Yitso 20
Asafoi ni Amɛyi Fa Babaoo
1. Yɛ be mli ni etsɔɔ 144,000 lɛ anaasɔomɔ lɛ mli lɛ, mɛɛ kuu kroko Yohane na?
YƐ BE mli ni etsɔɔ 144,000 lɛ naasɔomɔ lɛ mli lɛ, Yohane tee nɔ ebɔ Ŋmalɛ lɛ mli kpojiemɔi ni yɔɔ miishɛɛ fe fɛɛ lɛ ekome he amaniɛ. Kwɛ bɔ ni emli baafili lɛ kɛ miishɛɛ yɛ be mli ni ebɔɔ enɛ he amaniɛ lɛ, akɛ: “Nii nɛɛ asɛɛ lɛ mikwɛ, ni naa, asafo babaoo ni mɔ ko mɔ ko nyɛŋ akane ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔwiemɔi amli damɔ maŋtsɛsɛi lɛ hiɛ kɛ Toobi lɛ hiɛ, ni amɛwo atadei yɛji, ni amɛhiɛ blɛoi yɛ amɛdɛŋ.” (Kpojiemɔ 7:9) Hɛɛ, kɔɔyɔi ejwɛ lɛ ni ahiɛ mli lɛ ŋmɛɔ gbɛ koni ahere kuu kroko yiwala yɛ 144,000 mumɔŋ Israel mlibii lɛ asɛɛ: asafo babaoo ko ni wieɔ wiemɔi srɔtoi srɔtoi, ni jɛ majimaji anɔ.a—Kpojiemɔ 7:1.
2. Te je lɛŋ bii ni wieɔ Biblia lɛ he lɛ etsɔɔ asafo babaoo lɛ mli amɛha tɛŋŋ, ni te Biblia Kaselɔi lɛ po susu nɛkɛ kuu nɛɛ he yɛ blema amɛha tɛŋŋ?
2 Je lɛŋ bii ni wieɔ Biblia mli saji ahe lɛ etsɔɔ asafo babaoo nɛɛ shishi akɛ amɛji mɛi ni jeee Yudafoi yɛ heloo naa ni atsake amɛ kɛtee Kristojamɔ mli aloo amɛji Kristofoi la odasefoi ni miiya ŋwɛi. Biblia Kaselɔi ni hi shi yɛ tsutsu lɛ po bu amɛ akɛ amɛji ŋwɛi kuu ni ji enyɔ, taakɛ obaanyɛ ona yɛ 1886 mli yɛ Studies in the Scriptures, The Divine Plan of the Ages lɛ Kpo I lɛ mli lɛ: “Amɛlaajeɔ maŋtsɛsɛi lɛ he nyɔmɔwoo lɛ kɛ ŋwɛi akutso lɛ, shi yɛ naagbee lɛ, amɛnine baashɛ fɔmɔ akɛ mumɔŋ gbɔmɛi lɛ anɔ yɛ gbɛjianɔtoo ni baa shi fe ŋwɛi gbɔmɔtso lɛ nɔ lɛ nɔ. Eyɛ mli akɛ mɛnɛɛmɛi ejɔɔ amɛhe nɔ diɛŋtsɛ moŋ, shi je lɛŋ mumɔ lɛ yeɔ amɛnɔ aahu kɛyashiɔ he ni agbɛnɛ amɛkɛ amɛwala haaa yɛ afɔleshaa mli dɔŋŋ.” Ni yɛ sɛɛ mli be aaafee 1930 mli po lɛ, atsɔɔ jwɛŋmɔ nɛɛ yɛ Light, Book One lɛ mli akɛ: “Mɛi ni feɔ nɛkɛ asafo babaoo nɛɛ hereŋ tsɛmɔ akɛ amɛbafee Nuŋtsɔ lɛ odasefoi ni yɔɔ ekaa lɛ nɔ.” Atsɔɔ akɛ amɛji kuu ko ni buɔ amɛhe jalɔi ni akɛ amɛyɛ anɔkwale lɛ he nilee shi nɔ ko fioo ko pɛ amɛfeɔ yɛ eshiɛmɔ he. Amɛbaaya ŋwɛi akɛ kuu ni ji enyɔ ni amɛkɛ Kristo naŋ enɔyeli lɛ mli gbɛfaŋnɔ.
3. (a) Mɛɛ hiɛnɔkamɔ akɛha mɛi komɛi ni tsui ja ni sɛɛ mli lɛ amɛbatsɔmɔ mɛi ni yɔɔ ekaa yɛ shiɛmɔ nitsumɔ lɛ mli lɛ? (b) Te The Watch Tower lɛ tsɔɔ gwantɛŋi lɛ kɛ abotiai lɛ he abɛbua lɛ mli yɛ 1923 mli eha tɛŋŋ?
3 Shi, Kristofoi ni afɔ amɛ mu lɛ ahefatalɔi komɛi yɛ ni sɛɛ mli lɛ amɛbafee mɛi ni yɔɔ ekaa waa yɛ shiɛmɔ nitsumɔ lɛ mli. Amɛbɛ hiɛnɔkamɔ ko akɛ amɛbaaya ŋwɛi. Yɛ anɔkwale mli lɛ, amɛ hiɛnɔkamɔ kɛ maŋshiɛmɔ ko ni Yehowa webii ha kɛjɛ 1918 kɛbashi 1922 lɛ kpaa gbee. Shishijee mli lɛ, no ji “Je lɛ Eba Naagbee—Akpekpei Abɔ ni Yɔɔ Wala Mli Bianɛ lɛ Gboiŋ Gbi ko Gbi Ko.”b Yɛ no sɛɛ nɔŋŋ lɛ, Watch Tower wolo tɛtrɛɛ ni aŋma yɛ October 15, 1923 mli lɛ tsɔɔ Yesu abɛbua ni kɔɔ gwantɛŋi kɛ abotiai lɛ ahe lɛ mli (Mateo 25:31-46), ni ejaje akɛ: “Gwantɛŋi lɛ damɔ shi kɛha gbɔmɛi ni jɛ jeŋmaji lɛ fɛɛ mli, jeee mɛi ni akɛ mumɔ efɔ amɛ, shi moŋ mɛi ni sumɔɔ jalɛnifeemɔ, mɛi ni jɛɔ amɛjwɛŋmɔ mli amɛkpɛlɛɔ Yesu Kristo nɔ akɛ Nuŋtsɔ lɛ kɛ mɛi ni miitao ni amɛhiɛ ka be kpakpai anɔ yɛ enɔyeli lɛ shishi.”
4. Yɛ mɛɛ gbɛ nɔ la loo shishinumɔ ni kɔɔ shikpɔŋ nɔ kuu lɛ he lɛ mli bafee faŋŋ yɛ 1931? yɛ 1932? yɛ 1934?
4 Yɛ afii komɛi asɛɛ, yɛ 1931 lɛ, Vindication, Book One lɛ wie Ezekiel yitso 9 he, ni etsɔɔ akɛ mɛi ni akadi amɛ yɛ amɛhiɛnaai kɛha yibaamɔ yɛ je lɛ naagbee lɛ ji gwantɛŋi ni yɔɔ abɛbua ni yɔɔ yiteŋgbɛ nɛɛ mli lɛ. Vindication, Book Three lɛ ni ajie lɛ kpo yɛ 1932 lɛ tsɔɔ tsui ni ja su ni Yehonadab ni jeee Israelnyo lɛ ni kɛ ehe bɔ Israel Maŋtsɛ Yehu ni afɔ lɛ mu lɛ he yɛ eshwiili mli ni ekɛlɛ tee koni eyakwɛ ekaa ni Yehu yɔɔ yɛ apasa nyɔŋmɔ jalɔi ahiɛkpatamɔ mli lɛ yɔɔ lɛ. (2 Maŋtsɛmɛi 10:15-17) Wolo lɛ wie akɛ: “Yehonadab damɔ shi kɛha aloo efeɔ gbɔmɛi akuu ni yɔɔ shikpɔŋ nɔ bianɛ yɛ be mli ni Yehu nitsumɔ [ni ji Yehowa kojomɔi lɛ ajajemɔ] yaa nɔ nɛɛ mli, ni yɔɔ tsuijurɔ, ni kɛ Satan gbɛjianɔtoo lɛ kpaaa gbee, ni damɔɔ shi amɛhaa jalɛnifeemɔ, ni amɛji mɛi ni Nuŋtsɔ lɛ baabaa amɛyi yɛ Harmagedon be mli lɛ, ni ehere amɛyiwala kɛtsɔ nakai haomɔ be lɛ mli, ni eha amɛ naanɔ wala yɛ shikpɔŋ nɔ lɛ he mfoniri. Mɛnɛɛmɛi feɔ ‘gwantɛŋ’ kuu lɛ.” Yɛ afi 1934 mli lɛ, Buu-Mɔɔ lɛ fee lɛ faŋŋ akɛ esa akɛ nɛkɛ Kristofoi ni yɔɔ shikpɔŋ nɔ hiɛnɔkamɔ lɛ ajɔɔ amɛhe nɔ amɛha Yehowa ni abaptisi amɛ. La ni kɔɔ nɛkɛ shikpɔŋ nɔ kuu nɛɛ ahe lɛ miikpɛ kaŋkaŋ yɛ be fɛɛ mli.—Abɛi 4:18.
5. (a) Ayɔse asafo babaoo lɛ yɛ 1935 akɛ amɛji namɛi? (b) Beni J. F. Rutherford bi kpeeyalɔi ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ akɛ amɛte shi amɛdamɔ shi, yɛ 1935 mli lɛ, mɛni ba?
5 Shishinumɔ ni yɔɔ Kpojiemɔ 7:9-17 he lɛ miihe aje kpo faŋŋ yɛ ekpɛmɔ ni fe fɛɛ mli! (Lala 97:11) Buu-Mɔɔ wolo tɛtrɛɛ lɛ etsɔɔ shii abɔ akɛ hiɛnɔkamɔ yɛ akɛ kpee ni abaafee yɛ May 30 kɛyashi June 3, 1935 yɛ Washington, D.C., U.S.A. lɛ baafee “miishɛjemɔ kɛ sɛɛnamɔ diɛŋtsɛ” aha mɛi ni akɛ Yehonadab fee amɛhe mfoniri lɛ. Ni eba mli nakai hu! Yɛ wiemɔ ko ni kanyaa mɔ ni ji “Asafo Babaoo Lɛ” ni J. F. Rutherford ni nyiɛɔ shiɛmɔ nitsumɔ lɛ hiɛ yɛ nakai beaŋ lɛ kɛha mɛi aaafee 20,000 lɛ mli lɛ, ekɛ Ŋmalɛ naa odaseyeli ha akɛ ŋmɛnɛŋmɛnɛ beaŋ toi krokomɛi lɛ ji asafo babaoo ni yɔɔ Kpojiemɔ 7:9 lɛ. Yɛ ewiemɔ lɛ naagbee lɛ, wielɔ lɛ bi akɛ: “Nyɛfainɛ ani mɛi fɛɛ ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ baanyɛ ate shi adamɔ shi lo?” Yɛ be mli ni toibolɔi lɛ ateŋ mɛi ni fa te shi amɛdamɔ shi lɛ, wielɔ lɛ jaje akɛ: “Naa! Asafo babaoo lɛ!” Dioofeemɔ ko ba, kɛkɛ ni nɔ ni nyiɛ sɛɛ ba ji dɛtswaa ni gbɛɛ waa diɛŋtsɛ. Kwɛ miishɛɛ ni Yohane kuu lɛ na—kɛ Yehonadab kuu lɛ hu! Yɛ gbi ni nyiɛ sɛɛ lɛ nɔ lɛ, abaptisi Odasefoi heei 840, ni mɛnɛɛmɛi ateŋ mɛi ni fa ji mɛi ni kɛɛ amɛjɛ nakai asafo babaoo lɛ ateŋ.
Mɛi ni Asafo Babaoo lɛ Ji lɛ Nɔmimaa
6. (a) Mɛni hewɔ wɔbaanyɛ wɔnu shishi yɛ faŋŋ mli akɛ asafo babaoo lɛ ji ŋmɛnɛŋmɛnɛ beaŋ kuu ni ji Kristofoi ni amɛjɔɔ amɛhe nɔ ni yɔɔ hiɛnɔkamɔ akɛ amɛbaahi shi kɛya naanɔ yɛ shikpɔŋ nɔ lɛ? (b) Asafo babaoo lɛ atadei yɛji lɛ feɔ mɛni he mfoniri?
6 Te wɔɔfee tɛŋŋ wɔjaje kɛ nɔmimaa akɛ asafo babaoo lɛ ji ŋmɛnɛŋmɛnɛ beaŋ Kristofoi akuu ni amɛjɔɔ amɛhe nɔ ni yɔɔ hiɛnɔkamɔ akɛ amɛbaahi shi kɛya naanɔ yɛ Nyɔŋmɔ shikpɔŋ lɛ nɔ lɛ? Dani enɛ aaaba lɛ, Yohane etsɔ hiɛ ena ŋwɛi kuu lɛ ni “akpɔ amɛ aha . . . Nyɔŋmɔ kɛjɛ akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli” lɛ yɛ ninaa mli. (Kpojiemɔ 5:9, 10) Asafo babaoo lɛ hu jɛ he ko ni tamɔ nakai, shi esoro amɛhiɛnɔkamɔ. Amɛtamɔɔɔ Nyɔŋmɔ Israel, ejaakɛ agbako amɛyibɔ lɛ afɔko shi. Gbɔmɔ ko nyɛŋ atsɔ hiɛ ale bɔ ni amɛyibɔ baafee. Amɛfɔ amɛtadei lɛ ahe ni eyɛ futaa yɛ Toobi lɛ la lɛ mli ni enɛ tsɔɔ akɛ amɛyɛ jalɛ shidaamɔ yɛ Yehowa hiɛ kɛtsɔ hemɔkɛyeli ni amɛyɔɔ yɛ Yesu afɔleshaa lɛ mli lɛ hewɔ. (Kpojiemɔ 7:14) Ni amɛmiifɔ̃ blɛoi, amɛmiijie Mesia lɛ yi akɛ amɛ-Maŋtsɛ.
7, 8. (a) Ŋwanejee ko bɛ he akɛ blɛoi ni amɛfɔɔ lɛ kai bɔfo Yohane yɛ mɛni he? (b) Asafo babaoo lɛ ni fɔɔ blɛoi lɛ tsɔɔ mɛni?
7 Yɛ be mli ni ekwɛɔ ninaa nɛɛ lɛ, Yohane susumɔi baanyɛ ekɛ lɛ aya sɛɛ yɛ nɔ ni fe afii 60 kɛyashɛ Yesu naagbee otsi ni eye yɛ shikpɔŋ nɔ lɛ nɔ. Yɛ Nisan 9, afi 33 Ŋ.B., beni asafoi lɛ ke yuu kɛbahere Yesu kɛba Yerusalem lɛ, “amɛkɔlɔ blɛoi, ni amɛje kpo amɛyakpee lɛ, ni amɛbolɔ akɛ: Hosiana! Ajɔɔ mɔ ni baa yɛ Nuŋtsɔ lɛ [Yehowa] gbɛi anɔ lɛ, Israel maŋtsɛ lɛ!” (Yohane 12:12, 13) Nakai nɔŋŋ hu blɛoi ni asafo babaoo lɛ kɔlɔ kɛ amɛbolɔmɔ lɛ tsɔɔ akɛ amɛkɛ miishɛɛ fɛɛ miikpɛlɛ Yesu nɔ akɛ Yehowa Maŋtsɛ ni ahala lɛ.
8 Ŋwanejee ko bɛ he akɛ, blɛoi lɛ kɛ miishɛɛnamɔ lɛ kaiɔ Yohane blema Israel Asesei Agbijurɔ lɛ. Ejaakɛ Yehowa fa yɛ nɛkɛ gbijurɔ nɛɛ yeli he akɛ: “Ni klɛŋklɛŋ gbi lɛ nɔ lɛ, nyɛŋɔa tsei ayibii fɛfɛji kɛ blɛoi kɛ tsei kusuu aniji kɛ faa naa kpaai, ni nyɛnyaa yɛ Yehowa nyɛ-Nyɔŋmɔ lɛ hiɛ gbii kpawo.” Akɛ blɛoi lɛ tsu nii akɛ mlifilimɔ he okadi. Asesei ni amɛmamɔ ni baaye gbii fioo lɛ kaiɔ amɛ akɛ Yehowa ehere ewebii lɛ kɛjɛ Mizraim, koni amɛhi buui amli yɛ ŋa lɛ nɔ. “Gbɔ kɛ awusa kɛ okulafo” hu naa nɛkɛ gbijurɔyeli nɛɛ mli gbɛfaŋnɔ. Esa akɛ Israel fɛɛ ‘mii ashɛ amɛhe jogbaŋŋ.’—3 Mose 23:40; 5 Mose 16:13-15.
9. Mɛɛ bolɔmɔ kɛ nyamɔ ko asafo babaoo lɛ kɛ amɛhe woɔ mli?
9 Belɛ esa akɛ asafo babaoo lɛ afɔ blɛoi, eyɛ mli akɛ amɛjeee mumɔŋ Israel fa moŋ, ejaakɛ amɛkɛ miishɛɛ kɛ shidaa wieɔ akɛ kunimyeli kɛ yiwalaheremɔ ji Nyɔŋmɔ kɛ Toobi lɛ nɔ, taakɛ bɔ ni Yohane naa yɛ biɛ lɛ: “Ni amɛbolɔ kɛ gbee waa amɛkɛɛ: Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ Toobi lɛ nɔ!” (Kpojiemɔ 7:10) Eyɛ mli akɛ ajie amɛ kɛjɛ shikpɔŋ lɛ nɔ kui sɔrɔtoi fɛɛ mli moŋ, shi asafo babaoo lɛ bolɔɔ ‘kɛ gbee kome ni naa wa.’ Te amɛaafee tɛŋŋ amɛfee enɛ, akɛni amɛjɛ jeŋmaji kɛ wiemɔi sɔrɔtoi amli lɛ?
10. Te asafo babaoo lɛ aaafee tɛŋŋ ni amɛbolɔ kɛ “gbee waa” yɛ ekomefeemɔ mli yɛ maji srɔtoi anɔ ni amɛjɛ kɛ wiemɔi srɔtoi ni amɛwieɔ lɛ fɛɛ sɛɛ?
10 Nɛkɛ asafo babaoo nɛɛ ji majimaji ateŋ gbɛjianɔtoo kome pɛ ni yɔɔ shikpɔŋ nɛɛ nɔ ŋmɛnɛ ni efee ekome lɛlɛŋ lɛ fa. Amɛbɛ tɛi sɔrɔtoi ni afolɔ ashwie shi aha maji sɔrɔtoi, shi moŋ amɛkɛ Biblia mli shishitoo mlai ni ja lɛ tsuɔ nii pɛpɛɛpɛ yɛ he fɛɛ he ni amɛyɔɔ. Amɛkɛ amɛhe wooo maŋhedɔɔ, maŋ hiɛ atuatsemɔ kui amli, shi moŋ ‘amɛkɛ amɛklantei esɔ̃ kɔii.’ (Yesaia 2:4) Amɛmli gbalako amɛfeko jamɔ kui sɔrɔtoi, ni yɛ enɛ hewɔ lɛ amɛkɛ wiemɔi ni teɔ shi woɔ amɛhe bolɔɔɔ amɛwooo amɛhe taakɛ Kristendom jamɔi lɛ feɔ lɛ; ni asaŋ amɛshiii yijiemɔ lɛ amɛhaaa osɔfoi akuu ko ni amɛkɛ no efee amɛnitsumɔ koni amɛtsu amɛyijiemɔ lɛ he nii amɛha amɛ. Amɛbolɔɔɔ akɛ amɛyiwalaheremɔ jɛ mumɔ krɔŋkrɔŋ lɛ, ejaakɛ amɛjeee triniti nyɔŋmɔ ko tsuji. Amɛfee ekome yɛ Yehowa gbɛi lɛ tsɛmɔ mli yɛ be mli ni amɛwieɔ anɔkwale wiemɔ krɔŋŋ lɛ yɛ shikpɔji aaafee 200 nɔ yɛ jeŋ muu fɛɛ lɛ. (Zefania 3:9) Amɛjajeɔ yɛ faŋŋ akɛ amɛyiwalaheremɔ jɛ Yehowa, yiwalaheremɔ Nyɔŋmɔ lɛ, kɛtsɔ Yesu Kristo, E-yiwalaheremɔ Najiaŋdamɔlɔ Nukpa lɛ nɔ yɛ gbɛ ni ja nɔ.—Lala 3:9; Hebribii 2:10.
11. Ŋmɛnɛŋmɛnɛ beaŋ tsɔnei ahe nilee eye ebua asafo babaoo lɛ koni amɛgbee ni wa lɛ ajije po fe nakai yɛ mɛɛ gbɛ nɔ?
11 Ŋmɛnɛŋmɛnɛ beaŋ tsɔnei ahe nilee eye ebua ni eha asafo babaoo ni efee ekome lɛ gbee lɛ ejije waa diɛŋtsɛ. Jamɔ kuu ko bɛ shikpɔŋ nɛɛ nɔ ni ehe ehia akɛ amɛkala Biblia kasemɔ woji yɛ wiemɔi fe 400 mli, ejaakɛ kuu ko bɛ ni yɔɔ he miishɛɛ akɛ amɛkɛ shɛɛ sane kome ko aaayaha shikpɔŋ lɛ nɔ bii fɛɛ. Akɛ nɔ ni yeɔ buaa enɛ lolo lɛ, yɛ Yehowa Odasefoi Anɔyeli Kuu ni afɔ amɛ mu lɛ kwɛmɔ shishi hewɔ lɛ, afee Multilanguage Electronic Phototypesetting System (ekukufoo mli lɛ MEPS). Beni akalaa nɛkɛ wolo nɛɛ lɛ, no mli lɛ akɛ MEPS nɛɛ he tsɔnei sɔrɔtoi miitsu nii yɛ hei fe 125 yɛ shikpɔŋ muu lɛ fɛɛ lɛ anɔ, ni enɛ eye ebua koni anyɛ akala wolo ni baa daa otsii enyɔ, ni ji Buu-Mɔɔ lɛ yɛ wiemɔi fe 130 mli ni akalaa fɛɛ yɛ be kome mli. Yehowa webii ŋmalaa woji hu kɛ amɛmli sane kome tamɔ enɛ ni yɔɔ wiemɔi babaoo mli lɛ yɛ be kome too mli. No hewɔ lɛ Yehowa Odasefoi, ni amɛteŋ mɛi ni fa ji asafo babaoo lɛ mli bii lɛ nyɛɔ amɛjaa woji sɔrɔtoi akpekpei ohai abɔ daa afi yɛ wiemɔi ni ale jogbaŋŋ lɛ fɛɛ mli, ni eyeɔ ebuaa ni mɛi krokomɛi babaoo ni jɛ akutsei kɛ majianɔwiemɔi fɛɛ mli kaseɔ Nyɔŋmɔ Wiemɔ lɛ ni amɛkɛ amɛgbee fataa asafo babaoo lɛ gbee ni naa wa waa lɛ he.—Yesaia 42:10, 12.
Amɛyɛ Ŋwɛi Loo Shikpɔŋ Nɔ?
12, 13. Asafo babaoo lɛ “damɔ maŋtsɛsɛi lɛ kɛ Toobi lɛ hiɛ” yɛ mɛɛ gbɛ nɔ?
12 Te wɔfeɔ tɛŋŋ wɔleɔ akɛ “amɛdamɔ maŋtsɛsɛi lɛ hiɛ” lɛ etsɔɔɔ akɛ asafo babaoo lɛ yɛ ŋwɛi? Odaseyeli ni mli ka shi faŋŋ yɛ ni kɔɔ enɛ he. Akɛ nɔkwɛmɔnɔ lɛ, Hela wiemɔ ni atsɔɔ shishi yɛ biɛ akɛ “hiɛ” (e·noʹpi·on) lɛ shishi diɛŋtsɛ ji “yɛ hiɛ” ni akɛtsuɔ nii shii abɔ yɛ adesai ni yɔɔ shikpɔŋ nɔ ni yɔɔ Yehowa “hiɛ” lɛ ahe. (1 Timoteo 5:21; 2 Timoteo 2:14; Romabii 14:22; Galatabii 1:20) Be ko beni Israelbii lɛ yɔɔ ŋa lɛ nɔ lɛ, Mose kɛɛ Aaron akɛ: “Kɛɛmɔ Israelbii asafo muu lɛ fɛɛ akɛ: Nyɛtsia nyɛbaa Yehowa hiɛ; ejaakɛ enu nyɛhuhuuhu wiemɔi lɛ.” (2 Mose 16:9) Ehe ehiaaa ni aloo Israelbii lɛ kɛya ŋwɛi bɔni afee ni amɛyadamɔ Yehowa hiɛ yɛ nakai be lɛ mli. (Okɛto 3 Mose 24:8 he.) Shi moŋ, ŋa lɛ nɔ amɛdamɔ yɛ Yehowa hiɛ ni egbala ejwɛŋmɔ kɛba amɛnɔ.
13 Kɛfata he lɛ, wɔkaneɔ akɛ: “Shi beni gbɔmɔbi lɛ aaaba yɛ enunyam lɛ mli . . . ni aaabua jeŋmaji lɛ fɛɛ naa yɛ ehiɛ.”c Adesa weku muu lɛ fɛɛ ehiŋ ŋwɛi yɛ be mli ni nɛkɛ gbalɛ nɛɛ baa mli lɛ. Eka shi faŋŋ akɛ mɛi ni yaa ‘naanɔ la’ loo naanɔ hiɛkpatamɔ mli lɛ ehiŋ ŋwɛi. (Mateo 25:31-33, 41, 46) Shi moŋ, adesai damɔɔ shikpɔŋ nɛɛ nɔ ni Yesu naa amɛ, ni egbalaa ejwɛŋmɔ kɛyaa amɛnɔ koni ekojo amɛ. Nakai nɔŋŋ hu asafo babaoo lɛ “damɔ maŋtsɛsɛi lɛ hiɛ kɛ Toobi lɛ hiɛ” ni ji akɛ amɛdamɔɔ shi akɛ mɛi ni Yehowa kɛ e-Maŋtsɛ Kristo Yesu, ni amɛnine shɛɔ kojomɔ kpakpa nɔ kɛjɛɔ amɛdɛŋ lɛ miina amɛ.
14. (a) Namɛi atsɔɔ mli akɛ ‘amɛbɔle maŋtsɛsɛi lɛ he kɛkpe’ ni ‘amɛyɛ [ŋwɛi] Zion Gɔŋ lɛ nɔ’ lɛ? (b) Eyɛ mli akɛ asafo babaoo lɛ sɔmɔɔ Nyɔŋmɔ yɛ “esɔlemɔtsu” lɛ mli moŋ, shi mɛni hewɔ enɛ efeee amɛ osɔfoi akuu lɛ?
14 Atsɔɔ mli akɛ onukpai 24 lɛ kɛ kuu ni afɔ amɛ mu ni ji 144,000 lɛ ‘ebɔle’ Yehowa ‘maŋtsɛsɛi lɛ he kɛkpe’ ni amɛdamɔ “[ŋwɛi] Zion Gɔŋ lɛ nɔ.” (Kpojiemɔ 4:4; 14:1) Asafo babaoo lɛ jeee osɔfoi akuu ni amɛnine shɛɛɛ nakai gbɛhe ni awo nɔ lɛ nɔ. Eji anɔkwale akɛ atsɔɔ mli yɛ sɛɛ mli yɛ Kpojiemɔ 7:15 akɛ amɛsɔmɔɔ Nyɔŋmɔ “yɛ esɔlemɔ we lɛ.” Shi nɛkɛ sɔlemɔ we nɛɛ damɔɔɔ shi kɛhaaa mli gbɛ tsu lɛ, Krɔŋkrɔŋ Fe Fɛɛ lɛ. Shi moŋ, eji Nyɔŋmɔ mumɔŋ sɔlemɔ we lɛ shikpɔŋ nɔ kpo lɛ nɔ. Hela wiemɔ na·osʹ, ni atsɔɔ shishi yɛ biɛ akɛ “sɔlemɔtsu” lɛ tsɔɔ tsu muu lɛ fɛɛ ni ama aha Yehowa jamɔ lɛ yɛ be babaoo mli. Ŋmɛnɛ, enɛ ji mumɔŋ tsu ko ni kɔɔ ŋwɛi kɛ shikpɔŋ lɛ fɛɛ he.—Okɛto Mateo 26:61; 27:5, 39, 40; Marko 15:29, 30; Yohane 2:19-21 he, New World Translation Reference Bible, shishigbɛ niŋmaa.
Jeŋ Muu Fɛɛ Yijiemɔ kɛ Gbee ni Wa
15, 16. (a) Mɛni ba yɛ ŋwɛi yɛ be mli ni asafo babaoo lɛ pue lɛ? (b) Te Yehowa mumɔŋ bɔɔ nii lɛ feɔ amɛnii yɛ eyiŋtoo lɛ ni ajieɔ ehee fɛɛ ehee kpo lɛ he amɛhaa tɛŋŋ? (d) Te wɔɔfee tɛŋŋ ni wɔ ni wɔyɔɔ shikpɔŋ nɔ lɛ wɔkɛ wɔhe aaawo yijiemɔ lala lɛ mli?
15 Asafo babaoo lɛ miijie Yehowa yi, shi mɛi krokomɛi hu miila eyijiemɔi. Yohane bɔ amaniɛ akɛ: “Ni bɔfoi lɛ fɛɛ damɔ maŋtsɛsɛi lɛ kɛ onukpai nyɔŋmai enyɔ-kɛ-ejwɛ lɛ kɛ hiɛkalɔi ejwɛ lɛ ahewɔ kɛkpe, ni amɛkɛ amɛhiɛ bumɔ shi yɛ maŋtsɛsɛi lɛ hiɛ, ni amɛja Nyɔŋmɔ amɛkɛɛ: Amen! Jɔɔmɔ kɛ anunyam kɛ nilee kɛ shidaa kɛ agbojee kɛ hewalɛ kɛ nyɛmɔ aha wɔ-Nyɔŋmɔ lɛ kɛjɛ naanɔ kɛya naanɔ! Amen.”—Kpojiemɔ 7:11, 12.
16 Beni Yehowa bɔ shikpɔŋ lɛ, eŋwɛibɔfoi krɔŋkrɔŋi lɛ fɛɛ “la nyamɔ lala shikome, ni Nyɔŋmɔ bii lɛ fɛɛ kwa bɔ oshe.” (Hiob 38:7) Yehowa yiŋtoo fɛɛ yiŋtoo hee lɛ kpojiemɔ baanyɛ akanya ŋwɛibɔfoi ayijiemɔ kɛ gbee ni wa tamɔ nakai. Beni onukpai 24 lɛ—144,000 lɛ ni yɔɔ amɛŋwɛi anunyam mli lɛ—bolɔ waa amɛkɛkpɛlɛ Toobi lɛ nɔ lɛ, Nyɔŋmɔ ŋwɛi bɔɔ nii krokomɛi lɛ fɛɛ fata he ni amɛkɛ yijiemɔ ha Yesu kɛ Yehowa Nyɔŋmɔ. (Kpojiemɔ 5:9-14) Nɛkɛ bɔɔ nii nɛɛ amli efili amɛ babaoo po fe nine akɛ amɛmiina ni Yehowa yiŋtoo lɛ miiba mli yɛ adesai anɔkwafoi ni afɔ amɛ mu lɛ ni eteɔ amɛ shi kɛyaa anunyam gbɛhe mli yɛ mumɔŋ nɔyeli he lɛ hewɔ. Agbɛnɛ, Yehowa ŋwɛi bɔɔ nii anɔkwafoi lɛ fɛɛ kɛ gbee ni ŋɔɔ jie eyi yɛ be mli ni asafo babaoo lɛ pue lɛ. Yɛ anɔkwale mli lɛ, kɛha Yehowa tsuji fɛɛ lɛ, Nuŋtsɔ lɛ gbi lɛ ji miishɛɛ be ni aaahi mli. (Kpojiemɔ 1:10) Kwɛ hegbɛ ni wɔna yɛ shikpɔŋ nɛɛ nɔ akɛ wɔɔná yijiemɔ lala ni ji odase ni ayeɔ yɛ Yehowa Maŋtsɛyeli lɛ he lɛ mli gbɛfaŋnɔ!
Asafo Babaoo lɛ Pue
17. (a) Mɛni sane onukpai 24 lɛ ateŋ mɔ kome bi, ni anɔkwale ni eji akɛ onukpa lɛ baanyɛ aha hetoo lɛ tsɔɔ mɛni? (b) Mɛɛ be mli aha onukpa lɛ sanebimɔ lɛ hetoo?
17 Kɛjɛ bɔfo Yohane gbii lɛ amli aahu kɛbashi Nuŋtsɔ lɛ gbi lɛ nɔ lɛ, Kristofoi ni afɔ amɛ mu lɛ nuuu mɛi ni asafo babaoo lɛ ji lɛ shishi jogbaŋŋ. No hewɔ lɛ esa akɛ onukpai 24 lɛ ateŋ mɔ kome, ni damɔ shi kɛha mɛi ni afɔ amɛ mu lɛ ni yɔɔ ŋwɛi momo lɛ aaakanya Yohane susumɔ kɛtsɔ sanebimɔ ko nɔ. “Ni onukpai lɛ ateŋ mɔ kome here nɔ ni ekɛɛ mi akɛ: Mɛi ni wo atadei yɛji nɛɛ, namɛi ni, ni nɛgbɛ amɛjɛ? Ni mikɛɛ lɛ akɛ: Minuŋtsɔ, bo ole.” (Kpojiemɔ 7:13, 14a) Hɛɛ, nakai onukpa lɛ baanyɛ ana he ni hetoo lɛ yɔɔ ni ekɛha Yohane. Enɛ tsɔɔ akɛ onukpai 24 akuu lɛ ni atee amɛ shi lɛ fata he ni akɛ ŋwɛi anɔkwalei haa ŋmɛnɛ lɛ. Yɛ amɛgbɛfaŋ lɛ, Yohane kuu lɛ mli bii ni yɔɔ shikpɔŋ nɔ lɛ na le mɛi ni asafo babaoo lɛ ji kɛtsɔ nɔ ni Yehowa feɔ yɛ amɛteŋ lɛ ni amɛkwɛɔ no jogbaŋŋ lɛ nɔ. Amɛhe fee oya ni amɛkɛyɔse ŋwɛi la ni kpɛ kaŋkaŋ ni ha teokrase ŋwɛi lɛ kpɛ yɛ 1935, yɛ Yehowa be ni sa mli lɛ.
18, 19. (a) Mɛɛ hiɛnɔkamɔ Yohane kuu lɛ ma nɔ mi yɛ 1920 kɛ 1930 afii lɛ amli, shi namɛi here sane lɛ nɔ babaoo? (b) Asafo babaoo lɛ ni ayoo amɛ yɛ 1935 lɛ tsɔɔ mɛni yɛ 144,000 lɛ ahe? (d) Kaimɔ lɛ he akɔntaabuu jieɔ mɛni kpo?
18 Yɛ 1920 afii lɛ amli kɛ 1930 afii lɛ shishijee mli lɛ, Yohane kuu lɛ ma ŋwɛi hiɛnɔkamɔ lɛ nɔ mi, yɛ woji kɛ agbɛnɛ shiɛmɔ nitsumɔ lɛ mli. Eka shi faŋŋ akɛ no mli lɛ 144,000 lɛ yibɔ ni yeɔ emuu lɛ shɛko. Shi mɛi ni bo sane lɛ toi lɛ ateŋ mɛi ni amɛyi faa yɛ be fɛɛ mli lɛ tsɔɔ ekaa yɛ odaseyeli nitsumɔ lɛ mli ni amɛtsɔɔ miishɛɛ yɛ Paradeiso shikpɔŋ nɔ shihilɛ kɛmiiya naanɔ lɛ mli. Amɛbɛ suɔmɔ ko akɛ amɛaaya ŋwɛi. Jeee no ji amɛtsɛmɔ. Amɛjeee asafo kuu bibioo lɛ fa, shi moŋ toi krokomɛi. (Luka 12:32; Yohane 10:16) Bɔ ni ayoo amɛ yɛ 1935 akɛ asafo babaoo ni ji toi krokomɛi lɛ tsɔɔ akɛ 144,000 lɛ halamɔ lɛ miihe aba naagbee.
19 Ani akɔntaabui fiɔ sanenaamuu nɛɛ sɛɛ? Hɛɛ, amɛfiɔ sɛɛ. Yɛ 1938 lɛ, Yehowa Odasefoi 59,047 kɛ amɛhe wo sɔɔmɔ nitsumɔ lɛ mli yɛ jeŋ muu fɛɛ. Mɛnɛɛmɛi ateŋ 36,732 ye Yesu gbele lɛ Kaimɔ ni afeɔ daa afi lɛ he nibii lɛ eko, ni amɛkɛtsɔɔ akɛ amɛyɛ ŋwɛi tsɛmɔ lɛ mli. Kɛjɛ no sɛɛ afii lɛ amli kɛbaa nɛɛ, mɛi ni yeɔ enɛ eko lɛ ayifalɛ lɛ etee nɔ eba shi fiofio, ni titri lɛ ejɛ Yehowa Odasefoi anɔkwafoi lɛ ni gbeɔ amɛshikpɔŋ nɔ nitsumɔ lɛ naa yɛ gbele mli lɛ hewɔ. Yɛ afi 2005 lɛ, mɛi 8,524 pɛ ye Kaimɔ nibii lɛ eko—kɛ akɛto he lɛ, amɛji mɛi 16,390,116 ni ba shishi yɛ jeŋ muu fɛɛ lɛ mli oha mlijaa 0.05 pɛ.
20. (a) Mɛni J. F. Rutherford wie yɛ asafo babaoo lɛ he yɛ teemɔŋ yɛ Jeŋ Ta II be lɛ mli? (b) Mɛɛ anɔkwa saji tsɔɔ amrɔ nɛɛ akɛ asafo babaoo lɛ da diɛŋtsɛ?
20 Beni jeŋ ta ni ji enyɔ lɛ fɛ lɛ, Satan kɛ mɔdɛŋbɔɔ ni naa wa wo mli koni ekɛtsi asafo babaoo lɛ anaabuamɔ lɛ naa. Atsi Yehowa nitsumɔ lɛ naa yɛ maji pii anɔ. Yɛ nakai gbii ni mli ewo duŋ lɛ mli, kɛ agbɛnɛ beni eshwɛ fioo ni eeegbo yɛ January 1942 lɛ, anu ni J. F. Rutherford miikɛɛ akɛ: “Ojogbaŋŋ . . . etamɔ nɔ ni yɛ fɛɛ sɛɛ lɛ asafo babaoo lɛ yifalɛ efeŋ babaoo nakai.” Shi ŋwɛi jɔɔmɔ tsɔɔ nɔ kroko! Beni shɛɔ 1946, no mli lɛ Odasefoi ni shiɛɔ yɛ jeŋ fɛɛ lɛ ayifalɛ ji 176,456—mɛnɛɛmɛi ateŋ mɛi ni fa ji asafo babaoo lɛ mli bii. Beni shɛɔ 2005 lɛ, Odasefoi 6,390,022 miisɔmɔ Yehowa yɛ anɔkwayeli mli yɛ maji srɔtoi 235 nɔ—ASAFO BABAOO lɛlɛŋ! Ni amɛyibɔ lɛ miiya hiɛ lolo.
21. (a) Yɛ mɛɛ gbɛ nɔ Nyɔŋmɔ webii lɛ anaabuamɔ yɛ Nuŋtsɔ lɛ gbi lɛ mli lɛ kɛ Yohane ninaa lɛ kpaa gbee kwraa yɛ? (b) Te fee tɛŋŋ ni gbalɛi komɛi ni he hiaa bɔi mlibaa?
21 No hewɔ lɛ Nyɔŋmɔ webii anaabuamɔ yɛ Nuŋtsɔ lɛ gbi lɛ nɔ lɛ kɛ Yohane ninaa lɛ kpaa gbee kwraa: klɛŋklɛŋ lɛ 144,000 lɛ ateŋ mɛi ni eshwɛ lɛ anaabuamɔ; kɛkɛ lɛ asafo babaoo lɛ anaabuamɔ. Taakɛ Yesaia gba efɔ shi lɛ, amrɔ nɛɛ, yɛ “naagbee gbii lɛ amli” nɛɛ, gbɔmɛi ni jɛ jeŋmaji fɛɛ mli miiho yuu koni amɛyana Yehowa jamɔ krɔŋŋ lɛ mli gbɛfaŋnɔ. Ni yɛ anɔkwale mli lɛ, wɔmli filiɔ wɔ kɛ hiɛsɔɔ yɛ “ŋwɛi hee kɛ shikpɔŋ hee” ni Yehowa bɔɔ lɛ hewɔ. (Yesaia 2:2-4; 65:17, 18) Nyɔŋmɔ miibua “nibii fɛɛ [naa] eto yitso kome shishi yɛ Kristo mli, nii ni yɔɔ ŋwɛi kɛ nii ni yɔɔ shikpɔŋ lɛ nɔ lɛ fɛɛ, yɛ emli.” (Efesobii 1:10) Ŋwɛi Maŋtsɛyeli lɛ mli niyelɔi ni afɔ amɛ mu lɛ—ni ahala amɛ kɛtsɔ afii ohai abɔ lɛ amli kɛjɛ Yesu gbii lɛ amli lɛ—ji “nii ni yɔɔ ŋwɛi” lɛ. Ni agbɛnɛ, asafo babaoo lɛ ni ji toi krokomɛi lɛ pueɔ akɛ “nii ni yɔɔ shikpɔŋ lɛ nɔ lɛ” shishijee bii. Nakai gbɛjianɔtoo lɛ ni ooosɔmɔ yɛ he yɛ gbeekpamɔ naa lɛ baanyɛ atsɔ naanɔ miishɛɛ aha bo.
Asafo Babaoo lɛ Jɔɔmɔi
22. Mɛɛ saji krokomɛi Yohane nine shɛ nɔ yɛ asafo babaoo lɛ ahe?
22 Yohane tsɔ ŋwɛi adafitswaa gbɛ lɛ nɔŋŋ nɔ ni enine shɛ saji krokomɛi ni kɔɔ asafo babaoo nɛɛ he lɛ anɔ: “Ni [onukpa lɛ] ekɛɛ mi akɛ: Mɛnɛɛmɛi ji mɛi ni jɛ amanehulu kpeteŋkpele lɛ mli lɛ, ni amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli. No hewɔ ni amɛyɔɔ Nyɔŋmɔ maŋtsɛsɛi lɛ hiɛ, ni amɛjaa lɛ nyɔɔŋ kɛ shwane yɛ esɔlemɔtsu lɛ mli lɛ; ni mɔ ni ta maŋtsɛsɛi lɛ nɔ lɛ aaashi ebuu lɛ eto amɛnɔ.”—Kpojiemɔ 7:14b, 15.
23. Mɛni ji amanehulu babaoo ni asafo babaoo lɛ ‘jeɔ kpo kɛjɛɔ mli’ lɛ?
23 Yɛ be ko ni tsɔ enɛ hiɛ lɛ mli lɛ, Yesu ekɛɛ akɛ nɔ ni baajɛ ba ni eba yɛ Maŋtsɛyeli anunyam mli lɛ mli aba yɛ naagbee ji “amanehulu babaoo . . . ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ.” (Mateo 24:21, 22) Yɛ nakai gbalɛ lɛ mlibaa mli lɛ, ŋwɛibɔfoi lɛ baaŋmɛɛ shikpɔŋ lɛ nɔ kɔɔyɔi ejwɛ lɛ ahe koni amɛkpata Satan jeŋ gbɛjianɔtoo lɛ hiɛ. Klɛŋklɛŋ nii ni baaya ji Babilon Kpeteŋkpele, jeŋ apasa jamɔ maŋtsɛyeli lɛ. Kɛkɛ lɛ, yɛ amanehulu lɛ naagbee ni mli wa fe fɛɛ lɛ, Yesu baahere 144,000 lɛ mli bii ni amɛshwɛ yɛ shikpɔŋ nɔ lɛ, kɛ asafo babaoo lɛ fɛɛ yiwala.—Kpojiemɔ 7:1; 18:2.
24. Aŋkroaŋkroi ni yɔɔ asafo babaoo lɛ mli lɛ ahe saa kɛhaa yibaamɔ yɛ mɛɛ gbɛ nɔ?
24 Te feɔ tɛŋŋ ni aŋkroaŋkroi ni jɛ asafo babaoo lɛ ateŋ lɛ ahe saa kɛhaa yibaamɔ? Onukpa lɛ kɛɛ Yohane akɛ “amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli.” Yɛ gbɛ kroko nɔ lɛ, amɛtsɔɔ hemɔkɛyeli yɛ Yesu mli akɛ Kpɔlɔ lɛ, amɛjɔɔ amɛhe nɔ amɛha Yehowa, ni amɛkɛ nu mli baptisimɔ efee amɛhenɔjɔɔmɔ lɛ he okadi, ni amɛhiɛ “henilee kpakpa” mli yɛ amɛjeŋba ni ja lɛ hewɔ. (1 Petro 3:16, 21; Mateo 20:28) No hewɔ lɛ, amɛhe tse ni amɛja yɛ Yehowa hiɛ. Ni amɛtsiɔ amɛhe kɛjɛɔ je lɛ he koni ‘amɛkawo amɛhe muji.’—Yakobo 1:27.
25. (a) Asafo babaoo lɛ miisɔmɔ Yehowa “nyɔɔŋ kɛ shwane yɛ esɔlemɔtsu lɛ mli” yɛ mɛɛ gbɛ nɔ? (b) Yehowa ‘shiɔ ebuu lɛ etoɔ’ asafo babaoo lɛ ‘anɔ’ yɛ mɛɛ gbɛ nɔ?
25 Kɛfata he lɛ, amɛbatsɔmɔɔ Yehowa Odasefoi ni yɔɔ ekaa—“amɛjaa lɛ nyɔɔŋ kɛ shwane yɛ esɔlemɔ tsu lɛ mli.” Ani oji asafo babaoo ni amɛjɔɔ amɛhe nɔ nɛɛ ateŋ mɔ kome? Kɛji nakai ni lɛ, eji hegbɛ ni ona akɛ ooosɔmɔ Yehowa ni oŋmɛɛɛ he yɛ emumɔŋ sɔlemɔtsu kpeteŋkpele lɛ shikpɔŋ nɔ kpo lɛ nɔ. Ŋmɛnɛ, asafo babaoo lɛ miitsu odaseyeli nitsumɔ lɛ titri yɛ mɛi ni afɔ amɛ mu lɛ agbɛtsɔɔmɔ shishi. Yɛ heloo gbɛfaŋ nitsumɔi fɛɛ asɛɛ lɛ, amɛteŋ mɛi akpei ohai abɔ eto gbɛjianɔ amɛha be fɛɛ sɔɔmɔ lɛ akɛ gbɛgbalɔi. Shi kɛji akɛ oyɛ nakai kuu lɛ mli aloo obɛ mli hu lɛ, akɛ asafo babaoo lɛ mlinyo ni ojɔɔ ohe nɔ lɛ, omli baanyɛ afili bo akɛ yɛ ohemɔkɛyeli kɛ onitsumɔi ahewɔ lɛ, abuo jalɔ akɛ Nyɔŋmɔ shieŋtsɛ ni ahere bo atuu kɛba ekpee buu lɛ mli. (Lala 15:1-5; Yakobo 2:21-26) No hewɔ lɛ Yehowa ‘lɛɛɔ ebuu’ lɛ mli ehaa mɛi ni sumɔɔ lɛ lɛ anɔ, ni akɛ gbɔfeelɔ kpakpa lɛ, ebuɔ amɛhe.—Abɛi 18:10.
26. Mɛɛ jɔɔmɔi krokomɛi asafo babaoo lɛ baana mli gbɛfaŋnɔ?
26 Onukpa lɛ tee nɔ akɛ: “Hɔmɔ yeŋ amɛ dɔŋŋ, ni kumai hu yeŋ amɛ dɔŋŋ, ni asaŋ hulu loo latsaa ko esaŋ amɛhe dɔŋŋ; ejaakɛ Toobi lɛ ni yɔɔ maŋtsɛsɛi lɛ teŋ lɛ aaalɛ amɛ, ni eeetsɔɔ amɛ gbɛ kɛaatee wala nu bui ahe, ni Nyɔŋmɔ aaatsumɔ amɛhiɛaŋ yaafonui fɛɛ.” (Kpojiemɔ 7:16, 17) Hɛɛ, Yehowa ji gbɔfeelɔ ni mli hi diɛŋtsɛ! Shi te shishinumɔ ni yɔɔ nɛkɛ wiemɔi nɛɛ amli lɛ mli kwɔ ha tɛŋŋ?
27. (a) Yesaia gba nɔ ko ni tamɔ onukpa lɛ wiemɔi lɛ yɛ mɛɛ gbɛ nɔ? (b) Mɛni tsɔɔ akɛ Yesaia gbalɛ lɛ mlibaa je shishi yɛ Kristofoi asafo lɛ nɔ yɛ Paulo gbii lɛ amli?
27 Nyɛhaa wɔsusua gbalɛ ko ni emli wiemɔi tamɔ enɛ lɛ he: “Bɔ ni Yehowa kɛɛ nɛ: Be ni sa mli miboo toi yɛ, ni yiwalaheremɔ gbi lɛ nɔ hu miye mibuao yɛ. . . Hɔmɔ yeŋ amɛ, ni kumai hu yeŋ amɛ, ni shia ŋa ni nɔ edɔ loo hulu esaŋ amɛhe; ejaakɛ mɔ ni musuŋ tsɔɔ lɛ yɛ amɛhe lɛ aaawa amɛ, ni eeetsɔɔ amɛ gbɛ kɛaatee nu bui ahe.” (Yesaia 49:8, 10; kwɛmɔ Lala 121:5, 6 hu.) Bɔfo Paulo ŋɔ nɛkɛ gbalɛ nɛɛ mli wiemɔi lɛ eko ni ekɛto “yiwalaheremɔ gbi” lɛ ni je shishi yɛ Pentekoste afi 33 Ŋ.B. lɛ he. Eŋma akɛ: “Ejaakɛ [Yehowa] ekɛɛ akɛ: ‘Be ni sa mli miboo toi yɛ, ni walaheremɔ gbi nɔ hu miye mibuao yɛ.’ Naa, be ni sa jogbaŋŋ nɛ; naa, walaheremɔ gbi nɛ.”—2 Korintobii 6:2.
28, 29. (a) Yesaia wiemɔi lɛ ba mli yɛ klɛŋklɛŋ afii oha lɛ mli yɛ mɛɛ gbɛ nɔ? (b) Wiemɔi ni yɔɔ Kpojiemɔ 7:16 lɛ baa mli yɛ asafo babaoo lɛ anɔ yɛ mɛɛ gbɛ nɔ? (d) Mɛni baajɛ asafo babaoo lɛ ni anyiɛɔ amɛhiɛ kɛyaa “wala nu bui ahe” lɛ mli aba? (e) Mɛni hewɔ asafo babaoo lɛ baafee gbɔmɛi sɔrɔtoi yɛ adesai ateŋ lɛ?
28 Mɛni ji nɔ ni shiwoo akɛ hɔmɔ yeŋ amɛ loo kumai hu yeŋ amɛ ni hulu eshaŋ amɛ lɛ kɔɔ he yɛ no be lɛ mli? Eka shi faŋŋ akɛ, hɔmɔ kɛ kumai diɛŋtsɛ ye Kristofoi ni hi shi yɛ klɛŋklɛŋ afii oha lɛ mli lɛ yɛ bei komɛi amli. (2 Korintobii 11:23-27) Shi yɛ mumɔŋ gbɛfaŋ lɛ, amɛyɛ nii babaoo. Aha amɛ nibii babaoo kɛteke nɔ, no hewɔ lɛ mumɔŋ nibii ahe hɔmɔ loo kumai yeee amɛ. Agbɛnɛ, Yehowa haaa emlifu lɛ mli la lɛ asha amɛ beni ekpata Yudafoi anibii agbɛjianɔtoo lɛ hiɛ yɛ afi 70 Ŋ.B. lɛ. Wiemɔi ni yɔɔ Kpojiemɔ 7:16 lɛ hu baa mli yɛ mumɔŋ kɛhaa asafo babaoo lɛ ni yɔɔ ŋmɛnɛ lɛ. Amɛkɛ Kristofoi ni afɔ amɛ mu lɛ fɛɛ naa mumɔŋ niyenii babaoo mli ŋɔɔmɔ.—Yesaia 65:13; Nahum 1:6, 7.
29 Kɛ oji nakai asafo babaoo lɛ mli bii lɛ ateŋ mɔ kome lɛ, shihilɛ ni hi ni otsui yɔɔ mli lɛ baaha “obolɔ kɛ nyamɔ,” ní nɔ ni obaaŋmɛ otsui shi yɛ mli kɛtsɔ nibii ni onaa kɛ nɔnyɛɛ ni baa yɛ Satan gbɛjianɔtoo nɛɛ afii lɛ amli lɛ kɔɔɔ he eko. (Yesaia 65:14) Yɛ nakai shishinumɔ naa lɛ, amrɔ nɛɛ po Yehowa baanyɛ ‘atsumɔ ohiŋmɛiaŋ yaafo nui fɛɛ.’ Nyɔŋmɔ “hulu” ni naa wa ni ji efɔbuu kojomɔ lɛ woŋ ohe gbeyei, ni kɛ aŋmɛɛ hiɛkpatamɔ kɔɔyɔi ejwɛ lɛ ahe lɛ, abaabaa oyi kɛjɛ Yehowa mlifu lɛ mli ‘la ni shaa nii’ lɛ mli. Beni nakai hiɛkpatamɔ lɛ eho lɛ, Toobi lɛ baanyiɛ ohiɛ bɔni afee ni “wala nu bui” ni wajeɔ mɔ ni damɔ shi kɛha gbɛjianɔ fɛɛ ni Yehowa eto koni ona naanɔ wala lɛ he aba sɛɛnamɔ aha bo. Abaabu hemɔkɛyeli ni ona yɛ Toobi lɛ la lɛ mli lɛ bem akɛni aaawo onɔ fiofio kɛyashɛ adesa emuuyeli mli hewɔ. Bo ni ofata asafo babaoo lɛ he lɛ baafee mɔ sɔrɔto yɛ adesai ateŋ akɛ “akpekpei” abɔ ni ehe ebahiaaa ni amɛgboi lɛ ateŋ mɔ kome! Yɛ shishinumɔ ni yeɔ emuu naa lɛ, no mli lɛ atsumɔ yaafo nui fɛɛ kɛjɛ ohiŋmɛiaŋ.—Kpojiemɔ 21:4.
Tsɛmɔ lɛ nɔ Mi ni Oooma
30. Mɛni nibii sɔrɔtoi pii ni yɔɔ naakpɛɛ ni baaba he ninaa agbeleɔ naa ahaa wɔ yɛ Yohane ninaa lɛ mli, ni namɛi “baanyɛ shi adamɔ”?
30 Mɛɛ nibii sɔrɔtoi babaoo ni baaba ni yɔɔ naakpɛɛ lɛ ahe ninaa nɛkɛ wiemɔi nɛɛ gbeleɔ naa kɛhaa wɔ nɛkɛ! Yehowa diɛŋtsɛ ta emaŋtsɛsɛi nɔ, ni etsuji fɛɛ, ni yɔɔ ŋwɛi kɛ shikpɔŋ nɔ, efee ekome kɛmiijie eyi. Eshikpɔŋ nɔ tsuji lɛ yɔseɔ hegbɛ ni yɔɔ naakpɛɛ ni amɛna akɛ amɛaana yijiemɔ gbee ni jijeɔ nɛɛ mli gbɛfaŋnɔ. Etsɛŋ kwraa, Yehowa kɛ Kristo Yesu baatsu fɔbuu kojomɔ he nii, ni abaanu bolɔmɔ ni ji: “Emlifu gbi wulu lɛ eshɛ, ni namɔ aaanyɛ shi adamɔ?” lɛ he. (Kpojiemɔ 6:17) Ni hetoo lɛ hu? Adesai ateŋ mɛi fioo ko pɛ, ni 144,000 lɛ ni asɔo amɛnaa lɛ ateŋ mɔ fɛɛ mɔ ni ekolɛ eyɔɔ heloo mli lolo yɛ shikpɔŋ nɔ lɛ kɛ asafo babaoo lɛ ni ji toi krokomɛi lɛ pɛ “baanyɛ shi adamɔ,” ni ji akɛ, amɛkɛ amɛ baaje mli.—Yeremia 35:19; 1 Korintobii 16:13.
31. Te esa akɛ Yohane ninaa lɛ mlibaa asa Kristofoi ni ji mɛi ni afɔ amɛ mu lɛ kɛ asafo babaoo lɛ ahe aha tɛŋŋ?
31 Yɛ anɔkwa sane nɛɛ hewɔ lɛ, Yohane kuu lɛ mli bii ni ji Kristofoi ni afɔ amɛ mu lɛ miaa amɛhiɛ waa ni amɛmiitiu “oti lɛ kɛyashɛ Nyɔŋmɔ tsɛmɔ ni jɛ ŋwɛi yɛ Kristo Yesu mli lɛ he jweremɔ nɔ lɛ he.” (Filipibii 3:14) Amɛle jogbaŋŋ akɛ saji ni yaa nɔ yɛ nɛkɛ gbii nɛɛ amli lɛ biɔ tsuishiŋmɛɛ krɛdɛɛ yɛ amɛgbɛfaŋ. (Kpojiemɔ 13:10) Yɛ be mli ni amɛkɛ anɔkwayeli esɔmɔ Yehowa afii babaoo lɛ, amɛmɔɔ amɛhemɔkɛyeli lɛ mli kpɛŋŋ, amɛmli filiɔ amɛ akɛ “aŋmala” amɛgbɛi “yɛ ŋwɛi.” (Luka 10:20; Kpojiemɔ 3:5) Mɛi ni jɛ asafo babaoo lɛ ateŋ lɛ hu le akɛ “mɔ ni hiɛɔ mli kɛyawulaa shi lɛ, lɛ aaahere eyiwala.” (Mateo 24:13) Yɛ be mli ni ákɛ kuu lɛ, akadi asafo babaoo lɛ koni amɛje amanehulu kpeteŋkpele lɛ mli lɛ, esa akɛ aŋkroaŋkroi ni yɔɔ mli lɛ amia amɛhiɛ ni amɛhi shi akɛ mɛi ni he tse ni yɔɔ ekaa kɛ nitsumɔ.
32. Mɛɛ shihilɛ ko ni he hiaa anɔkwale ni eji akɛ kui enyɔ pɛ “baanyɛ shi adamɔ” yɛ Yehowa mlifu gbi lɛ nɔ lɛ maa nɔ mi?
32 Odaseyeli ko bɛ ni tsɔɔ akɛ yɛ nɛkɛ kui enyɔ nɛɛ asɛɛ lɛ kuu kroko ko yɛ ni “baanyɛ shi adamɔ” yɛ Yehowa mlifu gbi lɛ nɔ. Mɛni ji nɔ ni enɛ tsɔɔ kɛhaa akpekpei abɔ ni daa afi lɛ amɛjieɔ bulɛ ko kpo amɛhaa Yesu afɔleshaa lɛ kɛtsɔɔ egbele lɛ Kaimɔ lɛ shishi ni amɛbaa, shi kɛlɛ amɛtsɔko hemɔkɛyeli yɛ Yesu afɔleshaa lɛ mli kɛyashɛko he ni amɛaafee mɛi ni amɛjɔɔ amɛhe nɔ, Yehowa tsuji ni abaptisi amɛ, ni yɔɔ ekaa yɛ esɔɔmɔ lɛ mli lɛ hu? Kɛfata he lɛ, mɛi ni tsutsu ko lɛ amɛyɔɔ ekaa shi agbɛnɛ amɛŋmɛ gbɛ ni ‘haomɔi ehe amɛtsuii’ lɛ hu? Eba akɛ mɛnɛɛmɛi fɛɛ aaahɛle shi, ni amɛhiɛ atsɛ, bɔni afee ni ‘amɛnyɛ nii ni baaba nɛɛ fɛɛ mli amɛje, ni amɛnyɛ gbɔmɔbi lɛ’—Yesu Kristo—hiɛ amɛdamɔ. Be lɛ faaa!—Luka 21:34-36.
[Shishigbɛ niŋmai]
a Kwɛmɔ New World Translation Reference Bible, shishigbɛ niŋmaa.
b The Watch Tower, April 1, 1918, baafa 98.
c Kɛ aawie pɔtɛɛ lɛ, “yɛ ehiɛ,” The Kingdom Interlinear Translation of the Greek Scriptures.
[Akrabatsa ni yɔɔ baafa 119]
Shishitsɔɔmɔ lɛ Nyɔŋmɔ Nɔŋ
Afii nyɔŋma-nyɔŋmai abɔ ho ni Yohane kuu lɛ miibi mɛi ni asafo babaoo lɛ ji, shi amɛnaaa hetoo ko ni haa mɔ tsui nyɔɔ emli. Mɛni hewɔ? Wɔnaa hetoo lɛ yɛ Yosef anɔkwafo lɛ wiemɔi amli, beni ekɛɛ: “Ani shishitsɔɔmɔ lɛ jeee Nyɔŋmɔ nɔŋ?” (1 Mose 40:8) Mɛɛ be ni yɛ mɛɛ gbɛ nɔ Nyɔŋmɔ tsɔɔ egbalɛi amlibaa shishi? Yɛ bei babaoo mli lɛ beni amɛmlibaa be eshɛ aloo amɛmiiba mli bɔni afee ni tsuji ni pɛiɔ saji amli lɛ anu saji lɛ ashishi yɛ faŋŋ mli. Akɛ shishinumɔ nɛɛ haa kɛha “wɔhe nitsɔɔmɔ . . . koni wɔkɛ tsuishiŋmɛɛ kɛ ŋmalɛi lɛ amli miishɛjemɔ lɛ ana hiɛnɔkamɔ.”—Romabii 15:4.
[Akrabatsa ni yɔɔ baafa 124]
Asafo babaoo lɛ mli bii
▪ amɛbaa kɛjɛɔ jeŋmaji kɛ wekui kɛ gbɔmɛi kɛ wiemɔi fɛɛ mli
▪ amɛdamɔ Yehowa maŋtsɛsɛi lɛ hiɛ
▪ amɛfɔ amɛtadei ahe ni eyɛ futaa yɛ Toobi lɛ la lɛ mli
▪ amɛkɛɔ akɛ amɛyiwalaheremɔ jɛ Yehowa kɛ Yesu
▪ amɛbaa kɛjɛɔ amanehulu kpeteŋkpele lɛ mli
▪ amɛsɔmɔɔ Yehowa yɛ esɔlemɔtsu lɛ mli nyɔɔŋ kɛ shwane
▪ amɛnine shɛɔ Yehowa suɔmɔ kwɛmɔ kɛ hebuu nɔ
▪ Yesu nyiɛɔ amɛhiɛ kɛyaa wala nu bui ahe
[Baafa muu mfoniri ni yɔɔ baafa 121]
[Mfoniri ni yɔɔ baafa 127]
Asafo babaoo lɛ yiwalaheremɔ jɛ Nyɔŋmɔ kɛ Toobi lɛ
[Mfoniri ni yɔɔ baafa 128]
Toobi lɛ baanyiɛ asafo babaoo lɛ hiɛ kɛya wala nu bui ahe