Yitso 39
Maŋtsɛ Tabilɔ lɛ Ye Kunim yɛ Harmagedon
Ninaa 13—Kpojiemɔ 19:11-21
Saneyitso: Yesu nyiɛɔ ŋwɛi tabilɔi lɛ ahiɛ kɛkpataa Satan nibii agbɛjianɔtoo lɛ hiɛ
Emlibaa be: Yɛ Babilon Kpeteŋkpele lɛ hiɛkpatamɔ lɛ sɛɛ
1. Mɛni ji Harmagedon, ni mɛni kɛ enɛ baa?
HARMAGEDON—wiemɔ ni woɔ mɛi pii ahe gbeyei! Shi kɛha mɛi ni sumɔɔ jalɛ nifeemɔ lɛ, etsɔɔ be ni akɛ be kakadaŋŋ emɛ ni Yehowa baatsu enaagbee kojomɔ he nii eshi jeŋmaji lɛ. Ejeee gbɔmɔ ta, shi moŋ “Nyɔŋmɔ Ofe lɛ gbi wulu lɛ nɔ ta lɛ”—gbi ni ekɛbaatɔ owele yɛ shikpɔŋ lɛ nɔ nɔyelɔi anɔ lɛ. (Kpojiemɔ 16:14, 16; Ezekiel 25:17) Akɛni afee Babilon Kpeteŋkpele lɛ amaŋfɔ hewɔ lɛ, no mli lɛ amanehulu kpeteŋkpele lɛ eje shishi momo po. Akɛni Satan miitsirɛ eyisɛɛ hewɔ lɛ, kooloo ni tsuɔ tamɔ muneele kɛ ekoloŋtoi nyɔŋma lɛ baatsɔ amɛhiɛ amɛma Yehowa webii lɛ atutuamɔ nɔ. Abonsam, ni no mli lɛ emli efu Nyɔŋmɔ gbɛjianɔtoo ni tamɔ yoo lɛ fe be fɛɛ lɛ etswa efai shi akɛ ekɛ mɛi ni eshishiu amɛ lɛ baatsu nii ni amɛkɛ eseshibii lɛ ateŋ mɛi ni eshwɛ lɛ awuu ta kɛya naagbee. (Kpojiemɔ 12:17) Enɛ ji Satan naagbee hegbɛ!
2. Namɔ ji Gog ni jɛ Magog lɛ, ni mɛɛ gbɛ nɔ Yehowa kudɔɔ lɛ koni ebatutua Lɛ diɛŋtsɛ ewebii lɛ yɛ?
2 Atsɔɔ Abonsam tutuamɔ ni naa wa lɛ mli faŋŋ yɛ Ezekiel yitso 38. Atsɛɔ Abonsam ni aba lɛ shi yɛ jɛmɛ lɛ akɛ “Gog ni jɛ Magog shikpɔŋ lɛ nɔ.” Yehowa kɛ okadi kpoji aaatsɛrɛ Gog kadaai amli, ni ebaagbala lɛ kɛ etai babaoo lɛ kɛba tutuamɔ lɛ mli. Mɛɛ gbɛ nɔ etsɔɔ efeɔ enɛ yɛ? Kɛtsɔ ha ni eeeha Gog ana E-Dasefoi lɛ akɛ mɛi ni bɛ hebuu nɔ ko kwraa, “maŋ ni abua naa kɛjɛ jeŋmaji lɛ amli, ni amɛna kooloi kɛ nibii pii, ni amɛhiɔ shikpɔŋ laŋmɔ lɛ nɔ lɛ.” Mɛi fɛɛ ni yɔɔ shikpɔŋ lɛ nɔ lɛ egbala amɛjwɛŋmɔ kɛba nɛkɛ gbɔmɛi nɛɛ anɔ akɛ gbɔmɛi kome pɛ ni ekpoo akɛ amɛaaja kooloo lɛ kɛ emaga lɛ. Amɛmumɔŋ hewalɛ kɛ shweremɔ lɛ woɔ Gog mli la. No hewɔ lɛ Gog kɛ etabilɔi babaoo lɛ, ni kooloo ni fa kpo kɛjɛ ŋshɔŋ lɛ kɛ ekoloŋtoi nyɔŋma lɛ fata he lɛ, fɛɛ tutuaa amɛ koni amɛbagbe amɛ. Shi akɛni amɛtamɔɔɔ Babilon Kpeteŋkpele lɛ, ni amɛji Nyɔŋmɔ webii ni he tse hewɔ lɛ, amɛnaa ŋwɛi hebuu mli ŋɔɔmɔ!—Ezekiel 38:1, 4, 11, 12, 15; Kpojiemɔ 13:1.
3. Mɛɛ gbɛ nɔ Yehowa tsɔɔ ekpataa Gog tabilɔi lɛ ahiɛ yɛ?
3 Mɛɛ gbɛ nɔ Yehowa tsɔɔ ejieɔ Gog kɛ esafoi lɛ fɛɛ kɛyaa? Bo toi! “Ni matsɛ klante kɛaaba enɔ yɛ migɔji lɛ fɛɛ nɔ, Nuŋtsɔ Yehowa kɛɛ; mɔ fɛɛ mɔ klante aaaka enyɛmi nɔ.” Shi nuklea loo tawuu nii krokomɛi yeŋ omanye yɛ nakai be lɛ mli, ejaakɛ Yehowa jajeɔ akɛ: “Ni matsɔ gbelehela kɛ lá nɔ mikɛ lɛ aaakojo, ni maha nugbɔnɛmɔ ni looɔ nibii kɛyaa kɛ nyɔŋmɔŋtɛi kɛ la kɛ swɔɔ anɛ ashwie lɛ kɛ etai lɛ kɛ majimaji babaoo ni fata ehe lɛ anɔ. Ni mafee mihe agbo, ni mafee mihe krɔŋkrɔŋ, ni maha ale mi yɛ jeŋmaji pii ahiɛ, ni amɛaana amɛle akɛ mi ji Yehowa lɛ.”—Ezekiel 38:21-23; 39:11; okɛto Yoshua 10:8-14; Kojolɔi 7:19-22; 2 Kronika 20:15, 22-24; Hiob 38:22, 23 he.
Mɔ ni Atsɛɔ lɛ ‘Anɔkwafo kɛ Anɔkwayelɔ’ Lɛ
4. Te Yohane tsɔɔ bɔ ni Yesu Kristo esaa ehe eha tawuu lɛ mli eha tɛŋŋ?
4 Yehowa tsɛɔ klante. Namɔ ji mɔ ni fɔɔ klante lɛ? Kɛ wɔku sɛɛ wɔtee Kpojiemɔ lɛ, wɔnaa hetoo lɛ yɛ ninaa kroko ni yɔɔ miishɛɛ mli. Ŋwɛi gbele yɛ Yohane hiɛ koni ajie nɔ ko ni yɔɔ naakpɛɛ ni kanyaa mɔ diɛŋtsɛ kpo atsɔɔ lɛ—Yesu Kristo diɛŋtsɛ ni ewula ehe kɛha ta! Yohane kɛɔ wɔ akɛ: “Ni mina ni agbele ŋwɛi naa, ni naa, okpɔŋɔ yɛŋ, ni mɔ ni ta nɔ lɛ, atsɛɔ lɛ: Heyelilɔ kɛ Anɔkwafo; ni jalɛ naa ekojoɔ ni ewuuɔ ta. Ni ehiŋmɛii tamɔ lalilɛii, ni maŋtsɛfaii pii bumɔ eyiteŋ.”—Kpojiemɔ 19:11, 12a.
5, 6. Mɛni (a) “okpɔŋɔ yɛŋ” lɛ tsɔɔ? (b) gbɛi ‘Anɔkwafo kɛ Anɔkwayelɔ’ lɛ tsɔɔ? (d) hiŋmɛi ni tamɔ “lalilɛi” lɛ tsɔɔ? (e) “maŋtsɛfaii pii” lɛ tsɔɔ?
5 Taakɛ eji yɛ ninaa ni tsɔ hiɛ ni kɔɔ okpɔŋɔnɔtaralɔi ejwɛ lɛ ahe lɛ, nɛkɛ “okpɔŋɔ yɛŋ” nɛɛ ji jalɛ tawuu he okadi ni sa. (Kpojiemɔ 6:2) Ni Nyɔŋmɔ bii lɛ ateŋ namɔ baanyɛ afee mɔ ni ji jalɔ babaoo fe Tabilɔ ni he wa nɛɛ? Akɛni atsɛɔ lɛ “Heyelilɔ kɛ Anɔkwafo” hewɔ lɛ, esa akɛ efee “odasefonyo anɔkwafo lɛ kɛ anɔkwayelɔ lɛ,” ni ji Yesu Kristo. (Kpojiemɔ 3:14) Ewuɔ ta koni ekɛtsu Yehowa jalɛ kojomɔi lɛ ahe nii. No hewɔ lɛ eetsu nii akɛ Kojolɔ, “Nyɔŋmɔ Hewalɔ,” ni Yehowa ehala lɛ. (Yesaia 9:5) Ehiŋmɛii woɔ mɔ he gbeyei, tamɔ “lalilɛii” ni miikwɛ ehenyɛlɔi ahiɛkpatamɔ ni tamɔ la ni baa lɛ.
6 Maŋtsɛfaii pii bumɔ Maŋtsɛ Tabilɔ nɛɛ yiteŋ. Kooloo ni Yohane na akɛ eeje kpo kɛmiijɛ ŋshɔŋ lɛ yɛ maŋtsɛfaii nyɔŋma, ni efeɔ enɔyeli yɛ shikpɔŋ nɔ yɛ be fioo ko mli lɛ he okadi. (Kpojiemɔ 13:1) Shi Yesu yɛ “maŋtsɛfaii pii.” Nɔ ko nɔ ko bɛ ni kɛ enunyam nɔyeli lɛ yeɔ egbɔ, ejaakɛ lɛ ji “mɛi ni yeɔ nɔ akɛ maŋtsɛmɛi lɛ a-Maŋtsɛ kɛ mɛi ni yeɔ nɔ akɛ nuŋtsɔmɛi lɛ a-Nuŋtsɔ.”—1 Timoteo 6:15, New World Translation.
7. Mɛni ji gbɛi ko ni aŋma ni Yesu yɔɔ lɛ?
7 Bɔ ni Yohane tsɔɔ mli eha lɛ tee nɔ: “Ni aŋma egbɛi ko ni mɔ ko mɔ ko leee akɛ ja lɛ diɛŋtsɛ nɔŋŋ.” (Kpojiemɔ 19:12b) Biblia lɛ wieɔ Nyɔŋmɔ Bi lɛ he kɛ gbɛi tamɔ Yesu, Immanuel, kɛ Mikael. Shi “gbɛi” ni atsɔɔɔ nɛɛ feɔ tamɔ nɔ ni edamɔ shi kɛha gbɛhe kɛ hɛgbei ni Yesu naa mli ŋɔɔmɔ yɛ Nuŋtsɔ lɛ gbi lɛ nɔ lɛ. (Okɛto Kpojiemɔ 2:17 he.) Beni Yesaia tsɔɔ mɔ ni Yesu ebatsɔ kɛjɛ 1914 kɛbaa lɛ, ekɛɛ: “Ni aaatsɛ egbɛi akɛ Naakpɛɛ Ŋaawolɔ, Nyɔŋmɔ Hewalɔ, Naanɔ Tsɛ, Toiŋjɔlɛ Lumɔ.” (Yesaia 9:6, New World Translation) Bɔfo Paulo kɛ Yesu gbɛi lɛ to E-sɔɔmɔ hegbɛi ni nɔ kwɔlɔ lɛ ahe beni eŋma akɛ: “Nyɔŋmɔ wo [Yesu] enɔ gojoo, ni eduro lɛ gbɛi ni ta gbɛi fɛɛ gbɛi nɔ, koni . . . nakutso fɛɛ nakutso akula shi yɛ Yesu gbɛi lɛ amli.”—Filipibii 2:9, 10.
8. Mɛni hewɔ Yesu pɛ ji mɔ ni baale gbɛi ni aŋma lɛ, ni ekɛ namɛi naa ehegbɛi ni nɔ kwɔlɔ lɛ amli gbɛfaŋnɔ?
8 Hegbɛi ni Yesu yɔɔ lɛ yɛ sɔrɔto. Yɛ Yehowa sɛɛ lɛ, Yesu pɛ ji mɔ ni baanyɛ anu nɔ ni hegbɛ ni nɔ kwɔ ni tamɔ nɛkɛ ni aaahi mli lɛ tsɔɔ lɛ shishi. (Okɛto Mateo 11:27 he.) No hewɔ lɛ, yɛ Nyɔŋmɔ bɔɔ nii fɛɛ ateŋ lɛ, Yesu pɛ baanyɛ anu nɛkɛ gbɛi nɛɛ shishi. Ni kɛlɛ, Yesu kɛ eyemforo lɛ woɔ nɛkɛ hegbɛi nɛɛ ekomɛi amli. No hewɔ lɛ ekɛ nɛkɛ shiwoo nɛɛ ha: “Kunimyelɔ lɛ, . . . maŋma . . . mi diɛŋtsɛ migbɛi hee lɛ, yɛ enɔ.”—Kpojiemɔ 3:12.
9. Mɛni enɛɛmɛi tsɔɔ (a) Yesu ni “wo atade ni aŋɔtsɔ la mli” lɛ? (b) Yesu ni atsɛ lɛ akɛ “Nyɔŋmɔ Wiemɔ” lɛ?
9 Ni Yohane kɛfata he akɛ: “Ni ewo atade ni aŋɔtsɔ la mli; ni atsɛɔ egbɛi akɛ: Nyɔŋmɔ Wiemɔ lɛ.” (Kpojiemɔ 19:13) Namɔ “la” nɛ? Ebaanyɛ efee Yesu la ni ji ewala lɛ, nɔ ni efɔse eshwie shi eha adesai lɛ. (Kpojiemɔ 1:5) Shi, yɛ kuku nɛɛ mli lɛ, etamɔ nɔ ni ekɔɔ henyɛlɔi lɛ ala ni afɔseɔ ashwieɔ shi beni atsuɔ Yehowa kojomɔi ahe nii yɛ amɛnɔ lɛ he. Akaiɔ wɔ ninaa ni tsɔ hiɛ ni emli ni akpaa shikpɔŋ lɛ nɔ wein yibii ni anaanaa nɔ yɛ Nyɔŋmɔ mlifu weinŋaanɔ kpeteŋkpele lɛ mli aahu kɛyashiɔ be mli ni la lɛ shɛɔ “okpɔŋɔi lɛ adaaŋ nii lɛ ahe” lɛ—ni tsɔɔ kunim kpeteŋkpele ni aye yɛ Nyɔŋmɔ henyɛlɔi anɔ lɛ. (Kpojiemɔ 14:18-20) Nakai nɔŋŋ hu, la ni ekpa Yesu kponɔgbɛ atade mli lɛ maa nɔ mi akɛ ekunimyeli lɛ ji nɔ ni yeɔ emuu kwraa kɛmɔɔ shi. (Okɛto Yesaia 63:1-6 he.) Agbɛnɛ Yohane wieɔ ekoŋŋ yɛ Yesu he ákɛ akɛ gbɛi ko tsɛɔ lɛ. Yɛ enɛ mli lɛ eji gbɛi ko ni ale jogbaŋŋ—“Nyɔŋmɔ Wiemɔ lɛ”—ni haa ayɔseɔ nɛkɛ Maŋtsɛ Tabilɔ nɛɛ akɛ Yehowa Naawielɔ Nukpa kɛ anɔkwale lɛ Hefalɔ lɛ.—Yohane 1:1; Kpojiemɔ 1:1.
Yesu Nanemɛi Tabilɔi
10, 11. (a) Yɛ mɛɛ gbɛ nɔ Yohane tsɔɔ yɛ akɛ jeee Yesu kome wuɔ ta lɛ? (b) Anɔkwale ni eji akɛ okpɔŋɔi lɛ ji eyɛji ni akɛ okpɔŋɔnɔtaralɔi lɛ “amɛwo klala yɛŋ ni he tse” lɛ tsɔɔ mɛni? (d) Namɛi feɔ ŋwɛi “tai” lɛ?
10 Jeee Yesu kome too pɛ wuɔ nɛkɛ ta nɛɛ. Yohane kɛɔ wɔ akɛ: “Ni tai ni yɔɔ ŋwɛi lɛ tara okpɔŋɔi yɛji anɔ kɛnyiɛ esɛɛ, ni amɛwo klala yɛŋ ni he tse.” (Kpojiemɔ 19:14) Anɔkwale ni eji akɛ okpɔŋɔi lɛ ji okpɔŋɔi “yɛji” lɛ tsɔɔ jalɛ tawuu. “Klala yɛŋ ni he tse” lɛ sa kɛha Maŋtsɛ lɛ okpɔŋɔnɔtaralɔi lɛ, ni ehetsemɔ ni kpɛɔ kaŋkaŋ kɛ bɔ ni eyɛɔ futaa lɛ hu tsɔɔ shidaamɔ ni yɔɔ krɔŋŋ ni ja yɛ Yehowa hiɛ. Belɛ namɛi feɔ nɛkɛ “tai” nɛɛ? Ŋwanejee ko bɛ he akɛ bɔfoi krɔŋkrɔŋi lɛ fata he. Nuŋtsɔ lɛ gbi lɛ shishijee mli ni Mikael kɛ ebɔfoi lɛ shɛrɛ Satan kɛ edaimonioi lɛ kɛjɛ ŋwɛi amɛshwie. (Kpojiemɔ 12:7-9) Kɛfata he lɛ, “bɔfoi lɛ fɛɛ” baasɔmɔ Yesu yɛ be mli ni eta enunyam maŋtsɛsɛi nɔ ni eyaa nɔ ekojoɔ jeŋmaji kɛ shikpɔŋ lɛ nɔ gbɔmɛi lɛ. (Mateo 25:31, 32) Yɛ anɔkwale mli lɛ, Yesu bɔfoi lɛ baafata ehe yɛ naagbee ta ni emli ni atsuɔ Nyɔŋmɔ kojomɔi ahe nii kɛgbeɔ naa kwraa lɛ mli.
11 Ebaakɔ mɛi krokomɛi hu he. Beni ekɛ eshɛɛ sane lɛ majeɔ asafo ni yɔɔ Tiatira lɛ, Yesu wo shi akɛ: “Ni kunimyelɔ lɛ kɛ mɔ ni toɔ minitsumɔi lɛ kɛyashiɔ naagbee lɛ, maha lɛ hegbɛ yɛ jeŋmaji lɛ anɔ, ni ekɛ dadetso aaakpala amɛ ni eeejwara amɛ tamɔ ajwaraa su gbɛi lɛ, taakɛ bɔ ni mi hu mina kɛjɛ mi-Tsɛ ŋɔɔ lɛ.” (Kpojiemɔ 2:26, 27) Ŋwanejee ko bɛ he akɛ kɛ be lɛ shɛ lɛ, Kristo nyɛmimɛi ni yɔɔ ŋwɛi momo lɛ baana gbɛfaŋnɔ yɛ gbɔmɛi lɛ kɛ jeŋmaji lɛ ni akɛ dadetso aaatswia amɛ lɛ mli.
12. (a) Ani Nyɔŋmɔ tsuji ni yɔɔ shikpɔŋ nɔ lɛ baana Harmagedon tawuu lɛ mli gbɛfaŋnɔ? (b) Harmagedon saa Yehowa webii ni yɔɔ shikpɔŋ lɛ nɔ lɛ ahe yɛ mɛɛ gbɛ nɔ?
12 Shi Nyɔŋmɔ tsuji ni yɔɔ shikpɔŋ nɛɛ nɔ lɛ hu? Yohane kuu lɛ naŋ Harmagedon tawuu lɛ diɛŋtsɛ mli gbɛfaŋnɔ; ni amɛnanemɛi anɔkwafoi lɛ hu, ni ji gbɔmɛi ni jɛ jeŋmaji fɛɛ mli ni hoɔ yuu kɛbaa Yehowa mumɔŋ jamɔ we lɛ hu naŋ mli gbɛfaŋnɔ. Nɛkɛ gbɔmɛi ni sumɔɔ toiŋjɔlɛ nɛɛ kɛ amɛ klantei esɔ̃ kɔii momo. (Yesaia 2:2-4) Ni kɛlɛ, ekɔɔ amɛhe diɛŋtsɛ! Taakɛ wɔtsɔ hiɛ wɔna lɛ, Yehowa webii ni tamɔ mɛi ni bɛ hebuu nɔ ko kwraa lɛ ji mɛi ni Gog kɛ esafo lɛ fɛɛ kɛ hiɛdɔɔ tutuaa amɛ lɛ. Enɛ ji okadi kɛha Yehowa Maŋtsɛ Tabilɔ lɛ, ni ŋwɛi tai lɛ fiɔ esɛɛ lɛ, ni amɛje tawuu ni akɛbuleɔ nakai jeŋmaji lɛ fɛɛ aseshi shishi lɛ shishi. (Ezekiel 39:6, 7, 11; okɛto Daniel 11:44-12:1 he.) Akɛ mɛi ni kwɛɔ nɔ ni yaa nɔ lɛ, Nyɔŋmɔ webii ni yɔɔ shikpɔŋ lɛ nɔ lɛ ji mɛi ni baana enɛ he miishɛɛ waa. Harmagedon baatsɔɔ amɛyiwalaheremɔ, ni amɛbaahi shi kɛya naanɔ akɛ mɛi ni amɛkɛ amɛhiŋmɛi eye Yehowa bembuu ta kpeteŋkpele lɛ he odase.
13. Te wɔfeɔ tɛŋŋ wɔleɔ akɛ Yehowa Odasefoi eteee shi amɛwooo nɔyelii fɛɛ?
13 Ani enɛ tsɔɔ akɛ Yehowa Odasefoi teɔ shi woɔ nɔyelii fɛɛ? Jeee nakai kwraa! Amɛboɔ bɔfo Paulo ŋaawoo lɛ toi: “Mɔ fɛɛ mɔ aba ehe shi aha hegbɛi ni yeɔ nɔ lɛ.” Amɛyɔseɔ akɛ bei abɔ ni ŋmɛnɛŋmɛnɛ gbɛjianɔtoo nɛɛ yɔɔ lɛ, nakai “hegbɛi ni yeɔ nɔ” lɛ hu hiɔ shi yɛ Nyɔŋmɔ gbɛŋmɛɛ naa koni amɛha gbɛjianɔtoo fioo ko ahi adesai aweku lɛ mli. No hewɔ lɛ, Yehowa Odasefoi lɛ woɔ amɛtoo, amɛboɔ mlai atoi, amɛkɛ bulɛ haa gbɛjegbɛi anɔ mlai, amɛboɔ amɛgbɛi kɛ nibii aŋmalamɔ kɛ nibii krokomɛi atoi. (Romabii 13:1, 6, 7) Kɛfata he lɛ, amɛnyiɛɔ Biblia mli shishitoo mla akɛ amɛfee anɔkwafoi ni amɛye anɔkwa lɛ sɛɛ; amɛjieɔ naanyo suɔmɔ kpo; amɛtswaa weku ekomefeemɔ ni mli wa ni yɔɔ jeŋba kpakpa amɛmaa shi; amɛtsɔseɔ amɛbii koni amɛtsɔmɔ maŋbii kpakpai ni nɔ bɛ. Yɛ nɛkɛ gbɛ nɔ lɛ, jeee akɛ amɛkɛ “Kaisare nii haa Kaisare” kɛkɛ, shi moŋ amɛkɛ “Nyɔŋmɔ nii haa Nyɔŋmɔ” hu. (Luka 20:25; 1 Petro 2:13-17) Akɛni Nyɔŋmɔ Wiemɔ lɛ tsɔɔ akɛ nɔyeli hewalɛi ni yɔɔ je nɛŋ lɛ baahi shi be fioo ko pɛ hewɔ lɛ, Yehowa Odasefoi saa amɛhe bianɛ kɛhaa shihilɛ ni yeɔ emuu, shihilɛ diɛŋtsɛ, ni etsɛŋ amɛbaana mli ŋɔɔmɔ yɛ Kristo Maŋtsɛyeli nɔyeli shishi lɛ. (1 Timoteo 6:17-19) Eyɛ mli akɛ amɛnaŋ gbɛfaŋnɔ yɛ je nɛŋ hewalɛi lɛ abutumɔ mli moŋ, shi Odasefoi lɛ naa gbeyeishemɔ ni woo yɔɔ mli amɛhaa nɔ ni Nyɔŋmɔ Wiemɔ ni jɛ mumɔŋ lɛ, Ŋmalɛ Krɔŋkrɔŋ lɛ kɛɔ yɛ kojomɔ ni Nyɔŋmɔ baatsu he nii yɛ Harmagedon lɛ he.—Yesaia 26:20, 21; Hebribii 12:28, 29.
Aaya Naagbee Ta Lɛ!
14. “Tsi ni naa ba” ni jɛɔ Yesu daaŋ lɛ feɔ mɛni he okadi?
14 Mɛɛ hegbɛ loo hewalɛ Yesu tsɔɔ nɔ ekɛgbeɔ ekunimyeli lɛ naa? Yohane kɛɔ wɔ akɛ: “Ni tsi ni naa ba jɛɔ edaaŋ, koni ekɛ no atswia jeŋmajiaŋbii lɛ anii; ni ekɛ dadetso aaakpala amɛ.” (Kpojiemɔ 19:15a) Nakai “tsi ni naa ba” lɛ damɔ shi kɛha hegbɛ loo hewalɛ ni Nyɔŋmɔ kɛha Yesu koni ekɛ famɔ aha koni akpata mɛi fɛɛ ni kpooɔ akɛ amɛaafi Nyɔŋmɔ Maŋtsɛyeli lɛ sɛɛ lɛ ahiɛ lɛ. (Kpojiemɔ 1:16; 2:16) Nɛkɛ okadi ni jeɔ kpo faŋŋ nɛɛ tamɔ Yesaia wiemɔ lɛ: “Ni [Yehowa] efee minaabu tamɔ klante ni naa ba, eŋɔ mi etee yɛ eniji ashishi hɔɔŋ lɛ mli, ni eŋɔ mi efee egaimlibi ni he kpɛɔ.” (Yesaia 49:2) Yesaia fee Yesu, mɔ ni jajeɔ Nyɔŋmɔ kojomɔi ni etsuɔ he nii tamɔ ekɛ gaimlibi ni tɔ̃ɔɔ miitsu lɛ he mfoniri yɛ biɛ.
15. Beni shɛɔ nɛkɛ be nɛɛ mli lɛ, no mli lɛ namɔ akpa ehe mama ni akojo lɛ momo koni no akadi mɛni shishijee?
15 Beni nɛkɛ be nɛɛ aaashɛ lɛ, no mli lɛ Yesu eha Paulo wiemɔi nɛɛ eba mli momo po: “Ni no dani aaajie mlakwalɔ lɛ kpo, mɔ ni Nuŋtsɔ Yesu kɛ edaaŋ mumɔ lɛ aaagbe, ni ekɛ ba ni eba lɛ puemɔ lɛ aaakpata ehiɛ lɛ.” Hɛɛ, ba ni Yesu eba, (Hela, pa·rou·siʹa) lɛ ji nɔ ko ni ajie lɛ kpo atsɔɔ kɛjɛ 1914 kɛbaa nɛɛ kɛtsɔ esha gbɔmɔ lɛ, ni ji Kristendom osɔfoi lɛ ni akpaa amɛhe mama ni akojoɔ amɛ lɛ nɔ. Nakai be ni eba lɛ baaje kpo faŋŋ yɛ be mli ni kooloo ni tsuɔ tamɔ muneele lɛ akoloŋtoi nyɔŋma lɛ aaatsu nakai kojomɔ lɛ he nii ni efite Kristendom kwraa kɛ mɛi ni eshwɛ yɛ Babilon Kpeteŋkpele lɛ mli lɛ. (2 Tesalonikabii 2:1-3, 8, New World Translation) No baafee amanehulu kpeteŋkpele lɛ shishijee! Yɛ no sɛɛ lɛ, Yesu gbalaa ejwɛŋmɔ kɛyaa nɔ ni eshwɛ yɛ Satan gbɛjianɔtoo lɛ mli lɛ nɔ, taakɛ gbalɛ lɛ tsɔɔ lɛ: “Ekɛ edaaŋ tso lɛ aaatswa shikpɔŋ lɛ, ni ekɛ enaabu mumɔ lɛ aaagbe mɔ fɔŋ lɛ.”—Yesaia 11:4.
16. Lalai lɛ kɛ Yeremia tsɔɔ Maŋtsɛ Tabilɔ ni Yehowa ehala lɛ lɛ nitsumɔ lɛ mli yɛ mɛɛ gbɛ nɔ?
16 Akɛ mɔ ni Yehowa ehala lɛ lɛ, Maŋtsɛ Tabilɔ lɛ kɛ sɔrɔtofeemɔ baaba mɛi ni baaje mli lɛ kɛ mɛi ni baagboi lɛ ateŋ. Yɛ be mli ni Yehowa wieɔ yɛ gbalɛ naa etsɔɔ Nyɔŋmɔ Bi nɛɛ, ekɛɛ: “Oookumɔ amɛ [shikpɔŋ nɔ nɔyelɔi lɛ] kɛ dadetso, ooojwara amɛ tamɔ gbɛshɔlɔ gbɛ!” Ni Yeremia wieɔ etsɔɔ nɛkɛ nɔyeli mli hiɛnyiɛlɔi ni amɛfite nɛɛ kɛ amɛtsuji lulɔi lɛ akɛ: “Nyɛwoa lele ko, nyɛ tookwɛlɔi, ni nyɛbolɔa, ni nyɛkokloa shi yɛ lamulu mli nyɛ tooi lɛ amli ekpakpai; ejaakɛ nyɛgbee gbii lɛ eshɛ, ni majwara nyɛ wɔtsɔwɔtsɔ, ni nyɛaagbeegbee shi tamɔ shɔɔ nɔ ni jara wa!” Bɔ fɛɛ bɔ ni nakai nɔyelɔi lɛ aaatamɔ mɛi ni yiwalɛ jeŋ nɛɛ sumɔɔ amɛ ha lɛ fɛɛ sɛɛ lɛ, tswa ni akɛ Maŋtsɛ lɛ dadetso lɛ aaatswa amɛ shikome pɛ lɛ baajwara amɛ wɔtsɔwɔtsɔ, tamɔ ajwaraa shɔɔ nɔ ko ni yɔɔ fɛo. Ebaatamɔ bɔ pɛ ni David gba yɛ Nuŋtsɔ Yesu he lɛ: “Ohewalɛ tso lɛ, Yehowa aaakpa mli kɛaajɛ Zion ahao: Ye lumɔ yɛ ohenyɛlɔi lɛ ateŋ! Nuŋtsɔ [Yehowa] lɛ ni yɔɔ oninejurɔ nɔ lɛ aaatswia maŋtsɛmɛi anii yɛ emlifu gbi lɛ nɔ. Eeekojo yɛ jeŋmaji lɛ ateŋ, eeewo jɛmɛ obɔ kɛ gbohii sɔŋŋ.”—Lala 2:9, 12; 83:18, 19; 110:1, 2, 5, 6; Yeremia 25:34.
17. (a) Te Yohane tsɔɔ Maŋtsɛ Tabilɔ lɛ kojomɔ hiɛkpatamɔ ni ekɛaaba lɛ mli ehaa tɛŋŋ? (b) Tsɔɔmɔ gbalɛi komɛi ni tsɔɔ bɔ ni Nyɔŋmɔ mlifu gbi lɛ baaji amanehulu kpele gbi kɛha jeŋmaji lɛ.
17 Nɛkɛ Maŋtsɛ Tabilɔ ni he wa nɛɛ pueɔ ekoŋŋ yɛ ninaa ni nyiɛ sɛɛ lɛ mli: “Ni lɛ nɔŋŋ enaanaa Nyɔŋmɔ Ofe lɛ mlifu ni naa wa lɛ weinŋaanɔ lɛ nɔ.” (Kpojiemɔ 19:15b) Yohane etsɔ hiɛ yɛ ninaa ko ni tsɔ hiɛ lɛ mli ena bɔ ni “anaanaa Nyɔŋmɔ Ofe lɛ mlifu ni naa wa lɛ weinŋaanɔ lɛ nɔ” lɛ. (Kpojiemɔ 14:18-20) Yesaia hu tsɔɔ hiɛkpatamɔ ko ni tamɔ weinŋaanɔ mli, ni gbalɔi krokomɛi gbaa bɔ ni Nyɔŋmɔ mlifu gbi lɛ baafee oshara kpeteŋkpele gbi aha jeŋmaji lɛ fɛɛ lɛ.—Yesaia 24:1-6; 63:1-4; Yeremia 25:30-33; Daniel 2:44; Zefania 3:8; Zakaria 14:3, 12, 13; Kpojiemɔ 6:15-17.
18. Mɛni gbalɔ Yoel jieɔ lɛ kpo yɛ Yehowa ni baakojo jeŋmaji lɛ fɛɛ lɛ he?
18 Gbalɔ Yoel kɛ wein tsɔne toɔ Yehowa ni miiba “abakojo jeŋmaji fɛɛ ni jwere shi kɛkpe lɛ” he. Yehowa ji mɔ ni kɛ famɔ lɛ haa, ni ŋwanejee ko bɛ he akɛ ekɛhaa E-hefatalɔ Kojolɔ, Yesu, kɛ eŋwɛi tai lɛ: “Nyɛkɛ nikpamɔ kakla awoa mli, ejaakɛ nikpamɔ nii lɛ egbi; nyɛbaa ni nyɛbanaanaa nɔ, ejaakɛ wein tsɔne lɛ eyi tɔ, wein bui lɛ hu miiho; ejaakɛ amɛ nɔ fɔŋ feemɔ lɛ fa! Asafoi, asafoi yɛ atɛŋbuu jɔɔ lɛ mli; ejaakɛ Yehowa gbi lɛ eshɛ shi eta, yɛ atɛŋbuu jɔɔ lɛ mli. Hulu kɛ nyɔŋtsere ewo duŋ, ni ŋulamii efɔɔ kpɛmɔ. Ni Yehowa aaahũu kɛaajɛ Zion, ni eeewo egbee kɛaajɛ Yerusalem, ni ŋwɛi kɛ shikpɔŋ aaahoso; shi Yehowa aaatsɔ abobaa he eha emaŋ lɛ kɛ mɔɔ ni wa eha Israelbii lɛ. Ni nyɛaana nyɛle akɛ mi ji Yehowa.”—Yoel 4:12-17.
19. (a) Mɛɛ gbɛ nɔ aaatsɔ aha sane ni abi yɛ 1 Petro 4:17 lɛ hetoo? (b) Mɛɛ gbɛi aŋma yɛ Yesu atade lɛ mli, ni mɛni hewɔ ebaafee nɔ ni sa jogbaŋŋ lɛ?
19 Enɛ baafee hiɛkpatamɔ gbi, lɛlɛŋ, kɛha jeŋmaji kɛ adesai toigbolɔi lɛ, shi eji kpɔmɔ gbi kɛha mɛi fɛɛ ni kɛ Yehowa kɛ e-Maŋtsɛ Tabilɔ lɛ efee amɛ abobaa he lɛ! (2 Tesalonikabii 1:6-9) Kojomɔ ni je shishi yɛ Nyɔŋmɔ we lɛ yɛ 1918 lɛ efee nɔ ni etee nɔ aahu kɛyashɛ naagbee, ni eha sanebimɔ ni atee lɛ shi yɛ 1 Petro 4:17 lɛ hetoo: “Mɛi ni booo Nyɔŋmɔ sanekpakpa lɛ toi lɛ, te amɛnaagbee aaafee tɛŋŋ?” No mli lɛ anunyam Kunimyelɔ lɛ enaanaa wein tsɔne lɛ nɔ kɛgbe naa, ni ekɛtsɔɔ akɛ lɛ ji Mɔ ni awo enɔ ni Yohane wieɔ ehe nɛkɛ lɛ: “Ni aŋma gbɛi ko yɛ etade kɛ egboŋ nɔ akɛ: Maŋtsɛmɛi a-Maŋtsɛ kɛ nuŋtsɔmɛi a-Nuŋtsɔ.” (Kpojiemɔ 19:16) Ejie ehe kpo akɛ ehe wa kwraa fe shikpɔŋ nɔ nɔyelɔ fɛɛ nɔyelɔ, fe adesa maŋtsɛ loo nuŋtsɔ ko. Egbojee kɛ enyam lɛ kwɔɔ kɛtekeɔ nɔ. Eje kpo “yɛ anɔkwale kɛ mlijɔlɛ kɛ jalɛ mli” ni eye kunim kɛmiiya naanɔ! (Lala 45:5) Nɔ ni aŋma yɛ etade ni la ekpa mli lɛ mli ji gbɛi ko ni Nuŋtsɔ Maŋtsɛ Yehowa, ni e-Bembulɔ ji lɛ lɛ kɛha lɛ!
Nyɔŋmɔ Gbɛkɛnaashi Okpɔlɔ Kpeteŋkpele Lɛ
20. Te Yohane tsɔɔ “Nyɔŋmɔ okpɔlɔ kpeteŋkpele” lɛ mli eha tɛŋŋ, ni enɛ kɛ mɛɛ gbalɛ ni etsɔ hiɛ ni tamɔ nakai nɔŋŋ baa jwɛŋmɔ mli?
20 Yɛ Ezekiel ninaa lɛ mli, beni akpata Gog asafo yuu lɛ hiɛ sɛɛ lɛ, afɔɔ loofɔji kɛ kooloi anine kɛbaa okpɔlɔŋmɛɛ ko shishi! Amɛjie gbohii ni jwere shikpɔŋ lɛ nɔ lɛ fɛɛ kɛtee kɛtsɔ ye ni amɛye Nyɔŋmɔ henyɛlɔi lɛ agbohii nɛɛ nɔ. (Ezekiel 39:11, 17-20) Yohane wiemɔi ni nyiɛ sɛɛ lɛ kɛ nakai gbalɛ ni etsɔ hiɛ lɛ baa jwɛŋmɔ mli yɛ faŋŋ mli akɛ: “Ni mina bɔfo ko damɔ hulu mli, ni ebo kɛ gbee wulu ekɛɛ loofɔji ni filikiɔ yɛ ŋwɛi lɛ fɛɛ akɛ: Nyɛbaa ni nyɛbabuaa nyɛhe naa yɛ Nyɔŋmɔ okpɔlɔ kpeteŋkpele lɛ he, koni nyɛbaye maŋtsɛmɛi aloo kɛ asafoiatsɛmɛi aloo kɛ hewalɔi aloo kɛ okpɔŋɔi aloo kɛ mɛi ni tara amɛnɔ lɛ aloo kɛ odehei kɛ nyɔji kɛ mɛi bibii kɛ mɛi wuji fɛɛ aloo.”—Kpojiemɔ 19:17, 18.
21. Mɛni ji nɔ ni (a) bɔfo lɛ ni “damɔ hulu mli” lɛ tsɔɔ? (b) anɔkwale ni eji akɛ ashi gbohii lɛ yɛ shikpɔŋ lɛ hiɛ ni afuuu amɛ lɛ tsɔɔ? (d) gbohii ni ato naa ni abaashi yɛ shikpɔŋ lɛ nɔ lɛ tsɔɔ? (e) wiemɔ ni ji “Nyɔŋmɔ okpɔlɔ kpeteŋkpele lɛ” tsɔɔ?
21 Bɔfo lɛ “damɔ hulu mli,” gbɛhe ko ni adamɔɔ nɔ akɛ famɔ haa ni akɛgbalaa ŋwɛi loofɔji ajwɛŋmɔ. Efɔ nine etsɛ amɛ akɛ amɛfee klalo koni amɛbaye mɛi ni Maŋtsɛ Tabilɔ lɛ kɛ eŋwɛi tai lɛ baagbe amɛ lɛ aloo. Anɔkwale ni eji akɛ abaashi gbohii lɛ yɛ shikpɔŋ lɛ hiɛ lɛ tsɔɔ akɛ amɛbaagboi kɛ hiɛashishwiemɔ ni mɛi fɛɛ ana amɛ. Taakɛ blema Isabel ji lɛ, amɛnaŋ fuu ni woo yɔɔ mli. (2 Maŋtsɛmɛi 9:36, 37) Bɔ ni ato gbohii ni jwere shi nɛɛ anaa aha lɛ tsɔɔ bɔ ni hiɛkpatamɔ lɛ ji: maŋtsɛmɛi, asafoiatsɛmɛi, hewalɔi, odehei kɛ nyɔji. Ajieee mɔ ko yɛ mli. Abaajie atuatsemɔ je lɛ mli nɔ fɛɛ nɔ ni ji naagbee nɔ ni teɔ shi woɔ Yehowa lɛ kɛya. Yɛ enɛ sɛɛ lɛ, adesai ni efee hamahama tamɔ ŋshɔ kɛ yiŋfutumɔ lɛ bɛ dɔŋŋ. (Kpojiemɔ 21:1) Enɛ ji “Nyɔŋmɔ okpɔlɔ kpeteŋkpele lɛ,” ejaakɛ Yehowa ji mɔ ni fɔɔ nine etsɛɔ ŋwɛi loofɔji ni amɛbana mli gbɛfaŋnɔ lɛ.
22. Te Yohane muaa bɔ ni naagbee ta lɛ baatsɔ aba lɛ naa ehaa tɛŋŋ?
22 Yohane muaa bɔ ni naagbee ta lɛ baaba aha lɛ naa: “Ni mina kooloo lɛ kɛ shikpɔŋ lɛ nɔ maŋtsɛmɛi lɛ kɛ amɛtai ni abua naa lɛ, ni amɛkɛ mɔ ni ta okpɔŋɔ lɛ nɔ lɛ kɛ eta lɛ yawuu. Ni amɔ kooloo lɛ kɛ amale gbalɔ lɛ ni fee okadii yɛ ehiɛ ni ekɛshishiu mɛi ni he kooloo lɛ okadi lɛ kɛ mɛi ni jaa emaga lɛ afata ehe; aŋɔ mɛi enyɔ nɛɛ fɛɛ hiɛkalɔi awo la kpaakpo lɛ ni tsoɔ kɛ swɔɔ lɛ mli. Ni mɛi ni shwɛ lɛ, akɛ mɔ ni ta okpɔŋɔ lɛ nɔ lɛ tsi ni jɛɔ edaaŋ lɛ gbe amɛ, ni loofɔji fɛɛ tɔrɔ kɛ amɛlooi lɛ.”—Kpojiemɔ 19:19-21.
23. (a) Awuɔ “Nyɔŋmɔ Ofe lɛ gbi wulu lɛ nɔ ta lɛ” yɛ “Harmagedon” yɛ mɛɛ shishinumɔ naa? (b) Mɛɛ kɔkɔbɔɔ “shikpɔŋ lɛ nɔ maŋtsɛmɛi” lɛ booo toi lɛ, ni mɛni baajɛ mli aba?
23 Beni afɔse Yehowa mlifu tɔ ni ji ekpaa lɛ mli nii lɛ, Yohane bɔ amaniɛ akɛ daimonioi amumɔi ni lakaa mɛi bua “maŋtsɛmɛi ni yɔɔ jeŋ muu lɛ fɛɛ lɛŋ” lɛ anaa kɛtee “Nyɔŋmɔ Ofe lɛ gbi wulu lɛ nɔ ta lɛ” he. Awuɔ ta nɛɛ yɛ Harmagedon—jeee shikpɔŋ nɔ he ko pɔtɛɛ, shi je lɛ shihilɛ ni biɔ ni atsu Yehowa kojomɔi ahe nii lɛ. (Kpojiemɔ 16:12, 14, 16) Agbɛnɛ Yohane na bɔ ni asraafoi lɛ efee klalo kɛha ta lɛ. Mɛi ni amɛto akɛ amɛbaawuu amɛshi Nyɔŋmɔ lɛ ji “shikpɔŋ lɛ nɔ maŋtsɛmɛi kɛ amɛtai” lɛ fɛɛ. Amɛkɛ henɔwomɔ ekpoo akɛ amɛbaaba amɛhe shi amɛha Yehowa Maŋtsɛ lɛ. Ekɛ kɔkɔbɔɔ ni sa haa amɛ yɛ mumɔ naa sane lɛ mli: “Nyɛshɔa bi lɛ naa, koni [Yehowa] emli akafu ni nyɛhiɛ kpata yɛ gbɛ lɛ nɔ.” Akɛni amɛbaaa amɛhe shi amɛhaaa Kristo nɔyeli hewɔ lɛ, esa akɛ amɛgboi—Lala 2:12.
24. (a) Mɛɛ kojomɔ akɛbaa kooloo lɛ kɛ apasa gbalɔ lɛ nɔ, ni mɛɛ shishinumɔ naa amɛka he amɛji “hiɛkalɔi” lɛ? (b) Mɛni hewɔ esa akɛ “la kpaakpo” lɛ afee nɔ ko he okadi lɛ?
24 Akpata kooloo ni yɔɔ yitsei kpawo kɛ akoloŋtoi nyɔŋma ni fa kpo kɛjɛ ŋshɔ lɛ mli, ni damɔ shi kɛha Satan maŋkwramɔ gbɛjianɔtoo lɛ hiɛ ni eteee shi dɔŋŋ, kɛ ehefatalɔ amale gbalɔ lɛ, jeŋ hewalɛ ni ji kpawo lɛ. (Kpojiemɔ 13:1, 11-13; 16:13) Beni amɛka he amɛji “hiɛkalɔi” aloo amɛyaa nɔ amɛtsuɔ nii yɛ ekomefeemɔ mli amɛkɛteɔ shi amɛwoɔ Yehowa webii ni yɔɔ shikpɔŋ nɔ lɛ, ashɛrɛ amɛ awo “la kpaakpo” lɛ mli. Ani enɛ ji la diɛŋtsɛ ni tsoɔ? Dabi, taakɛ bɔ ni kooloo lɛ kɛ amale gbalɔ lɛ hu jeee kooloi diɛŋtsɛ lɛ. Shi moŋ, eji hiɛkpatamɔ kwraa, naagbee hiɛkpatamɔ, he ni ayaa ni akuuu sɛɛ abaaa dɔŋŋ he okadi. Biɛ ji he ni, yɛ sɛɛ mli lɛ, ashɛrɛɔ gbele kɛ Hades (gbohiiaje) kɛ agbɛnɛ Abonsam diɛŋtsɛ awoɔ lɛ. (Kpojiemɔ 20:10, 14) Ejeee he ni la tsoɔ grigri yɛ jɛmɛ ni akɛpiŋɔ efɔŋfeelɔi kɛyaa naanɔ, ejaakɛ jwɛŋmɔ ni tamɔ nɛkɛ lɛ po ji nihiinii yɛ Yehowa hiɛ.—Yeremia 19:5; 32:35; 1 Yohane 4:8, 16.
25. (a) Namɛi ji mɛi ni “akɛ mɔ ni ta okpɔŋɔ lɛ nɔ lɛ tsi ni jɛɔ edaaŋ lɛ gbe amɛ” lɛ? (b) Ani esa akɛ wɔkpa gbɛ akɛ mɛi ni “agbe amɛ” lɛ baana gbohiiashitee?
25 Mɛi krokomɛi fɛɛ ni jeee nɔyeli lɛ fa diɛŋtsɛ shi moŋ amɛji adesai ajeŋ ni ekpɔtɔ nɛɛ fa ni tsakeee lɛ, amɛ hu akɛ “mɔ ni ta okpɔŋɔ lɛ nɔ lɛ tsi ni jɛɔ edaaŋ lɛ gbe amɛ.” Yesu baajaje akɛ amɛsa gbele. Akɛni atsiii la kpaakpo lɛ ta yɛ amɛ gbɛfaŋ hewɔ lɛ, ani esa akɛ wɔkpa gbɛ akɛ amɛbaana gbohiiashitee? He ko he ko bɛ ni akɛɔ wɔ yɛ akɛ mɛi ni Yehowa Kojolɔ lɛ kpataa amɛhiɛ lɛ abaatee amɛ shi. Taakɛ Yesu diɛŋtsɛ jaje lɛ, mɛi fɛɛ ni jeee “gwaŋtɛŋi” lɛ yaa “naanɔ la ni asaa ato aha Abonsam kɛ ebɔfoi lɛ mli,” ni ji akɛ “naanɔ hejaramɔ [hiɛkpatamɔ] mli.” (Mateo 25:33, 41, 46) Enɛ kɛ “kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ gbi lɛ” baa naagbee.—2 Petro 3:7; Nahum 1:2, 7-9; Maleaki 3:19.
26. Tsɔɔmɔ nɔ ni jɛɔ Harmagedon mli baa lɛ mli kuku.
26 Yɛ nɛkɛ gbɛ nɔ, Satan shikpɔŋ nɔ gbɛjianɔtoo muu lɛ fɛɛ baa enaagbee. “Tsutsu ŋwɛi” ni ji maŋkwramɔŋ nɔyeli lɛ eho etee. “Shikpɔŋ” lɛ, ni tamɔ gbɛjianɔtoo ni hiɔ shi daa ni Satan etswa ema shi yɛ afii ohai abɔ lɛ amli lɛ efee nɔ ni akpata hiɛ kwraa agbɛnɛ. “Ŋshɔ” lɛ, adesai yiwalɔi ni teɔ shi woɔ Yehowa lɛ bɛ dɔŋŋ. (Kpojiemɔ 21:1; 2 Petro 3:10) Shi, mɛni Yehowa yɔɔ kɛha Satan diɛŋtsɛ? Yohane yaa nɔ ekɛɔ wɔ.