Yitso Nɛɛhu
Yehowa Tsɔɔ Wɔ Nii Kɛha Wɔsɛɛnamɔ
1. Te mɛi ni yɔɔ nilee lɛ hereɔ Yehowa wiemɔi anɔ amɛhaa tɛŋŋ?
KƐ́ YEHOWA wie lɛ, mɛi ni yɔɔ nilee lɛ boɔ toi kɛ bulɛ ní mli kwɔ ni amɛyeɔ ewiemɔi lɛ anɔ. Nɔ fɛɛ nɔ ní Yehowa kɛɔ lɛ yɛ kɛha wɔsɛɛnamɔ, ni eyɛ wɔ hilɛ-kɛhamɔ he miishɛɛ waa diɛŋtsɛ. Ákɛ nɔkwɛmɔnɔ lɛ, kwɛ bɔ ni eyɔɔ miishɛɛ akɛ wɔɔsusu bɔ ni Yehowa kɛ ewebii ní hi shi yɛ blema, ní ekɛ amɛ fee kpaŋmɔ lɛ wie lɛ he, akɛ: “Eji obo mikitai lɛ atoi kulɛ.” (Yesaia 48:18) Esa akɛ bɔ ni ama sɛɛnamɔ ní yɔɔ Nyɔŋmɔ nitsɔɔmɔ he lɛ nɔ mi lɛ atsirɛ wɔ ní wɔbo lɛ toi ní wɔnyiɛ egbɛtsɔɔmɔ sɛɛ. Gbalɛi ní eba mli lɛ ahe saji ní aŋmala ashwie shi lɛ jieɔ Yehowa yiŋ ní ekpɛ akɛ ebaaha eshiwoi aba mli lɛ he yiŋkɔshikɔshifeemɔi fɛɛ.
2. Namɛi aŋmala Yesaia yitso 48 lɛ mli wiemɔi lɛ aha, ni namɛi hu baanyɛ aná wiemɔi nɛɛ ahe sɛɛ?
2 Eka shi faŋŋ akɛ aŋmala Yesaia wolo lɛ yitso 48 lɛ mli wiemɔi lɛ yɛ Yudafoi ní baatsɔmɔ nomii yɛ Babilon lɛ ahewɔ. Kɛfata he lɛ, wiemɔi nɛɛ hiɛ shɛɛ sane ko ní Kristofoi ní yɔɔ ŋmɛnɛ lɛ nyɛŋ aku amɛhiɛ amɛfɔ̃ nɔ. Biblia lɛ gba Babilon shigbeemɔ efɔ̃ shi yɛ Yesaia yitso 47 lɛ. Agbɛnɛ Yehowa tsɔɔ nɔ ni yɔɔ ejwɛŋmɔ mli kɛha Yudafoi nomii ní yɔɔ nakai maŋtiase lɛ mli lɛ. Yehowa ye awerɛho yɛ ewebii ní ehala amɛ lɛ osatofeemɔ kɛ kuɛŋtimɔ ní amɛkɛheee eshiwoi amɛyeee lɛ hewɔ. Shi kɛlɛ, eesumɔ ní etsɔɔ amɛ nii lolo, yɛ amɛsɛɛnamɔ hewɔ. Etsɔ hiɛ ena hetsuumɔ be ko ní baaha akɛ shwɛɛnii anɔkwafoi komɛi aku sɛɛ kɛba amɛmaŋ shikpɔŋ nɔ ekoŋŋ.
3. Mɛni ejaaa yɛ Yuda jamɔ lɛ he?
3 Kwɛ bɔ ni Yehowa webii lɛ egbá afã kwraa kɛjɛ jamɔ krɔŋŋ he! Yesaia shishijee wiemɔi lɛ haa mɔ he jɔ̃ɔ ehe: “Nyɛboa enɛ toi, nyɛ Yakob we, mɛi ní akɛ Israel gbɛi ewo nyɛ, ní nyɛjɛ Yuda nui lɛ amli; nyɛ mɛi ní nyɛkɛ Yehowa gbɛi kãa kita, ní nyɛtsĩɔ Israel Nyɔŋmɔ lɛ tã, shi jeee anɔkwale aloo jalɛ naa! Ejaakɛ amɛtsɛɔ amɛhe maŋ krɔŋkrɔŋ lɛ mli bii, ni amɛkɛ amɛhe kpasaa Israel Nyɔŋmɔ lɛ, Yehowa Zebaot ji egbɛi!” (Yesaia 48:1, 2) Mɛɛ osatofeemɔ nɛ! Eyɛ faŋŋ akɛ ‘Yehowa gbɛi ní akɛkãa kita’ lɛ tsɔɔ Nyɔŋmɔ gbɛi ní akɛtsuɔ nii jabejabe yɛ gbɛ ní bulɛ bɛ mli nɔ. (Zefania 1:5) Dani Yudafoi lɛ baaya nomŋɔɔ mli yɛ Babilon lɛ, no mli lɛ amɛjáa Yehowa yɛ “maŋ krɔŋkrɔŋ lɛ,” ni ji Yerusalem mli. Shi amɛjamɔ lɛ jeee anɔkwale. Amɛtsuii etsi ehe kɛjɛ Nyɔŋmɔ he kwraa, ni amɛjamɔ nifeemɔi lɛ “jeee anɔkwale aloo jalɛ naa!” Amɛbɛ blematsɛmɛi lɛ ahemɔkɛyeli lɛ eko.—Maleaki 3:7.
4. Mɛɛ jamɔ nɛkɛ saa Yehowa hiɛ?
4 Yehowa wiemɔi lɛ kaiɔ wɔ akɛ esaaa akɛ jamɔ feɔ jabejabe ko kɛkɛ. Esa akɛ ejɛ tsui mli. Sɔɔmɔ bibioo ko kɛkɛ—ní ekolɛ afeɔ ní akɛsa mɛi komɛi ahiɛ loo amɛná he miishɛɛ lɛ—jeee ‘Nyɔŋmɔ jamɔ hetuu-kɛhamɔ nifeemɔi.’ (2 Petro 3:11) Tsɛmɔ ní mɔ ko tsɛɔ ehe Kristofonyo lɛ kɛkɛ haaa ejamɔ lɛ afee nɔ ni Nyɔŋmɔ kpɛlɛɔ nɔ. (2 Timoteo 3:5) Kpɛlɛmɔ ní akpɛlɛɔ nɔ akɛ Yehowa yɛ lɛ he miihia, shi eji shishijee nɔ̃ pɛ kɛkɛ. Yehowa miitao susuma muu fɛɛ jamɔ ní suɔmɔ ní mli kwɔ kɛ hiɛsɔɔ kanyaa lɛ.—Kolosebii 3:23.
Nibii Heei ní Agbaa Afɔ̃ɔ Shi
5. Mɛni ji “tsutsu nii” ní Yehowa gba efɔ̃ shi lɛ ekomɛi?
5 Ekolɛ ehe miihia ní akusɛɛ akai nakai Yudafoi ní yɔɔ Babilon lɛ. No hewɔ lɛ, Yehowa kai amɛ shikome ekoŋŋ akɛ lɛ ji anɔkwa gbalɛ Nyɔŋmɔ lɛ, ni ekɛɛ: “Tsutsu nii lɛ mijaje mitsɔɔ jeeŋmɔ; eje minaa, ni miha anu, trukaa mifee, ni amɛba mli hu.” (Yesaia 48:3) “Tsutsu nii lɛ” ji nibii ní Nyɔŋmɔ etsu he nii momo, tamɔ kpɔmɔ ní ekpɔ̃ Israelbii lɛ kɛjɛ Mizraim ní ekɛ Shiwoo Shikpɔŋ lɛ ha amɛ ákɛ gboshinii lɛ. (1 Mose 13:14, 15; 15:13, 14) Gbalɛi nɛɛ baa kɛjɛɔ Nyɔŋmɔ daaŋ; ajɛɔ ŋwɛi akɛhaa. Nyɔŋmɔ haa gbɔmɛi nuɔ akpɔi ní ewo lɛ, ni esa akɛ nɔ ni amɛnuɔ lɛ atsirɛ amɛ ní amɛfee toiboo. (5 Mose 28:15) Efeɔ nii trukaa ni ekɛtsuɔ nɔ ni egba efɔ̃ shi lɛ he nii. Anɔkwale ní eji akɛ Yehowa ji Ofe lɛ maa nɔ mi akɛ eyiŋtoo baa mli.—Yoshua 21:45; 23:14.
6. Nɛgbɛ Yudafoi lɛ etsɔmɔ “kaniŋkajelɔi kɛ atuatselɔi” kɛyashɛ?
6 Yehowa webii lɛ etsɔmɔ “kaniŋkajelɔi kɛ atuatselɔi.” (Lala 78:8) Ekɛɛ amɛ yɛ faŋŋ mli akɛ: “Onuuu nɔ̃, ni okuɛ lɛ adabãŋ ni, ni ohiɛŋtso lɛ akɔɔble ni.” (Yesaia 48:4) Taakɛ sũ mli nibii tamɔ dade ji lɛ, Yudafoi lɛ adɔrɔmɔ wa waa—amɛkpɛlɛɛɛ tsakemɔ. No ji yiŋtoo kome hewɔ ní Yehowa jieɔ nibii akpo dani amɛbaa mli lɛ. Kɛ́ jeee nakai lɛ, ewebii lɛ baawie nibii ní Yehowa efee lɛ ahe akɛ: “Miwɔŋ lɛ fee, aloo mimaga ní agbɔ loo mimaga ní ashwie lɛ fã!” (Yesaia 48:5) Ani nɔ ni Yehowa wieɔ amrɔ nɛɛ baaná hewalɛ ko yɛ Yudafoi ní yeee anɔkwa lɛ anɔ? Nyɔŋmɔ kɛɛ amɛ akɛ: “Onu: belɛ kwɛmɔ enɛ fɛɛ! Ni nyɛ lɛ, aso esaaa akɛ nyɛjaje lo? Miiha onu nibii heei kɛjɛ be nɛɛ mli, nibii ní aŋɔtee ní oleko. Kpaako abɔ, ni ebɛ sá; onuko dã, ja ŋmɛnɛ, koni okakɛɛ akɛ: Naa, mile!”—Yesaia 48:6,7.
7. Mɛni ehe baahia akɛ Yudafoi nomii lɛ akpɛlɛ nɔ, ni mɛni amɛbaanyɛ amɛkpa gbɛ?
7 Jeeŋmɔ beebe ni Yesaia tsɔ hiɛ eŋma Babilon shigbeemɔ he gbalɛ efɔ̃ shi. Agbɛnɛ, ákɛ nomii yɛ Babilon lɛ, akɛ gbalɛ mli famɔ miiha Yudafoi lɛ ní amɛsusu gbalɛ lɛ mlibaa he. Ani amɛbaanyɛ amɛkɛɛ akɛ Yehowa jeee Nyɔŋmɔ ní haa gbalɛ baa mli? Ni akɛni Yuda maŋ lɛ mli bii lɛ ena ni amɛnu hu akɛ Yehowa ji anɔkwa Nyɔŋmɔ hewɔ lɛ, ani esaaa akɛ amɛjajeɔ anɔkwale nɛɛ amɛtsɔɔ mɛi krokomɛi hu? Yehowa wiemɔ ní ejie lɛ kpo lɛ gbaa nibii heei ní bako mli dã, tamɔ Babilon nɔ kunim ní Koresh baaye lɛ kɛ Yudafoi lɛ aheŋmɛɛmɔ lɛ. (Yesaia 48:14-16) Nɛkɛ nifeemɔi ní yɔɔ naakpɛɛ nɛɛ baa trukaa ní akpaaa gbɛ. Mɔ ko mɔ ko nyɛŋ atsɔ hiɛ ana kɛtsɔ je lɛŋ shihilɛi ní yaa nɔ lɛ ahesusumɔ kɛkɛ nɔ. Amɛbaa trukaa kɛkɛ tamɔ nɔ ni jeee nɔ ko haa amɛbaa. Namɔ haa nifeemɔi nɛɛ baa? Akɛni Yehowa gba aaafee afii 200 kɛtsɔ hiɛ hewɔ lɛ, hetoo lɛ yɛ faŋŋ.
8. Mɛɛ nibii heei Kristofoi ahiɛ kã nɔ ŋmɛnɛ, ni mɛni hewɔ amɛyɔɔ Yehowa gbalɛ wiemɔ lɛ mli hekɛnɔfɔɔ kɛmɔ shi lɛ?
8 Agbɛnɛ hu, Yehowa tsuɔ ewiemɔ he nii yɛ lɛ diɛŋtsɛ ebe ní eto lɛ naa. Gbalɛi ní eba mli lɛ maa Nyɔŋmɔ ní eji lɛ nɔ mi, jeee kɛha Yudafoi ní hi shi yɛ blema beaŋ lɛ pɛ shi moŋ kɛha Kristofoi ni yɔɔ ŋmɛnɛ lɛ hu. Gbalɛi babaoo ní ba mli yɛ blema lɛ ahe saji ni aŋmala ashwie shi—“tsutsu nii lɛ”—ji nɔmimaa ní tsɔɔ akɛ nibii heei ní Yehowa ewo shi yɛ he—ni ji “amanehulu kpeteŋkpele” ni baa lɛ, kɛ “asafo babaoo” lɛ ayibaamɔ kɛtsɔ nakai amanehulu lɛ mli, kɛ “shikpɔŋ hee” lɛ, kɛ nibii krokomɛi babaoo—lɛ fɛɛ baaba mli. (Kpojiemɔ 7:9, 14, 15; 21:4, 5; 2 Petro 3:13) Nakai nɔmimaa lɛ kanyaa mɛi ni yɔɔ jalɛ tsuii lɛ ŋmɛnɛ ni amɛwieɔ ehe kɛ ekãa. Amɛkɛ lalatsɛ lɛ henumɔi nɛɛ kpãa gbee, akɛ: “Mijaje jalɛ he sane yɛ asafo kpele lɛ mli; naa, mimuako minaa.”—Lala 40:10.
Yehowa kɛ Henɔyeli Tsuɔ Nii
9. Israel maŋ lɛ ji “nɔtɔlɔ kɛjɛ musuŋ beebe” yɛ mɛɛ gbɛ nɔ?
9 Hemɔkɛyeli ní Yudafoi lɛ bɛ, ní amɛkɛfee amɛnii yɛ Yehowa gbalɛi lɛ ahe lɛ haaa amɛbo ekɔkɔbɔɔi lɛ atoi. No hewɔ ni etee nɔ ekɛɛ amɛ akɛ: “Onuko, ni asaŋ oleko, ni kɛjɛ blema beebe lɛ otoi gbeleko; ejaakɛ mile akɛ kutumpɔoi anii ofeɔ, ni atsɛɔo nɔtɔlɔ kɛjɛ musuŋ beebe.” (Yesaia 48:8) Yuda sumɔɔɔ ní ebo Yehowa adafitswaa ní yɔɔ miishɛɛ lɛ toi. (Yesaia 29:10) Bɔ ni Nyɔŋmɔ webii ní ekɛ amɛ efee kpaŋmɔ lɛ fee amɛnii lɛ tsɔɔ akɛ maŋ lɛ ji “nɔtɔlɔ kɛjɛ musuŋ beebe.” Kɛjɛ efɔ́mɔ mli, kɛ eyinɔsane be fɛɛ mli lɛ, ale Israel maŋ lɛ waa akɛ maŋ ní tseɔ atua. Mlatɔmɔ kɛ kutumpɔoyeli ji tɔmɔi ní eka gbɔmɛi lɛ ahe, jeee eshai ní amɛfeɔ yɛ bei komekomei amli kɛkɛ.—Lala 95:10; Maleaki 2:11.
10. Mɛni hewɔ Yehowa baatsĩ ehe naa lɛ?
10 Ani hiɛnɔkamɔ ko kwraa bɛ? Dabi. Eyɛ mli akɛ Yuda efee ehe atuatselɔ kɛ kutumpɔfo moŋ, shi Yehowa yeɔ anɔkwa be fɛɛ be. Lɛ diɛŋtsɛ egbɛi kpeteŋkpele lɛ hiɛnyamwoo hewɔ lɛ, ebaaha husu ahi emlifu lɛ fɔsemɔ kɛ shishwiemɔ lɛ he. Ekɛɛ akɛ: “Migbɛi lɛ hewɔ lɛ matsi mlifu lɛ mato, ni miyijiemɔ lɛ hewɔ lɛ mato mitsui shi mahao, koni mikakpata ohiɛ.” (Yesaia 48:9) Mɛɛ srɔtofeemɔ kpele nɛ! Yehowa webii, ni ji Israel kɛ Yuda fɛɛ, yeee lɛ anɔkwa. Shi Yehowa baatse egbɛi lɛ he, ni ebaafee nii bɔ ni ekɛ yijiemɔ kɛ hiɛnyamwoo baaha egbɛi lɛ. Yɛ enɛ hewɔ lɛ, ekpataŋ ewebii ní ehala amɛ lɛ ahiɛ kwraa.—Yoel 2:13, 14.
11. Mɛni hewɔ Nyɔŋmɔ eŋmɛŋ gbɛ ní akpata ewebii lɛ ahiɛ kwraa lɛ?
11 Yudafoi nomii lɛ ateŋ aŋkroaŋkroi ní yɔɔ jalɛ tsuii lɛ hɛle shi yɛ Nyɔŋmɔ wiemɔi ní ekɛkã amɛhiɛ lɛ hewɔ ni amɛtswa amɛfai shi akɛ amɛbaabo enitsɔɔmɔi lɛ atoi. Sane jajemɔ ní nyiɛ sɛɛ lɛ woɔ gbɔmɛi nɛɛ hewalɛ waa diɛŋtsɛ, akɛ: “Naa, mitsuu ohe, shi jeee tamɔ jwiɛtɛi; mikao mikwɛ yɛ amanehulu flɔnɔɔ mli. Mihewɔ nɔŋŋ, mihewɔ nɔŋŋ mafee, ejaakɛ té tɛŋŋ ni aaabule migbɛi lɛ? ni minunyam lɛ mikɛhaŋ mɔ kroko!” (Yesaia 48:10, 11) Kaai ní mli wa waa ní Yehowa ŋmɛ gbɛ ní eba ewebii anɔ—tamɔ nɔ ni ekɛ amɛ ewo “amanehulu flɔnɔɔ mli” lɛ—eka amɛ ni etsuu amɛhe, ni ejie nɔ ni yɔɔ amɛtsuii amli lɛ kpo. Nɔ ko ní tamɔ nakai ba mli afii ohai abɔ komɛi ní eho beni Mose kɛɛ amɛblematsɛmɛi lɛ akɛ: “Okai gbɛ fɛɛ ní Yehowa, o-Nyɔŋmɔ lɛ, eha onyiɛ nɔ yɛ ŋa lɛ nɔ afii nyɔŋmai ejwɛ sɔŋŋ nɛ, koni ekɛbao shi ní ekɛkao ekwɛ, beni afee ní ele nɔ ni yɔɔ otsui mli.” (5 Mose 8:2) Yɛ amɛ atuatsemɔ subaŋ lɛ fɛɛ sɛɛ lɛ, Yehowa kpataaa maŋ lɛ hiɛ yɛ nakai beaŋ, ni ekpataŋ maŋ lɛ hiɛ kwraa yɛ nɛkɛ be nɛɛ mli hu. Enɛ baaha awó egbɛi kɛ egbojee lɛ nɔ gojoo. Kɛji eha ewebii lɛ ahiɛ kpata yɛ Babilonbii lɛ adɛŋ lɛ, no lɛ eku ekpaŋmɔ lɛ mli ni no baabule egbɛi lɛ. Ebaafee tamɔ nɔ ni Israel Nyɔŋmɔ lɛ bɛ hewalɛ ní ekɛaahere ewebii lɛ ayiwala.—Ezekiel 20:9.
12. Mɛɛ gbɛ nɔ atsɔ atsuu anɔkwale Kristofoi ahe yɛ klɛŋklɛŋ jeŋ ta lɛ mli?
12 Hetsuumɔ he ehia Yehowa webii yɛ ŋmɛnɛŋmɛnɛ beaŋ hu. Mra mli yɛ afii ohai 20 lɛ shishijee beaŋ tɔ̃ɔ lɛ, Biblia Kaselɔi akuu bibioo lɛ mli bii lɛ ateŋ mɛi pii sɔmɔ Nyɔŋmɔ kɛjɛ anɔkwa suɔmɔ ní amɛyɔɔ akɛ amɛaasa ehiɛ lɛ mli, shi mɛi komɛi yɛ mli ní kɛ otii ní ejaaa emamɔ amɛhiɛ, tamɔ gbɛihemɔ he akɔnɔ ní amɛyɔɔ lɛ. Dani nakai kuu bibioo lɛ baanyɛ anyiɛ jeŋ muu fɛɛ sanekpakpa shiɛmɔ nitsumɔ ní agba afɔ̃ shi kɛha naagbee be nɛɛ hiɛ lɛ, ehe baahia ní atsuu amɛhe. (Mateo 24:14) Gbalɔ Maleaki gba efɔ̃ shi akɛ abaatsu nakai hetsuumɔ lɛ he nii pɛpɛɛpɛ yɛ be mli ní Yehowa baaba esɔlemɔtsu lɛ mli lɛ. (Maleaki 3:1-4) Ewiemɔi lɛ ba mli yɛ afi 1918 mli. Anɔkwa Kristofoi tsɔ kaa be ní naa wa waa mli beni awuɔ klɛŋklɛŋ jeŋ ta lɛ, ni nakai kaa lɛ yashɛ he ni mli wa fe fɛɛ beni amɔ Joseph F. Rutherford, ni ji Buu Mɔɔ Asafo lɛ sɛinɔtalɔ yɛ nakai beaŋ lɛ, kɛ onukpai lɛ ekomɛi hu lɛ. Nakai anɔkwa Kristofoi lɛ ná hetsuumɔ nifeemɔ lɛ he sɛɛ. Amɛtsɔ Jeŋ Ta I be lɛ mli kɛ faishitswaa ní mli wa fe bei fɛɛ akɛ amɛbaasɔmɔ amɛ-Nyɔŋmɔ kpeteŋkpele lɛ yɛ gbɛ fɛɛ gbɛ ní eeetsɔɔ lɛ nɔ.
13. Te Yehowa webii efee amɛnii yɛ yiwaa ní akɛba amɛnɔ yɛ klɛŋklɛŋ jeŋ ta lɛ sɛɛ afii lɛ amli lɛ he amɛha tɛŋŋ?
13 Kɛjɛ nakai beaŋ kɛbaa nɛɛ, Yehowa Odasefoi kɛ yiwaa ní mli wa fe fɛɛ ekpe yɛ be kɛ bei amli. Enɛ hako amɛyiŋ afee amɛ kɔshikɔshi yɛ amɛ-Bɔlɔ lɛ wiemɔ lɛ he. Shi moŋ, eha amɛkadi wiemɔi ní bɔfo Petro kɛ Kristofoi ní hi shi yɛ egbii lɛ amli, ní awaa amɛ yi lɛ wie lɛ, akɛ: “Nyɛyeɔ ŋkɔmɔ fioo ko yɛ kaai srɔtoi amli . . . koni ana nyɛhemɔkɛyeli salɛ lɛ . . . kɛyaha yijiemɔ kɛ woo kɛ anunyam yɛ Yesu Kristo kpojiemɔ lɛ mli.” (1 Petro 1:6, 7) Yiwaa ní naa wa waa fiteee anɔkwa Kristofoi emuuyeli mlihiɛmɔ lɛ. Shi moŋ, ejieɔ bɔ ni amɛkanyamɔi amli tse lɛ kpo. Ekɛ su ní aka akwɛ fataa amɛhemɔkɛyeli lɛ he ni etsɔɔ bɔ ni amɛhetuu-kɛhamɔ kɛ suɔmɔ lɛ mli kwɔ ha.—Abɛi 17:3.
‘Mi Ji Klɛŋklɛŋ Mɔ, Mi Ji Sɛɛkpee Mɔ’
14. (a) Yehowa ji “klɛŋklɛŋ mɔ” kɛ “sɛɛkpee mɔ” yɛ mɛɛ gbɛ nɔ? (b) Mɛɛ nitsumɔi wuji Yehowa tsɔ ‘enine’ nɔ etsu?
14 Agbɛnɛ Yehowa kɛ miishɛɛ kpá ewebii ní ekɛ amɛ efee kpaŋmɔ lɛ fai akɛ: “Bó mi toi ko, Yakob, kɛ Israel ní mitsɛ́o: Mi ni, mi ji klɛŋklɛŋ mɔ, ni mi nɔŋŋ ji sɛɛkpee mɔ! Minine to shikpɔŋ lɛ shishi, ni mininejurɔ lɛɛ ŋwɛi mli; ni mitsɛ́ amɛ, ni amɛ fɛɛ amɛbadamɔ shi!” (Yesaia 48:12, 13) Ákɛ mɔ ni tamɔɔɔ adesai lɛ, Nyɔŋmɔ hiɔ shi kɛyaa naanɔ ni etsakeee. (Maleaki 3:6) Yehowa jaje yɛ Kpojiemɔ wolo lɛ mli akɛ: “Mi ji Alfa lɛ kɛ Omega lɛ, shishijee lɛ kɛ naagbee lɛ, klɛŋklɛŋ mɔ lɛ kɛ naagbee mɔ lɛ.” (Kpojiemɔ 22:13) Nyɔŋmɔ ofe ko bɛ ní tsɔ Yehowa hiɛ, ni eko hu baŋ yɛ esɛɛ. Lɛ ji Mɔ ní Nɔ Kwɔ Fe Fɛɛ kɛ Naanɔ Mɔ lɛ, Bɔlɔ lɛ. ‘Enine’—ni ji ehewalɛ ní ekɛtsuɔ nii lɛ—to shikpɔŋ lɛ shishi ni elɛɛ ŋwɛi kɛ emli ŋulamii lɛ amli. (Hiob 38:4; Lala 102:26) Kɛ́ etsɛ enibɔɔ nii lɛ, amɛbadamɔɔ shi ní amɛfee klalo akɛ amɛaasɔmɔ lɛ.—Lala 147:4.
15. Mɛɛ gbɛ nɔ, ni mɛɛ yiŋtoo hewɔ Yehowa “sumɔɔ” Koresh lɛ?
15 Akɛ ninefɔɔ ko ní he hiaa waa ha Yudafoi lɛ kɛ mɛi ní jeee Yudafoi lɛ fɛɛ akɛ: “Nyɛ fɛɛ nyɛbuaa nyɛhe naa ní nyɛbaboa toi: Amɛteŋ namɔ jaje enɛ tsɔɔ? Mɔ ni Yehowa sumɔɔ lɛ: eeefee nɔ ni sa ehiɛ yɛ Babel he, ni enine aaakã Kaldeabii lɛ anɔ. Mi, mi nɔŋŋ miwie, ni mitsɛ́ lɛ, ni miŋɔ lɛ kɛba, ni egbɛ lɛ aaaja.” (Yesaia 48:14, 15) Yehowa pɛ ji mɔ ni he wa fe fɛɛ ni enyɛɔ egbaa nɔ ni baaba wɔsɛɛ ni ebaa mli pɛpɛɛpɛ. Amagai ní he bɛ sɛɛnamɔ ko lɛ ‘ateŋ’ eko bɛ ní nyɛɔ egbaa nɛkɛ nibii nɛɛ. Jeee amagai, shi moŋ Yehowa ji mɔ ni “sumɔɔ” Koresh lɛ—ni tsɔɔ akɛ, Yehowa ehala lɛ kɛha yiŋtoo krɛdɛɛ ko. (Yesaia 41:2; 44:28; 45:1, 13; 46:11) Etsɔ hiɛ ena Koresh puemɔ yɛ je lɛŋ saji amli, ni ehala lɛ ákɛ mɔ ni baaye Babilon nɔ kunim wɔsɛɛ.
16, 17. (a) Mɛni hewɔ abaanyɛ awie akɛ Nyɔŋmɔ kɛ egbalɛi haaa yɛ teemɔŋ lɛ? (b) Mɛɛ gbɛ nɔ Yehowa etsɔ ejie eyiŋtoi akpo faŋŋ ŋmɛnɛ?
16 Yehowa tee nɔ ekɛ ninefɔɔ gbee wie akɛ: “Nyɛtsia nyɛbɛŋkɛa mi, nyɛbaboa enɛ toi: kɛjɛ shishijee lɛ jeee dujiaŋ miwie yɛ; kɛjɛ beyinɔ ní eyɔɔ lɛ miyɛ jɛi!” (Yesaia 48:16a) Yehowa kɛ gbalɛi ní jɛɔ eŋɔɔ lɛ haaa yɛ teemɔŋ aloo ní eeeha mɛi fioo ní ekɛ ehe nitsumɔ woɔ amɛdɛŋ lɛ pɛ ale. Yehowa gbalɔi lɛ damɔɔ Nyɔŋmɔ najiaŋ amɛwieɔ ewiemɔi lɛ yɛ faŋŋ mli. (Yesaia 61:1) Amɛjajeɔ Nyɔŋmɔ suɔmɔnaa nii amɛtsɔɔ faŋŋ. Ákɛ nɔkwɛmɔnɔ lɛ, saji ní kɔɔ Koresh he lɛ jeee saji heei kɛha Nyɔŋmɔ loo nɔ ní eleee kɛtsɔɔɔ hiɛ. Nyɔŋmɔ gba amɛhe sane efɔ̃ shi yɛ faŋŋ mli kɛtsɔ Yesaia nɔ aaafee afii 200 kɛtsɔ hiɛ.
17 Nakai nɔŋŋ hu Yehowa kɛ eyiŋtoi ahe saji eteee ŋmɛnɛ. Gbɔmɛi akpekpei abɔ ní yɔɔ shikpɔji kɛ ŋshɔkpɔi ohai abɔ nɔ jajeɔ nibii agbɛjianɔtoo nɛɛ naagbee ní baa lɛ he kɔkɔbɔɔ kɛ sanekpakpa ni ji jɔɔmɔi ní baaba yɛ Nyɔŋmɔ Maŋtsɛyeli lɛ shishi lɛ amɛtsɔɔ yɛ shia kɛ shia, kɛ gbɛjegbɛi anɔ, kɛ hei krokomɛi fɛɛ ní amɛbaanyɛ. Lɛɛlɛŋ, Yehowa ji Nyɔŋmɔ ní jieɔ eyiŋtoo kpo etsɔɔ.
‘Bó Mikitai lɛ Atoi!’
18. Mɛni Yehowa shweɔ kɛha ewebii lɛ?
18 Akɛni Yehowa mumɔ lɛ wo gbalɔ lɛ hewalɛ hewɔ lɛ, ejaje akɛ: “Nuntsɔ Yehowa etsu mi, kɛ Emumɔ lɛ! Bɔ ni Yehowa, okpɔ̃lɔ lɛ kɛ Israel Mɔ krɔŋkrɔŋ lɛ, kɛɛ nɛ: Mi ji Yehowa, o-Nyɔŋmɔ lɛ, mɔ ni tsɔɔo nii ni hi hao, mɔ ni tsɔɔo gbɛ ní onyiɛ nɔ lɛ.” (Yesaia 48:16b, 17) Esa akɛ bɔ ni Yehowa kwɛɔ amɛ lɛ he kpojiemɔ ní suɔmɔ yɔɔ mli nɛɛ ama nɔ mi kɛha Israel maŋ lɛ akɛ Nyɔŋmɔ baajie amɛ kɛjɛ Babilon. Lɛ ji amɛ-Kpɔ̃lɔ. (Yesaia 54:5) Nɔ ni Yehowa shweɔ yɛ etsui mli ji ní Israelbii lɛ asaa amɛkɛ lɛ teŋ wekukpaa lɛ ekoŋŋ, ní amɛbo ekitai lɛ atoi. Anɔkwa jamɔ damɔ toiboo ní afeɔ ahaa ŋwɛi gbɛtsɔɔmɔi anɔ. Israelbii lɛ nyɛɛɛ anyiɛ gbɛ ní ja nɔ, ja atsɔɔ amɛ ‘gbɛ ní esa akɛ amɛnyiɛ nɔ.’
19. Mɛɛ faikpamɔ ní jɛ tsui mli Yehowa kɛha?
19 Yehowa jie bɔ ni esumɔɔ ní ewebii ajo amanehulu naa foi ní amɛná shihilɛ mli ŋɔɔmɔ lɛ kpo yɛ gbɛ ní yɔɔ miishɛɛ diɛŋtsɛ nɔ, akɛ: “Eji obo mikitai lɛ atoi kulɛ, ohejɔlɛ aaatamɔ faa, ni ojalɛ hu aaatamɔ ŋshɔkei.” (Yesaia 48:18) Mɛɛ tsuiŋ henumɔ ní mli wa ní jɛ Bɔlɔ ofe lɛ ŋɔɔ nɛ! (5 Mose 5:29; Lala 81:14) Yɛ nɔ̃ najiaŋ ní amɛaaya nomŋɔɔ mli lɛ, Israelbii lɛ baanyɛ aná toiŋjɔlɛ ní fá babaoo mli ŋɔɔmɔ, tamɔ nu ní miiho yɛ faa mli. (Lala 119:165) Amɛ jalɛ nifeemɔi lɛ hu baanyɛ afá bɔ ni ehiŋ kanemɔ tamɔ bɔ ni ŋshɔkei fá lɛ. (Amos 5:24) Ákɛ mɔ ni yɔɔ amɛhe miishɛɛ lɛɛlɛŋ lɛ, Yehowa kpa Israelbii lɛ fai, ni ejɛ suɔmɔ mli etsɔɔ amɛ gbɛ ní esa akɛ amɛnyiɛ nɔ. Oo, kɛji amɛbaabo lɛ toi kɛkɛ!
20. (a) Mɛni Nyɔŋmɔ shweɔ kɛha Israel yɛ amɛ atuatsemɔ lɛ fɛɛ sɛɛ? (b) Mɛni wɔkaseɔ yɛ Yehowa he yɛ bɔ ni ekɛ ewebii lɛ ye ha lɛ mli? (Kwɛmɔ akrabatsa ni yɔɔ baafa 133 lɛ.)
20 Kɛji Israel aaatsake etsui lɛ, mɛɛ jɔɔmɔi aaajɛ mli aba? Yehowa kɛɛ akɛ: “Oseshi aaafá tamɔ shia, ni omusuŋ bii hu aaatamɔ shia kulibii: afoŋ ogbɛi ashɛŋ afɔ̃ŋ ni afiteŋ lɛ yɛ mihiɛ!” (Yesaia 48:19) Yehowa kai gbɔmɛi lɛ yɛ shiwoo ní ekɛha akɛ Abraham seshi lɛ yi baafá, “tamɔ ŋwɛi ŋulamii kɛ ŋshɔnaa shia” lɛ he. (1 Mose 22:17; 32:12) Shi kɛlɛ, nɛkɛ Abraham seshibii nɛɛ etsɔmɔ atuatselɔi, ni amɛbɛ hegbɛ akɛ amɛnine shɛɔ shiwoo lɛ mlibaa nɔ. Yɛ anɔkwale mli lɛ, nibii ní amɛfee yɛ amɛshihilɛ mli lɛ ehiii kwraa, aahu akɛ yɛ Yehowa diɛŋtsɛ Mla lɛ naa lɛ, amɛsa mɛi ní esa akɛ afo amɛgbɛi ashɛ afɔ̃ kwraa ákɛ maŋ. (5 Mose 28:45) Shi kɛlɛ, Yehowa sumɔɔɔ ní ekpata ewebii lɛ ahiɛ, ni esumɔɔɔ hu ní ekwa amɛ kwraa.
21. Mɛɛ jɔɔmɔi wɔbaanyɛ wɔná mli ŋɔɔmɔ ŋmɛnɛ kɛji wɔtao Yehowa gbɛtsɔɔmɔ sɛɛgbɛ?
21 Shishitoo mlai ni yɔɔ ŋmalɛ kuku ní mli wa nɛɛ mli lɛ kɔɔ Yehowa jálɔi ahe ŋmɛnɛ. Yehowa ji wala Jɛɛhe, ni ele bɔ ni esa akɛ wɔkɛ wɔwala atsu nii aha jogbaŋŋ fe mɔ fɛɛ mɔ. (Lala 36:10) Ekɛ gbɛtsɔɔmɔi eha wɔ, jeee ní ekɛfite wɔ miishɛɛnamɔ, shi moŋ ní wɔná he sɛɛ. Anɔkwa Kristofoi boɔ toi kɛtsɔɔ suɔmɔ ni amɛsumɔɔ ní Yehowa atsɔɔ amɛ nii lɛ nɔ. (Mika 4:2) Egbɛtsɔɔmɔi lɛ buɔ wɔmumɔŋ shihilɛ kɛ wɔkɛ lɛ teŋ wekukpaa lɛ he, ni amɛbuɔ wɔhe kɛjɛɔ Satan hewalɛ ní fiteɔ mɔ lɛ hu he. Kɛ́ wɔnu shishitoo mlai ní yɔɔ Nyɔŋmɔ mlai lɛ asɛɛ lɛ shishi lɛ, wɔnaa akɛ Yehowa tsɔɔ wɔ nii kɛha wɔ sɛɛnamɔ. Wɔyooɔ akɛ “ekitai lɛ waaa.” Ni afoŋ wɔ ashɛŋ afɔ̃ŋ.—1 Yohane 2:17; 5:3.
‘Nyɛjea Kpo Kɛjɛa Babel!’
22. Mɛni awoɔ Yudafoi anɔkwafoi lɛ hewalɛ ní amɛfee, ni mɛɛ nɔmimaa ahaa amɛ?
22 Kɛ́ Babilon gbee shi lɛ, ani Yudafoi lɛ ekomɛi baajie tsui kpakpa kpo? Ani amɛkɛ kpɔmɔ ní Nyɔŋmɔ baakpɔ̃ amɛ lɛ mli hegbɛ lɛ baatsu nii, ní amɛku amɛsɛɛ kɛya amɛmaŋ shikpɔŋ nɔ, ní amɛyato jamɔ krɔŋŋ shishi ekoŋŋ? Hɛɛ. Yehowa wiemɔi ní nyiɛ sɛɛ lɛ tsɔɔ hekɛnɔfɔɔ ní eyɔɔ akɛ amɛbaafee enɛ. “Nyɛjea Babel, nyɛjoa foi kɛjɛa Kaldeabii ateŋ kɛ nyamɔ gbee! Nyɛjajea enɛ nyɛtsɔɔa, nyɛgbaa, nyɛhaa ejijea kɛyaa shikpɔŋ lɛ naagbeehe! Nyɛkɛa akɛ: Yehowa ekpɔ̃ etsulɔ Yakob! Beni ekɛ amɛ nyiɛ ŋã lɛ nɔ lɛ, kumai yeee amɛ: eha nu jɛ tɛsaa mli ho ha amɛ; egbá tɛsaa lɛ mli, ni nu lɛ tue kɛje kpo.” (Yesaia 48:20, 21) Aawo Yehowa webii lɛ hewalɛ yɛ gbalɛ wiemɔ mli ní amɛje Babilon maŋ lɛ mli amɛya oya. (Yeremia 50:8) Esa akɛ amɛha ale amɛkpɔmɔ lɛ kɛyashi shikpɔŋ lɛ naagbeehei lɛ tɔ̃ɔ. (Yeremia 31:10) Yɛ Kpojee kɛmiijɛ Mizraim lɛ sɛɛ lɛ, Yehowa ha ewebii lɛ amɛhiamɔ nii beni amɛnyiɛ shia ŋã nɔ shikpɔji anɔ kɛyaa lɛ. Nakai nɔŋŋ hu ebaaha ewebii lɛ amɛhiamɔ nii beni amɛshiɔ Babilon kɛkuɔ amɛsɛɛ kɛyaa amɛmaŋ lɛ.—5 Mose 8:15, 16.
23. Namɛi naŋ toiŋjɔlɛ ní Nyɔŋmɔ kɛhaa lɛ mli ŋɔɔmɔ?
23 Shishitoo mla kroko hu ní he hiaa yɛ ní kɔɔ Yehowa yiwalaheremɔ nifeemɔi lɛ ahe ní esa akɛ Yudafoi lɛ akai. Ekolɛ mɛi ni sumɔɔ jalɛ nifeemɔ lɛ baana amanehulu yɛ eshai ní amɛfeɔ lɛ ahewɔ, shi akpataŋ amɛhiɛ. Shi kɛlɛ, jeee nakai kwraa eji yɛ mɛi fɔji lɛ agbɛfaŋ. “Hejɔlɛ bɛ ha mɛi fɔji lɛ! Yehowa kɛɛ.” (Yesaia 48:22) Eshafeelɔi ní tsakeee amɛtsui lɛ anine shɛŋ toiŋjɔlɛ ní Nyɔŋmɔ esaa eto mɛi ní sumɔɔ lɛ lɛ nɔ. Atsuuu yiwalaheremɔ nifeemɔi ahe nii ahaaa efɔŋfeelɔi ní kuɛŋ ti, loo mɛi ní heee yeee lɛ. Nakai nifeemɔi lɛ yɛ kɛha mɛi ní yɔɔ hemɔkɛyeli lɛ pɛ. (Tito 1:15, 16; Kpojiemɔ 22:14, 15) Mɛi fɔji bɛ toiŋjɔlɛ ní jɛɔ Nyɔŋmɔ ŋɔɔ lɛ eko.
24. Mɛni ha Nyɔŋmɔ webii ná miishɛɛ yɛ ŋmɛnɛŋmɛnɛ beaŋ lɛ?
24 Yɛ afi 537 D.Ŋ.B. lɛ, hegbɛ ní Yudafoi anɔkwafoi lɛ ná akɛ amɛshi Babilon lɛ ha amɛná miishɛɛ waa diɛŋtsɛ. Yɛ afi 1919 lɛ, Nyɔŋmɔ webii lɛ aheŋmɛɛmɔ kɛmiijɛ Babilonbii anomŋɔɔ mli lɛ ha amɛná miishɛɛ kpele diɛŋtsɛ. (Kpojiemɔ 11:11, 12) Amɛná hiɛnɔkamɔ waa, ni amɛŋɔ hegbɛ lɛ ni amɛkɛlɛɛ amɛnitsumɔ lɛ mli. Lɛɛlɛŋ, ehe bahia ní nakai Kristofoi akuu bibioo lɛ aná ekãa koni amɛnyɛ amɛkɛ hegbɛi heei ní amɛná kɛha shiɛmɔ yɛ jeŋ ní nyɛ̃ɔ amɛ lɛ mli lɛ atsu nii kɛmɔ shi. Shi kɛtsɔ Yehowa yelikɛbuamɔ nɔ lɛ, amɛgbala amɛjwɛŋmɔ kɛtee sanekpakpa shiɛmɔ nitsumɔ lɛ nɔ waa. Yinɔsane yeɔ odase akɛ Yehowa jɔɔ amɛ.
25. Mɛni hewɔ ehe hiaa akɛ wɔbo Nyɔŋmɔ jalɛ mlai lɛ atoi jogbaŋŋ lɛ?
25 Yesaia gbalɛ lɛ fã nɛɛ maa nɔ mi akɛ Yehowa tsɔɔ wɔ nii kɛha wɔ sɛɛnamɔ. Ehe miihia waa akɛ wɔbo Nyɔŋmɔ jalɛ mlai lɛ atoi jogbaŋŋ. (Kpojiemɔ 15:2-4) Kɛ́ wɔkai wɔhe yɛ Nyɔŋmɔ nilee kɛ esuɔmɔ lɛ he lɛ, ebaaye ebua wɔ ní wɔhi shi yɛ nɔ ni Yehowa kɛɔ akɛ eja lɛ naa pɛpɛɛpɛ. Ekitai lɛ fɛɛ yɛ kɛha wɔ sɛɛnamɔ.—Yesaia 48:17, 18.
[Akrabatsa/Mfonirii ni yɔɔ baafa 133]
Nyɔŋmɔ Ofe lɛ To Etsui Shi
Yehowa kɛɛ Israelbii hemɔkɛyeli kwalɔi lɛ akɛ: “Matsi mlifu lɛ mato . . . mato mitsui shi.” (Yesaia 48:9) Wiemɔi ní tamɔ nɛkɛ yeɔ ebuaa wɔ ni wɔnaa akɛ Nyɔŋmɔ feɔ nɔkwɛmɔnɔ ní eye emuu efɔ̃ɔ shi yɛ ehewalɛ ní ekɛtsuuu nii yɛ gbɛ fɔŋ nɔ kɔkɔɔkɔ lɛ gbɛfaŋ. Eji anɔkwale akɛ mɔ ko mɔ ko bɛ hewalɛ fe Nyɔŋmɔ. No hewɔ ni wɔtsɛɔ lɛ akɛ Mɔ ni yɔɔ hewalɛ fe fɛɛ, Mɔ ni nyɛɔ nɔ fɛɛ nɔ efeɔ lɛ. Ekɛ sabala ni ji “Ofe” lɛ tsɛɔ ehe yɛ gbɛ ní sa nɔ. (1 Mose 17:1) Jeee akɛ eyɛ hewalɛ ní husu bɛ he kɛkɛ, shi moŋ eyɛ hegbɛ hu, yɛ gbɛhe ní eyɔɔ akɛ jeŋ muu fɛɛ ní ebɔ lɛ nɔ Nuntsɔ Maŋtsɛ ní eji lɛ hu hewɔ. No hewɔ ni mɔ ko mɔ ko nyɛŋ asusu akɛ eeetswa enine efɔ̃ loo ekɛɛ lɛ akɛ, “Mɛni ofeɔ nɛɛ?”—Daniel 4:35.
Ni kɛlɛ, kɛji ehe miihia ní ejie ehewalɛ kpo eshi ehenyɛlɔi lɛ po lɛ, Nyɔŋmɔ mli fuuu mra. (Nahum 1:3) Yehowa baanyɛ ‘atsi emlifu eto,’ ni awieɔ ehe yɛ gbɛ ni ja nɔ akɛ ‘emli fuuu mra’ ejaakɛ suɔmɔ—jeee mlifu—ji esu ní fe fɛɛ. Kɛ́ ejie emlifu kpo lɛ, efeɔ nakai yɛ jalɛ naa be fɛɛ be, eja gbɛ be fɛɛ be, ni ekudɔɔ lɛ be fɛɛ be.—2 Mose 34:6; 1 Yohane 4:8.
Mɛni hewɔ Yehowa feɔ nii yɛ nɛkɛ gbɛ nɔ lɛ? Ejaakɛ ehaa hewalɛ ní eyɔɔ ákɛ ofe lɛ kɛ esui krokomɛi etɛ ni he hiaa titri—nilee, jalɛsaneyeli, kɛ suɔmɔ lɛ ŋmɛɔ pɛpɛɛpɛ yɛ gbɛ ní yeɔ emuu nɔ. Bɔ ni ekɛ hewalɛ tsuɔ nii lɛ kɛ sui krokomɛi nɛɛ kpãa gbee be fɛɛ be.
[Mfoniri ni yɔɔ baafa 122]
Yesaia shɛɛ sane ní kɔɔ Yudafoi anɔkwafoi ní yɔɔ nomŋɔɔ mli lɛ asɛɛkuu he lɛ ha amɛná hiɛnɔkamɔ
[Mfonirii ni yɔɔ baafa 124]
Yudafoi lɛ sumɔɔ ní amɛkɛɛ akɛ amagai tsuɔ Yehowa nitsumɔi lɛ
1. Ishtar 2. Ŋtayaa ní awula lɛ awo ashwishwɛ mli, ní jɛ Babilon Nyiɛmɔ kɛ Shifoo Gbɛ lɛ nɔ 3. Drako ní akɛfeɔ Marduk he okadi
[Mfoniri ni yɔɔ baafa 127]
“Amanehulu flɔnɔɔ” baanyɛ atsɔɔ kɛji yiŋtoi ahewɔ ni wɔsɔmɔɔ Yehowa lɛ he tse aloo ehe tseee
[Mfonirii ni yɔɔ baafa 128]
Anɔkwa Kristofoi kɛ yiwaa ní naa wa waa diɛŋtsɛ ekpe