔ̃ɔ shi lɛ nɔ. Lɛɛlɛŋ, “nilelɔi ajwɛŋmɔi lɛ . . . yaka nii ni”!—1 Korintobii 3:20.
Babilon Kpeteŋkpele lɛ Naagbee ní Baa Lɛ
27. Mɛɛ be, ni mɛɛ gbɛ nɔ Babilon Kpeteŋkpele lɛ ná shigbeemɔ ko ní tamɔ Babilon nɔ̃ ní ba yɛ afi 539 D.Ŋ.B. lɛ?
27 Ŋmɛnɛŋmɛnɛ beaŋ jamɔi eha blema Babilon tsɔɔmɔi lɛ amli babaoo etee nɔ ehi shi. No hewɔ lɛ, atsɛɔ jeŋ apasa jamɔ maŋtsɛyeli lɛ yɛ gbɛ ní sa nɔ akɛ “Babilon kpeteŋkpele lɛ.” (Kpojiemɔ 17:5) Nakai majimaji ateŋ jamɔ gbɛjianɔtoo ní abua naa lɛ ená shigbeemɔ ko ní tamɔ blema Babilon shigbeemɔ ní ba yɛ afi 539 D.Ŋ.B. lɛ pɛpɛɛpɛ. (Kpojiemɔ 14:8; 18:2) Yɛ afi 1919 lɛ, Kristo nyɛmimɛi lɛ ateŋ shwɛɛnii lɛ je kpo kɛjɛ mumɔŋ nomŋɔɔ mli ni amɛje jamɔ mli hewalɛ ní Kristendom, ni ji Babilon Kpeteŋkpele lɛ fã titri fe fɛɛ lɛ náa yɛ mɛi anɔ lɛ shishi. Kɛjɛ nakai beaŋ kɛbaa nɛɛ, Kristendom hewalɛ ní eyɔɔ yɛ shikpɔji babaoo ní tsutsu ko lɛ eyɔɔ hewalɛ waa yɛ amɛnɔ lɛ eba shi kwraa.
28. Te Babilon Kpeteŋkpele lɛ shwãa ekɛɔ tɛŋŋ, shi mɛni mɛɔ lɛ?
28 Shi kɛlɛ, nakai shigbeemɔ lɛ ji apasa jamɔ hiɛkpatamɔ kwraa ní baa lɛ he okadi bibioo ko kɛkɛ. Nɔ ni yɔɔ miishɛɛ ji akɛ, Kpojiemɔ gbalɛ ní kɔɔ Babilon Kpeteŋkpele lɛ hiɛkpatamɔ he lɛ haa wɔkaiɔ gbalɛ wiemɔi ní aŋmala yɛ Yesaia 47:8, 9 lɛ. Taakɛ blema Babilon ji lɛ, ŋmɛnɛŋmɛnɛ beaŋ Babilon Kpeteŋkpele lɛ kɛɔ akɛ: “Mitá shi akɛ maŋnyɛ ni mijeee okulafo ni minaŋ awerɛho ko.” Shi “gbi kome nɔ ehaomɔi lɛ aaaba, gbele kɛ awerɛho kɛ hɔmɔ, ni akɛ la aaashã lɛ, ejaakɛ Nuntsɔ Nyɔŋmɔ lɛ ni kojoɔ lɛ he wa.” No hewɔ lɛ, gbalɛ wiemɔi ní aŋmala yɛ Yesaia yitso 47 lɛ mli lɛ ji kɔkɔbɔɔ kɛha mɛi ní kã he amɛkɛ apasa jamɔ bɔɔ lɛ. Kɛ́ amɛsumɔɔɔ ní amɛná ehiɛkpatamɔ lɛ eko lɛ, no lɛ esa akɛ amɛbo famɔ ni jɛ mumɔŋ nɛɛ toi, akɛ: “Nyɛjea emli”!—Kpojiemɔ 18:4, 7, 8.
[Shishigbɛ niŋmai]
a Kɛ́ ootao bɔ ni fee ní apasa jamɔ tsɔɔmɔi gbɛ eshwã babaoo lɛ mlitsɔɔmɔ fitsofitso lɛ, kwɛmɔ wolo ni ji Nyɔŋmɔ Sɛɛ Gbɛ ni Adesai Taoɔ, ní Watchtower Bible and Tract Society of New York, Inc. fee lɛ.
b Yɛ Hebri wiemɔ mli lɛ, “oblayoo, Babel biyoo” lɛ ji abɛbuiaŋ wiemɔ ní kɔɔ Babilon loo Babilon maŋ lɛ mli bii ahe. Eji “oblayoo” ejaakɛ kɛjɛ be mli ní ebatsɔ jeŋ hewalɛ nɛɛ, mɔ ko mɔ ko yeko enɔ kunim ní eeehà enii dã.
c Woloŋlelɔi wieɔ Hebri wiemɔ ní atsɔɔ shishi akɛ “gbɔmɔ ko etsiŋ minaa” lɛ he akɛ eji “wiemɔ kuku ní ewa waa diɛŋtsɛ” ákɛ aaatsɔɔ shishi. New World Translation lɛ kɛ wiemɔ ni ji ‘yɛ mlihilɛ hewɔ’ fataa he koni eha anu shishi akɛ aŋmɛŋ mɔ ko mɔ ko gbɛ ní ejɛ sɛɛ ní ebahere Babilon. Shishitsɔɔmɔ ko ní Jewish Publication Society lɛ fee lɛ tsɔɔ wiemɔ kuku nɛɛ shishi akɛ: “Mihaŋ . . . mɔ ko mɔ ko abadamɔ mli aha lɛ.”
d Wolo ko ní atsɛɔ lɛ Nabonidus and Belshazzar, ní Raymond Philip Dougherty ŋma lɛ tsɔɔ mli akɛ, eyɛ mli akɛ Nabonido Yinɔsane lɛ kɛɔ akɛ Babilon tutualɔi lɛ bote maŋtiase lɛ mli “ní amɛwuuu ta” moŋ, shi Helanyo yinɔsaneŋmalɔ Xenophon tsɔɔ akɛ ekolɛ láshishwiemɔ babaoo diɛŋtsɛ ba.
e Mɛi komɛi tsɔɔ Hebri wiemɔ ní atsɔɔ shishi akɛ “mɛi ní le ŋwɛi nii” lɛ shishi akɛ “mɛi ní jaraa ŋwɛi mli.” Ekolɛ enɛ miitsɔɔ nifeemɔ ni ji ŋwɛi mli ní ajaraa awoɔ kui amli, ní ŋulamiiaŋkwɛlɔi kwɛɔ mli amɛkɛtsɔɔ nɔ ni baa mɛi anɔ lɛ.
[Mfonirii ni yɔɔ baafa 111]
Abaaba Babilon ní sumɔɔ ŋɔɔmɔyeli lɛ shi kɛba mulu mli
[Mfoniri ni yɔɔ baafa 114]
Babilon ŋulamiiaŋkwɛlɔi lɛ nyɛŋ agba eshigbeemɔ he sane amɛfɔ̃ shi
[Mfoniri ni yɔɔ baafa 116]
Babilonbii aŋulamiiaŋkwɛmɔ kalanda, yɛ klɛŋklɛŋ afii akpe D.Ŋ.B.
[Mfonirii ni yɔɔ baafa 119]
Etsɛŋ ni ŋmɛnɛŋmɛnɛ beaŋ Babilon hiɛ baakpata kwraa